MOZZJONI GĦAL RIŻOLUZZJONI KONĠUNTA
7.10.2008
- –Georgios Papastamkos, Robert Sturdy, Corien Wortmann-Kool u Godelieve Quisthoudt-Rowohl, f'isem il-Grupp PPE-DE
- –Erika Mann, f'isem il-Grupp PSE
- –Jorgo Chatzimarkakis, Gianluca Susta, Daniel Dăianu u Ignasi Guardans Cambó, f'isem il-Grupp ALDE
- –Mieczysław Edmund Janowski, Adam Bielan, Cristiana Muscardini, Ģirts Valdis Kristovskis, Zbigniew Krzysztof Kuźmiuk u Seán Ó Neachtain, f'isem il-Grupp UEN
- –UEN (B6‑0521/2008)
- –PPE-DE (B6‑0524/2008)
- –ALDE (B6‑0525/2008)
- –PSE (B6‑0529/2008)
Riżoluzzjoni tal-Parlament Ewropew dwar is-sospensjoni tar-Rawnd ta' Doha tad-WTO u l-futur tal-Aġenda ta' Doha dwar l-Iżvilupp
Il-Parlament Ewropew,
– wara li kkunsidra d-Dikjarazzjoni Ministerjali ta’ Doha tal-Organizzazzjoni Dinjija tal-Kummerċ (WTO) tal-14 ta' Novembru 2001,
– wara li kkunsidra r-riżoluzzjonijiet preċedenti tiegħu rigward l-Aġenda ta' Doha għall-Iżvilupp (DDA),
– wara li kkunsidra d-Dokument Finali tas-Sessjoni Annwali 2008 tal-Konferenza Parlamentari dwar id-WTO, adottat b'kunsens fit-12 ta’ Settembru 2008 f’Ġinevra,
– wara li kkunsidra l-Artikolu 103(4) tar-Regoli ta’ Proċedura tiegħu,
A. billi t-taħditiet ministerjali tad-WTO maħsuba biex jikkonkludu r-Rawnd ta’ Doha daħlu f’fażi li ma setgħux jitkomplew fl-aħħar ta’ Lulju tal-2008,
B. billi n-negozjati waqfu f'Ġinevra f'Lulju tal-2008; billi nkiseb xi progress fuq ċerti kwistjonijiet, filwaqt li kwistjonijiet importanti oħra għall-konklużjoni ta' modalitajiet sħaħ ma ġewx indirizzati fil-ftehima ta' qafas,
C. billi l-interessi tal-pajjiżi li qed jiżviluppaw, u b’mod partikulari l-pajjiżi l-inqas żviluppati, kif ukoll l-impenn tal-membri kollha tad-WTO għar-‘Rawnd ta' Żvilupp’, għandhom jinżammu fil-qalba tan-negozjati,
D. billi n-nuqqas li jiġi finalizzat ir-Rawnd ta' Doha jwassal għal żieda fl-inċertezza tal-ekonomija globali preżenti u jista' jipperikola l-kredibilità tas-sistema tal-kummerċ multilaterali u dan imbagħad iwassal għal qabża favur ftehimiet kummerċjali bilaterali u reġjonali,
1. Huwa serjament iddiżappuntat u mħasseb bil-fatt li t-taħdidiet ministerjali tad-WTO f'Lulju li għadda waslu f’punt li ma setgħux jitkomplew;
2. Itenni l-impenn sħiħ tiegħu għall-istrateġija multilaterali għall-politika kummerċjali u sabiex id-WTO tkun tista’ tiggarantixxi riżultat komprensiv, ambizzjuż u bbilanċjat għall-kummerċ internazzjonali b'rispett sħiħ għall-Għanijiet tal-Millenju għall-Iżvilupp;
3. Huwa konvint li fil-kuntest preżenti, ikkaratterizzat bi kriżi ekonomika u finanzjarja, konklużjoni pożittiva tar-Rawnd ta' Doha tista' tkun fattur li jwassal għal stabilità;
