dwar l-iżvilupp u l-migrazzjoni

(2005/2244(INI))

Il-Parlament Ewropew,

–    wara li kkunsidra l-komunikazzjoni tal-Kummissjoni lill-Kunsill, lill-Parlament Ewropew, lill-Kumitat Ekonomiku u Soċjali Ewropew u lill-Kumitat tar-Reġjuni bit-titolu "Il-Migrazzjoni u l-Iżvilupp: xi orjentazzjonijiet konkreti" (COM(2005)0390),

–    wara li kkunsidra l-proposta għal direttiva tal-Parlament Ewropew u tal-Kunsill dwar in-normi u l-proċeduri komuni applikabbli fl-Istati Membri għar-ritorn ta' ċittadini ta' pajjiżi terzi li qegħdin fil-pajiż illegalment (COM(2005)0391),

–    wara li kkunsidra l-komunikazzjonijiet tal-Kummissjoni lill-Kunsill u lill-Parlament Ewropew bit-titoli "Prijoritajiet ta' azzjoni quddiem l-isfidi tal-migrazzjoni: L-ewwel stadju tal-proċess ta' Hampton Court" (COM(2005)0621); "L-Istrateġija ta’ l-UE għal Azzjoni dwar il-Kriżi fir-Riżorsi Umani fil-qasam tas-Saħħa f’Pajjiżi li għadhom qed Jiżviluppaw" (COM(2005)0642) u "Programm tematiku għall-kooperazzjoni ma pajjiżi terzi fl-oqsma tal-migrazzjoni u l-kenn politiku" (COM(2006)0026),

–    wara li kkunsidra l-punt IV tal-konklużjoniujiet tal-presidenza tal-Kunsill Ewropew ta' Brussell tal-15 u s-16 ta' Diċembru 2005, intitulat "Approċċ globali dwar il-migrazzjoni",

–    wara li kkunsidra r-riżoluzzjonijiet A/RES/58/208, A/RES/59/241 u A/RES/60/205 ta' l-Assemblea Ġenerali tan-Nazzjonijiet Uniti li jipprevedu djalogu ta' livell għoli matul il-61 sessjoni tagħha fl-2006 dwar il-kwistjonijiet tal-migrazzjonijiet internazzjonali u ta' l-iżvilupp,

–    wara li kkunsidra l-Ftehima ta' Sħubija bejn fuq naħa waħda l-membri tal-Grupp ta' l-Istati ta' l-Afrika, tal-Karibew u tal-Paċifiku (ACP), u fuq in-naħa l-oħra l-Komunità Ewropea u l-Istati Membri tagħha, iffirmat f'Cotonou fit-23 ta Ġunju 2003 (il-Ftehima ta' Cotonou)(1), u emendat fil-Lussemburgu fil-25 ta' Ġunju 2005(2) b'mod partikulari l-Artikolu 13 dwar il-migrazzjonijiet,

–    wara li kkunsidra d-dikjarazzjoni u l-pjan ta' azzjoni ta' Brussell adottati fit-13 ta' April 2006 mill-ewwel laqgħa ta' ministri ACP inkarigati mill-kwistjonijiet ta' kenn, migrazzjoni u mobilità,

–    wara li kkunsidra d-deċiżjoni nru 4/2005 tal-Kunsill tal-ministri ACP-KE tat-13 ta' April 2005 dwar l-użu tar-riżerva ...... tad-disa' Fond Ewropew għall-Iżvilupp, dedikat għall-iżvilupp fuq żmien twil(3)

–    wara li kkunsidra r-rapport tas-segretarju ġenerali tan-Nazzjonijiet Uniti intitolata "Studju global dwar l-irwol tan-nisa fl-iżvilupp, 2004: in-nisa u l-migrazzjoni internazzjonali", A/59/287/Add.1,

–    wara li kkunsidra r-rapport tal-Bank Dinji intitolat "Global Economic Prospects 2006: Economic Implications of Remittances and Migration"(4),

–    wara li kkunsidra r-rapport ta' Ottubru 2005 tal-Kummissjoni globali dwar il-migrazzjonijiet internazzjonali intitolat "Il-migrazzjonijiet f'dinja interdipendenti: perspettivi ġodda ta' azzjoni"(5)

–    wara li kkunsidra l-Karta tad-Drittijiet Fundamentali ta' l-Unjoni Ewropea, b'mod partikulari l-Artikoli 18, 19 u 21,

