dwar is-segwitu tal-Konferenza ta' Monterrey ta' l-2002 dwar l-Iffinanzjar għall-Iżvilupp

(2008/2050(INI))

Il-Parlament Ewropew,

– wara li kkunsidra l-Konsensus ta’ Monterrey, adottat mill-Konferenza Internazzjonali dwar l-Iffinanzjar għall-Iżvilupp (FfD) f’Monterry, il-Messiku, bejn it-18 u t-22 ta’ Marzu 2002,

– wara li kkunsidra l-impenji magħmula mill-Istati Membri fil-Kunsill Ewropew ta’ Barċellona li sar fl-14 ta’ Marzu 2002 (l-impenji ta’ Barċellona),

– wara li kkunsidra r-riżoluzzjoni tiegħu tal-25 ta’ April 2002 dwar l-iffinanzjar ta’ l-għajnuna għall-iżvilupp¹,

– wara li kkunsidra r-riżoluzzjoni tiegħu tas-7 ta' Frar 2002 dwar l-iffinanzjar ta’ l-għajnuna għall-iżvilupp²,

– wara li kkunsidra l-istqarrija konġunta tal-Kunsill u tar-rappreżentanti tal-gvernijiet ta' l-Istati Membri li ltaqgħu fi ħdan il-Kunsill, il-Parlament Ewropew u l-Kummissjoni dwar il-Politika għall-Iżvilupp ta' l-Unjoni Ewropea: ‘Il-Konsensus Ewropew’ ³ iffirmata fl-20 ta’ Diċembru 2005,

– wara li kkunsidra l-Komunikazzjoni mill-Kummissjoni intitolata ‘Ngħaġġlu l-progress lejn il-Miri għall-Iżvilupp għall-Millennju’ (COM(2008)0177) tad-9 ta’ April 2008,

– wara li kkunsidra l-Komunikazzjoni mill-Kummissjoni intitolata ‘Nonoraw il-wegħdiet ta’ l-Ewropa dwar il-finanzjament ta’ l-Iżvilupp’ (COM(2007)0164) ta' l-4 ta’ April 2007,

– wara li kkunsidra l-Komunikazzjoni mill-Kummissjoni tat-2 ta' Marzu 2006 intitolata ‘Finanzjament għall-iżvilupp u l-Effettività ta’ l-Għajnuna – L-isfidi biex tiġi miżjuda l-għajnuna ta’ l-UE 2006 - 2010’ (COM(2006)0085),

– wara li kkunsidra l-Komunikazzjoni mill-Kummissjoni tat-12 ta' April 2005 intitolata ‘Li tħaffef il-progress lejn il-kisba ta’ l-Għanijiet tal-Millennju għall-Iżvilupp - Finanzjament għall-Iżvilupp u Effettività ta’ l-Għajnuna’ (COM(2005)0133),

– wara li kkunsidra l-Komunikazzjoni mill-Kummissjoni tal-5 ta' Marzu 2004 lill-Kunsill u lill-Parlament Ewropew intitolata ‘Insarrfu l-Kunsens ta' Monterrey fil-prattika: il-kontribuzzjoni tal-Unjoni Ewropea’ (COM(2004)0150),

– wara li kkunsidra l-konklużjonijiet tal-Kunsill ta’ l-14 ta’ Marzu 2002 dwar il-Konferenza tan-Nazzjonijiet Uniti (NU) dwar l-Iffinanzjar għall-Għajnuna (Monterrey),

– wara li kkunsidra l-Għanijiet tal-Millennju għall-Iżvilupp (MDGs) adottati waqt is-Samit tal-Millennju tan-Nazzjonijiet Uniti li sar f’New York bejn is-6 u t-8 ta' Settembru 2000, u li ġew konfermati mill-ġdid waqt Konferenzi sussegwenti tan-NU, speċjalment waqt il-Konferenza ta' Monterrey dwar l-Iffinanzjar għall-Iżvilupp,

– wara li kkunsidra l-impenn li sar waqt il-Kunsill Ewropew ta’ Göteborg li ltaqa’ bejn il-15 u s-16 ta’ Ġunju 2001 biex l-Istati Membri jilħqu l-mira tan-NU għall-Assistenza Uffiċjali għall-Iżvilupp (ODA) ta’ 0,7% tad-Dħul Gross Nazzjonali (GNI),

– wara li kkunsidra l-Komunikazzjoni mill-Kummissjoni tat-2 ta' Marzu 2006 intitolata ‘L-Għajnuna ta' l-UE: Inwassluha aktar, b’mod aħjar u aktar malajr’ (COM(2006)0087),

– wara li kkunsidra r-riżoluzzjoni tiegħu tat-22 ta’ Mejju 2008 dwar is-segwitu tad-Dikjarazzjoni ta’ Pariġi ta’ l-2005 dwar l-Effettività ta’ l-Għajnuna¹,

– wara li kkunsidra l-Artikolu 45 tar-Regoli ta' Proċedura tiegħu,

– wara li kkunsidra r-rapport tal-Kumitat għall-Iżvilupp u l-opinjoni tal-Kumitat għall-Baġits (A6-0310/2008),

A.  billi għat-tieni darba fl-istorja, in-Nazzjonijiet Uniti qed torganizza Konferenza Internazzjonali dwar l-Iffinanzjar għall-Iżvilupp, li għandha l-għan li tlaqqa’ flimkien il-Kapijiet ta' Stat u Gvernijiet u mhux biss lill-Ministri ta’ l-Iżvilupp iżda wkoll lill-Ministri tal-Finanzi, kif ukoll lir-rappreżentanti ta’ l-organizzazzjonijiet finanzjarji internazzjonali, tal-banek u n-negozji privati u tas-soċjetà ċivili, biex jevalwaw il-progress li sar mill-Ewwel Samit Dinji ta’ l-2002 f’Monterrey dwar l-Iffinanzjar għall-Iżvilupp,

B.   billi, biex jintlaħqu l-MDGs, hemm bżonn ta’ żieda finanzjarja qawwija,

C.  billi l-iffinanzjar għall-iżvilupp għandu jkun definit bħala l-iktar mod vantaġġjuż kif wieħed jirrispondi għall-bżonnijiet tal-iżvilupp tad-dinja u għall-inċertezzi globali,

D.  billi l-bżonn ta’ riżorsi finanzjarji sostenibbli, previdibbli u adegwati huwa urġenti iktar minn qatt qabel, specjalment meta wiehed iqis l-isfida tat-tibdil fil-klima u l-implikazzjonijiet tagħha, inklużi d-diżastri naturali u b’mod partikolari l-vulnerabilità tal-pajjiżi li qed jiżviluppaw,