4. Jemmen li jiġri x'jiġri fil-kuntest tal-progress tad-DDA, id-WTO, flimkien mal-organizzazzjonijiet internazzjonali l-oħra, għandha bżonn tindirizza, b'mod konsistenti u urġenti, l-isfidi globali l-ġodda li fihom il-kummerċ għandu parti importanti, bħas-sigurtà tal-ikel, l-enerġija, l-għajnuna għall-kummerċ u l-bidla fil-klima;
5. Huwa konxju bis-sħiħ dwar id-diffikultajiet ta’ Impenn Uniku; jilqa’ b’sodisfazzjon il-progress li sar sa issa matul in-negozjati, liema progress għandu jipprovdi bażi importanti u kkonsolidata għal-laqgħa li jmiss sabiex jitkompla r-Rawnd ta’ Doha u sabiex jinkiseb riżultat ta’ suċċess;
6. jistieden lill-UE u lill-Istati Uniti tal-Amerka, kif ukoll lill-G20 bħala parteċipanti ekonomiċi ġodda importanti, biex jerfgħu r-responsabbiltajiet tagħhom fin-negozjati attwali, biex jirrispettaw bis-sħiħ l-ispirtu tar-Rawnd ta’ Żvilupp u biex jagħmlu kull sforz biex jilħqu ftehim kemm jista' jkun malajr; għal darb’oħra jenfasizza l-importanza tad-divrenzjar bejn il-pajjiżi li qed jiżviluppaw u l-pajjiżi emerġenti;
7. Jistieden lill-Indja u lill-Istati Uniti tal-Amerka biex isibu soluzzjoni politika għall-kwistjoni dwar il-kundizzjonijiet għall-applikazzjoni ta' Mekkaniżmi ta' Salvagwardja Speċjali (SSM) biex jiġi żgurat bilanċ ġust bejn il-kummerċ u t-tħassib tas-sigurtà tal-ikel, sabiex tkun tista' ssir kontinwazzjoni tan-negozjati tad-DDA f'Ġinevra dwar il-kwistjonijiet l-oħra pendenti;
8. Jitlob lill-pajjiżi żviluppati u dawk li qed jiżviluppaw aktar avvanzati biex isegwu l-inizjattiva Kollox barra l-Armi tal-UE, li toffri aċċess għas-suq mingħajr l-ebda dazju u mingħajr l-ebda kwota għall-LCDs;' jenfasizza wkoll l-importanza tal-Għajnuna għall-Kummerċ;
9. Jemmen li l-bżonnijiet tal-pajjiżi li qed jiżviluppaw u speċjalment ta' dawk l-inqas żviluppati għandhom jingħataw prijorità fin-negozjati tad-DDA, filwaqt li l-iżvilupp ikun fil-quċċata tal-kunsiderazzjonijiet kollha;
10. Jemmen li d-diffikultajiet tad-DDA jenfasizzaw il-bżonn, ladarba r-Rawnd jintemm, biex tkun indirizzata b'urġenza l-kwistjoni tar-riforma tad-WTO sabiex tkun aktar effettiva u trasparenti u biex titjieb il-leġittimità demokratika, ir-responsabilità, it-trasparenza l-inklussività u l-integrità tagħha fl-istruttura usa’ tal-governanza globali; jemmen li l-parlamentari għandhom jeżerċitaw skrutinju saħansitra aktar rigoruż u effettiv fil-qasam tal-kummerċ internazzjonali;
11. Itenni l-bżonn ta' għajnuna teknika mmirata u l-bini tal-kapaċità biex il-pajjiżi li qed jiżviluppaw ikunu megħjuna jinvolvu ruħhom effettivament fid-DDA;
12. Jistieden lill-Kummissjoni Ewropea u lill-Kunsill biex jistabbilixxu ftehima fl-ispirtu tat-Trattat ta' Liżbona sabiex tiġi żgurata l-parteċipazzjoni sħiħa tal-Parlament Ewropew fin-negozjati internazzjonali tal-UE;
13. Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill, lill-Kummissjoni, lill-gvernijiet u lill-parlamenti tal-Istati Membri u lid-Direttur Ġenerali tad-WTO.