–    wara li kkunsidra l-impenji li ħadu l-Istati Membri fl-2005, b'mod partikulari:

–  li l-Unjoni Ewropea u l-Istati Membri tagħha jilħqu, minn issa sa l-2015, l-għan magħmul mill-Organizzazzjoni tan-Nazzjonijiet Uniti ta' 0.7% tad-dħul gross nazzjonali tagħhom, li għandu jfisser li l-kontribut ta' l-Unjoni lejn l-Għanijiet tal-Millennju għall-Iżvilupp (MDG's) ta' 33 biljun EUR fl-2003 għal aktar minn 84 biljun EUR fl-2015 (konklużjonijiet tal-presidenza tal-Kunsill Ewropew ta' Brussell tas-16 u s17 ta' Ġunju 2005),

–  li l-Unjoni Ewropea u l-provvedituri oħra tal-fond jirduppjaw l-għajnuna lill-Afrika, li għandu jfisser għajnuna pubblika għall-iżvilupp (PDA) ta' 25 biljun USD fl-2010(6), (komunikazzjoni maħruġa fit-8 ta' Lulju 2005 mill-G8 fi Gleneagles),

–    wara li kkunsidra r-rakkomandazzjoni nru 151 ta' l-ILO dwar il-ħaddiema migranti,

–    wara li kkunsidra d-dikjarazzjoni konġunta tal-Kunsill u tar-rappreżentanti tal-gvernijiet ta' l-Istati membri fi ħdan il-Kunsill, tal-Parlament Ewropew u tal-Kummissjoni dwar il-politika ta' żvilupp ta' l-Unjoni Ewropea intitolata "Il-kunsens Ewropew dwar il-politika ta' l-iżvilupp" ta' l-20 ta' Diċembru 2005, li tistabbilixxi l-qafas ġenarali ta' azzjoni tal-Komunità dwar l-iżvilupp,

–    wara li kkunsidra d-dikjarazzjoni ta' Vjenna adottata fir-IV laqgħa għolja bejn l-Unjoni Ewropea u l-Amerika Latina fit-12 ta' Mejju 2006,

–    wara li kkunsidra r-riżoluzzjonijiet tas-17 ta' Novembru 2005 dwar strateġija ta' żvilupp għall-Afrika(7), tal-15 ta' Novembru 2005 dwar id-dimensjoni soċjali tal-globalizzazzjoni(8), tas-26 ta' Ottubru 2005 dwar approċċ komunitarju lejn l-immaniġġjar tal-migrazzjonijiet ekonomiċi(9), tad-9 ta' Ġunju 2005 dwar ir-rabtiet bejn l-immigrazzjoni legali u illegali u l-integrazzjoni tal-migranti(10) u tat-12 ta' April 2005 dwar l-irwol ta' l-Unjoni Ewropea sabiex jintlaħqu l-Għanijiet tal-Millennju għall-Iżvilupp (MDG's)(11),

–    wara li kkunsidra r-regolament (KE) nru 2836/98 tal-Kunsill tat-22 ta' Diċembru 1998 dwar l-integrazzjoni ta' kwistjonijiet ta' ugwaljanza bejn is-sessi fil-koperazzjoni għall-iżvilupp,

–    wara li kkunsidra l-Artikolu 45 tar-Regoli ta' Proċedura tiegħu,

–    wara li kkunsidra r-rapport tal-Kumitat għall-Iżvilupp u l-opinjonijiet tal-Kumitat għall-Affarjiet Barranin, tal-Kumitat għall-Impjiegi u l-Affarjiet Soċjali, tal-Kumitat għal-Libertajiet ċivili, il-Ġustizzja u l-Intern u tal-Kumitat għad-Drittijiet tan-Nisa u l-Ugwaljanza bejn is-Sessi (A6-0210/2006),

A.  billi minn 175 miljun migrant (3% tal-popolazzjoni tad-dinja), 40% jgħixu fil-pajjiżi li qed jiżviluppaw,

B.   billi l-migrazzjonijiet mhumiex fenomenu ġdid iżda d-daqs tagħhom fil-kuntest tal-globalizzazzjoni u l-kuxjenza li teżisti dwarhom fl-oqsma kollha konċernati madwar id-dinja issa biddlu dan il-fenomenu f'tema politika ewlenija għall-komunità internazzjonali,

