Riżoluzzjoni tal-Parlament Ewropew ta' l-10 ta' Lulju 2008 dwar is-sitwazzjoni fiċ-Ċina wara t-terrromot u qabel il-Logħob Olimpiku

P6_TA(2008)0362 RC-B6-0340/2008

Il-Parlament Ewropew,

–   wara li kkunsidra r-riżoluzzjoni tiegħu tat-22 ta" Mejju 2008 dwar id-diżastru naturali fiċ-Ċina(1),

–   wara li kkunsidra r-riżoluzzjoni tiegħu ta" l-10 ta" April 2008 dwar is-sitwazzjoni fit-Tibet(2),

–   wara li kkunsidra r-riżoluzzjoni tiegħu tat-13 ta" Diċembru 2007 dwar is-Samit bejn l-UE u ċ-Ċina u d-djalogu bejn l-UE u ċ-Ċina dwar id-Drittijiet tal-Bniedem(3),

–   wara li kkunsidra r-riżultati tal-25 rawnd tad-Djalogu dwar id-Drittijiet tal-Bniedem bejn l-UE u ċ-Ċina li sar fi Brdo, fis-Slovenja, fil-15 ta' Mejju 2008,

–   wara li kkunsidra l-Artikolu 103(4) tar-Regoli ta" Proċedura tiegħu,

A.   billi kemm iċ-Ċina kif ukoll l-UE ħadu l-impenn li jikkontribwixxu għall-paċi, is-sigurtà u l-iżvilupp sostenibbli fid-dinja,

B.   billi tiġi kkunsidrata l-iskala tal-qirda kkawżata mit-terremot vjolenti fil-Lbiċ taċ-Ċina fit-12 ta' Mejju 2008; billi dak it-terremot qatel għexieren ta' eluf ta' nies, b'mod partikolari fil-provinċja ta' Sichuan; billi skond l-aħħar stimi, 10 miljun ruħ ġew affettwati it-terremot u nqatlu kważi 70,000 persuna, inklużi eluf ta' tfal ta' l-iskola li mietu meta kkollassaw il-klassijiet tagħhom,

C.   billi l-gvern Ċiniż ipprovda mezzi ta" salvataġġ eċċezzjonali, u ta" persunal - inkluża parti mill-armata - kif ukoll timijiet mediċi biex jgħinu lill-abitanti tar-reġjun milqut,

D.   billi kien hemm mobilizzazzjoni u solidarjetà straordinarja tal-poplu Ċiniż kollu kemm hu, kif ukoll tal-komunità internazzjonali, bil-għan li jiġu megħjuna l-persuni affettwati,

E.   billi l-ftuħ tat-Tibet għat-turiżmu u għall-midja m'għandux jiġi trattat bħala ''avveniment ta' relazzjonijiet pubbliċi'' iżda bħala ftuħ reali, li ser jippermetti lill-ġurnalisti, lill-midja u lit-turisti li jżuru r-reġjun tat-Tibet,

F.   billi jitqiesu d-dikjarazzjonijiet konklussivi tal-Kumitat Olimpiku Internazzjonali (IOC), li enfasizza li l-fatt li l-organizzazzjoni tal-Logħob Olimpiku għall-2008 ngħatat f'idejn iċ-Ċina kien se jgħin sabiex il-pajjiż isir iktar miftuħ u sabiex tittejjeb is-sitwazzjoni tad-Drittijiet tal-Bniedem,

1.  Jesprimi sodisfazzjoni dwar l-iżviluppi fir-relazzjonijiet bejn l-UE u ċ-Ċina, id-djalogi settorjali u l-kooperazzjoni iktar mill-qrib dwar bosta kwistjonijiet ta' portata dinjija;

2.  Jistieden lill-awtoritajiet Ċiniżi biex jiftakru li t-twissija ta' terremot hi waħda mill-kriterji ta' referenza ta' l-iżvilupp ta' pajjiż; jenfasizza, għalhekk, l-importanza vitali li tirrispondi b'mod attiv u pront għal kull twissija li l-komunità xjentifika tista' tagħti lill-awtoritajiet fis-sitwazzjoni mhux probabbli imma possibbli ta' diżastru naturali ieħor fiċ-Ċina;

3.  Jilqa" bil-ferħ il-ftuħ mill-ġdid tal-kuntatti, wara l-ġrajjiet tax-xahar ta" Marzu f'Lhasa, bejn ir-rappreżentanti tad-Dalai-Lama u l-awtoritajiet Ċiniżi; iħeġġeġ liż-żewġ partijiet biex jintensifikaw dawn il-kuntatti sabiex joħolqu bażi ta" fiduċja reċiproka, l-unika kundizzjoni li permezz tagħha tista' tinstab soluzzjoni politika li tkun aċċettabbli miż-żewġ naħat;

4.  Jiddispjaċih li, filwaqt li r-relazzjonijiet maċ-Ċina għamlu progress importanti ferm fl-oqsma ekonomiċi u tal-kummerċ, dan il-progress ma kienx akkumpanjat minn kisbiet sostanzjali fir-rigward tad-drittijiet tal-bniedem u fi kwistjonijiet ta' demokrazija;

5.  Jikkundanna l-fatt li r-rekord taċ-Ċina dwar id-drittijiet tal-bniedem għadu sors ta' tħassib minħabba l-ksur sistematiku u frekwenti tad-drittijiet tal-bniedem; ifakkar fl-impenji dwar id-drittijiet tal-bniedem li ċ-Ċina kkommettiet ruħha għalihom meta ġie assenjat lilha l-Logħob Olimpiku;

6.  Jikkundanna l-użu frekwenti tal-piena tal-mewt miċ-Ċina u jistieden lill-awtoritajiet Ċiniżi sabiex jistabbilixxu moratorju fuq l-għoti tal-piena tal-mewt;

7.  Jiddeplora l-fatt li l-ebda sejħa internazzjonali ma rnexxielha twaqqaf lill-awtoritajiet Ċiniżi milli jissoktaw bit-tkomplija tagħhom għall-ġlied ta' l-14 ta' Marzu 2008 fit-Tibet, peress li l-parteċipanti fil-protesti f'Lhasa għadhom qed jiġu traċċati, miżmuma u arrestati b'mod arbitrarju, u l-familji tagħhom mhumiex jingħataw informazzjoni dwar fejn jinsabu, għalkemm dan huwa rikjest mil-liġi Ċiniża; jitlob lill-awtoritajiet Ċiniżi sabiex, matul il-Logħob Olimpiku, itemmu l-kampanja tagħhom ta' ''rijedukazzjoni patrijottika'', li ġiet intensifikata sa mill-bidu ta' April, f'ġieħ ''Tregwa Olimpika'' li ilha li ġiet stabbilita;

8.  Jinnota b'sodisfazzjoni li ċ-Ċina ma damitx biex aċċettat l-għajnuna tal-komunità internazzjonali għall-persuni milquta mit-terremot fir-reġjun ta" Sichuan u biex tiffaċilita l-intervent ta" l-organizzazzjonijiet ta" għajnuna umanitarja u ta" salvataġġ għat-tqassim ta" l-għajnuna;

9.  Jenfasizza l-importanza ta' l-appoġġ ta" l-Unjoni Ewropea, ta" l-Istati Membri tagħha u tal-komunità internazzjonali fil-fażi tar-rikostruzzjoni tar-reġjun milqut;

10.  Jitlob liċ-Ċina biex tirrispetta l-impenji pubbliċi tagħha lejn id-Drittijiet tal-Bniedem u d-drittijiet tal-minoranzi, id-demokrazija u l-istat tad-dritt li tħabbru fid-deċiżjoni tal-IOC, meta ħalliet liċ-Ċina torganizza l-Logħob Olimpiku;

11.  Iħeġġeġ lill-awtoritajiet Ċiniżi biex jieħdu din l-opportunità storika ħalli juru lid-dinja li l-għoti tal-Logħob Olimpiku lil Pekin ipprovda opportunità unika biex jitjiebu r-rekords tad-Drittijiet tal-Bniedem f'dan il-pajjiż, billi juru klemenza lill-priġunieri politiċi kollha u lill-attivisti għad-Drittijiet tal-Bniedem li jinsabu arrestati, inkluż fil-ħabsijiet fit-Tibet wara l-ġlied li nqala' f'Marzu 2008 (ovvjament minbarra l-persuni li jkunu wettqu reati vjolenti); jitlob minbarra dan lill-awtoritajiet Ċiniżi biex iwaqqfu d-diskriminazzjoni kontra l-migranti rurali u l-minoranzi etniċi u biex jieqfu jittormentaw l-attivisti tat-trejdunjins, l-avukati u l-ġurnalisti meta dawn jiddenunċjaw ksur tal-libertajiet fundamentali; itenni l-konvinzjoni tiegħu li l-arrest ta' nies bħal dawn huwa kontra l-ispirtu universali u aċċettat tal-ius gentium (liġi tan-nazzjonijiet);

12.  Jagħti istruzzjonijiet lill-President tiegħu biex jgħaddi din ir-riżoluzzjoni lil Kunsill, lill-Kummissjoni, lill-gvernijiet u lill-parlamenti ta' l-Istati Membri, lill-Gvern tar-Repubblika Popolari taċ-Ċina u lill-Kumitat Eżekuttiv tal-Kumitat Olimpiku Internazzjonali.

(1) Testi adottati, P6_TA(2008)0232. (2) Testi adottati, P6_TA(2008)0119. (3) Testi adottati, P6_TA(2007)0622.

Riżoluzzjoni tal-Parlament Ewropew tal-10 ta' Lulju 2008 dwar id-dokument tal-Kummissjoni ta" l-2007 dwar l-istrateġija għat-tkabbir (2007/2271(INI))

P6_TA(2008)0363 A6-0266/2008

Il-Parlament Ewropew,

–   wara li kkunsidra l-Komunikazzjoni tal-Kummissjoni dwar l-Istrateġija għat-Tkabbir u l-Isfidi Ewlenin 2007-2008 (COM(2007) 0663),

–   wara li kkunsidra r-riżoluzzjoni tiegħu tas-16 ta' Marzu 2006 dwar id-dokument tal-Kummissjoni ta" 2005 dwar l-istrateġija għat-tkabbir(1) u tat-13 ta' Diċembru 2006 u l-Komunikazzjoni tal-Kummissjoni dwar l-Istrateġija għat-Tkabbir u l-Isfidi Ewlenin 2006-2007(2),

–   wara li kkunsidra r-riżoluzzjonijiet preċedenti tiegħu dwar il-pajjiżi tal-Balkani tal-Punent, it-Turkija u l-imsieħba Ewropej tal-Politika Ewropea tal-Viċinanzi (ENP),

–   wara li kkunsidra l-Artikolu 45 tar-Regoli ta' Proċedura tiegħu,

–   wara li kkunsidra r-rapport tal-Kumitat għall-Affarijiet Barranin u l-opinjoni tal-Kumitat għall-Kultura u l-Edukazzjoni (A6-0266/2008),

A.   billi l-Istrateġija għat-Tkabbir ta' l-UE għandha dimensjoni kemm esterna u kif ukoll interna,

B.   billi d-dimensjoni esterna ta' din l-istrateġija tinvolvi l-promozzjoni ta' riformi, f'konformità ma' l-istandards Ewropej, ta' demokrazija, ta" rispett għad-drittijiet tal-bniedem, ta' paċi, u ta' stabilità u prosperità,

C.   billi d-dimensjoni interna ta' l-Istrateġija għat-Tkabbir taffettwa direttament il-kapaċità ta' l-UE li ssegwi l-objettivi tal-politika tagħha u li tinkiseb Unjoni dejjem eqreb, kif stipulat fit-Trattati,

D.   billi tinħtieġ UE intergrata politikament li tkun kapaċi tiżviluppa politiki ambizzjużi ta" solidarjetà u ta" stabilità,

E.   billi, skond it-Trattat ta" Ruma, "kull stat Ewropew jista' japplika biex isir membru tal-Komunità",

F.   billi, kull tkabbir li sar s'issa kien bla dubju suċċess kemm għall-UE u kif ukoll għall-Istati Membri li ngħaqdu magħha u kkontribwixxa għall-istabilità, l-iżvilupp u l-prosperità fl-Ewropa kollha kemm hi, huwa essenzjali li jinħolqu l-kundizzjonijiet meħtieġa sabiex jiġi żgurat li kull tkabbir fil-futur ikun suċċess ukoll,

G.   billi l-Ftehimiet ta" Stabilizzazzjoni u ta" Assoċjazzjoni qed jagħtu kontribut importanti u ta" suċċess lir-relazzjonijiet bejn l-UE u l-pajjiżi tal-Balkani tal-Punent bil-għan ta" l-integrazzjoni tagħhom fl-Ewropa u qed jippromwovu l-koperazzjoni reġjonali,

H.   billi l-Kunsill Ewropew ta" l-2003 li sar f'Tessaloniki u l-Kunsill Ewropew ta" l-2006 li sar fi Brussell affermaw mill-ġdid l-intenzjoni ta' l-UE li tirrispetta l-impenji tagħha mal-pajjiżi tax-Xlokk ta' l-Ewropa u tal-Balkani tal-Punent,

I.   billi, f'dan il-kuntest, il-konsensus imġedded adottat mill-Kunsill Ewropew f'Diċembru 2006 huwa bbażat fuq il-prinċipji tal-konsolidazzjoni ta" l-impenji, tal-kundizzjonalità ġusta u stretta u ta" komunikazzjoni aħjar mal-pubbliku,

J.   billi l-Istrateġija tat-Tkabbir hija ħafna aktar minn metodoloġija sempliċi ta' negozjar, li tirrifletti t-twemmin ewlieni li l-UE hija komunità ta" valuri komuni u li hija marbuta b'mod kumpless mad-dibattitu dwar l-objettivi ta' l-UE, il-futur tagħha u kif ukoll l-irwol tagħha fost il-pajjiżi ġirien u fid-dinja,

K.   billi l-metodoloġija u l-kriterji deskritti fil-Komunikazzjoni tal-Kummissjoni msemmija hawn fuq għat-twettiq ta' negozjati ta' adeżjoni jistħoqqilhom appoġġ sħiħ u għandhom jiġu implimentati b'mod rigoruż, u billi l-kunsiderazzjonijiet politiċi m'għandhomx ikunu iktar importanti mill-konformità stretta ma" dawn il-kriterji,

L.   billi l-Istrateġija għat-Tkabbir ta" l-UE għandha tkun parti minn firxa wiesgħa ta" strumenti ta" politika mfassla biex jikkonsolidaw id-demokrazija u biex jinbnew l-istabilità u l-iżvilupp soċjali fil-viċinanzi ta' l-UE, u kif ukoll biex jissaħħaħ l-irwol ta' l-UE fid-dinja,

