RAPPORT dwar ir-Responsabilità Soċjali Korporattiva: promozzjoni tal-interessi tas-soċjetà u triq lejn l-irkupru sostenibbli u inklużiv

29.1.2013 - (2012/2097(INI))

tal-Kumitat għall-Impjiegi u l-Affarijiet Soċjali
Rapporteur: Richard Howitt

Proċedura : 2012/2097(INI)
Ċiklu ta' ħajja waqt sessjoni
Ċiklu relatat mad-dokument :  
A7-0023/2013

MOZZJONI GĦAL RIŻOLUZZJONI TAL-PARLAMENT EWROPEW

dwar ir-Responsabilità Soċjali Korporattiva: promozzjoni tal-interessi tas-soċjetà u triq lejn l-irkupru sostenibbli u inklużiv

(2012/2097(INI))

Il-Parlament Ewropew,

–   wara li kkunsidra l-Artikoli 5, 12, 14, 15, 16, 21, 23, 26, 27, 28, 29, 31, 32, 33, 34 u 36 tal-Karta tad-Drittijiet Fundamentali tal-Unjoni Ewropea,

–   wara li kkunsidra l-Karta Soċjali Ewropea, b'mod partikolari l-Artikoli 5, 6 u 19 tagħha,

–   wara li kkunsidra d-Dikjarazzjoni tal-Organizzazzjoni Internazzjonali tax-Xogħol (ILO) dwar il-Prinċipji u d-Drittijiet Fundamentali fix-Xogħol, adottata fl-1998, u l-konvenzjonijiet tal-ILO li jistabbilixxu standards universali fundamentali tax-xogħol fir-rigward ta': l-abolizzjoni tax-xogħol furzat (Nri 29 (1930) u 105 (1957)); il-libertà ta' assoċjazzjoni u d-dritt ta' negozjar kollettiv, (Nri 87 (1948) u 98 (1949); l-abolizzjoni tat-tħaddim tat-tfal (Nri 138 (1973) u 182 (1999)); u n-nondiskriminazzjoni fl-impjieg, (Nri 100 (1951) u 111 (1958)),

–   wara li kkunsidra wkoll il-konvenzjonijiet tal-ILO dwar il-klawsoli tax-xogħol (kuntratti pubbliċi) (Nru 94) u dwar in-negozjar kollettiv (Nru 154),

–   wara li kkunsidra l-Aġenda tax-Xogħol Deċenti u l-Patt Globali ghall-Impjiegi tal-ILO, adottati b'kunsens dinji fid-19 ta' Ġunju 2009 waqt il-Konferenza Internazzjonali dwar ix-Xogħol,

–   wara li kkunsidra d-Dikjarazzjoni dwar il-Ġustizzja Soċjali għal Globalizzazzjoni Ġusta, adottata bil-kunsens tal-183 Stat Membru tal-ILO fl-10 ta' Ġunju 2008,

–   wara li kkunsidra d-Dikjarazzjoni Universali tad-Drittijiet tal-Bniedem (1948) u strumenti oħra tan-Nazzjonijiet Uniti fil-qasam tad-drittijiet tal-bniedem, b'mod partikolari l-Patt Internazzjonali dwar id-Drittijiet Ċivili u Politiċi (1966) u dak dwar id-Drittijiet Ekonomiċi, Soċjali u Kulturali (1966), il-Konvenzjoni Internazzjonali dwar l-Eliminazzjoni tal-Forom Kollha ta' Diskriminazzjoni Razzjali (1965), il-Konvenzjoni dwar l-Eliminazzjoni ta' Kull Forma ta' Diskriminazzjoni kontra n-Nisa (1979), il-Konvenzjoni dwar id-Drittijiet tat-Tfal (1989), il-Konvenzjoni Internazzjonali dwar il-Protezzjoni tad-Drittijiet tal-Ħaddiema Migranti Kollha u tal-Membri tal-familji taghhom (1990) u l-Konvenzjoni dwar id-Drittijiet tal-Persuni b'Diżabbiltajiet (2006),

   wara li kkunsidra l-Prinċipji tat-Tisħiħ tal-Pożizzjoni tan-Nisa tan-NU mnedija f'Marzu 2010, li joffru gwida dwar kif in-nisa jistgħu jingħataw is-setgħa fuq il-post tax-xogħol, fis-suq u fil-komunità u huma riżultat ta' kollaborazzjoni bejn il-UN Women u l-Patt Dinji tan-Nazzjonijiet Uniti;

–   wara li kkunsidra l-"Consistency Project", proġett kollaborattiv bejn il-"Climate Disclosure Standards Board" (CDSB), il-"Global Reporting Initiative" (GRI), l-Organizzazzjoni għall-Kooperazzjoni u l-Iżvilupp Ekonomiċi (OECD) u l-Konferenza tan-Nazzjonijiet Uniti dwar il-Kummerċ u l-Iżvilupp (UNCTAD) imfassal biex jappoġġa approċċ aktar konsistenza għad-domanda u l-forniment ta' informazzjoni korporattiva relatata mat-tibdil fil-klima;

–   wara li kkunsidra l-Prinċipji Gwida tan-NU dwar in-Negozju u d-Drittijiet tal-Bniedem u l-konklużjonijiet tal-Kunsill Affarijiet Barranin tat-8 ta' Diċembru 2009[1],

–   wara li kkunsidra l-Linji Gwida tal-OECD għall-Impriżi Multinazzjonali, aġġornati f'Mejju 2011,

–   wara li kkunsidra l-Konvenzjoni dwar il-Ġlieda Kontra t-Tixħim tal-OECD tal-1997,

–   wara li kkunsidra l-Global Reporting Initiative,

–   wara li kkunsidra t-twaqqif tal-Kunsill Internazzjonali dwar ir-Rapportar Integrat (International Integrated Reporting Council - IIRC),

–   wara li kkunsidra l-Att dwar id-Dikjarazzjonijiet Finanzjarji (2008) tad-Danimarka,

–   wara li kkunsidra l-Patt Dinji tan-NU,

–   wara li kkunsidra l-istudju ta' Ottubru 2010 prodott għall-Kummissjoni dwar il-lakuni fil-governanza bejn l-istrumenti u l-istandards internazzjonali fil-qasam tar-Responsabilità Soċjali Korporattiva u l-leġiżlazzjoni Ewropea fis-seħħ (magħrufa bħala l-"Istudju ta' Edinburgh)[2], li l-konklużjonijiet tiegħu ġew rapportati fir-Rapport Annwali tal-Parlament Ewropew dwar id-Drittijiet tal-Bniedem tal-2011[3], u li kienu approvati kompletament mill-Kunsill Ewropew,

–   wara li kkunsidra l-paragrafi 46 u 47 tad-dokument finali tas-Summit Dinji tal-2012 Rio+20 dwar l-Izvilupp Sostenibbli,

–   wara li kkunsidra l-Principji tan-NU ghall-Investiment Responsabbli (UNPRI),

–   wara li kkunsidra l-Istandard Internazzjonali ISO 26000 li jipprovdi linji gwida għar-responsabilità socjali, u li nħareġ fl-1 ta' Novembru 2010,

–   wara li kkunsidra l-istudju "Green Winners" tal-2009 li sar fuq 99 kumpanija[4],

–   wara li kkunsidra t-twaqqif tal-Forum Multilaterali Ewropew dwar ir-Responsabilità Socjali Korporattiva, imniedi fis-16 ta' Ottubru 2002,

–   wara li kkunsidra d-Direttiva 2004/18/KE tal-Parlament Ewropew u tal-Kunsill tal-31 ta' Marzu 2004 fuq koordinazzjoni ta' proċeduri għall-għoti ta' kuntratti għal xogħlijiet pubbliċi, kuntratti għal provvisti pubbliċi u kuntratti għal servizzi pubbliċi[5],

–   wara li kkunsidra l-proposta tal-Kummissjoni għal direttiva tal-Parlament Ewropew u tal-Kunsill dwar l-akkwist pubbliku (COM(2011)0896);

–   wara li kkunsidra r-Regolament tal-Kunsill (KE) Nru 44/2001 tat-22 ta’ Diċembru 2000 dwar ġurisdizzjoni u rikonoxximent u eżekuzzjoni ta' sentenzi f'materji ċivili u kummerċjali[6], li ħadet post il-Konvenzjoni ta' Brussel tal-1968 minbarra fir-rigward tar-relazzjonijiet bejn id-Danimarka u Stati Membri Oħra,

–   wara li kkunsidra r-Riżoluzzjoni tal-Kunsill tat-3 ta’ Diċembru 2001 dwar is-segwitu tal-Green Paper rigward ir-responsabilità soċjali korporattiva[7],

–   wara li kkunsidra r-riżoluzzjoni tal-Kunsill tas-6 ta' Frar 2003 dwar ir-responsabilità soċjali korporattiva[8],

–   wara li kkunsidra l-komunikazzjoni mill-Kummissjoni bit-titolu "Promozzjoni tax-xogħol deċenti għal kulħadd - Il-kontribuzzjoni tal-Unjoni fl-implimentazzjoni tal-aġenda tax-xogħol deċenti għal kulħadd " (COM(2006)0249) (komunikazzjoni mill-Kummissjoni dwar ix-xogħol deċenti),

–   wara li kkunsidra l-komunikazzjoni mill-Kummissjoni bit-titolu "Il-Modernizzazzjoni tad-dritt soċjetarju u t-tisħiħ tal-governanza tal-impriżi fl-Unjoni Ewropea – Pjan għall-avvanz" (COM(2003)0284) (Pjan ta' Azzjoni dwar il-Governanza tal-Impriżi),

–   wara li kkunsidra l-komunikazzjoni mill-Kummissjoni bit-titolu "Kummerċ, Tkabbir u Affarijiet Dinjija – Il-Politika tal-Kummerċ bħala element prinċipali mill-Istrategija tal-UE 2020" (COM(2010)0612),

–   wara li kkunsidra l-komunikazzjoni mill-Kummissjoni bit-titolu "Pakkett "Negozji responsabbli"" (COM(2011)0685),

–   wara li kkunsidra l-komunikazzjoni mill-Kummissjoni bit-titolu "Lejn irkupru li jwassal ghall-ħolqien abbundanti ta' impjiegi" (COM(2012)0173),

–   wara li kkunsidra l-komunikazzjoni mill-Kummissjoni bit-titolu "Inizjattiva għan-negozju soċjali – Il-ħolqien ta' klima favorevoli għall-intraprizi socjali, il-partijiet interessati ewlenin fl-ekonomija soċjali u l-innovazzjoni" (COM(2011)0682),

–   wara li kkunsidra l-komunikazzjoni mill-Kummissjoni bit-titolu "Ewropa 2020 – Strateġija għal tkabbir intelliġenti, sostenibbli u inklussiv" (COM(2010)2020),

–  wara li kkunsidra l-Komunikazzjoni mill-Kummissjoni bit-titolu "Strateġija għall-ugwaljanza bejn in-nisa u l-irġiel 2010-2015" (COM(2010)0491),  wara li kkunsidra r-riżoluzzjoni tiegħu tat-30 ta' Mejju 2002 dwar il-Green Paper tal-Kummissjoni dwar il-promozzjoni ta' qafas Ewropew għar-responsabilità soċjali korporattiva[9],

–   wara li kkunsidra r-riżoluzzjoni tiegħu tat-13 ta' Mejju 2003 dwar "il-Komunikazzjoni mill-Kummissjoni dwar ir-responsabilità soċjali korporattiva: kontribut tal-impriżi għall-Iżvilupp Sostenibbli"[10],

–   wara li kkunsidra r-rizoluzzjoni tiegħu tat-13 ta' Marzu 2007 dwar "ir-responsabilità soċjali tal-intraprizi: sħubija ġdida"[11],

–   wara li kkunsidra r-riżoluzzjoni tiegħu tal-25 ta' Novembru 2010 dwar ir-responsabilità soċjali tal-kumpaniji fil-ftehimiet kummerċjali internazzjonali[12],

–   wara li kkunsidra r-riżoluzzjoni tiegħu tas-16 ta' Ġunju 2010 dwar l-UE 2020, li tafferma li teżisti rabta inestrikabbli bejn ir-reponsabilità korporattiva u l-governanza korporattiva[13],

–   wara li kkunsidra l-Komunikazzjoni tal-Kummissjoni bl-isem “Inizjattiva għan-Negozju Soċjali – Il-ħolqien ta’ klima favorevoli għall-intrapriżi soċjali, il-partijiet interessati ewlenin fl-ekonomija soċjali u l-innovazzjoni”[14],

–   wara li kkunsidra l-opinjoni tal-Kumitat Ekonomiku u Soċjali Ewropew tal-24 ta’ Mejju 2012 dwar il-komunikazzjoni mill-Kummissjoni bit-titolu “Strateġija rinnovata tal-UE 2011-14 għar-Responsabilità Soċjali Korporattiva”[15],

–   wara li kkunsidra l-komunikazzjoni mill-Kummissjoni bit-titolu “Strateġija rinnovata tal-UE 2011-2014 għar-Responsabilità Soċjali Korporattiva” (COM(2011)0681),

–   wara li kkunsidra l-Artikolu 48 tar-Regoli ta' Procedura tieghu,

–   wara li kkunsidra r-rapport tal-Kumitat għall-Impjiegi u l-Affarijiet Soċjali u l-opinjonijiet tal-Kumitat għall-Affarijiet Legali, tal-Kumitat għall-Affarijiet Barranin, tal-Kumitat għall-Iżvilupp, tal-Kumitat għall-Kummerċ Internazzjonali kif ukoll tal-Kumitat għall-Kultura u l-Edukazzjoni (A7-0023/2013),

A.  billi t-terminu "responsabilità soċjali korporattiva (RSK)" jeħtieġ ma jintużax b'mod ħażin għad-definizzjoni mill-ġdid tal-istandards minimi applikabbli maqbula f'livell internazzjonali, iżda jintuża biex titkejjel l-implimentazzjoni tagħhom u jinftiehem aħjar kif dawn jistgħu jiġu applikati malajr u direttament mill-impriżi ta' kull daqs;

B.   billi l-kunċett tal-RSK tipikament użat fl-istituzzjonijiet tal-UE għandu jitqies bħala prinċipalment mhux distingwibbli mill-kunċetti relatati ta' impriżi responsabbli u etiċi, "ambjent, soċjetà u governanza", żvilupp sostenibbli u responsabilità korporattiva;

C.  billi approċċ multilaterali jeħtieġ li jibqa' l-ġebla tax-xewka tal-inizjattivi kollha appoġġati mill-UE dwar l-RSK, kif ukoll il-bażi tal-RSK l-aktar kredibbli mwettqa mill-impriżi stess, u li jibda mil-livell lokali;

D.  billi l-Global Reporting Initiative ipprovdiet il-metodoloġija l-aktar aċċettata fil-livell internazzjonali għat-trasparenza tal-impriżi u billi l-formazzjoni tal-International Integrated Reporting Council (IIRC), li tinvolvi l-entitajiet internazzjonali l-aktar importanti dwar it-twaqqif ta' standards tal-kontabbiltà, tindika li r-rappurtar ta' sostenibbiltà korporattiva integrat fil-kontijiet finanzjarji se jsir in-norma globali f'inqas minn għaxar snin;

E.   billi x-xogħol innovattiv tal-"Prince’s Accounting for Sustainability Project", tat-TEEB (L-Ekonomija tal-Ekosistemi u l-Bijodiversità) għall-Impriżi u tal-Programm Ambjentali tan-Nazzjonijiet Uniti issa għamilha possibbli għall-impriżi li jifhmu sew u b'mod preċiż il-valutazzjoni monetarja tal-impatt soċjali u ambjentali estern tagħhom u b'hekk jinserixxu dan bħala parti mill-ġestjoni finanzjarja tal-kumpanija;

F.   billi kien hemm bidla radikali fil-komunità ta' investituri b'1 123 investitur (li jirrappreżentaw USD 32 triljun ta' assi totali ġestiti) li japprovaw il-Prinċipji ta' Investiment Responsabbli tan-NU (UNPRI); billi l-Forum għall-Investiment Sostenibbli Ewropew jikkalkula li s-suq globali tal-investiment soċjalment responsabbli laħaq madwar EUR 7 triljun minn Settembru 2010, u billi 82 investitur immexxija minn Aviva Global Investors u li jirrappreżentaw USD 50 triljun ta' assi totali ġestiti talbu, fl-okkażjoni tas-Summit tan-NU għal Żvilupp Sostenibbli, sabiex ir-rappurtar tas-sostenibbiltà korporattiva jsir obbligatorju;

G.  billi t-twaqqif tal-Pjattaforma Multilaterali Ewropea dwar l-RSK, it-twettiq ta' għadd ta' proġetti pilota u ta' proġetti ta' riċerka, l-attivitajiet tal-Alleanza preċedenti għall-Impriżi stabbilixxew rekord passat ċar ta' azzjoni Ewropea fil-qasam tal-RSK, flimkien mal-kontribut kontinwu u ta' siwi li sar minn "familja" ta' organizzazzjonijiet tal-RSK Ewropej li tinkludi CSR Europe, l-Akkademja Ewropea tan-Negozju fis-Soċjetà (EABIS), il-Forum għall-Investiment Sostenibbli Ewropew (Eurosif), u l-Koalizzjoni Ewropea għall-Ġustizzja Korporattiva (ECCJ);

H.  billi ċerti standards komuni għall-RSK huma essenzjali, billi differenzi fil-materjalità jeħtieġu wkoll approċċi differenzjati mill-industrija u billi, f'soċjetà libera, l-RSK qatt ma tista' tagħmel azzjoni tal-karità obbligatorja, li tista' tnaqqas ir-rieda tan-nies li jagħtu;

I.    billi l-kodiċijiet ta' kondotta tal-kumpanija kellhom rwol importanti biex jinbeda u jitkabbar l-għarfien dwar l-RSK, iżda huma rispons insuffiċjenti minħabba n-nuqqas frekwenti ta' speċifiċità, ta' inkonsistenza mal-istandards internazzjonali eżistenti, ta' eżempji ta' evitar ta' kwistjonijiet materjali u ta' nuqqas ta' paragunabilità u trasparenza fl-applikazzjoni;

J.    billi l-Prinċipji ta' Linji Gwida dwar in-Negozji u d-Drittijiet tal-Bniedem tan-NU ġew maqbula unanimament fin-NU bl-appoġġ sħiħ tal-Istati Membri tal-UE, tal-Organizzazzjoni Internazzjonali tal-Impjegaturi u tal-Kamra Internazzjonali tal-Kummerċ, inkluż appoġġ għall-kunċett ta' "smart mix" (taħlita intelliġenti) bejn azzjonijiet regolatorji u dawk volontarji;

K.  billi r-Rappreżentant Speċjali preċedenti tas-Segretarju Ġenerali tan-NU dwar in-Negozju u d-Drittijiet tal-Bniedem, John Ruggie, appella lill-Istati Membri tal-UE, bħala parti mill-Konferenza tal-RSK imsejħa mill-Presidenza Svediża ta' dak iż-żmien, biex jikkjarifikaw u jappoġġaw il-kwistjoni tal-ġurisdizzjoni extraterritorjali għal każijiet ta' ksur minn kumpaniji f'pajjiżi terzi fraġli; billi l-appell tiegħu kien sussegwentement approvat fil-konklużjonijiet tal-Kunsill Ewropew, imma attwalment għadha ma ttieħdet l-ebda azzjoni bħala risposta;

L.   billi l-istudju tal-Kummissjoni dwar lakuni ta' governanza bejn l-istrumenti u l-istandards tal-RSK u leġiżlazzjoni eżistenti Ewropea, magħruf bħala l-Istudju ta' Edinburgh, ippubblikat f'Ottubru 2010 u li r-riżultati tiegħu ġew irrappurtati fir-Rapport Annwali dwar id-Drittijiet tal-Bniedem tal-2011, ġie approvat b'mod sħiħ mill-Kunsill Ewropew u mill-Parlament Ewropew;

M.  billi l-Linji Gwida tal-OECD dwar l-Impriżi Multinazzjonali huma l-istandard RSK internazzjonali l-aktar kredibbli u li l-aġġornament maqbul f'Mejju 2011 jirrappreżenta opportunità sinifikanti biex l-implimentazzjoni tal-RSK timxi 'l quddiem;

N.  billi kien hemm għadd ta' inizjattivi internazzjonali biex jiżguraw rappurtar ta' sostenibbiltà mill-impriżi, inklużi r-rekwiżiti għall-impriżi mmexxija mill-Istat Ċiniż li jirrappurtaw, u għall-impriżi li jirrappurtaw dwar l-implimentazzjoni tal-Linji Gwida tal-RSK żviluppati mill-Gvern tal-Indja, flimkien mal-fatt li l-impriżi għandhom jiżvelaw ir-rendiment ta' sostenibbiltà tagħhom mitlub bħala rekwiżit fil-lista uffiċjali tal-Borża fil-Brażil, fl-Afrika tan-Nosfinhar u l-Malasja, u bħala rekwiżit tal-Kummissjoni għat-Titoli u l-Kambju tal-Istati Uniti;

O.  billi l-Att dwar id-Dikjarazzjonijiet Finanzjarji Daniż (2008) fir-rigward tar-rappurtar tas-sostenibilità korporattiva li għandu rekwiżiti addizzjonali speċifiċi ta' rappurtar dwar l-impatt tat-tibdil fil-klima u tad-drittijiet tal-bniedem, kien ferm popolari mal-impriżi Daniżi, li 97% minnhom jagħżlu li jirrappurtaw minkejja d-dispożizzjoni ta' "kkomforma jew spjega" li tkopri l-ewwel tliet snin tal-applikazzjoni tal-Att;

P.   billi Franza u d-Danimarka huma tnejn mill-erba' gvernijiet tal-Istati Membri tan-NU li qablu li jmexxu l-implimentazzjoni tal-impenn tan-NU Rio+20 għar-rappurtar dwar is-sostenibbiltà korporattiva;

Q.  billi l-aġġornament tal-Linji Gwida dwar l-Impriżi Multinazzjonali tal-OECD, immexxi mill-Pajjiżi l-Baxxi, offra l-opportunità li jtejjeb il-viżibilità u l-istatus ta' dawk il-linji gwida, permezz ta' sistema ta' punti ta' kuntatt nazzjonali, temm "in-nexus ta' investiment" li fixkel l-applikazzjoni sħiħa tagħhom mal-katina tal-provvista u integra bis-sħiħ il-Prinċipji dwar in-Negozji u d-Drittijiet tal-Bniedem tan-NU;

R.   billi r-riżoluzzjoni tal-Parlament Ewropew dwar l-Ewropa 2020 tiddikjara li hemm rabta qawwija bejn ir-responsabilità korporattiva u l-governanza korporattiva;

S.  billi l-istudju "Green Winners" 2009 li jiġbor fih 99 kumpanija wera li f'16-il settur industrijali separat, kumpaniji bi strateġiji RSK kellhom rendiment aħjar mill-medja industrijali b'mill-inqas 15 %, b'hekk jirrappreżentaw kapitalizzazzjoni tas-suq addizzjonali ta' EUR 498 miljun (USD 650 miljun) għal kull kumpanija;

T.   billi l-Istħarrig "Global CEO 2012" juri li l-impriżi jirrikonoxxu li t-tkabbir jitlob ħidma mill-qrib mal-popolazzjoni lokali; billi, pereżempju, aktar minn 60% ta' dawk mistħarrġa kienu qed jippjanaw li jżidu l-investiment tagħhom fit-tliet snin ta' wara biex jgħinu ħalli titħares is-saħħa tal-ħaddiema;

1.   Jirrikonoxxi li l-komunikazzjoni mill-Kummissjoni hija parti minn sensiela ta' dikjarazzjonijiet politiċi li bis-saħħa tagħhom l-RSK hija promossa b'mod aktar wiesa', hija integrata fil-politiki tal-UE u se ssir prinċipju stabbilit għall-azzjoni Ewropea; jistieden lill-Kummissjoni u lill-Istati Membri jużaw l-istrateġija RSK 2014-2020 bħala l-bażi għal miżuri prattiċi li jinkoraġġixxu lill-kumpaniji jinvolvu ruħhom fl-RSK;

