Regoli ġodda Ewropej għall-protezzjoni tal-whistle-blowers
- Sistema ġdida li tipproteġġi u tiffaċilita r-rappurtar ta’ irregolaritajiet
- Il-whistle-blowers ser ikunu jistgħu jagħżlu bejn rappurtar intern jew estern
- Protezzjoni kontra reazzjonijiet negattivi minn min jimpjegahom
Dawk li jikxfu informazzjoni miksuba matul ix-xogħol tagħhom, dwar attivitajiet illegali jew dannużi, ser jiġu protetti aħjar, skont regoli ġodda approvati t-Tlieta.
Ir-regoli l-ġodda, li diġà kien hemm qbil dwarhom mal-ministri tal-UE, jistabbilixxu standards madwar l-UE kollha biex il-whistle-blowers ikunu jistgħu jiżvelaw ksur tal-liġijiet tal-UE f’bosta oqsma bħall-akkwist pubbliku, is-servizzi finanzjarji, il-ħasil tal-flus, is-sigurtà tal-prodotti u t-trasport, is-saħħa pubblika, il-protezzjoni tal-konsumatur, u l-protezzjoni tad-data.
Kanali siguri għar-rappurtar
Ir-regoli ser jippermettu lill-whistle-blowers biex jikxu informazzjoni permezz ta’ kanali interni lill-entità ikkonċernata jew direttament lill-awtoritajiet kompetenti nazzjonali jew l-istituzzjonijiet, il-korpi jew l-aġenziji rilevanti tal-UE.
F’każijiet fejn ma tkun ittieħdet l-ebda azzjoni xierqa b’riżultat tar-rapport inizjali tal-whistle-blower, jew jekk jemmnu li hemm periklu imminenti għall-interessi pubbliċi jew riskju ta’ ritaljazzjoni, il-whistle-blower xorta jkun protett jekk jagħżel li jikxef l-informazzjoni pubblikament.
Protezzjoni kontra ritaljazzjonijiet
Il-liġi tipprojbixxi espliċitament ir-ritaljazzjonijiet u tintroduċi protezzjonijiet biex il-whistle-blower ma jkunx jista’ jiġi sospiż, imniżżel grad, intimidat jew jiġi kkonfrontat b’forom oħra ta’ ritaljazzjoni. Dawk li jgħinu lill-whistle-blowers, bħal faċilitaturi, kollegi u qrabat, għandhom ukoll jibbenefikaw minn protezzjoni.
L-istati membri jridu jiżguraw li l-whistle-blowers ikollhom aċċess għal informazzjoni sħiħa u indipendenti dwar il-proċeduri u r-rimedji b’xejn disponibbli, kif ukoll għajnuna legali matul il-proċedimenti. Matul proċedimenti legali, il-whistle-blowers jistgħu wkoll jirċievu appoġġ finanzjarju u psikoloġiku.
Il-passi li jmiss
Il-liġi issa trid tiġi approvata mill-ministri tal-UE. L-istati membri mbagħad ikollhom sentejn biex jikkonformaw mar-regoli.
Kuntatti:
-
Yasmina YAKIMOVA
Press Officer