M.   billi dawn il-politiki għandhom jinkludu l-varjetà ta' sitwazzjonijiet prevalenti fil-viċinanzi tagħna, b'mod partikulari f'dawk il-pajjiżi li għandhom status ta' kandidat u li bdew in-negozjati, dawk il-pajjiżi li għandhom status ta' kandidat iżda li għadhom ma bdewx in-negozjati, dawk li għandhom prospetti ta' sħubija, dawk li għandhom għan ta' integrazzjoni Ewropea u dawk li sempliċement jixtiequ li jkollhom relazzjonijiet ta" pajjiżi ġirien mill-qrib ma' l-Unjoni,

N.   billi dawn il-politiki għandhom ikunu indipendenti u bla ħsara għad-dispożizzjonijiet li jippermettu li pajjiż wieħed ikun jista' javvanza minn tip ta' relazzjoni ma' l-UE għal oħra, jekk jiġu ssodisfati l-kundizzjonijiet meħtieġa interni u esterni ta" dak il-pajjiż,

O.   billi l-imsieħba tal-Lvant ta' l-ENP huma identifikabbli b'mod ċar bħala pajjiżi Ewropej u li wħud minnhom iddikjaraw l-objettiv li jsiru membri ta" l-Unjoni,

P.   billi, kif iddikjarat fir-riżoluzzjoni msemmija hawn fuq tat-13 ta' Diċembru 2006, il-pajjiżi bi prospetti Ewropej għandhom jibbenefikaw minn relazzjoni bilaterali jew multilaterali mill-qrib ma' l-UE, li tkun taqbel mal-bżonnijiet u l-interessi speċifiċi tagħhom; billi din l-għażla, li tinvolvi firxa wiesgħa ta' possibilitajiet operazzjonali, tagħti lill-pajjiżi msieħba perspettiva stabbli u fit-tul tar-relazzjonijiet istituzzjonali ma' l-UE u tipprovdi l-inċentiv neċessarju għat-trawwim ta' stabilità, paċi u riforma demokratika u ekonomika fil-pajjiżi kkonċernati;

Q.   billi, skond l-istess riżoluzzjoni, ikun f'idejn il-pajjiżi kollha bi prospetti ta' adeżjoni rikonoxxuti li jiddeċiedu jekk iridux jibbenefikaw minn arranġamenti multilaterali simili bħala pass intermedjarju lejn sħubija sħiħa,

R.   billi l-Istrateġija tat-Tkabbir ta" l-UE tenħtieġ li tiġu kkomunikata u spjegata b'mod effettiv liċ-ċittadini attwali ta" l-UE kif ukoll liċ-ċittadini futuri kollha sabiex jiġi żgurat li jkunu mgħarrfa sew dwar il-politiki konċernati u li jingħata appoġġ pubbliku akbar għall-impenji ta' l-UE lejn il-ġirien tagħha, u b'hekk jiġu garantiti l-kredibilità u s-solidarjetà ta' l-UE bħala msieħba filwaqt li wieħed ifittex li jagħti tweġiba għall-preokkupazzjonijiet leġittimi,

1.  Jaqbel mal-Kummissjoni li t-tkabbir fil-passat kien suċċess, u li minnu gawdew kemm l-Istati Membri ta" l-UE l-antiki u kif ukoll il-ġodda permezz tat-tkabbir ekonomiku, l-promozzjoni tal-progress soċjali u l-ħolqien tal-paċi, l-istabilità, il-ħelsien u l-prosperità fil-kontinent Ewropew; jemmen li jistgħu jinstiltu lezzjonijiet mit-tkabbir ta' qabel u li modi oħra biex tittejjeb il-kwalità tal-proċess ta" tkabbir iridu jkunu bbażati fuq l-esperjenzi pożittivi li ttieħdu sal-lum;

2.  Jafferma mill-ġdid l-impenn sod tiegħu lejn il-pajjiżi kandidati kollha u lejn dawk li ngħataw prospetti ċari ta' sħubija, bil-kundizzjoni ta" konformità sħiħa mal-kriterji ta' Kopenħagen fl-1993 u li l-UE trid tagħmel sforzi sabiex issaħħaħ il-kapaċità ta' integrazzjoni tagħha u li din il-kapaċità għandha titqies b'mod sħiħ;

3.  Ifakkar, li f'dan il-kuntest, għall-pajjiżi ta" dik li qabel kienet il-Jugoslavja, kooperazzjoni sħiħa mat-Tribunal Kriminali Internazzjonali għal dik li qabel kienet il-Jugoslavja hija wkoll sine qua non;

4.  Huwa tal-fehma li l-Istrateġija għat-Tkabbir ta' l-UE għandha tissodisfa d-dispożizzjonijiet tat-Trattat ta' l-UE u tirrifletti l-impenji li diġà daħlet għalihom l-Unjoni, kif ukoll tilħaq bilanċ bejn l-interessi ġeostrateġiċi ta' l-UE, l-impatt ta' l-iżviluppi politiċi barra mill-fruntieri tagħha u l-kapaċità ta' integrazzjoni ta' l-UE, inkluża l-kapaċità tagħha li tlaħħaq ma' l-isfidi futuri interni u esterni u biex tirrealizza l-proġett ta' integrazzjoni politika tagħha;

5.  Ifakkar, f'dan il-kuntest, il-ħtieġa li jitwettqu r-riformi interni meħtieġa, mmirati lejn, inter alia, żieda fl-effiċjenza, il-koeżjoni soċjali u t-tisħiħ tar-responsabilità demokratika;

6.  Ifakkar li l-kapaċità ta' integrazzjoni hija marbuta mal-kapaċità ta' l-UE li tiddeċiedi u għalhekk li tikseb l-objettivi politiki tagħha, b'mod partikulari l-għanijiet ta' promozzjoni tal-progress politiku u soċjali u ta' livell għoli ta' impjiegi fl-Istati Membri tagħha, li tafferma l-abilità tagħha u l-kapaċità tagħha li taġixxi fuq ix-xena internazzjonali, li tippromwovi d-drittijiet u l-interessi ta' l-Istati Membri ta' l-UE u taċ-ċittadini Ewropej, li tiżviluppa żona ta' libertà, sigurtà u ġustizzja, li żżomm u tibni fuq l-acquis communautaire tagħha u li tħares id-drittijiet u l-libertajiet fundamentali, kif stipulat fil-Karta tad-Drittijiet Fundamentali ta' l-Unjoni Ewropea;

7.  Iqis li l-kunċett ta" kapaċità ta" integrazzjoni huwa magħmul minn erba" elementi:

8.  Jenfasizza li, sabiex jissaħħu l-kredibilità u l-effettività ta" l-istrateġija tat-tkabbir, il-kriterji ta" Kopenħagen iridu jiġu rrispettati bis-sħiħ u l-Istati Membri jridu jikkonformaw magħhom ukoll, sabiex jiġi evitat li l-pajjiżi applikanti jintalbu standards ogħla minn dawk applikati f'xi partijiet ta" l-UE;

9.  Barra minn hekk, ifakkar li l-istruttura ekonomika u l-interessi ta' kull Stat Membru ġdid jista' jkollhom impatt fuq id-direzzjoni li jieħdu l-politiki u l-baġit ta' l-UE u li l-adattazzjonijiet politiċi mitluba jistgħu jaffettwaw in-natura ta' l-UE nnfisha; ifakkar li Komunità magħquda ta" nazzjonijiet u ċittadini għandha tkun ibbażata fuq politiki koerenti u fuq is-solidarjetà ta" l-interessi;

10.  Iqis li l-implikazzjonijiet baġitarji, kif ukoll l-implikazzjonijiet ekonomiċi u soċjali usa', ta" tkabbir ieħor li jista" jkun hemm għandhom jitqiesu kif jixraq waqt l-evalwazzjoni ta" nofs iż-żmien tal-qafas finanzjarju plurijennali 2007-2013 u l-abbozzar ta" oqfsa finanzjarji sussegwenti;

11.  Jinsab ukoll konvint li kwalunkwe Stat Membru ġdid għandu jipprova jsolvi l-problemi interni prinċipali tiegħu, b'mod partikulari dawk li jikkonċernaw il-konfigurazzjoni territorjali u kostituzzjonali, qabel ma jkun jista' jingħaqad ma' l-UE; huwa ta" l-opinjoni li, qabel u waqt in-negozjati ma" kwalunkwe Stat simili, l-UE għandha tgħin biex tinstab soluzzjoni ta" dawn il-kwistjonijiet;

12.  Jendorsja l-enfasi fuq il-konsolidazzjoni, il-kundizzjonalià u l-komunikazzjoni bħala prinċipji gwida ta" l-Istrateġija għat-Tkabbir ta" L-UE;

13.  Huwa tal-fehma li kull tkabbir għandu jiġi segwit b'konsolidazzjoni adegwata u b'konċentrazzjoni politika, jiġifieri, b'evalwazzjoni mill-ġdid u serja tal-politiki u l-mezzi ta' l-UE sabiex ikun hemm reazzjoni għall-aspettattivi taċ-ċittadini Ewropej u sabiex tkun garantita l-vijabilità ta' l-UE bħala proġett politiku;

14.  Jinsab imħasseb li tkabbir mingħajr konsolidazzjoni u preparazzjoni xierqa jista" jinfluwenza b'mod negattiv lill-għaqda interna ta" l-UE u jista" jkollu implikazzjonijiet serji fuq il-kapaċità ta" l-UE li taġixxi – billi l-istituzzjonijiet tagħha jiddgħajfu, l-Istati Membri jkunu aktar vulnerabbli għall-pressjoni minn barra u l-kredibilità ta" l-UE bħala parteċipant globali tiddgħajjef;

15.  Barra minn dan, jemmen ukoll li s-suċċess tal-proċess tat-tkabbir (u, għalhekk, is-suċċess ta" l-integrazzjoni politika ta" l-UE) jista" jinkiseb biss jekk ikun hemm appoġġ pubbliku ċar u fit-tul għas-sħubija fl-UE ta' kull pajjiż kandidat; għalhekk huwa tal-fehma li tkabbir ulterjuri għandu jkun akkumpanjat b'politika ta' komunikazzjoni miftiehma li tkun tinvolvi l-Istituzzjonijiet ta' l-UE kollha u l-Gvernijiet ta' l-Istati Membri kif ukoll ir-rappreżentanti tas-soċjetà ċivili, u li din il-politika ta" komunikazzjoni tkun imfassla biex tispjega liċ-ċittadini ta' l-UE l-benefiċċji politiċi, ekonomiċi, soċjali u kulturali tat-tkabbir; għalhekk ifakkar lill-gvernijiet u lill-parlamenti ta" l-Istati Membri li hija fir-responsabilità tagħhom li jinfurmaw l-opinjoni pubblika b'mod xieraq dwar il-kisbiet pożittivi tat-tkabbir ta" qabel, l-istatus quo tan-negozjati li għaddejjin u l-kwistjonijiet marbuta ma" l-adeżjoni ta" l-Istati Membri l-ġodda;

16.  Huwa tal-fehma li l-pajjiżi bi prospetti Ewropej għandhom jagħmlu kull sforz biex jispjegaw, jinvolvu u jħejju l-opinjoni pubblika għall-integrazzjoni fl-Unjoni, u jinvolvu lis-soċjetà ċivili sa mill-bidu f'dan il-proċess;

17.  Jinsab konvint ukoll li l-Istrateġija għat-Tkabbir għandha tkun appoġġjata b'firxa iktar diversifikata ta' oqfsa kuntrattwali esterni u li dawn l-oqfsa jistgħu jiġu strutturati bħal ċrieki konċentriċi reċiprokament permeabbli, fejn il-pajjiżi jiġu offruti l-opportunità, skond kundizzjonijiet interni u esterni stretti iżda ċari, li jimxu minn status wieħed għal ieħor jekk ikunu jixtiequ jagħmlu hekk u jekk ikunu jissodisfaw il-kriterji li jappartjenu għal kull qafas speċifiku;

18.  Jafferma li l-parteċipazzjoni ta' l-ENP ma tfissirx sostituzzjoni għal sħubija jew livell li jwassal bilfors għal sħubija, la fil-prinċipju u lanqas fil-prattika; huwa tal-fehma li hemm bżonn li d-distakk konċettwali, politiku u legali li jeżisti bejn l-Istrateġija għat-Tkabbir ta' l-UE u l-Politika għall-Viċinanzi tagħha jimtela biex ikun hemm reazzjoni għall-aspettattivi tal-ġirien tal-Lvant tagħha; jinsab konvint li l-politika imsaħħa għall-viċinanzi tal-Kummissjoni m'hijiex biżżejjed f'dan ir-rigward, minkejja li tirrapreżenta pass diġà pożittiv fid-direzzjoni t-tajba, u jinsab konvint li hemm bżonn ta' bidla iktar sostanzjali u kwalitattiva;

19.  Għalhekk, jissuġġerixxi li, fir-rigward ta' dawk il-ġirien tal-Lvant li, minħabba l-qagħda politika, ekonomika u soċjali tagħhom u minħabba l-kapaċità attwali ta' integrazzjoni ta' l-UE, fil-preżent ma jgawdux minn prospetti ta' sħubija iżda fl-istess ħin jissodisfaw ċerti kundizzjonjiet demokratiċi u ekonomiċi, l-UE għandha tistabbilixxi żona bbażata fuq il-linji politiċi komuni li jkopru, b'mod partikulari, l-istat ta' dritt, id-demokrazija u d-drittijiet tal-bniedem, il-koperazzjoni fil-politika barranija u ta' sigurtà komuni, kwistjonijiet ekonomiċi u finanzjarji, il-kummerċ, l-enerġija, it-trasport, kwistjonijiet ambjentali, il-ġustizzja, is-sigurtà, il-migrazzjoni, il-moviment mingħajr viża u l-edukazzjoni; huwa tal-fehma li dawn il-linji politiċi komuni għandu jkollhom l-għan ġenerali li jgħinu lill-ġirien tal-Lvant biex, bil-mod, jiksbu l-istandards ta' l-UE u b'hekk iwittu triqithom għal integrazzjoni eqreb fi ħdan l-Ewropa; jinsab konvint li l-linji politiċi komuni msemmija hawn fuq għandhom jitfasslu b'mod konġunt mal-pajjiżi parteċipanti fuq il-bażi ta' mekkaniżmi ta' teħid ta' deċiżjonijiet speċifiċi, u għandhom jkollhom is-sostenn ta" għajnuna finanzjarja xierqa; għandu opinjoni pożittiva dwar il-proposta Pollako-Svediża għal Sħubija tal-Lvant ippreżentata waqt il-laqgħa tal-Kunsill dwar l-Affarijiet Ġenerali u r-Relazzjonijiet Esterni tas-26 u s-27 ta" Mejju 2008, kemm-il darba l-inizzjattiva li dik il-proposta tinvolvi tiżvolġi fi ħdan il-qafas ta" l-UE;

