Il-Parlament Ewropew,

–   wara li kkunsidra r-riżoluzzjoni 1970(2011), tal-Kunsill tas-Sigurtà tan-Nazzjonijiet Uniti (NU), tas-26 ta' Frar 2011,

–   wara li kkunsidra d-deċiżjoni tal-Kunsill tat-28 ta' Frar li timplimenta r-riżoluzzjoni tal-KSNU u li timponi miżuri restrittivi addizzjonali kontra dawk responsabbli għall-azzjonijiet vjolenti fil-konfront tal-popolazzjoni ċivili,

–   wara li kkunsidra s-sospensjoni, fit-22 ta' Frar, tan-negozjati dwar il-Ftehim ta' Qafas bejn l-UE u l-Libja,

–   wara li kkunsidra d-dikjarazzjonijiet riċenti mir-Rappreżentat Għoli/Viċi President Catherine Ashton dwar il-Libja (20 ta' Frar, 23 ta' Frar, 26 ta' Frar, 27 ta' Frar),

–   wara li kkunsidra d-diskors li għamel Štefan Füle- Il-Kummissarju Ewropew għat-Tkabbir u l-Politika tal-Viċinat, dwar avvenimenti li seħħew dan l-aħħar fl-Afrika ta' Fuq, fil-Kumitat għall-Affarijiet Barranin tal-Parlament Ewropew fi Brussell, fit-28 ta' Frar 2011(1),

–   wara li kkunsidra l-Artikolu 110(2) tar-Regoli ta' Proċedura tiegħu,

A. billi d-dimostrazzjonijiet riċenti f’diversi pajjiżi Għarab fl-Afrika ta’ Fuq u fil-Lvant Nofsani talbu t-tneħħija ta' reġimi awtoritarji u riformi politiċi, ekonomiċi u soċjali u talbu għal-libertà, id-demokrazija u kundizzjonijiet ta’ għajxien aħjar għaċ-ċittadini,

B.  billi mill-15 ta' Frar, il-protesti kontra r-reġim Libjan, li fil-bidu kienu paċifiċi, kienu soġġetti għal attakki ta' vjolenza straordinarja; billi l-Kurunell Gaddafi uża l-forzi armati u milizji tal-Libja biex iwaqqaf il-protesti b'mod vjolenti, anke bl-użu indiskriminatorju ta' armi tan-nar awtomatiċi, suldati mħarrġa biex jisparaw mill-bogħod u ajruplani militari, kontra ċ-ċittadini; billi dan irriżulta f'numru ta' vittmi li qed jiżdied b'rata mgħaġġla ħafna u fejn numru kbir ta' nies indarbu u ġew arrestati,

C. billi wara ġranet sħaħ ta' kunflitti vjolenti bejn id-dimostranti u l-forzi tal-gvern, id-dimostranti issa rnexxielhom jieħdu l-kontroll ta' diversi bliet importanti, inkluża l-belt ta' Bengażi; billi wara li lliberaw il-parti tal-Lvant tal-pajjiż, d-dimostranti li jopponu lill-mexxej Muammar Gaddafi qegħdin jersqu lejn il-kapital Tripoli fejn il-ġlied għadu għaddej,

D. billi l-forzi li jopponu lir-reġim ta' Gaddafi ħadu l-kontroll tal-biċċa l-kbira tal-kampi tal-gass u ż-żejt, u billi sanzjonijiet tal-enerġija kontra l-Libja, għalhekk, se jmorru kontra l-iskop tagħhom,

E.  billi skont l-Uffiċċju tal-Kummissarju Għoli tan-Nazzjonijiet Uniti għar-Rifuġjati, f'dawn l-aħħar jiem aktar minn 140,000 persuna ħarbu lejn pajjiżi ġirien (b'mod partikolari l-Eġittu u t-Tuneżija) u diversi eluf weħlu fil-fruntieri u jeħtieġu għajnuna fil-pront; billi dan iwassal għal sitwazzjoni ta' emerġenza umanitarja li timplika azzjoni fil-pront min-naħa tal-UE,