E.   billi l-UE hija l-ikbar donatur ta’ għajnuna fuq skala globali, azzjonista ewlenija fl-istituzzjonijiet finanzjarji internazzjonali, u l-imsieħeba kummerċjali l-aktar importanti għall-pajjiżi li qed jiżviluppaw,

F.   billi l-UE diġà impenjat ruħha li f’limitu ta’ żmien ċar u obbligatorju tilħaq ir-rata ta’ 0.56% tal-GNI li hija l-mira sa l-2010 u r-rata ta’ 0.7% tal-GNI sa l-2015,

G. billi, jekk it-tendenzi attwali relatati mal-livelli ta’ l-ODA ta’ l-Istati Membri jkomplu, l-Istati Membri mhux se jilħqu l-miri li impenjaw ruħhom li jilħqu ta' 0,51% għall-UE 15 (jiġifieri l-Istati Membri li kienu parti mill-UE qabel it-tkabbir ta’ l-2004) u 0,17% għall-UE 12 (jiġifieri l-Istati Membri li saru Membri ta’ l-UE fl-1 ta’ Mejju 2004 u fl-1 ta’ Jannar 2007) tal-GNI sa l-2010,

H.  billi l-għajnuna programmabbli lill-Afrika qed tiżdied minkejja t-tnaqqis ġenerali ta’ l-ODA fl-2007,

I.   billi dan l-aħħar tfaċċaw sfidi ta' żvilupp ġodda u sinifikanti, inklużi t-tibdil fil-klima, bidliet strutturali fis-swieq tal-prodotti u b'mod partikolari dawk ta' l-ikel u ż-żejt, u tendenzi ġodda importanti fil-koperazzjoni Nofsinhar-Nofsinhar, inklużi l-appoġġ għall-infrastruttura miċ-Ċina fl-Afrika u s-self mill-Bank Brażiljan għall-Investiment BNDES fl-Amerika Latina,

J.    billi s-servizzi finanzjarji f'ħafna pajjiżi li qed jiżviluppaw huma sottożviluppati bħala riżultat ta' ħafna fatturi inklużi restrizzjonijiet tal-provvista tas-servizzi, nuqqas ta' ċertezza legali u drittijiet tal-proprjetà,

1.   Itenni l-impenn tiegħu għall-qerda tal-faqar, għall-iżvilupp sostenibbli u għall-ilħuq ta’ l-MDGs, bħala l-uniku mod kif tinkiseb il-ġustizzja soċjali u kif titjieb il-kwalità tal-ħajja għal madwar biljun persuna madwar id-dinja li jgħixu f’faqar estrem, jiġifieri li għandhom dħul ta' inqas minn dollaru kuljum;

2.   Jistieden lill-Istati Membri biex jagħmlu diviżjoni ċara bejn l-infiq għall-iżvilupp u l-infiq għall-interessi ta' politika barranija u f'dan ir-rigward l-ODA għandha tkun konformi mal-kriterji għall-ODA stabbiliti mill-Kumitat għall-Assistenza ta' l-Iżvilupp ta' l-Organizzazzjoni għall-Koperazzjoni u l-Iżvilupp Ekonomiku (OECD/DAC) u r-rakkomandazzjonijiet ta' l-OECD/DAC dwar il-ħall mill-irbit ta' l-ODA;

3.   Jenfasizza l-bżonn assolut għall-UE li timmira għall-ogħla livell ta’ koordinazzjoni biex tikseb koerenza mal-politiki Komunitarji l-oħra (l-ambjent, il-migrazzjoni, ir-riżorsi umani, l-agrikoltura, eċċ) u biex tevita li jkun hemm xogħol doppju jew nuqqas ta' konsistenza fl-attivitajiet;

4.   Ifakkar li l-azzjonijiet immedjati u neċessarji li għandhom jittieħdu mill-UE biex din tittratta l-konsegwenzi drammatiċi tal-prezzijiet ta’ l-ikel li qed jiżdiedu b’rata allarmanti ma għandhomx jinftiehmu u jitwettqu bħala parti mill-isforzi meħtieġa mill-Konsensus ta’ Monterrey; jistenna bil-ħerqa għalhekk proposta konkreta mill-Kummissjoni dwar l-użu ta' fondi ta' emerġenza;

5.   Jenfasizza li l-piż amministrattiv eċċessiv u sproporzjonat f’xi wħud mill-pajjiżi msieħba, ixekkel l-effettività ta’ l-għajnuna għall-iżvilupp; jesprimi l-biża’ li hija qed tirriskja li ttellef l-ilħuq ta’ l-Għanijiet tal-Millennju għall-Iżvilupp (MDGs);

6.   Jinnota li l-UE għadha trid issib il-bilanċ it-tajjeb bejn żewġ approċċi kontradittorji dwar l-għajnuna għall-iżvilupp: minn naħa waħda, biex tafda lill-pajjiżi msieħba fl-allokazzjoni adegwata tal-fondi u biex tgħin lill-amministrazzjonijiet tagħhom jiżviluppaw l-istrumenti l-ġusti għall-implimentazzjoni tal-fondi; min-naħa l-oħra, biex tkun identifikata l-għajnuna finanzjarja sabiex tkun evitata allokazzjoni ħażina jew mingħajr effett ta’ l-għajnuna;

Volumi ta’ l-ODA

7.   Jiġbed l-attenzjoni li l-UE hija d-donatur dinji ewlieni ta’ l-ODA, li tirrappreżenta kważi 60% ta’ l-għajnuna għall-iżvilupp uffiċjali dinjija, u jilqa’ b’sodisfazzjon il-fatt li l-parti ta’ l-UE ta' l-ODA globali qed tiżdied matul is-snin; madanakollu jitlob lill-Kummissjoni biex tipprovdi dejta ċara u trasparenti dwar is-sehem tal-baġit ta' l-UE ddedikat għall-għajnuna għall-iżvilupp ta’ l-UE sabiex tevalwa s-segwitu tal-Konsensus ta’ Monterrey mid-donaturi Ewropej kollha; jesprimi wkoll id-dispjaċir tiegħu li l-livell tal-kontribuzzjonijiet finanzjarji ta’ l-UE għall-pajjiżi li qed jiżviluppaw ma għandux viżjoni u jistieden lill-Kummissjoni biex tiżviluppa komunikazzjoni u strumenti ta’ informazzjoni xierqa u mmirati biex tiżdied il-viżjoni ta’ l-għajnuna għall-iżvilupp ta’ l-UE;