20.  Jilqa' b'sodisfazzjon it-tnedija mill-ġdid tal-"Proċess ta' Barċellona fil-qafas ta' l-UE: Unjoni għall-Mediterran" bħala pass ieħor fir-relazzjonijiet ta' l-UE mal-ġirien tan-Nofsinhar; jemmen li dan l-iżvilupp ġdid isaħħaħ l-argument favur relazzjonijiet multilaterali kuntrattwali speċifiċi mal-ġirien tal-Lvant ta' l-UE, li, meta mqabbla ma' l-imsieħba tan-nofsinhar, għandhom perspettivi u ambizzjonijiet Ewropej ċari; ifakkar li, bħala l-ewwel pass, dawn ir-relazzjonijiet għandhom isarrfu fit-twaqqif ta' Żona ta' Kummerċ Ħieles, li għandha tiġi segwita b'relazzjonijiet eqreb fuq il-linji taż-Żona Ekonomika Ewropea Plus (EEA +), ta' Commonwealth Ewropea jew ta' oqfsa speċifiċit a' koperazzjoni reġjonali ;

21.  Itenni, fil-kuntest ta" l-oqfsa speċifiċi ta" koperazzjoni reġjonali, l-importanza li titfassal strateġija ta' l-UE aktar sofistikata u komprensiva għar-reġjun tal-Baħar l-Iswed, li tmur lilhinn mill-inizjattiva attwali ta' sinerġija u li tipprevedi l-ħolqien ta" Ftehima ta" Koperazzjoni tal-Baħar l-Iswed, li għandha tinkludi l-UE, it-Turkija u l-istati kollha ta' madwar ix-xtut tal-Baħar l-Iswed bħala msieħba ugwali, filwaqt li jiġi mfittex l-involviment sħiħ tar-Russja, u li tkun tista", fi stadju ieħor aktar tard, tiżviluppa f'Unjoni tal-Baħar l-Iswed; jemmen li qafas multilaterali bħal dan mhux biss joffri lill-pajjiżi involuti l-possibilità li jsaħħu l-koperazzjoni tagħhom ma' l-UE f'għadd kbir ta' oqsma ta' politika, imma jippermetti wkoll li l-Unjoni Ewropea jkollha rwol aktar attiv fit-tiftix ta' soluzzjonijiet paċifiċi għall-kunflitti fir-reġjun, u b'hekk ikun hemm kontribut pożittiv favur is-sigurtà fir-reġjun;

22.  Fl-istess ħin jemmen li l-pajjiżi li jgawdu minn prospetti rikonoxxouti ta' sħubija iżda li għad fadlilhom ħafna xi jkopru qabel ma jiksbu l-kundizzjonijiet politiċi, ekonomiċi u soċjali neċessarji biex jinkiseb status ta' kandidat, jistgħu jibbenefikaw b'mod utli, b'mod kompletament volontarju, f'arranġamenti simili għall-oqfsa bilaterali jew multilaterali msemmija hawn fuq; ifakkar li pass immedjat bħal dan jiffaċilita l-użu ta" l-istrumenti kollha disponibbli għall-UE sabiex tgħin lill-pajjiżi konċernati fi triqithom lejn sħubija sħiħa;

23.  F'dan il-kuntest jilqa' b'sodisfazzjon il-Komunikazzjoni tal-Kummissjoni dwar il-Balkani tal-Punent: Tissaħħaħ il-perspettiva Ewropea, tal-5 ta' Marzu 2008 (COM(2008)0127), li tiddiskrivi firxa ta' miżuri ta" appoġġ għall-pajjiżi fir-reġjun fl-isforzi tagħhom lejn integrazzjoni ta' l-UE u biex napprofondixxu r-relazzjonijiet ta' l-UE magħhom, fl-oqsma kemm ta' kummerċ, ta' enerġija, ta' edukazzjoni u/jew kif ukoll ta' riċerka; jesprimi sodisfazzjon għall-iffirmar tal-Ftehimiet ta" Stabilizzazzjoni u Assoċjazzjoni tas-7 ta' Novembru 2007 mar-Repubblika tas-Serbja u tas-16 ta' Ġunju 2008 mal-Bożnja-Herzegovina, li huwa jqis bħala pass ieħor lejn il-konsolidazzjoni tar-rabtiet bejn ir-reġjun ikkonċernat u l-UE; f'dan ir-rigward jitlob li n-negozjati dwar il-liberalizzazzjoni tal-viżi mal-pajjiżi tal-Balkani tal-Punent jitħaffu, sabiex il-parteċipazzjoni tagħhom fil-Komunità tiġi ffaċilitatà;

24.  Iħeġġeġ lill-Kummissjoni biex toħroġ bi proposti konkreti għall-politika ta' relazzjonijiet esterni lejn il-ġirien ta' l-UE li tkun aktar diversifikata, fuq il-linji deskritti fir-riżoluzzjoni attwali, u, biex meta tikkunsidra l-konfigurazzjoni amministrattiva tagħha stess, ta" l-anqas tistabbilixxi rabta strutturali bejn l-attivitajiet imwettqa mid-Direttorat Ġenerali għat-Tkabbiar u d-Direttorat Ġenerali RELEX;

25.  Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill u lill-Kummissjoni.

(1) ĠU C 291 E, 30.11.2006, p. 402. (2) ĠU C 317 E, 23.12.2006, p. 480.

Riżoluzzjoni tal-Parlament Ewropew ta' l-10 ta' Lulju 2008 dwar is-sitwazzjoni fiż-Żimbabwe

P6_TA(2008)0364 B6-0347/2008

Il-Parlament Ewropew,

–   wara li kkunsidra r-riżoluzzjonijiet preċedenti tiegħu dwar iż-Żimbabwe, partikolarment dik ta' l-24 ta' April 2008(1),

–   wara li kkunsidra l-Pożizzjoni Komuni tal-Kunsill 2008/135/PESK(2) tat-18 ta' Frar 2008, li ġġeddet il-miżuri restrittivi kontra ż-Żimbabwe sa l-20 ta' Frar 2009, imposti skond il-Pożizzjoni Komuni 2004/161/PESK(3),

–   wara li kkunsidra l-Konklużjonijiet tal-Kunsill dwar iż-Żimbabwe adottati fid-29 ta' April 2008 u fis-26-27 ta' Mejju 2008,

–   wara li kkunsidra r-riżoluzzjoni dwar l-elezzjoni li kienet għadha se ssir fiż-Żimbabwe, adottata mill-Kummissjoni Afrikana dwar id-Drittijiet tal-Bniedem u tal-Popli (il-Kummissjoni Afrikana) li ltaqgħet waqt it-43 Sessjoni Ordinarja tagħha f'Ezulwini, ir-Renju tas-Sważiland bejn is-7 u t-22 ta' Mejju 2008,

–   wara li kkunsidra r-rapport tal-Missjoni Parlamentari ta' Osservazzjoni ta' l-Elezzjoni Pan-Afrikana tad-29 ta' Marzu 2008 dwar l-armonizzazzjoni ta' l-elezzjonijiet fir-Repubblika taż-Żimbabwe,

–   wara li kkunsidra l-Konklużjonijiet tal-Presidenza tal-Kunsill Ewropew tad-19-20 ta' Ġunju 2008, li emfasizzaw il-prontezza ta' l-UE biex tadotta miżuri addizzjonali kontra dawk responsabbli għall-vjolenza,

–   wara li kkunsidra l-istqarrija interim tal-Missjoni ta' Osservazzjoni ta' l-Elezzjoni tal-Komunità għall-Iżvilupp ta' l-Afrika tan-Nofsinhar (SADC) dwar il-ballottaġġ presidenzjali fiż-Żimbabwe u ta' l-elezzjonijiet parzjali tal-Kamra ta' l-Assemblea tad-29 ta' Ġunju 2008,

–   wara li kkunsidra l-istqarrija interim tal-Missjoni Parlamentari ta' Osservazzjoni ta' l-Elezzjoni Pan-Afrikana tat-30 ta' Ġunju 2008 dwar il-ballottaġġ presidenzjali u l-elezzjonijiet parzjali fiż-Żimbabwe,

–   wara li kkunsidra l-istqarrija preliminari tal-Missjoni Parlamentari ta' Osservazzjoni ta' l-Elezzjoni ta' l-Unjoni Afrikana (UA) tad-29 ta' Ġunju 2008,

–   wara li kkunsidra r-riżoluzzjoni dwar iż-Żimbabwe adottata mill-Assembleja ta' l-UA fil-11-il Samit ta' l-UA, li sar f'Sharm el-Sheikh, l-Eġittu, fit-30 ta' Ġunju-1 ta' Lulju 2008,

–   wara li kkunsidra l-Artikolu 103(2) tar-Regoli ta' Proċedura tiegħu,

A.   billi l-ballottaġġ presidenzjali taż-Żimbabwe, sar fis-27 ta' Ġunju 2008 minkejja l-irtirar tal-kandidat presidenzjali Morgan Tsvangirai minħabba li żdiedu l-vjolenza u r-restrizzjonijiet fuq il-partit ta' l-oppożizzjoni u l-partitarji,

B.   billi osservaturi mill-SADC, il-Parlament Pan-Afrikan u l-UA qalu li l-ballottaġġ kien imfixkel mill-vjolenza u ma laħaqx l-istandards ta' l-UA u l-SADC u ma rriflettiex ir-rieda tal-poplu,

C.   billi l-elezzjonijiet għall-Kamra ta' l-Assemblea taż-Żimbabwe, għas-Senat taż-Żimbabwe, għall-Presidenza, u għall-entitajiet tal-gvern lokali seħħew fid-29 ta' Marzu 2008,

D.   billi skond riżultati uffiċjali li ngħataw mill-Kummissjoni Elettorali taż-Żimbabwe, il-partit ta' l-oppożizzjoni Moviment għall-Bidla Demokratika (MDC) rebaħ maġġoranza ta' siġġijiet fl-Assemblea, waqt li Morgan Tsvangirai rebaħ 47,9% u Robert Mugabe rebaħ 43,2% tal-voti fl-elezzjoni presidenzjali,

E.   billi r-riżultati ta' l-elezzjoni presidenzjali damu ma ħarġu għal xi ġimgħat, dewmien li tellef il-kredibilità u t-trasparenza tal-proċess elettorali,

F.   billi Robert Mugabe ddikjara, qabel il-ballottaġġ elettorali, li l-MDC qatt mhu se jiggverna liż-Żimbabwe u li hu kien lest jiġġieled kontrihom biex ma jħallihomx jieħdu l-poter,

G.   billi fit-tħejjija għat-tieni fażi ta' l-elezzjoni presidenzjali attivisti u partitarji ta' l-oppożizzjoni sofrew vjolenza sponsorjata mill-istat, tortura, intimidazzjoni u arresti arbitrarji, u skond l-MDC għallinqas 86 partitarju tagħha ġew maqtula u 200,000 spustati minn darhom,

H.   billi, waqt il-kampanja elettorali, Morgan Tsvangirai kien arrestat diversi drabi, kien segwit minn suldati armati u mġiegħel jistkenn fl-Ambaxxata Olandiża f'Harare,

I.   billi s-Segretarju Ġenerali ta' l-MDC, Tendai Biti, kien arrestat fit-12 ta' Ġunju 2008 u akkużat b'sovversjoni u tradiment,

J.   billi l-midja ta' l-istat ipprojbixxiet reklami tal-kampanja ta' l-MDC, u għalhekk impediet li jkun hemm kampanja elettorali ħielsa u ġusta; billi r-rally ta' l-MDC ippjanat għat-22 ta' Ġunju 2008 f'Harare kien imfixkel minn partitarji vjolenti ta' l-Unjoni Nazzjonali Afrikana taż-Żimbabwe - Front Patrijottiku (ZANU-PF),

K.   billi fl-24 ta' Ġunju 2008 il-President tal-Kungress Nazzjonali Afrikan, Jacob Zuma ddeskriva s-sitwazzjoni fiż-Żimbabwe bħala 'mingħajr kontroll', u sejjaħ għal intervent urġenti min-Nazzjonijiet Uniti u mill-SADC,

L.   billi l-Kunsill tas-Sigurtà tan-NU (UNSC) fl-aħħar ikkundanna unanimament il-kampanja ta' vjolenza li saret mill-Gvern taż-Żimbabwe, għalkemm ma wasalx li jiddikjara din l-elezzjoni bħala illeġittima, minħabba l-oġġezzjoni ta' l-Afrika t'Isfel,

M.   billi l-UA ma qablet dwar l-ebda linjigwidi jew skeda ta' żmien ċara biex jinbdew u jintemmu n-negozjati u billi, barra minn hekk, id-diviżjonijiet fi ħdan l-SADC jfissru li x'aktarx mhux se jkun hemm djalogu,

N.   billi ġurnalisti kienu ffastidjati u intimidati u l-ġurnalisti barranin ma tħallewx jidħlu fil-pajjiż,

O.   billi l-pulizija arbitrarjament arrestat attivisti tas-soċjetà ċivili, inklużi membri ta' gruppi ċiviċi ta' diversi Knejjes f'Harare, u numru ta' NGOs u aġenziji ta' l-għajnuna kellhom jissospendu l-operazzjonijiet tagħhom,

P.   billi d-'diplomazija tas-silenzju' tal-President ta' l-Afrika t'Isfel, Thabo Mbeki, matul is-snin sfortunatament ma ħalliet l-ebda riżultat tanġibbli fir-rigward tas-sitwazzjoni politika fiż-Żimbabwe waqt li s-simpatiji magħrufa tiegħu għal Mugabe eventwalment wasslu biex l-oppożizzjoni fiż-Żimbabwe tirrifjutah bħala medjatur,

Q.   billi l-kriżi fiż-Żimbabwe qed tħalli effetti sinifikanti fuq il-pajjiżi ġirien, l-aktar l-Afrika t'Isfel,

R.   billi skond rapport ta' l-Organizzazzjoni dwar l-Ikel u l-Agrikoltura u l-Programm Dinji ta' l-Ikel madwar żewġ miljun persuna se jkunu mingħajr ikel bejn Lulju 2008 u Settembru 2008 fiż-Żimbabwe, u din il-figura mistennija li tikber għal 5,1 miljun bejn Jannar u Marzu 2009,

S.   billi wieħed minn kull għaxart itfal fiż-Żimbabwe imutu qabel ma jagħlqu l-ħames snin u li l-medja ta' l-għomor tal-ħajja hi ta' 37 sena għall-irġiel u 34 sena għan-nisa,

1.  Jenfasizza li l-elezzjonijiet tas-27 ta' Ġunju 2008 ma jistgħux jitqiesu bħala leġittimi, u jilqa' b'sodisfazzjon l-istqarrija tat-28 ta' Ġunju 2008 tal-Presidenza tal-Kunsill li b'mod ċar tiddikjara din il-pożizzjoni;

