Dak kollu li dejjem ridt tkun taf dwar l-interpreti fil-PE

Ilbieraħ kien imiss lit-tradutturi, illum inħarsu lejn il-ħajja ta’ kuljum tal-interpreti u r-rwol tagħhom fit-trasformazzjoni ta’ dibattiti, li jinkludu sa 23 lingwa, f’unità koerenti u komprensibbli. Bħala rappreżentanti taċ-ċittadini tal-UE eletti direttament huwa importanti li l-Membri tal-PE jkunu jistgħu jsegwu l-laqgħat fil-lingwa tagħhom stess u għalhekk ir-rwol tal-interpreti huwa wieħed ta’ importanza vitali.

 "Il-lingwa hija parti mill-identità tagħna, u hija ħafna iżjed minn sempliċement mezz ta’ komunikazzjoni, fil-fatt għalhekk huwa importanti li l-Membri tal-PE jitkellmu bil-lingwi tagħhom sabiex ikunu jistgħu jiddefendu bl-aħjar mod l-interessi tal-elettorat tagħhom u jitkellmu direttament maċ-ċittadini b’lingwa li jifhmuha. Dan il-miraklu rridu nagħmluh kuljum," qalet Olga Cosmidou, Direttur Ġenerali għall-Interpretazzjoni u l-Konferenzi.

Il-ħidma tal-interpreti

Hija qalet li l-interpreti jaħdmu f’ħin reali, u jridu jisimgħu u jitkellmu fl-istess ħin, għalhekk jisimgħu b’mod selettiv, filwaqt li jiffukaw fuq il-messaġġ iktar milli fuq il-kliem. "Il-prestazzjoni tal-interpreti hija bħal dik ta' akrobati f'ċirku minħabba li xogħolhom jagħmluh mingħajr ix-xibka ta' sikurezza, għax ladarba kelma tkun ħarġet, ma tistax tirtiraha, u għalhekk iridu jkunu ċerti sew minn dak li jkunu qed jagħmlu. L-għaġla hija wieħed mill-għedewwa prinċipali (iżda) dan huwa interessanti ħafna. Trid tkun tħobb dan l-istress pożittiv u l-adrenalina, u trid tkun taf tantiċipa wkoll."

L-interpreti jaħdmu sa żewġ xiftijiet ta’ tliet sigħat u nofs kuljum. Huma jħejju ruħhom billi jaqraw dokumenti relevanti fil-lingwi li jaħdmu bihom, sabiex jibqgħu aġġornati mat-tibdil u t-termini l-ġodda. Jaqraw ukoll l-aħbarijiet b'mod regolari u b’lingwi differenti, sabiex ikunu aġġornati fir-rigward tas-sitwazzjoni politika internazzjonali u l-aħħar żviluppi minħabba li dan jgħinhom jittrattaw il-firxa vasta ta’ suġġetti koperti fil-parlament.

Il-Parlament Ewropew – promotur tal-multilingwiżmu

Il-Parlament Ewropew jippromwovi l-multilingwiżmu, bil-garanzija ta’ interpreti għas-sessjonijiet plenarji, għal-laqgħat tal-korp governattiv u għall-kumitati u d-delegazzjonijiet, sakemm dan ikun possibbli. Dan huwa l-parlament l-iktar multilingwu u l-ikbar impjegatur ta’ interpreti fid-dinja. In-numru ta’ interpreti li jaħdmu fil-PE jvarja minn 350 waqt il-kumitati sa massimu ta’ 1000 waqt il-ġimgħat tal-plenarja fi Strasburgu. Il-PE għandu riżerva ta’ 4000 interpretu indipendenti li jista’ jagħmel użu minnhom skont il-ħtieġa.

L-interpreti jitkellmu l-lingwa materna tagħhom perfettament u jkunu profiċjenti sewwa ħafna f’minn tal-anqas żewġ lingwi oħra.

Kont taf?

L-interpretazzjoni tal-plenarja ssir minn 23 kabina għall-interpretar, li kull waħda jkun fiha 3 jew 4 interpreti. Il-kabini huma mgħammra b-iżolament akustiku, arja kkundizzjonata, dawl tajjeb u siġġijiet ergonomiċi, u minnhom l-interpreti jistgħu jaraw tajjeb il-kamra tal-laqgħa u b’hekk ikunu jistgħu jsegwu dak li jkun għaddej. L-udjenza tista’ tarahom imma huma qatt ma jkunu fiċ-ċentru tal-attenzjoni.

Hemm 506 kombinazzjoni lingwistika possibbli (23 x 22 lingwa), għalhekk kultant minflok interpretazzjoni diretta minn lingwa għal oħra, tintuża sistema "relay" fejn l-interpretar jgħaddi minn lingwa terza, "pivot" jew "relay".

B’differenza minn persunal ieħor tal-PE, l-interpreti m’għandhomx uffiċċju, bil-kompjuters u t-telefowns u għalhekk jingħatawlhom telefowns u laptops speċjali sabiex ikunu jistgħu jiġu kkuntattjati jekk ikun hemm xi tibdil fil-ħin u l-post tal-laqgħa għax l-interpreti qatt ma jistgħu jkunu tard. Il-laqgħa ma tkunx tista’ tibda mingħajrhom.

Trid issir interpretu?

Għandek bżonn lawrea u sentejn speċjalizzazzjoni fl-interpretar. Biex taħdem mal-PE trid tgħaddi wkoll minn kompetizzjoni iżda dan mhux biżżejjed – “teħtieġ karatteristiċi partikolari: trid tħobb tikkomunika, u trid tkun estrovert u kurjuż ħafna,” qalet Cosmidou.