L-inizjattiva "two-pack": inżidu s-sorveljanza baġitarja fiż-żona tal-euro

Attwalment il-PE qed jikkunsidra l-hekk imsejħa "two-pack", li hija żewġ proposti biex tiżdied id-dixxiplina finanzjarja fiż-żona tal-euro. Abbozzi ta' rapporti minn żewġ Membri tal-PE jipproponu li dawn jiġu emendati sabiex is-setgħat ta' sorveljanza tal-Kummissjoni jiġu kkontrollati iżjed mill-qrib u l-membri taż-żona tal-euro f'diffikultajiet finanzjarji jkunu jistgħu jitqiegħdu taħt protezzjoni legali bħalma jsir f'każ ta' falliment.

It-"two-pack" hija żvilupp tas-"six-pack", grupp ta' regolamenti dwar il-governanza ekonomika li daħlu fis-seħħ fit-13 ta' Diċembru 2011. L-għan tas-"six-pack" huwa li terġa' tistabbilixxi l-istabbiltà ekonomika fl-UE billi tnaqqas l-iżbilanċi makroekonomiċi u fil-kompetittività bejn l-Istati Membri kif ukoll billi toħloq regoli stretti dwar id-dejn pubbliku, l-infiq pubbliku sostenibbli u sorveljanza aħjar.

Il-Kummissjoni issa pproponiet it-"two-pack" sabiex iżżid is-sorveljanza tal-baġits nazzjonali tal-membri taż-żona tal-euro u jkollha aktar superviżjoni tal-pjanijiet għall-politika ekonomika ta' dawk li jinsabu f'diffikultajiet finanzjarji. Il-Parlament Ewropew u l-Kunsill issa jeħtiġilhom japprovaw iż-żewġ proposti u jaqblu dwar emendi possibbli. Huwa għalhekk li membri tal-Kumitat għall-Affarijiet Ekonomiċi u Monetarji tal-PE ressqu rapporti dwar kull wieħed miż-żewġ regolamenti proposti. Il-Kumitat mistenni jivvota dwar iż-żewġ regolamenti f'Mejju u ż-żewġ rapporti mbagħad jiffurmaw il-bażi għal aktar negozjati mal-Kunsill, li jirrappreżenta lill-gvernijiet nazzjonali.

Il-monitoraġġ tal-Kummissjoni

Ir-rapport dwar il-monitoraġġ tal-abbozzi tal-pjanijiet baġitarji tas-Soċjaldemokratika Portugiża Elisa Ferreira jappoġġja rwol aktar attiv għall-Kummissjoni iżda fl-istess ħin jitlob superviżjoni mill-qrib tas-setgħat superviżorji tagħha. Hija qalet li: "Jinħtieġ ċertu ribilanċjar tas-setgħat li jippermetti aktar sjieda nazzjonali u proċess demokratiku aħjar."

Il-pajjiżi li adottaw l-euro għandhom jikkonsultaw lill-Kummissjoni u lil membri oħra taż-żona tal-euro qabel ma jadottaw xi pjanijiet kbar ta' riforma tal-politika ekonomika u fiskali b'effetti mifruxa potenzjali. Għandhom iressqu l-pjanijiet tagħhom lill-Kummissjoni għal monitoraġġ qabel ma l-pjanijiet isiru vinkolanti. Madankollu, is-Sa Ferreira tgħid li l-Kummissjoni m'għandhiex awtomatikament tingħata s-setgħa li titlob lil pajjiż jibdel il-pjanijiet baġitarji tiegħu. Barra minn hekk, tenfasizza li skedi ta' żmien għat-tnaqqis tad-defiċits għandhom jiġu estiżi f'każijiet ta' tnaqqis kbir ħafna fir-ritmu ekonomiku sabiex jitħalla żmien biżżejjed biex jitħeġġeġ it-tkabbir.

Il-protezzjoni f'każ ta' falliment

Ir-rapport tal-Kristjandemokratiku Franċiż Jean-Paul Gauzès analizza l-proposta għat-tisħiħ tas-sorveljanza ekonomika u baġitarja tal-pajjiżi taż-żona tal-euro li qed jaffaċċjaw problemi finanzjarji kbar. Jiddikjara li l-Kummissjoni għandha tiddeċiedi li tqiegħed lil pajjiżi taħt protezzjoni legali, u mbagħad il-Kunsill ikollu għaxart ijiem biex jirrevoka din id-deċiżjoni. Ladarba jkun tqiegħed taħt protezzjoni bħal din, pajjiż ma jistax jiġi ddikjarat bħala inadempjenti, il-kredituri tiegħu jkun jeħtiġilhom jinnotifikaw l-identità tagħhom lill-Kummissjoni fi żmien xahrejn u l-imgħax fuq is-self jiġi ffriżat. Il-pajjiż inkwistjoni jkollu jressaq pjan dwar l-irkupru u s-saldu tad-dejn lill-Kummissjoni u jimplimenta miżuri xierqa.

Is-Sur Gauzès qal li regola bħal din tagħti aktar ċarezza f'xenarji li fihom il-pajjiż ikun wasal biex ikun inadempjenti. "Tipprovdi sostitut tajjeb għall-metodi ad hoc attwali li jvarjaw skont il-każ."