F.  billi skont ir-riżoluzzjoni tal-Kunsill tas-Sigurtà tan-Nazzjonijiet Uniti (KSNU) 1970 (2011) l-attakki sistematiċi u ġeneralizzati mwettqa mil-Libja kontra ċ-ċittadini jistgħu jirrappreżentaw delitti kontra l-umanità,

G. billi permezz tar-Riżoluzzjoni 1970(2011) tas-26 ta' Frar, il-Kunsill tas-Sigurtà tan-Nazzjonijiet Uniti waqt li aġixxa skont il-Kapitolu VII tal-Karta, impona embargo fuq l-armi u adotta sanzjonijiet kontra Muammar Gaddafi u l-persuni responsabbli għar-ripressjoni, filwaqt li rrefera s-sitwazzjoni lill-Qorti Kriminali Internazzjonali,

H. billi mit-22 ta' Frar, l-UE ssospendiet n-negozjati li kienu għaddejjin dwar il-Ftehim ta' Qafas bejn l-UE u l-Libja u l-kuntratti ta' kooperazzjoni kollha mal-Libja; billi fit-28 ta' Frar il-Kunsill tal-UE adotta miżuri restrittivi addizzjonali fil-konfront tal-Libja,

I.   billi l-libertà tal-espressjoni u d-dritt għal għaqda flimkien b'mod paċifiku huma drittijiet tal-bniedem inaljenabbli li għandhom jiġu rispettati u protetti,

J.   billi, hekk kif r-rewwixta tkompli, is-sitwazzjoni umanitarja fil-Libja qiegħda tiddeġenera fejn provvisti mediċi, flimkien ma' fjuwil u ikel, qegħdin isiru aktar skarsi billi skont l-Aġenzija tan-Nazzjonijiet Uniti għar-rifuġjati, aktar minn 140,000 persuna ħarbu mil-Libja lejn it-Tuneżija u l-Eġittu li huma pajjiżi ġirien,

K. billi l-fluss tal-massa u kontinwu ta' persuni spostati wassal ukoll għal sitwazzjonijiet drammatiċi fil-qasam tas-saħħa, u l-interventi umanitarji li ġew mobilizzati minn xi Stati Membri huma rispons effikaċi għall-bżonnijiet tal-popolazzjoni affettwata,

L.  billi l-UE għandha interess kruċjali f'Afrika ta' Fuq demokratika, stabbli, prosperuża u paċifika,

M. billi l-protesti tal-massa f'għadd kbir ta' pajjiżi Għarab urew li reġimi awtoritarji li ma jħaddnux id-demokrazija ma jistgħux jiżguraw l-istabbiltà u li l-valuri demokratiċi ma jistgħux jinfirdu minn sħubijiet ekonomiċi u politiċi,

1.  Jesprimi s-solidarjetà tiegħu mal-poplu Libjan, u b'mod partikolari maż-żgħażagħ Libjani li qegħdin iservu ta' mutur għad-demokrazija u biex issir bidla fir-reġim, u jesprimi s-sostenn tiegħu għall-aspirazzjonijiet demokratiċi, ekonomiċi u soċjali leġittimi tagħhom, jikkundanna bl-aktar mod qawwi l-ksur sfaċċat u sistematiku tad-drittijiet tal-bniedem fil-Libja, u b'mod partikolari r-ripressjoni vjolenti tad-dimostranti mir-reġim ta' Gaddafi, u tal-ġurnalisti u d-difensuri tad-drittijiet tal-bniedem, li lkoll huma paċifiċi u favur id-demokrazija;

2.  Jikkundanna bil-qawwa l-użu intenzjonat u sproporzjonat tal-forza u juri dispjaċir profond għan-numru konsiderevoli ta' mwiet u għan-numru għoli ta' nies li ndarbu; jesprimi l-kondoljanzi tiegħu mal-familji tal-vittmi;