2.  Jikkundanna bil-qawwa l-kampanja ta' vjolenza sponsorjata mill-gvern kontra l-oppożizzjoni politika qabel it-tieni fażi ta' l-elezzjonijiet Presidenzjali, li rriżultat fil-qtil, l-arrest arbitrarju u l-fastidju ta' attivisti u partitarji ta' l-oppożizzjoni kif ukoll ta' difensuri tad-drittijiet tal-bniedem;

3.  Iqis li l-kampanja ta' vjolenza, theddid u intimidazzjoni kontra l-oppożizzjoni għamlitha impossibbli li jkun hemm ballottaġġ għall-elezzjoni presidenzjali ħieles u ġust, kif magħruf sew mill-komunità internazzjonali, inklużi l-osservaturi Afrikani ta' l-elezzjoni u mexxejja Afrikani;

4.  Jilqa' b'sodisfazzjon l-istqarrijia presidenzjali ta' l-UNSC li tikkundanna l-mod kif saret l-elezzjoni presidenzjali fiż-Żimbabwe;

5.  Jilqa' l-istqarrija tal-mexxejja tal-G8 dwar iż-Żimbabwe tat-8 ta' Lulju 2008, b'mod partikolari ir-rifjut tagħhom li jaċċettaw il-leġittimità ta' kull gvern li ma jirriflettix ir-rieda tal-poplu taż-Żimbabwe, jilqa' ir-rakkomandazzjoni tagħhom li jinħatar Mibgħut Speċjali tas-Segretarju Ġenerali tan-NU sabiex jirraporta dwar is-sitwazzjoni politika, umanitarja, drittijiet tal-bniedem u sigurtà u sabiex jappoġġjaw l-isforzi reġjonali biex jitmexxew in-negozjati bejn il-partiti politiċi filwaqt li jkunu rispettati r-riżultati ta' l-elezzjoni tad-29 ta' Marzu 2008, u l-intenzjoni tagħhom li jieħdu passi ulterjuri, inter alia billi jintroduċi miżuri finanzjarji u oħrajn kontra dawk l-individwi responsabbli mill-vjolenza;

6.  Jistieden lill-pajjiżi Afrikani u lill-komunità internazzjonali kollha biex tirrifjuta li tirrikonoxxi r-reġim ta' Mugabe;

7.  Jistieden lill-Unjoni Afrikana, lill-SADC u lin-NU biex jiffaċilitaw proċess inklussiv ta' medjazzjoni bi skadenzi ċari għal negozjati, li jippermetti soluzzjoni rapida u pożittiva għall-kriżi taż-Żimbabwe, ibbażata fuq elezzjonijiet ħielsa u ġusti;

8.  Jenfasizza li biex l-isforz ta' medjazzjoni iwassal għal djalogu nazzjonali sodisfaċenti u produttiv, parteċipanti esterni oħra flimkien mal-President Mbeki għandhom ikunu involuti, u d-djalogu intern m'għandux ikun ristrett għaż-żewġ partiti politiċi, imma għandu jinkludi parteċipanti oħra tas-soċjetà ċivili bħal NGOs, knejjes,trade unions u l-parlament;

9.  Isejjaħ biex ikun hemm soluzzjoni negozjata għall-kriżi attwali, li twassal għall-ħolqien ta' amministrazzjoni tranżizzjonali, b'mandat biex tintemm il-vjolenza sponsorjata mill-gvern, ikunu demobilizzati l-militias, jitneħħew il-liġijiet ripressivi, tissolva l-kriżi umanitarja, ikun hemm stabilità ekonomika, jinbeda proċess inklussiv u kostituzzjonali ta' reviżjoni, u terġa titwaqqaf il-Kummissjoni Elettorali taż-Żimbabwe (ZEC) sabiex jinħolqu l-kundizzjonijiet għal elezzjonijiet presidenzjali ħielsa u ġusti fil-futur qarib taħt il-partroċinju ta' l-UA u n-NU; jitlob li dawn in-negozjati jkunu osservati minn mibgħut ta' l-UA/Nazzjonijiet Uniti;

10.  Jistieden lin-NU sabiex tniedi investigazzjoni sħiħa u indipendenti dwar il-ksur tad-drittijiet tal-bniedem li saru u tinsisti li dawk responsabbli ma jitħallewx mingħajr ma jieħdu li ħaqqhom u għandhom jitressqu quddiem tribunal kompetenti u imparzjali;

11.  Jenfasizza l-ħtieġa ta' riabilitazzjoni tal-vittmi u jitlob għal miżuri tranżizzjonali ta' ġustizzja, inkluż it-twaqqif ta' kummissjoni tal-verità u r-rikonċiljazzjoni;

12.  Jilqa' b'sodisfazzjon il-pożizzjoni ta' numru sew ta' pajjiżi Afrikani, kif ukoll ta' grupp kbir ta' personalitajiet Afrikani rispettati sew, inkluż Nelson Mandela, Desmond Tutu u Kofi Annan, li tikkundanna s-sitwazzjoni fiż-Żimbabwe, u tinkoraġġihom biex b'mod konkret jimpenjaw ruħhom għal soluzzjoni politika u demokratika;

13.  Jappoġġja lil Botswana fis-sejħiet tagħha biex iż-Żimbabwe tkun sospiża mill-fora Afrikani sakemm jinżammu elezzjonijiet ħielsa u ġusti;

14.  Jitlob lill-Afrika t'Isfel biex tassumi rwol ewlieni fir-reġjun ta' l-SADC għall-futur taż-Żimbabwe u jiddispjaċih sew dwar ir-rifjut ta' l-Afrika t'Isfel fil-UNSC li tiddikjara din l-elezzjoni illeġittima;

15.  Jitlob lill-komunità internazzjonali biex iżżid il-pressjoni diplomatika fuq ir-reġim ta' Mugabe biex iwaqqaf kull vjolenza immedjatament, u jippermetti lill-Parlament li kien elett tliet xhur ilu li jiltaqa';

16.  Jistieden lill-Kunsill biex jintensifika s-sanzjonijiet immirati kontra membri tar-reġim ta' Mugabe u persuni oħra responsabbli mill-ksur gravi tad-drittijiet tal-bniedem, jekk l-isforzi ta' medjazzjoni ma jkunux aċċettati u jekk il-vjolenza sponsorjata mill-istat ma tieqafx, u sabiex jinsisti dwar sanzjonijiet li għandhom ikunu adottati fuq livell tan-NU, inkluż embargo ta' l-armi kif ukoll iffriżar komprensiv ta' l-assi kollha tal-gvern u tal-partit fit-tmexxija; jenfasizza l-ħtieġa li jkunu implimentati b'mod strett is-sanzjonijiet u li jkun hemm koordinazzjoni mal-komunità internazzjonali kollha sabiex tiġi żgurata l-effettività tagħhom u ma jkunx hemm evażjonijiet;

17.  Jinsisti li miżuri koersivi bħal dawn għandhom isemmu u jagħmlu diżunur lil dawk in-negozjanti responsabbli għall-finanzjament tar-reġim ripressiv ZANU-PF, kif ukoll li ma jħallulhomx id-dritt ta' residenza fl-Ewropa, u ma jagħtux aċċess għall-membri tal-familji tagħhom għal impjieg jew għal istituzzjonijiet edukattivi, kif ukoll jesponu isimhom lill-azzjonisti tal-banek internazzjonali li jservu biex jgħaddu l-qliegħ b'mod korrott, u jipprovdu self u investiment bħal Barclays Bank, Standard Chartered u oħrajn; jinkoraġġixxi kumpaniji Ewropej u internazzjonali oħra biex jirrevedu kull attività li tippermetti lir-reġim aċċess għal munita soda u, f'dan il-kuntest, jilqa' b'sodisfazzjon id-deċiżjoni ta' Tesco u Giesecke & Devrient biex itemmu r-relazzjonijiet ta' kummerċ maż-Żimbabwe;

18.  Jistieden, għalhekk, lill-Istati Membri biex ma jagħtu l-ebda viża lil Robert Mugabe, lill-kabinett tiegħu u lit-tmexxija ta' ZANU-PF għal skopijiet nazzjonali jew internazzjonali fuq territorju ta' l-UE, għaliex huma jirrapreżentaw reġime de facto illeġittimu, u ma jistgħux jitolbu l-ebda privileġġ skond il-konvenzjonijiet internazzjonali relevanti dwar libertajiet u privileġġi;

19.  Jistieden lill-Istati Membri, lill-Kunsill u lill-Kummissjoni sabiex iżidu l-ħidma diplomatika mal-gvernijiet Afrikani, l-SADC u l-Unjoni Afrikana kif ukoll ma' parteċipanti oħra importanti, inkluż il-gvern Ċiniż, sabiex jidentifikaw pożizzjonijiet komuni dwar il-kriżi taż-Żimbabwe;

20.  Jistieden liċ-Ċina u lil-Libja biex ma jkomplux jagħtu appoġġ lir-reġim ta' Mugabe;

21.  Jistieden lill-Kunsill u lill-Kummissjoni sabiex jimpenjaw lilhom infushom speċifikament ma' l-Afrika t'Isfel, bħala l-pajjiż ewlieni tar-reġjun, ħalli jesprimu t-tħassib serju tagħna għan-nuqqas ta' kwalunkwe riżultat ta' medjazzjoni tanġibbli f'dawn l-aħħar snin fir-rigward tal-kriżi taż-Żimbabwe, biex juru li l-impatt tal-kriżi fuq pajjiżi ġirien, inkluż l-Afrika t'Isfel, m'għandux jitħalla mingħajr ma jingħata attenzjoni fir-reġjun u sabiex jiċċaraw li l-appoġġ politiku u ekonomiku kontinwu lir-reġim ta' Mugabe jista' jkollu effetti negattivi fuq ir-relazzjonijiet bejn l-UE u l-Afrika t'Isfel;

22.  Jistieden lill-Kunsill biex jinsisti dwar miżuri effettivi u tanġibbli ta' prevenzjoni tal-konflitt internazzjonali u miżuri ta' mitigazzjoni, jekk meħtieġ permezz ta' l-iskjerament rapidu tal-forzi taż-żamma tal-paċi ta' l-UA/NU;

23.  Iħeġġeġ biex il-persuni arrestati għal raġunijiet politiċi jinħelsu immedjatament;

24.  Jinnota l-impatt devastanti li l-kriżi politika qed ikollha fuq il-poplu taż-Żimbabwe u jistieden lill-Gvern ta' Mugabe sabiex ineħħi r-restrizzjonijiet kollha kontra aġenziji ta' l-għajnuna umanitarja u sabiex jiżgura li l-għajnuna umanitarja tista' titwassal skond il-prinċipji ta' l-umanità, in-newtralità, l-imparzjalità u l-indipendenza;

25.  Jistieden lill-gvern taż-Żimbabwe biex immedjatament ineħħi l-armi minn idejn il-milizja żagħżugħa u l-veterani tal-gwerra u jiddemobilizzahom kif ukoll jieħu passi kontra individwi li wettqu ksur tad-drittijiet tal-bniedem;

26.  Jikkundanna l-fatt li uffiċjal tad-drittijiet tal-bniedem tan-NU kien imkeċċi miż-Żimbabwe ġimgħa qabel l-elezzjonijiet ippjanati, u jistieden lill-gvern biex jagħti aċċess bla tfixkil lill-istaff tan-NU;

27.  Jistieden lill-awtoritajiet ta' l-Afrika t'Isfel u lill-Istati Membri ta' l-UE biex ma jiddeportawx refuġjati li ġejjin miż-Żimbabwe u jagħtuhom status temporanju sakemm ikun possibbli li jirritornaw lura b'mod sikur;

28.  Jistieden lill-Kummissjoni biex iżżid l-appoġġ għad-difensuri tad-drittijiet tal-bniedem u tieħu azzoni malajr meta jkun hemm ħtieġa umanitarja addizzjonali kkawżata mill-kriżi politika, partikolarment fir-rigward tal-bżonnijiet u tas-sikurezza tal-persuni li huma spustati f'pajjiżhom;

29.  Juri tħassib dwar it-tbassir ta' żieda ta' bejn l-10% u l-40% ta' persuni miż-Żimbabwe li jaqsmu l-fruntieri fil-ġimgħat li ġejjin; jinnota li fost il-migranti, it-tfal se jkunu partikolarment f'sitwazzjoni vulnerabbli, f'riskju ta' abbuż, u furzati li jagħmlu xogħol perikoluż bħal dak fil-minjieri, iħaddmu makkinarju tal-biedja jew xogħol relatat mas-sess biex jibqgħu jgħixu;

30.  Jistieden lill-UE sabiex twaqqaf kwalunkwe għajnuna li qed titqassam permezz ta' l-awtoritajiet taż-Żimbabwe u biex tindirizzaha minflok permezz ta' istituzzjonijiet indipendenti nazzjonali u internazzjonali;

31.  Jilqa' b'sodisfazzjon l-impenn tal-Kummissarju Michel li jżid b'mod sinifikanti l-appoġġ għaż-Żimbabwe u l-poplu tiegħu billi jwiegħed EUR 250 miljun f'għajnuna għall-iżvilupp, ladarba terġa' lura d-demokrazija u jiġi elett gvern leġittmu u kredibbli;

32.  Jinsisti dwar il-ħtieġa li jkunu rispettati x-xewqat demokratiċi tal-poplu taż-Żimbabwe; iħeġġeġ lil dawk kollha li jixtiequ jieħdu sehem fil-ġejjieni taż-Żimbabwe sabiex jikkoperaw mal-forzi tal-bidla demokratika;

33.  Jistieden lill-Gvern taż-Żimbabwe biex jirrispetta l-impenji tiegħu stess favur prinċipji demokratiċi, id-drittijiet tal-bniedem u l-istat tad-dritt bħala firmatarju tat-Trattat SADC u tal-Protokolli relattivi, inkluż il-protokoll elettorali ta' l-SADC, ta' l-Att Kostituttiv ta' l-Unjoni Afrikana, tal-Karta Afrikana tad-Drittijiet tal-Bniedem u tal-Popli u tas-Sħubija Ġdida għall-Iżvilupp ta' l-Afrika;

34.  Jistieden lil dawk ta' rieda tajba fl-istrutturi tar-reġim u fiż-ZANU-PF sabiex iwarrbu l-forzi anti-demokratiċi u jieħdu azzjoni ħalli jikkoperaw ma l-MDC biex iġibu bidla rapida qabel ikun tard wisq;

35.  Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill, lill-Kummissjoni, lill-gvernijiet u l-parlamenti ta' l-Istati Membri, lill-gvernijiet tal-pajjiżi tal-G8, lill-gvernijiet u lill-parlamenti taż-Żimbabwe u ta' l-Afrika t'Isfel, lis-Segretarju Ġenerali tal-Commonwealth, lis-Segretarju Ġenerali tan-Nazzjonijiet Uniti, liċ-Chairpersons tal-Kummissjoni u tal-Kunsill Eżekuttiv ta' l-Unjoni Afrikana, lill-Parlament Pan-Afrikan, u lis-Segretarju Ġenerali u l-gvernijiet ta' l-SADC u lill-Forum Parlamentari tiegħu.

