Simon Busuttil (PPE). - Sinjura President, M’hemmx dubju li l-Ewropa setgħet tagħmel ħafna aktar biex twassal lill-pajjiżi u lid-dinja Għarbija lejn id-demokrazija, iżda jekk hemm xi ħaġa pożittiva minn dawn l-avvenimenti drammatiċi li assistejna għalihom żgur li hija li kienu l-popli Għarab infushom li ħadu r-riedni f’idejhom biex is-sitwazzjoni tagħhom stess itejbuha huma stess.

Wara kollox l-istorja hija miżgħuda b’sitwazzjonijiet u b’interventi tal-pajjiżi tal-Punent li sfaw aktar ta’ dannu milli ta’ ġid f’dawn il-pajjiżi. Allura rridu nneħħu din l-idea li biex jirranġaw l-affarijiet bilfors li rridu mmorru aħna, niddettaw aħna u nippridkaw aħna. Dak li rridu nistaqsu llum huwa x’nistgħu nagħmlu minn issa ’l quddiem fid-dawl ta’ dak li seħħ.

Jien jidhirli li rridu nagħmlu żewġ affarijiet: l-ewwel nett irridu nidħlu bi ħġarna, bl-għajnuna tagħna, sabiex inkattru u nsaħħu l-ambjent demokratiku f’dawn il-pajjiżi, u b’mod partikulari l-istituzzjonijiet demokratiċi, sabiex ikunu jistgħu jiffjorixxu; u jiffjorixxu b’mod li l-estremisti u d-dittaturi ġodda jitwarrbu.

It-tieni nett irridu nistaqsu fejn żbaljajna. Irridu nistaqsu jekk il-politika Ewro-Mediterranja tagħna kinitx wisq paroli u xejn fatti. Fejn kienet l-Unjoni tal-Mediterran? L-Ewropa, irridu nistaqsu, jekk hijiex se tibqa’ tirreaġixxi minflok ma tibda taġixxi?