b'rakkomandazzjonijiet lill-Kummissjoni dwar l-aċċess għat-testi ta' l-istituzzjonijiet

(2004/2125(INI))

Il-Parlament Ewropew,

–   wara li kkunsidra l-Artikolu 192, paragrafu 2, tat-Trattat KE,

–   wara li kkunsidra r-Regoli 39 u 45 tar-Regoli ta' Proċedura tiegħu,

–   wara li kkunsidra r-rapporti ta' l-Istituzzjonijiet dwar l-implimentazzjoni tar-Regolament (KE) Nru 1049/2001 tat-30 ta' Mejju 2001 rigward l-aċċess pubbliku għad-dokumenti tal-Parlament Ewropew, tal-Kunsill u tal-Kummissjoni u, b'mod partikolari, għall-ewwel rapport trijennali tal-Kummissjoni dwar l-implimentazzjoni, kif stipulat fl-Artikolu 17(2) ta' dak ir-Regolament,

–   wara li kkunsidra r-rapport tal-Kumitat għal-Libertajiet Ċivili, il-Ġustizzja u l-Intern (A6-0052/2006),

A. billi mir-ratifika tat-Trattat ta' Amsterdam u d-dħul fis-seħħ ta' l-Artikolu 255 tat-Trattat li jistabbilixxi l-Komunità Ewropea (TEC), it-trasparenza saret prinċipju fundamentali ta' l-Unjoni Ewropea, li l-għanijiet tagħha għandhom isaħħu n-natura demokratika ta' l-istituzzjonijiet Ewropej, jippermettu ċ-ċittadini biex jipparteċipaw iżjed mill-qrib fil-proċessi għat-teħid tad-deċiżjonijiet, jippermettu li l-amministrazzjonijiet pubbliċi jgawdu leġittimità ikbar billi jkunu iżjed effettivi u jagħtu kont ikbar liċ-ċittadini, u finalment, jagħtu lok għal problemi u żbalji biex jiġu identifikati f'manjiera iżjed f'waqtha,

B.  billi Regolament (KE) Nru 1049/2001 jimplimenta biss parzjalment l-Artikolu 255TEC, f'dak li għandu x'jaqsam ma':

- id-definizzjoni impliċita tiegħu ta' l-attività leġiżlattiva (l-Artikolu 12) hija ġenerali wisq u tista' toħloq konfużjoni b'attivitajiet ta' natura amministrattiva; barra minn hekk, ir-Regolament ma jipprevedix li leġiżlazzjoni għandha tkun dibattibbli u adottata fil-pubbliku mill-Kunsill u l-Parlament jew li, flimkien ma' inizjattivi leġiżlattivi, emendi li jiġu ppreżentati lill-Istati Membri għandhom ukoll ikunu immedjatament aċċessibbli; bl-istess mod, kull dokument leġiżlattiv preparatorju għandu wkoll ikun aċċessibbli (mingħajr ma jingħata kas jekk kienx imħejji mis-servizzi legali ta' l-istituzzjonijiet) sabiex id-deċiżjonijiet ikunu jistgħu jittieħdu b'mod ugwali u b'koperazzjoni leali mill-Parlament, mill-Kunsill u mill-Kummissjoni bl-għarfien sħiħ tal-qasam li jrid jiġi rregolat; barra minn hekk, għad m'hemmx għarfien komuni tal-ħtiġijiet rigward il-pubblikazzjoni ta' testi leġiżlattivi fil-Ġurnal Uffiċjali jew fil-mod kif il-Ġurnal għandu jiġi organizzat (per eżempju, fejn jikkonċerna l-edizzjoni elettronika),

- m'hemmx regoli ċari dwar: aċċess għad-dokumenti ta' natura amministrattiva; l-hekk imsemmi "żmien għal riflessjoni"; abbozzar aħjar; l-għoti ta' informazzjoni liċ-ċittadini tal-proċedura li trid tiġi segwita minn kull istituzzjoni involuta; regoli komuni għall-arkivjar ta' dokumenti, jew aċċess privileġġjat minn persuni b'drittijiet speċifiċi għal aċċess,