8.   Jilqa’ b’sodisfazzjon il-fatt li l-UE laħqet il-mira tagħha li torbot ta’ ODA li l-Komunità jkollha medja ta’ 0.39% tal-GNI sa l-2006, iżda jinnota t-tnaqqis allarmanti ta’ l-għajnuna ta’ l-UE fl-2007 minn EUR 47,7 biljun fl-2006 (0.41% tal-GNI kollettiv ta’ l-UE) għal EUR 46.1 biljun fl-2007 (0.38% tal-GNI kollettiv ta’ l-UE) u jistieden lill-Istati Membri biex iżidu l-volumi ta’ l-ODA biex jilħqu l-mira mwiegħda ta’ 0.56 % tal-GNI sa l-2010;

9.   Jinsisti li ma għandux ikun hemm tnaqqis ieħor mill-ODA rappurtat fl-Istati Membri; jinnota li l-UE se tkun tat EUR 75 biljun inqas milli kien imwiegħed għall-perjodu 2005-2010 jekk se tkompli t-tendenza attwali;

10. Jesprimi tħassib serju li l-maġġuranza ta' l-Istati Membri (18 minn 27, b'mod speċjali l-Latvja, l-Italja, il-Portugall, il-Greċja u r-Repubblika Ċeka) ma setgħux iżidu l-livell tagħhom ta' l-ODA bejn l-2006 u l-2007 u li kien hemm ukoll tnaqqis drammatiku ta' aktar minn 10% f'numru ta' pajjiżi bħall-Belġju, Franza u r-Renju Unit; jistieden lill-Istati Membri biex jissodisfaw il-volumi ODA tagħhom li huma wiegħdu; jinnota b’sodisfazzjon li xi Stati Membri (id-Danimarka, l-Irlanda, il-Lussemburgu, Spanja, l-Iżvezja u l-Olanda) huma ċerti li se jilħqu l-miri tagħhom ta’ l-ODA sa l-2010 u jinsab kunfidenti li dawn l-Istati Membri se jżommu l-livelli għoljin tagħhom ta’ ODA;

11. Jilqa’ b’sodisfazzjon il-pożizzjoni soda tal-Kummissjoni fl-isforzi biex tikkonċentra kemm fuq il-kwantità u kemm fuq il-kwalità ta’ l-għajnuna għall-iżvilupp mill-Istati Membri u jappoġġja b’mod sħiħ it-twissija tagħha kontra konsegwenzi negattivi potenzjalment għoljin għall-Istati Membri li jonqsu milli jissodisfaw l-impenji finanzjarji tagħhom; jistieden lill-Kummissjoni biex tuża l-ħila esperta u l-awtorità tagħha biex tikkonvinċi donaturi pubbliċi u privati oħra biex jonoraw il-wegħdiet finanzjarji tagħhom;

12. Jinsab imħasseb ħafna li xi Stati Membri qed jiffinanzjaw b’mod retroattiv iż-żidiet ODA, sitwazzjoni li qed twassal għal telf nett għall-pajjiżi li qed jiżvilupaw ta’ aktar minn EUR 17-il biljun;

13. Jilqa’ b’sodisfazzjon l-approċċ ta’ xi Stati Membri li jiżviluppaw skedi plurijennali li jorbtu għaż-żieda tal-livelli ta’ l-ODA biex jilħqu l-mira tan-NU ta’ 0.7% sa l-2015; jitlob lill-Istati Membri li għadhom m'għamlux dan biex jiżvelaw mill-aktar fis possibbli l-iskedi plurijennali tagħhom; jenfasizza li l-Istati Membri għandhom jadottaw dawn l-iskedi qabel il-Konferenza Internazzjonali dwar l-Iffinanzjar għall-Iżvilupp li jmiss u għandhom jissodisfaw l-impenji tagħhom;

14. Josserva li t-tnaqqis irrappurtat fl-2007 fil-livelli ta’ għajnuna kien minħabba li f’xi każijiet kien hemm żieda artifiċjali taċ-ċifri ta’ l-2006 minħabba li nħafer xi dejn; jistieden lill-Istati Membri biex iżidu l-livelli ta’ l-ODA b’mod sostenibbli billi jikkonċentraw fuq iċ-ċifri mingħajr id-dejn li nħafer;

15. Jikkunsidra li d-diskrepanza bejn il-wegħdiet li jsiru ta’ spiss ta’ iktar assistenza finanzjarja u l-ammonti konsiderevolment inqas li attwalment jingħataw hija totalment mhux aċċettabbli u huwa mħasseb li xi Stati Membri qed juru nuqqas ta' ħeġġa lejn l-għajnuna;

16. Jenfasizza l-fatt li l-konsultazzjoni ma' gvernijiet sħab, parlamenti nazzjonali u l-organizazzjonijiet tas-soċjetà ċivili hija kruċjali fit-teħid tad-deċiżjonijiet dwar il-volumi u d-destinazzjonijiet ta’ l-ODA;

Ħeffa, flessibilità, prevedibilità u sostenibilità tal-flussi finanzjarji

17. Jenfasizza li l-assistenza teħtieġ li titwassal fil-ħin u jesprimi n-nuqqas ta’ sodisfazzjon tiegħu li l-proċessi biex titwassal l-assistenza huma ħafna drabi suġġetti għal dewmien bla bżonn;

18. Jenfasizza l-bżonn li l-flessibilità tkun bilanċjata fit-twassil tal-fondi ta’ koperazzjoni, sabiex wieħed jirrispondi għaċ-ċirkustanzi li qed jinbidlu, bħall-prezzijiet ta’ l-ikel li qed jogħlew bl-imperattiv għal iffinanzjar prevedibbli li jippermetti lill-pajjiżi msieħba jippjanaw żvilupp sostenibbli u adattament u mitigazzjoni għall-bidla fil-klima;

19. Jitlob bis-sħiħ għall-osservanza ċara tal-prinċipji ta’ self u ffinanzjar responsabbli, li jagħmlu l-operazzjonijiet ta' self u ta' ffinanzjar sostenibbli f'termini ta' żvilupp ekonomiku u ambjentali fuq il-linji u skond il-prinċipji ta' l-ekwatur; jistieden lill-Kummissjoni biex tipparteċipa fit-twaqqif ta’ prinċipji bħal dawn u biex tagħmel pressjoni fil-fora internazzjonali għal miżuri li jorbtu biex tpoġġihom fil-prattika b’tali mod li l-kopertura testendi għal parteċipanti ta’ l-iżvilupp ġodda mis-setturi pubbliċi u privati;

