L-MEPs japprovaw il-ftehima dwar id-dejta tal-passiġġieri tal-ajru

Il-Parlament Ewropew approva ftehima ġdida mal-Istati Uniti dwar id-dejta tal-passiġġieri tal-ajru. Il-ftehima tistabbilixxi kundizzjonijiet legali u tkopri kwistjonijiet bħal salvagwardji għall-ħarsien tad-dejta, it-tul taż-żamma tad-dejta, ir-raġunijiet għall-użu tagħha kif ukoll r-rikors amministrattiv u ġudizzjali. Din il-ftehima għandha tissostitwixxi ftehima proviżorja oħra, li ilha tapplika mill-2007.

Il-ftehima bejn l-UE u l-Istati Uniti, dwar it-trasferiment ta' dejta personali tal-passiġġieri ġiet addottata b'409 voti favur, 226 kontra u 33 astensjoni. Kien hemm minoranza sinifikanti ta' MEPs li vvotaw kontra minħabba tħassib dwar is-salvagwardji għall-ħarsien tad-dejta, inkluż ir-rapporteur Sophie in 't Veld (ALDE, NL) li rtirat isimha mir-rapport wara li ttieħed il-vot. Proposta biex il-ftehima tinbagħat quddiem il-Qorti Ewropea għall-Ġustizzja ġiet irrifjutata.

Il-perjodu u r-raġunijiet għalfejn tinżamm id-dejta

Skont il-ftehima addottata, dejta tar-reġistru tal-ismijiet tal-passiġġieri (passenger name record - PNR) għandha tinżamm mill-awtoritajiet tal-Istati Uniti f'bażi tad-dejta attiva għal perjodu ta' ħames snin. Wara l-ewwel sitt xhur, l-informazzjoni li tkun tista' tidentifika passiġġier tiġi "spersonalizzata"  billi jiġu kodifikati l-ismijiet u l-informazzjoni dwar kuntatti.

Wara l-ewwel 5 snin, id-dejta tkun trid tintefa' f'bażi tad-dejta inattiva. L-informazzjoni tinżamm hawnhekk għal mhux iktar minn 10 snin oħra u l-aċċess għad-dejta lill-uffiċjali tal-Istati Uniti isir aktar ristrett. Skont il-ftehima, l-informazzjoni li tista' tidentifika l-passiġġier imbagħad tiġi "anonimizzata" billi titħassar id-dejta kollha li tkun tista' tidentifika passiġġier. Dejta relatata ma' kas speċifiku tinżamm f'bażi tad-dejta attiva sakemm l-investigazzjoni tiġi arkivjata.

Normalment, dejta tal-PNR tintuża għall-identifikazzjoni, l-investigazzjoni u l-prosekuzzjoni tat-terroriżmu u tal-kriminilità transnazzjonali, jew biex dawn jiġu evitati. Dejta tal-PNR isservi wkoll biex tidentifika persuni li jkunu mressqa għall-interrogazzjoni jew eżaminazzjoni iktar dettaljata.

Dejta Sensittiva

Dejta sensittiva bħall-oriġini razzjali, it-twemmin reliġjuż, l-istat ta' saħħa fiżika u mentali jew l-orjentazzjoni sesswali tal-passiġġier tista' tiġi wżata f'ċirkostanzi speċjali, meta l-ħajja tal-persuna tkun f'riskju. Din id-dejta ġeneralment tintuża b'rabta mal-għażla tal-ikel matul it-titjira jew f'każ ta' bżonn ta' assistenza medika. Din id-dejta tiġi wżata każ b'każ u tiġi mħassra b'mod permanenti wara 30 jum, sakemm ma tkunx użata minn investigazzjoni speċifika.

Rikors Ġudizzjali

Ċittadini Ewropej għandhom id-dritt għal rikors amministrattiv jew ġudizzjali skont il-liġi tal-Istati Uniti, jekk isir abbuż mid-dejta tagħhom. Għandhom ukoll id-dritt li jaraw id-dejta tal-PNR tagħhom, kif ukoll li jitolbu tibdil jew tħassir ta' informazzjoni mhux korretta mid-Department of Homeland Security (DHS).

Sfond

Waqt il-proċess ta' prenotazzjoni, trasportaturi tal-ajru jiġbru d-dettalji personali tal-passiġġieri, fosthom l-isem, l-indirizz, id-dettalji tal-karta ta' kreditu u n-numru tal-post fuq l-ajruplan, f'reġistru tal-ismijiet tal-passiġġieri. Skont il-liġi tal-Istati Uniti, il-linji tal-ajru għandhom jipprovdu aċċess għal din id-dejta lid-DHS, qabel it-tluq tal-passiġġieri lejn id-destinazzjoni tagħhom. Dan japplika għal titjiriet sejrin lejn u ġejjin mill-Istati Uniti.

F'Mejju 2010, il-Parlament ippospona l-votazzjoni dwar il-ftehima proviżorja applikata mill-2007, minħabba tħassib fir-rigward tal-ħarsien tad-dejta. L-MEPs ħeġġew lill-Kummissjoni tinnegozzja ftehima ġdida - ħaġa li seħħet fl-2011.

Il-Parlament Ewropew adotta ftehima tal-PNR mal-Awstralja fl-2011 u bħalissa għaddejjin negozzjati mal-Kanada.

X'imiss

Il-Ministri tal-UE għall-Ġustizzja u l-Intern huma mistennija japprovaw formalment il-ftehima fis-26 ta' April. Din se tieħu post il-ftehima proviżorja tal-2007 u se tibqa' tapplika għal seba' snin.