Fit-28 ta' Ġunju l-Kummissjoni ppreżentat rapport dwar is-sitwazzjoni tas-settur tal-frott iż-żgħir u taċ-ċirasa li huma maħsuba għall-ipproċessar (KOM(2006)0345 fin.). Ir-rapport jikkonferma dak li diġa huwa magħruf dwar is-sitwazzjoni kurrenti u jindika li s-suq tal-frott iż-żgħir għaddej minn kriżi dejjiema. Din il-kriżi taffettwa l-aktar lill-Istati Membri l-ġodda speċjalment il-Polonja, u l-konsegwenzi negattivi tagħha fir-reġjuni l-aktar foqra ta' l-UE huma konsiderevoli. Għalkemm il-Parlament emfasiżża repetutament l-importanza ta' din il-problema, il-Kummissjoni għadha ma ħaditx il-passi neċessarji sabiex tissolva din il-kriżi. Jogħġobha l-Kummissjoni tindika liema miżuri taħseb li tieħu sabiex: 

titnaqqas l-importazzjoni, minn pajjiżi terzi, ta' frott żgħir maħsub biex ikun proċessat, partikolarment billi twaqqaf il-prattiċi ta' 'dumping' li huma karatteristika ta' ċertu importazzjonijiet? 

tintroduċi mekkaniżmu ta' appoġġ għall-gruppi u l-organizzazzjonijiet tal-produtturi maħsub speċifikament għas-sitwazzjoni ta' l-Istati Membri l-ġodda? 

tiffaċilita l-kisba ta' kumpens għal danni magħmula minn kundizzjonijiet tat-temp mhux favorevoli; 

tagħti l-possibilità lill-bdiewa li jiksbu kumpens għal prodotti tar-raba' li jiġu abbandunati fil-każ ta' sitwazzjoni diffiċli mhux mistennija riżultat ta' eċċess tal-provvista fis-suq? 

tistieden lill-Istati Membri sabiex jintroduċu inċentivi finanzjarji għall-qirda ta' l-impjanti ta' frott żgħir fil-każ ta' sitwazzjoni ta' provvista eċċessiva fis-suq? 

tħoll il-fondi għall-promozzjoni u l-konsum ta' frott żgħir fl-UE?