C.  billi, minkejja li l-immigrazzjoni ilha tiżdied b'mod sostanzjali sa mis-snin 80, ma kienx hemm rispons komuni u koerenti min-naħa ta' l-Unjoni Ewropea,

D.  billi l-Unjoni Ewropea tilqa' immigranti li ġejjin prattikament mill-pajjiżi kollha li qed jiżviluppaw, jiġifieri numru kbir ta' dawn l-immigranti ġejjin mill-Ażja, mill-Afrika u mill-Amerika Latina, u li mhux probabbli li dan il-fenomenu jonqos fis-snin li ġejjin,

E.   billi l-mobilizzazzjoni tal-komunità internazzjonali qed iddum biex taffaċċja dawn il-fatti permezz ta' azzjonijiet sinifikanti komuni,

F.   billi l-kwistjoni tal-migrazzjonijiet teħtieġ risposta globali mill-komunità internazzjonali u li l-Unjoni Ewropea għadha ma offriet l-ebda risposta politika globali u ma armatx ruħha b'għodda adattati għal din il-problema,

G.  billi l-assenza ta' politika komuni dwar ir-regolazzjoni tal-flussi mitratorji tħalli lill-Istati Membri jadottaw deċiżjonijiet unilaterali li jagħmlu l-adozzjoni ta' pożizzjoni komunitarja koerenti diffiċli,

H.  billi r-rispons għall-fenomenu ta' l-immigrazzjoni għandu jkun riżultat ta' l-aktar kunsens wiesa' possibbli fi ħdan l-Unjoni Ewropea,

I.    filwaqt li jqis id-djalogu ta' livell għoli (HLD) dwar il-migrazzjonijiet internazzjonali u l-iżvilupp li se jsir waqt l-Assemblea ġenerali tan-Nazzjonijiet Uniti fl-14 u l-15 ta' Settembru 2006,

J.    billi l-Unjoni Afrikana għażlet il-migrazzjoni bħala waħda mit-temi ta' azzjoni ewlenin tagħha, taħt il-patroċinju tal-President tal-Kummissjoni ta' l-Unjoni Afrikana, is-Sur Alpha Oumar Konaré,

K.  billi d-diversità tal-motivazzjonijiet, u għalhekk tal-kategoriji ta' migranti, tagħmilha diffiċli li jiġu implimentati politiki politiki koerenti bil-għan li l-migrazzjoni ssir strument ta' żvilupp,

L.   billi l-migrazzjoni globalment hija l-aktar iffukata fuq l-Ażja u l-Amerika Latina, imma billi l-Afrika tispikka minħabba l-impatti negattivi tal-fenomenu tal-migrazzjoni,

M.  billi l-analiżi ta' dan il-fenomenu huwa ffukat fuq il-pajjiżi tat-Tramuntana li jilqgħu l-immigranti, meta 60% tal-migranti ma jitilqux mill-emisfera ta' Nofsinhar,

N.  filwaqt li jqis l-impenn sabiex jimxi 'l quddiem id-djalogu globali u tissaħħaħ il-koperazzjoni dwar il-kwistjoni tal-migrazzjoni bejn l-Unjoni Ewropea u l-Amerika Latina, stipulat fid-dikjarazzjoni ta' Vjenna adottata fir-IV laqgħa għolja bejn l-Unjoni Ewropea u l-Amerika Latina fit-12 ta' Mejju 2006,

O.  billi ż-żieda fl-għajnuna pubblika lill-iżvilupp fiha nfisha m'hijiex risposta għall-kwistjoni tar-rabta bejn il-migrazzjoni u l-iżvilupp, iżda hemm bżonn li jiġu żviluppati wkoll għodda speċifiċi u innovattivi bil-għan li jkun hemm għarfien aħjar u promozzjoni ta' l-irwol tal-migranti fil-ġlieda kontra l-faqar u għall-iżvilupp,

P.   billi l-isforz sabiex tinstab risposta għal dan il-fenomenu għandu jkun parti integrali ta' l-istrateġiji nazzjonali u internazzjonali dwar il-ġlieda kontra l-faqar, sabiex jintlaħqu l-Għanijiet tal-Millennju għall-Iżvilupp,

Q.  billi d-dritt tal-pajjiżi tan-Nofsinhar li jwettqu politika awtonoma dwar il-migrazzjoni għandu jiġi rikonoxxut u appoġġjat,

