Lobbyists u gruppi ta' interess: il-Parlament japprova reġistru konġunt

L-MEPs approvaw ftehim innegozjat bejn rappreżentanti tal-Parlament u tal-Kummissjoni, ir-reġistri tal-lobbyists u ta' gruppi ta' interess oħra taż-żewġ istituzzjonijiet għandhom jingħaqdu f'wieħed. L-MEPs iqisu li anke l-Kunsill tal-Ministri għandu jissieħeb fir-reġistru. L-MEPs għandhom ukoll jelenkaw il-kuntatti tagħhom ma' lobbyists f'footprint leġiżlattiva li tiġi annessa ma' rapporti leġiżlattivi li jkunu se jiġu vvutati.

"Ir-Reġistru Trasparenza huwa pass 'l quddiem importanti fil-ġlieda tagħna għal teħid tad-deċiżjonijiet ċar u responsabbli fl-Unjoni Ewropea. Għandna bżonn il-gruppi ta' lobbyists u ta' interess sabiex insiru nafu x'impatt il-leġiżlazzjoni tagħna jista' jkollha fuq gruppi differenti ta' nies u kumpaniji. Iżda rridu niżguraw li ħadd ma jinfluwenza d-deċiżjonijiet permezz ta' mezzi illeċiti," qal il-President tal-Parlament Ewropew Jerzy Buzek.

L-hekk imsejjaħ "reġistru ta' trasparenza" għandu jġib flimkien ir-reġistri eżistenti tal-Parlament u tal-Kummissjoni, kif miftiehem minn rappreżentanti taż-żewġ istituzzjonijiet f'Novembru 2010. Mhux biss lobbyists iżda anke think tanks jew organizzazzjonijiet li jirrappreżentaw il-knejjes u komunitajiet reliġjużi għandhom ikunu jistgħu jiġu elenkati fir-reġistru.

L-MEPs kienu tal-fehma li l-Kunsill għandu jingħaqad ma' dan ir-reġistru malajr kemm jista' jkun u lagħu l-fatt li l-Kunsill indika li ser jagħmel dan.

Għalkemm il-Parlament iqis li l-lobbyists għandu jkollhom l-obbligu li jkunu elenkati f'dan ir-reġistru komuni, it-test adottat jgħid li dan għandu jsir permezz ta' sistema volontarja. Madankollu, huwa impossibbli li dak li jkun jikseb akkreditazzjoni għall-Parlament jekk ma jkunx elenkat fir-reġistru.

Barra minn hekk, l-MEPs adottaw ukoll proposta għal "footprint leġiżlattiva" annessa mal-emendi leġiżlattivi abbozzati fil-Parlament. Dan l-anness għandu jkun jelenka l-lobbyists li ltaqgħu magħhom ir-rapporteurs matul l-abbozzar tar-rapporti tagħhom.

Il-Parlament adotta wkoll emenda fir-regoli interni tiegħu li tgħid li l-MEPs għandhom jaġġornaw id-dikjarazzjonijiet finanzjarji tagħhom malli jseħħu tibdiliet.