3.  Jitlob għalhekk għaż-żarmar immedjat tar-reġim brutali u dittatorjali tal-Kurunell Gaddafi u jitlob lill-istess Gaddafi biex iċedi immedjatament sabiex ma jkunx hemm aktar tixrid tad-demm u biex transizzjoni politika paċifika, tkun tista' sseħħ; jistieden lill-awtoritajiet Libjani biex iwaqqfu immedjatament il-vjolenza biex tkun tista' tinstab soluzzjoni paċifika għas-sitwazzjoni li tissodisfa l-aspettattivi leġittimi tal-poplu Libjan; jistieden lill-awtoritajiet Libjani jirrispettaw id-drittijiet tal-bniedem u l-liġi umanitarja internazzjonali, ineħħu kull restrizzjoni kontra l-libertà tal-espressjoni, anke permezz tal-internet, u jagħtu aċċess immedjat lill-osservaturi indipendenti tad-drittijiet tal-bniedem u lill-midja barranija;

4.  Jistieden lill-UE u lill-komunità internazzjonali biex jieħdu kull miżura possibbli biex jiżolaw kompletament lil Gaddafi u lir-reġim tiegħu kemm fil-livell nazzjonali kif ukoll f'dak internazzjonali;

5.  Jitlob biex kumitat ta' investigazzjoni internazzjonali indipendenti jinvestiga l-inċidenti li wasslu għall-imwiet, għall-korrimenti u għall-arresti matul l-avvenimenti li seħħew fil-Libja mill-15 ta' Frar; jenfasizza li dawk responsabbli għall-attakki kontra ċ-ċittadini huma individwalment responsabbli għal delitti kriminali f'għajnejn il-liġi internazzjonali, u għandha ssir ġustizzja minnhom u ma jista' jkun hemm l-ebda impunità; jilqa', f'dan ir-rigward, l-fatt li l-KSNU rrefera s-sitwazzjoni fil-Libja lill-Qorti Kriminali Internazzjonali u jistieden lill-Istati Membri biex jikkooperaw mal-Qorti u mal-Prosekutur tagħha ħalli ssir ġustizzja fil-pront;

6.  Jilqa' r-riżoluzzjoni tal-Assemblea Ġenerali tan-NU tal-1 ta' Marzu 2011 li tissospendi d-drittijiet ta' sħubija tal-Libja fil-Kunsill tan-NU għad-Drittijiet tal-Bniedem. Din is-sħubija, mill-bidu nett, kienet paradoss, speċjalment fid-dawl tal-ksur sistematiku tad-drittijiet tal-bniedem imwettaq fil-Libja;

7.  Huwa tal-fehma li l-gravità tas-sitwazzjoni fil-Libja teħtieġ azzjoni determinata u miftiehma mill-komunità internazzjonali; jilqa' għalhekk l-adozzjoni tar-Riżoluzzjoni 1970 (2011) mill-KSNU li timponi embargo fuq l-armi, tiffriża l-beni, u tiċħad il-ħruġ ta' viża f'isem Muammar Gaddafi jew f'isem persuni oħra involuti fir-ripressjoni vjolenti tal-protesti; jieħu nota li l-UE kienet l-ewwel li implimentat is-sanzjonijiet deċiżi mill-KSNU u li l-miżuri tal-UE imorru lil hinn minnhom, u jimponi sanzjonijiet awtonomi; jilqa' għalhekk d-deċżijoni tal-Kunsill li tipprojbixxi kull kummerċ mal-Libja ta' tagħmir li jista' jintuża fir-ripressjoni interna, kif ukoll l-estensjoni tal-lista ta' persuni soġġetti għal iffriżar tal-beni u ċ-ċaħda li toħroġ viża f'ismihom;