- huwa ċar li hemm bżonn li jiġu definiti ċ-ċirkustanzi li fihom jistgħu jiġu klassifikati dokumenti speċifiċi, kompletament jew parti minnhom, bħala kunfidenzjali u għal regoli li jkollhom bżonn klassifikazzjonijiet bħal dawn biex jiġu riveduti regolarment; barra minn hekk, li l-Parlament Ewropew m'għandux bażi legali ċara għall-aċċess ta' informazzjoni kklassifikata ta' l-UE, l-aktar fejn aċċess bħal dan huwa wkoll ipprojbit jew limitat għall-parlamenti nazzjonali, imur kontra l-prinċipju demokratiku li fuqu twaqqfet l-Unjoni; għandha wkoll issir dispożizzjoni biex pajjiżi terzi jew organizzazzjonijiet internazzjonali ma jkunux jistgħu jipprojbixxu l-Kunsill jew il-Kummissjoni milli jagħtu aċċess lill-Parlament għal informazzjoni klassifikata,

- is-sistema amministrattiva (ir-reġistri ta' l-Istituzzjonijiet, id-'databases' u applikazzjonijiet oħra ta' l-IT) għadha f'fażi esperimentali u m'hemmx approċċ komuni mit-tliet istituzzjonijiet; anki rigward proċeduri interistituzzjonali, għad m'hemmx għarfien komuni fost l-Istituzzjonijiet dwar kif jimmaniġjaw, jaqsmu bejniethom, u jarkivjaw it-tipi varji ta' dokumenti; għalkemm sar xi titjib, xorta hemm nuqqas ċar ta' koordinazzjoni bejn l-istituzzjonijiet, l-aktar fir-rigward ta' dokumenti li għandhom x'jaqsmu ma' proċeduri interistituzzjonali, li b'riżultat ta' dan mhumiex biss iċ-ċittadini normali li jħossuhom mitlufa imma wkoll il-professjonisti, ir-riċerkaturi u l-parlamenti nazzjonali,

C. billi, anki jekk saret dispożizzjoni fir-Regolament (KE) Nru 1049/2001 għar-reviżjoni tiegħu wara tliet snin, u minbarra l-fatt li l-Parlament talab ħafna drabi lill-Kummissjoni biex ittejjeb u ssaħħaħ il-leġiżlazzjoni Komunitarja dwar it-trasparenza, mhi qed issir l-ebda proposta skond l-Artikolu 39(2) tar-Regoli ta' Proċedura tal-Parlament,

D. billi l-problemi fl-applikazzjoni tar-Regolament (KE) Nru 1049/01 ġew sa ċertu punt marbuta ma' implimentazzjoni mhux adegwata; filwaqt li l-ġurisprudenza tal-Qorti tal-Ġustizzja wriet ukoll il-bżonn li jiġu żviluppati u ċċarati ftit mid-dispożizzjonijiet tar-Regolament, b'mod partikolari dawk li jikkonċernaw dokumenti magħmula mill-Istati Membri u partijiet terzi u l-eċċezzjonijiet għal investigazzjonijiet, parir legali u "ż-żmien għal riflessjoni",

E.   billi negozjati trasparenti u miftuħa u kooperazzjoni leali bejn l-istituzzjonijiet huma mezz aħjar min-negozjati sigrieta fil-Kunsill, biex tiġi żgurata l-effettività tal-proċeduri għat-teħid tad-deċiżjonijiet imsemmija fl-Artikolu 207 tat-Trattat KE; għalhekk, b'dispjaċir li, fil-Konklużjonijiet tiegħu tat-22 ta' Diċembru 2005, il-Kunsill għażel li ma jemendax ir-regoli ta' proċedura tiegħu u ma jkollux dibattiti trasparenti f'livell ministerjali waqt il-proċedura leġiżlattiva,

1.  Jitlob lill-Kummissjoni biex fl-2006 tippreżenta lill-Parlament, fuq il-bażi ta' l-Artikolu 255 TEC, proposta leġiżlattiva dwar "id-dritt għal aċċess għad-dokumenti tal-Parlament Ewropew, tal-Kunsill u tal-Kummissjoni, u prinċipji ġenerali u limiti fuq il-bażi ta' interessi pubbliċi jew privati li jirregolaw dan id-dritt għal aċċess", li għandha tiġi ppreparata fid-diskussjonijiet interistituzzjonali u ssegwi r-rakkomandazzjonijiet iddettaljati mniżżla hawn taħt;

