Il-Globalizzazzjoni: kif il-Parlament Ewropew qed jiżgura li taħdem sew
Il-globalizzazzjoni toffri kemm sfidi u kemm opportunitajiet: aqra x'diġà għamel il-Parlament biex ingawdu kemm nistgħu minnha.
Il-globalizzazzjoni toffri potenzjal kbir għall-ħolqien tal-ġid u tal-impjiegi, iżda hija wkoll kapaċi tħarbat l-affarijiet. L-UE minn dejjem ippruvat tagħmel l-aħjar użu minnha, filwaqt li ttaffi l-effetti negattivi tagħha billi tistabbilixxi regoli u taħdem ma' pajjiżi oħra. Il-Kummissjoni Ewropea fl-10 ta' Mejju ppubblikat dokument ta' riflessjoni dwar kif l-UE għandha tittratta l-globalizzazzjoni fil-futur, suġġett li l-MPE ddibattewh fil-plenarja fis-16 ta' Mejju. Kompli aqra biex titkixxef x'diġà għamel il-Parlament dan l-aħħar.
X'għamel il-Parlament dan l-aħħar
L-UE hija l-akbar protagonista fil-kummerċ dinji u tuża l-qawwa ekonomika tagħha biex timponi standards għolja fuq prodotti li jiġu importati kif ukoll biex tippromwovi l-valuri tagħha fil-bqija tad-dinja. L-MPE dejjem ikunu ħerqana jagħmlu użu minn dan billi jinsistu fuq iż-żieda ta' emendi fi ftehimiet tal-UE. Fin-negozjati reċenti dwar Ceta, pressjoni mill-Parlament wasslet biex minflok is-sistema ta' soluzzjoni ta' tilwim bejn investituri u stati jkun hemm sistema ta' qorti tal-investiment, b'garanzija ta' aktar trasparenza u bl-iżgurar li l-gvernijiet ikollhom kontroll fuq l-għażla tal-arbitri.
L-MPE huma favur miżuri li jikkumbattu l-kompetizzjoni inġusta minn barra l-UE, bħal meta talbu strateġija tal-UE wara mewġa ta' importazzjonijiet fl-UE ta' provvisti ferrovjarji rħas. Biex jipproteġi l-impjiegi fl-Ewropa, il-Parlament qed jagħfas biex bla dewmien jintlaħaq qbil dwar il-modernizzazzjoni tal-istrumenti tal-UE għad-difiża kummerċjali. Bħal dejjem, jeħtiġilna nsibu bilanċ korrett, bħal fil-każ taċ-Ċina.
Biex ma jħallux li l-kummerċ tal-minerali jiffinanzja l-kunflitti u l-ksur tad-drittijiet tal-bniedem, f'Marzu l-MPE adottaw abbozz ta' regolament tal-UE li jimponi l-obbligu li l-importaturi kollha tal-UE ta' landa, tungstenu, tantalu u deheb jiċċekkjaw dwar il-fornituri tagħhom, filwaqt li manifatturi kbar se jkollhom ukoll jgħidu kif biħsiebhom jimmonitorjaw is-sorsi tagħhom ħalli dawn jikkonformaw mar-regoli. Barra minn hekk, minħabba l-Parlament, ir-regoli riveduti tal-UE li jipprevjenu l-kummerċ fi prodotti u servizzi li jistgħu jikkontribwixxu għal atti ta' tortura jew eżekuzzjoni jinkludu projbizzjoni tat-tqegħid fis-suq u t-tranżitu ta' tagħmir użat għal trattament krudili, inuman u degradanti ta' persuni barra mill-UE.
Il-Parlament ukoll ta' sikwit iħeġġeġ lill-Kummissjoni tħejji leġiżlazzjoni ġdida billi jadotta riżoluzzjonijiet fuq inizjattiva tiegħu stess Pereżempju, f'April l-MPE talbu li jitfasslu regoli tal-UE biex jobbligaw lill-fornituri tat-tessuti u tal-ilbies jirrispettaw id-drittijiet tal-ħaddiema. F'dak l-istess xahar, l-MPE wkoll talbu li jkun hemm skema unika ta' ċertifikazzjoni għaż-żejt tal-palma li jidħol fis-suq tal-UE, biex jilqgħu għall-effetti tal-produzzjoni mhux sostenibbli taż-żejt tal-palm, bħad-deforestazzjoni u d-degradazzjoni tal-habitats.
