MOZZJONI GĦAL RIŻOLUZZJONI għal involviment aktar importanti tal-parlamenti nazzjonali fit-traspożizzjoni tad-Direttivi Ewropej
3.4.2018
Joëlle Mélin
B8-0228/2018
Mozzjoni għal riżoluzzjoni tal-Parlament Ewropew għal involviment aktar importanti tal-parlamenti nazzjonali fit-traspożizzjoni tad-Direttivi Ewropej
Il-Parlament Ewropew,
– wara li kkunsidra l-Artikolu 288 tat-Trattat dwar il-Funzjonament tal-Unjoni Ewropea[1],
– wara li kkunsidra l-Artikolu 133 tar-Regoli ta' Proċedura tiegħu,
A. billi t-traspożizzjoni tad-Direttivi Ewropej hija ta' importanza partikolari fl-ordinament ġuridiku tal-UE;
B. billi huwa wara li jiġu trasposti d-direttivi li d-deċiżjonijiet meħuda fi Brussell jsiru vinkolanti fuq l-Istati Membri;
C. billi 14-17 % biss tat-traspożizzjonijiet jitwettqu permezz tal-parlamenti nazzjonali, u l-bqija mill-awtoritajiet eżekuttivi[2];
1. Jistieden lill-Istati Membri, fil-qafas tas-sistema legali proprja tagħhom, jippromwovu r-rwol tal-parlamenti nazzjonali tagħhom;
2. Iħeġġeġ lill-Kummissjoni tappoġġja l-azzjonijiet kollha favur involviment akbar tal-parlamenti nazzjonali fit-traspożizzjoni tad-Direttivi Ewropej;
3. Jagħti istruzzjonijiet lill-President tiegħu biex jgħaddi din ir-riżoluzzjoni lill-Kummissjoni, lill-Kunsill u lill-Istati Membri.
- [1] L-Artikolu 288 tat-Trattat dwar il-Funzjonament tal-Unjoni Ewropea jistipula li l-korpi nazzjonali huma marbuta biss bir-riżultat li jridu jilħqu, iżda huma liberi bil-mezzi u l-forma li jixtiequ jużaw biex jiksbu l-objettiv tad-Direttiva.
- [2] L. K. Perez, National Parliamentary Involvement in EU Policy-Making: Questions, Resolutions and Transposition ,2016. p. 145.