(1) Testi adottati, P6_TA(2008)0184. (2) ĠU L 43, 19.2.2008, p.39. (3) ĠU L 50, 20.2.2004, p.66.

Riżoluzzjoni tal-Parlament Ewropew ta' l-10 ta' Lulju 2008 dwar l-ispazju u s-sigurtà (2008/2030(INI))

P6_TA(2008)0365 A6-0250/2008

Il-Parlament Ewropew,

–   wara li kkunsidra l-Istrateġija tas-Sigurtà Ewropea intitolata "Ewropa Sikura f'Dinja Aħjar", adottata mill-Kunsill Ewropew fit-12 ta' Diċembru 2003,

–   wara li kkunsidra l-Istrateġija ta' l-UE kontra l-proliferazzjoni ta' l-Armi tal-Qerda tal-Massa, li kienet adottata ukoll mill-Kunsill Ewropew fit-12 ta' Diċembru 2003,

–   wara li kkunsidra r-riżoluzzjoni tal-Kunsill tal-21 ta' Mejju 2007 dwar il-Politika Spazjali Ewropea(1),

–   wara li kkunsidra t-Trattat dwar it-Tħaddim ta' l-Unjoni Ewropea (it-TFEU) u t-Trattat dwar l-Unjoni Ewropea (it-TEU), kif emendati bit-Trattat ta' Liżbona, u d-dispożizzjonijiet rilevanti tagħhom dwar il-politika spazjali Ewropea (l-Artikolu 189 tat-TFEU), il-koperazzjoni strutturata permanenti dwar kwistjonijiet ta' sigurtà u ta' difiża (l-Artikoli 42(6) u 46 tat-TEU u l-Protokoll10) u l-koperazzjoni msaħħa fil-qasam ċivili (Parti Sitta, Titolu III), kif ukoll il-klawsola ta' solidarjetà (l-Artikolu 222 tat-TFEU) u d-dispożizzjonijiet għall-assistenza reċiproka fil-każ ta' aggressjoni armata kontra xi Stat Membru jew xi Stati Membri (l-Artikolu 42(7) tat-TEU),

–   wara li kkunsidra r-Riżoluzzjoni tiegħu tad-29 ta' Jannar 2004 dwar il-pjan ta' azzjoni għall-implimentazzjoni tal-Politika Spazjali Ewropea(2),

–   wara li kkunsidra r-riżoluzzjoni tiegħu ta' l-14 ta' April 2005 dwar l-Istrateġija ta' Sigurtà Ewropea(3),

–   wara li kkunsidra t-Trattat ta" l-1967 dwar il-Prinċipji li jirregolaw l-Attivitajiet ta" l-Istati fl-Esplorazzjoni u fl-Użu ta" l-Ispazju, fosthom tal-Qamar u Korpi ċelesti oħra ("it-Trattat dwar l-Ispazju"),

–   wara li kkunsidra l-koperazzjoni bejn l-UE u r-Russja dwar il-politika spazjali li fl-2006 ħolqot Djalogu Tripartitiku dwar l-Ispazju bejn il-Kummissjoni Ewropea, l-Aġenzija Spazjali Ewropea (ESA) u r-Roscosmos (l-Aġenzija Spazjali Federali Russa),

–   wara li kkunsidra l-Artikolu 45 tar-Regoli ta' Proċedura tiegħu,

–   wara li kkunsidra r-rapport tal-Kumitat għall-Affarijiet Barranin u l-opinjoni tal-Kumitat għall-Industrija, r-Riċerka u l-Enerġija (A6-0250/2008),

A.   billi l-ħelsien minn theddid mill-ispazju u l-aċċess sostenibbli u sikur ta' l-ispazju, kif ukoll l-użu tiegħu, għandhom ikunu l-prinċipji li jmexxu l-Politika Spazjali Ewropea,

B.   billi Politika Spazjali Ewropea awtonoma hija ħtieġa strateġika biex l-Unjoni Ewropea tilqa' għall-isfidi politiċi u ta' sigurtà varji li kull ma tmur qiegħda tħabbat wiċċha magħhom,

C.   billi n-nuqqas ta' strateġija komuni dwar il-politika spazjali bejn l-Istati Membri ta' l-UE jfisser programmi li jiġu jqumu wisq,

D.   billi l-operazzjonijiet b'ġestjoni ta' kriżi fil-qafas tal-Politika ta' Sigurtà u ta' Difiża Ewropea jbatu minn nuqqas ta' interoperabilità bejn l-assi spazjali mħaddma mill-Istati Membri ta' l-UE,

E.   billi l-Unjoni Ewropea m'għandhiex struttura sħiħa Ewropea għall-ispazju għal skopijiet ta' sigurtà u ta' difiża,

F.   billi l-iżvilupp ta' ġenerazzjoni ġdida ta' launchers jieħu madwar 15-il sena u l-ħajja ta' dawk attwali trid tiġi sostitwita sa 20 sena oħra,

G.   billi l-iżvilupp ta' l-assi spazjali mill-Istati Uniti, ir-Russja, il-Ġappun u minn stati oħra li għadhom kemm bdew jivvjaġġaw fl-ispazju, bħaċ-Ċina, l-Indja, il-Korea t'Isfel, it-Tajwan, il-Brażil, l-Iżrael, l-Iran, il-Malasja, il-Pakistan, l-Afrika t'Isfel u t-Turkija, huwa miexi 'l quddiem b'pass mgħaġġel,

H.   billi l-Presidenza Franċiża ta' l-Unjoni Ewropea fit-tieni semestru ta' l-2008 se ġġib 'il quddiem il-Politika Spazjali Ewropea bħala waħda mill-prijoritajiet tagħha,

I.   billi wieħed mill-elementi ewlenin ta" arkitettura spazjali, meta mqabbla man-nefqa, u għall-kisba ta" flotta sostenibbli ta" assi spazjali huwa s-servisjar fl-orbita, permezz ta" mezzi in situ,

Kunsiderazzjonijiet ġenerali

1.  Jinnota l-importanza tad-dimensjoni spazjali għas-sigurtà ta' l-Unjoni Ewropea u l-bżonn ta' strateġija komuni meħtieġa biex tiddefendi l-interessi Ewropej fl-ispazju;

2.  Jenfasizza l-ħtieġa ta' l-assi spazjali sabiex l-attivitajiet politiċi u diplomatiċi ta' l-Unjoni Ewropea jkunu bbażati fuq informazzjoni indipendenti, affidabbli u sħiħa b'appoġġ għall-politiki tagħha ta" prevenzjoni ta" kunflitti, għall-operazzjonijiet tagħha b'ġestjoni ta' kriżi u għas-siġurtà dinjija, l-aktar il-monitoraġġ tal-proliferazzjoni ta' l-armi tal-qerda tal-massa u l-mezzi ta" trasportazzjoni tagħhom u l-verifika ta' trattati internazzjonali, il-kuntrabandu tranżnazzjonali ta" l-armamenti ħfief u ta" l-armi żgħar, il-ħarsien ta' l-infrastruttura kruċjali u tal-fruntieri ta' l-Unjoni Ewropea, kif ukoll il-protezzjoni ċivili fil-każ ta' diżastri u kriżijiet naturali u kkawżati mill-bniedem;

3.  Jilqa' b'sodisfazzjon l-endorsjar tal-Politika Spazjali Ewropea mill-"Kunsill Spazjali" kif proposta minn komunikazzjoni konġunta ppreżentata mill-Kummissjoni u mill-Aġenzija Spazjali Ewropea (COM(2007)0212), l-aktar il-kapitlu dwar is-sigurtà u d-difiża, filwaqt li jiddeplora n-nuqqas ta' kwalunkwe referenza għat-theddida li l-ispazju jista' jimtela bl-armamenti fi ħdan il-"kwistjonijiet ewlenin li għandhom jitqiesu fl-iżvilupp ta' strateġija għar-relazzjonijiet internazzjonali" (kif imsemmi fl-Anness 3 tar-Riżoluzzjoni tal-Kunsill tal-21 ta' mejju 2007); jirrakkomanda, għalhekk, li l-Istrateġija riveduta Ewropea tas-Sigurtà għandha tqis din il-politika kif xieraq, u huwa tal-fehma li l-kwistjonijiet dwar l-ispazju għandhom jiġu riflessi fil-White Paper li possibilment se ssir dwar il-Politika tas-Sigurtà u tad-Difiża;

4.  Japprova l-inklużjoni ta' bażi legali għall-Politika Spazjali Ewropea fit-Trattat ta' Liżbona; jilqa' b'sodisfazzjon l-opportunità li ngħatat lilu u lill-Kunsill biex jistabbilixxu, skond il-proċedura leġiżlattiva ordinarja, il-miżuri biex jiġi msawwar Programm Spazjali Ewropew; Jistieden lill-Kummissjoni biex tissottometti lilu u lill-Kunsill proposta xierqa għal miżuri bħal dawn, flimkien ma' Komunikazzjoni dwar l-istabbiliment ta' relazzjonijiet xierqa ma' l-Aġenzija Spazjali Ewropea; jilqa' b'sodisfazzjon ukoll il-possibilitajiet ta' koperazzjoni strutturata permanenti fi kwistjonijiet ta' sigurtà u ta' difiża u ta' koperazzjoni msaħħa fil-qasam ċivili;

5.  Jinkoraġġixxi lill-Istati Membri ta' l-Unjoni Ewropea, lill-Aġenzija Spazjali Ewropea u lil kull min għandu interess biex jużaw aktar u aħjar is-sistemi spazjali nazzjonali u multinazzjonali u biex iħeġġu l-komplementarjetà reċiproka tagħhom; jinnota f'dan ir-rigward li l-kapaċitajiet komuni huma meħtieġa għall-ESDP mill-inqas fl-oqsma li ġejjin: it-telekomunikazzjonijiet, l-immaniġġjar ta" l-informazzjoni, l-osservazzjoni u n-navigazzjoni; jirrakkomanda l-qsim u l-iskambju ta' din l-informazzjoni skond il-linja tal-kunċett ta' l-UE dwar l-Istruttura Ċentrika tan-Networks ta' l-Operat;

6.  Japprova l-isforzi ta' l-Akkademja Internazzjonali ta" l-Astronawtiċi u l-Assoċjazzjoni Internazzjonali għall-Avvanz tas-Sigurtà ta" l-Ispazju biex jippromwovu r-remedjazzjoni, il-ftehim u l-miżuri rigward l-iskart fl-ispazju;

Evalwazzjoni awtonoma tat-theddid

7.  Jistieden lill-Istati Membri biex jiġbru flimkien u jiskambjaw it-tagħrif ġeospazjali meħtieġ għall-evalwazzjoni awtonoma tat-theddid għall-UE;

Osservazzjoni u tkixxif dwar id-Dinja

8.  Iħeġġeġ biex iċ-Ċentru tas-Satelliti ta' l-Unjoni Ewropea (l-EUSC) ikompli jiġi żviluppat biex isir użu sħiħ mill-potenzjal tiegħu; barra minn hekk, jirrakkomanda li jkunu konklużi b'urġenza l-ftehim bejn iċ-Ċentru tas-Satelliti ta' l-Unjoni Ewropea u l-Istati Membri ta' l-UE biex kull immaġni disponibbli tgħaddi għand l-operat ta' l-ESDP u l-kmandanti tal-forza, filwaqt li tkun żgurata l-komplementarjetà mal-kapaċitajiet ta' osservazzjoni tal-Monitoraġġ Globali ta' l-Ambjent u s-Sigurtà (il-GMES) u ma' l-informazzjoni marbuta mas-siġurtà; f'dan ir-rigward, jilqa' b'sodisfazzjon il-proġett ta' l-Istazzjon ta' l-Esplojtazzjoni ta' l-Immaġni Tattika, li jitmexxa b'mod konġunt mill-Aġenzija tad-Difiża Ewropea (l-EDA) u ċ-Ċentru tas-Satelliti ta' l-Unjoni Ewropea;

9.  Jirrakkomanda li l-UE tiżviluppa kunċett komuni għall-intelligenza ġeospazjali, b'hekk toħloq kundizzjonijiet għall-involviment ta' l-EUSC fl-ippjanar ta' kull operazzjoni ta" l-ESDP li teħtieġ osservazzjoni bbażata fl-ispazju u intelliġenza bbażata fl-ispazju; jirrakkomanda li l-EUSC tistabbilixxi link ta" komunikazzjoni sikura sabiex tappoġġja l-operazzjonijiet ta" l-ESDP mhux biss mal-Kwartieri ta" l-Operazzjonijiet (OHQ) ibbażati fl-UE imma wkoll mal-Kwartieri tal-Forza (FHQ) fir-reġjun ta" l-iskjerament; aktar minn hekk, jissuġġerixxi li l-UE tesplora l-possibilità ta" kontribuzzjoni finanzjarja għall-EUSC mill-baġit ta" l-UE sabiex tipprovdi biżżejjed fondi biex tissodisfa l-bżonnijiet li qed jiżdiedu ta" l-operazzjonijiet ta" l-ESDP;

10.  Iħeġġeġ lill-Istati Membri ta' l-UE li għandhom aċċess għal tipi varji ta' radar, satelliti għall-osservazzjoni ottika u tat-temp u sistemi ta' tkixxif (Helios, SAR-Lupe, TerraSAR-X, Rapid Eye, Cosmo-Skymed, Pleiades) biex jagħmluhom kompatibbli; jilqa' b'sodisfazzjon il-ftehim bilaterali u multilaterali bejn il-pajjiżi l-kbar ta' l-UE (bħal SPOT, ORFEO, il-qafas ta' koperazzjoni Helios, il-ftehim ta' Schwerin u, fil-ġejjieni, il-MUSIS); jirrakkomanda li s-sistema MUSIS tiddaħħal f'qafas Ewropew u tiġi ffinanzjata mill-baġit ta' l-UE;

11.  Jisħaq dwar l-importanza tal-GMES għall-politika barranija kif ukoll għall-politika ta' sigurtà u ta' difiża ta' l-Unjoni Ewropea; iħeġġeġ biex tinħoloq linja baġitarja operattiva li tiżgura li s-servizzi tal-GMES ikunu sostenibbli skond il-ħtiġijiet ta' min jużahom;

