Trattat aħjar, iżda jibqa' l-bżonn għal aktar tkabbir

Skont l-MEPs, it-trattat ta' governanza li għadu kif ġie miftiehem, ma kienx proprju meħtieġ bien tingħeleb il-kriżi. Hemm bżonn li dan it-trattat ikun konsistenti mas-six pack għall-governanza ekonomika u jrid jiġi msaħħaħ b'miżuri immedjati li jindirizzaw il-limitazzjonijiet immedjati taż-żona tal-ewro. Madankollu, l-MEPs kienu sodisfatti bil-fatt li t-trattat il-ġdid jinkludi ħafna mill-proposti magħmula mir-rappreżentanti tagħhom.

Ir-riżoluzzjoni adottata b'443 vot favur, 124 kontra u 75 astensjoni, tiddeskrivi l-prijoritajiet tal-Parlament, wara d-dibattitu li sar l-Erbgħa mal-President tal-Kunsill Ewropew Herman Van Rompuy u l-President tal-Kummissjoni José Manuel Barroso dwar l-eżitu tas-summit tat-30 ta' Jannar. Id-dibattitu ġie ddominatat minn talbiet mill-maġġoranza tal-gruppi politiċi tal-Parlament biex issir azzjoni li tirristawra t-tkabbir u tnaqqas l-qgħad.

Aħjar, imma xorta ħasra

Ir-riżoluzzjoni tgħid li t-test finali tat-trattat, kif miftiehem mill-kapijiet ta' stat, fih titjib sinifikanti fuq il-verżjonijiet preċedenti u jieħu kont tal-insistenza tal-MEPs biex tingħata iktar attenzjoni għat-tkabbir u r-restrizzjoni fiskali, waqt li ssir ħidma fi ħdan is-sistema normali tal-UE fejn possibbli. Ir-riżoluzzjoni tilqa' wkoll il-fatt li tinaqqas ir-riskju ta' Unjoni Ewropea b'żewġ veloċitajiet u li s-sorveljanza parlamentari saret iktar importanti milli kien ippjanat fil-bidu.

Madankollu, il-Parlament reġa' tenna l-argument li kien ikun aħjar li kieku nkisbet ftehima skont il-liġi normali tal-UE.

Bżon ta' azzjoni rapida

Ir-riżoluzzjoni tinsisti li l-irkupru ekonomiku jeħtieġ miżuri speċifiċi biex jippromwovu s-solidarjetà, l-impjiegi u t-tkabbir. L-ewwel miżura li tista' tittieħed hija li jiġi stabbilit malajr  fond ta' fidwa ibbażat fuq il-proposta tal-konsulenti ekonomiċi tal-gvern Ġermaniż. Barra minn hekk, jistgħu jiġu introdotti bonds tal-proġetti waqt li jsiru sforzi għall-introduzzjoni tal-bonds tal-istabilità u tat-taxxa fuq it-tranżazzjonijiet finanzjarji fil-livell Ewropew.

Sfond

Il-Parlament Ewropew kien involut totalment fil-grupp ta' ħidma li abbozza t-trattat permezz tal-erba' rappreżentanti tiegħu, Elmar Brok (EPP, DE), Roberto Gualtieri (S&D, IT), Guy Verhofstadt (ALDE, BE) u Daniel Cohn-Bendit (Greens/EFA, DE). Il-grupp ta' ħidma ppreżenta l-abbozz tat-trattat lill-kapijiet ta' stat matul is-summit tat-30 ta' Jannar. It-test, kif approvat mill-kapijiet ta' stat, issa jrid jgħaddi mill-proċess ta' ratifika normali fl-Istati Membri li ffirmaw għalih.