L-Ewropa għandha bżonn sħubija ta' vera mal-Eġittu

Dan kliem is-Sur James Moran, il-kap il-ġdid tad-Delegazzjoni tal-UE għall-Eġittu, li jixtieq jiżviluppa sħubija ta' vera ma' dan il-pajjiż sabiex iż-żewġ naħat imorru lil hinn mill-perċezzjonijiet superfiċjali li jistgħu jħaddnu fuq xulxin. "Jekk aħna narawhom bħala nies li dejjem nagħtuhom l-għajnuna, huma jittratawna bħala xi ħadd li jindaħal fl-affarijiet interni tagħhom - hemm bżonn li mmorru lil hinn minn din il-mentalità" hu qal waqt intervista.

Is-Sur Moran inħatar fil-kariga l-ġdida tiegħu f'Diċembru, u ġie l-Parlament Ewropew biex jaqsam xi fehmiet mal-MEPs fuq l-isfidi li għandu quddiemu l-Eġittu, u r-rwol tal-UE qabel ma jibda x-xogħol f'dan il-qasam.

Sitwazzjoni kkumplikata, imma mimlija tama

Skont is-Sur Moran, bħalissa s-sitwazzjoni fl-Eġittu hi waħda "kkumplikata, li qed titħarrek u li hi dinamika, imma xorta hi waħda mimlija tama". Hu qal li "saret elezzjoni li kienet l-aqwa elezzjoni li qatt saret f'dawn l-aħħar snin fl-Eġittu. Naf li ma konniex hemm biex nosservaw - kemm l-Unjoni Ewropea, kif ukoll il-komunità internazzjonali - imma għalkemm ma tistax tgħid li kienet perfetta, marret tajjeb ħafna hu wieħed jista' jgħid li r-riżultati huma kredibbli… mhux kulħadd għoġbu r-riżultat, imma dik hi n-natura tad-demokrazija".

Is-Sur Moran qal li x-xogħol li fadal hu dak li "naħdmu flimkien mal-atturi" fid-dinja emerġenti tal-politika Eġizzjana. Min-naħa l-oħra hu semma kwistjonijiet li ġew imressqa wkoll waqt is-smigħ tal-Parlament dwar id-drittijiet tal-bniedem fuq ir-rwol tal-armata u s-sitwazzjoni ekonomika u politika tal-pajjiż li hemm bżonn tiġi indirizzata.

Il-paċenzja hi l-aktar ħaġa importanti

Meta tkellem dwar il-futur tal-Eġittu, is-Sur Moran irrimarka li t-tibdil li seħħ wara l-avvenimenti f'Pjazza Tahrir taw "ħafna tamiet u ħafna frustrazzjonijiet" kemm għall-Eġittu, kemm għall-komunità internazzjonali.". Il-fatt hu li ddum ħafna biex tagħmel din it-tip ta' transizzjoni meta wieħed iżomm f'moħħu li għal sittin sena t-tip ta' politika u t-tip ta' gvern li kellha l-Eġittu kienu differenti ħafna minn dawk li qed jaspiraw għalihom issa. B'hekk naħseb li hemm bżonn naqra paċenzja hekk kif isibu mezz kif jimxu 'l quddiem".

L-Istrateġija tal-UE

Is-Sur Moran jgħid li l-istrateġija tal-UE għall-Eġittu hi waħda ċara u msejsa fuq ħidma kontinwa.

Skont Moran, il-bżonnijiet li għandha l-Eġittu huma dawl finanzjarji, ta' mobilità u ta' aċċess għas-suq. Moran qal li "hemm bżonn nadattaw dawn il-bżonnijiet għas-sitwazzjoni Eġizzjana".