Merħba għas-sit tal-Kumitat għall-Kultura u l-Edukazzjoni. Hawnhekk se ssib tagħrif dwar il-ħidma tagħna - pereżempju, l-aġendi tal-laqgħat tagħna li jmiss, jew l-abbozzi tar-rapporti u l-emendi għalihom - u tagħrif dwar il-Membri tal-Kumitat, sabiex tkun tista' tikkuntattjahom direttament. Tista' wkoll issegwi l-laqgħat tal-Kumitat waqt li jkunu għaddejjin, permezz ta' streaming dirett fuq l-internet.
Fil-Parlament, il-Kumitat hu responsabbli għall-edukazzjoni, il-kultura, iż-żgħażagħ, l-isport u l-aspetti kulturali u edukattivi tal-politika medjatika tal-UE. Għandu rwol indaqs għal dak tal-gvernijiet tal-Istati Membri fl-adozzjoni ta' liġijiet ġodda u s-sorveljanza tal-programmi tal-UE f'dawn l-oqsma. Dawn jinkludu l-Programm ta' Tagħlim Tul il-Ħajja, li jħallas għall-programm Erasmus għall-iskambju tal-istudenti, il-programm Kultura 2007, li jappoġġja l-Kapitali Kulturali Ewropej, u l-programm Media 2007, li għen fil-finanzjament għall-produzzjoni ta' għadd ta' films Ewropej ta' suċċess, bħal Slumdog Millionaire. Il-Kumitat regolarment jorganizza wkoll seduti ta' smigħ pubbliku biex jiġbor evidenza minn esperti dwar aspetti ta' ħidmietu.
Jiena kburi li nippresiedi dan il-Kumitat u nittama li dan is-sit se jkun ta' għajnuna biex tkun tista' ssegwi aktar faċilment l-attività tiegħu.
Doris Pack
President, Kumitat għall-Kultura u l-Edukazzjoni
