MOZZJONI GĦAL RIŻOLUZZJONI KONĠUNTA
12.3.2008
- –Nickolay Mladenov, Thomas Mann, Guido Podestà, Nicole Fontaine, Eija-Riitta Korhola u Ivo Belet, f'isem il-Grupp PPE-DE
- –Pasqualina Napoletano, Ana Maria Gomes, Robert Evans, Elena Valenciano Martínez-Orozco u Emilio Menéndez del Valle, f'isem il-Grupp PPE-DE
- –Jules Maaten, Marco Cappato, Marios Matsakis u Marielle De Sarnez, f'isem il-Grupp PPE-DE
- –Adam Bielan, Ewa Tomaszewska u Konrad Szymański, f'isem il-Grupp PPE-DE
- –Angelika Beer, Joost Lagendijk u Hélène Flautre, f'isem il-Grupp Verts/ALE
- –Francis Wurtz u André Brie, f'isem il-Grupp Verts/ALE
- –Verts/ALE (B6‑0112/2008)
- –Verts/ALE (B6‑0112/2008)
- –UEN (B6‑0116/2008)
- –PSE (B6‑0118/2008)
- –GUE/NGL (B6‑0123/2008)
- –ALDE (B6‑0125/2008)
Riżoluzzjoni tal-Parlament Ewropew dwar il-każ tal-ġurnalista Afgan Perwiż Kambakhsh
Il-Parlament Ewropew,
– wara li kkunsidra r-riżoluzzjonijiet preċedenti tiegħu dwar l-Afganistan,
– wara li kkunsidra l-Kostituzzjoni Afgana li ġiet adottata fl-2004,
– wara li kkunsidra r-Riżoluzzjoni ta' l-Assemblea Ġenerali tan-Nazzjonijiet Uniti tat-18 ta’ Diċembru ta’ l-2007 li titlob moratorju dinji fuq il-piena tal-mewt;
– wara li kkunsidra d-Dikjarazzjoni Universali tan-Nazzjonijiet Uniti dwar id-Drittijiet tal-Bniedem, il-Konvenzjoni Internazzjonali dwar id-Drittijiet Ċivili u Politiċi u l-Konvenzjoni Internazzjonali dwar id-Drittijiet Ekonomiċi, Soċjali u Kulturali,
– wara li kkunsidra l-Artikolu 115(5) tar-Regoli ta’ Proċedura tiegħu,
A. billi fit-22 ta’ Jannar 2008 qorti reġjonali fil-provinċja ta’ Balkh fit-tramuntana ta’ l-Afganistan ikkundannat għall-mewt lill-ġurnalist Afgan ta’ 23 sena Perwiz Kambakhsh talli ċċirkola artiklu dwar id-drittijiet tan-nisa fl-Islam li kien niżżel mill-internet; billi l-imħalfin iddeċidew li l-artikolu kien “dagħwa” u kkundannaw lis-Sur Kambakhsh għall-mewt skond il-liġi Iżlamika tax-Xarija,
B. billi Perwiz Kambakhsh kien imċaħħad minn rappreżentazzjoni legali u kkundannatu mingħajr smigħ xieraq; billi hu kien allegatament imsawwat u mhedded li jiġi ġġustizzjat sakemm iffirma konfessjoni ta’ ħtija,
C. billi fis-6 ta’ Frar 2008, delegazzjoni mill-Assoċjazzjoni tal-Ġurnalisti Indipendenti ta’ l-Afganistan (AIJA) iltaqgħat mal-President Hamid Karzai f’Kabul, u tagħtu d-dettalji ta’ dan il-każ u talbitu jintervjeni f’isem is-Sur Kambakhsh,
D. billi l-Artikolu 34 tal-Kostituzzjoni ta’ l-Afganistan jiddefendi b’mod ċar id-dritt għall-libertà ta' l-espressjoni, b’konformità mad-Dikjarazzjoni Universali tad-Drittijiet tal-Bniedem, u jiddikkjara li “il-libertà ta’ l-espressjoni hi invjolabbli; kull Afgan għandu d-dritt li jesprimi ħsibijiet permezz ta’ kliem, kitba, illustrazzjonijiet kif ukoll b’mezzi oħra skond id-dispożizzjonijiet ta’ din il-Kostituzzjoni”,