2.    Jenfasizza li għarfien attiv tar-responsabilità soċjali jwassal għal fiduċja u aċċettazzjoni soċjali akbar fl-impriżi;

3.   Jaqbel, madankollu, mal-analiżi stabbilita fil-komunikazzjoni, skont liema l-prattiki tal-RSK għadhom limitati, fil-biċċa l-kbira, għal minoranza tal-impriżi l-kbar, minkejja l-appelli diretti fil-komunikazzjonijiet tal-Kummissjoni tal-2001 u 2006 biex aktar impriżi jħaddnu l-RSK; iqis, madankollu, li l-impriżi dejjem kienu involuti fis-soċjetà li fiha joperaw u li l-RSK tista' tiġi introdotta f'kumpaniji ta' kwalunkwe daqs; jinnota wkoll il-ħtieġa li l-SMEs ikunu involuti fid-dibattitu dwar l-RSK, li ħafna minnhom jadottawha abbażi ta' approċċ aktar informali u intuwittiv li jinvolvi l-ammont minimu ta' amministrazzjoni u l-ebda żieda fl-ispejjeż;

4.   Jiġbed l-attenzjoni fuq ir-rwol strateġiku tal-SMEs, li billi huma qrib it-territorju li jaħdmu fih, jistgħu jiffaċilitaw it-tixrid tal-RSK; jitlob lill-Kummissjoni tiżviluppa, flimkien mal-awtoritajiet nazzjonali u mal-pjattaformi multilaterali, forom ta’ kooperazzjoni settorjali bejn l-SMEs li jippermettulhom jieħdu azzjoni konġunta dwar problemi soċjali u ambjentali;

5.  Jiddispjaċih li l-RSK tkompli tkun iffokata fuq standards ambjentali u tħalli barra standards soċjali, anke jekk dawn huma essenzjali sabiex tinkiseb klima soċjali li twassal għal tkabbir ekonomiku u għal konverġenza soċjali;

6.  Jemmen li fil-kriżi finanzjarja globali hemm ir-riskju reali li dawk li jfasslu l-politika, inkluż fl-UE, se jsofri konsegwenzi negattivi minħabba ppjanar fuq terminu qasir ta' żmien, b'konċentrazzjoni esklużiva fuq miżuri ta' trasparenza u kontabilità definiti b'mod ristrett fis-swieq finanzjarji, filwaqt li qed tiġi traskurata l-ħtieġa urġenti li s-setturi finanzjarji kif ukoll dawk industrijali jindirizzaw l-isfidi fundamentali tad-degradazzjoni ambjentali u tad-diżintegrazzjoni soċjali b'mod integrat;

7.   Iwissi li l-impriżi jistgħu biss ikunu sostenibbli fil-futur jekk ikunu jeżistu f'ekonomija sostenibbli, u li ma jistax ikun hemm alternattiva għall-bidla futura b'emissjonijiet baxxi tal-karbonju li tinkludi wkoll il-preservazzjoni tal-kapital soċjali u naturali fid-dinja, proċess li fih l-RSK għandu jkollu rwol deċisiv;

8.   Jemmen li "t-tisħiħ"tal-RSK jeħtieġ jitjieb permezz ta': enfasi fuq l-istrumenti globali tal-RSK; impetu ġdid minn impriżi li huma l-mexxejja fost il-pari tagħhom; żvelar mill-impriżi ta' informazzjoni soċjali u ambjentali; l-użu ta' linji gwida xierqa; appoġġ milll-amministrazzjoni pubblika għall-ħolqien ta' kundizzjonijiet li jwasslu għal kooperazzjoni tal-RSK u l-provvediment ta' għodda u strumenti xierqa, bħal pereżempju sistema ta' inċentiva; analiżi tal-impatt robusta ta' inizjattivi eżistenti tal-RSK; appoġġ għal inizjattivi ġodda fl-isfera soċjali; adattament tal-RSK sabiex jiġu ssodisfati l-ħtiġijiet tal-SMEs; u żieda fir-rikonoxximent fi ħdan kemm il-komunità tan-negozju kif ukoll is-soċjetà ġenerali tal-iskala kbira ħafna tal-isfidi globali soċjali u ambjentali li qed jiffaċċjaw l-Ewropa u d-dinja;

9.   Jappoġġa l-intenzjoni tal-Kummissjoni li ssaħħaħ l-RSK fl-Ewropa billi tipproduci linji gwida u tappoġġa inizjattivi multilaterali għal setturi industrijali individwali, u jappella lill-kumpaniji u l-assoċjazzjonijiet ewlenin biex iħaddnu din l-inizjattiva;

10. Itenni li l-RSK għandha tgħaddi mill-proċess għar-riżultat;

11. Jilqa' favorevolment il-fatt li d-definizzjoni tal-RSK stabbilita fil-komunikazzjoni mill-Kummissjoni, li tirrifletti l-approċċ ġdid adottat għall-ewwel darba mill-Kummissjoni fil-Forum Multilaterali tal-2009, toffri opportunità indispensabbli f'termini ta' inklużjoni u ta' ħolqien ta' kunsens, u tirrifletti korrettament il-kunsens il-ġdid li ntlaħaq bejn l-impriżi u l-partijiet interessati l-oħrajn f'dan l-ambitu bis-saħħa tal-qbil unanimu tal-Prinċipji Gwida tan-NU u strumenti oħra bħall-Gwida Standard dwar ir-Responsabilità Soċjali ISO 26000; jilqa' l-integrazzjoni tat-tħassib soċjali, ambjentali, etiku u rigward id-drittijiet tal-bniedem fl-operazzjonijiet tan-negozju; jinsisti li l-Kummissjoni jeħtiġilha tiddifferenzja aktar bejn: (1) atti ta' karità minn impriżi; (2) atti socjali minn imprizi bbażati fuq il-ligijiet, ir-regoli u l-istandards internazzjonali; u (3) atti antisoċjali minn impriżi li jiksru l-liġijiet, ir-regoli u l-istandards internazzjonali u li huma atti kriminali u abużivi, bħal pereżempju x-xogħol tat-tfal jew ix-xogħol furzat, u li għandhom jiġu kkundanati bil-kbir;

12. Itenni li l-RSK teħtieġ testendi wkoll għall-aġir tal-impriżi fil-konfront ta' pajjiżi terzi u fihom stess;

13. Jinnota b'interess li l-Kummissjoni bdiet tinkludi referenzi għall-RSK fil-ftehimiet kummerċjali tal-UE; huwa tal-fehma li, meta jitqies ir-rwol ewlieni tal-korporazzjonijiet, is-sussidjarji tagħhom u l-ktajjen ta' provvista tagħhom fil-kummerċ internazzjonali, ir-responsabilità soċjali u ambjentali korporattiva għandha ssir parti integrali tal-kapitolu dwar l-iżvilupp sostenibbli tal-ftehimiet kummerċjali tal-UE; jistieden lill-Kummissjoni tiżviluppa proposti konkreti għall-implimentazzjoni ta' dawn il-prinċipji tal-RSK fil-politika kummerċjali;

14. Iqis li "r-responsabilità soċjali" għandha wkoll tirrispetta l-prinċipji u d-drittijiet fundamentali bħal dawk speċifikati mill-ILO, inkluż b'mod partikolari l-libertà ta' assoċjazzjoni, id-dritt għall-ftehim kollettiv, il-projbizzjoni ta' xogħol furzat, l-abolizzjoni tax-xogħol tat-tfal u l-eliminazzjoni tad-diskriminazzjoni fuq il-post tax-xogħol;

15. Jirrakkomanda bil-qawwa l-kontribut magħmul mill-Kummissarji għall-Impjiegi, l-Intrapriża u s-Suq Intern u s-servizzi tagħhom għall-approċċ progressiv u kostruttiv adottat fil-Komunikazzjoni mill-Kummissjoni; jagħraf il-kontribut ta' partijiet oħra tal-Kummissjoni permezz tal-Grupp Inter-Servizz dwar l-RSK; madankollu jitlob lill-President tal-Kummissjoni jipprovdi tmexxija personali fil-qasam tal-RSK u jiżgura li tittieħed "responsabilità" sħiħa tal-impenn tal-Kummissjoni għall-RSK b'mod partikolari fid-Direttorati Ġenerali għall-Ambjent u f'dawk li jikkonċernaw ir-relazzjonijiet esterni;

16.  Itenni l-konvinzjoni tiegħu li l-RSK għandha tinkludi miżuri soċjali li jiġbru fihom taħriġ vokazzjonali, bilanċ bejn ix-xogħol u l-ħajja, u kundizzjonijiet tax-xogħol xierqa; jiddikjara mill-ġdid il-konvinzjoni tiegħu fil-"każ kummerċjali" għall-RSK, iżda jtenni li, meta tali każ ma japplikax fit-terminu qasir f'sitwazzjoni jew f'kumpanija partikolari, dan qatt ma jista' jintuża bħala skuża għall-aġir irresponsabbli u antisoċjali; jemmen li teżisti riċerka suffiċjenti li turi li l-"każ kummerċjali" u li d-disseminazzjoni ta' dik ir-riċerka għandha tkun il-prijorità; jitlob li r-riċerka ġdida dwar l-RSK tkun idedikata għall-valutazzjoni tal-impatt kumulattiv ta' bidliet relatati mal-RSK fl-imġiba tal-impriżi meta jiffaċċjaw sfidi globali Ewropej u dinjija bħall-emissjonijiet tal-karbonju, l-aċidifikazzjoni tal-ilma, il-faqar estrem, ix-xogħol tat-tfal jew l-inugwaljanza, u li l-esperjenza pożittiva ssir parti mill-input futur Ewropew li jgħin biex jiġu żviluppati inizjattivi globali tal-RSK;

17. Jaqbel mal-analiżi tal-Kummissjoni li l-RSK qed issir aktar importanti biex kumpanija jkollha liċenzja soċjali li topera biha, meta titqies l-inċidenza ta' protesta soċjali ta' movimenti bħall-antiglobalizzazzjoni u "Occupy", ta' kunflitti soċjali u xi drabi ta' relazzjonijiet industrijali ta' konfrontazzjoni; jemmen li l-Unjoni Ewropea stess għandha tadotta l-RSK bħala "liċenzja soċjali" tagħha biex tfittex benefiċċji kummerċjali u ekonomiċi ma' pajjiżi u reġjuni oħra fid-dinja; b'mod partikolari jqis li l-RSK jeħtiġilha tkun parti "ewlenija" tal-politiki ta' kummerċ tal-UE;

18. Jirrikonoxxi li jirriżulta difett kbir fl-inizjattivi tal-RSK jekk il-kumpaniji li jiddikjaraw li jipprattikaw l-RSK jirnexxilhom jevitaw gruppi ta' interess kruċjali jew kwistjonijiet sensittivi rilevanti għall-attività tagħhom u l-katina tal-provvista globali tagħhom; jistieden lill-Kummissjoni, f'kollaborazzjoni mal-awtoritajiet finanzjarji u s-sħab soċjali, tibni fuq ix-xogħol preċedenti tal-"laboratorji" tal-RSK biex tidentifika aħjar il-mod kif il-kumpaniji u l-partijiet interessati tagħhom jistgħu jidentifikaw oġġettivament il-kwistjonijiet soċjali u ambjentali essenzjali għall-impriża kkonċernata, u jitlob li ssir għażla ġusta u bilanċjata ta' partijiet interessati li jkunu involuti f'inizjattivi tal-RSK ta' kumpanija;

19. Jemmen li l-konsumaturi qegħdin dejjem aktar jiffukaw l-attenzjoni fuq kumpaniji b'attivitajiet tal-RSK, u għalhekk iħeġġeġ lill-kumpaniji jieħdu approċċ trasparenti, speċjalment fl-operazzjonijiet korporattivi relatati ma' thassib etiku, socjali u ambjentali;

20. Jenfasizza l-fatt li l-RSK tkun vijabbli biss jekk ikunu rrispettati d-dispożizzjonijiet legali fis-seħħ u r-regolamentazzjoni dwar tariffi lokali tas-sħab soċjali;

21. Jinnota li waqt li qed tiġi vvalutata r-responsabilità soċjali ta' impriża, għandha titqies l-imġiba tal-impriżi involuti fil-katina tal-provvista tagħha u kwalunkwe subkuntrattur eventwali;

Irkupru sostenibbli

22. Isostni r-rikonoxximent, fil-komunikazzjoni mill-Kummissjoni, li "l-kontribuzzjoni għall-mitigazzjoni tal-effetti soċjali tal-kriżi attwali" u s-sejba ta' mudelli ta' negozju sostenibbli huma parti mir-responsabilità soċjali tal-impriżi; jistieden lill-Kummissjoni u lill-Istati Membri jgħinu lin-negozji, f'kooperazzjoni mar-rappreżentanti tal-ħaddiema, isiru involuti fl-RSK; jistieden lill-impriżi jqisu inizjattivi maħsuba biex jippreservaw u joħolqu l-impjiegi, speċjalment għaż-żgħażagħ u n-nisa, fl-oqsma kollha ta' attività (bħal pereżempju l-ġestjoni u t-taħriġ, is-swieq, il-persunal, l-ambjent u s-soċjetà), b'attenzjoni partikolari għal dawk affettwati minn żvantaġġi multipli, bħal pereżempju r-Roma u l-persuna b'diżabilità, u biex mis-suq tax-xogħol lokali jirreklutaw mhux biss ħaddiema komuni imma wkoll uffiċjali għolja tal-maniġment u biex jistabbilixxu, pereżempju, sistema li tippermetti li gradwati universitarji jwettqu apprendistati ta' kwalità sabiex jiksbu l-esperjenza ta' xogħol meħtieġa minn impjegaturi tas-settur privat;

23 Iqis li l-impriżi għandhom ikunu involuti fir-riżoluzzjoni ta' problemi soċjali aggravati mill-kriżi ekonomika, bħan-nuqqas ta' abitazzjoni u l-faqar, kif ukoll fl-iżvilupp tal-komunitajiet li fihom jaħdmu;

24. Jirrikonoxxi li l-kriżi ekonomika ġiet akkumpanjata minn żieda fil-każwalizzazzjoni tal-impjiegi, speċjalment għan-nisa, minn differenzi fil-kundizzjonijiet ta' ħidma, li jirriżultaw parzjalment minħabba subkuntrattar, xogħol part time furzat għal ħafna li jixtiequ jaħdmu full time u minn żieda ta' xogħol u prattiki ta' xogħol li xi drabi jkunu abużivi u minn spinta tas-settur informali; jistieden lill-Kummissjoni u lill-Forum Multilaterali Ewropew speċifikament jeżaminaw iż-żieda tas-subkuntrattar. iħeġġeġ li dan ix-xogħol ikun infurmat mill-Prinċipji Gwida tan-NU applikabbli għall-katina tal-provvista u b'mod partikolari għall-kunċett tal-valutazzjoni tal-impatt irrispettivament mil-livelli differenti ta' fornituri;

25. Jinnota li l-konformità mal-leġiżlazzjoni dwar il-kundizzjonijiet fiżiċi tax-xogħol, l-iżvilupp ta' proċeduri u politika dwar ir-reklutaġġ u s-sensji, il-protezzjoni tad-data u tal-privatezza tal-ħaddiema u l-ħlas fil-ħin tar-remunerazzjoni u ta' benefiċċji oħra huma wkoll parti mill-RSK, u jitlob li dawn l-aspetti jkunu rispettati;

26.  Jirrikonoxxi li l-kriżi qed ikollha effett fuq l-istruttura soċjali; jilqa' l-firxa ta' passi li ttieħdu minn ċerti impriżi biex jinkorporaw gruppi vulnerabbli u żvantaġġati fis-suq tax-xogħol; jitlob lill-kumpaniji jżommu l-pass ma' din it-tip ta' inizjattiva; Jenfasizza, madankollu, li l-għeluq tal-impriżi u l-awsterità qegħdin jikkompromettu wħud mit-titjib li ntlaħaq bis-saħħa tal-RSK, bħal pereżempju l-impjieg għall-gruppi vulnerabbli fis-soċjetà, partikolarment il-persuni b'diżabilitajiet, filwaqt li jtejbu t-taħriġ u l-istatus għal dawn il-ħaddiema, jippromwovu forom ġodda inovattivi ta' produzzjoni u servizzi ta’ siwi soċjali, pereżempju permezz ta' unjins ta' kreditu, u jippromovu mudelli ġodda ta' impjiegi permezz tal-impriżi soċjali, tal-kooperattivi u tal-kummerċ ġust; iqis li huwa għalhekk essenzjali li jiġu determinati limiti għall-miżuri soċjali; jistieden lill-Kummissjoni twettaq analiżi importanti tal-impatt soċjali tal-kriżi fuq dawn l-inizjattivi, billi tinkorpora approċċ ibbażat fuq il-ġeneru b'attenzjoni fuq il-pajjiżi tan-Nofsinhar tal-Ewropa, u tikkonsulta b'mod sħiħ mas-sħab soċjali u mal-partijiet interessati tal-RSK dwar l-eżitu tagħha;

27. Jemmen li l-azzjonijiet tal-RSK ma jibbenefikawx biss lis-soċjetà b'mod ġenerali, imma jgħinu wkoll kumpanija ttejjeb l-immaġni tagħha u l-pożizzjoni tagħha f'għajnejn il-konsumaturi potenzjali, b'hekk tista' tkun ekonomikament vijabbli fuq perjodu twil ta' żmien;

28. Jinnota li t-twaqqif ta' programmi ta' żvilupp ta' ħiliet u ta' tagħlim tul il-ħajja għall-ħaddiema, valutazzjonijiet individwali regolati għall-ħaddiema u programm ta' ġestjoni tat-talent kif ukoll it-twaqqif ta' impriżi individwali u l-iżvilupp ta' objettivi għall-ħaddiema jżidu l-motivazzjoni tagħhom u l-impenn tagħhom u huma parti essenzjali mill-RSK;

29. Jinnota li, partikolarment fi żminijiet ta' kriżi, kumpaniji li joperaw bi qbil mal-RSK għandhom jgħinu biex jiġu żviluppati kapaċitajiet innovattivi fir-reġjun tagħhom billi jintroduċu soluzzjonijiet teknoloġiċi innovattivi u li jkunu favur l-ambjent u permezz ta' investimenti ġodda u l-modernizzazzjoni; jenfasizza li l-integrazzjoni tat-tħassib ambjentali bħad-bijodiversità, it-tibdil fil-klima, l-effiċjenza tar-riżorsi u s-saħħa ambjentali fl-operazzjonijiet tal-impriżi toffri potenzjal li jippromovi rkupru sostenibbli;

30. Iqis li l-kriżi finanzjarja f'xi każijiet setgħet mermret il-fiduċja tal-impjegati fil-konfront tal-obbligi tal-kumpaniji li jikkonformaw mad-drittijiet għall-pensjoni privata fit-tul, b'kunsiderazzjoni tad-differenzi bejn sistemi ta' pensjoni fl-UE, wara l-kriżi; jistieden lil kumpaniji responsabbli biex jindirizzaw din il-problema flimkien mal-Kummissjoni u s-sħab soċjali, inkluż bit-twaqqif ta' arranġamenti miftuħa, inklużivi u bbażati fuq ir-regoli biex jiġu ġestiti l-investimenti tal-pensjoni, u bħala parti mill-isfida usa' fi ħdan l-RSK biex jindirizzaw it-tixjiħ attiv fi żmien ta' tibdil demografiku; sabiex ikun hemm irkupru ekonomiku sostenibbli hu essenzjali li terġa' tinbena l-fiduċja bejn l-impjegati u l-kumpaniji;

Organizzazzjoni internazzjonali u approcci multilaterali

31. Jirrakkomanda bil-qawwa l-enfasi mogħtija fil-komunikazzjoni mill-Kummissjoni għat-tisħiħ u l-implimentazzjoni tal-istandards internazzjonali, u – fid-dawl tal-aġġornament tal-2011 tal-Linji Gwida tal-OECD u l-qbil mal-Prinċipji Gwida tan-NU – jemmen li llum trid tingħata attenzjoni partikolari mill-azzjoni tal-UE għall-implimentazzjoni sħiħa ta' tali linji gwida u prinċipji fost l-impriżi Ewropej; jenfasizza li dawn il-linji gwida tal-OECD ġew definiti u rikonoxxuti fil-livell internazzjonali biex jiġu stabbiliti u jinżammu kundizzjonijiet ugwali ta' kompetizzjoni, filwaqt li jitrawmu prattiki kummerċjali miftuħa, ġusti u responsabbli fid-dinja kollha; jissuġġerixxi lill-Kummissjoni li tirrapporta kull sena kemm lill-Parlament kif ukoll lill-Kunsill dwar l-implimentazzjoni ta' dawn il-linji gwida tal-OECD fl-UE;

32. Jissottolinja l-importanza li jkunu żviluppati politiki tal-Unjoni dwar l-RSK f'konformità mal-istandards internazzjonali, għall-fini li jiġu evitati interpretazzjonijiet diverġenti u riskji ta’ vantaġġi jew żvantaġġi kompetittivi f’livell nazzjonali jew internazzjonali;

33 Jinsisti li kull wieħed mis-27 Stat Membru jeħtieġ jaċċellera r-reviżjoni tal-pjanijiet tiegħu ta’ azzjoni dwar l-RSK, u l-iżvilupp tal-pjanijiet nazzjonali li jimplementaw il-Linji Gwida tal-OECD u l-Prinċipji Gwida tan-NU, li għandhom ikunu ffinalizzati sa mhux aktar tard minn tmiem Diċembru 2013; iqis li l-Istati Membri għandhom jiżguraw li dawn il-pjanijiet jitfasslu bil-parteċipazzjoni tal-partijiet interessati relevanti kollha, inkluzi l-NGOs, is-socjetà civili, it-trejdjunjins, l-organizzazzjonijiet tal-impjegaturi u l-istituzzjonijiet nazzjonali tad-drittijiet tal-bniedem (NHRI); jitlob lill-UE tiffaċilita t-tagħlim mill-esperjenza ta’ dawk l-Istati tal-UE li għaddejjin bħalissa mill-proċess; jinkoraġġixxi lill-Istati Membri jitnebbħu mil-linji gwida li jinsabu fl-istandard ISO 26000, mill-aħħar verżjoni tal-linji gwida tal-Global Reporting Initiative u mill-gwida żviluppata mill-Grupp Ewropew tal-Istituzzjonijiet Nazzjonali tad-Drittijiet tal-Bniedem (NHRIs);

34. Jitlob li jkun hemm koerenza akbar fil-politiki f’livell ta’ UE billi l-politiki u l-ftehimiet dwar l-akkwist pubbliku, il-kreditu tal-esportazzjoni, il-governanza t-tajba, il-konkorrenza, l-iżvilupp, il-kummerċ, l-investiment u oħrajn jinġiebu f’konformità mal-istandards internazzjonali tad-drittijiet tal-bniedem, soċjali u ambjentali, stabbiliti fil-linji gwida u l-principji tal-OECD u tan-NU; jitlob, f’dan is-sens, għal kooperazzjoni mal-korpi li jirrappreżentaw l-impjegati, l-impjegaturi u l-konsumaturi filwaqt li jittieħed il-parir tal-NHRIs, bħalma huma s-sottomissjoni tal-Grupp Ewropew tal-NHRIs lill-Kummissjoni dwar id-drittijiet tal-bniedem u l-akkwist; jitlob li jkun hemm valutazzjonijiet sinifikanti u adegwati tal-impatt tal-proposti legizlattivi għal inkoerenza potenzjali mal-Principji Gwida tan-NU, u jinsisti fuq il-koordinazzjoni mal-Grupp ta' Hidma dwar in-Negozju u d-Drittijiet tal-Bniedem tan-NU, ħalli tkun evitata interpretazzjoni ma ssegwix u inkonsistenti ta’ dawk il-Principji Gwida;