2.  Jikkonferma li r-rakkomandazzjonijiet t'hawn taħt jirrispettaw il-prinċipju tas-sussidjarjetà, id-drittijiet fundamentali taċ-ċittadini, il-ġurisprudenza ta' l-ECHR, b'mod partikolari dik dwar l-Artikolu 8, u l-Artikoli 7 u 8 tal-Karta dwar id-Drittijiet Fundamentali;

3. Jikkunsidra li l-implikazzjonijiet tal-proposta rikjesta trid tkun koperta mill-baġits għat-tħaddim ta' l-istituzzjonijiet għax l-eżiġenzi tat-trasparenza li ma jkunux maqsumin minn dik relatata mal-formazzjoni l-adozzjoni u l-pubblikazzjoni tat-testi fejn l-istituzzjonijiet huma l-awturi jew id-destinatarji".

4. Jisħaq li kwalunkwe regola ġdida dwar l-aċċess għad-dokumenti għandu japplika sa mid-data tad-dħul fis-seħħ tar-Regolament emendat u għalhekk m'għandux ikollu effetti retroattivi

5.   Jagħti struzzjonijiet lill-President biex iressaq din ir-riżoluzzjoni u r-rakkomandazzjonijiet dettaljati li jiġu magħha lill-Kummissjoni u lill-Kunsill u lill-gvernijiet u l-parlamenti ta' l-Istati Membri u tal-pajjiżi fil-proċess ta' adeżjoni u dawk kandidati.

Rakkomandazzjoni 1 (dwar l-Artikolu 255 TEC u Regolament (KE) Nru 1049/2001 minn perspettiva kostituzzjonali)

Il-Kummissjoni trid ittejjeb iċ-ċarezza taċ-ċitazzjonijiet u tal-premessi fir-Regolament (KE) Nru 1049/2001 sabiex tagħmilha ċara li l-Artikolu 255 TEC(1), li hija l-bażi legali għar-Regolament stess:

(a)  huwa l-bażi legali ewlenija fit-Trattati għall-implimentazzjoni tal-prinċipji fundamentali ta' l-Unjoni, imsemmija fl-Artikolu 1 tat-Trattat ta' l-Unjoni Ewropea (TEU), li skond dan "...jittieħdu d-deċiżjonijiet b'mod miftuħ kemm jista' jkun possibbli u mill-viċin kemm jista' jkun possibbli taċ-ċittadin", u fl-Artikolu 6 TEU, li skond dan "l-Unjoni hija bbażata fuq il-prinċipji ta' ... demokrazija ... u l-istat tad-dritt";

(b)  huwa l-bażi legali ċentrali, safejn jikkonċerna t-trasparenza u l-kunfidenzjalità, għall-attivitajiet kollha tal-Kunsill, tal-Kummissjoni u tal-Parlament (it-"triangolu leġiżlattiv") meta dan jaġixxi taħt it-TEC u t-TEU;

(c)  jrid jiġi implimentat b'mod leali u sħiħ fir-Regoli ta' Proċedura tal-Parlament Ewropew(2), tal-Kummissjoni(3) u tal-Kunsill(4);

(d)  irid jiġi applikat b'mod konsistenti meta l-Istituzzjonijiet jaġixxu f'kapaċità leġiżlattiva (kif imsemmi fl-Artikolu 207 TEC) jew jimplimentaw leġiżlazzjoni ta' l-UE u tal-KE (l-Artikolu 202 TEC), irrispettivament liema istituzzjoni timplimenta l-leġiżlazzjoni jew teżerċita s-setgħat implimentattivi;

Rakkomandazzjoni 2 (dwar il-kunċetti tad-dokumenti leġiżlattivi u mhux leġiżlattivi)

Il-Kummissjoni, wara diskussjoni fil-kumitat interistituzzjonali li jipprovdi għaliha l-Artikolu 15 tar-Regolament u bi qbil mal-prinċipji msemmija fir-Rakkomandazzjoni 1, għandha temenda Regolament (KE) Nru 1049/2001 :
(a)  billi tingħata definizzjoni ġdida għall-kunċett ta' "dokumenti leġiżlattivi", preżentament definiti fl-Artikolu 12(2) ta' dak ir-Regolament, għal dokumenti "...magħmula jew irċevuti fil-proċess tal-proċeduri għall-adozzjoni ta' atti li jorbtu legalment fl-Istati Membri u lill-Istati Membri", billi tiżdied referenza għall-fatt li l-kunċett ta' att (leġiżlattiv) għandu jkun irriservat għal-liġi sekondarja biss (b'bażi legali diretta fit-Trattati); Għal dak li għandu x'jaqsam mad-dokumenti leġiżlattivi, għandu jingħata l-aċċess:

