Artikolu 194 : Rapporti Verbatim (1)

1.   Għandu jsir rapport verbatim tad-diskussjonijiet ta' kull seduta bħala dokument multilingwi li fih jidhru l-kontribuzzjonijiet orali kollha bil-lingwa oriġinali uffiċjali.

2.   Mingħajr preġudizzju għas-setgħat dixxiplinarji l-oħra tiegħu, il-President jista' jordna li d-diskorsi ta' Membri li ma jkunx tahom il-kelma jew li jkomplu jitkellmu aktar mill-ħin mogħti lilhom jitħassru mir-rapporti verbatim tad-dibattiti.

3.   Il-kelliema jistgħu jagħmlu korrezzjonijiet għat-test ittajpjat tal-kontribuzzjonijiet orali tagħhom fi żmien ħamest ijiem ta' xogħol. Il-korrezzjonjiet għandhom jintbagħtu sal-iskadenza lis-Segretarjat.

4.   Ir-rapport verbatim multilingwi għandu jkun ippubblikat bħala anness ma' Il-Ġurnal Uffiċjali tal-Unjoni Ewropea u għandu jinżamm fl-arkivji tal-Parlament.

5.   Għandha ssir traduzzjoni bi kwalunkwe lingwa uffiċjali ta' silta mir-rapport verbatim fuq talba minn Membru. Jekk ikun meħtieġ, it-traduzzjoni għandha tingħata fi żmien qasir.