35. Jilqa' b'mod partikolari l-inklużjoni tas-settur tal-ICT għal linji gwida speċifiċi Ewropej dwar l-impriżi u d-drittijiet tal-bniedem; jirrikonoxxi d-dilemmi ġenwini maħluqa mill-ħtieġa li tkun protetta l-privatezza u l-ġlieda kontra kontenut kriminali fuq naħa, bl-objettiv li tkun difiża l-libertà tal-espressjoni fuq l-oħra, kif evidenzjat mill-kontroversja reċenti maħluqa mill-vidjow antiiżlamiku mtella’ fuq YouTube; jistieden ħafna aktar kumpaniji Ewropej jkunu involuti fl-inizjattiva li tinkludi diversi partijiet interessati f'dan ir-rigwrd, l-Inizjattiva Global Network (GNI), li s-sħubija fiha hi attwalment dominata mill-kumpaniji bbazati fl-Istati Uniti;

36. Jinsisti li t-totalità tal-"finanzi favur il-kummerċ u l-iżvilupp" konċessi lill-atturi tas-settur privat mill-faċilitajiet ta' investiment tal-UE, il-Bank Ewropew tal-Investiment u l-Bank Ewropew għar-Rikostruzzjoni u l-Iżvilupp għandha tinkludi l-klawsoli kuntrattwali li jeħtieġu l-konformità mal-Linji Gwida tal-OECD dwar Impriżi Multinazzjonali u mal-Prinċipji Gwida tan-NU dwar in-Negozji u d-Drittijiet tal-Bniedem, b'dispożizzjonijiet dwar ir-responsabilità ta’ rendikont u mekkaniżmu ċar ta' lmenti; itenni s-sejħa tiegħu lill-Istati Membri biex jagħmlu l-istess fir-rigward tal-ħruġ ta' krediti tal-esportazzjoni lill-impriżi;

37. Jilqa' l-inizjattiva tal-Kummissjoni dwar il-pjanijiet ta' azzjoni nazzjonali għall-implimentazzjoni tal-Prinċipji Gwida tan-NU dwar in-Negozji u d-Drittijiet tal-Bniedem; jistieden lis-Servizz Ewropew għall-Azzjoni Esterna (SEAE) jiżvolġi rwol ferm akbar biex jikkontribwixxi fit-tmexxija tal-implimentazzjoni f'livell għoli u biex jinkoraġġixxi monitoraġġ u rappurtar effetttiv; jappella għal "proċess ta' riezami inter pares" li jseħħ bejn l-Istati Membri ħalli jsir progress fl-implimentazzjoni; jitlob lill-Kummissjoni u lis-SEAE jwettqu evalwazzjoni tal-implimentazzjoni tal-pjanijiet ta' azzjoni u valutazzjoni tal-azzjoni meħuda fil-livell tal-UE, u jirrapportaw lura lill-Kunsill Ewropew u lill-Parlament sa tmiem l-2014;

38. Jirrikonoxxi li l-kumpaniji qed joperaw dejjem iżjed fi stati fraġli u li huma għandhom dmir li jipproteġu l-persunal tagħhom mill-kunflitt, it-terroriżmu u l-kriminalità organizzata; madankollu jinsisti li l-kumpaniji għandhom dmir ugwali li jassiguraw li l-arranġamenti ta' sigurtà ma jippreġudikawx il-paċi jew is-sigurtà ta' oħrajn f'postijiet fejn joperaw, u li bihom jistgħu jkunu akkużati b'kompliċità fi ksur tad-drittijiet tal-bniedem; jistieden lill-Kummissjoni u lill-Istati Membri jiżguraw adozzjoni ferm akbar tal-Prinċipji tas-Sigurtà Volontarja internazzjonali u li jfittxu ftehim dwar qafas regolatorju internazzjonali fuq ir-regolazzjoni, il-monitoraġġ u s-superviżjoni tal-attivitajiet tal-kumpaniji militari u ta' sigurtà privati (PMSCs);

39. Jistieden lill-impriżi u partijiet interessati oħra jkunu involuti b'mod kostruttiv fil-proċess tal-Kummissjoni biex jiżviluppaw gwida tad-drittijiet tal-bniedem speċifika għas-settur, u biex jużaw il-gwida li tirriżulta meta din tkun kompluta;

40. Jistieden lill-Kummissjoni, partikolarment id-DĠ Ġustizzja tagħha, tressaq proposti biex tiffaċilita aħjar l-aċċess għall-ġustizzja fil-qrati tal-UE għall-każijiet l-aktar impressjonanti u estremi ta' ksur tad-drittijiet tal-bniedem jew tax-xogħol min-naħa ta' impriżi bbażati fl-Ewropa, jew mis-sussidjarji, mis-sottokuntratturi jew mis-sħab kummerċjali tagħhom, kif rakkomandat mis-Segretarju Ġenerali u Rappreżentat Għoli tan-NU dwar in-Negozji u d-Drittijiet tal-Bniedem;

41. Jinnota, ukoll, il-ħtieġa li jiġu żviluppati u mwaqqfa mekkaniżmi għar-rappurtar ta' ksur tad-drittijiet tal-bniedem f'impriżi individwali;

42. Jemmen li l-istudju "Green Matters" juri definittivament ir-rabta pożittiva bejn kumpaniji li qed isegwu l-RSK u l-ilħuq ta' rendiment finanzjarju aħjar hekk kif qed joħorġu mill-kriżi; japprova l-kunċett ta' "kompetittività responsabbli" u jenfasizza li s-suq potenzjali għal prodotti u servizzi soċjalment u ambjentalment utli jibqa' opportunità kruċjali tas-suq għal kumpaniji kif ukoll jissodisfa l-ħtiġijiet tas-soċjetà;

43. Huwa tal-istess fehma tal-impriżi, identifikata fl-Istħarriġ Global CEO 2012, li tkabbir sostenibbli tan-negozju jesiġi ħidma mill-qrib mal-popolazzjonijiet lokali, mal-gvernijiet u mas-sħab tan-negozju, u investiment fil-komunitajiet lokali; jappoġġa u jitlob intensifikazzjoni tal-inizjattivi tan-negozju marbutin mal-ħolqien tal-impjiegi, it-taħriġ, l-għajnuna biex ikunu ġestiti l-limiti tar-riżorsi u l-kontribuzzjoni għas-soluzzjonijiet tas-saħħa;

44. Jistieden lill-Kummissjoni, partikolarment id-DĠ Kummerċ, titlaq minn approċċ "passiv" u tadotta approċċ "attiv" fil-konfront tal-Linji Gwida tal-OECD, inkluż billi taderixxi mad-Dikjarazzjoni tal-OECD dwar l-Investiment Internazzjonali u l-Impriżi Multinazzjonali, li tinkludi l-Linji Gwida tal-OECD, filwaqt li tiżgura l-promozzjoni u s-sostenn kontinwu tal-Linji Gwida tal-OECD permezz tad-Delegazzjonijiet tal-UE f'pajjiżi terzi, tiżgura l-finanzjament ta' inizjattivi għall-bini tal-kapaċità flimkien mal-impriżi, it-trejdunjins u s-soċjetà ċivili f'pajjiżi terzi fir-rigward tal-implimentazzjoni tal-Linji Gwida, u tiżgura li l-Linji Gwida jkunu speċifikament imsemmija fil-ftehimiet il-ġodda kollha bejn l-UE u pajjiżi terzi, inklużi t-trattati kollha ta' kummerċ u ta' investiment; jitlob lill-UE tagħmel sforz diplomatiku kbir biex tikkonvinċi aktar pajjiżi fil-livell internazzjonali ħalli jsiru firmatarji u biex tipprovdi lil gruppi tas-soċjetà ċivili b'appoġġ konkret għal "każijiet speċifiċi" ta' ksur allegat, f'kooperazzjoni mal-Istati Membri;

45. Jemmen li l-RSK tista' tkun għodda importanti biex tgħin lill-UE tappoġġa l-implimentazzjoni tal-konvenzjonijiet internazzjonali tal-Organizzazzjoni Dinjija tax-Xogħol (ILO); jistieden lill-Kummissjoni tappoġġa lill-organizzazzjonijiet u s-sħab soċjali Ewropej li jkunu qed ifittxu li jwettqu proġetti pilota bi qbil mal-Linji Gwida tal-OECD u standards internazzjonali oħra tal-RSK bil-għan li tinbena l-kapaċità fil-pajjiżi terzi; jitlob lill-Kummissjoni biex tistabbilixxi mira speċifika għan-negozjar u l-konklużjoni ta' ftehimiet qafas ġodda dwar kwistjonijiet relatati mal-RSK u biex tistieden lis-sħab soċjali jikkonkludu dawn il-ftehimiet fil-kuntest tal-approċċ settorjali l-ġdid tagħhom għall-RSK; jistieden lill-Kummissjoni, b'mod partikolari d-DĠ Impjiegi, biex tintegra l-istandards tax-xogħol fl-RSK billi twettaq proġetti pilota dwar xogħol deċenti flimkien ma' gvernijiet ta' pajjiżi terzi;

46. Jaqbel mal-komunikazzjoni tal-Kummissjoni bit-titolu "Strateġija rinnovata tal-UE 2011-2014 għar-Responsabilità Soċjali Korporattiva" li "r-rispett għal-leġiżlazzjoni applikabbli, u għall-ftehimiet kollettivi bejn is-sħab soċjali, huwa prerekwiżit biex titwettaq responsabilità [soċjali korporattiva]"; jemmen li RSK għandha tikkumplimenta, imma bl-ebda mod tieħu post, il-leġiżlazzjoni eżistenti, in-negozjar kollettiv u d-djalogu mal-ħaddiema organizzati fi trejdunjins; jemmen li l-kumpaniji għandhom jikkommettu lilhom infushom li jiddiskutu l-politika tagħhom tal-RSK − u elementi bħal rapport annwali tal-kumpanija dwar l-impatt soċjali u ambjentali tal-attivitajiet tagħhom − mal-impjegati u r-rappreżentanti tagħhom; jemmen li għandu jkun adottat sett ta' regoli fakultattiv għall-EFAs fuq il-bażi tal-kontenut possibbli ta' tali qafas, kif deskritt fid-dokument ta' ħidma tal-persunal tal-Kummissjoni dwar dan is-suġġett;

47. Jitlob lil-UE, u b'mod partikolari l-Kummissjoni:

(1) tiżgura li t-tema tal-RSK u d-drittijiet tal-bniedem tkun tidher fost il-prijoritajiet tal-istrumenti finanzjarji individwali fil-qafas finanzjarju pluriennali (QFP) l-ġdid għall-perijodu 2014-2020; kif ukoll

(2) tiżviluppa appoġġ speċifiku skont l-EIDHR għat-taħriġ u l-bini globali tal-kapaċità fil-qasam tal-RSK u d-drittijiet tal-bniedem għall-organizzazzjonijiet tas-soċjetà ċivili, l-NHRIs, id-difensuri tad-drittijiet tal-bniedem, it-trejdunjins, u organizzazzjonijiet oħrajn tad-drittijiet tal-bniedem;

48. Jilqa' l-fatt li wħud fis-settur tan-negozju użaw is-samit tan-NU Rio+20 biex jappoġġaw konvenzjoni globali ġdida dwar ir-responsabilità korporattiva fis-sistema tan-NU; jemmen li għalkemm tali konvenzjoni probabilment għad fadlilha ftit snin, l-UE għandha, b'mod kostruttiv, tinvolvi lilha nnifisha fid-dibattitu; madankollu jemmen li tali diskussjonijiet ma għandhomx jaljenaw lil dawk responsabbli mill-politika tal-impriżi u lill-gvern milli jipproċedu b'urġenza bl-implimentazzjoni tal-istrumenti eżistenti tal-RSK; jiġbed l-attenzjoni għall-fatt li hemm mudelli differenti dwar kif jistgħu joħorġu forom ġodda ta' governanza globali tal-RSK flimkien mas-sistema tan-NU, pereżempju billi jiġi promoss it-tkabbir tal-Linji Gwida tal-OECD fost dawk li mhumiex membri jew permezz ta' inizjattiva indipendenti minn gvernijiet tal-istess opinjoni; jistieden lill-UE, lill-Kummissjoni u lill-Istati Membri biex jiżviluppaw u jappoġġaw proposti speċifiċi għal kontribut konkret u verifikabbli għall-impriżi li jrid ikun hemm qbil dwarhom bħala parti mill-għanijiet proposti tan-NU dwar l-iżvilupp sostenibbli għal wara l-2015;

Politiki pubbliċi għall-RSK

49. Japprova l-fehma, li ġejja mill-ewwel rapport ta' Ġunju 2004 tal-Forum Multilaterali, li l-awtoritajiet pubbliċi jista' jkollhom rwol sinifikanti billi jagħmlu użu mill-funzjonijiet tagħhom ta' konvokazzjoni u ta' inċentivazzjoni biex isir progress fl-RSK, mhux l-inqas fl-akkwist pubbliku, u jistieden lill-Istati Membri, permezz tal-Grupp ta' Livell Għoli u alternattivi oħra, biex jagħtu spinta kbira ġdida lil tali sforzi;

50. Jitlob li fejn l-UE jew l-Istati Membri tagħha jkunu sħab fin-negozju (eż. fil-kuntest tal-akkwist pubbliku, l-impriżi tal-istat, l-impriżi konġunti, il-garanziji tal-kreditu għall-esportazzjoni u l-proġetti fuq skala kbira f’pajjiżi terzi), il-konsistenza mal-OECD u l-Linji Gwida u l-prinċipji tan-NU għandha tkun prijorità, riflessa fi klawsoli speċifiċi b'konsegwenzi għall-kumpaniji li jiksru b'mod ċar l-istandards soċjali, ambjentali u tad-drittijiet tal-bniedem;

51. Jisħaq fuq l-importanza tal-qafas tan-NU "Protezzjoni, Rispett u Rimedju" u jqis li dawn it-tliet pilastri – ir-responsabilità tal-Istat li jipproteġi mill-ksur tad-drittijiet tal-bniedem, ir-responsabilità tal-kumpaniji li jirrispettaw id-drittijiet tal-bniedem u l-bżonn ta' aċċess aktar effettiv għar-rimedju – għandhom ikunu appoġġati permezz ta' miżuri xierqa li jippermettu l-implimentazzjoni tagħhom;

52. Jenfasizza li, minħabba l-piż tagħhom fil-kummerċ internazzjonali, il-kumpaniji Ewropej u s-sussidjarji u s-sottokuntratturi tagħhom għandhom rwol fundamentali fil-promozzjoni u t-tixrid tal-istandards soċjali u tax-xogħol mad-dinja kollha; jirrikonoxxi li l-ilmenti kontra l-kumpaniji tal-UE li joperaw barra huma ta' spiss solvuti b'mod aktar utli in situ; ifaħħar lill-punti nazzjonali ta' kuntatt tal-OECD bħala mekkaniżmi mhux legali bbażati fl-istati li jistgħu jimmedjaw fuq firxa wiesgħa ta' tilwim tan-negozju u tad-drittijiet tal-bniedem; jitlob, madankollu, li jkun hemm sforzi akbar mill-kumpaniji biex jiżviluppaw mekkaniżmi ta’ lmentar allinjati mal-kriterji ta’ effikaċja msemmija fil-Prinċipji Gwida tan-NU u biex ifittxu aktar gwida awtorevoli pprovduta minn prinċipji u linji gwida rikonoxxuti internazzjonalment, b'mod partikolari l-Linji Gwida tal-OECD aġġornati reċentement għal Impriżi Multinazzjonali, l-għaxar prinċipji tal-Patt Globali tan-NU, l-istandard ta' gwida dwar ir-responsabilità soċjali ISO 26000 u d-Dikjarazzjoni Tripartitika ta’ Prinċipji fir-rigward tal-Impriżi Nazzjonali u l-Politika Soċjali tal-ILO;

53. Jilqa’ l-intenzjoni tal-Kummissjoni li temenda d-dispożizzjonijiet tad-dritt internazzjonali privat li jinstabu fir-Regolament Brussell I, u b'mod partikolari l-introduzzjoni tal-prinċipju tal-'forum necessitatis'; jisħaq dwar il-ħtieġa li jkun hemm żvilupp ulterjuri fl-aċċess effikaċi għal rimedji għal vittmi ta' ksur tad-drittijiet tal-bniedem li jirriżulta mill-operazzjonijiet tal-kumpaniji barra mill-UE, permezz ta’ riformi tar-Regolamenti Brussell I u Ruma II; jitlob li jkun hemm miżuri effikaċi għat-tneħħija tal-ostakli eżistenti għall-ġustizzja, bħalma huma l-kostijiet mhux xierqa tal-litigazzjoni, permezz ta' inizjattivi bħalma huwa l-iżvilupp ta' standards minimi ta' rimedju kollettiv u soluzzjonijiet għall-problema tal-'personalità ġuridika separata' tal-kumpaniji;

54. Jitlob għall-iżvilupp ta' standards ta' trasparenza u responsabilità aktar effettivi għall-kumpaniji teknoloġiċi tal-UE fir-rigward tal-esportazzjoni ta' teknoloġiji li jistgħu jintużaw sabiex jiksru id-drittijiet tal-bniedem jew jaġixxu kontra l-interessi tas-sigurtà tal-UE;

55. Jitlob li jiġi implimentat il-prinċipju "kun af l-utent aħħari tiegħek" biex jiġi żgurat aktar skrutinju u biex jiġi evitat milli jseħħ ksur tad-drittijiet tal-bniedem fl-istadji tal-bidu jew dawk sussegwenti fil-ktajjen tal-provvista u fil-flussi tal-produzzjoni jew tas-swieq;

56. Iqis li l-Istati Membri għandhom iżommu lill-kumpaniji responsabbli għall-adozzjoni ta' prinċipji u politiki proattivi biex jikkumbattu d-diskriminazzjoni u l-esklużjoni soċjali, jippromovu l-ugwaljanza bejn is-sessi u jirrispettaw id-drittijiet fundamentali ta' kulħadd;

57. Jistieden lill-Kummissjoni u lill-Istati Membri, meta jitqies l-approċċ multilaterali għall-RSK, biex jikkunsidraw li jwessgħu l-attendenza ta' osservaturi fil-laqgħat biennali tal-Grupp ta' Livell Għoli biex jinkludu rappreżentanti bħala osservaturi li jinkludu żewġ rapporteurs mill-kumitati relevanti tal-Parlament, rappreżentanti mill-Programm tal-Ambjent tan-NU, il-Kunsill dwar id-Drittijiet tal-Bniedem tan-NU u tal-Organizzazzjoni Internazzjonali tax-Xogħol, u persuna maħtura mis-settur tan-negozji Ewropej, mit-trejdunjins u mis-soċjetà ċivili, li jrid ikun hemm qbil dwarhom mill-kumitat ta' koordinazzjoni tal-Forum Multilaterali;

58. Jirrikonoxxi li l-ħtieġa, imsemmija fid-Dikjarazzjoni ta' Laeken tal-2001, li l-istituzzjonijiet tal-UE jitressqu aktar qrib taċ-ċittadini tal-Unjoni għadha għaddejja; jappoġġa għalhekk eżami formali tal-"proposta Solidarité" għal programm interistituzzjonali fil-qasam tar-riżorsi umani fl-istituzzjonijiet tal-UE bil-għan li jiffaċilita l-involviment tal-persunal u tal-apprendisti tagħhom fil-volontarjat, permezz tal-attivitajiet umanitarji benevolenti u soċjali pożittivi, kemm bħala parti mit-taħriġ tal-persunal kif ukoll fil-forma ta' volontarjat; jenfasizza l-fatt li l-programm propost jiffranka l-ispejjeż u għandu valur miżjud għoli kif ukoll jista' jgħin fil-promozzjoni u l-implimentazzjoni tal-politiki u l-programmi tal-UE; iħeġġeġ lill-Istati Membri kollha biex jinkludu l-volontarjat tal-impjegati fil-pjanijiet ta' azzjoni nazzjonali tagħhom; jitlob għal 'patt' li jkun iffirmat permezz taċ-Ċentru Ewropew għall-Volontarjat (CEV) bil-għan li jinvolvi organizzazzjonijiet tas-soċjetà ċivili mill-Ewropa kollha li jipprovaw jilħqu dan l-objettiv;

59. Jistieden lill-impriżi biex iħeġġu l-impjegati tagħhom biex jagħmlu xogħol volontarju internazzjonali, bil-għan li jiġu promossi s-sinerġiji bejn is-settur pubbliku u s-settur privat fil-qasam tal-kooperazzjoni għall-iżvilupp; jitlob lill-Kummissjoni biex tipprovdi appoġġ, permezz tal-Korp Volontarju Ewropew ta' Għajnuna Umanitarja, għal azzjoni meħuda min-negozji f'dan il-qasam;

60. Iqis li l-Istati Membri għandhom jinkoraġġixxu kumpaniji jiżviluppaw politiki u jwettqu miżuri li jindirizzaw il-ħtieġa li jkunu rispettati l-ħajja privata u tal-familja tal-impjegati kollha tagħhom; jemmen li dawn il-politiki u l-miżuri għandhom jikkonformaw mal-prinċipju tal-ugwaljanza, u għandhom jestendu għal negozjati dwar it-tul u l-organizzazzjoni tas-sigħat tax-xogħol, il-livelli tas-salarji, id-disponibilità ta' ċerti faċilitajiet prattiċi għall-ħaddiema, u kundizzjonijiet flessibbli ta' xogħol, inkluża n-natura tal-kuntratti tal-impjieg u d-disponibilità ta' waqfien waqt il-karriera;

61. Jirrikonoxxi li l-indikaturi soċjali għadhom lura fir-rigward tal-indiċi ambjentali f'termini ta' valutazzjoni ekonomika u l-ispeċifiċità ġenerali f'ħafna inizjattivi tal-RSK; jemmen, minkejja l-manwal dwar l-akkwist soċjali, li l-UE stess kienet wisq limitata f'dan il-qasam; jitlob għal studju dwar "valutazzjoni tal-kapital soċjali" li jwassal għal dibattitu Ewropew wiesa' dwar integrazzjoni aħjar tal-impatt soċjali fuq it-tmexxija ta' negozju sostenibbli; jappoġġa fondi għall-proġetti pilota li jiżviluppaw l-indiċi soċjali, l-aġenziji ta' klassifikazzjoni soċjali u l-prattika ta' awditjar soċjali f'uħud mill-Istati Membri u s-setturi tan-negozju;

62. Jilqa' r-rikonoxximent tar-rwol li jrid ikollu s-settur tal-akkwist pubbliku biex iħeġġeġ fil-prattika l-RSK, inkluż l-aċċess għat-taħriġ, l-ugwaljanza, il-kummerċ ġust u l-integrazzjoni soċjali ta' ħaddiema żvantaġġati u ta' persuni b'diżabilitajiet, sabiex jipprovdu lill-impriżi b'inċentiv li jżidu r-responsabilità soċjali tagħhom; madankollu jqis li mhuwiex ċar sa liema punt ġew verament segwiti mill-awtoritajiet pubbliċi l-emendi suċċessivi għar-regoli tal-akkwist tal-UE u x'impatt globali kien hemm f'termini ta' titjib tar-rendiment ambjentali u soċjali tan-negozju kif ukoll ta' inċentivi għall-RSK; jitlob għal aktar riċerka u valutazzjonijiet tal-impatt li jwasslu għal rakkomandazzjonijiet ċari bil-għan li jipprovdu inċentivi li jinftiehmu faċilment mill-impriżi; jitlob biex dan jinkludi analiżi tal-prattika li qed tikber ta' bini ta' negozji fuq klawsoli RSK fl-akkwist privat tagħhom i.e. fil-kuntratti impriża ma' impriża, u jitlob biex ikunu identifikati prattiki tajba f'dan il-qasam;

63. Jinkoraġġixxi l-użu ta' teknoloġija tal-informazzjoni u tal-komunikazzjoni u l-midja soċjali biex iħeġġeġ lil dawk globalment interessati li jieħdu sehem aktar attiv fil-konsultazzjonijiet multilaterali;

