Il-parteċipazzjoni ta' persuni b'diżabilità fl-elezzjonijiet Ewropej (dibattitu)
Marlene Mizzi (S&D). – L-Artikolu 29 tal-Konvenzjoni tan-Nazzjonijiet Uniti dwar il-Persuni b’Diżabilità jinsisti li kull persuna b’diżabilità għandha tiġi mogħtija d-dritt li tipparteċipa fi kwalunkwe elezzjoni billi tivvota jew billi tkun kandidat.
B’hekk qed nappella lil din il-Kamra biex sabiex verament tħaddan dak kollu li tgħid il-Konvenzjoni billi jkollna Elezzjonijiet Ewropej aktar aċċessibbli. Għaldaqstant għandna jkollna materjal li jifhem kulħadd u dibattiti li jirriflettu l-bżonnijiet tal-persuni b’diżabilità. Ukoll hemm bżonn li jkun hemm stazzjonijiet tal-votazzjoni aktar aċċessibbli għal kull tip ta’ diżabilità fiżika. Iċ-ċittadini għandhom id-dritt li jħossuhom indipendenti u parteċipi daqs kulħadd. Apparti minn dan, għandu jkollna elezzjonijiet li jissarrfu f’aktar parteċipazzjoni politika tan-nies b’diżabilità għax bl-għajnuna tagħhom nistgħu noħolqu liġijiet li jinkludu lil kulħadd. Irridu nisimgħu u rridu nifhmu lilhom biex inkunu nafu d-diffikultajiet li jiltaqgħu magħhom u b’hekk naddattaw liġijiet li verament jirriflettu soċjetà inklużiva. B’dan il-mod biss jista’ jkollna Parlament li jirrappreżenta lil kulħadd u li jirrispetta l-kapaċitajiet u d-drittijiet ta’ kull ċittadin Ewropew. Hekk biss jista’ jkollna Ewropa aktar aċċessibbli, Ewropa aktar inklużiva.