Dejn u ħarba mill-kapital

20. japprova b'mod sħiħ l-isforzi tal-pajjiżi li qed jiżviluppaw biex iżommu s-sostenibilità tad-dejn għal tul ta' żmien u biex jimplimentaw l-inizjattiva tal-pajjiżi foqra li għandhom djun kbar (HIPC), li huma ta' importanza ewlenija biex jintlaħqu l-MDGs; jiddispjaċih, madankollu, li l-pjani ta' tnaqqis eskludew numru kbir ta' pajjiżi li għalihom id-dejn jibqa' ostakolu biex jilħqu l-MDGs;jinsisti dwar il-bżonn ta' dibattitu internazzjonali urġenti dwar l-espansjoni tat-tnaqqis ta' miżuri internazzjonali għal numru ta' pajjiżi midjuna, li bħalissa jinsabu esklużi mill-inizjattiva HIPC;

21. Jistieden lill-Kummissjoni biex tindirizza l-kwistjoni ta' djun 'mistmerra' jew illeġittimi, li jfissru djun li ġew minn self irresponsabbli, ta’ interessi individwali, bi traskuraġni jew b'mod inġust u l-prinċipji ta' finanzi responsabbli f'negozjati bilaterali u multilaterali biex jittaffa d-dejn; jilqa’ b’sodisfazzjon is-sejħa għall-azzjoni tal-Kummissjoni biex tillimita d-drittijiet ta' kredituri kummerċjali u vulture funds li jridu jitħallsu lura, fil-każ ta' proċeduri ġudizzjarji;

22. Jistieden lill-Istati Membri biex jimxu skond il-qafas ta' sostenibilità tad-dejn u jisħqu fuq l-iżvilupp tiegħu biex jitqies id-dejn intern ta' pajjiż u l-bżonnijiet finanzjarji tiegħu; jistieden lill-Istati Membri kollha biex jirrikonoxxu li r-responsabilità ta' min isellef ma tinvolvix biss konformità mal-qafas ta' sostenibilità, imma tinvolvi wkoll:

-  il-konsiderazzjoni tal-vulnerabilità tal-pajjiżi li qed jissellfu għal xokkijiet esterni, billi jipprovdu f'dawn il-każi għas-sospensjoni jew it-tnaqqis tal-ħlas lura;

-  l-inkorporazzjoni ta' rekwiżiti ta' trasparenza, għaż-żewġ partijiet, fil-ftehimiet ta' self;

-  l-eżerċizzju ta' aktar viġilanza biex jiġi żgurat li s-self ma jikkontribwix għall-ksur tad-drittijiet tal-bniedem jew żieda fil-korruzzjoni;

23. Iħeġeġġ lill-UE biex tippromwovi sforzi internazzjonali li għandhom l-għan li jistabbilixxu xi forma ta' proċeduri internazzjonali ta' falliment jew proċedura ta' arbitraġġ ġust u trasparenti biex tittratta b'mod effiċjenti u ġust ma’ kwalunkwe kriżi ta' dejn fil-futur;

24. Jiddispjaċih li l-Kummissjoni ma tagħmilx aktar enfasi dwar il-mobilizzazzjoni tar-riżorsi interni biex tiffinanzja l-iżvilupp, għax dawn huma riżorsi ta' aktar awtonomija għall-pajjiżi li qed jiżviluppaw; jinkoraġġixxi lill-Istati Membri li jkunu involuti b'mod sħiħ fl-inizjattiva ta' trasparenza fl-industriji ta' estrazzjoni u biex jitolbu li tkun imsaħħa; jistieden lill-Kummissjoni biex titlob lill-Bord ta' l-Istandards Internazzjonali ta' Kontabilità (IASB) biex jinkludi fost dawn l-istandards internazzjonali ta' kontabilità ħtieġa ta' rappurtar pajjiż b'pajjiż ta' l-attivitajiet tal-kumpaniji multinazzjonali fis-setturi kollha;

25. Jiddispjaċih li l-pakkett ta’ komunikazzjoni tal-Kummissjoni dwar l-effettivit๠ta’ l-għajnuna ma jsemmix il-ħarba mill-kapital bħala fattur ta’ riskju għall-ekonomiji ta’ pajjiżi li qed jiżviluppaw; jiġbed l-attenzjoni li l-ħarba mill-kapital tagħmel ħsara serja lill-iżvilupp ta' sistemi ekonomiċi sostenibbli fil-pajjiżi li qed jiżviluppaw u jiġbed l-attenzjoni li kull sena l-evażjoni tat-taxxa tiswa lill-pajjiżi li qed jiżviluppaw aktar milli jirċievu fil-forma ta' ODA; jistieden lill-Kummissjoni biex tinkludi fil-politiki tagħha miżuri li jevitaw li ssir ħarba mill-kapital, kif mitlub mill-Konsensus ta’ Monterrey, li jinkludu analiżi ċara tal-kawżi tal-ħarba mill-kapital, bil-għan li jingħalqu r-refuġji fiskali (tax havens), li xi ftit minnhom jinsabu fl-UE jew joperaw mill-qrib ma’ l-Istati Membri;

26. Jinnota, b'mod partikolari, li skond il-Bank Dinji il-komponent illegali minn din il-ħarba mill-kapital jammonta għal bejn 1 000 sa 1 600 biljun Dollaru Amerikan kull sena, li nofshom jiġu mill-pajjiżi li qed jiżviluppaw; jappoġġja l-isforzi internazzjonali biex jiġu ffriżati u rkuprati l-assi misruqa u jitlob lill-Istati Membri li għadhom m'għamlux hekk biex jirratifikaw il-Konvenzjoni tan-Nazzjonijiet Uniti kontra l-korruzzjoni; jiddeplora li mhux qed isiru sforzi simili biex tiġi miġġielda l-evażjoni tat-taxxa u jitlob lill-Kummissjoni u lill-Istati Membri biex jippromwovu l-estensjoni globali tal-prinċipju ta' l-iskambju awtomatiku ta' l-informazzjoni dwar it-taxxa, jitolbu li l-Kodiċi ta' Kondotta dwar l-evażjoni tat-taxxa li qed titfassal fil-preżent fil-Kunsill Ekonomiku u Soċjali tan-Nazzjonijiet Uniti (ECOSOC) jiġi anness mad-dikjarazzjoni ta' Doha u jappoġġjaw it-trasformazzjoni tal-kumitat tat-tassazzjoni tan-NU f'korp ġenwin intergovernattiv mgħammar b'riżorsi addizzjonali biex ikun jista' jiġġieled il-ġlieda internazzjonali kontra l-evażjoni tat-taxxa flimkien ma' l-OECD;

Mekkaniżmi finanzjarji innovattivi

27. Jilqa’ b’sodisfazzjon il-proposti għal mekkaniżmi finanzjarji innovattivi mressqa mill-Istati Membri u jistieden lill-Kummissjoni biex teżaminahom skond il-livell ta’ faċilità ta’ implimentazzjoni prattika, ta’ sostenibilità, ta’ addizzjonalità, ta’ spejjeż tat-tranżazzjoni u ta’ effettività; jitlob li jkun hemm mekkaniżmi u strumenti finanzjarji li jipprovdu fondi ġodda u li ma jpoġġux flussi finanzjarji futuri f’riskju;

