Schengen: il-MEPs jikkritikaw bl-aħrax il-Presidenza tal-Kunsill

L-MEPs qed jikkunsidraw jiftħu każ il-Qorti Ewropea tal-Ġustizzja kontra l-mossa tal-gvernijiet tal-UE biex, b'mod legali, jeskludu l-Parlament minn deċiżjonijiet fuq it-tħaddim tal-ftehim ta' Schengen dwar l-ivjaġġar bla viża. F'dibattitu waqt il-plenarja, kelliema mill-parti l-kbira tal-gruppi politiċi kkritikaw il-Presidenza Daniża għal dak li huma sejħu attakk dirett fuq il-valuri fundamentali tal-Unjoni Ewropea.

Fis-7 ta' Ġunju, il-Ministri tal-Ġustizzja u tal-Intern tal-UE iddeċidew li jbiddlu l-bażi legali tar-regoli dwar l-evalwazzjoni ta' Schengen, dan sakemm għadhom għaddejin in-negozjati mal-istituzzjonijiet tal-UE l-oħra. Dan sar b'mod li bih il-Parlament jitħalla barra mit-teħid ta' deċiżjonijiet f'dan il-qasam. Il-ministri wegħdu sempliċiment li jinfurmaw il-Parlament dwar id-deċiżjonijiet li jittieħdu fil-ġejjieni.

Il-Ministru tal-Ġustizzja Daniż, Morten Bødskov, qal li l-mossa tal-Istati Membri hi waħda "legali, imsejjsa fuq kontenut mhux politika" u talab l-MEPs jarawha "f'din il-perspettiva aktar wiesgħa".

Iżda bosta kapijiet tal-gruppi politiċi rrispondew b'mod qawwi ħafna. Il-President tal-EPP Joseph Daul qal li din id-deċiżjoni hi "kompletament inaċċettabbli" u l-President tal-S&D Hannes Swoboda widdeb il-Kunsill li "fetaħ it-triq għall-populiżmu", u kompla jgħid li "ser nibqgħu sħaħ kontrikom, u ser nużaw kull mezz politiku u legali li għandna aċċess għalih biex inwaqqfuha".

Il-kap tal-grupp tal-Greens, Rebecca Harms, qalet li l-gvernijiet qed jużaw il-ftehim ta' Schengen biex "jaljenaw iċ-ċittadini mill-kriżi".

Il-Kummissarju responsabbli għall-Intern, Cecilia Malmström, qalet li hi "konvinta li l-istorja mhijiex ser tispiċċa hawn", hekk kif esprimiet "diżappunt ċar" fuq id-deċiżjoni.