64. Ifaħħar lill-Istati Membri għall-isforzi konsiderevoli tagħhom biex jiżviluppaw u jimplimentaw il-pjanijiet ta' azzjoni nazzjonali dwar l-RSK f'konsultazzjoni ma' pjattaformi multilaterali nazzjonali f'bosta pajjiżi tal-UE; madankollu, jesprimi tħassib li varjetà kbira ta' miżuri tal-politika pubblika għad irid ikollhom impatt viżibbli sinifikanti fuq il-progress tal-RSK; jitlob biex ikun hemm aktar riċerka u evalwazzjoni tal-miżuri tal-politika pubblika relatati mal-RSK fil-livell Ewropew; jitlob lill-Kummissjoni stess biex turi "tmexxija bl-eżempju" bħala impjegatur responsabbli billi tippubblika r-rapport dwar l-RSK tagħha bi qbil mas-Suppliment tas-Settur Pubbliku tal-GRI, filwaqt li toffri lill-persunal tal-Kummissjoni "time-off" biex jieħu inizjattivi ta' volontarjat tal-impjegati u billi tirrevedi l-użu tal-investimenti tal-fondi tal-pensjoni skont kriterji etiċi;

65. Jitlob biex is-Sena Ewropea taċ-Ċittadinanza 2013 tinkludi parti speċifika dwar iċ-ċittadinanza tan-negozju, filwaqt li jistieden l-intraprendituri u n-negozjanti biex jinvolvu lilhom infushom fl-inizjattivi eżistenti tal-RSK fl-Istati Membri u fil-livell tal-UE bil-għan li jiġi promoss u żviluppat il-kunċett ta' "ċittadin korporattiv tajjeb";

66. Jilqa' l-intenzjoni tal-Kummissjoni li tibbaża l-iskema ġdida tal-premjijiet tagħha fuq prattiki eżistenti f'dan il-qasam; jemmen li l-premjijiet jistgħu jinċentivaw l-RSK ladarba r-rebbieħa jirrappreżentaw ġenwinament l-aħjar prattika fil-livell nazzjonali, Ewropew u globali; jistieden lill-Kummissjoni tistabbilixxi panel indipendenti ta' esperti li jevalwaw dan u li "jawditjaw" l-iskema f'din is-sena u fi snin futuri fuq bażi kontinwa; jitlob biex il-pubbliċità dwar il-premjijiet tirrifletti l-kumplessità reali tal-isfidi li qed jiġu affaċċjati u jenfasizza li għandhom jittieħdu lezzjonijiet mhux biss għar-rebbieħa imma wkoll għall-kumpaniji kollha;

67. Iqis bħala essenzjali għall-Kummissjoni li tiżviluppa malajr kemm jista' jkun il-metodoloġija komuni mħabbra għall-kejl tar-rendiment ambjentali bbażat fuq l-ispiża taċ-ċiklu tal-ħajja; jemmen li tali metodoloġija tista' tkun utli f'termini kemm ta' trasparenza tal-informazzjoni tal-kumpaniji kif ukoll tal-valutazzjoni mill-awtoritajiet tar-rendiment ambjentali tal-kumpaniji;

68. Jistieden lill-Kummissjoni taċċelera l-isforzi tagħha intiżi li jressqu proposti ġodda fil-programm ta' ħidma tagħha biex jimtlew il-lakuni f'termini ta' governanza fir-rigward tal-istandards internazzjonali fil-qasam tal-RSK, kif jirrakkomanda l-"Istudju ta' Edinburgh" li hi kkummissjonat;

69. Jistieden lill-Istati Membri jieħdu azzjoni li ssaħħaħ l-effikaċja ta' politiki li jippromovu l-RSK billi, pereżempju, jintroduċu premjijiet għal imġiba korporattiva responsabbli fil-forma ta' inċentivi ta' politika ta' investiment u ta' aċċess għall-investiment pubbliku;

70. Jirrakkomanda lill-Kummissjoni tippjana biex tressaq inizjattivi fl-oqsma tal-produzzjoni u tal-konsum responsabbli; jemmen li l-UE tista' tibni fuq l-esperjenza ta' inizjattivi tal-RSK li jkun fihom taħriġ speċifiku u bini tal-kapaċità għax-xerrejja fil-kumpaniji; jemmen li l-inizjattiva ppjanata dwar trasparenza tista' tkun mutur ewlieni għall-moviment tal-konsumatur etiku; jistieden lill-Kummissjoni u l-Istati Membri biex iqisu l-fattibilità u x-xewqa li tiġi żviluppata tikketta soċjali Ewropea għall-kumpaniji kollha involuti fl-RSK, sabiex l-isforzi tagħhom ikunu aktar viżibbli għall-konsumaturi u l-investituri, u billi jibnu fuq l-inizjattivi ta' tikketti eżistenti, biex tiġi kontinwament promossa l-kollaborazzjoni minn "isfel għal fuq" taħt il-patroċinju tal-Alleanza tal-Akkreditazzjoni Internazzjonali Soċjali u Ambjentali u ta' Tikkettar (ISEAL); jissuġġerixxi li l-kumpaniji li jkollhom tali tikketta Ewropea jkunu sorveljati regolarment dwar il-konformità tagħhom mad-dispożizzjonijiet soċjali tal-RSK stabbiliti fit-tikketta;

Rabta bejn l-investiment soċjalment responsabbli u l-informazzjoni

71. Josserva li mutur fundamentali tas-suq tal-investiment responsabbli b'mod soċjali u sostenibbli jibqa' d-domanda tal-investituri istituzzjonali, għalkemm l-attenzjoni primarja m'għandhiex tibqa' marbuta biss mal-aspetti ambjentali; josserva, f'dan ir-rigward, li l-informazzjoni hija mutur fundamentali tal-RSK u trid tkun ibbażata fuq prinċipji soċjali u ambjentali faċilment applikabbli u li jistgħu jitkejlu; jilqa' l-azzjoni tal-Kummissjoni li tinvolvi lilha nnifisha mal-komunità tal-investituri dwar kwistjonijiet tal-RSK; jitlob biex dan l-involviment ikun ibbażat sew fuq appoġġ għall-Prinċipji tan-NU għal Investiment Responsabbli u l-prinċipju dwar rappurtar integrat (IR);

72. Jinnota li l-benefiċjarji ta' investituri fit-tul bħal pereżempju fondi tal-pensjonijiet għandhom interess fir-rendiment sostenibbli u fl-imġiba korporattiva responsabbli; jemmen li huwa importanti li l-inċentivi tal-aġenti tal-investiment ikunu allinjati b'mod effikaċi mal-interessi tal-benefiċjarji, u ma jillimitawhomx għal interpretazzjoni ristretta ta' dawk l-interessi li tiffoka biss fuq il-massimizzazzjoni tar-rendiment għal terminu qasir; japprova qafas legali li jappoġġa dan l-għan; jilqa' l-iżvilupp tal-proposti tal-Kummissjoni dwar l-investiment fit-tul u dwar il-governanza korporattiva li se jikkontribwixxu għall-indirizzar ta' dawn il-kwistjonijiet.

73. Jappoġġa l-Kummissjoni biex tressaq proposta dwar żvelar mhux finanzjarju min-negozji; jinsab kuntent li din il-proposta hija bbażata fuq konsultazzjoni pubblika wiesgħa kif ukoll fuq sensiela ta' workshops ma' partijiet interessati rilevanti; javża li l-użu tat-terminu ‘mhux finanzjarju’ m’għandux jaħbi l-konsegwenzi finanzjarji verament reali għan-negozju fir-rigward tal-kwistjonijiet soċjali, ambjentali u tad-drittijiet tal-bniedem; jemmen li l-proposta tagħti lill-UE l-opportunità li tirrakkomanda li n-negozji Ewropej japplikaw il-Prinċipji Gwida tan-NU dwar in-Negozju u d-Drittijiet tal-Bniedem u l-Patt Globali tan-NU u li għandhom jiġu armonizzati b'rapportar integrat kif attwalment qed jiġi żviluppat mill-Kunsill Internazzjonali dwar ir-Rapportar Integrat (IIRC); jenfasizza li kwalunkwe soluzzjoni trid tkun flessibbli u ma toħloqx piżijiet u spejjeż amministrattivi eċċessivi, partikolarment għal negozji b'anqas minn 500 ħaddiem; jemmen li sistema ta' "ikkonforma jew spjega" hija għodda utli;

74. Jinnota li sabiex tissaħħaħ il-kredibilità tal-azzjonijiet tan-negozju, ir-rapport soċjali għandu jiġi vverifikat minn korp estern;

Promozzjoni tal-RSK

75. Huwa favur rwol ta' tmexxija kontinwa tal-Forum Multilaterali Ewropew għas-sostenn tal-implimentazzjoni tal-proposti stabbiliti fil-komunikazzjoni mill-Kummissjoni; jirrimarka li kieku l-RSK tkun adattata aktar mill-qrib għall-SMEs, hi tkun tista' tinfirex aktar fil-partijiet kollha tal-Ewropa; jistieden lill-parteċipanti kollha jimpenjaw ruħhom fil-ħidma tal-forum b'approċċ li jkun flessibbli, b'moħħ miftuħ u orjentat lejn il-kunsens fl-ispirtu reali tal-RSK;

76.  Jinsisti li d-drittijiet u l-libertajiet tat-trejdunjins u r-rappreżentazzjoni ta' korpi li jirrappreżentaw il-ħaddiema u li jkunu eletti b'mod demokratiku jinsabu fiċ-ċentru ta' kwalunkwe strateġija tal-RSK; ifaħħar il-qafas estensiv tal-UE tal-istrutturi tad-djalogu soċjali settorjali u transsettorjali u jitlob li jkun hemm konsultazzjoni u involviment sħaħ u attivi tal-organizzazzjonijiet rappreżentattivi u t-trejdunjins, b'mod partikolari fl-iżvilupp, l-operat u l-monitoraġġ tal-proċessi u l-istrutturi tal-RSK tal-kumpaniji, f'kollaborazzjoni mal-impjegaturi b'approċċ ġenwin ta' sħubija; jistieden lill-Kummissjoni tittratta r-rappreżentanti tal-unjins u tal-persunal, li huma atturi essenzjali, bħala sħab fi djalogu f'konnessjoni ma' temi relatati mal-RSK, flimkien ma' impriżi u partijiet interessati oħra; huwa tal-fehma li s-sħab soċjali jista' jkollhom rwol ewlieni fil-promozzjoni tar-responsabilità soċjali korporattiva li, għandu jkun innutat, tikkontribwixxi għad-djalogu soċjali u tiffaċilitah;

77. Jitlob li l-politiki tal-RSK jinkludu miżuri speċifiċi li jindirizzaw il-prattika illegali li permezz tagħha ħaddiema jitqiegħdu fuq “lista sewda”u jinċaħdu l-aċċess għall-impjieg, ħafna drabi minħabba s-sħubija jew l-attivitajiet tagħhom f’xi trejdjunjin jew ir-rwol bħala rappreżentanti fil-qasam tas-saħħa u s-sikurezza;

78. Jinsisti li kwalunkwe impriża li tinsab li qed tqiegħed il-ħaddiema fuq “lista sewda” jew tikser id-drittijiet tal-bniedem u l-istandards tax-xogħol għandha tiġi eskluża milli tirċievi għotjiet u finanzjament tal-UE u milli tieħu parti f’sejħiet għal offerti għal kuntratti ta’ akkwist pubbliku oħrajn fil-livell tal-UE, nazzjonali jew fil-livell tal-awtorità pubblika;

79. Jinnota li l-politiki tal-RSK jeħtieġu jiġu rispettati mhux biss mill-kumpanija ewlenija jew mill-kuntrattur iżda wkoll minn kull sottokuntrattur jew katina tal-provvista li tista' tintuża, kemm fil-provvista tal-oġġetti, ħaddiema jew servizzi u kemm jekk ikunu bbażati fl-UE jew f'pajjiż terz, biex b'hekk jiġu żgurati kundizzjonijiet ekwi bbażati fuq paga ġusta u kundizzjonijiet ta' xogħol diċenti, u jiġu ggarantiti d-drittijiet u l-libertajiet tat-trejdunjins;

80. Japprova d-Direttiva tal-Kummissjoni dwar standards minimi għall-vittmi u jitlob li l-politiki tal-RSK tal-kumpaniji fis-setturi rilevanti (bħall-ivvjaġġar, l-assigurazzjoni, l-akkomodazzjoni u t-telekomunikazzjonijiet) jinkludu strateġiji u strutturi pożittivi u prattiċi biex jappoġġaw il-vittmi ta’ reati u l-familji tagħhom waqt kriżi, u biex jistabbilixxu politiki speċifiċi għal kwalunkwe impjegat li jisfa vittma ta’ reat, kemm jekk fil-post tax-xogħol u kemm barra minnu;

81. Jaqbel li ma jistax ikun hemm approċċ "universali" fil-konfront tal-RSK iżda jirrikonoxxi li l-abbundanza ta' inizjattivi varji tal-RSK, għalkemm turi kuxjenza lejn l-importanza tal-politiki tal-RSK, tista' tiġġenera spejjeż addizzjonali, tkun ta' ostakolu għall-implimentazzjoni u ddgħajjef il-fiduċja u s-sens ta' ġustizzja; jemmen li jeħtieġ li jkun hemm biżżejjed flessibilità fl-implimentazzjoni tal-linji gwida tal-RSK sabiex jipprovdu għar-rekwiżiti speċifiċi ta' kull Stat Membru u reġjun, u b'mod partikolari fir-rigward tal-kapaċitajiet tal-SMEs; jilqa', madankollu, il-kooperazzjoni attiva tal-Kummissjoni bil-parteċipazzjoni tal-Parlament u l-Kunsill, flimkien ma' korpi internazzjonali oħra biex tintlaħaq konverġenza fundamentali tal-inizjattivi tal-RSK fuq tul ta' żmien twil u l-iskambju u l-promozzjoni ta' prattika korporattiva tajba rigward l-RSK, kif ukoll biex jitmexxew 'il quddiem il-linji gwida li jinsabu fl-Istandard Internazzjonali ISO 26000 sabiex tiżgura definizzjoni unika globali, koerenti u trasparenti tal-RSK; iħeġġeġ lill-Kummissjoni tikkontribwixxi b'mod effettiv fil-gwida u l-koordinament tal-politiki tal-Istati Membri tal-UE, b'hekk timminimizza r-riskju ta' spejjeż addizzjonali fuq l-impriżi li joperaw f'aktar minn Stat Membru wieħed bħala riżultat ta' dispożizzjonijiet diverġenti;

82. Jemmen li l-kunċett li l-RSK huwa "oġġett ta' lussu" appoġġat biss min-negozji fi żminijiet ta' prosperità ġie rrifjutat b'mod deċiżiv mil-livelli kontinwament għoljin ta' impenn tan-negozji għall-RSK; jemmen li din kienet suppożizzjoni qadima li tinjora l-importanza tar-reputazzjoni u wkoll il-livell ta' riskju estern għall-profitabilità tan-negozji moderni; jitlob lil-leġiżlaturi Ewropej kollha biex huma stess jintegraw lill-RSK fil-livelli kollha tal-politika ekonomika inkluż it-tisħiħ tal-RSK fi ħdan l-Istateġija Ewropa 2020;

83. Jenfasizza li l-RSK għandha tapplika għall-katina kollha tal-provvista globali, inklużi l-livelli kollha ta' sottokuntrattar, li fil-provvista kemm ta' prodotti, kemm ta' ħaddiema kif ukoll ta' servizzi, għandha tinkludi dispożizzjonijiet biex testendi l-protezzjoni għall-ħaddiema migranti, il-ħaddiema tal-aġenziji u l-ħaddiema stazzjonati, u li għandha tkun imsejsa fuq pagi ġusti u kundizzjonijiet tax-xogħol deċenti u tiggarantixxi d-drittijiet u l-libertajiet fir-rigward tat-trejdunjins; huwa tal-fehma li l-kunċett tal-Ġestjoni Responsabbli tal-Katina tal-Provvista jeħtieġ li jiġi elaborat aktar bħala mekkaniżmu għat-twettiq tal-RSK;

84. Ifaħħar il-ħidma li saret minn ċerti skejjel ta' ġestjoni tal-kumpaniji għall-promozzjoni tal-RSK, iżda jirrikonoxxi li dawn huma biss f'minoranza; jistieden lill-Grupp ta' Livell Għoli u l-Istati Membri, f'kooperazzjoni mal-Kummissjoni u, kif xieraq, mal-universitajiet, biex jindirizzaw mezzi li bihom jiġu integrati l-RSK, il-ġestjoni responsabbli u ċ-ċittadinanza responsabbli fl-edukazzjoni u t-taħriġ vokazzjonali dwar il-ġestjoni għall-mexxejja futuri kollha tan-negozji sabiex din issir ċentrali għall-governanza korporattiva strateġika u sabiex titrawwem kuxjenza tal-konsum sostenibbli; jemmen li dan jista' jinkludi tfal involuti fi skemi ta' intraprenditorija għaż-żgħażagħ; jistieden lill-Kummissjoni tipprovdi appoġġ finanzjarju ulterjuri għall-proġetti ta' edukazzjoni u taħriġ dwar l-RSK taħt il-programmi tal-UE għat-Tagħlim tul il-Ħajja u Żgħażagħ Attivi;

85. Itenni li l-RSK għandha tkun applikabbli għall-impriżi kollha biex ikun hemm kundizzjonijiet ġusti u ekwi għal kulħadd; madanakollu, jirrimarka li l-mod kif l-industriji estrattivi joperaw fil-pajjiżi li qed jiżviluppaw jirrikjedi li wieħed imur lil hinn minn approċċ volontarju; jenfasizza li l-investiment fin-Niġerja min-naħa tal-industrija tal-pitrolju huwa eżempju tajjeb tal-limitazzjonijiet tal-RSK kif implimentata bħalissa, fejn kumpaniji naqsu milli jieħdu inizjattivi tal-RSK biex joħolqu prattiki ta' negozju sostenibbli jew jikkontribwixxu għall-iżvilupp tal-istati ospitanti tagħhom; isostni bil-qawwi l-proposta leġiżlattiva għal rappurtar għal kull pajjiż abbażi tal-istandards tal-Inizjattiva għat-Trasparenza tal-Industriji Estrattivi (EITI) u rappurtar tal-bejgħ u l-profitti, kif ukoll it-taxxi u d-dħul, sabiex tiġi skoraġġita l-korruzzjoni u jiġi evitat l-evitar tat-taxxa; jistieden ukoll lill-industriji estrattivi Ewropej li joperaw f'pajjiżi li qed jiżviluppaw biex jagħtu eżempju ta' responsabilità soċjali u jippromwovu x-xogħol deċenti;

86. Jitlob li jkun hemm standards ta' diliġenza dovuta għad-drittijiet tal-bniedem u għall-katina tal-provvista fil-livell tal-UE li, fost ħwejjeġ oħra, jissodisfaw ir-rekwiżiti mniżżlin fil-Gwida tal-OKŻE dwar id-Diliġenza Dovuta għal Ktajjen ta’ Provvista Responsabbli tal-Minerali minn Żoni Affettwati mill-Kunflitti u Żoni ta’Riskju Għoli u jindirizzaw, fost kwistjonijiet oħrajn, oqsma b'potenzjal sinifikattiv ta' impatt negattiv jew pożittiv fuq id-drittijiet tal-bniedem bħalma huma l-ktajjen tal-provvista globali u lokali, il-minerali tal-kunflitti, l-outsourcing, il-ħtif tal-art, u reġjuni fejn id-dritt tax-xogħol u l-ħarsien tal-ħaddiema huma insuffiċjenti jew fejn jiġu mmanifatturati l-prodotti li huma perikolużi għall-ambjent u għas-saħħa; jilqa' l-programmi diġà stabbiliti mill-UE, partikolarment il-programm tal-Infurzar tal-Liġi tal-Foresta, Governanza u Kummerċ (FLEGT) fil-qasam tal-forestrija, u jappoġġa l-inizjattivi privati bħal ma hija l-Inizjattiva tat-Trasparenza tal-Industriji Estrattivi (EITI);

87. Jistieden lill-Kummissjoni tieħu inizjattivi ulterjuri mmirati lejn l-iżblukkar u t-tisħiħ tal-potenzjal tal-RSK li tindirizza t-tibdil fil-klima (billi torbotha mal-effiċjenza fl-użu tar-riżorsi u tal-enerġija), pereżempju fil-proċess tax-xiri ta' materji primi mill-kumpaniji;

88. Jenfasizza li l-għajnuna li l-UE tagħti lill-gvernijiet ta' pajjiżi terzi biex jimplimentaw regolazzjoni soċjali u ambjentali kif ukoll reġimi ta' spezzjoni effikaċi tikkostitwixxi komplement meħtieġ sabiex l-RSK tan-negozji Ewropej tikseb progress fid-dinja kollha;

89. Jissuġġerixxi li l-gvernijiet tal-Istati Membri jistiednu lill-BEI jinkludi klawsola dwar l-RSK fl-operazzjonijiet tiegħu;

90. Jistieden lill-Kummissjoni tippromwovi l-RSK f’forums multilaterali billi tappoġġa kooperazzjoni msaħħa bejn id-WTO u forums multilaterali oħra li jittrattaw l-RSK, bħall-ILO u l-OECD;

91. Jitlob li tiġi stabbilita sistema ta’ kooperazzjoni legali transnazzjonali bejn l-UE u l-pajjiżi terzi firmatarji ta’ ftehimiet kummerċjali bilaterali sabiex jiġi żgurat aċċess effikaċi għall-ġustizzja fil-pajjiż fejn ikun twettaq il-ksur għall-vittmi ta’ ksur ta’ liġijiet soċjali jew ambjentali, jew ta' nuqqas ta' osservanza ta' impriżi fil-qasam tal-RSK min-naħa ta' multinazzjonali jew is-sussidjarji immedjati tagħhom, kif ukoll bħala appoġġ għall-istabbiliment ta' proċeduri ġudizzjarji internazzjonali sabiex ikun żgurat, fejn xieraq, għoti ta' kastig fil-każ ta' ksur tal-liġi mill-kumpaniji;

92. Jitlob li l-valutazzjonijiet tal-impatt tat-teknoloġiji l-ġodda fuq id-drittjiet tal-bniedem isiru kmieni kemm jista' jkun possibbli fil-fażi tar-riċerka u l-iżvilupp, u jitlob sabiex tali valutazzjonijiet jinkludu studji ta' xenarji u kunsiderazzjonijiet għall-identifikazzjoni ta' standards sabiex jiġu inkorporati d-drittijiet tal-bniedem fit-tfassil ("id-Drittijiet tal-Bniedem fit-Tfassil");

93. Jinnota li l-RSK hija mekkaniżmu li tippermetti lil min iħaddem jappoġġa l-ħaddiema tiegħu u l-komunitajiet lokali fil-pajjiżi li qed jiżviluppaw, li r-rispett għall-RSK u għall-istandards tax-xogħol jippermettu lil dawn il-pajjiżi jibbenefikaw minn aktar kummerċ internazzjonali, u li l-RSK tista' tiżgura li l-gwadann jinqasam b'mod ekwu sabiex tiġi żviluppata l-prosperità ekonomika u soċjali sostenibbli u sabiex aktar persuni jinqalgħu mill-faqar, speċjalment fi żmien ta' kriżi finanzjarja;

94. Jinkoraġġixxi lill-UE twettaq rwol attiv fis-sensibilizzazzjoni tal-kontribut li jistgħu jagħtu l-impriżi lis-soċjeta permezz tal-RSK fil-qasam tal-kultura, l-edukazzjoni, l-isport u ż-żgħażagħ;

95.  Iħeġġeġ lill-kumpaniji tal-midja jinkludu standards ta’ ġurnaliżmu trasparenti fil-politiki tagħhom tal-RSK, inklużi garanziji ta’ protezzjoni tal-fonti u d-drittijiet tal-whistle blowers;

96. Jistieden lill-Kummissjoni tissalvagwardja l-inizjattivi tal-RSK stabbiliti u li jiffunzjonaw sew billi tintroduċi Test tal-RSK, li għandu jivvaluta l-impatt tal-inizjattivi leġiżlattivi u amministrattivi li jmiss dwar il-miżuri tal-RSK, u tqis ir-riżultati rilevanti meta tfassal il-proposti;

97. Jilqa', għal raġunijiet ta' sostenibilità, l-obbligi imposti fuq l-operaturi tas-suq u jistieden lill-Kummissjoni timmonitorja u tevalwa l-inizjattivi tal-RSK;

98. Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill u lill-Kummissjoni, u lill-gvernijiet u lill-parlamenti tal-Istati Membri.

