Francis Zammit Dimech (PPE). – L-ewwelnett nirringrazzja lill-kollegi f’dan il-Parlament li reġgħu rreferew għall-każ ta’ Daphne Caruana Galizia.

Irrid ngħid li llum għandek 25 ġurnalist minn madwar id-dinja li qegħdin ikomplu jinvestigaw l-istejjer li hija kienet qiegħda taħdem fuqhom. Huwa b’hekk biss li x-xogħol investigattiv ta’ ġurnalisti bħal Daphne Caruana Galizia u Ján Kuciak inkomplu nħarsuh, għaliex meta ġurnalisti bħal dawn jitwaqqfu mix-xogħol tagħhom, dak li jkun qiegħed jiġri huwa attakk kontra s-soċjetà kollha biex ma nirċivux il-verità li għandna dritt għaliha.

Irrid ngħid li f’Malta, il-Gvern, flok ma jipprova jsib min huwa verament responsabbli għall-qtil ta’ Daphne Caruana Galizia, ikompli b’attività bħal li jiġġustifika s-SLAPP li hija proċedura użata kontra ġurnalisti milli jagħmlu l-ħidma tagħhom. F’ċirkostanzi bħal dawn huwa d-dmir tagħna f’dan il-Parlament Ewropew li nkomplu niddefendu l-ġurnaliżmu investigattiv għaliex huwa mibni fuq il-libertà tal-espressjoni.

Il-ħsieb li nagħlaq bih huwa, huwa b’hekk biss li ma nħallux lil min irid jidfen lil dawn il-ġurnalisti jidfen ukoll il-verità li huma kienu qegħdin jistħarrġu.