28. Jitlob li jkun hemm mekkaniżmi u strumenti finanzjarji li jipprovdu miżuri li jsaħħu flus privati kif stipulat fil-Konsensus ta’ Monterrey u li japplikaw b’mod effettiv il-garanziji ta’ kreditu;

29. Jistieden lill-Kummissjoni biex issaħħaħ b'mod qawwi l-finanzjament għall-miżuri t'adattament u mitigazzjoni tat-tibdil fil-klima fil-pajjiżi li qed jiżviluppaw, b'mod partikolari dawk ta' l-Alleanza dwar it-Tibdil fil-Klima Globali; jenfasizza l-bżonn akut għal finanzjament lil hinn minn flussi attwali ta' l-ODA għaliex l-ODA weħidha m'għandhiex tipprovdi rispons adegwat għall-miżuri ta’ adattament u mitigazzjoni tat-tibdil fil-klima fil-pajjiżi li qed jiżviluppaw; jenfasizza li għal dan il-għan għandhom jiġu żviluppati b'mod urġenti mekkaniżmi ta' finanzjament innovattivi, bħal ma huma taxxi fuq l-avjazzjoni u l-kummerċ fiż-żejt, kif ukoll l-identifikar tad-dħul mill-irkant tas-Sistema tal-Kummerċ ta' l-Emissjonijiet ta' l-UE (EU ETS);

30. Jilqa’ b’sodisfazzjon il-proposta tal-Kummissjoni li tistabbilixxi Mekkaniżmu ta' Finanzjament tal-Klima Globali, ibbażat fuq il-prinċipju ta' għajnuna antiċipata biex tiffinanzja miżuri ta' mitigazzjoni u adattament fil-pajjiżi li qed jiżviluppaw; jistieden lill-Istati Membri u lill-Kummissjoni biex jagħmlu impenji finanzjarji sostanzjali sabiex jimplimentaw il-proposta b'mod urġenti;

31. Jistieden lill-Kummissjoni u lill-Istati Membri sabiex jidentifikaw mill-inqas 25% mid-dħul futur ta' l-irkant mill-UE ETS biex jiffinanzjaw miżuri ta’ adattament u mitigazzjoni għat-tibdil fil-klima fil-pajjiżi li qed jiżviluppaw;

32. Jistieden lill-Kummissjoni biex tiżviluppa aċċess għall-iffinanzjar għal impriżi żgħar u għall-bdiewa, bħal mezz kif tiżdied il-produzzjoni ta’ l-ikel u kif tinstab soluzzjoni sostenibbli għall-kriżi ta’ l-ikel;

33. Jistieden lill-Bank Ewropew ta’ l-Investiment (EIB) biex jinvestiga l-possibilitajiet għat-twaqqif immedjat ta’ fond ta’ garanzija li jappoġġja skemi ta’ mikrokreditu u skemi ta’ lqugħ għar-riskju (risk-hedging) li jirrispondu mill-viċin għall-bżonnijiet tal-produtturi ta’ l-ikel lokali f’pajjiżi li qed jiżviluppaw li huma ifqar;

34. Jilqa’ b’sodisfazzjon il-proposta biex jitwaqqaf fond multidonatur li għandu x'jaqsam mas-sessi li tnieda fin-NU u li se jkun immexxi mill-Fond għall-Iżvilupp tan-Nisa tan-Nazzjonijiet Uniti (UNIFEM), bil-għan li jippromwovi u jiffinanzja politiki ta' ugwaljanza bejn is-sessi f'pajjiżi li qed jiżviluppaw; jistieden lill-Kunsill u lill-Kummissjoni biex jevalwaw u japprovaw din l-inizjattiva internazzjonali;

35. Jitlob li jiġu rduppjati l-isforzi li jinkoraġġixxu l-iżvilupp tas-servizzi finanzjarji, minħabba li s-settur bankarju għandu l-potenzjal li jillibera l-finanzjament lokali għall-iżvilupp u li barra minn hekk settur tas-servizzi finanzjarji stabbli huwa l-aħjar mod biex tiġi miġġielda l-ħarba tal-kapital;

36. Jistieden lill-partijiet interessati biex japprezzaw b'mod sħiħ il-potenzjal enormi tad-dħul mir-riżorsi naturali; f'dan ir-rigward jara li huwa essenzjali li l-industriji tar-riżorsi jkunu trasparenti; jikkunsidra li, filwaqt li l-Inizjattiva ta' Trasparenza ta' l-Industriji Estrattiva (EITI) u l-Proċess Kimberly qed jimxu fid-direzzjoni t-tajba, għandu bżonn isir ħafna aktar biex tiġi nkorraġita t-tmexxija trasparenti tat-tmexxija ta' l-industriji tar-riżorsi u d-dħul tagħhom;

Riforma tas-sistemi internazzjonali

37. Jistieden lill-Kunsill u lill-Kummissjoni biex jinkludu l-Fond Ewropew għall-Iżvilupp fil-baġit ta’ l-UE fir-Reviżjoni ta’ Nofs it-Terminu ta’ l-2008/2009, sabiex tissaħħaħ il-leġittimità demokratika ta’ parti importanti tal-politika ta’ l-iżvilupp ta’ l-UE u l-baġit tagħha;

38. Jinnota l-ewwel pass li ttieħed f'April 2008 lejn rappreżentazzjoni aħjar ta' pajjiżi li qed jiżviluppaw fl-IMF; jiddispjaċih li l-kejl ibbażat fuq il-ġid ikompli jirregola l-analiżi tad-drittijiet tal-vot fl-IMF; jitlob lill-Kummissjoni u lill-Istati Membri biex juru l-interess tagħhom fit-teħid tad-deċiżjoni b'maġġoranza doppja(azzjonisti/stati) fl-istituzzjoni responsabbli għall-istabilità finanzjarja internazzjonali, l-IMF;

39. Jistieden lill-Kummissjoni u lill-Istati Membri biex jużaw il-Konferenza Internazzjonali ta’ Segwitu dwar l-Iffinanzjar għall-Iżvilupp imsemmija hawn fuq, li għandha ssir f’Doha mid-29 ta’ Novembru sat-2 ta’ Diċembru 2008, bħala opportunità biex tkun preżentata pożizzjoni komuni ta’ l-UE dwar l-iżvilupp immirata għall-ilħuq ta’ l-MDGs permezz ta’ approċċ sostenibbli;

40. Jistieden lill-Istati Membri biex jagħmlu riforma mgħaġġla u ambizzjuża tal-Bank Dinji sabiex dawk li huma l-aktar ikkonċernati direttament bil-programmi tiegħu jkunu rappreżentati aħjar;

41. Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill, lill-Kummissjoni, lis-Segretarju Ġenerali tan-Nazzjonijiet Uniti u lill-kapijiet ta’ l-Organizzazzjoni Dinjija tal-Kummerċ, lill-Fond Monetarju Internazzjonali, lill-Grupp tal-Bank Dinji u lill-Kunsill Soċjali u Ekonomiku tan-Nazzjonijiet Uniti.

