Diskors ta’ ftuħ – Schengen, il-Presdient il-ġdid tas-Serbja, Layla Zana u Asmaa Mahfouz

Il-Parlament se jopponi bil-qawwa l-pjan li qablu fuqu l-Ministri tal-Intern fis-7 ta’ Ġunju li jibdlu l-bażi legali għall-evalwazzjoni tal-funzjonament tal-ispazju bla viża ta’ Schengen, il-President Martin Schulz wiegħed fid-diskors ta’ ftuħ tiegħu. Din il-bidla ġibdet il-kritika ħarxa tal-gruppi politiċi kważi kollha, li kkunsidrawha bħala attakk fuq id-drittijiet bażiċi taċ-ċittadini tal-UE.

Is-Sur Schulz wissa wkoll lill-President tas-Serbja, Tomislav Nikolic, biex ma jiffalsifikax l-istorja u ġibed l-attenzjoni fuq il-proċessi tar-rebbieħa tal-Premju Sakharov Layla Zana u Asmaa Mahfouz.

Il-Ministru tal-Ġustizzja tad-Danimarka, Morten Bødskov, se jattendi l-Parlament it-Tlieta filgħodu fi-09.00 biex jispjega l-bidla tal-bażi legali għall-Artikolu 70 tat-Trattat, li lill-Parlament jagħtih rwol deċiżjonali anqas prominenti rigward l-evalwazzjoni ta’ kif jiġu implimentati r-regoli ta’ Schengen. Il-Presdient żied jgħid li d-dikjarazzjoni tiegħu se tiġi segwita minn kontribuzzjonijiet minn kelliema tal-gruppi politiċi.

Is-Sur Schulz irrapporta li, f’konverżazzjoni bit-telefon mas-Sur Bødskov u mal-Aġent President tal-Kunsill il-Prim Ministru Thorning-Schmidt, huwa kien enfasizza li l-Parlament Ewropew kien sejjer jopponi bil-qawwa kwalunkwe tentattiv ta’ tnaqqir tal-libertajiet bażiċi taċ-ċittadini tal-UE.

Is-Serbja

Is-Sur Schulz kien kiteb lill-President il-ġdid tas-Serbja, Tomislav Nikolic, biex jifraħlu għas-suċċess elettorali tiegħu, iżda wkoll biex jirrimarka li l-ebda tentattiv ta’ falsifikazzjoni tal-istorja mhuwa aċċettabbli. Innota li l-ġenoċidju ta’ Srebrenica u d-delitti kontra l-umanità ġew rikonoxxuti internazzjonalment, mhux l-anqas mill-Qorti Internazzjonali tal-Ġustizzja, u żied jgħid li jittama li s-Serbja “mhijiex se toħroġ mit-triq tar-rikonċiljazzjoni reġjonali, għax b’hekk tkun qed toħroġ mit-triq lejn l-Ewropa”.

Proċessi ta’ rebbieħa tal-Premju Sakharov

Is-Sur Schulz irrikjeda proċess u proċedimenti ta’ appel ġusti għar-rebbieħa tal-Premju Sakharov Layla Zana, li sfat ikkundannata fuq il-bażi tal-leġiżlazzjoni antiterroristika Torka. Qal li t-Turkija ffirmat il-Konvenzjoni Ewropea tad-Drittijiet tal-Bniedem, u l-Parlament Ewropew jistenna li tirrispettaha, filwaqt li żied li, matul iż-żjara uffiċjali tiegħu fit-Turkija ġimagħtejn ilu, is-Sinjura Zana kienet irringrazzjatu għas-sostenn sod tal-Parlament.

Is-Sur Schulz innota li rebbieħa oħra tal-Premju Sakharov, l-Eġizzjana Asmaa Mahfouz, se tibda l-appell tagħha kontra sentenza ta’ ħabs fis-17 ta’ Ġunju, u żied li kien kiteb lir-Rappreżentant Għoli għall-Affarijiet Barranin, Catherine Ashton, biex jitlobha tiżgura li l-ambaxxatur tal-UE għall-Kajr ikun preżenti.

MPE deħlin / ħerġin

Is-Sur Schulz ħabbar li:

is-Sur Eric Andrieu kien ħa post is-Sur Kader Arif (S&D, FR)

is-Sur Jean-Jacob Bicep kien ħa post is-Sur Pascal Canfin (Verts/EFA, FR)

is-Sur Karim Zeribi kien ħa post is-Sur Vincent Peillon (S&D, FR)

is-Sur Eric Banki kien ħa post is-Sur János Áder, u

l-kredenzjali tas-Sinjura Minodora Clivetti kienu ġew ivverifikati mill-Kumitat għall-Affarijiet Legali.