David Casa, f'isem il-grupp PPE. – Sinjura President, nixtieq nibda billi nifraħ lir-Rapporteur Jeroen Lenaers għar-riżultat eċċellenti li kiseb f'din il-leġiżlazzjoni u li b'hekk ħadna passi importanti biex inkomplu niksbu Ewropa iżjed soċjali u ġusta.

Iva din hija storja ta' suċċess oħra fl-implimentazzjoni tal-prinċipji tal-pilastru Ewropew tad-drittijiet soċjali u suċċess ukoll fl-opportunitajiet offruti mis-suq komuni. L-Awtorità Ewropea tax-Xogħol se tkun hemm biex tgħin u tassisti lill-awtoritajiet individwi tal-Istati Membri biex jiġġieldu kontra kwalunkwe abbużi u frodi u jagħmlu din l-istess mobbiltà faċli għaċ-ċittadini. Ser ikun hemm ukoll biex tgħin fil-koperazzjoni bejn il-pajjiżi Ewropej u biex tinforza l-liġijiet li japplikaw. Biex nagħmlu dan, kellna nikkreaw regoli ċari, ġusti u li jiġu infurzati kif suppost fuq il-mobilità għax-xogħol. Huwa biss b'sinerġija u kooperazzjoni tajba bejn l-awtoritajiet tal-Istati Membri illi dan huwa possibbli. Mingħajr ma ninsew ir-rwol importanti li l-imsieħba soċjali għandhom f'dan il-proċess.

Kif nafu, is-suq komuni huwa ċentrali għall-pjan u l-proġett Ewropew, u l-mobbiltà fl-Unjoni Ewropea hija realtà li naraw u nesperjenzaw kuljum fejn miljuni ta' ċittadini Ewropej jaħdmu, jgħixu u jivvjaġġaw.