NOTA SPJEGATTIVA

L-aħħar komunikazzjoni mill-Kummissjoni dwar ir-responsabilità soċjali korporattiva (RSK) tinkorpora l-RSK fil-mentalità Ewropea, f'qasam politiku li fih il-Parlament Ewropew żvolġa rwol deċiżiv. Jirrappreżenta wkoll pass 'il quddiem importanti bħala reazzjoni għad-djalogu mal-Parlament u mal-partijiet interessati involuti fid-dibattitu dwar l-RSK mill-komunikazzjoni preċedenti.

Dan l-abbozz ta' riżoluzzjoni parlamentari jilqa' favorevolment l-enfasi l-ġdida mpoġġija fuq is-sostenn Ewropew għall-inizjattivi globali tal-RSK, is-sostenn imġedded għal approċċ multilaterali, definizzjoni li tirrifletti l-kunsens f'livell globali u rwol ta' sostenn ferm aktar attiv għall-Kummissjoni Ewropea stess.

Ir-rapporteur iqis li l-komunikazzjoni hija kostruttiva, lunġimiranti u reattiva għall-iżviluppi tal-RSK fl-Ewropa u fid-dinja. Din tirrappreżenta bażi soda għall-azzjonijiet futuri, u l-Parlament Ewropew huwa mistieden jagħti s-sostenn wiesa' tiegħu.

Għaldaqstant, ir-rapport tiegħi jipprova jagħti l-kontribut tiegħu lid-dibattitu billi jiżviluppa ċerti ideat fil-komunikazzjoni, kif anki billi jidentifika xi lakuni possibbli.

Irkupru sostenibbli

Qabel kollox, id-dibattitu dwar l-RSK jitqiegħed f'kuntest tal-kriżi ekonomika attwali. Jargumenta li l-RSK hija indispensabbli jekk għandha terġa' tinġieb il-fiduċja fl-impriżi kif ukoll irkupru ekonomiku sostenibbli.

Filwaqt li huwa xieraq li nitħarsu kontra l-akkuża ta' "taparsi ambjentaliżmu", l-RSK trid titqies bħala opportunità u mhux bħala theddida għall-kompetittività tal-impriżi. Tifforma wkoll parti mil-"liċenzja soċjali" tal-Ewropa li trawwem tkabbir immexxi mill-kummerċ.

Ir-riflessjonijiet għat-terminu qasir ta' Brussell, li jikkonċentraw esklużivament fuq it-trasparenza, ir-responsabilità u l-obbligu ta' rendikont tas-swieq finanzjarji biss, jafu wkoll itennu proprju l-istess żbalji li tagħhom huma akkużati dawk responsabbli mill-kollass tas-sistema bankarja.

Ħadd ma jista' jirtira mill-impenn kruċjali favur it-trasformazzjoni tal-ekonomija Ewropea u dinjija f'ekonomija b'konsum baxx ta' karbonju. L-impriżi sostenibbli jistgħu joperaw biss f'ekonomija sostenibbli.

Għaldaqstant ir-rapport tiegħi jistieden lill-kumpaniji responsabbli juru l-impenn attiv tagħhom favur it-taffija tal-konsegwenzi soċjali tal-kriżi u dan jagħmluh billi jagħtu bidu għal għadd ta' azzjonijiet suġġeriti fil-qasam tal-RSK: fl-oqsma tal-ħolqien ta' impjiegi fost iż-żgħażagħ, is-saħħa okkupazzjonali, is-sostenibilità tal-pensjonijiet, il-promozzjoni tal-paga li tiggarantixxi l-għajxien, il-ġlieda kontra l-prattiki ta' sfruttament tax-xogħol fil-katini tal-provvista tal-kumpaniji u l-promozzjoni ta' swieq ġodda għall-prodotti u s-servizzi soċjalment utli u ambjentali.

Implimentazzjoni ta' RSK f'livell globali

It-tieni prijorità tar-rapport tikkonsisti fl-iżvilupp ta' ideat konkreti li jgħinu titqiegħed fil-prattika l-intenzjoni tal-Kummissjoni intiża li timplimenta aħjar l-inizjattivi tal-RSKs f'livell globali. Ir-rapporteur jargumenta li l-"pol ta' eċċellenza" fil-qasam tal-RSK li l-Kummissjoni wiegħdet fl-2006 jintlaħaq ħafna aħjar fl-2012 bl-adozzjoni ta' approċċ globali mmirat lejn il-kumpaniji Ewropej li joperaw fis-swieq globali.

Ir-rapporteur jirrakkomanda li l-Kummissjoni Ewropea għandha tfassal rapport globali dwar l-implimentazzjoni tal-Prinċipji Gwida tan-NU dwar in-Negozju u d-Drittijiet tal-Bniedem, filwaqt li l-Istati Membri jistgħu jtejbu l-implimentazzjoni tagħhom permezz ta' proċess ta' rieżami inter pares li diġà huwa stabbilit fil-valutazzjoni tal-politiki tad-drittijiet tal-bniedem. Wasal ukoll iż-żmien li tiġi ttrattata l-kwistjoni delikata tal-ġurisdizzjoni extraterritorjali, li tikkonċerna l-abbużi tad-drittijiet tal-ħaddiema jew, iktar ġenerali, tal-bniedem min-naħa tal-impriżi Ewropej, li jseħħu fil-pajjiżi terzi li fihom l-aċċess għall-ġustizzja hija limitata.

Ir-rapport jargumenta wkoll lil-Kummissjoni trid tiżvolġi rwol ferm aktar attiv biex timplimenta l-Linji Gwida tal-OECD dwar l-Impriżi Multinazzjonali, tagħmel riferiment għalihom fil-ftehimiet kummerċjali u tal-investimenti, tagħti sostenn finanzjarju lit-tisħiħ tal-kapaċitajiet, tgħin lill-ilmenti f'każ ta' allegat ksur, tagħmel is-sostenn finanzjarju għall-impriżi subordinat għar-rispett tal-Linji Gwida u tgħin biex issib firmatarji ġodda fid-dinja kollha.

Ir-rapport isostni wkoll l-importanza tat-trasparenza u tar-rapportar integrat tas-sostenibilità bħala mutur fundamentali għall-RSK. Tingħata attenzjoni kbira lill-adozzjoni tal-Global Reporting Initiative, il-metodoloġija ewlenija użata mill-impriżi fid-dinja kollha għar-rapportar tas-sostenibilità. Ir-rapport ikompli jinkoraġġixxi l-proposta prevista tal-Kummissjoni f'dan il-qasam, iżda dan isir billi tibqa' ankrata fl-objettiv tal-Kunsill Internazzjonali dwar ir-Rapportar Integrat (International Integrated Reporting Council): ir-Rapportar Integrat isir in-norma globali sal-aħħar tad-deċennju.

Ir-rapport jappoġġa l-intenzjoni tal-Kummissjoni li timpenja ruħha mal-investituri, speċjalment għall-promozzjoni tal-Prinċipji tan-NU għall-Investiment Responsabbli u ir-rapporteur jissuġġerixxi li tiġi varata inizjattiva ġdida tal-UE dwar il-progress tal-"materjalità".

Ir-rapport jirrakkomanda wkoll is-sostenn attiv tal-UE fil-konfront tal-proposta varata mill-impriżi favur konvenzjoni tan-NU dwar ir-responsabilità korporattiva, imressqa fis-samit tan-NU Rio+20 ta' din is-sena għall-Iżvilupp Sostenibbli. Ir-rapporteur jappoġġa l-promozzjoni tal-RSK permezz tal-proċess tal-objettivi ta' żvilupp sostenibbli, imniedi bis-saħħa tar-riżultati tas-samit.

L-Approċċ Multilaterali

Il-Parlament Ewropew huwa wkoll mitlub jirrikonoxxi n-natura speċjali tat-teħid tad-deċiżjonijiet tal-UE dwar l-RSK. L-ideat jiġu żviluppati biex jużaw id-djalogu soċjali konvenzjonali, pereżempju billi jiġi stabbilit objettiv f'termini ta' ftehimiet qafas ġodda fil-qasam tal-RSK u jiġu ffinanzjati proġetti pilota mat-trade unions Ewropej fil-qasam tax-"Xogħol Deċenti".

Madankollu l-Parlament Ewropew huwa espliċitament mitlub li jappoġġa l-funzjonament u l-iżvilupp tal-Forum Multilaterali dawr l-RSK, anki permezz tal-inizjattivi settorjali proposti fil-komunikazzjoni. Ir-rapporteur jipproponi inizjattivi addizzjonali fir-rigward tal-ICT u s-settur privat tas-sigurtà. Jiġi wkoll sostnut l-ippjanar ta' "komunitajiet tal-prattika" multilaterali ġodda.

Isir appell għal iżjed impenn mal-partijiet interessati l-oħrajn mingħand il-Grupp ta' Livell Għoli tal-Istati Membri, flimkien mal-bżonn ta' attenzjoni akbar lejn l-RSK mid-Direttorati Ġenerali tal-Kummissjoni għall-Ambjent u għar-Relazzjonijiet Esterni.

Is-settur pubbliku u privat flimkien - l-"għaqda intelliġenti"

Ir-rapport jappoġġa l-enfasi akbar fuq l-impatt tal-politiki pubbliċi dwar l-RSK. Dan għandu jinkludi l-implimentazzjoni tar-rakkomandazzjonijiet tal-"Istudju ta' Edinburgh" tal-Kummissjoni dwar il-lakuni f'termini ta' governanza u l-bżonn li jintlaħqu riżultati konkreti f'dik li hi implimentazzjoni tal-indikaturi soċjali, partikolarment permezz tal-akkwist pubbliku.

Il-Kummissjoni Ewropea hija mistiedna tiżvolġi rwol ta' gwida billi tassumi l-impenn tagħha stess favur ir-rapportar tas-sostenibilità, il-ġestjoni etika tal-fondi tagħha għall-pensjonijiet u ssostni l-volontarjat tal-impjegati min-naħa tal-persunal tal-Kummissjoni.

Ir-rapport jerġa' jafferma r-rabta bejn ir-responsabilità korporattiva u l-governanza korportattiva, u jsostni l-użu ta' kodiċijiet ta' prassi tajba u tad-dmirijiet tad-diretturi biex isir progress fil-"pussess" u l-integrazzjoni tal-RSK fi ħdan il-kumpanija.

Madankollu, l-importanza kontinwa tal-azzjonijiet privati u volontarji kumplemetari hija enfasizzata bl-istess intensità, partikolarment permezz tal-appoġġ lejn il-vantaġġi tas-sostenn favur il-prinċipju tal-"konverġenza" ta' tali inizjattivi. Qed jiġi argumentat li hija ħafna aħjar il-promozzjoni tal-kooperazzjoni volontarja pjuttost milli inizjattivi obbligatorji ġodda fir-rigward tal-marki soċjali.

Għal dak li ntqal hawn fuq, fir-rigward tal-Prinċipji Gwida tan-NU, jikkostitwixxi l-"għaqda intelliġenti" tal-approċċi regolamentari u volontarji u tkun għaqlija l-UE jekk tadotta dan l-approċċ.

It-triq 'il quddiem

Fil-komunikazzjoni qed tiġi sostnuta firxa wiesgħa ta' azzjonijiet suġġeriti oħra. Ir-rapporteur jissuġġerixxi li titpoġġa enfasi ulterjuri fuq l-integrazzjoni tal-RSK fil-kurrikulum tal-iskejjel tradizzjonali ta' ġestjoni tal-kumpaniji, il-promozzjni tal-RSK fl-impriżi ż-żgħar permezz ta' approċċ ta' raggruppamenti (cluster) u l-introduzzjoni ta' sistema ta' "awditjar" bil-għan li tiggarantixxi li l-premjijiet previsit tal-RSK jingħataw tassew għall-prattika tajba fuq livell Ewropew u dinji.

Fl-aħħar nett, ir-rapporteur jixtieq itenni l-konvinzjoni tiegħu li l-RSK trid tgħaddi mill-azzjoni għar-riżultati. Il-komunikazzjoni għandha raġun biex tbigħ li l-"iżvilupp gradwali" konsiderevoli tal-adozzjoni tal-RSK hija ta' importanza enormi. L-adozzjoni ta' inizjattivi dwar iċ-ċittadinanza tal-impriżi bħala parti mis-Sena Ewropea tal-2013, ir-riċerka tal-impatt kumulattiv tal-RSK fit-trattament tal-problemi soċjali u ambjentali biex tiġi enfasizzata l-urġenza tal-isfidi u l-proposta għal "patt" ġdid mas-soċjetà ċivili huma wħud mill-ideat rakkomandati mir-rapport bil-għan li tinvolvi lin-nies fl-impriżi u barra minnhom jikkontribwixxu biex jintlaħaq dan l-objettiv.

Jekk, kif tafferma l-Kummissjoni bir-raġun, l-RSK hija responsabilità tal-impriżi għall-impatti tagħhom fuq is-soċjetà, huwa proprju l-impatt li l-impriżi u s-soċjetà għandhom ifittxu aktar flimkien.

OPINJONI tal-Kumitat għall-Affarijiet Legali (18.12.2012)

għall-Kumitat għall-Impjiegi u l-Affarijiet Soċjali

dwar ir-responsabilità soċjali korporattiva: il-promozzjoni tal-interessi tas-soċjetà u t-tmexxija ’l quddiem lejn irkupru sostenibbli u inklussiv
negħilbu x-xkiel u l-ineffiċjenzi permezz ta’ implimentazzjoni u infurzar aħjar (2012/2097(INI))

Rapporteur għal opinjoni: Raffaele Baldassarre

SUĠĠERIMENTI

Il-Kumitat għall-Affarijiet Legali jistieden lill-Kumitat għall-Impjiegi u l-Affarijiet Soċjali, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

1.  itenni l-benefiċċji reċiproċi tal-kollaborazzjoni bejn l-impriżi u s-soċjetà ċivili għall-fini tal-faċilitizzazzjoni tar-riċerka ta’ strateġiji kondiviżi u l-iskambju ta’ għarfien u stennijiet komuni; isostni għalhekk b’qawwa l-impenn assunt mill-Kummissjoni li toħloq pjattaformi multilaterali għall-RSK, ħalli tkun aċċentwata l-kollaborazzjoni bejn l-impriżi u s-soċjetà fuq il-kwestjonijiet soċjali u ambjentali l-aktar importanti; jenfasizza li r-responsabbiltà soċjali korporattiva tista’ tkun teħtieġ dispożizzjonijiet ta' qafas statutorju u li, filwaqt li miżuri volontarji jistgħu jikkumplimentaw dispożizzjonijiet eżistenti dwar il-protezzjoni tal-ħaddiema, il-monitoraġġ effiċjenti tal-konformità u l-impożizzjoni tal-penali fejn meħtieġ, qatt ma jistgħu jissostitwixxuhom.

2.  hu mħasseb dwar l-impatt li l-kriżi ekonomika seta' kellha fuq l-organizzazzjoni tax-xogħol; jitlob lill-Kummissjoni tuża wkoll, f'kooperazzjoni mill-qrib mas-sħab soċjali, il-pjattaformi multilaterali biex tippromwovi sforzi biex jinstabu soluzzjonijiet sostenibbli li jiggarantixxu r-rispett sħiħ għal jeddijiet il-ħaddiema f’dak li għandu x’jaqsam mal-organizzazzjoni tal-ħin tax-xogħol, mal-impjiegi prekarji u mal-ugwaljanza fit-trattament, l-organizzazzjoni tal-ħin tax-xogħol u l-impjiegi prekarji;

3.  Jaqbel mal-Komunikazzjoni tal-Kummissjoni dwar il-fatt li l-konformità mal-leġiżlazzjoni applikabbli u l-kuntratti kollettivi bejn is-sħab soċjali hija essenzjali biex tiġi żgurata r-responsabbiltà soċjali korporattiva; jinnota wkoll li mġiba soċjalment responsabbli għandha tinvolvi relazzjonijiet korretti mat-trade unions, b'mod partikolari fir-rigward tad-drittijiet tat-trade unions, informazzjoni kontinwa għall-ħaddiema u l-assoċjazzjonijiet li jirrappreżentawhom kif ukoll l-involviment ta’ dawn l-assoċjazzjonijiet fit-teħid ta' deċiżjonijiet korporattivi;

4.  Jinnota li waqt li qed tiġi valutata r-responsabbiltà soċjali ta' impriża għandha titqies l-imġiba tal-impriżi involuti fil-katina tal-provvista tagħha u kwalunkwe subkuntrattur eventwali;

5.  ifakkar fir-rwol strateġiku tal-SMEs, li billi huma qrib it-territorju li jaħdmu fih, jistgħu jiffaċilitaw it-tixrid tal-RSK; jitlob lill-Kummissjoni tiżviluppa, flimkien mal-awtoritajiet nazzjonali u mal-pjattaformi multilaterali, forom ta’ kooperazzjoni settorjali bejn l-SMEs li jkunu jippermettulhom jaffrontaw problemi soċjali u ambjentali b'mod kollettiv;

6.  jissottolinja l-importanza li jkunu żviluppati politiki tal-Unjoni f’dak li għandu x’jaqsam mal-RSK b’mod komplementari għall-iżvilupp tar-regoli internazzjonali, għall-fini li jiġi evitati interpretazzjonijiet diverġenti u riskji ta’ vantaġġi jew żvantaġġi kompetittivi f’livell nazzjonali jew internazzjonali;

7.  jistieden lill-impriżi jinċentivaw il-volontarjat internazzjonali tal-impjegati tagħhom, għall-fini li jiġu ffaċilitati s-sinerġiji bejn is-settur pubbliku u s-settur privat fil-kooperazzjoni għall-iżvilupp; jitlob lill-Kummissjoni tgħin fl-inizjattivi tal-impriżi f’dan is-sens permezz tal-korp volontarju Ewropew ta’ għajnuna umanitarja futur;

8.  Jistieden lill-Kummissjoni, b'mod partikolari d-DĠ Ġustizzja, tippreżenta proposti li jiffavorixxu l-ġurisdizzjoni extraterritorjali fil-qrati tal-UE f'każi ta' ksur tad-drittijiet tal-bniedem min-naħa ta' kumpaniji fl-UE jew is-sussidjarji, is-subkuntratturi jew is-sħab kummerċjali tagħhom;

9.  Jirrikonoxxi l-importanza li jiżdiedu l-prattiki u l-politiki tar-Responsabilità Soċjali Korporattivi fi ħdan il-kumpanniji l-kbar; jistieden, għalhekk, lill-Kummissjoni tevidenzja l-importanza tal-introduzzjoni tar-RSK bħala suġġett tat-tagħlim fl-edukazzjoni u t-taħriġ, l-aktar fil-business schools u l-management schools.

RIŻULTAT TAL-VOTAZZJONI FINALI FIL-KUMITAT

Data tal-adozzjoni

18.12.2012

 

 

 

Riżultat tal-votazzjoni finali

+:

–:

0:

12

0

0

Membri preżenti għall-votazzjoni finali

Raffaele Baldassarre, Sebastian Valentin Bodu, Françoise Castex, Marielle Gallo, Klaus-Heiner Lehne, Alajos Mészáros, Bernhard Rapkay, Evelyn Regner, Rebecca Taylor, Cecilia Wikström, Tadeusz Zwiefka

Sostitut(i) preżenti għall-votazzjoni finali

József Szájer

OPINJONI tal-Kumitat għall-Affarijiet Barranin (5.12.2012)

għall-Kumitat għall-Impjiegi u l-Affarijiet Soċjali

dwar ir-Responsabbiltà Soċjali Korporattiva: promozzjoni tal-interessi tas-soċjetà u triq lejn l-irkupru sostenibbli u inklużiv
(2012/2097(INI))

Rapporteur għal opinjoni: Andrzej Grzyb

SUĠĠERIMENTI

Il-Kumitat għall-Affarijiet Barranin jistieden lill-Kumitat għall-Impjiegi u l-Affarijiet Soċjali, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

1.  Jilqa’ l-fatt li d-definizzjoni l-ġdida stabbilita fil-Komunikazzjoni tal-Kummissjoni tal-25 ta’ Ottubru 2011 dwar ir-Responsabbiltà Soċjali Korporattiva tissottolinja l-esiġenza tal-ottemperanza mar-regoli legali fis-seħħ bħala prekundizzjoni għal aġir responsabbli u li tippreċiża l-qafas meħtieġ għar-responsabbiltà korporattiva permezz tal-esiġenza li “li l-proċess operattiv jintegra r-responsabbiltajiet soċjali, ambjentali, etiċi u dawk li jirrigwardaw id-drittijiet tal-bniedem u tal-konsumatur fl-operazzjonijiet ta' negozju u l-istrateġija ewlenija tal-impriżi b'kollaborazzjoni mill-qrib mal-partijiet interessati; itenni li r-responsabbiltà soċjali korporattiva jeħtieġ li testendi wkoll għall-aġir tal-impriżi fil-konfront ta' pajjiżi terzi u f’dawk il-pajjiżi;

2.  Jilqa’ l-isforzi tal-Unjoni Ewropea u tal-Istati Membri li jallinjaw il-politiki tagħhom mar-reviżjoni tal-2011 tal-linji gwida tal-OECD għall-impriżi multinazzjonali kif ukoll mal-Prinċipji Gwida tan-NU dwar in-Negozju u d-Drittijiet tal-Bniedem[1] u jissottolinja li dawn l-isforzi, speċjalment fis-settur tal-kummerċ internazzjonali li mhuwiex regolat mill-istati nazzjon għadhom s'issa ma wasslux għal impenn suffiċjenti għaż-żamma u r-rieżami ta’ standards ambjentali, soċjali, u tad-drittijiet tal-bniedem;

3.  Jenfasizza l-importanza li titqies l-katina tal-provvista fil-valutazzjoni tar-rispett tar-responsabilità soċjali min-naħa ta' kumpannija; iqis li hija ta' importanza enormi li jiġu stabbiliti indikaturi effiċjenti u trasparenti li jippermettu l-valutazzjoni b'mod preċiż tal-impatti tal-attivitajiet tal-kumpanniji mil-lat sistematiku;

4.  Jinsisti li kull wieħed mis-27 Stat Membru jrid jaċċellera r-reviżjoni tal-pjanijiet tiegħu ta’ azzjoni dwar ir-Responsabilità Soċjali tal-Kumpaniji (RSK), u l-iżvilupp tal-pjanijiet nazzjonali li jimplementaw il-Prinċipji Gwida tan-NU, li għandhom ikunu ffinalizzati sa mhux aktar tard minn tmiem Diċembru 2013; iqis li l-Istati Membri għandhom jiżguraw li dawn il-pjanijiet jitfasslu bil-parteċipazzjoni tal-istakeholders relevanti kollha, inklużi l-NGOs, is-soċjetà ċivili, it-trade unions, l-organizzazzjonijiet ta' min iħaddem u l-istituzzjonijiet nazzjonali tal-jeddijiet tal-bniedem (NHRI); jitlob lill-UE tiffaċilita t-tagħlim mill-esperjenza ta’ dawk l-Istati tal-UE li għaddejjin bħalissa mill-proċess; jinkoraġġixxi lill-Istati Membri jitnebbħu mil-linji gwida li jinsabu fl-istandard ISO 26000, mill-Prinċipji Gwida tal-OECD, mill-aħħar verżjoni tal-linji gwida tal-Global Reporting Initiative u mill-gwida mogħtija mill-Grupp Ewropew tal-Istituzzjonijiet Nazzjonali tad-Drittijiet tal-Bniedem (NHRIs);

5.  Jissottolinja li r-responsabbiltà soċjali tal-impriżi sew fi ħdan l-UE kif ukoll f’pajjiżi terzi għandha tiġi estiża għal oqsma bħall-organizzazzjoni tax-xogħol, il-kwalita tal-impjiegi, l-ugwaljanza tal-opportunitajiet, il-parteċipazzjoni soċjali, il-ġlieda kontra d-diskriminazzjoni kif ukoll it-tagħlim tul il-ħajja;