8.  Jesprimi tħassib profond li s-sitwazzjoni fil-Libja li qed tiddeġenera tista' twassal għal spustjar straordinarju ta' persuni li qegħdin jaħarbu kemm lejn il-fruntiera tat-Tuneżija kif ukoll lejn dik tal-Eġittu u l-Ewropa;

9.  Jistieden lill-Kummissjoni Ewropea u lill-aġenzija Frontex biex jiżguraw li l-miżuri kollha meħtieġa, li jinkludu riżorsi finanzjarji, umani u tekniċi adegwati, ikunu stabbiliti biex jiżguraw li l-UE tkun tista' tagħti rispons xieraq fil-każ ta' moviment migratorju tal-massa, b'konformità mal-Artikolu 80 tat-TFUE;

10. Jitlob biex l-effikaċja tas-sanzjonijiet tkun valutata b'mod kostanti; jilqa' f'dak il-kuntest id-diskussjonijiet dwar sanzjonijiet ulterjuri tal-UE li jinkludu wkoll l-iffriżar tal-assi ta' kumpaniji Libjani li għandhom xi rabta mar-reġim ta' Gaddafi;

11. Jistieden lir-Rappreżentant Għoli/Viċi President u lill-Istati Membri biex ikomplu jissorveljaw mill-qrib is-sitwazzjoni u biex jagħmlu preparazzjonijiet biex ikunu lesti li jadottaw, b'kooperazzjoni mill-qrib man-NU, miżuri aktar ibsin, li jinkludu żoni ħielsa minn kull titjira u possibbilment miżuri militari oħra, biex ma jibqax ikun hemm tixrid tad-demm u biex ir-reġim ta' Gaddaffi jispiċċa iżolat għalkollox;

12. Jinsab profondament imħasseb bis-sitwazzjoni umanitarja fil-Libja li qed tiddeġenera, kif ukoll bis-sitwazzjoni tar-rfuġjati li jinsabu fil-fruntieri tagħha u madwarhom; jenfasizza li eluf ta' persuni weħlu fuq in-naħa Libjana tal-fruntiera mal-Eġittu u t-Tuneżija u ma ngħatawx id-dritt li jaqsmu, u għaldaqstanat dan qed iwassal għal sitwazzjoni ta' emerġenza umanitarja; jistieden lill-awtoritajiet Libjani tal-preżent u tal-ġejjieni biex jagħtu aċċess lill-organizzazzjonijiet umanitarji u jiggarantixxu s-sikurezza tal-persunal umanitarju; jenfasizza li l-UE għandha tevalwa b'urġenza l-bżonnijiet umanitarji fil-Libja u fil-pajjiżi ġirien u timmobilizza fil-pront l-għajnuna finanzjarja u umanitarja kollha meħtieġa; jilqa' l-miżuri li ttieħdu u l-fondi li ġew allokati s'issa mill-Kummissarju Georgieva u minn ECHOM kif ukoll l-għajnuna umanitarja pprovduta minn xi Stati Membri biex din l-isfida tiġi indirizzata;

13. Jilqa' t-tlaqqigħ fil-11 ta' Marzu, ta' Kunsill Ewropew straordinarju dwar l-iżviluppi fil-Libja u fil-Viċinat tan-Nofsinhar; jistieden lir-Rappreżentatnt Għoli/Viċi President u lill-Istati Membri biex ifasslu strateġija komprensiva u koerenti għar-rispons umanitarju u politiku għas-sitwazzjoni f'dan il-pajjiż;

14. Jistieden lill-UE biex tieħu rwol ewlieni anke fl-iżvilupp fit-tul politiku, ekonomiku u soċjali tal-Libja; jiltob f'dan il-kunstest li għandha tingħata prijorità lill-għajnuna għall-ħolqien ta’ istituzzjonijiet u għar-riformi li jippromwovu d-drittijiet tal-bniedem, l-istat tad-dritt, governanza tajba u pluralistika, u Libja paċifika u demokratika; jitlob lir-Rappreżentat Għoli/Viċi President tal-Kummissjoni Ewropea biex tuża bis-sħiħ l-istrumenti finanzjarji esterni rilevanti kollha tal-UE;