Navigazzjoni – Pożizzjoni – Kejl ta' żmien

12.  Jenfasizza l-ħtieġa tal-Galileo għall-operazzjonijiet awtonomi ta' l-ESDP, għall-Politika Barranija u ta' Sigurtà Komuni u għas-sigurtà ta' l-Ewropa nnifisha u għall-awtonomija strateġika ta" l-Unjoni; jinnota li, b'mod partikulari, is-servizz tal-Galileo, regolat b'mod pubbliku, huwa vitali fil-qasam tan-navigazzjoni, tal-pożizzjoni u tal-kejl taż-żmien, mhux l-anqas sabiex ikunu evitati riskji bla bżonn;

13.  Jinnota l-ftehim waqt l-ewwel qari bejn il-Parlament u l-Kunsill dwar il-proposta għal regolament dwar l-implimentazzjoni ulterjuri tal-programmi Ewropej ta' radjunavigazzjoni bis-satellita (EGNOS u Galileo) li jistabbilixxi li Komunità hija s-sid tas-sistema u li l-fażi ta' preparazzjoni tagħha hija ffinanzjata kollha kemm hi mill-baġit tal-Komunità;

14.  Jiġbed l-attenzjoni għall-pożizzjoni tiegħu adottata fit-23 t'April 2008 dwar il-programmi Ewropej ta' radjunavigazzjoni bis-satellita (EGNOS u Galileo)(4), b'mod partikulari għall-fatt li l-programmi EGNOS u Galileo għandhom jitqiesu bħala waħda mill-pilastri ewlenin tal-Programm Spazjali Ewropew futur, u għal-governanza tal-programmi, flimkien mal-Panel Interistituzzjonali Galileo, li jista' jservi ta' mudell fl-iżvilupp ta' Politika Spazjali Ewropea;

Telekomunikazzjoni

15.  Jisħaq fuq il-ħtieġa ta' komunikazzjoni sikura bbażata fuq is-satelliti għall-operat ta' l-ESDP (Staff Militari ta' l-UE, Kwartieri Ġenerali ta' l-UE, kwartieri ġenerali skjerabbli) u għall-iskjerament ta' l-Istati Membri ta' l-UE man-NU, man-NATO u ma' organizzazzjonijiet bħal dawn;

16.  Jitlob biex is-sistemi attwali u futuri ta' telekomunikazzjoni bis-satellita li huma disponibbli fl-Istati Membri ta' l-Unjoni Ewropea (bħal Skynet, Syracuse, SICRAL, SATCOMBw, Spainsat) ikunu interoperabbli b'mod reċiproku sabiex tonqos l-ispiża;

17.  Jagħti l-appoġġ tiegħu għall-iżvilupp koperattiv ta' Radju Definit b'Softwer (SDR) mill-Kummissjoni u mill-Aġenzija tad-Difiża Ewropea; jinnota li l-SDR se jagħti sehmu biex ikun hemm interoperabilità aħjar min-naħa tas-segment ta' l-art tas-sistemi ta' telekomunikazzjoni;

18.  Jirrakkomanda li jiġu ffrankati riżorsi permezz ta' l-użu ta' infrastruttura fuq l-art li tkun il-bażi ta' sistemi ta' telekomunikazzjoni nazzjonali differenti;

19.  Jappoġġja l-possibilità ta" finanzjament fil-futur mill-baġit ta" l-UE, ta" sistemi satellitari Ewropej tat-telekomunikazzjonijiet li jappoġġjaw operazzjoni ta" l-ESDP;

Sorveljanza spazjali

20.  Jagħti l-appoġġ tiegħu għall-ħolqien ta' sistema ta' sorveljanza spazjali Ewropea li twassal għall-għarfien tas-sitwazzjoni fl-ispazju (li tinkludi, pereżempju, il-GRAVES u t-TIRA) biex ikun hemm monitoraġġ ta' l-infrastruttura spazjali, tal-fdal spazjali u, forsi, ta' xi periklu ieħor;

21.  Jappoġġja l-possibilità ta" finanzjament fil-futur mill-baġit ta" l-UE, ta" sistema Ewropea għall-għarfien tas-sitwazzjoni fl-ispazju;

Sistemi ta' satelliti ta' twissija bikrija kontra missili ballistiċi

22.  Jiddeplora l-fatt li l-Istati Membri ta' l-UE m'għandhomx aċċess għal informazzjoni immedjata dwar it-tfigħ ta' missili ballistiċi madwar id-dinja; jesprimi l-appoġġ tiegħu, għalhekk, għal proġetti li jwasslu għal twissija bikrija bis-satelliti kontra t-tfigħ ta' missili ballistiċi (bħall-iSpirale ta' Franza); barra minn hekk, jitlob li l-informazzjoni akkwistata permezz ta' dawn is-sistemi futuri tkun disponibbli għall-Istati Membri kollha ta' l-Unjoni Ewropea sabiex il-popolazzjoni tagħhom tkun protetta u biex jiġu appoġġjati kontromiżuri, kif ukoll biex isservi għall-verifika ta' konformita' mat-Trattat tan-Non-proliferazzjoni Nukleari, u għall-iskopijiet ta' l-operazzjonijiet ESDP u s-salvagwardja ta' l-interessi tas-sigurtà ta' l-Ewropa;

Informazzjoni elettronika (Signal intelligence)

23.  Jagħti l-appoġġ tiegħu għall-iskambju ta' informazzjoni elettronika (bħas-sistema Franċiża "Essaim" u informazzjoni rigward il-komunikazzjonijiet) fil-livell Ewropew;

Aċċess awtonomu għall-ispazju u għall-ambjent internazzjonali

24.  Jagħti l-appoġġ tiegħu għal aċċess għall-ispazju li jkun sikur, indipendenti u sostenibbli għall-Unjoni Ewropea bħala waħda mill-kundizzjonijiet ewlenin għall-azzjoni awtonoma tagħha;

25.  Jirrakkomanda li s-satelliti Ewropej mhux kummerċjali jintefgħu fl-orbita permezz ta' launchers Ewropej preferibbilment mit-territorju ta' l-Unjoni Ewropea, filwaqt li jitqiesu l-aspetti tas-sigurtà tal-provvista u tal-ħarsien tal-Bażi Teknoloġika u Industrijali tad-Difiża Ewropea;

26.  Jinnota li huwa neċessarju li jiżdied l-isforz għall-iżvilupp sabiex Ariane 5 msaħħa tkun disponibbli qabel l-2015;

27.  Jirrakkomanda li mill-aktar fis għandu jingħata bidu għal investiment strateġiku għat-tul f'launchers Ewropej ġodda, bi wieħed iħaħħaq mal-kompetizzjoni dinjija li qiegħda dejjem tikber; jitlob għal aktar dixxiplina f'dan il-proġett f'termini ta' baġit u ta' perjodu ta' skadenza;

28.  Jirrakkomanda li l-vetturi spazjali jiġu sservisjati waqt li qegħdin fl-orbita, bħala mezz ta" appoġġ biex jissaħħu r-reżistenza, il-persistenza, id-disponibilità u l-effiċjenza operattiva ta" l-assi spazjali operattivi u, fl-istess waqt, biex jitnaqqsu l-iskjerament ta" l-assi u l-ispejjeż tal-manutenzjoni;

Governanza

29.  Jinkuraġġixxi koperazzjoni b'saħħitha bejn il-pilastri għall-ispazju u għas-sigurtà, li tinvolvi l-partijiet kollha rilevanti (i.e. il-Kummissjoni, il-Kunsill, l-Aġenzija tad-Difiża Ewropea u ċ-Ċentru tas-Satelliti ta' l-Unjoni Ewropea) sabiex ikunu ggarantiti l-politika ta' sigurtà u s-sigurtà ta' l-informazzjoni marbuta ma' l-ESDP;

30.  Jirrakkomanda bil-qawwa l-promozzjoni ta" aċċess indaqs għall-Istati Membri kollha ta" l-UE għall-informazzjoni dwar l-operat miġbura bl-użu ta" l-assi spazjali permezz ta' qafas imsaħħaħ ta' l-ESDP;

31.  Jirrakkomanda li jiġu żviluppati kapaċitajiet amministrattivi u finanzjarji għall-immaniġġjar ta' attivitajiet relatati ma' l-ispazju mill- Aġenzija tad-Difiża Ewropea;

Il-Finanzjament

32.  Jinnota li l-baġit ta' l-UE jiddedika nefqa li tammonta għal madwar EUR 5.25 miljun fis-snin 2007-2013 għal attivitajiet komuni Ewropej ta' l-ispazju, li jirriżulta f'nefqa medja ta' EUR 750 miljun fis-sena f'dan il-perjodu;

33.  Jitlob lill-Unjoni Ewropea biex tistabbilixxi baġit operattiv għall-assi spazjali, li jservu għall-appoġġ ta' l-ESDP u l-interessi tas-sigurtà Ewropea;

34.  Hu allarmat mill-fatt li n-nuqqas ta' koordinazzjoni bejn l-Istati Membri jwassal għal skarsezza ta' riżorsi minħabba duplikazzjoni bla bżonn ta' l-attivitajiet; jagħti, għalhekk, l-appoġġ tiegħu għall-idea tat-tnedija ta' programmi konġunti bejn l-Istati Membri, li twassal biex jiġu ffrankati l-ispejjeż maż-żmien;

35.  Barra minn hekk, jinnota li l-ispiża għan-nuqqas ta' strateġija Ewropea komuni għall-kisba, il-manutenzjoni u t-tħaddim ta' l-assi spazjali hija stmata li tammonta għal mijiet ta' miljuni ta' euro;

36.  Jinnota li, kif uriet l-esperjenza, proġetti komuni fuq skala kbira ma jistgħux jiġu mmaniġġjati kif xieraq meta jkunu involuti 27 awtorità nazzjonali tal-baġit differenti li japplikaw il-prinċipju ta' "qligħ ġust"; jirrakkomanda, għalhekk, li dawn il-proġetti u programmi jiġu ffinanzjati mill-baġit ta' l-UE;

37.  Jinnota li l-istimi minn kompetenzi disponibbli jissuġġerixxu li l-livell ta' investiment meħtieġ għall-ħtiġijiet tas-sigurtà u d-difiża Ewropea rigward it-telekomunikazzjonijiet bis-satellita, u l-ispiża proprja ta' l-Unjoni Ewropea għall-osservazzjoni u l-ġbir ta' informazzjoni dwar id-Dinja, fosthom l-informazzjoni elettronika, għandhom jiżdiedu sabiex jissodisfaw il-ħtiġijiet u l-ambizzjonijiet ta" politika spazjali komprensiva;

38.  Hu tal-fehma li l-Unjoni Ewropea, l-Aġenzija Spazjali Ewropea, l-Aġenzija tad-Difiża Ewropea u l-Istati Membri tagħhom għandhom jagħmlu tajjeb għall-finanzjament affidabbli u xieraq ta' l-attivitajiet spazjali maħsuba u għar-riċerka marbuta magħhom; jagħti importanza kbira lill-finanzjament mill-baġit ta' l-UE, bħal fil-każ tal-proġett Galileo;

Ħarsien ta' l-infrastruttura spazjali

39.  Jenfasizza l-vulnerabilità ta' l-assi spazjali strateġiċi kif ukoll ta' l-infrastruttura li tippermetti l-aċċess għall-ispazju, bħal launchers u portijiet spazjali; għalhekk jisħaq fuq il-ħtieġa li dawn ikunu mħarsa b'mod xieraq b'difiża b'missili ta' medda medja mill-art, b'ajruplani u b'sistemi ta' sorveljanza mill-ispazju; barra minn hekk, jagħti l-appoġġ tiegħu biex is-sħab internazzjonali jaqsmu l-informazzjoni bejniethom fil-każ li s-satelliti jsiru inoperabbli minħabba l-azzjoni ta' l-għadu;

40.  Jitlob biex għall-ġejjieni tonqos il-vulnerabilità tas-sistemi tas-satelliti Ewropej permezz ta' sistemi kontra l-iġġammjar, sistemi ta' ħarsien, isservisjar fl-orbita, u strutturi b'kostellazzjonijiet ta" orbita għolja u multiorbitali;

41.  Jenfasizza li l-miżuri ta' ħarsien għandhom jikkonformaw għal kollox ma' l-istandards internazzjonali dwar l-użu paċifiku ta' l-ispazju u mal-miżuri għat-trasparenza u għat-tisħiħ tal-fiduċja miftiehma b'mod reċiproku (TCBMs); jitlob lill-Istati Membri ta" l-UE biex jesploraw il-possibilità li jiżviluppaw regoli li jorbtu legalment jew politikament għall-operaturi ta" l-ispazju, flimkien ma" sistema ta" mmaniġġjar tat-traffiku spazjali;

42.  Jenfasizza li, minħabba din il-vulnerabilità, il-komunikazzjoni avvanzata m'għandha qatt issir totalment dipendenti fuq it-teknoloġiji bbażati fuq l-ispazju;

Reġim legali internazzjonali għall-użu ta' l-ispazju

43.  Itenni l-importanza tal-prinċipju ta' l-użu ta' l-ispazju għal skopijiet paċifiċi kif imfisser fit-Trattat dwar l-Ispazju ta' l-1967 msemmi hawn fuq; huwa għalhekk imħasseb li fil-ġejjieni l-ispazju jista' jimtela bl-armamenti;

44.  Jinsisti li taħt l-ebda ċirkostanzi l-politika Ewropea ta' l-ispazju m'għandha tikkontribwixxi sabiex l-ispazju jiġi mmilitarizzat u jimtela bl-armi;

45.  Jitlob biex ir-reġim legali internazzjonali jissaħħaħ sabiex jirregola u jħares l-użu ta' l-ispazju għal għanijiet mhux aggressivi u għat-tisħiħ tat-TCBMs, fil-qafas ta' l-abbozz tal-linji gwida dwar il-mitigazzjoni tal-fdal spazjali tal-Kumitat tan-NU dwar l-Użu Paċifiku ta' l-Ispazju (COPUOS), b'konsistenza ma' dawk tal-Kumitat ta' l-Aġenziji għall-Koordinazzjoni tal-Fdal Spazjali, kif ukoll l-iżvilupp min-naħa tal-Konferenza tan-NU dwar id-Diżarm (CD) ta' ftehim multilaterali dwar il-prevenzjoni tal-Ġirja għall-Armamenti fl-Ispazju (PAROS); barra minn hekk, jitlob lill-Presidenza ta' l-UE biex tirrappreżenta lill-UE b'mod proattiv fil-COPUOS; jitlob lill-istituzzjonijiet ta" l-UE sabiex jippromwovu konferenza biex jirrevedu t-Trattat ta" l-Ispazju, bil-għan li jsaħħuħ u jwessgħu l-ambitu tiegħu biex jipprojbixxu l-armamenti kollha fl-ispazju;