6.  Jitlob li jkun hemm koerenza akbar fil-politiki f’livell ta’ UE billi l-politiki u ftehimiet dwar l-akkwist pubbliku, il-kreditu tal-esportazzjoni, il-governanza t-tajba, il-konkorrenza, l-iżvilupp, il-kummerċ, l-investiment u oħrajn jinġiebu f’konformità mal-istandards internazzjonali tal-jeddijiet tal-bniedem, soċjali u ambjentali, imniżżlin fil-linji gwida u l-prinċipji tal-OECD u tan-NU; jitlob, f’dan is-sens, għal kooperazzjoni mal-korpi li jirrappreżentaw l-impjegati, dawk li jħaddmu u lill-konsumaturi filwaqt li jittieħed il-parir tal-NHRIs, bħalma huma s-sottomissjoni tal-Grupp Ewropew tal-NHRIs lill-Kummissjoni dwar il-jeddijiet tal-bniedem u l-akkwist; jitlob li jkun hemm valutazzjonijiet sinifikanti u adegwati tal-impatt tal-proposti leġiżlattivi għal inkoerenza potenzjali mal-Prinċipji Gwida, u jinsisti fuq il-koordinazzjoni mal-Grupp ta' Ħidma dwar in-Negozju u l-Jeddijiet tal-Bniedem, ħalli tkun evitata interpretazzjoni ma ssegwix u inkonsistenti ta’ dawk il-Prinċipji Gwida; filwaqt li jirrikonoxxi l-importanza tal-qafas tal-jeddijiet tal-bniedem tan-NU għar-RSK, ifakkar li l-Artikolu 16 tal-Karta tad-Drittijiet Fundamentali tal-Unjoni Ewropea tiggarantixxi d-dritt fundamentali ta' libertà ta' intrapriża, dritt li għandu jiġi kkunsidrat kif xieraq u jservi ta' referenza għall-appoġġ ta' politiki tar-RSK fl-UE; jenfasizza l-importanza li jinżamm bilanċ bejn il-libertà ta' intrapriża u drittijiet oħra garantiti minn din il-Karta kif ukoll prinċipji u linji gwida rikonoxxuti internazzjonalment għar-RSK; f'dan il-kuntest, il-Kummissjoni tilqa' pożittivament l-isforzi tal-Aġenzija tal-Unjoni Ewropea għad-Drittijiet Fundamentali (FRA) biex tiġbor il-provi u l-kompetenzi rigward l-eżistenza u l-interpretazzjoni tal-libertà tal-intrapriża;

7.  Jimpenja ruħu li jissokta jgħolli b’mod konsistenti l-istennija tiegħu li l-istituzzjonijiet u l-uffiċjali tal-UE, inkluż ir-Rappreżentant Speċjali tal-UE għall-Jeddijiet tal-Bniedem kif ukoll ir-Rappreżentanti Speċjali tal-UE speċifiċi għall-pajjiż u għar-reġjun, jagħmlu kull sforz biex imexxu ’l quddiem l-istandards soċjali u ambjentali, u l-jeddijiet tal-bniedem u l-aġenda tan-negozju fir-relazzjonijiet u l-azzjonijiet esterni kollha tal-UE; jstieden lill-Kummissjoni u lill-Istati Membri jwettqu valutazzjonijiet tal-impatt b'rabta mad-drittijiet fundamentali qabel il-konklużjoni u waqt l-evalwazzjoni ta' ftehimiet multilaterali u bilaterali tal-kummerċ u tal-investiment u l-attribuzzjoni ta' għajnuna mill-Istat u jiżguraw li dawn id-drittijiet jiġu rispettati;

8.  Jirrikonoxxi li l-NHRIs allinjati mal-Prinċipji ta' Pariġi huma pożizzjonati b'mod tajjeb ħalli jagħtu l-appoġġ għall-implementazzjoni tal-Prinċipji Gwida tan-NU, inkluża l-faċilitizzazzjoni tal-aċċess għal irmedji jekk mhux l-iżgurar tiegħu; jitlob lill-UE u lill-Istati Membri tagħha jirrikonoxxu l-NHRIs flimkien mal-impriżi u l-korpi rappreżentanti l-impjegati, lil min iħaddem u lill-konsumaturi bħala sieħba ewlenin fl-avvanz tal-jeddijiet tal-bniedem u l-aġenda tan-negozju, bl-iżvilupp tar-rabtiet bejn in-negozju, l-istat u s-soċjetà ċivili u l-promozzjoni ta’ standards u linji-gwidi soċjali, ambjentali u ta’ jeddijiet tal-bniedem li jkunu internazzjonalment rikonoxxuti; jitlob, f’dan il-kuntest, lill-Istati Membri jsaħħu u, fejn ikun neċessarju, iwessgħu l-mandati tal-NHRIs ħalli jagħmluhom aktar effettivi, jew, fejn ma jkunx hemm NHRI allinjat mal-Prinċipji ta’ Pariġi, ħalli jieħdu passi biex iwaqqfuhom, u ħalli l-UE tiżviluppa appoġġ stateġiku xieraq; jimpenja ruħu li jwaqqaf skambju regolari ta’ kull sena ta’ veduti mal-NHRIs fil-qafas tal-LIBE u/jew DROI, billi jibni fuq l-esperjenza tal-iskambju ta’ veduti tad-DROI dwar is-‘Samit tal-2011 tal-Ombudsmen tal-UE u tas-Sħubija Lvant’, u li jikkomplementa tali skambji b’workshops iddedikati apposti għall-jeddijiet tal-bniedem u n-negozju;

9.  Jilqa' favorevolment l-adozzjoni mill-Organizzazzjoni Internazzjonali tax-Xogħol, fl-14 ta' Ġunju 2012, tar-Rakkomandazzjoni nru 202 dwar il-bażijiet ta' protezzjoni soċjali; jintrabat li jqiegħed il-kwestjoni tal-'drittijiet tal-bniedem u n-negozju' fuq l-aġendi tal-laqgħat li jmiss tal-UE ma' pajjiżi terzi, l-aktar dawk li magħhom l-UE għandha rapport speċjali; jitlob li r-RSK tkun inkorporata fir-relazzjonijiet kontrattwali atl-UE ma' pajjiżi terzi u jitlob li, jekk ikun neċessarju, it-traduzzjonijiet tal-Prinċipji Gwida tan-NU jitwettqu bl-użu tal-kapaċità tal-PE jew ta' istituzzjonijiet oħrajn tal-UE;

10. Jitlob lill-UE, u b’mod partikolari lill-Kummissjoni, tiżgura li l-istrumenti finanzjarji, inkluż l-Istrument Ewropew għad-Demokrazija u d-Drittijiet tal-Bniedem (EIDHR), jaraw lill-NHRIs konformi mal-Prinċipji ta’ Pariġi bħala sħab kjavi fil-ksib tal-objettivi tagħhom, u tappoġġjahom fl-użu effiċjenti li jagħmlu mill-pożizzjoni unika u mill-għarfien espert tagħhom dwar il-jeddijiet tal-bniedem ħalli joħolqu spazju għad-djalogu bejn l-istakeholders varji, inklużi l-awtoritajiet statali, is-soċjetà ċivili u n-negozju, għal dan l-effett:

(1) (1) jiżgura li t-tema tar-responsabbiltà soċjali korporattiva tkun tidher fost il-prijoritajiet tal-istrumenti finanzjarji individwali skont il-perspettiva tal-Qafas Finanzjarju Pluriennali (QFP) għall-perijodu 2014-2020; u

(2) jiżviluppa appoġġ speċifiku skont l-EIDHR għat-taħriġ u l-bini globali tal-kapaċità fil-qasam tal-jeddijiet tal-bniedem u n-negozju tal-organizzazzjonijiet tas-soċjetà ċivili, l-NHRIs, id-difensuri tal-jeddijiet tal-bniedem, it-trade unions, u organizzazzjonijiet oħrajn tal-jeddijiet tal-bniedem;

11. Jinsisti, sabiex jiżgura li l-implementazzjoni tal-istrateġija l-ġdida RSK tal-UE tkun tippromwovi l-interessi tas-soċjetà, ir-rispett għall-jeddijiet tal-bniedem, u triq għal progress sostenibbli u inklussiv, li l-proposta leġiżlattiva dwar il-kxif obbligatorju tal-informazzjoni mhux finanzjarja (inkluża informazzjoni ambjentali, soċjali u ta’ governanza) tal-kumpanniji tiżgura t-trasparenza billi tagħti qafas ċar, mhux ambigwu, komuni u determinat minn qabel, b’riferiment speċifiku għall-jeddijiet tal-bniedem, li jkun kompletament allinjat mal-Prinċipji Gwida tan-NU u msejjes fuq indikaturi oġġettivi: l-ugwaljanza bejn in-nisa u l-irġiel, inklużi kwestjonijiet bħalma hija l-qabża fis-salarji bejn il-ġeneri u l-proporzjon ta’ nisa f’pożizzjonijiet għolja; il-pagi taż-żgħażagħ; il-possibilità li l-ħaddiem jissieħbu fi trade unions u jkollhom negozjati kollettivi; garanziji effettivi ta’ sigurtà fuq il-post tax-xogħol; u d-diżabbiltà;

12. Jitlob lill-UE tindirizza l-avariji fil-kapaċità interna u fl-għarfien espert billi timplementa progammi ta’ taħriġ sinifikanti dwar il-‘jeddijiet tal-bniedem u n-negozju' fl-istituzzjonijiet u l-oqsma kollha tal-politiki tal-UE;

13. Itenni t-talbiet tiegħu lill-UE u lill-Istati Membri li jtejbu l-eżekuzzjoni tal-liġijiet eżistenti li jindirizzaw ir-RSK it-tħassib tan-negozju u l-jeddijiet tal-bniedem, u li jiżviluppaw aktar soluzzjonijiet li jimmiraw lejn opportunitajiet indaqs għall-impriżi tan-negozju kemm domestiċi kemm ta' pajjiżi terzi bil-għan li jiġi miġġieled id-dumping soċjali;

14. Jitlob li jkun hemm standards ta' għall-jeddijiet tal-bniedem u għall-katina ta’ fornitura f’livell ta’ UE li, fost ħwejjeġ oħra, jissodisfaw ir-rekwiżiti mniżżlin fil-Gwida tal-OKŻE dwar id-Diliġenza Dovuta għal Ktajjen ta’ Provvista Responsabbli tal-Minerali minn Zoni Affettwati mill-Kunflitti u Zoni ta’Riskju Għoli li jkunu indirizzati, fost kwestjonijiet oħrajn, oqsma b'potenzjal sinifikattiv ta' impatt negattiv jew pożittiv fuq il-jeddijiet tal-bniedem bħalma huma l-ktajjen ta' fornituri globali u lokali, il-minerali tal-kunflitti, l-outsourcing, il-ħtif tal-art, u reġjuni fejn id-dritt tax-xogħol u ħarsien il-ħaddiema huma insuffiċjenti jew fejn jiġu mmanifatturati l-prodotti li huma perikolużi għall-ambjent u għas-saħħa; jilqa' pożittivament il-programmi diġà stabbiliti mill-UE, partikolarment il-programm FLEGT fil-qasam tas-silvikultura, u jsostni l-Inizjattiva għat-trasparenza tal-industriji estrattivi (EITI);

15. Jitlob li fejn l-UE jew l-Istati Membri jkunu sħab fin-negozju (eż., fl-akkwist pubbliku, fl-impriżi tal-istat, fil-joint ventures, fil-‘blending’, fil-garanziji tal-kreditu għall-esportazzjoni, fil-proġetti fuq skala kbira f’pajjiżi terzi), il-konsistenza mal-Linji gwida u prinċipji tal-OECD u tan-NU għandha tkun prijorità, riflessa fi klawsoli kontrattwali speċifiċi, u b'konsegwenzi għall-kumpanniji li jiksru b'mod ċar l-istandards soċjali, ambjentali u tad-drittijiet tal-bniedem; jirrakkomanda li l-‘Pjattaforma tal-UE għall-Kooperazzjoni u l-Iżvilupp Esterni’ twaqqaf modalitajiet bħal dawn bil-ħsieb li jtejbu l-kwalità u l-effiċjenza tal-mekkaniżmi ta' taħlit u tal-istrumenti finanzjarji tal-kooperazzjoni esterna tal-UE u l-kooperazzjoni u l-koordinazzjoni bejn l-UE, l-Istituzzjonijiet Finanzjarji u partijiet interessati oħra f'dan il-qasam;

16. Jisħaq fuq l-importanza tal-qafas tan-Nazzjonijiet Uniti "protezzjoni, rispett u rimedju"u jqis li dawn it-tliet pilastri: ir-responsabilità tal-Istat li jipproteġi mill-ksur tad-drittijiet tal-bniedem, ir-responsabilità tal-kumpanniji li jirrispettaw id-drittijiet tal-bniedem u l-bżonn ta' aċċess aktar effettiv għar-rimedju għandhom ikunu suġġetti għal provvedimenti adegwati li jippermettu l-implementazzjoni tagħhom;

17. Jenfasizza li, minħabba l-piż tagħhom fil-kummerċ internazzjonali, l-kumpanniji Ewropej, is-sussidjarji tagħhom u s-sottokuntratturi tagħhom jiżvolġu rwol fundamentali fil-promozzjoni u t-tixrid tal-istandards soċjali u tax-xogħol fid-dinja; jirrikonoxxi li l-ilmenti kontra l-kumpaniji tal-UE li joperaw barra huma aktar iva milli le riżolti b'mod tajjeb in situ; ifaħħar lill-Punti Nazzjonali ta’ Kuntatt tal-OECD bħala mekkaniżmu mhux legali bbażati fuq l-istat li jistgħu jimmedjaw fuq gamma wiesgħa ta’ tilwimiet tan-negozju u tal-jeddijiet tal-bniedem; jitlob, b’danakollu, li jkun hemm sforzi akbar mill-kumpanniji fl-iżvilupp tal-mekkaniżmi ta’ lmentar allinjati mal-kriterji ta’ effikaċja msemmijin fil-Prinċipji Gwida u li jfittxu aktar gwida awtorevoli pprovduta minn prinċipji u linji gwida rikonoxxuti internazzjonalment, b'mod partikolari l-Linji Gwida tal-OECD aġġornati reċentement għal Intrapriżi Multinazzjonali, l-għaxar prinċipji tal-Patt Globali tan-Nazzjonijiet Uniti, l-Istandard ta' Gwida dwar ir-Responsabilità Soċjali ISO 26000, id-Dikjarazzjoni Tripartitika tal-Prinċipji fir-rigward tal-Impriżi Nazzjonali u l-Politika Soċjali tal-ILO;

18. Jilqa’ l-intenzjoni tal-Kummissjoni Ewropea li temenda d-dispożizzjonijiet tad-dritt internazzjonali privat misjubin fir-Regolament Brussell I, u b'mod partikolari l-introduzzjoni tal-prinċipju tal-'forum necessitatis'; jisħaq dwar il-ħtieġa li jiżviluppa atkar aċċess effikaċi għar-rimedji għall-vittmi tal-vjolazzjonijiet tal-jeddijiet tal-bniedem riżultanti mill-operazzjonijiet tal-kumpanniji barra l-UE, permezz ta’ riformi tar-regolamenti Brussell I u Ruma II; jitlob li jkun hemm miżuri effikaċi għat-tneħħija tal-ostakli eżistenti għall-ġustizzja, bħalma huma l-kostijiet mhux xierqa tal-litigazzjoni, permezz ta' inizjattivi bħalma huwa l-iżvilupp ta' standards minimi ta' rimedju kollettiv, jew soluzzjonijiet għall-problema tal-'personalità ġuridika separata' tal-kumpanniji.

19. Jitlob l-iżvilupp ta' standards ta' trasparenza u responsabilità aktar effettivi għall-kumpaniji teknoloġiċi tal-UE fir-rigward ta' teknoloġiji ta' esportazzjoni li jistgħu jintużaw sabiex jiksru il-jeddijiet tal-bniedem jew jaġixxu kontra l-interess tas-sigurtà tal-UE;

20. Jilqa' favorevolment ir-rieda tal-Kummissjoni li tittratta l-kwestjoni tar-responsabilità soċjali tal-kumpanniji fil-kuntest tat-tkabbir; huwa diżappuntat, b’dana kollu, li din il-kwestjoni ma ġiet indirizzata b’mod speċifiku fin-negozjati għat-tisħib mal-pajjiżi kandidati jew imsemmija fil-komunikazzjoni tal-Kummissjoni tal-10 ta’ Ottubru 2012 bit-titlu ‘L-Istrateġija ta’ Tkabbir u l-Isfidi Ewlenin 2012-2013’ (COM(2012)0600);

21. Jilqa' pożittivament l-intenzjoni tal-Kummissjoni li tistabbilixxi kampanji mondjali, linji gwida internazzjonali u miżuri leġiżlattivi komplementari bil-għan li jiġi garantit li l-impriżi jħallu impatti pożittivi fuq il-kumpanniji barranin; ifakkar li l-impatti pożittivi tal-impriżi fuq il-kumpanniji barranin jistgħu, fost affarijiet oħrajn, jitkejlu skont l-aċċess għar-riżorsi mill-popolazzjonijiet lokali, tas-sovranità tal-ikel tal-popolazzjonijiet, tal-iżvilupp endoġenu tal-kumpanniji;

22. Jitlob l-implimentazzjoni tal-'konoxxenza tal-utent finali proprju' sabiex ikun żgurat li jiġi evitat il-ksur tal-jeddijiet tal-bniedem fl-istadji tal-bidu u dawk sussegwenti fi fluss tal-produzzjoni jew tas-suq.

RIŻULTAT TAL-VOTAZZJONI FINALI FIL-KUMITAT

Data tal-adozzjoni

3.12.2012

 

 

 

Riżultat tal-votazzjoni finali

+:

–:

0:

42

1

2

Membri preżenti għall-votazzjoni finali

Sir Robert Atkins, Arnaud Danjean, Marietta Giannakou, Andrzej Grzyb, Anna Ibrisagic, Liisa Jaakonsaari, Anneli Jäätteenmäki, Jelko Kacin, Tunne Kelam, Nicole Kiil-Nielsen, Evgeni Kirilov, Maria Eleni Koppa, Andrey Kovatchev, Paweł Robert Kowal, Eduard Kukan, Alexander Graf Lambsdorff, Krzysztof Lisek, Mario Mauro, Francisco José Millán Mon, María Muñiz De Urquiza, Annemie Neyts-Uyttebroeck, Raimon Obiols, Ria Oomen-Ruijten, Pier Antonio Panzeri, Alojz Peterle, Bernd Posselt, Cristian Dan Preda, Tokia Saïfi, José Ignacio Salafranca Sánchez-Neyra, Jacek Saryusz-Wolski, György Schöpflin, Werner Schulz, Marek Siwiec, Charles Tannock, Kristian Vigenin, Sir Graham Watson

Sostitut(i) preżenti għall-votazzjoni finali

Laima Liucija Andrikienė, Marije Cornelissen, Elisabeth Jeggle, Agnès Le Brun, Marietje Schaake, Helmut Scholz

Sostitut(i) (skont l-Artikolu 187(2)) preżenti għall-votazzjoni finali

Lara Comi, Danuta Jazłowiecka, Giovanni La Via

  • [1]  Kunsill tal-Jeddijiet tal-Bniedem tan-Nazzjonijiet Uniti, 17-il Sessjoni, 21 ta' Marzu 2011, Rapport tar-Rappreżentant Speċjali tas-Segretarju-Ġenerali dwar il-kwestjoni tal-jeddijiet tal-bniedem u l-korporazzjonijiet transnazzjonali u impriżi oħrajn tan-negozju, John Ruggie: "Prinċipji Gwida dwar il-Kummerċ u d-Drittijiet tal-Bniedem: Implementing the United Nations “Protect, Respect and Remedy” Framework”’ (A/HRC/17/31) (magħrufin minn issa ’l quddiem bħala l-“Prinċipji Gwida tan-NU”).

OPINJONI tal-Kumitat għall-Iżvilupp (6.12.2012)

għall-Kumitat għall-Impjiegi u l-Affarijiet Soċjali

dwar ir-Responsabbiltà Soċjali Korporattiva: promozzjoni tal-interessi tas-soċjetà u triq lejn l-irkupru sostenibbli u inklużiv
(2012/2097(INI))

Rapporteur għal opinjoni: Catherine Grèze

SUĠĠERIMENTI

Il-Kumitat għall-Iżvilupp jistieden lill-Kumitat għall-Impjiegi u l-Affarijiet Soċjali, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

1.  Jinnota li minħabba l-eteroġeneità tal-kunċett tar-Responsabbiltà Soċjali Korporattiva, fejn kumpanniji differenti żviluppaw standards differenti dwar il-kontabilità, l-awditjar u r-rappurtar, il-livelli tar-Responsabbiltà Soċjali Korporattiva diffiċli jitqabblu; jenfasizza li r-regolazzjoni maqbula f'livell internazzjonali fil-kuntest tar-Responsabbiltà Soċjali Korporattiva toħloq fiduċja u ekwità fir-relazzjonijiet kummerċjali u jkollha l-benefiċċji taċ-ċertezza, l-infurzabbiltà progressiva, l-universalità u l-għoti tas-setgħa lill-partijiet interessati;

2.   Jaqbel mal-Kummissjoni li r-Responsabbiltà Soċjali Korporattiva trid tkopri d-drittijiet tal-bniedem, il-prattiki fil-qasam tax-xogħol u l-impjieg, il-kwistjonijiet ambjentali (bħall-bijodiversità, it-tibdil fil-klima, l-effiċjenza fl-użu tar-riżorsi) u l-ġlieda kontra t-tixħim u l-korruzzjoni, b'mod partikolari permezz ta' governanza tajba fil-qasam tat-taxxa (jiġifieri t-trasparenza, l-iskambju tal-informazzjoni u l-kompetizzjoni ġusta fil-qasam tat-taxxa);

3.  Jirrimarka li r-Responsabbiltà Soċjali Korporattiva tkopri diversi standards soċjali iżda dawn ftit li xejn huma enfasizzati peress li ma ġewx stabbiliti indikaturi li jippermettu l-kejl tal-progress miksub fil-livell soċjali;

4.   Jenfasizza li l-impriżi li jimpenjaw ruħhom favur ir-Responsabbiltà Soċjali Korporattiva għandhom ikunu jistgħu jiġu identifikati faċilment mill-investituri u l-konsumaturi sabiex jiġu inkoraġġiti fl-isforzi tagħhom;

5.  Jinsisti sabiex l-UE teżamina l-possibbiltà li tagħti spinta lill-impriżi li jieħdu impenn favur ir-Responsabbiltà Soċjali Korporattiva, permezz ta' marka jew tikketta li tiġi assenjata lill-isem tal-impriża jew tal-prodott ikkonċernat;

6.  Jirrimarka li r-Responsabbiltà Soċjali Korporattiva hija l-aħjar għodda sabiex il-kumpanniji juru l-impenn, is-solidarjetà u r-responsabbiltà tagħhom lejn is-soċjetà u hija wkoll essenzjali biex jintlaħaq l-objettiv tal-koerenza tal-politiki għall-iżvilupp (PCD); jilqa' bi pjaċir l-impenn tal-Kummissjoni li tippromwovi r-Responsabbiltà Soċjali Korporattiva b'konsistenza sħiħa mal-linji gwida internazzjonali attwali, b'mod partikolari l-Linji Gwida għall-Impriżi Multinazzjonali tal-OECD, l-għaxar prinċipji tal-Patt Dinji tan-Nazzjonijiet Uniti, l-Istandard Gwida dwar ir-Responsabbiltà Soċjali ISO 26000, id-Dikjarazzjoni Tripartitika tal-Prinċipji fir-rigward tal-Impriżi Multinazzjonali u l-Politika Soċjali tal-ILO, u l-Prinċipji Gwida tan-Nazzjonijiet Uniti dwar in-Negozju u d-Drittijiet tal-Bniedem; jiddispjaċih, madankollu, li l-lingwaġġ tar-Responsabbiltà Soċjali Korporattiva fil-parti l-kbira tiegħu huwa volontarju;

