Il-Parlament Ewropew,

–  wara li kkunsidra l-Artikolu 103(2) tar-Regoli ta' Proċedura tiegħu,

A.  billi fit-3 ta' Novembru 2007 l-President Pervez Musharraf, fil-kapaċità tiegħu tal-Kap ta' l-Istaff ta' l-Armata, iddikjara stat ta' emerġenza, issospenda l-kostituzzjoni u ppromulga Ordni Kostituzzjonali Proviżorja (PCO),

B.  billi din il-mossa saret ftit qabel is-sentenza mistennija mill-Qorti Suprema dwar il-legalità tat-tielet perjodu ta' presidenza l-ġdid tal-President li xorta baqa' l-kap tal-forzi armati, u billi bosta avukati u ċittadini mħassbin rreaġixxew billi ħarġu jipprotestaw fit-toroq, u eluf minnhom ġew imsawta b'mod brutali u arrestati,

C.  billi seba' membri tal-Qorti Suprema stqarrew li l-PCO tmur kontra l-kostituzzjoni; billi taħt din it-tmexxija ta' emerġenza, id-drittijiet fundamentali taċ-ċittadini - bħad-dritt għas-sigurtà tal-persuna, id-dritt għal-libertà mill-arrest arbitrarju u d-detenzjoni, kif ukoll id-dritt tal-moviment, ta' l-assemblea, ta' l-assoċjazzjoni u tal-kelma - huma sospiżi,

D.  billi l-PCO tipprojbixxi lil kwalunkwe qorti li toħroġ xi ordni kontra l-President, il-Prim Ministru jew kwalunkwe persuna li teżerċita s-setgħa taħt l-awtorità tagħhom u tissospendi b'mod effettiv lill-membri tal-ġudikatura għolja sakemm dawn jieħdu ġurament ġdid li jiddefendu l-PCO; billi 55 mis-97 imħallef tal-Qorti Suprema u l-erba' qrati għoljin irrifjutaw li jieħdu dan il-ġurament,

E.  billi l-iżjed membri superjuri influwenti tal-ġudikatura tpoġġew taħt arrest domiċiljarju, notevolment il-Prim Imħallef Iftikar Chaudhry, il-President tal-Kamra ta' l-Avukati tal-Qorti Suprema Aitzaz Aksan, kif ukoll bosta attivisti favur id-drittijiet tal-bniedem, inkluż Asma Jahangir, ir-Rappreżentant Speċjali tan-Nazzjonijiet Uniti dwar il-Libertà Reliġjuża u attivisti politiċi;

F.  billi fl-4 ta' Novembru 2007 sar rejd mill-pulizija fl-uffiċċju tal-Kummissjoni tad-Drittijiet tal-Bniedem tal-Pakistan u ġew arrestati iżjed minn 50 attivist favur id-drittijiet tal-bniedem;

G.  billi l-gvern ħareġ ukoll l-ordinanza dwar l-Awtorità Regolatorja tal-Midja Elettronika tal-Pakistan (PEMRA) li tipprojbixxi lill-ġurnalisti milli jikkritikaw lill-kap ta' l-istat, lill-militar u lill-ġudikatura u li tillimita d-drittijiet ta' l-istazzjonijiet tat-televiżjoni privati,

H.  billi Benazir Bhutto, l-iżjed mexxeja prominenti ta' l-oppożizzjoni, tpoġġiet taħt arrest domiċiljarju għal bosta sigħat, u billi r-ràli ta' protesta tal-partit tagħha ġiet ipprojbita,

I.  billi l-perjodi parlamentari ta' l-assemblei federali u provinċjali jiskadu fil-15 ta' Novembru 2007 u l-President Musharraf ħabbar it-twaqqif ta' gvern temporanju u reġa' kkonferma l-5 ta' Jannar 2008 bħala d-data ta' l-elezzjoni;

J.  billi l-eżenzjoni parlamentari speċjali għall-President Musharraf li tippermettilu li jżomm ir-rwol doppju tiegħu bħala president u kap ta' l-armata jiskadi wkoll fil-15 ta' Novembru 2007,

1.  Jesprimi t-tħassib gravi tiegħu dwar l-irġigħ lura serju ta' l-istat tad-dritt u tad-demokrazija fil-Pakistan, li mhux biss ifixkel l-aspirazzjonijiet tal-poplu tal-Pakistan għall-paċi u l-iżvilupp, iżda jipperikola wkoll is-sigurtà tal-ħażna ta' l-armi nukleari tiegħu u l-istabilità fir-reġjun kollu;

2.  Jiddispjaċih għall-fatt li l-President Musharraf qiegħed jirriskja li jikkomprometti l-progress ċar li għamel il-Pakistan f'dawn l-aħħar snin f'dak li għandu x'jaqsam ma' l-indipendenza tal-ġudikatura u mal-libertà ta' l-istampa;

3.  Jistieden lill-President Musharraf biex:

4.  Jistieden lill-awtoritajiet tal-Pakistan biex iwaqqfu l-arresti arbitrarji u d-detenzjonijiet u biex jiżguraw li ħadd ma jkun soġġett għat-tortura jew għal trattament jew kastigi degradanti jew inumani; jitlob għall-ħelsien immedjat u bla kundizzjonijiet ta' dawk kollha li ġew arrestati sempliċiment għax eżerċitaw id-drittijiet tagħhom tal-libertà, ta' l-assoċjazzjoni u ta' l-assemblea;

5.  Jilqa' b'sodisfazzjon it-tħabbira tal-President Musharraf li se jinħoloq gvern temporanju u l-konferma li d-data ffissata tal-5 ta' Jannar għall-elezzjonijiet parlamentari se tkun rispettata;

6.  Jinsisti li l-mexxejja tal-partiti għandhom jitħallew jikkontestaw għal dawn l-elezzjonijiet, inkluż l-ex Prim Ministru Nawaz Sharif;

7.  Jistieden lill-Kunsill u lill-Kummissjoni biex jimponu projbizzjonijiet fuq l-ivjaġġar għall-membru tal-gvern, ġenerali u uffiċjali għoljin sakemm titneħħa t-tmexxija ta' emerġenza;

8.  Jistieden lill-Istati Membri ta' l-UE biex iwaqqfu kompletament il-bejgħ ta' l-armi lill-Pakistan u l-koperazzjoni militari miegħu sakemm jiddaħħlu lura l-istat tad-dritt u d-demokrazija fil-pajjiż;

9.  Jistieden lill-UE u lill-Istati Membri, biex hekk kif jiġu stabbiliti mill-ġdid l-istat tad-dritt u d-demokrazija, iżidu l-għajnuna lill-Pakistan u iċaqalquha mill-miżuri ta' kontra t-terroriżmu għall-edukazzjoni, is-saħħa, it-tisħiħ tas-setgħat tan-nisa u l-ħolqien ta' l-impjiegi;

10.  Jagħti struzzjonijiet lill-President tiegħu sabiex jgħaddi din ir-riżoluzzjoni lill-Kunsill, lill-Kummissjoni, u lill-Gvern tal-Pakistan.