- għad-dokumenti preparatorji kollha li huma marbuta ma' proċedura ta' deċiżjoni identifikata; għandu jingħata l-aċċess hekk kif dawk id-dokumenti jiġu formalment ippreżentati minn kull istituzzjoni li tkun qed tieħu sehem fid-deċiżjoni;

- għar-reġistrazzjoni tad-dibattiti tal-Parlament jew tal-Kunsill, fejn dawk l-istituzzjonijiet qed jaġixxu fil-kapaċità leġiżlattiva, u għad-dokumenti diskussi (jekk mhux klassifikati, ara r-Rakkomandazzjoni 3 t'hawn taħt);

- għall-identità ta' l-awtur ta' kull inizjattiva jew emenda formali;

- għal informazzjoni kumplimetarja relevanti jew dokumenti relatati mal-laqgħat tal-gruppi ta' ħidma ta' l-istituzzjonijiet, u għall-kontribuzzjonijiet ippreżentati mis-segretarjati ta' l-istituzzjonijiet (inklużi s-servizzi legali), fejn dokumenti bħal dawn mhumiex sempliċiment ta' natura amministrattiva.

Ir-Regolament emendat għandu jkun ukoll il-bażi legali għall-istabbiliment ta' regoli, prattika tajba u ftehimiet interistituzzjonali magħmula biex itejbu l-abbozzar ta' testi leġiżlattivi u biex jiżguraw li t-testi leġiżlattivi finali huma aċċessibbli, bħal ma huma r-regoli li jridu jiġu segwiti għal

- abbozzar ta' atti leġiżlattivi,

- pubblikazzjoni tagħhom f'format elettroniku fil-Ġurnal Uffiċjali,

- konsolidazzjoni ta' testi bażiċi bl-atti li jemendaw tagħhom, u

- determinazzjoni tal-format tal-Ġurnal Uffiċjali, implimentazzjoni tal-multilingwiżmu u definizzjoni tal-ħidmiet ta' l-OPOCE;

(b)      billi jiġi definit il-kunċett tad-"dokumenti mhux leġiżlattivi" bħala dokumenti marbutin mal-proċeduri għall-implimentazzjoni ta' l-atti leġiżlattivi (kwalunkwe istituzzjoni tkun involuta) u d-dokumenti marbuta mal-proċeduri għall-adozzjoni ta' atti li ma jorbtux; għandu jkun possibbli li, minħabba n-natura amministrattiva tagħhom, jiġu applikati regoli ta' trasparenza inqas stretti għal dokumenti bħal dawn;

Għalhekk l-Istituzzjonijiet:

- għandhom jagħmlu pubbliku l-proċedura li trid tiġi segwita għal dokumenti mhux leġiżlattivi u jistipulaw b'mod ċar meta u kif partijiet interessati jistgħu jieħdu sehem fil-proċedura kkonċernata u meta u kif il-pubbliku jkun jista' jkollu aċċess għad-dokumenti;

- għandhom jindikaw ukoll b'mod ċar l-unitajiet organizzattivi involuti fi proċeduri amministrattivi, il-mod li bih jinħażnu d-dokumenti, kemm b'mod temporanju u permanenti, u kif dawn jistgħu jiġu aċċessati.

(c)       billi jiġi definit il-kunċett tad-"dokumenti regolatorji"((5)) bħala dokumenti marbuta ma' proċeduri għall-adozzjoni ta' atti li jtemmu jew jemendaw elementi mhux essenzjali ta' atti leġiżlattivi (kif inhu definit f'punt (a)) irrispettivament jekk dokumenti regolatorji bħal dawn humiex adottati mill-Kunsill jew delegati lill-Kummissjoni; dokumenti bħal dawn għandhom ikunu aċċessibbli "mutatis mutandis" taħt l-istess kundizzjonijiet bħal dawk applikabbli għal dokumenti leġiżlattivi (eż. fi proċeduri ta' komitoloġija , aċċess għandu jingħata hekk kif l-abbozz ta' miżura tiġi ppreżentata formalment lil kumitat); bl-istess mod, għandu wkoll jingħata aċċess lid-dokumenti kumplimentari relevanti (eż. l-aġendi, il-minuti u r-riżultati tal-voti tal-kumitat).