7.  Jiddispjaċih għan-nuqqas ta' informazzjoni mogħtija lill-SMEs dwar l-eżistenza tal-Patt Dinji li bis-saħħa tiegħu l-impriżi jieħdu l-impenn li jallinjaw l-operazzjonijiet u l-istrateġiji tagħhom ma' għaxar prinċipji aċċettati b'mod universali li jkopru d-drittijiet tal-bniedem, l-istandards tax-xogħol, l-ambjent u l-ġlieda kontra l-korruzzjoni;

8.   Jenfasizza li l-Patt Dinji tan-NU u l-istandards ISO 26000 mhumiex adattati biżżejjed għall-SMEs u li dan iċekken l-impatt tar-Responsabbiltà Soċjali Korporattiva fil-livell Ewropew;

9.  Jenfasizza li huwa utli li fil-livell Ewropew u f'dak nazzjonali jiġu eżaminati l-mezzi ta' inċentiv fiskali li jistgħu jippermettu l-promozzjoni tar-Responsabbiltà Soċjali Korporattiva mal-ikbar numru possibbli ta' impriżi;

10. Jenfasizza li, bħala impenn purament volontarju, ir-Responsabbiltà Soċjali Korporattiva taf ma tkunx biżżejjed biex tittratta l-esternalitajiet li jirriżultaw mill-operazzjonijiet tal-kumpanniji multinazzjonali, inklużi l-vjolazzjonijiet tad-drittijiet tal-bniedem u d-degradazzjoni ambjentali; itenni t-talba tiegħu sabiex l-investituri u l-kumpanniji barranin li joperaw f'pajjiżi li qed jiżviluppaw jikkonformaw bis-sħiħ mal-obbligi legalment vinkolanti fil-livell internazzjonali fir-rigward tad-drittijiet tal-bniedem u l-istandards ambjentali u l-istandards tax-xogħol ewlenin tal-ILO kif ukoll il-Prinċipji Gwida tan-NU dwar in-Negozju u d-Drittijiet tal-Bniedem; jitlob li l-politiki tar-Responsabbiltà Soċjali Korporattiva jinkludu wkoll miżuri speċifiċi maħsuba biex jindirizzaw il-prattika illegali li permezz tagħha ħaddiema jitqiegħdu fuq "lista sewda" u jinċaħdu l-aċċess għall-impjieg, ħafna drabi minħabba s-sħubija jew l-attivitajiet tagħhom f'xi trade union jew ir-rwol rappreżentattiv tagħhom fil-qasam tas-saħħa u s-sigurtà;

11. Jenfasizza l-fatt li l-kumpanniji għandhom jitħeġġew jimplimentaw prassi tar-Responsabbiltà Soċjali Korporattiva, u li kumpanniji li diġà implimentaw tali prassi għandhom jitħeġġu jfittxu li jilħqu l-għanijiet tar-Responsabbiltà Soċjali Korporattiva; jitlob lill-Kummissjoni tqis inċentivi, bħall-għoti ta' prijorità f'kuntratti ta' akkwist pubbliku tal-UE, sabiex il-kumpanniji jaslu biex iħarsu lejn ir-Responsabbiltà Soċjali Korporattiva bħala opportunità u mhux bħala theddida;

12. Jenfasizza li r-Responsabbiltà Soċjali Korporattiva għandha twassal sabiex ikun hemm impenji ċari favur ir-rispett għad-drittijiet, il-protezzjoni u l-benesseri tal-ħaddiema b'indikaturi tal-prestazzjoni u punti ta' riferiment ċari għall-kejl tat-titjib, u li għandu jsir provvediment għal monitoraġġ oġġettiv, inklużiv u trasparenti u mekkaniżmi effikaċi ta' għoti ta' rendikont u ta' infurzar biex jiġu indirizzati każijiet ta' nuqqas ta' konformità, inkluża proċedura aktar miftuħa u ċara għat-tressiq u l-ikkunsidrar tal-ilmenti u għat-tnedija ta' investigazzjonijiet meta jkun meħtieġ;

13. Itenni li r-Responsabbiltà Soċjali Korporattiva għandha tkun applikabbli għall-impriżi kollha biex ikun hemm kundizzjonijiet ġusti u ugwali għal kulħadd; madanakollu, jirrimarka li l-mod kif l-industriji estrattivi joperaw fil-pajjiżi li qed jiżviluppaw jirrikjedi li wieħed imur lil hinn minn approċċ volontarju; jenfasizza li l-investiment fin-Niġerja min-naħa tal-industrija tal-pitrolju huwa eżempju tajjeb tal-limitazzjonijiet tar-Responsabbiltà Soċjali Korporattiva kif implimentata bħalissa, fejn kumpanniji naqsu milli jieħdu inizjattivi tar-Responsabbiltà Soċjali Korporattiva biex joħolqu prattiki ta' negozju sostenibbli, jew jikkontribwixxu għall-iżvilupp tal-istati ospitanti tagħhom; isostni bil-qawwi l-proposta leġiżlattiva għal rappurtar għal kull pajjiż abbażi tal-istandards tal-Inizjattiva għat-Trasparenza tal-Industriji Estrattivi (EITI), fir-rigward tar-rappurtar tal-bejgħ u l-profitti, kif ukoll it-taxxi u d-dħul, sabiex tiġi skoraġġita l-korruzzjoni u evitat l-evitar tat-taxxa; jistieden ukoll lill-industriji estrattivi Ewropej li joperaw f'pajjiżi li qed jiżviluppaw biex jagħtu eżempju ta' responsabbiltà soċjali u jippromwovu x-xogħol deċenti;

14. Jistieden lill-Kummissjoni tieħu inizjattivi ulterjuri mmirati lejn l-iżblukkar u t-tisħiħ tal-potenzjal tar-Responsabbiltà Soċjali Korporattiva li tindirizza t-tibdil fil-klima (billi torbotha mal-effiċjenza fl-użu tar-riżorsi u tal-enerġija), pereżempju fil-proċess tax-xiri ta' materji primi mill-kumpanniji;

15. Jenfasizza li r-Responsabbiltà Soċjali Korporattiva għandha tapplika għall-katina kollha tal-provvista globali, inklużi l-livelli kollha ta' sottokuntrattar, li fil-provvista kemm ta' prodotti, kemm ta' ħaddiema kif ukoll ta' servizzi, għandha tinkludi dispożizzjonijiet biex testendi l-protezzjoni għall-ħaddiema migranti, il-ħaddiema temporaniji permezz tal-aġenziji u l-ħaddiema stazzjonati, u li għandha tkun imsejsa fuq pagi ġusti u kundizzjonijiet tax-xogħol deċenti u tiggarantixxi d-drittijiet u l-libertajiet fir-rigward tat-trade unions; huwa tal-fehma li l-kunċett tal-Ġestjoni Responsabbli tal-Katina tal-Provvista jeħtieġ li jiġi elaborat aktar bħala mekkaniżmu għat-twettiq tar-Responsabbiltà Soċjali Korporattiva;

16. Huwa tal-fehma li, biex ikollha impatt ġenwin fuq it-tnaqqis tal-faqar, l-aġenda tar-Responsabbiltà Soċjali Korporattiva għandha wkoll tiffoka fuq l-SMEs billi l-impatti soċjali u ambjentali kumulattivi tagħhom huma sinifikanti;

17. Iqis li l-kumpanniji tal-UE għandhom ikunu legalment responsabbli u li mekkaniżmi differenti ta' obbligu ta' rendikont u responsabbiltà għandhom jiġu implimentati bejnhom u bejn is-sussidjarji tagħhom u bejn l-entitajiet li jikkontrollaw fil-pajjiżi li qegħdin jiżviluppaw; jilqa', barra minn hekk, il-ħidma li saret mis-soċjetà ċivili tal-UE, li ilha impenjata b'mod attiv fit-tqajjim tal-kuxjenza dwar ksur li sar minn dawn il-kumpanija barra mill-UE;

18. Jinsisti li huwa d-dmir tal-istat li jipproteġi minn ksur tad-drittijiet tal-bniedem u tax-xogħol, inkluż mill-kumpanniji, li jżomm responsabbli lill-kumpanniji, li jiddefendi l-libertà ta' assoċjazzjoni u d-drittijiet ta' negozjar kollettiv u li jipprovdi aċċess għall-ġustizzja għall-vittmi; jistieden lill-Kummissjoni tipprovdi miżuri effikaċi biex tibda tħaddem il-Qafas Ipproteġi, Irrispetta u Irrimedja tan-NU propost minn John Ruggie, ir-Rappreżentant Speċjali tan-NU dwar in-Negozju u d-Drittijiet tal-Bniedem;

19. Jenfasizza li l-implimentazzjoni aħjar tal-Prinċipji Gwida tan-NU dwar in-Negozju u d-Drittijiet tal-Bniedem se tikkontribwixxi għall-għanijiet tal-UE fir-rigward ta' kwistjonijiet speċifiċi marbutin mad-drittijiet tal-bniedem u standards ewlenin tax-xogħol; għalhekk, jistieden lill-UE tistinka favur qafas ġuridiku internazzjonali ċar dwar ir-responsabbiltajiet u l-obbligi tal-kumpanniji fir-rigward tad-drittijiet tal-bniedem;

20. Jilqa' l-fatt li n-numru ta' kumpanniji li qed jiżvelaw informazzjoni dwar il-prestazzjoni ambjentali, soċjali u ta' governanza (ESG) tagħhom kiber b'mod sinifikanti dawn l-aħħar snin; madankollu, jindika li l-kumpanniji li jirrappurtaw tali informazzjoni xorta għadhom jirrappreżentaw sehem żgħir tan-negozju globali; jinnota li, filwaqt li d-Direttiva (2003/51/KE) dwar l-Immodernizzar tal-Kontijiet tal-UE[1] tiżgura livell minimu ta' żvelar ta' indikaturi ta' prestazzjoni ewlenin kemm finanzjarji u kemm mhux finanzjarji, din ma tistabbilixxi l-ebda rekwiżit fir-rigward tat-tip ta' indikaturi li jridu jiġu inklużi fir-rapporti annwali; jistieden lill-Kummissjoni tinvestiga aktar il-miżuri possibbli li jsaħħu l-iżvelar tal-informazzjoni ESG fl-livell Ewropew;

21. Jenfasizza li l-għajnuna li l-UE tagħti lill-gvernijiet ta' pajjiżi terzi biex jimplimentaw regolamentazzjoni soċjali u ambjentali kif ukoll reġimi ta' spezzjoni effikaċi tikkostitwixxi komplement meħtieġ sabiex ir-Responsabbiltà Soċjali Korporattiva tan-negozji tal-UE tikseb progress fid-dinja kollha;

22. Jenfasizza li l-Investiment Soċjalment Responsabbli (ISR) jagħmel parti mill-proċess ta' implimentazzjoni tar-Responsabbiltà Soċjali Korporattiva fid-deċiżjonijiet marbutin mal-investiment; jinnota li bħalissa ma teżisti l-ebda definizzjoni universali tal-ISR iżda s-soltu dan jgħaqqad l-għanijiet finanzjarji tal-investituri mal-preokkupazzjonijiet tagħhom dwar kwistjonijiet soċjali, ambjentali, etiċi u ta' governanza korporattiva;

23. Iħeġġeġ lill-UE u lill-Istati Membri tagħha jieħdu inizjattivi ulterjuri ta' politika mmirati lejn is-sensibilizzazzjoni u t-tisħiħ tal-iżvilupp tal-ISR, pereżempju billi jikkunsidraw it-tfassil ta' qafas ġuridiku għall-istandards minimi ta' ISR, speċjalment fl-ambitu tal-ftehimiet kummerċjali u ta' investiment tal-UE ma' pajjiżi li qed jiżviluppaw;

24. Jinnota li r-Responsabbiltà Soċjali Korporattiva hija mekkaniżmu li permezz tiegħu min iħaddem jista' jappoġġa lill-ħaddiema u lill-komunitajiet lokali fil-pajjiżi li qed jiżviluppaw u li hija tista' tiżgura li l-qligħ jinqasam b'mod ekwu sabiex tiġi żviluppata prosperità ekonomika u soċjali sostenibbli u sabiex aktar nies jintrefgħu mill-faqar, speċjalment fi żmenijiet ta' kriżi finanzjarja; jiddispjaċih li l-protokolli għall-intervent soċjali bħalissa huma biss volontarji u jħeġġeġ lill-Kummissjoni tagħmilhom vinkolanti;

25. Jappella sabiex l-organizzazzjonijiet rappreżentattivi, inklużi t-trade unions, jiġu kkonsultati u involuti b'mod sħiħ u attiv fl-iżvilupp, it-tħaddim u l-monitoraġġ tal-proċessi u l-istrutturi ta' Responsabbiltà Soċjali Korporattiva tal-kumpanniji, inkluż permezz tal-iżvilupp kontinwu tal-ħiliet u l-kwalifiki tal-ħaddiema bis-saħħa tat-taħriġ u t-tagħlim tul il-ħajja, filwaqt li jaħdmu ma' min iħaddem f'approċċ ta' sħubija ġenwina.

RIŻULTAT TAL-VOTAZZJONI FINALI FIL-KUMITAT

Data tal-adozzjoni

6.12.2012

 

 

 

Riżultat tal-votazzjoni finali

+:

–:

0:

23

1

2

Membri preżenti għall-votazzjoni finali

Thijs Berman, Michael Cashman, Nirj Deva, Leonidas Donskis, Charles Goerens, Catherine Grèze, Eva Joly, Filip Kaczmarek, Miguel Angel Martínez Martínez, Gay Mitchell, Norbert Neuser, Bill Newton Dunn, Birgit Schnieber-Jastram, Michèle Striffler, Alf Svensson, Keith Taylor, Patrice Tirolien, Ivo Vajgl, Daniël van der Stoep, Anna Záborská, Iva Zanicchi

Sostitut(i) preżenti għall-votazzjoni finali

Enrique Guerrero Salom, Cristian Dan Preda

Sostitut(i) (skont l-Artikolu 187(2)) preżenti għall-votazzjoni finali

Ioan Enciu, Emilio Menéndez del Valle, Helmut Scholz

  • [1]  ĠU L 178, 17.7.2003, p. 16.

OPINJONI tal-Kumitat għall-Kummerċ Internazzjonali (18.12.2012)

għall-Kumitat għall-Impjiegi u l-Affarijiet Soċjali

dwar ir-Responsabbiltà Soċjali Korporattiva: promozzjoni tal-interessi tas-soċjetà u triq lejn l-irkupru sostenibbli u inklużiv
(2012/2097(INI))

Rapporteur għal opinjoni: Bernd Lange

SUĠĠERIMENTI

Il-Kumitat għall-Kummerċ Internazzjonali jistieden lill-Kumitat għall-Impjiegi u l-Affarijiet Soċjali, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

1.  Jinnota b'interess li l-Kummissjoni bdiet tinkludi referenzi għar-Responsabbiltà Soċjali Korporattiva fil-ftehimiet kummerċjali tal-UE; huwa tal-fehma li, meta jitqies ir-rwol ewlieni tal-korporazzjonijiet, is-sussidjarji tagħhom u l-ktajjen ta' provvista tagħhom fil-kummerċ internazzjonali, ir-responsabbiltà soċjali u ambjentali korporattiva għandha ssir parti integrali tal-kapitolu dwar l-iżvilupp sostenibbli tal-ftehimiet kummerċjali tal-UE; jistieden lill-Kummissjoni tiżviluppa proposti konkreti għall-implimentazzjoni ta' dawn il-prinċipji tar-Responsabbiltà Soċjali Korporattiva fil-politika kummerċjali;

2.  Jimpenja ruħu li jżid l-isforzi tiegħu b’mod kontinwu sabiex l-istituzzjonijiet u l-uffiċjali tal-UE, inkluż ir-Rappreżentant Speċjali tal-UE għad-Drittijiet tal-Bniedem, ikollhom l-obbligu jinfurzaw l-istandards soċjali, ambjentali u tad-drittijiet tal-bniedem fir-relazzjonijiet u l-azzjonijiet esterni kollha tal-UE;

3.  Jenfasizza li l-promozzjoni tar-Responsabbiltà Soċjali Korporattiva huwa objettiv appoġġat mill-Unjoni Ewropea, u li għalhekk l-Unjoni għandha tiżgura li l-politiki esterni li timplimenta jikkontribwixxu lejn l-iżvilupp sostenibbli u l-iżvilupp soċjali tal-pajjiżi kkonċernati;

4.  Iħeġġeġ lill-Kummissjoni, fit-tfassil ta' proposti konkreti għall-applikazzjoni ta' prinċipji tar-Responsabbiltà Soċjali Korporattiva, tibbaża fuq il-Linji Gwida tal-OECD għall-Intrapriżi Multinazzjonali, inkluża l-proċedura ta' lmenti tal-OECD;

5.  Ifaħħar lill-istati membri kollha tal-OECD għall-ħidma komprensiva tagħhom fuq il-Linji Gwida tal-OECD għall-Intrapriżi Multinazzjonali, ippubblikati fil-25 ta' Mejju 2011; jinnota li 44 gvern aderenti, li jirrappreżentaw ir-reġjuni kollha tad-dinja u li jikkostitwixxu 85 % tal-investiment barrani dirett, iħeġġu lill-intrapriżi tagħhom jirrispettaw dawn ir-rakkomandazzjonijiet estensivi għal imġiba kummerċjali responsabbli kull fejn dawn joperaw;

6.  Jaqbel li l-imperattivi ambjentali u klimatiċi attwali u l-iżvilupp ta' ktajjen tal-produzzjoni globali jesiġu kopertura usa' tal-kunċett tar-Responsabbiltà Soċjali Korporattiva milli kien previst meta l-kunċett ġie definit għall-ewwel darba; għalhekk iqis li hu neċessarju li jiġi elaborat kunċett aġġornat tar-Responsabbiltà Soċjali Korporattiva, li jikkonċerna d-drittijiet tax-xogħol u tal-bniedem u l-kwistjonijiet tal-impjiegi, kif ukoll il-protezzjoni ambjentali, il-preokkupazzjonijiet relatati mat-tibdil fil-klima u l-evitar tal-korruzzjoni u l-evażjoni tat-taxxa;

7.  Jappella sabiex il-kumpaniji Ewropej kollha li joperaw f'pajjiżi terzi u li jimpjegaw aktar minn 1 000 persuna jkunu obbligati japplikaw il-Linji Gwida tal-OECD għall-Intrapriżi Multinazzjonali mill-1 ta' Jannar 2014;

8.  Jitlob lill-Kummissjoni tinkludi klawsola vinkolanti dwar ir-Responsabbiltà Soċjali Korporattiva fil-ftehimiet bilaterali kummerċjali u ta’ investiment kollha ffirmati mill-UE, abbażi tal-prinċipji tar-Responsabbiltà Soċjali Korporattiva kif definiti fil-livell internazzjonali, b'enfasi fuq l-iżvilupp sostenibbli u l-governanza tajba u b'attenzjoni ċara fuq id-drittijiet tal-bniedem, ix-xogħol deċenti, l-istandards tax-xogħol, il-libertà ta' assoċjazzjoni, in-negozjar kollettiv u kunsiderazzjonijiet soċjali oħrajn, b'mod partikolari l-aġġornament tal-2010 tal-Linji Gwida tal-OECD; jissuġġerixxi li din il-klawsola għandha tarmonizza l-istandards u l-kunċetti eżistenti sabiex jiġu żgurati l-paragunabilità u s-sens ta' ġustizzja, u tkun tinkludi miżuri għall-monitoraġġ ta' dawn il-prinċipji fil-livell tal-UE u għall-implimentazzjoni tagħha, u li jitwaqqfu Punti ta' Kuntatt Nazzjonali bħala forums għall-mistoqsijiet dwar il-kwistjonijiet li jitqajmu fil-Linji Gwida tal-OECD, bħar-rekwiżit li jiġu mmonitorjati l-attivitajiet tal-kumpaniji u s-sussidjarji tagħhom u l-ktajjen ta' provvista, u r-rekwiżit li tiġi applikata diliġenza dovuta;

9.  Jistieden lill-Kummissjoni tiżgura li l-kumpaniji kollha li joperaw fis-suq uniku, inklużi dawk il-korporazzjonijiet transnazzjonali li s-sussidjarji jew il-ktajjen ta' provvista tagħhom jinsabu fl-UE, jikkonformaw mal-obbligi legali kollha tagħhom kemm fil-livell nazzjonali kif ukoll f'dak tal-UE sabiex tiġi żgurata kompetizzjoni ġusta u jiġu massimizzati l-benefiċċji għall-konsumaturi tal-UE; jistieden lill-Kummissjoni tippromwovi b'mod attiv imġiba kummerċjali responsabbli fost kumpaniji tal-UE li joperaw barra minn pajjiżhom, b'enfasi speċjali fuq l-iżgurar ta' konformità stretta mal-obbligi legali kollha tagħhom li joriġinaw jew mil-liġijiet nazzjonali jew minn kwalunkwe obbligu legali bilaterali jew internazzjonali li l-operazzjonijiet kummerċjali tagħhom huma suġġetti għalihom, mhux l-inqas il-konformità mal-istandards u r-regoli internazzjonali fl-oqsma tad-drittijiet tal-bniedem, ix-xogħol u l-ambjent; jissuġġerixxi għal dan il-għan li l-Kummissjoni għandha tinvolvi ruħha b'mod attiv mas-sħab tagħha fil-pajjiżi li qed jiżviluppaw u f'dawk emerġenti għall-iskambju tal-aqwa prattiki u ta' għarfien dwar modi u mezzi kif jittejjeb l-ambjent kummerċjali u titqajjem kuxjenza dwar imġiba kummerċjali responsabbli;

10. Jissuġġerixxi li l-gvernijiet tal-Istati Membri jistiednu lill-BEI jinkludi klawsola dwar ir-Responsabbiltà Soċjali Korporattiva fl-operazzjonijiet tiegħu;

11. Jistieden lill-Kummissjoni tintroduċi proċedura aktar miftuħa u ċara għat-tressiq u l-eżami ta' lmenti relatati ma' nuqqas ta' konformità mal-prinċipji tar-Responsabbiltà Soċjali Korporattiva, inklużi mekkaniżmi ta' infurzar, u tniedi investigazzjonijiet fejn ikun meħtieġ;

12. Jistieden lill-Kummissjoni tħeġġeġ lill-kumpaniji japplikaw ir-Responsabbiltà Soċjali Korporattiva; jenfasizza l-ħtieġa li t-tixrid ta’ dawn il-prattiki jiġi mħeġġeġ u appoġġat fost l-SMEs filwaqt li jiġu limitati l-ispejjeż u l-burokrazija;

13. Jistieden lill-Kummissjoni tinkludi klawsola dwar ir-Responsabbiltà Soċjali Korporattiva fi ftehimiet ma' organizzazzjonijiet nongovernattivi (NGOs), partikolarment f'każijiet fejn dawn ikunu relatati ma' attivitajiet ta' żvilupp;

14. Jistieden lill-Kummissjoni tuża l-miżuri bbażati fuq inċentivi b'mod aktar effikaċi u biex tkun aktar attenta fil-monitoraġġ u fl-iżgurar li l-korporazzjonijiet transnazzjonali li s-sussidjarji jew il-ktajjen ta’ provvista tagħhom jinsabu f’pajjiżi li qed jipparteċipaw fil-GSP u l-GSP+, għandhomx jew le l-uffiċċju rreġistrat tagħhom fl-Unjoni Ewropea, kif ukoll il-pajjiżi kkonċernati a) jikkonformaw mal-obbligi legali nazzjonali u internazzjonali tagħhom fl-oqsma tad-drittijiet tal-bniedem, l-istandards soċjali u tax-xogħol u r-regoli ambjentali, b) juru impenn ġenwin fir-rigward tad-drittijiet, il-protezzjoni u l-benessri tal-ħaddiema tagħhom u taċ-ċittadini b'mod ġenerali, c) jiddefendu l-libertà ta' assoċjazzjoni u d-drittijiet ta' negozjar kollettiv, u d) jittrattaw kwalunkwe ksur b'mod rapidu u effikaċi;

