L-Estonja ddaħħal l-Ewro

Fl-1 ta' Jannar 2011 l-ewro jieħu post il-kroon fl-Estonja. Dan in-nazzjon Baltiku issa ser ikollhu l-istess munita ta' aktar minn 330 miljun ruħ fi 17 l-Istat Membru tal-Unjoni Ewropea.

Il-President tal-PE Jerzy Buzek qal li s-sena l-ġdida ser tkun "kisba kbira" għall-Estonja, li fl-aħħar ser tingħaqad maż-żona tal-ewro. Hu kompla li "dan hu riżultat l-impenn qawwi tal-Estonja biex tikkonforma mal-istandards meħtieġa u biex twitti t-triq għal futur prosperu għaċ-ċittadini tagħha. "

L-Estonja issa ser ikollha l-istess munita bħall-Awstrija, il-Belġju, Ċipru, il-Finlandja, Franza, il-Ġermanja, il-Greċja, l-Irlanda, l-Italja, il-Lussemburgu, Malta, l-Olanda, il-Portugall, is-Slovakkja, is-Slovenja u Spanja.

{}Ser ikun hemm perjodu ta' ċirkolazzjoni doppja għall-ewwel nofs ta' Jannar li matulu ż-żewġ muniti se jiċċirkolaw sabiex jippermettu l-irtirar gradwali ta' kroons Estonjani.

Il-muniti tal-ewro ser ikollhom naħa komuni (li turi immaġini tal-Unjoni Ewropea jew tal-Ewropa u tissimbolizza l-għaqda tal-UE) u naħa nazzjonali. Id-disinn għan-naħa nazzjonali tal-muniti tal-Estonja hi xbieha ġeografika tal-Estonja u l-kelma "Eesti" (li tfisser "Estonja").

Il-munita unika Ewropea inħoloqot fl-1999 (karti tal-flus u muniti ġew introdotti fl-2002). Id-Danimarka u r-Renju Unit għandhom klawżola "opt-out" li tippermettilhom li jibqgħu barra miż-żona tal-ewro, filwaqt li l-bqija (ħafna mill-membru l-ġdid flimkien ma l-Iżvezja) huma mistennija li jidħlu fiż-żona euro fis-snin li ġejjin, billi jissodisfaw il-kondizzjonijiet meħtieġa dwar ir-rati ta' inflazzjoni, il-finanzi tal-gvern, rati tal-kambju u rati tal-imgħax għal terminu twil.