David Casa (PPE). – Din it-traġedja li għandna fil-Mediterran Sur President qiegħda, iktar ma jgħaddi ż-żmien, iktar tħalli l-pajjiżi tal-Unjoni Ewropea mifrudin. Sfortunatament, anke alleati kbar, bħal ma kienu, u għandhom jibqgħu, Malta u l-Italja. Jien niddejjaq nisma xi deputati, mill-Italja, pajjiż li jien tant inħobb, jgħidu affarijiet illi flok iressquna lejn xulxin biex nagħmlu l-battalja tagħna fl-Unjoni Ewropea, iva kontra min mhux qiegħed jagħti dan il-kontribut biex insolvu darba għal dejjem din il-problema.

Mhuwiex sew, għandkom raġun, illi xi pajjiżi fl-Unjoni Ewropea ma għamlu assolutament xejn biex jgħinu lill-Italja, b’mod partikolari, naturalment lil Malta illi ilna issa s-snin kbar niffaċċjaw wiċċna ma’ din il-problema. Għandna diversi soluzzjonijiet, jien ngħid lill-Membri tal-Kunsill, għandna r-Regolament ta’ Dublin illi rridu naraw kif jitranġa. Ma jistax ikun illi nħallu r-regolamenti kif inhuma llum. Għandna bżonn li l-Istati Membri kollha jaqsmu din ir-responsabbiltà. Għandna bżonn li jkun hemm ċentri ta’ applikazzjoni f’pajjiżi sikuri fl-Afrika qabel dawn jiddeċiedu li jitħallew jitilqu biex jiġu fl-Ewropa. Imma ejja naħdmu din il-battalja flimkien għaliex jekk ma nagħmlux hekk ħa jerġa’ jkollna d-diżastri illi kellna sfortunatament fil-passat.