MOZZJONI GĦAL RIŻOLUZZJONI dwar ir-rispett tad-dritt tat-tfal għal familja wara s-separazzjoni tal-ġenituri
3.12.2018
Ivan Jakovčić, Jozo Radoš
B8-0554/2018
Mozzjoni għal riżoluzzjoni tal-Parlament Ewropew dwar ir-rispett tad-dritt tat-tfal għal familja wara s-separazzjoni tal-ġenituri
Il-Parlament Ewropew,
– wara li kkunsidra l-Artikolu 133 tar-Regoli ta' Proċedura tiegħu,
A. billi d-dibattitu dwar il-kustodja konġunta huwa partikolarment rilevanti llum, minħabba rati ta' żwieġ storikament baxxi u livelli relattivament għoljin ta' tifrik ta' żwiġijiet u relazzjonijiet;
B. billi studji reċenti wrew li t-tfal li l-arranġamenti ta' għajxien tagħhom wara separazzjoni tal-ġenituri jinvolvu alternanza bejn il-ġenituri, fejn iqattgħu bejn wieħed u ieħor ammonti ta' ħin ugwali mat-tnejn, jirrapportaw livell ogħla ta' benessri u saħħa mentali aħjar mit-tfal li jgħixu fil-biċċa l-kbira jew esklussivament ma' ġenitur wieħed;
C. billi l-aġenziji għall-protezzjoni tat-tfal spiss iħabbtu wiċċhom ma' sitwazzjonijiet diffiċli biex it-tfal jinżammu 'l bogħod mill-periklu, it-tneħħija tat-tfal mill-familja mingħajr raġunijiet konvinċenti tmur kontra d-dritt internazzjonali;
1. Iħeġġeġ lill-Istati Membri jipprovdu lill-ġenituri, mill-bidu nett u f'kull stadju tal-proċedimenti relatati mat-tfal, b'informazzjoni ċara u kompleta dwar il-proċedimenti u dwar il-konsegwenzi possibbli tagħhom;
2. Jistieden lill-Kunsill jirrapporta dwar l-azzjonijiet speċifiċi li qed jiġu implimentati mill-Istati Membri bil-għan li jinħolqu sinerġiji bejn it-28 sistema nazzjonali ta' protezzjoni tat-tfal;
3. Jitlob lill-Kummissjoni tfassal gwida ċara u faċilment aċċessibbli b'informazzjoni prattika għaċ-ċittadini tal-UE dwar l-arranġamenti istituzzjonali relatati mal-protezzjoni tat-tfal;
4. Jagħti istruzzjonijiet lill-President tiegħu sabiex jgħaddi din ir-riżoluzzjoni lill-Kunsill u lill-Kummissjoni kif ukoll lill-gvernijiet u lill-parlamenti tal-Istati Membri.