Kwistjoni pendenti fl-aġenda dwar l-iżvilupp internazzjonali: L-iffinanzjar għall-Iżvilupp

Fil-Konferenza Internazzjonali dwar l-Iffinanzjar għall-Iżvilupp f'Monterrey f'Marzu ta' l-2002, il-komunità internazzjonali adottat il-Konsensus ta' Monterrey, li kkonċentra fuq dawn il-ħsibijiet ewlenien li ġejjin:

· Il-mobilizzazzjoni tar-riżorsi finanzjarji domestiċi għall-iżvilupp;

· Il-mobilizzazzjoni ta' riżorsi internazzjonali għall-iżvilupp (Investiment Barrani Dirett (FDI) u flussi privati oħrajn);

· Kummerċ internazzjonali bħala l-magna ta’ l-iżvilupp;

· Iż-żieda tal-koperazzjoni internazzjonali finanzjarja u teknika għall-iżvilupp;

· Dejn estern;

· Kwistjonijiet sistematiċi - il-promozzjoni tal-koerenza u tal-konsistenza tas-sistemi internazzjonali monetarji, finanzjarji u kummerċjali bħala appoġġ għall-iżvilupp.

L-ewwel Konferenza ta' Segwitu dwar l-Iffinanzjar għall-Iżvilupp se ssir f'Doha (Qatar) mid-29 ta' Novembru sat-2 ta' Diċembru 2008. Dan is-samit jipprovdi l-opportunità biex jiġi evalwat il-progress li sar minn meta ġie adottat il-Konsensus ta' Monterrey.  

L-UE tkompli tkun fuq ta' quddiem fl-Iffinanzjar Internazzjonali għall-Iżvilupp bħala l-akbar donatur internazzjonali għall-iżvilupp, filwaqt li tipprovdi aktar minn 50% ta' l-Assistenza Uffiċjali għall-Iżvilupp (ODA) madwar id-dinja.  

Ir-Rapport tal-Kummissjoni dwar il-progress ta' l-UE dwar il-Konsensus ta' Monterrey ġie ppubblikat f'Marzu 2008¹. Il-Konklużjonijiet tal-Kunsill dwar l-Iffinanzjar għall-Iżvilupp ġew ippubblikati fil-25 ta' Mejju 2008.

Il-miri ta' l-ODA limitati biż-żmien 2010 u 2015

Fl-2006 l-UE laħqet il-mira individwali tagħha miftiehma li tiddedika 0.39% (UE 15) tal-GNI kollettiv tagħha lill-ODA. Il-mira prinċipali li jmiss ta' l-ODA hija li tilħaq iż-0.56% tal-GNI kollettiv ta' l-UE sa l-2010.² Madankollu, hija problema serja li fl-2007 l-volumi ta' l-ODA ta' diversi Stati Membri niżlu b'mod drammatiku - skond ix-xejriet globali attwali fl-iżvilupp finanzjarju, segwiti wkoll mill-Ġappun u l-Istati Uniti. Madankollu, xi Stati Membri qatgħu l-isforzi finanzjarji tagħhom biex jilħqu l-miri ta' l-2010 sa 2015 u naqqsu r-rati tagħhom biex ikabbru l-ODA.

Filwaqt li t-tnaqqis ġenerali ta' l-ODA wieħed jittama li jkun okkorrenza ta' darba, - u r-Rapporteur jinsisti li l-Istati Membri jiżguraw li jiġri hekk. It-tnaqqis taż-żidiet huwa mistenni li jnaqqas l-ammont totali ta' l-ODA mogħti lill-pajjiżi li qed jiżviluppaw fi snin li ġejjin. Il-Finlandja u Franza, pereżempju, kellhom politiki u responsabilitajiet nazzjonali li kienu aktar ambizzjużi minn dawk ta' l-UE, imma fl-2007 huma naqqsu l-mira tagħhom sabiex jassoċjaw ruħom mal-kalendarju ta' l-UE. Dan bla dubju jagħmel ħsara lill-mira kollettiva ta' l-UE. Huwa stmat li fil-perjodu 2006-2010 bejn wieħed u ieħor ’il-fuq minn EUR 17-ilbilljun ta' ODA se jintilfu kompletament. Il-miri kollettivi ta' l-UE jintlaħqu biss jekk xi wħud mill-Istati Membri l-kbar jilħqu livelli ta' ODA ’il fuq mill-mira. Ir-Rapporteur huwa mħasseb serjament li żviluppi riċenti jistgħu jagħmluha diffiċli biex jitwettqu l-obbligi.

Bilfors trid issir bidla sinifikanti u sħiħa biex jiġi ppruvat li l-Istati Membri kollha huma impenjati li jilħqu l-miri mwiegħda ta' ODA, u għalhekk itejbu l-possibilità li jilħqu l-MDGs. Ir-Rapporteur jistieden lill-Istati Membri li għadhom m'għamlux hekk biex jintroduċu skedi ta' miri finanzjarji fissi qabel ma ssir il-konferenza ta' Doha.  

Dejn estern u ħarba mill-kapital

L-inklużjoni tal-ħelsien mid-dejn fiċ-ċifri ta' l-ODA kien wieħed mir-raġunijiet ewlenin għat-tnaqqis fil-livelli ta' l-UE għall-ODA fl-2007, għalhekk ir-Rapporteur jistieden lill-Istati Membri biex jikkonċentraw fuq iċ-ċifri ta' l-ODA bit-tneħħija tal-komponent tal-maħfra tad-dejn. Madankollu, daqstant ieħor importanti huma kwistjonijiet ta' sostenibilità ta' dejn ta' perjodu twil u prinċipji ta' self responsabbli.  

Self u finanzjament irresponsabbli huma ta' ħsara kbira għall-istabilità ekonomika ta' pajjiżi li qed jiżviluppaw u hija kontroproduttiva b'mod qawwi biex tkun stabbilita s-sostenibilità ta' dejn għal perjodu twil. Eżempji ta' prattiki bħal dawn jikludu litigazzjoni aggressiva minn kredituri kummerċjali u fondi ta' dejn eżawriti li jpoġġu piż fuq il-baġits tal-pajjiżi involuti li qed jiżviluppaw. Finanzi u self responsabbli jistgħu jkunu l-mod biex tiġi żgurata s-sostenibilità tad-dejn, u jistgħu jintużaw ukoll biex jitħeġġew is-sosteniblità, żvilupp li jħares l-ekoloġija u xogħol diċenti f'pajjiżi li qed jiżviluppaw.  

