David Casa (PPE). - L-implimentazzjoni tal-istrateġija Ewropea taż-żgħażagħ għall-ewwel darba se tagħtina opportunità unika biex inpoġġu l-għodod f’azzjoni li għandhom il-possibilità li jkollhom effett fuq dawk l-isfidi l-kbar li qed jiffaċċjaw iż-żgħażagħ tal-lum.

L-importanza tal-investiment fiż-żgħażagħ m’għandhiex tkun sottovalutata. Is-sejħa f’dawn iż-żewġ rapporti, sabiex ikun hemm aktar riżorsi li għandhom jiġu allokati għal din il-kawża għandhom jintlaqgħu. Partikolarment nemmen bis-sħiħ li għandna nikkultivaw u nrawmu l-intraprenditorija taż-żgħażagħ. Dan ivarja minn żgħażagħ imħeġġa li jużaw it-talenti tagħhom għalihom infushom u għal ħidma sabiex jippromwovu assistenza finanzjarja u inċentivi fiskali sabiex wieħed ikun jista' jibda l-kummerċ tiegħu.

Hekk kif il-prospetti ekonomiċi għall-UE qed jitjiebu b’mod gradwali u hemm stmat li jkun hemm żidiet fil-futur tal-ħolqien tax-xogħol, jeħtieġ nistaqsu lilna nfusna jekk is-suq tax-xogħol tagħna huwiex se jkollu l-ħiliet meħtieġa biex jitqabblu man-numru ta’ impjiegi li se jinħolqu.

Din hija r-raġuni għala naqbel li matul iż-żmien huwa essenzjali li d-diskrepanza bejn il-ħiliet tal-ħaddiema u l-ħtiġijiet tas-suq tax-xogħol ikunu indirizzati. Dan ifisser li għandu jkun hemm koordinazzjoni aħjar bejn min iħaddem u l-istituzzjonijiet tat-taħriġ li jippermettu sabiex iż-żgħażagħ itejbu l-prospetti tagħhom tal-impjiegi.

Nagħlaq Sinjura President billi nirringrazzja liż-żewġ rapporteurs tagħna għax-xogħol utli u eċċellenti li huma għamlu.