Rakkomandazzjoni 3 (għal dokumenti li jridu jiġu trattati bħala kunfidenzjali)

- Billi jitqiesu l-aħjar prattiċi fl-Istati Membri, ir-Regolament (KE) Nru 1049/2001 għandu wkoll jiġi emendat b'tali mod li jiddefinixxi b'mod ċar il-"...limiti skond l-interess pubbliku jew privat", kif imsemmi fl-Artikolu 255 TEC, li jista' jwassal għad-dewmien jew għall-prevenzjoni ta' aċċess għad-dokumenti ta' l-Istituzzjonijiet (jew partijiet relevanti minnhom); ir-Regolament għandu għalhekk ikollu regoli biex:

(a) -  jiġi żgurat li, irrispettivament mill-qasam ta' l-azzjoni ta' l-UE, li fuqha jittieħdu d-deċiżjonijiet bażiċi ta' politika u tiġi adottata l-leġiżlazzjoni huma fil-qasam pubbliku; hemm bżonn ukoll għal kjarifika tad-distinzjoni bejn, fuq naħa l-bżonn għal kunfidenzjalità fir-rigward ta', per eżempju, operazzjonijiet ippjanati jew fil-proċess minn servizzi ta' sigurtà u, fuq in-naħa l-oħra l-ħtiġijiet għal responsabilità u kontroll a posteriori,

(b) -  jiġi żgurat li d-dokumenti ma jiġux ikklassifikati kunfidenzjali bħala rutina, sempliċiment għax jirreferu għal kwistjoni li hija jew tista' tkun relevanti mill-aspett ta' sigurtà u

(c) -  jiġi żgurat kontroll adegwat mill-Parlament Ewropew (skrutinju parlamentari demokratiku);

Ir-Regolament għandu wkoll jipprovdi b'mod ċar li ftehimiet bilaterali ma' pajjiżi terzi jew organizzazzjonijiet internazzjonali ma jistgħux iżommu l-Kunsill jew il-Kummissjoni milli jaqsmu informazzjoni kunfidenzjali mal-Parlament Ewropew (b'mod partikolari, fejn id-dokumenti relevanti mhumiex aċċessibbli għall-parlamenti nazzjonali, ladarba huma dokumenti ta' l-UE).

Rakkomandazzjoni 4 (dwar ir-relazzjoni bejn l-UE u l-Istati Membri fir-rigward tal-qsim ta' informazzjoni/dokumenti)

Billi jitqies il-prinċipju msemmi fl-Artikolu 296 TEC li skond dan "l-ebda Stat Membru m'għandu jkun obbligat li jippreżenta informazzjoni li l-iżvelar tagħha huwa meqjus kuntrarju għall-interessi essenzjali tas-sigurtà tagħha", ir-Regolament (KE) Nru 1049/2001 għandu jiġi emendat b'tali mod sabiex

(a)  jillimita d-dritt ta' l-Istati Membri sabiex jillimitaw l-aċċess għall-kontribuzzjonijiet/emendi tagħhom fi proċeduri leġiżlattivi/regolatorji;

(b)  jagħtu aċċess sħiħ għal informazzjoni ppreżentata lill-Kummissjoni meta taħdem fuq l-implimentazzjoni tal-leġiżlazzjoni tal-KE jew ta' l-UE saż-żmien qabel ikun beda kwalunkwe proċediment fil-Qorti;

Rakkomandazzjoni 5 (dwar l-aspetti prattiċi sabiex ikun żgurat l-aċċess taċ-ċittadini għad-dokumenti)

Billi titqies l-esperjenza ta' l-ewwel perjodu ta' erba' snin tar-Regolament (KE) Nru 1049/2001, il-Kummissjoni għandha temenda r-Regolament billi tagħmel proposta koerenti biex:

(a)  jiġi żgurat punt wieħed ta' aċċess b'mod ċar u struttrat għad-dokumenti preparatorji kollha b'proċedura leġiżlattiva jew regolatorja (ara Rakkomandazzjoni 2);

(b)  jiġu rijorganizzati r-reġistri ta' l-Istituzzjonijiet billi jiżdied 'interface' komuni sabiex iċ-ċittadin/utent ikun kapaċi jsib l-istess funzjonalitajiet fit-tliet reġistri;

(c)  jiġu definiti regoli komuni biex jiġu arkivjati d-dokumenti, tiġi evitata d-dupplikazzjoni u tiġi żgurata l-awtentiċità tal-verżjonijiet varji;

(d)  jiġi ppreżentat b'mod ċar u komprensibbli l-'work-flow' ta' l-istituzzjonijiet u, fejn hu relevanti, il-punt ta' aċċess għad-dokumenti.