Il-ħarba mill-kapital u r-refuġji mit-taxxa huma wkoll kwistjoni kbira fl-aġenda dwar l-iffinanzjar għall-iżvilupp, għax jista' jkollhom effetti serji għad-dejn estern. Mezzi biex tiġi evitata l-ħarba mill-kapital jistgħu jinkludu li jiġu installati aktar sistemi ta' kontroll effettivi (speċjalment permezz ta' sistemi ta' tassazzjoni) f'pajjiżi li qed jiżviluppaw, li jagħmlu s-sinjuri f'pajjiżi li qed jiżviluppaw aktar konxji mill-obbligi tagħhom, kif ukoll biex tiġi nkorraġita t-titolarità u li jiġi żgurat li l-flus ma jmorrux għand ir-refuġji tat-taxxa (anke dawk fl-UE). Sadanittant, l-aktar mod effettiv biex tiġi evitata l-ħarba mill-kapital minn pajjiżi li qed jiżviluppaw tinvolvi t-trawwim ta’ ambjenti stabbli, paċifiċi u demokratiċi, fejn l-Istat tad-Dritt jiżgura rispett lejn kuntratti kummerċjali , kontijiet bankarji u drittijiet tal-proprjetà liċ-ċittadini kollha.  

Sfidi Ġodda

It-tibdil fil-klima huwa waħda mill-isfidi riċenti li qed taffaċċja l-assistenza għall-iżvilupp. L-għan ewlieni tal-politika ta' żvilupp huwa li jinqered il-faqar. It-tibdil fil-klima, fost inċertezzi globali kbar oħra, huwa kwistjoni li għandha impatt sinifikanti fuq pajjiżi inqas żviluppati li huma speċjalment vulnerabbli għal xokkijiet esterni (eż. diżastri naturali, pandemiji).¹ Madankollu, l-iffinanzjar biex jitnaqqsu l-effetti tat-tibdil fil-klima huwa meqjus bħala mezz li bih pajjiżi industrijalizzati jgħinu biex isewwu l-ħsara li huma stess ħolqu fil-pajjiżi li qed jiżviluppaw. Għalhekk m'għandhomx jittieħdu minn weghdiet ta' ODA eżistenti imma ghandhom jiżdiedu magħhom. F'dan ir-rigward, ir-Rapporteur jaqbel mal-fehma espressa mill-Kummissarju għall-Iżvilupp Louis Michel li l-fondi għall-iżvilupp eżistenti m'għandhomx jintużaw bħala finanzjament fil-ġlieda kontra t-tibdil fil-klima fil-Pajjiżi l-Inqas Żviluppati. Qed isiru diskussjonijiet bejn l-UE u l-Bank Dinji dwar il-possibilità li jingħata self kbir għal perjodu twil biex jgħinu lill-pajjiżi l-aktar fqar jiffinanzjaw miżuri kruċjali biex jiġġieldu t-tibdil fil-klima². Ir-Rapporteur jistenna li l-UE tkun ta' l-ewwel f'dan id-dibattitu.

L-isplużjoni internazzjonali attwali tal-prezzijjiet ta' l-ikel hija sfida addizzjonali li għandha tiġi indirizzata. L-iżvilupp rurali, b'mod speċjali fis-sens ta' żvilupp agrikolu qiegħed diġa' jsir aktar importanti u b'mod inevitabbli se jkollu profil aktar għoli fuq l-aġenda ta' l-iżvilupp internazzjonali fis-snin li ġejjin. Għandhom jiġu indirizzati l-ostakoli fl-iżvilupp tal-agrikoltura f'pajjiżi li qed jiżviluppaw. L-agrikoltura lokali, b'mod partikolari, għandha tkun appoġġjata. Bdiewa fuq skala żgħira għandhom jingħataw aċċess b'mod mgħaġġel għal self biex itejbu l-impriżi tagħhom u jżidu l-produzzjoni.

Sfida ġdida oħra tinsab fid-dehra ta' atturi emerġenti ġodda fix-xena internazzjonali ta' l-iffinanzjar għall-iżvilupp, b'mod speċjali ċ-Ċina, il-Brażil, u l-Arabja Sawdita, kif ukoll ta’ numru ta' donaturi privati.¹ Hemm tħassib dwar il-politiki użati minn xi donaturi ġodda lejn l-implimentazzjoni tal-koperazzjoni tagħhom.

Il-mobbilizzar ta’ l-iffinanzjar privat għall-iżvilupp

Il-flussi tal-kapital privat għall-pajjiżi li qed jiżviluppaw qed jiżdiedu. Huwa stmat li huma sitt darbiet aktar għolja mill-ammont totali ta' ODA irrappurtati (anke jekk ma ġiex ikkoreġut il-ħelsien mid-dejn), li jammontaw għal madwar 600 biljun Dollaru Amerikan.

Flussi privati jammontaw għal madwar 80% mill-flussi totali lill-Afrika: fl-2007 l-FDI fl-Afrika żdied b'madwar 200% fl-2004.

Bla dubju, ikun ta' benefiċċju, li ftit minn dan il-finanzjament privat ikun utilizzat lejn l-objettiv ta' l-iżvilupp, u r-Rapporteur jissuġġerixxi li dan jista' jseħħ bl-użu ta' sħubijiet pubbliċi/privati innovattivi. L-UE għandha tippromwovi b'mod attiv il-Prinċipji Equator li bihom numru kbir ta' banek madwar id-dinja jkollhom l-għan li jirrispettaw il-kriterji ta' sostenibilità fil-politiki ta' investiment.

L-effettività ta’ l-għajnuna

Ir-rilaxx ta' l-għajnuna, it-tnaqqis ta' l-ispejjeż tat-transazzjoni u aktar flessibilità u ħeffa fil-proċeduri burokratiċi jibqgħu l-kwistjonijiet ewlenin rigward l-effettività ta' l-għajnuna. Ir-Rapporteur, madankollu, ra kif jimminimizza l-inklużjoni ta' dawn il-kwistjonijiet fir-rapport tiegħu biex jevita li jkun hemm overlap mar-rapport dwar l-Effettività ta' l-Għajnuna mill-kollega tiegħu Johan Van Hecke.

Kwistjonijiet Sistematiċi

Il-leħen tal-pajjiżi li qed jiżviluppaw għandu jissaħħaħ fil-proċessi tat-teħid tad-deċiżjonijiet fl-istituzzjonijiet finanzjarji u ekonomiċi internazzjonali.