15. Jistieden f'dan il-kuntest lill-UE biex tmantni djalogu permanenti mal-oppożizzjoni Libjana;

16. Huwa tal-fehma li l-bidliet rivoluzzjonarji li qed iseħħu fl-Afrika ta' Fuq u fil-Lvant Nofsani wrew biċ-ċar li l-impatt pożittiv u l-kredibbiltà fit-tul tal-UE f'dak ir-reġjun se jiddependu fuq kemm hi kapaċi twettaq politika komuni barranija koeżiva li hija bbażata fuq il-valuri u li se xxaqleb b'mod ċar lejn il-forzi demokratiċi ġodda; itenni t-talba tiegħu biex l-UE teżamina mill-ġdid il-politika tagħha għas-sostenn tad-demokrazija u tad-drittijiet tal-bniedem sabiex toħloq mekkaniżmu ta' implimentazzjoni għall-klawsola dwar id-drittijiet tal-bniedem fil-ftehimiet kollha ma' pajjiżi terzi;

17. Itenni t-talba tiegħu li jkun assoċjat fil-qrib mal-ħidma tat-Task force li twaqqaf biex jikkoordina r-rispons tal-UE għall-kriżi fil-Libja u f'pajjiżi oħra fir-reġjun Mediterran;

18. Jenfasizza darb'oħra li l-avvenimenti li seħħew fil-Libja, u f’pajjiżi oħra fir-reġjun, jitfgħu dawl fuq il-ħtieġa urġenti li jiġu żviluppati politiki u strumenti aktar ambizzjużi u effikaċi biex iħeġġu u jsostnu riformi politiċi, ekonomiċi u soċjali fil-pajjiżi ġirien tan-Nofsinhar tal-UE; jenfasizza li r-Rieżami Strateġiku kontinwu tal-Politika Ewropea tal-Viċinat għandu jirrifletti żviluppi attwali fir-reġjun u għandu joħroġ b’metodi ġodda mtejba biex jissodisfa l-ħtiġijiet u l-aspirazzjonijiet tal-poplu; jinsisti li r-rieżami tal-politika tal-viċinat irid jagħti prijorità lill-kriterji marbuta mal-indipendenza tal-ġudikatura, mar-rispett tal-libertajiet fundamentali, mal-pluraliżmu u l-libertà tal-istampa u l-ġlieda kontra l-korruzzjoni; jitlob għal koordinazzjoni aħjar mal-politiki l-oħra tal-Unjoni fir-rigward ta’ dawn il-pajjiżi;

19. Huwa tal-fehma li l-Unjoni għall-Mediterran għandha tadatta għall-epoka ġdida u għaċ-ċirkostanzi l-ġodda u għandha tirrifletti dwar l-avvenimenti riċenti u taġixxi fil-konfront tagħhom sabiex tressaq proposti dwar kif l-aħjar tippromwovi d-demokrazija u d-drittijiet tal-bniedem fl-Istati Membri tagħha u fir-reġjun, inkluża l-Libja, u dwar ir-riformi possibbli li jsaħħu r-rwol tagħha stess u tagħmlu koerenti u aktar effikaċi;

20. Iqis li l-ġlieda kontra l-korruzzjoni u t-tisħiħ tal-istat tad-dritt f’pajjiżi terzi huma kriterji fundamentali biex jintlaqgħu l-aspettattivi tal-poplu kif ukoll biex jiġi attirat l-investiment barrani;

21. Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill, lill-Kummissjoni, lir-Rappreżentant Għoli, lill-gvernijiet u lill-parlamenti tal-Istati Membri, lill-Assemblea Parlamentari tal-Unjoni għall-Mediterran u lill-awtoritajiet u lill-oppożizzjoni Libjani.

(1) http://europa.eu/rapid/pressReleasesAction.do?reference=SPEECH/11/130&language=en