(1) Artikolu 255. TEC. 1. Kwalunkwe ċittadin ta' l-Unjoni, u kwalunkwe persuna fiżika jew legali li tgħix jew għandha l-uffiċċju rreġistrat fi Stat Membru, għandhom id-dritt għal aċċess għad-dokumenti tal-Parlament Ewropew, tal-Kunsill u tal-Kummissjoni, suġġetti għall-prinċipji u l-kundizzjonijiet li jridu jiġu definiti skond paragrafu 2 u 3.2. Prinċipji ġenerali u limiti minħabba interess pubbliku jew privat li jirregolaw dan id-dritt għal aċċess għad-dokumenti għandhom jiġi ddeterminati mill-Kunsill, isiru bi qbil mal-proċedura msemmija fl-Artikolu 251 sa sentejn mid-dħul fis-seħħ tat-Trattat ta' Amsterdam.3. Kull istituzzjoni msemmija hawn fuq għandha telabora, fir-Regoli ta' Proċedura tagħha stess, dispożizzjonijiet speċifiċi rigward l-aċċess għad-dokumenti tagħha. (2) L-Artikolu 199 TEC Il-Parlament Ewropew għandu jadotta r-Regoli ta' Proċedura tiegħu, billi jaġixxi b'maġġoranza tal-Membri tiegħu. (3) Art. 218.2 TEC "Il-Kummissjoni għandha tadotta r-Regoli ta' Proċedura tagħha sabiex tiżgura li kemm hi kif ukoll id-dipartimenti tagħha jaħdmu bi qbil mad-dispożizzjonijiet ta' dan it-Trattat. Għandha tiżgura li dawn ir-Regoli jiġu ppubblikati." (4) Art. 207 TEC. 3. Il-Kunsill għandu jadotta r-Regoli ta' Proċedura tiegħu. Għar-raġuni biex jiġi applikat l-Artikolu 255(3), f'dawn ir-Regoli, il-Kunsill għandu jelabora fuq il-kundizzjonijiet, li taħthom il-pubbliku għandu jkollu aċċess għad-dokumenti tal-Kunsill. Għar-raġuni ta' dan il-paragrafu, il-Kunsill għandu jiddefinixxi l-każijiet li fihom irid jitqies bħala qed jaġixxi fil-kapaċità leġiżlattiva tiegħu, bil-għan li jiġi aċċettat aċċess ikbar għad-dokumenti f'dawk il-każijiet, filwaqt li fl-istess ħin iżomm l-effettività tal-proċessi għat-teħid tad-deċiżjonijiet tiegħu. F'kwalunkwe każ, meta l-Kunsill jaġixxi fil-kapaċità leġiżlattiva tiegħu, ir-riżultati tal-votazzjonijiet u l-ispjegazzjonijiet tal-votazzjoni kif ukoll l-istqarrijiet fil-minuti għandhom isiru pubbliċi. (5) L-Artikolu 2 b) tad-deċiżjoni tal-Komitoloġija ta' l-1999 jistipula li: "…. b) il-miżuri ta' obbligi leġiżlattivi maħsuba biex japplikaw id-dispożizzjoni essenzjali ta' att bażiku, flimkien mal-miżuri li jikkonċernaw il-protezzjoni tas-saħħa jew tas-sikurezza tan-nies, ta' l-annimali jew tal-pjanti, iridu jiġi adottati skond il-proċedura ta' regolamentazzjoni. Meta att bażiku jistipula li ċertu elementi mhux essenzjali ta' dan l-att jistgħu jiġu adottati jew aġġornati bil-proċeduri ta' eżekuzzjoni, dawn il-miżuri jridu jiġu adottati skond il-proċedura ta' regolamentazzjoni."