Id-Delegazzjoni tal-Parlament Ewropew għar-relazzjonijiet mal-Belarus, imwaqqfa fl-1994, attwalment m'għandhiex relazzjonijiet uffiċjali mal-parlament jew il-gvern tar-reġim fil-Belarus, minħabba n-nuqqas tiegħu li jmexxi elezzjonijiet ħielsa u ġusti, li jistabbilixxi l-istat tad-dritt u li jirrispetta d-drittijiet tal-bniedem u l-libertajiet fundamentali għall-poplu fil-Belarus.
Madankollu, id-delegazzjoni żżomm djalogu attiv u mill-qrib mar-rappreżentanti ta' l-oppożizzjoni demokratika, ma' l-organizzazzjonijiet mhux governattivi indipendenti u mas-soċjetà ċivili tal-Belarus.
Minħabba li ripetutament ġiet miċħuda minn visas għad-dħul mill-awtoritajiet f'Minsk, id-delegazzjoni ma setgħatx tivvjaġġja lejn il-Belarus f'dawn l-aħħar snin, madankollu tiltaqa' b'mod regolari fi Brussell u fi Strasburgu biex tiddiskuti l-iżviluppi fil-politika ta' l-UE lejn il-Belarus, biex tevalwa l-qagħda politika u ekonomika fil-Belarus u kif ukoll biex tipprovdi rakkomandazzjonijiet lill-Kunsill ta' l-UE u lill-Kummissjoni Ewropea dwar passi ulterjuri eventwali biex tittejjeb il-qagħda tad-demokrazija, id-drittijiet tal-bniedem u l-istat tad-dritt fil-Belarus u biex dan il-pajjiż ġar importanti jitressaq aktar qrib lejn l-UE.