Il-karigi tal-President tal-Bank Dinji u d-Direttur Maniġerjali tal-IMF għadhom mhumiex miftuħa għall-pajjiżi kollha. Numru kbir ta’ l-Istati Membri tal-UE (14) urew appoġġ għal riformi li jagħmlu l-karigi disponibbli għaċ-ċittadini tal-pajjiżi kollha.

Problema partikolari fil-Bord tal-Bank Dinji, hija li 46 pajjiż Afrikan ’l isfel mis-Saħara għandhom nuqqas serju ta' rappreżentanza. Billi reġjuni oħra b'anqas pajjiżi għandhom mill-anqas tliet siġġijiet, il-pajjiżi li qed jiżviluppaw fir-reġjun ’l isfel mis-Saħara huma rappreżentati biss b’żewġ siġġijiet. Ir-Rapporteur jikkunsidra li din is-sitwazzjoni m’hijiex aċċettabbli u jipproponi li għandha tkun irrimedjata.

SUĠĠERIMENTI

Il-Kumitat għall-Baġits jistieden lill-Kumitat għall-Iżvilupp, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

Il-Parlament Ewropew,

- wara li kkunsidra l-Konsensus ta’ Monterrey adottat mill-Konferenza Internazzjonali dwar l-Iffinanzjar għall-Iżvilupp li saret f’ Marzu 2002,

- wara li kkunsidra l-Konsensus Ewropew adottat mill-Kunsill, mir-rappreżentanti ta’ l-Istati Membri fil-Kunsill, mill-Parlament Ewropew u mill-Kummissjoni f’Diċembru 2005,

- wara li kkunsidra l-Komunikazzjoni mill-Kummissjoni dwar it-tħaffif tal-progress lejn il-kisba ta’ l-Objettivi tal-Millenju għall-Iżvilupp (COM(2008)0177 tad-9 ta’ April 2008),

1. Jiġbed l-attenzjoni li l-UE hija d-donatur dinji ewlieni ta’ l-għajnuna għall-iżvilupp, li tirrappreżenta kważi 60% ta’ l-għajnuna għall-iżvilupp uffiċjali dinjija, u jilqa’ b’sodisfazzjon il-fatt li l-parti tal-KE qed tiżdied matul is-snin; madanakollu jitlob lill-Kummissjoni biex tipprovdi dejta ċara u trasparenti dwar is-sehem tal-baġit tal-Komunità fl-għajnuna għall-iżvilupp ta’ l-UE sabiex tevalwa s-segwitu tal-Konsensus ta’ Monterrey mid-donaturi Ewropej kollha; jesprimi wkoll id-dispjaċir tiegħu li l-livell tal-kontribuzzjonijiet finanzjarji ta’ l-UE għall-pajjiżi li qed jiżviluppaw ma għandux viżjoni u jistieden lill-Kummissjoni biex tiżviluppa komunikazzjoni u strumenti ta’ informazzjoni xierqa u mmirati biex tiżdied il-viżjoni ta’ l-għajnuna għall-iżvilupp ta’ l-UE;

2. Jinsab imħassaeb ħafna madanakollu dwar it-tendenza negattiva f’termini assoluti u bħala proporzjon tal-GNI (tnaqqis ta’ EUR 1 589 miljun li jirrappreżenta tnaqqis ta’ 3.33%, li jammonta għal total ta’ 0.38% tal-GNI ta’ l-UE fl-2007, meta mqabbel ma’ 0.41% fl-2006), għall-ewwel sena, f’għajnuna għall-iżvilupp ta’ l-UE; ifakkar li l-Konsensus Ewropew għall-2005, li dwaru ntlaħaq ftehim mill-Istati Membri kollha u mill-Istituzzjonijiet ta' l-UE, ikkonferma l-mira ta' 0.56% tal-GNI fl-2010 u 0.70% fl-2015 f’għajnuna għall-iżvilupp;

3. Jilqa’ b’sodisfazzjon il-pożizzjoni soda tal-Kummissjoni fl-isforzi biex tikkonċentra kemm fuq il-kwantità u kemm fuq il-kwalità ta’ l-għajnuna għall-iżvilupp mill-Istati Membri u jappoġġja b’mod sħiħ it-twissija tagħha kontra konsegwenzi negattivi potenzjalment għoljin għall-Istati Membri li jonqsu milli jissodisfaw l-impenji finanzjarji tagħhom; jistieden lill-Kummissjoni biex tuża l-ħila esperta u l-awtorità tagħha biex tikkonvinċi donaturi pubbliċi u privati oħra biex jonoraw il-wegħdiet finanzjarji tagħhom;

4. Jenfasizza l-bżonn assolut għall-UE li timmira għall-ogħla livell ta’ koordinazzjoni biex tikseb koerenza mal-politiki Komunitarji l-oħra (l-ambjent, il-migrazzjoni, ir-riżorsi umani, l-agrikoltura, eċċ) u biex tevita li jkun hemm xogħol doppju jew nuqqas ta' konsistenza fl-attivitajiet;

5. Ifakkar li l-azzjonijiet immedjati u neċessarji li għandhom jittieħdu mill-UE biex din titratta l-konsegwenzi drammatiċi tal-prezzijiet ta’ l-ikel li qed jiżdiedu b’rata allarmanti ma għandhomx jinfthiemu u jkunu mwettqa bħala parti mill-isforzi meħtieġa mill-Konsensus Monterrey; Jistenna bil-ħerqa għalhekk proposta konkreta mill-Kummissjoni dwar l-użu ta' fondi ta' emerġenza;

6. Jenfasizza li l-piż amministrattiv eċċessiv u sproporzjonat f’xi wħud mill-pajjiżi msieħba, ixekkel l-effettività ta’ l-għajnuna għall-iżvilupp; jesprimi l-biża’ li hija qed tirriskja li ttellef il-kisba ta’ l-Objettivi tal-Millenju għall-Iżvilupp;

7. Jiġbed l-attenzjoni li l-Unjoni Ewropea għadha trid issib il-bilanċ it-tajjeb bejn żewġ approċċi kontradittorji dwar l-għajnuna għall-iżvilupp: min-naħa l-waħda, biex tafda lill-pajjiżi msieħba fl-allokazzjoni adegwata tal-fondi u biex tgħin lill-amministrazzjonijiet tagħhom jiżviluppaw l-istrumenti l-ġusti għall-implimentazzjoni tal-fondi; min-naħa l-oħra, biex tkun identifikata l-għajnuna finanzjarja sabiex tkun evitata allokazzjoni ħażina jew mingħajr effett ta’ l-għajnuna.

RIŻULTAT TAL-VOTAZZJONI FINALI FIL-KUMITAT