15. Jistieden lill-Kummissjoni tippromwovi r-Responsabbiltà Soċjali Korporattiva f’forums multilaterali billi tappoġġa kooperazzjoni msaħħa bejn id-WTO u forums multilaterali oħra li jittrattaw ir-Responsabbiltà Soċjali Korporattiva, bħall-ILO u l-OECD;

16. Ifakkar li għas-soluzzjoni ta' tilwim kummerċjali u/jew it-talba ta' kumpens għal esternalitajiet negattivi ta' attività kummerċjali irresponsabbli jew illegali, diġà jeżistu kemm ir-rikorsi fil-qrati kif ukoll alternattivi għar-rikorsi fil-qrati; jistieden f'dan ir-rigward lill-Kummissjoni tieħu aktar inizjattivi sabiex iżżid l-għarfien dwar iż-żewġ alternattivi kemm fost il-komunità kummerċjali kif ukoll il-pubbliku b'mod ġenerali; ifakkar li l-Kamra Internazzjonali tal-Kummerċ (KIK) tipprovdi servizzi ta' soluzzjoni tat-tilwim għal individwi, negozji, stati, entitajiet statali u organizzazzjonijiet internazzjonali li jfittxu alternattivi għal rikorsi fil-qorti, liema alternattivi jistgħu jikkontribwixxu biex itejbu l-aċċess effikaċi għall-ġustizzja għall-vittmi f'każ ta' ksur ta' prattiki kummerċjali responsabbli li jikkawżaw danni ekonomiċi, soċjali u ambjentali fl-UE u/jew barra minnha;

17. Jitlob li jkun hemm monitoraġġ ta' miżuri restrittivi (sanzjonijiet, bojkotts, embargos), kif ukoll skemi ta' liċenzji għal oġġetti b'użu doppju, fil-livell tal-UE;

18. Jitlob li jiġu stabbiliti mekkaniżmi li permezz tagħhom il-prinċipji tar-Responsabbiltà Soċjali Korporattiva ikollhom jiġu rispettati mhux biss mill-kumpanija ewlenija jew mill-appaltatur prinċipali li jibbenefika minn ftehim kummerċjali, iżda wkoll minn kwalunkwe subappaltatur jew katina ta' provvista li jistgħu jutilizzaw, sew jekk fil-provvista ta' oġġetti, ħaddiema jew servizzi, biex b'hekk jiġu żgurati kundizzjonijiet ugwali ta' kompetizzjoni bbażati fuq salarji ġusti u kundizzjonijiet ta' xogħol deċenti, u jiġu garantiti d-drittijiet u l-libertajiet trejdjunjonistiċi;

19. Jistieden lill-Kummissjoni ttejjeb il-mudell tagħha ta’ valutazzjoni tal-impatt fir-rigward tas-sostenibilità, sabiex dan jirrifletti sew l-implikazzjonijiet ekonomiċi, soċjali, ambjentali u tad-drittijiet tal-bniedem, inklużi l-għanijiet ta' mitigazzjoni tat-tibdil fil-klima, tan-negozjati kummerċjali; jistieden lill-Kummissjoni tagħti segwitu għall-ftehimiet kummerċjali mal-pajjiżi sħab tal-UE billi twettaq, qabel u wara l-iffirmar ta' ftehim kummerċjali, studji ta’ valutazzjoni tal-impatt fir-rigward tas-sostenibilità, filwaqt li tqis b'mod partikolari s-setturi vulnerabbli;

20. Jenfasizza li wara d-dħul fis-seħħ tat-Trattat ta’ Lisbona, il-Parlament għandu jinżamm infurmat bis-sħiħ dwar kif ir-riżultati tal-Valutazzjonijiet tal-Impatt fir-rigward tas-Sostenibilità (SIA) tal-ftehimiet jiġu inkorporati fin-negozjati ta' qabel il-konklużjoni tagħhom u dwar liema kapitoli ta’ dawn il-ftehimiet ikunu nbidlu bil-għan li jiġu evitati impatti negattivi identifikati f'dawn il-valutazzjonijiet;

21. Jitlob li tiġi stabbilita sistema ta’ kooperazzjoni legali transnazzjonali bejn l-UE u l-pajjiżi terzi firmatarji ta’ ftehimiet kummerċjali bilaterali sabiex jiġi żgurat aċċess effikaċi għall-ġustizzja fil-pajjiż fejn ikun twettaq il-ksur għall-vittmi ta’ ksur ta’ liġijiet soċjali jew ambjentali, jew ta' nuqqas ta' osservanza ta' impenji fil-qasam tar-Responsabbiltà Soċjali Korporattiva min-naħa ta' multinazzjonali jew is-sussidjarji immedjati tagħhom, kif ukoll bħala appoġġ għall-istabbiliment ta' proċeduri ġudizzjarji internazzjonali sabiex ikun żgurat, fejn xieraq, għoti ta' kastig fil-każ ta' ksur tal-liġi min-naħa ta' kumpaniji;

22. Jitlob l-iżvilupp ta' standards ta' trasparenza u responsabilità aktar effikaċi għall-kumpaniji teknoloġiċi tal-UE involuti fl-esportazzjoni ta' teknoloġiji li jistgħu jintużaw sabiex jiksru id-drittijiet tal-bniedem jew jaġixxu kontra l-interess tas-sigurtà tal-UE;

23. Jistieden lis-SEAE jiżgura li l-uffiċjali tal-UE fil-qasam tal-kummerċ, jekk ikunu bbażati f'ambaxxati tal-UE, jingħataw taħriġ regolari dwar kwistjonijiet b'rabta mar-Responsabbiltà Soċjali Korporattiva, b'mod partikolari fir-rigward tal-implimentazzjoni tal-Qafas tan-NU ‘Protezzjoni, Rispett u Rimedju’ u li l-ambaxxati tal-UE jaġixxu bħala punti ta' kuntatt tal-UE għal ilmenti li jikkonċernaw kumpaniji tal-UE u s-sussidjarji tagħhom, billi l-Punti ta' Kuntatt Nazzjonali tal-OECD jinsabu biss f'pajjiżi aderenti mal-OECD u għaldaqstant fil-prattika, mhumiex aċċessibbli għal impjegati ta' kumpaniji bħal dawn ibbażati f'pajjiżi li mhumiex OECD;

24. Jappella li l-valutazzjonijiet tal-impatt tat-teknoloġiji l-ġodda fuq id-drittjiet tal-bniedem isiru kemm jista' jkun kmieni possibbli fil-fażi tar-riċerka u l-iżvilupp, u jitlob sabiex tali valutazzjonijiet ikunu jinkludu studji ta' xenarji u kunsiderazzjonijiet għall-identifikazzjoni ta' standards sabiex jiġu inkorporati d-drittijiet tal-bniedem fit-tfassil (id-Drittijiet tal-Bniedem fit-Tfassil);

25. Jenfasizza li s-sensibilizzazzjoni fil-livell korporattiv dwar l-importanza tar-Responsabbiltà Soċjali Korporattiva u l-konsegwenzi tan-nuqqas ta' konformità, bħala kompitu għall-Kummissjoni, għandhom ikunu akkumpanjati minn sensibilizzazzjoni u tisħiħ xieraq tal-kapaċitajiet fil-livell tal-gvernijiet tal-pajjiżi ospitanti, biex tiġi żgurata l-implimentazzjoni effikaċi tad-drittijiet tar-Responsabbiltà Soċjali Korporattiva u l-aċċess għall-ġustizzja;

26. Jitlob li jiġi implimentat il-prinċipju "kun af l-utent aħħari tiegħek" biex jiġi żgurat aktar skrutinju u biex jiġi evitat ksur tad-drittijiet tal-bniedem li jseħħ fi stadji tal-bidu jew dawk sussegwenti fil-ktajjen ta' provvista u fil-flussi tal-produzzjoni jew tas-swieq;

27. Jenfasizza li trattati bilaterali futuri dwar l-investiment iffirmati mill-UE għandhom jiżguraw li jinstab bilanċ ġust bejn il-ħtieġa li jitħarsu l-investituri u l-ħtieġa li jkun previst intervent mill-istat, b’mod partikolari b'rabta mal-istandards soċjali, tas-saħħa u dawk ambjentali;

28. Jieħu nota tal-passi pożittivi li saru fir-riforma attwali tad-Direttiva dwar it-Trasparenza (2004/109/KE) u d-Direttiva dwar il-Kontabilità (2003/51/KE) sabiex tiġi indirizzata l-kwistjoni tar-Responsabbiltà Soċjali Korporattiva filwaqt li jinstab bilanċ bejn it-tiftix leġittimu għat-trasparenza u r-responsabbiltà u l-impenn ta' rappurtar min-naħa tal-kumpaniji; jistieden lill-Kummissjoni tiżgura li l-kumpaniji li jaqgħu fl-ambitu ta' dawn id-Direttivi jkunu obbligati jirrappurtaw regolarment dwar l-attivitajiet ta' Responsabbiltà Soċjali Korporattiva tagħhom, f'konformità mal-Linji Gwida tal-OECD għall-Kumpaniji Multinazzjonali, filwaqt li jiġu żgurati arranġamenti speċjali għall-SMEs sabiex ir-rappurtar ikun possibbli kemm mil-lat finanzjarju kif ukoll dak amministrattiv;

29. Jenfasizza li d-dimensjoni tar-Responsabbiltà Soċjali Korporattiva għandha tiġi inkorporata fil-ftehimiet kummerċjali multilaterali u għalhekk jistieden lill-Kummissjoni tappoġġa proposti f'dak ir-rigward kemm fil-fora internazzjonali, b'mod partikolari fl-OECD u fl-ILO, kif ukoll fid-WTO fil-kuntest ta' wara Doha;

30. Jappella sabiex miżuri futuri b'rabta mar-Responsabbiltà Soċjali Korporattiva jinkludu l-katina tal-valur kollha, mill-estrazzjoni tal-materja prima, għall-kummerċ u r-riċiklaġġ;

31. Jitlob li l-politiki tar-Responsabbiltà Soċjali Korporattiva jiġu inklużi fil-livelli kollha tal-ftehimiet kummerċjali mal-UE, u jkunu jinkludu dispożizzjonijiet biex tiġi estiża l-protezzjoni għall-ħaddiema migranti, tal-aġenziji u dawk ippostjati;

32. Huwa tal-fehma li l-Kummissjoni u l-Istati Membri għandhom iħeġġu lill-kumpaniji tal-UE jieħdu inizjattivi immirati li jippromwovu r-Responsabbiltà Soċjali Korporattiva u jiskambjaw prattiki tajba mas-sħab tagħhom f'pajjiż oħra;

33. Jitlob li l-politiki fil-qasam tar-Responsabbiltà Soċjali Korporattiva u d-drittijiet tax-xogħol u trejdjunjonistiċi fundamentali, bħad-dritt għall-privatezza u l-libertà ta' assoċjazzjoni, jiġu rispettati mill-kumpaniji tal-UE fl-operazzjonijiet kollha tagħhom, sew jekk ikunu bbażati fl-UE u sew jekk f'pajjiżi terzi;

34. Jitlob li jkun hemm konsultazzjoni sħiħa u attiva u involviment tal-organizzazzjonijiet rappreżentattivi, inklużi t-trejdjunjins, fl-iżvilupp, l-operazzjoni u l-monitoraġġ tal-proċessi u l-istrutturi tal-Responsabbiltà Soċjali Korporattiva tal-kumpaniji; jistieden lill-organizzazzjonijiet rappreżentattivi ta' din ix-xorta sabiex jaħdmu ma' min iħaddem b'approċċ ġenwin ta' sħubija;

35. Jitlob li jiżdied il-monitoraġġ tal-prinċipji tar-Responsabbiltà Soċjali Korporattiva fil-politika kummerċjali tal-UE u li jkun aktar inklużiv u trasparenti, b'punti ta' riferiment ċari biex jitkejjel it-titjib bl-għan li titħeġġeġ il-fiduċja fis-sistema;

36. Jinnota li r-Responsabbiltà Soċjali Korporattiva hija mekkaniżmu li tippermetti lil min iħaddem jappoġġa l-ħaddiema tiegħu u l-komunitajiet lokali fil-pajjiżi li qed jiżviluppaw, li r-rispett għar-Responsabbiltà Soċjali Korporattiva u għall-istandards tax-xogħol jippermettu lil dawn il-pajjiżi jibbenefikaw minn aktar kummerċ internazzjonali, u li r-Responsabbiltà Soċjali Korporattiva tista' tiżgura li l-gwadann jinqasam b'mod ekwu għall-iżvilupp ta' prosperità ekonomika u soċjali sostenibbli u sabiex aktar persuni jinqalgħu mill-faqar, speċjalment fi żmien ta' kriżi finanzjarja; jiddispjaċih li l-protokolli għal intervent soċjali attwalment huma biss volontarji u jħeġġeġ lill-Kummissjoni tagħmilhom vinkolanti;

RIŻULTAT TAL-VOTAZZJONI FINALI FIL-KUMITAT

Data tal-adozzjoni

18.12.2012

 

 

 

Riżultat tal-votazzjoni finali

+:

–:

0:

24

2

1

Membri preżenti għall-votazzjoni finali

William (The Earl of) Dartmouth, Maria Badia i Cutchet, Nora Berra, Daniel Caspary, María Auxiliadora Correa Zamora, George Sabin Cutaş, Christofer Fjellner, Yannick Jadot, Franziska Keller, Vital Moreira, Paul Murphy, Cristiana Muscardini, Niccolò Rinaldi, Helmut Scholz, Peter Šťastný, Robert Sturdy, Gianluca Susta, Henri Weber, Iuliu Winkler, Paweł Zalewski

Sostitut(i) preżenti għall-votazzjoni finali

Salvatore Iacolino, Silvana Koch-Mehrin, Maria Eleni Koppa, Katarína Neveďalová, Marietje Schaake

Sostitut(i) (skont l-Artikolu 187(2)) preżenti għall-votazzjoni finali

Norbert Neuser, Birgit Schnieber-Jastram, Derek Vaughan

OPINJONI tal-Kumitat għall-Kultura u l-Edukazzjoni (19.12.2012)

għall-Kumitat għall-Impjiegi u l-Affarijiet Soċjali

dwar ir-Responsabbiltà Soċjali Korporattiva: imġiba kummerċjali responsabbli u trasparenti u tkabbir sostenibbli
(2012/2097(INI))

Rapporteur għal opinjoni: Morten Løkkegaard

SUĠĠERIMENTI

Il-Kumitat għall-Kultura u l-Edukazzjoni jistieden lill-Kumitat għall-Impjiegi u l-Affarijiet Soċjali, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

1.  Jinkoraġġixxi lill-UE twettaq rwol attiv fis-sensibilizzazzjoni tal-kontribut li jistgħu jagħtu l-impriżi lis-soċjeta permezz tar-Responsabilità Soċjali tal-Kumpaniji (RSK) fil-qasam tal-kultura, l-edukazzjoni, l-isport u ż-żgħażagħ;

2.  Jinkoraġġixxi lill-UE kif ukoll lill-Istati Membri jagħtu tagħrif konkret dwar l-RSK, u tagħlim u taħriġ dwarha, ħalli l-impriżi jieħdu vantaġġ sħiħ mill-RSK u jkunu jistgħu jimplementawha fil-kultura organizzattiva tagħhom;

3.  Jitlob lill-Istati Membri jintroduċu eżenzjonijiet fiskali għall-azjendi li jiffinanzjaw ix-xogħol volontarju u l-inizjattivi mhux għal skop ta’ lukru;

4.  Jiġbed l-attenzjoni għall-ħtieġa li r-RSK tkun inkorporata fil-kurrikula tal-istituzzjonijiet edukattivi fil-livelli kollha, inklużi l-business schools, u fil-programmi ta' taħriġ għall-instituri u l-impjegati tal-impriżi żgħar u ta' daqs medju;

5.  Jinkoraġġixxi lill-Istati Membri jintegraw l-RSK fil-kurrikuli relevanti tal-edukazzjoni;

6.  Jisħaq dwar l-importanza tar-rabta bejn l-impriżi fl-iskejjel billi jagħtu edukazzjoni sekondarja għolja u, b’mod aktar speċjali, fil-livelli ogħla ta’ edukazzjoni jindika r-rwol li jista’ jkollha l-RSK fl-għoti ta’ esperjenza prattika lill-istudenti matul l-istudji tagħhom, kemm fuq bażi part-time bi ħlas kemm waqt stages bi ħlas fl-impriżi;

7.  Iħeġġeġ lill-impriżi jagħtu stages ta’ kwalità b’komponent qawwi ta’ tagħlim li jiffaċilita t-tranżizzjoni bejn l-edukazzjoni u l-impjieg, jiffaċilita l-iżvilupp tal-ħiliet relevanti għas-suq tax-xogħol u jappoġġja l-awtonomija taż-żgħażagħ;

8.  Jinkoraġġixxi lill-impriżi jippromwovu l-kreattività u l-proġetti kulturali fil-politiki tagħhom ta’ RSK fil-kuntest tal-impenn ċiviku u li jistimulaw it-tkabbir u l-ħolqien sostenibbli tal-impjiegi;

9.  Jindika l-importanza li jkunu involuti l-impriżi żgħar u ta' daqs medju fir-RSK u jirrikonoxxi l-kisbiet tagħhom f'dan il-qasam;

10. Jinkoraġġixxi lill-impriżi, b’kollaborazzjoni mal-instituri u l-ħaddiema, jinfurmaw lill-impjegati tagħhom, u jħarrġuhom u jdaħħluhom, fl-isfidi soċjali maġġuri li jolqtu lill-Ewropa, l-aktar f'dak li għandu x'jaqsam mal-ekonomija, is-soċjetà, l-ambjent u internazzjonalment;

11. Jistieden li fost min iħaddem tkun promossa l-idea tal-isponsorizzazzjoni;

12. Jindika l-kontribut importanti tal-RSK fil-ħolqien tal-opportunitajiet għat-tagħlim u t-tkabbir, u fit-tiswir u l-promozzjoni ta’ attitudni soċjali, impenn ċiviku, etika professjonali u integrazzjoni soċjali bħala interazzjoni ta’ livell għoli mas-soċjetà, kif ukoll l-attivitajiet interġenerazzjonali bħalma huma l-mentoring reċiproku u t-trasferiment tan-know-how mix-xjuħ għaż-żgħażagħ; jisħaq b’mod partikolari l-kontribut li tista’ tagħti r-RSK fil-ħolqien ta’ opportunitajiet għaż-żgħażagħ u fl-iżvilupp tat-talenti tagħhom;

13. Jisħaq dwar l-importanza li jiġu rispettati l-jeddijiet tal-bniedem fir-relazzjonijiet mal-pajjiżi mhux membri fl-UE;

14. Jilqa’ l-iskema Ewropea ta’ aġġudikazzjoni tal-isħubijiet RSK bejn l-impriżi u stakeholders oħrajn, inklużi l-istituzzjonijiet edukattivi u l-organizzazzjonijiet sportivi bħala pass importanti fit-tkattir tal-viżibilità tal-RSK;

15. Jisħaq li l-Investiment Soċjalment Responsabbli (SRI), bħala parti mill-proċess ta’ implementazzjoni tar-RSK fid-deċiżjonijiet tal-investiment, jikkombina l-objettivi finanzjarji u ekonomiċi tal-investituri mal-kunsiderazzjonijiet soċjali, ambjentali, etiċi, kulturali u edukattivi tagħhom;

16. Iħeġġeġ lill-Istati Membri u lill-Unjoni jqisu huma u jħejju l-aġenda tagħhom tar-RSK li l-SMEs kulturali u kreattivi jista’ jkollhom impatti sinifikattiv fuq il-bidla soċjali u ambjentali bl-integrazzjoni ta’ kunsiderazzjonijiet soċjali u t-twassil ta' soluzzjonijiet fit-tul fit-taqbida kontra l-faqar billi jagħtu impulsi ġodda lis-suq tax-xogħol;

17. Jistieden li ssir riċerka dwar ir-raġunijiet għall-effikaċja jew nuqqas tagħha tal-varji strateġiji tar-RSK li ġew implementati;

18. Jistieden lill-Istati Membri jagħtu sostenn u jtejbu l-istatus lill-volontarjat tal-impjegati u lill-volontarjat appoġġjat minn min iħaddem ukoll fil-kuntest tal-RSK, kif jingħad fir-riżoluzzjoni tat-12 ta’ Ġunju 2012 dwar ir-rikonoxximent u l-promozzjoni fl-UE tal-ħidmiet volontarji transkonfinali[1]; jisħaq li l-volontarjat ma għandu b’ebda mod jolqot il-paga jew ix-xogħol tal-ħaddiema u li l-attivitajite ta’ volontarjat u x-xogħol bi ħlas għandhom jikkomplementaw wieħed lill-ieħor;

19. Jemmen li l-kumpaniji b'kontenut kulturali u ta' media għandhom responsabilità soċjali tal-kumpaniji li jiżgura li l-jeddijiet tal-bniedem tal-ut’nti jkunu protetti, u jqis li l-awtoregolazzjoni u l-ispezzjonijiet deep packet għandhom ir-riskju li jagħmlu outsourcing tal-pulizija u tal-eżekuzzjoni tal-liġi favur is-settur privat;

20. Iħeġġeġ lill-kumpaniji tal-media jinkludu standards ta’ ġurnaliżmu trasparenti fil-politiki tagħhom ta’ RSK, inklużi garanziji ta’ protezzjoni tal-fonti u l-jeddijiet tal-whistle blowers.

RIŻULTAT TAL-VOTAZZJONI FINALI FIL-KUMITAT

Data tal-adozzjoni

18.12.2012

 

 

 

Riżultat tal-votazzjoni finali

+:

–:

0:

23

0

0

Membri preżenti għall-votazzjoni finali

Piotr Borys, Jean-Marie Cavada, Silvia Costa, Santiago Fisas Ayxela, Lorenzo Fontana, Mary Honeyball, Petra Kammerevert, Morten Løkkegaard, Emma McClarkin, Emilio Menéndez del Valle, Katarína Neveďalová, Doris Pack, Marie-Thérèse Sanchez-Schmid, Marietje Schaake, Marco Scurria, Hannu Takkula, Helga Trüpel, Milan Zver

Sostitut(i) preżenti għall-votazzjoni finali

Nadja Hirsch, Stephen Hughes, Iosif Matula, Raimon Obiols, Rui Tavares

Sostitut(i) (skont l-Artikolu 187(2)) preżenti għall-votazzjoni finali

Leonardo Domenici

RIŻULTAT TAL-VOTAZZJONI FINALI FIL-KUMITAT

Data tal-adozzjoni

24.1.2013

 

 

 

Riżultat tal-votazzjoni finali

+:

–:

0:

26

1

11

Membri preżenti għall-votazzjoni finali

Edit Bauer, Heinz K. Becker, Jean-Luc Bennahmias, Phil Bennion, Pervenche Berès, Vilija Blinkevičiūtė, Milan Cabrnoch, Alejandro Cercas, Marije Cornelissen, Emer Costello, Andrea Cozzolino, Frédéric Daerden, Sari Essayah, Marian Harkin, Nadja Hirsch, Stephen Hughes, Ádám Kósa, Jean Lambert, Patrick Le Hyaric, Thomas Mann, Elisabeth Morin-Chartier, Csaba Őry, Siiri Oviir, Sylvana Rapti, Licia Ronzulli, Elisabeth Schroedter, Joanna Katarzyna Skrzydlewska, Jutta Steinruck, Traian Ungureanu, Andrea Zanoni

Sostitut(i) preżenti għall-votazzjoni finali

Georges Bach, Malika Benarab-Attou, Sergio Gutiérrez Prieto, Richard Howitt, Paul Murphy, Ria Oomen-Ruijten, Gabriele Zimmer

Sostitut(i) (skont l-Artikolu 187(2)) preżenti għall-votazzjoni finali

Jens Nilsson