Tacaíonn Parlaimint na hEorpa le cearta an duine

Tá urraim do chearta an duine ar cheann de luachanna bunúsacha an Aontais Eorpaigh. Déanann aon sárú ar na cearta sin difear do na prionsabail dhaonlathacha ar a bhfuil ár sochaí bunaithe, cibé acu a tharlaíonn siad laistigh nó lasmuigh d'AE. Troideann Parlaimint na hEorpa na sáruithe sin trí ghníomhaíocht reachtach lena n-áirítear breathnóireacht toghcháin, díospóireachtaí míosúla chearta an duine in Strasbourg agus trí chearta an duine a chumhdach i gcomhaontuithe maidir le trádáil sheachtrach.

Tacaíonn Parlaimint na hEorpa freisin le cearta an duine trí Dhuais bhliantúil Sakharov um Shaoirse Smaointeoireachta, a bunaíodh i 1988. Dámhtar an duais do dhaoine aonair atá tar éis cur go mór leis an troid ar son chearta an duine ar fud na cruinne, ag tarraingt aird ar sháruithe ar chearta an duine chomh maith le tacú leis na buaiteoirí agus a gcúis.

Raif Badawi, buaiteoir 2015 Dhuais Sakharov um Shaoirse Smaointeoireachta

Duine as an Araib Shádach é Raif Badawi ar blagálaí, scríbhneoir agus gníomhaí é, agus is é a chruthaigh an láithreán gréasáin ar a dtugtar 'Free Saudi Liberals' atá ina ardán ar líne le haghaidh díospóireacht pholaitiúil agus reiligiúnach. Tuairiscíodh gur óstáil a laithreán gréasáin ábhar inar cáineadh pearsana sinsearacha reiligiúnacha agus thug Badawi le fios gur nead do sceimhlitheoirí atá anois in Ollscoil Ioslamach Imam Muhammad ibn Saud.

Gabhadh é in 2012 ar chúiseamh gur mhaslaigh sé an Ioslám agus rinneadh é a dhíotáil ar roinnt cúiseamh, lena n-áirítear séanadh creidimh. Ciontaíodh é agus gearradh téarma príosúin seacht mbliana agus 600 lasc fuipe air in 2013 agus ansin in 2014, athraíodh an pionós go dtí 1 000 lasc fuipe, deich mbliana eile sa phríosún agus fíneáil. Tugadh na chéad 50 lasc fuipe dó os comhair slua de na céadta duine an 9 Eanáir 2015. Cuireadh babhtaí eile fuipeála ar athló in ainneoin go raibh cáineadh idirnáisiúnta déanta ar an bpianbhreith agus go bhfuil an tsláinte go dona ag Badawi. Tar éis bagairtí báis a fháil, theith a bhean chéile agus a thriúr clainne go Ceanada. I Meitheamh 2015, sheas an Chúirt Uachtarach leis an bpianbhreith a gearradh air agus tá sé fós sa phríosún.

#FreeRazan

  • URL

Conas a thacaíonn Parlaimint na hEorpa le cearta an duine?

I dteannta Dhuais Sakharov, tacaíonn Parlaimint na hEorpa le cearta an duine trí ghníomhaíocht nithiúil pholaitiúil agus reachtach.

Teagmháil

Feachtais chumarsáide (DG COMM)

Parlaimint na hEorpa / European Parliament
Rue Wiertz 60
B-1047 - Brussels
An Bheilg / Belgium