Marlene Mizzi (S&D). – Dan id-dibattitu li qatt ma missu sar hu instigat biss għal skop partiġjan bil-ħsieb li jimmina x-xogħol tal-Gvern Malti u jtebba’ isem Malta. Qegħdin niddiskutu affarijiet ta’ Stat demokratiku li misshom jiġu indirizzati internament u mingħajr indħil.

Qegħdin niddiskutu wieħed mill-Istati Membri li l-aktar għamlu suċċess ekonomiku, fejn id-demokrazija u r-rule of law qatt ma kienu dubjużi. Waqt li għall-Panama Papers hemm il-PANA Committee, id-dibattitu tal-lum huwa biss skuża meskina biex din il-Kamra tinkludi aġenda partiġjana ta’ nies li, kull meta tkellmu bl-iskop li jattakkaw ‘il-Gvern, għamlu kemm setgħu deni lil pajjiżhom, speċjalment waqt li Malta għandha l-presidenza. Nies li stqarru li jistħu li huma Maltin.

L-iskop ta’ dan id-dibattitu mhux veru biex niddiskutu r-rule of law. Tant hu hekk, li dawn riedu li dan id-dibattitu jsir qabel l-elezzjoni ġenerali biex b’hekk jieħdu vantaġġ politiku partiġjan. Dawn huma tattiċi tal-mistħija, tattiċi tal-bullying. Malta hi pajjiż demokratiku, progressiv u ta’ suċċess. Pajjiż żgħir imma nazzjon kbir. Tippruvawx tkunu bullies magħna għax ma nħallukomx.