46.  Jistieden lill-protagonisti internazzjonali kollha biex ma jużawx tagħmir offensiv fl-ispazju; jesprimi t-tħassib partikulari tiegħu dwar l-użu ta" forza qerrieda kontra s-satelliti, bħas-sistema kontra s-satelliti ttestjata miċ-Ċiniżi f'Jannar 2007 u l-konsegwenzi taż-żieda qawwija fl-iskart għas-sigurtà spazjali; jirrakkomanda, għalhekk, li jkunu adottati strumenti internazzjonali li jorbtu b'mod legali u li jiffukaw fuq il-projbizzjoni ta' l-użu ta' l-armamenti kontra l-assi spazjali u tat-tqegħid ta' armamenti fl-ispazju;

47.  Jistieden lill-utenti kollha ta' l-ispazju biex jirreġistraw is-satelliti tagħhom, fosthom dawk militari, permezz ta' miżura għas-sigurtà spazjali li ssaħħaħ il-fiduċja u tħeġġeġ it-trasparenza; jagħti l-appoġġ tiegħu biex il-Kunsill ikompli jinsisti għal Kodiċi ta' Kondotta komprensiv ta' l-UE dwar l-Oġġetti Spazjali; jitlob li dan il-Kodiċi jsir strument li jorbot legalment;

48.  Iħeġġeġ lin-Nazzjonijiet Uniti u lill-Unjoni Ewropea biex jagħtu sehem attiv fit-tnaqqis tal-fdal spazjali li jista' jkun ta' ħsara għas-satelliti, kif ukoll għall-ħarsien minnu;

Koperazzjoni transatlantika għall-politika spazjali u d-difiża kontra l-missili

49.  Jitlob l-UE u l-Organiżżazzjoni tat-Trattat ta' l-Atlantiku tat-Tramuntana bil-ħeġġa biex iniedu djalogu strateġiku dwar il-politika spazjali u d-difiża kontra l-missili, filwaqt li jżommu quddiem għajnejhom l-imperattiv legali li tiġi evitata kwalunkwe azzjoni li tista' tkun inkompatibbli mal-prinċipju ta' l-użu paċifiku ta' l-ispazju, l-aktar dwar il-komplementarjetà u l-interoperabilità tas-sistemi ta' komunikazzjoni bis-satellita, is-sorveljanza spazjali u t-twissija bikrija kontra l-missili ballistiċi, kif ukoll il-ħarsien tal-forzi Ewropej b'sistema ta' difiża b'missili ta' medda medja ('theatre missile defence system");

50.  Jistieden lill-Unjoni Ewropea u lill-Istati Uniti ta' l-Amerika biex jieħdu sehem fi djalogu strateġiku dwar l-użu ta' l-assi spazjali u biex ikunu minn ta" quddiem, fuq livell globali, fi ħdan in-NU u barra minnhom, li jiżguraw li l-ispazju jiġi ppreservat għal politiki paċifiċi biss;

Koperazzjoni internazzjonali oħra

51.  Jilqa' b'sodisfazzjon il-koperazzjoni msaħħa bejn l-Unjoni Ewropea u l-Federazzjoni Russa fil-qafas tad-Djalogu Tripartitiku dwar l-Ispazju stabbilit fl-2006, msemmi hawn fuq, bejn il-Kummissjoni Ewropea, l-Aġenzija Spazjali Ewropea u r-Roscosmos li tinkludi l-applikazzjonijiet spazjali (in-navigazzjoni tas-satelliti, l-osservazzjoni tad-Dinja u l-komunikazzjoni bis-satelliti) kif ukoll l-aċċess għall-ispazju (launchers u sistemi oħra ta' trasport spazjali);

o
o   o

52.  Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill, lill-Kummissjoni, lill-Aġenzija Spazjali Ewropea, lill-parlamenti ta' l-Istati Membri u lis-Segretarji Ġenerali tan-Nazzjonijiet Uniti, ta' l-Organizzazzjoni tat-Trattat ta' l-Atlantiku tat-Tramuntana u ta' l-Organizzazzjoni għas-Siġurtà u l-Koperazzjoni fl-Ewropa.

(1) ĠU C 136, 20.6.2007, p. 1. (2) ĠU C 96 E, 21.4.2004, p. 136. (3) ĠU C 33 E, 9.2.2006, p. 580. (4) Testi Adottati, P6_TA(2008)0167.

Riżoluzzjoni tal-Parlament Ewropew tal-10 ta' Lulju 2008 dwar allegazzjonijiet ta' oqbra tal-massa fil-parti tal-Kashmir li amministrata mill-Indja

P6_TA(2008)0366 RC-B6-0349/2008

Il-Parlament Ewropew,

–   wara li kkunsidra r-rapporti tad-delegazzjoni ad hoc tiegħu, wara ż-żjarat tagħha fil-Kashmir mit-8 sal-11 ta' Diċembru 2003 u mill-20 sa l-24 ta' Ġunju 2004,

–   wara li kkunsidra r-riżoluzzjoni tiegħu tat-18 ta' Mejju 2006 dwar ir-Rapport Annwali dwar id-Drittijiet tal-Bniedem fid-Dinja għall-2005 u l-politika ta' l-UE dwar din il-kwistjoni(1),

–   wara li kkunsidra r-riżoluzzjoni tiegħu ta' l-24 ta' Mejju 2007 dwar is-sitwazzjoni attwali u prospetti għall-futur tal-Kashmir(2),

–   wara li kkunsidra l-Artikolu 115(5) tar-Regoli ta" Proċedura tiegħu,

A.   billi huwa rrappurtat li nstabu mijiet ta' oqbra mhux identifikati sa mill-2006 f'Jammu u fil-Kashmir u billi allegatament instabu mill-inqas 940 kadavru fi 18-il raħal fid-distrett ta' Uri biss,

B.   billi l-Assoċjazzjoni bbażata fi Srinagar tal-Ġenituri tal-Persuni li Għebu (APDP) ħarġet rapport fid-29 ta' Marzu 2008 fejn indikat l-eżistenza ta' bosta oqbra f'postijiet fejn, minħabba l-viċinanza tagħhom għal-linja ta' kontroll mal-Pakistan, mhumiex aċċessibbli mingħajr permess speċifiku tal-forzi ta' sigurtà,

C.   billi, skond l-organizzazzjonijiet tad-drittijiet tal-bniedem, ma jistax jiġi eskluż li l-oqbra fihom il-fdalijiet ta' vittmi ta' qtil illegali, għajbien infurzat, tortura u abbużi oħra li seħħew fil-kuntest tal-kunflitt armat li għadu għaddej f'Jammu u fil-Kashmir sa mill-1989,

D.   billi stimi dwar in-numru ta' persuni li għebu mill-1989 ivarjaw ħafna bejn l-assoċjazzjonijiet tal-familji tal-vittmi li jsemmu 'l fuq minn 8,000 u l-awtoritajiet tal-gvern li jsemmu inqas minn 4,000,

E.   billi rapport tal-pulizija ta' l-istat ta' l-2006 ikkonferma l-imwiet ta' 331 persuni taħt arrest u l-għajbien infurzat wara detenzjoni ta' 111 persuna sa mill-1989,

F.   billi għad hemm allegazzjonijiet dwar ksur tad-drittijiet tal-bniedem minkejja l-fatt li l-Gvern Indjan ħa impenn f'Settembru 2005 biex ma jibqax jittollera ksur tad-drittijiet tal-bniedem f'Jammu u fil-Kashmir,

G.   billi Parvez Imroz, avukat tad-Drittijiet tal-Bniedem ippremjat, president tal-Koalizzjoni tas-Soċjetà Ċivili ta' Jammu u tal-Kashmir u fundatur ta' l- APDP, baqa' ħaj wara attakk fit-30 ta' Ġunju 2008 fi Srinagar, allegatament minn membri tal-forzi ta' sigurtà, u billi huwa allegat li ġew ittormentati membri oħra tal-Qorti Internazzjonali għad-Drittijiet tal-Bniedem u għall-Ġustizzja fil-Kashmir, li qed tiġi faċilitata mill-APDP,

1.  Jitlob lill-Gvern Indjan sabiex b'mod urġenti jiżgura li jsir stħarriġ indipendenti u imparzjali tas-siti kollha ssuspettati ta' oqbra tal-massa f'Jammu u fil-Kashmir, u bħala l-ewwel pass immedjat, li jiżgura li s-siti ta' l-oqbra jkunu siguri sabiex ikunu jistgħu jiġu ppreservati l-provi;

2.  Jitlob lill-Kummissjoni biex toffri għajnuna finanzjarja u teknika lill-Gvern Indjan fil-kuntest ta' l-Istrument ta' l-Istabilità, sabiex issir investigazzjoni fil-fond u għal miżuri ulterjuri possibbli għas-soluzzjoni tal-kunflitti fil-Kashmir;

3.  Jitlob lill-Istati Membri ta' l-UE biex jindirizzaw il-kwistjoni fid-djalogu li jmiss dwar id-drittijiet tal-bniedem, li għandu jseħħ sa tmiem is-sena;

4.  Jesprimi t-tħassib tiegħu rigward is-sigurtà ta' Parvez Imroz u ta' attivisti oħra favur id-drittijiet tal-bniedem, li qed jinvestigaw l-oqbra mhux immarkati u allegazzjonijiet oħra ta' ksur tad-drittijiet tal-bniedem f'Jammu u fil-Kashmir, u jitlob lill-awtoritajiet Indjani sabiex jiżguraw il-protezzjoni tagħhom u jippermettulhom li jagħmlu xogħolhom mingħajr biża' ta' turment u ta' vjolenza; iħeġġeġ lill-awtoritajiet biex iwettqu investigazzjoni imparzjali mingħajr dewmien fir-rigward ta' l-attakk fuq Parvez Imroz, biex jippubblikaw ir-riżultati u biex issir ġustizzja fuq il-persuni responsabbli;

5.  Itenni t-talba tiegħu lill-Gvern Indjan u lill-awtoritajiet ta' l-istat sabiex jinvestigaw l-allegazzjonijiet kollha ta' għajbien infurzat; iħeġġeġ sabiex il-każijiet kollha fejn aġenti militari, tas-sigurtà jew ta' l-infurzar tal-liġi jkunu suspettati li jkunu involuti jingħataw kollha kemm huma f'idejn uffiċċju tal-prosekutur ċivili, u sabiex tinħoloq bażi tad-dejta unika tal-persuni kollha li għebu u tal-kadavri kollha li jkunu nstabu; jitlob lill-Istati Membri ta' l-UE sabiex jiffaċilitaw u jappoġġjaw kwalunkwe koperazzjoni li tkun possibbli bejn il-Gvernijiet ta' l-Indja u tal-Pakistan, fir-rigward ta' din il-kwistjoni;

6.  Jitlob lill-awtoritajiet kollha ta' l-istat sabiex jiżguraw li l-proċeduri kollha ta' detenzjoni jissodisfaw ir-rekwiżiti minimi ta' l-istandards legali internazzjonali, it-trattament dinjituż, ir-reġistrazzjoni u l-prosekuzzjoni, l-aċċess malajr għall-membri tal-familja, l-avukati u l-qrati indipendenti, kif ukoll ir-responsabilità għal kwalunkwe ksur ta' dawn il-proċeduri;

7.  Jikkundanna bis-saħħa l-qtil illegali, l-għajbien infurzat, it-tortura, l-istupru u l-abbużi l-oħra tad-drittijiet tal-bniedem li seħħew f'Jammu u fil-Kashmir sa mill-bidu tal-kunflitt armat fl-1989; jinsisti li l-familji tal-vittmi jingħataw kumpens sħiħ;

8.  Jitlob lill-gvenrijiet sabiex jirratifikaw l-Istatut tal-Qorti Kriminali Internazzjonali ta' Ruma, sabiex jirratifikaw u jimplimentaw mingħajr riżerva il-Konvenzjoni tan-NU għall-Protezzjoni tal-Bnedmin Kollha kontra l-Għajbien Infurzat, u sabiex, skond l- Artikoli 31 u 32 ta' dik il-Konvenzjoni, jiddikjaraw li jirrikonoxxu l-kompetenza tal-Kumitat għall-Għajbien Infurzat;

9.  Jitlob li jkun hemm aċċess sħiħ liż-żewġ partijiet tal-Linja ta' Kontroll għar-Relaturi Speċjali tan-Nazzjonijiet Uniti skond it-termini ta' referenza tal-Proċeduri Speċjali tan-Nazzjonijiet Uniti, partikolarment ir-Relaturi Speċjali għat-Tortura u għall-Eżekuzzjonijiet extraġudizzjarji, sommarji jew arbitrarji u għall-Grupp ta' Ħidma tan-Nazzjonijiet Uniti dwar l-Għajbien Involontarju;

10.  Jerġa' jsejjaħ lil-Lok Sabha biex jemenda l-Att dwar id-Drittijiet tal-Bniedem sabiex il-Kummissjoni Nazzjonali għad-Drittijiet tal-Bniedem tkun tista' tistħarreġ b'mod indipendenti l-allegazzjonijiet ta' abbuż mill-membri tal-forzi armati;

11.  Jagħti istruzzjonijiet lill-President tiegħu sabiex jgħaddi din ir-riżoluzzjoni lill-Kunsill, lill-Kummissjoni, lill-Gvern u lill-Parlament ta' l-Indja, lill-Gvern u lill-Parlament tar-Repubblika Iżlamika tal-Pakistan, lill-Gvern u lill-Parlament ta' l-Istat ta' Jammu u tal-Kashmir u lis-Segretarju Ġenerali tan-Nazzjonijiet Uniti.

(1) ĠU C 297 E, 7.12.2006, p.341. (2) ĠU C 102, E, 24.4.2008, p.468.