L-MPE jżommu quddiem għajnejhom ukoll kif il-globalizzazzjoni tolqot l-impjiegi, pereżempju billi japoġġjaw inizjattivi maħsuba biex isaħħu d-drittijiet tal-ħaddiema. Il-Parlament bħalissa qed jaħdem biex jipproteġi lil min jinsab f'forom ġodda ta' impjieg maħluqa mill-ekonomija diġitali. Il-Parlament jappoġġja wkoll il-Fond Ewropew ta' Aġġustament għall-Globalizzazzjoni, li jgħin lil ħaddiema ssensjati jsibu impjiegi ġodda. Pereżempju, fil-11 ta' Mejju l-Kumitat għall-Baġits approva €2.6 miljun biex jgħin lil 821 ħaddiem li ngħataw is-sensja minn Nokia fil-Finlandja.
Dawn huma biss ftit eżempji ta' dak li għamel il-Parlament rigward il-globalizzazzjoni f'dawn l-aħħar xhur, imma jagħtu idea tal-modi differenti li bihom l-MPE qed jaħdmu biex jiżguraw li l-globalizzazzjoni taħdem sewwa għall-Ewropej.
Dibattitu dwar il-futur tal-integrazzjoni Ewropea
Sal-aħħar ta' Ġunju, il-Kummissjoni se tippubblika ħames dokumenti ta' riflessjoni biex tagħti bidu għal dibattitu dwar il-ġejjieni tal-integrazzjoni Ewropea. Kull dokument jittratta tema speċifika: id-dimensjoni soċjali tal-Ewropa, il-globalizzazzjoni, l-unjoni ekonomika u monetarja, id-difiża u l-finanzi. Id-dokumenti fihom ideat u xenarji dwar x'bixra jista' jkollha l-Ewropa fl-2025, iżda l-ebda proposta konkreta. L-inizjattiva tispiċċa f'nofs Settembru, meta l-President tal-Kummissjoni Jean-Claude Juncker jagħmel id-diskors annwali tiegħu dwar l-istat tal-Unjoni.
Dan l-artiklu ġie aġġornat fis-16 ta' Mejju 2017 biex jinkludi d-dibattitu fil-plenarja
Il-biċċa l-kbira ta' dawk li wieġbu fl-istħarriġ tal-Ewrobarometru tal-2017
- Il-promozzjoni tal-paċi u tad-demokrazija fid-dinja (73%)
- Il-politika ekonomika (58%)
- Il-politika barranija (57%)
Id-dokument ta' riflessjoni tal-Kummissjoni Ewropea
- (iftaħ f’tab ġdida) L-immaniġġar tal-globalizzazzjoni
- (iftaħ f’tab ġdida) Stqarrija għall-istampa dwar id-dibattitu fil-plenarja dwar dan id-dokument ta' riflessjoni (is-16 ta' Mejju 2017)
Materjal awdjoviżiv
- (iftaħ f’tab ġdida) Ceta
- (iftaħ f’tab ġdida) TTIP
- (iftaħ f’tab ġdida) Minerali minn żoni ta' kunflitt
- (iftaħ f’tab ġdida) Qgħad fost iż-żgħażagħ
- (iftaħ f’tab ġdida) Fond għall-globalizzazzjoni
- (iftaħ f’tab ġdida) Votazzjoni dwar l-industrija tal-ilbies
- IT_2017_Africa conference_INTRO_V01 (PDF - 829 Kb)
Briefings tal-EPRS
- Opens in a new window Ceta (Jannnar 2017)
- Opens in a new window Il-ġlieda kontra l-kummerċ f'għodod tat-tortura u tal-eżekuzzjonijiet (Frar 2017)
- Opens in a new window Negozjati UE-USA dwar it-TTIP (2016)
- Opens in a new window Is-settur tal-ilbies (April 2017)
- Opens in a new window Protezzjoni minn importazzonijiet tad-dumping jew sussidjati (2017)
Stejjer ewlenin
- (iftaħ f’tab ġdida) TTIP
- (iftaħ f’tab ġdida) Nerġgħu nġibu l-ekonomija fit-triq it-tajba
- (iftaħ f’tab ġdida) L-impjiegi
- (iftaħ f’tab ġdida) L-UE fid-dinja