Tnedija tal-Premju Ewropew Karlumanju għaż-Żgħażagħ tas-sena d-dieħla

Il-proċedura tal-għażla tal-Premju Ewropew Karlumanju għaż-Żgħażagħ tas-sena d-dieħla tnediet illum l-Erbgħa. Il-Premju jingħata lil żgħażagħ li kienu nvoluti fi proġetti li jippromwovi l-kollaborazzjoni bejn nies minn pajjiżi differenti tal-Ewropa. Id-data tal-għeluq biex jiġu sottomessi proġetti għall-premju tas-sena d-dieħla, ir-raba' wieħed minn meta nbeda fl-2008, hija t-23 ta' Jannar 2011.

Mudelli għaż-żgħażagħ Ewropej

Il-Premju Ewropew Karlumanju għaż-Żgħażagħ, li huwa ko-organizzat mill-Parlament Ewropew u mill- Fondazzjoni Premju Charlemagne ta' Aachen, jingħata għal proġetti magħmula minn żgħażagħ bejn is-16 u t-30 sena. Il-proġett rebbieħ għandu jservi bħala mudell għaż-żgħażagħ li jgħixu fl-Ewropa u joffru eżempji prattiċi ta' kif l-Ewropej jistgħu jgħixu flimkien bħala komunita'.

Programmi ta' skambju, u proġetti artistiċi u bl-Internet li jkollhom dimensjoni Ewropea, huma fost il-proġetti li jintagħżlu.

10,000 Ewro fi Premji

It-tlett proġetti rebbieħa se jingħataw fondi ta' €5,000, €3,000, u €2,000 respettivament. Huma se jkunu mistienda jżuru l-Parlament Ewropew.

Rebbieħa 2010

Fl- 2010, il-proġett mill-Ġermanja "European CNC Network - Train for Europe" rebaħ l-ewwel premju fil-kompetizzjoni tal-Premju Ewropew Karlumanju għaż-Żgħażagħ. Il-proġett ġab flimkien 24 skola vokazzjonali biex tinbena lokomotiva żgħira u vaguni. It-tieni u t-tielet premji marru għal-proġetti "You are here", porġett ta' ktieb mill-Irlanda, u "Best Engineering Competition BEC" mill-Bulgarija rispettivament.

Fis-26 ta' Ottubru, MEPs mill-Kumitat tal-Kultura u l-Edukazzjoni fil-Parlament Ewropew laqgħu lir-rebbieħa tal-2010. Il-Membri awguraw lir-rebbieħa dwar il-preżentazzjonijiet tagħhom, u qalu li dawn kienu ta' ispirazzjoni u interess qawwi, u wrew kif iż-żgħażagħ kienu qed jaħdmu sabiex in-nies jifhmu lil xulxin fl-Ewropa.

L-applikazzjonijiet jinsabu fuq il-website tal-Premju Ewropew Karlumanju għaż-Żgħażagħ.