Riżoluzzjoni tal-Parlament Ewropew ta' l-10 ta Lulju 2008 dwar il-Bangladexx

P6_TA(2008)0367 RC-B6-0356/2008

Il-Parlament Ewropew,

–   wara li kkunsidra r-riżoluzzjonijiet preċedenti tiegħu dwar il-Bangladexx, b'mod partikolari dawk tas-16 ta' Novembru 2006(1) u tas-6 ta' Settembru 2007(2),

–   wara li kkunsidra l-Ftehima ta' Koperazzjoni bejn il-Komunità Ewropea u -Repubblika Popolari tal-Bangladexx dwar Sħubija u Żvilupp(3),

–   wara li kkunsidra l-istat ta' emerġenza li ġie ddikjarat mill-gvern proviżorju tal-Bangladexx fil-11 ta' Jannar 2007,

–   wara li kkunsidra l-Artikolu 115(5) tar-Regoli ta" Proċedura tiegħu,

A.   billi l-UE għandha relazzjonijiet tajbin u fit-tul mal-Bangladexx, anke permezz tal-Ftehima ta' Koperazzjoni dwar Sħubija u Żvilupp,

B.   billi fil-11 ta' Jannar 2007, fost il-vjolenza fit-tħejjija għall-elezzjoni, il-gvern provviżorju tal-Bangladexx, impona stat ta' emerġenza u ftit wara adotta Regoli ta' Poter ta' Emerġenza, li taw lill-armata u lill-forzi paramilitari l-istess setgħat ta' arrest bħal dawk tal-pulizija; billi l-Missjoni ta' Osservazzjoni ta' l-Elezzjoni ssospendiet l-operazzjonijiet tagħha fit-22 ta' Jannar 2007,

C.   billi l-impożizzjoni ta' Regoli ta' Poter ta' Emerġenza kienu akkumpanjati mis-sospensjoni ta' għadd ta' drittijiet ċivili ggarantiti mill-Kostituzzjoni tal-Bangladexx,

D.   billi s-sospensjoni ta' dawn id-drittijiet wasslet għal numru allarmanti ta' sentenzi mogħtija reċentement mid-Diviżjoni ta' l-Appell tal-Qorti Suprema b'implikazzjonijiet serji għad-drittijiet individwali u għall-prinċipju tal-legalità,

E.   billi fil-11 ta' Ġunju 2008 ġiet adottata Ordinanza ġdida għal Kontra t-Terroriżmu mingħajr parteċipazzjoni tal-pubbliku, li kisret il-libertajiet fundamentali u d-drittijiet bażiċi għal proċess ġust u introduċiet definizzjoni ta' 'atti terroristiċi' wiesgħa biex tinkludi r-reati tal-proprjetà kif ukoll attakki kontra individwi; billi din id-definizzjoni hi kontra r-rakkommandazzjonijiet tan-Nazzjonijiet Uniti; billi organizzazzjonijiet tad-drittijiet tal-bniedem u assoċjazzjonijiet ta' l-avukati esprimew tħassib li din l-ordinanza se tintuża għal skopijiet ta' persekuzzjoni politika,

F.   billi skond organizzazzjonijiet internazzjonali tad-drittijiet tal-bniedem bħal ma huma l-Human Rights Watch u l-Amnesty International in-numru ta' persuni rrappurtati li ġew arrestati, minn meta beda l-istat ta' emergenza 18-il xahar ilu, kiber għal aktar minn 300,000, ħafna minnhom wara ġew meħlusa; billi, minħabba li d-dritt li tapplika għall-ħelsien fuq pleġġ hu ristrett mir-Regoli ta' Poter ta' Emerġenza, l-arresti tal-massa li għaddejjin jistgħu joħolqu pressjoni serja fuq is-sistema tal-ħabs,

G.   billi numru kbir ta' dawk arrestati allegatament kienu ttorturati b'mod sever, u billi ġie rrapurtat minn Odhikar, l-organizzazzjoni nazzjonali tad-drittijiet tal-bniedem tal-Bangladexx, li żdiedu l-inċidenti ta' qtil extra-ġudizzjarju,

H.   billi, b'mod konsistenti, hu sejjaħ għal moratorium dwar il-piena tal-mewt fil-pajjiżi kollha u taħt iċ-ċirkustanzi kollha,

I.   jilqa' b'sodisfazzjon il-fatt li reċentement kienet rilassata l-projbizzjoni fuq l-attivitajiet politiċi, il-ftehima biex il-Gvern u l-Lega Awami jidħlu f'negozjati dwar l-elezzjonijiet nazzjonali ppjanati għal Diċembru 2008 u l-fatt li partijiet oħra se jkunu involuti f'dan il-proċess,

J.   billi waqt il-mewġa ġdida ta' arresti tal-massa, mit-28 ta' Mejju 2008, aktar minn 12,000 persuna kienu arrestati inklużi attivisti tal-partit lokali; billi l-gvern irrifjuta suġġerimenti li l-arresti kienu motivati politikament, waqt li minflok sostna li din kienet tindifa ppjanata kontra l-kriminali,

K.   billi, waqt li jirreferi għall-ħtieġa ta' lista komprensiva ta' votanti, il-gvern provviżorju s'issa injora l-appelli tal-partiti politiċi, ta' organizzazzjonijiet tas-soċjetà ċivili biex iħejji t-triq ħalli jsiru elezzjonijiet nazzjonali bikrija u qed jinsisti fuq it-tielet ġimgħa ta' Diċembru 2008,

L.   billi t-tbatija li qed jiffaċċja l-poplu tal-Bangladexx kienet aggravata mill-fatt li l-prezzijiet ta' oġġetti bażiċi ta' l-ikel bħal ma hu r-ross żdiedu b'terz jew aktar fix-xhur reċenti, u billi għal biċċa l-kbira tal-popolazzjoni l-ispejjeż ta' l-ikel diġà kienu jieħdu 60% tal-baġit tagħhom qabel ma splodew il-prezzijiet,

M.   billi gvern elett jagħmilha aktar faċli li jkunu ffaċċjati l-effetti tal-bidla fil-klima; billi daqs kwart mit-territorju tal-Bangladexx qed jiffaċċja theddida li jispiċċa b'mod permanenti taħt l-ilma minħabba li qed jogħla l-livell tal-baħar fil-bajja ta' Bengal; billi xjentisti tal-klima widdbu li l-Bangladexx jista' jkollu bejn 20 u 25 miljun refuġjat minħabba l-klima sa l-2050,

1.  Jistieden lill-Gvern tal-Bangladexx biex ineħħi l-istat ta' emerġenza bħala l-ewwel pass importanti biex jipprepara ħalli fil-pajjiż isiru l-elezzjonijiet parlamentari li jmiss u sabiex l-elezzjonijiet tal-kunsilli lokali jkunu jistgħu jsiru f'Awissu 2008;

2.  Jistieden lill-Gvern tal-Bangladexx biex jiżgura li l-ordinanza ta' kontra t-terroriżmu l-ġdida ikollha standards legali rikonoxxuti b'mod internazzjonali dwar il-ġlieda kontra t-terroriżmu, bħal dawk rakkomandati mir-Rapporteur Speċjali tan-NU dwar il-promozzjoni u l-protezzjoni tad-drittijiet u l-libertajiet fundamentali filwaqt li jkun miġġieled it-terroriżmu;

3.  Jistieden lill-Gvern tal-Bangladexx biex jneħħi l-piena tal-mewt;

4.  Jistieden lill-Gvern tal-Bangladexx biex immedjatament ma jkomplix bil-mewġa reċenti ta' arresti tal-massa u tal-fastidju ta' l-avversarji politiċi jew ta' ġurnalisti taħt l-istat ta' l-emerġenza u jesprimi t-tħassib tiegħu dwar rapporti ta' tortura mill-awtoritajiet; jistieden lill-gvern biex jiggarantixxi lill-persuni arrestati id-dritt bażiku tagħhom ta' proċess u lil dawk akkużati għal proċess ġust; iħeġġeġ lill-awtoritajiet biex jew jakkużaw lill-eluf ta' persuni arrestati fuq il-bażi ta' evidenza kredibbli jew jeħilsuhom;

5.  Ifaħħar lill-Gvern tal-Bangladexx talli pprojbixxa persuni li qabel kienu kriminali tal-gwerra milli joħorġu għall-elezzjonijiet u jistiednu biex isegwi dan il-pass pożittiv billi jwaqqaf kumitat ta' inkjesta indipendenti ħalli jibda l-proċess kontra l-kriminali tal-gwerra;

6.  Jifraħ lill-gvern provviżorju dwar il-progress li sar fil-preparazzjoni għall-elezzjonijiet parlamentari u li għall-progress essenzjali li għamel bir-riformi tal-proċess elettorali u bit-twaqqif ta' reġistru elettorali preċiż mill-awtoritjiet; jistieden lill-gvern biex jiżgura li l-membri tal-minoritajiet etniċi u reliġjużi tal-Bangladexx ikunu f'pożizzjoni ħielsa li jitfgħu il-vot tagħhom; jsejjaħ għal-libertà ta' l-istampa fil-perjodu ta' qabel l-elezzjoni fil-Bangladexx;

7.  Jilqa' b'sodisfazzjon il-ħelsien tal-Prim Ministru ta' qabel Sheikh Hasina għal raġunijiet umanitarji;

8.  Jistieden lill-Kunsill u lill-Kummissjoni Ewropea sabiex jieħdu rwol aktar proattiv u biex jikkonvinċu lill-Gvern tal-Bangladexx dwar il-ħtieġa li jitneħħa malajr u b'mod komplet l-istat ta' emerġenza u r-regoli kollha adottati taħtu;

9.  Isejjaħ għal elezzjonijiet ħielsa u ġusti li jsiru skond standards internazzjonali, bil-parteċipazzjoni tal-partiti kollha; jistieden lill-missjoni ta' l-UE għall-Osservazzjoni ta' l-Elezzjoni sabiex terġa' tibda l-attivitajiet tagħha malajr kemm jista' jkun għaliex dan hu fattibbli u xieraq; jistieden lill-missjonijiet ta' l-Istati Membri ta' l-UE u lid-Delegazzjoni tal-Kummissjoni fil-Bangladexx biex jissorveljaw sew id-drittijiet tal-bniedem u s-sitwazzjoni politika fil-Bangladexx;

10.  Jitlob biex il-forzi armati jirtiraw mill-involviment tagħhom fil-proċess politiku;

11.  Jistieden lill-Gvern tal-Bangladexx biex jipprovdi kamp ta' applikazzjoni massimu għall-mobilitazzjoni fuq skala kbira tas-sezzjonijiet kollha tas-soċjetà, ta' l-organizzazzjonijiet ambjentali u mhux governattivi, tal-ġurnalisti u x-xjentisti sabiex jipprepara l-pajjiż għad-disastri li se jseħħu minħabba l-bidla fil-klima u jqis il-liġi ta' l-emerġenza bħala ostaklu allarmanti biex jintlaħaq dan il-għan;

12.  Jemmen li s-Samit tal-G8 għandu responsabilità enormi biex jevita aktar aċċellerazzjoni tal-bidla fil-klima u ż-żieda fin-numru ta' katastrofi li qed jheddu l-ħajjiet ta' miljuni ta' nies fil-Bangladexx u f'postijiet oħra billi jadotta miżuri effettivi u estensivi biex inaqqas l-emissjonijiet tas-CO2;

13.  Jagħti istruzzjonijiet lill-President tiegħu sabiex jgħaddi din ir-riżoluzzjoni lill-Kunsill, lill-Kummissjoni, lill-Istati Membri ta' l-Assoċjazzjoni tal-Koperazzjoni Reġjonali tja' l-Ażja t'Isfel u lill-Gvern tal-Bangladexx.

(1) ĠU C 314 E, 21.12.2006, p. 377. (2) Testi Adottati, P6_TA(2007)0385. (3) ĠU L 118, 27.4.2001, p. 48.

Riżoluzzjoni tal-Parlament Ewropew ta' l-10 ta' Lulju 2008 dwar il-piena tal-mewt, b'mod partikulari l-każ ta" Troy Davis

P6_TA(2008)0368 RC-B6-0350/2008

Il-Parlament Ewropew,

-   wara li kkunsidra r-riżoluzzjonijiet preċedenti tiegħu dwar l-abolizzjoni tal-piena tal-mewt u l-ħtieġa ta' moratorju immedjat fuq l-eżekuzzjonijet f'dawk il-pajjiżi fejn il-piena tal-mewt hi imposta,

-   wara li kkunsidra r-Riżoluzzjoni ta" l-Assemblea Ġenerali tan-NU 62/149 tat-18 ta" Diċembru 2007 dwar il-moratorju fuq l-użu tal-piena tal-mewt fid-dinja,

-   wara li kkunsidra l-verżjoni aġġornata u riveduta tal-Linji Gwida ta' l-UE dwar il-Piena tal-Mewt, adottata mill-Kunsill fis-16 ta" Ġunju 2008,

A.   wara li kkunsidra l-każ ta" Troy Davis, li kien ikkundannat għall-mewt mill-Qorti ta" l-Istat ta" Georgia fl-1991 għall-qtil ta" pulizija u ppjanat ikun iġġustizzjat fl-aħħar ta" Lulju 2008,

B.   billi, skond l-avukati tas-Sur Davis, hemm provi abbondanti ta" l-innoċenza tiegħu, qatt ma nstabet evidenza materjali kontra tiegħu u seba" xhieda għall-prosekuzzjoni irritrattaw id-dikjarazzjoni tagħhom,

C.   billi fl-4 ta" Awissu 2007 il-Qorti Suprema ta' Georgia kienet qablet li tikkunsidra mill-ġdid l-elementi l-ġodda li jitfgħu dell fuq il-ħtija tas-Sur Davis,

D.   billi fis-17 ta" Marzu 2008 il-Qorti Suprema ta" Georgia ċaħdet lis-Sur Troy Davis proċess ġdid, filwaqt li l-Prim Imħallef ta' opinjoni kontrarja għal din id-deċiżjoni,

E.   billi mill-1975 aktar minn 120 ruħ inħelsu mill-piena tal-mewt fl-Istati Uniti peress li kienu innoċenti,

F.   billi l-poter tal-maħfra fil-każijiet ta" sentenza kapitali fl-Istati Uniti jeżisti bħala sikurezza minn żbalji irriversibbli li l-qrati ma setgħux jew ma riedux jirranġaw,

G.   billi New Jersey huwa l-ewwel stat ta" l-Istati Uniti li neħħa l-piena kapitali fil-leġiżlazzjoni minn meta l-piena tal-mewt reġgħet iddaħħlet fl-Istati Uniti fl-1972, fejn isemmi r-riskju inevitabbli li jkunu ġġustizzjati dawk ikkundannati inġustament,

1.  Jistieden lil dawk il-pajjiżi fejn tiġi imposta l-piena tal-mewt sabiex jieħdu l-passi meħtieġa biex din tiġi abolita;

2.  Jitlob biex għalhekk il-kundanna tal-mewt titneħħa u biex, fid-dawl ta" evidenza abbondanti li tista" tirrevoka s-sentenza tiegħu, il-qrati rilevanti jippermettu proċess ġdid lil Troy Davis;

3.  Jappella b'mod urġenti lill-Bord ta" l-Istat ta" Georgia dwar il-maħfriet u l-ħelsien biex jibdel il-piena tal-mewt kontra Troy Davis f'waħda inqas ħarxa;

4.  Jistieden lill-Presidenza tal-Kunsill u lid-Delegazzjoni tal-Kummissjoni Ewropea għall-Istati Uniti biex tqajjem b'mod urġenti l-kwistjoni ma" l-awtoritajiet ta" l-Istati Uniti;

5.  Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill u lill-Kummissjoni, u lill-Gvern ta" l-Istati Uniti, lill-Bord ta" l-Istat ta" Georgia dwar il-maħfriet u l-ħelsien u lill-Avukat Ġenerali ta" Georgia.