E. billi ġurnalisti fl-Afganistan, b’mod speċjali n-nisa, qegħdin jiffaċjaw dejjem iktar intimidazzjoni, theddid ta’ mewt, ħtif u vjolenza,
F. billi l-kundanna għall-mewt ta’ Perwiz Kambakhsh inħarġet minkejja l-adozzjoni ta’ reżoluzzjoni ta’ l-Assemblea Ġenerali tan-NU fit-18 ta’ Diċembru 2007 li titlob moratorju dinji fuq l-użu tal-piena tal-mewt u waqt li total ta’ 135 pajjiż neħħew il-piena tal-mewt fil-liġi jew fil-prattika,
1. Jafferma mill-ġdid l-oppożizzjoni bla kundizzjoni tiegħu għall-piena tal-mewt u l-impenn tiegħu għar-rispett ta’ l-istat tad-dritt;
2. Jikkundanna l-arrest ta’ Perwiz Kambakhsh u d-deċiżjoni mill-qorti ta’ l-ewwel istanza tal-provinċja ta’ Balkh sabiex jiġi ġġustizzjat minħabba id-dagħa; jitlob li s-Sur Kambakhsh jinħeles;
3. Jistieden b’mod urġenti lill-awtoritajiet Afgani sabiex juru l-impenn tagħhom għad-drittijiet tal-bniedem u dawk demokratiċi biex jagħmlu ħilithom kollha sabiex iwaqqfu l-eżekuzzjoni tiegħu u jiksbu reviżjoni tal-każ tiegħu; jitlob lill-President Karzai, jekk il-qorti ta’ l-appell tikkonferma l-piena tal-mewt, sabiex juża l-poter tiegħu biex jagħti l-maħfra lis-Sur Kambakhsh;
4. Ifakkar fl-assigurazzjonijiet dwar is-sikurezza ta’ Perwiz Kambakhsh li l-President Hamid Karzai ta lil delegazzjoni mill-Assoċjazzjoni tal-Ġurnalisti Indipendenti ta’ l-Afganistan fis-6 ta’ Frar 2008;
5. Jesprimi s-solidarjetà tiegħu ma' dawk kollha li qed jiġġieldu għall-ġurnaliżmu indipendenti fl-Afganistan;
6. Jistieden lill-President u lill-Parlament ta’ l-Afganistan biex jieħdu l-passi xierqa sabiex iħaffu l-iżvilupp ta’ sistema penali u ġudizzjarja li tiffunzjona u li tkun imsejsa fuq l-istandards u l-aħjar prattiki internazzjonali; jilqa’ bi pjaċir l-istqarrija tal-Kummissjarju ta’ l-Affarijiet Barranin ta’ l-UE dwar appoġġ finanzjarju immedjat sabiex jgħin lill-Afganistan isaħħaħ l-istat tad-dritt u jirriforma l-ġudikatura tiegħu, stqarrija li saret fil-konferenza ta’ Ruma dwar “L-Istat tad-Dritt fl-Afganistan” f’Lulju 2007;
7. Jistieden lill-Gvern Afgan sabiex jirrispetta b’mod sħiħ id-Dikjarazzjoni Universali tad-Drittijiet tal-Bniedem tan-Nazzjonijiet Uniti u biex jiżgura li l-libertà ta' l-espressjoni tkun garantita u rispettata b'mod sħiħ għaċ-ċittadini kollha ta' l-Afganistan;
8. Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill, lill-Kummissjoni u lill-gvernijiet u l-parlamenti ta' l-Istati Membri ta’ l-UE u tar-Repubblika Iżlamika ta’ l-Afganistan.