R.   billi, għall-pajjiżi tan-Nofsinhar, il-migrazzjoni tfisser li jitilfu ċ-ċittadini li għandhom l-għola livell ta' edukazzjoni jew sens qawwi ta' intrapriża, u li dan it-telf ta' kapaċitajiet jhedded il-proviżjoni u l-kwalità ta' bosta servizzi essenzjali, fosthom dawk tas-saħħa u ta' l-edukazzjoni,

S.   billi l-eżodu tal-kapaċitajiet jiġi mħeġġeġ permezz tal-politiki ta' aċċettazzjoni selettivi għall-immigranti, imħaddna mit-Tramuntana taħt il-kappa ta' "migrazzjoni magħzula", u li dan jaggrava l-emoroġija tal-kapaċitajiet li minnha qed isofru bosta pajjiżi tan-Nofsinhar,

T.   billi, skond il-President tal-Kummissjoni ta' l-Unjoni Afrikana, is-Sur Alpha Oumar Konaré, dawn il-politiki "jinnegaw id-dritt għall-iżvilupp lill-Afrika",

U.  billi l-migrazzjonijiet ċirkulari, li jippermettu vjaġġi bir-ritorn bejn il-pajjiż ta' oriġini u d-destinazzjoni, joffru l-aħjar opportunitajiet ta' żvilupp għall-pajjiżi li qed jilqgħu l-immigranti kif ukoll għall-pajjiżi minn fejn jitilqu,

V.  billi l-iżvilupp konġunt, jiġifieri li wieħed juża bl-aħjar mod il-potenzjal tal-komunitajiet ta' migranti stabbiliti fil-pajjiżi żviluppati għas-servizz ta' l-iżvilupp tal-pajjiżi tagħhom ta' oriġini, jista' jbiddel il-migrazzjonijiet fi strument għall-iżvilupp u għajnuna reċiproka bejn il-popli,

W. billi l-flus li l-migranti jibgħatu lejn il-pajjiżi ta' oriġini tagħhom jirrappreżentaw opportunità ewlenija ta' żvilupp, billi dawn l-ammonti huma ferm ikbar minn dawk mogħtija bħala għajnuna pubblika (PDA) fuq skala globali u billi, fil-parti l-kbira tal-każijiet, l-ispejjeż finanzjarji u bankarji biex jintbagħtu dawn il-flus huwa għoli ferm, u l-proċess huwa nieqes mit-trasparenza; waqt li jenfasizza, madankollu, li dawn il-flus huma prinċipalment għall-konsum mill-familji u li parti żgħira biss minn dawn it-trasferimenti finanzjarji tiffinanzja l-investimenti u l-iżvilupp,

X.  billi, madankollu, dawn it-trasferimenti m'għandhomx l-irwol li jissostitwixxu jew jiġġustifikaw tnaqqis fl-għajnuna pubblika għall-iżvilupp,

Y.  billi fl-2005 fid-dinja kien hawn madwar 9.2 miljun rifuġjat u 25 miljun persuna li ħallew djarhom u ċċaqalqu fil-konfini ta' pajjiżhom stess (IDP's), nofshom fl-Afrika, u li ma jibbenefikawx minn ebda protezzjoni fuq livell internazzjonali, fatt li joħloq ġerarkija intolerabbli tal-vittmi,

Z.   filwaqt li jqis iż-żieda fin-numru ta' rifuġjati u ta' nies li ċċaqalqu minħabba ragunijiet "ekoloġiċi" li, skond il-Kummissarju Għoli tan-Nazzjonijiet Uniti għar-Rifuġjati (UNHCR), jista' jilħaq il-50 miljun ruħ ftit snin oħra,

AA. billi l-integrazzjoni tal-migranti hija proċess bilaterali bbażat fuq ir-reċiproċità tad-drittijiet u ta' l-obligazzjonijiet tal-migranti legali u tas-soċjetà li qed tilqagħhom, li għandha l-għan li tiżgura li l-immigranti jkunu kapaċi jipparteċipaw f'din is-soċjetà,

AB. billi l-migranti, vittmi ta' l-ittraffikar tal-bnedmin, tad-diskriminazzjoni u tal-pożizzjoni prekarja tagħhom fis-soċjetà, huma grupp li globalment mhuwiex protett biżżejjed mill-Komunità internazzjonali u minn ċerti leġiżlazzjonijiet nazzjonali,

AC. billi l-Konvenzjoni Internazzjonali dwar il-ħarsien tad-drittijiet tal-migranti ma ġietx ratifikata minn l-ebda Stat Membru,

AD. billi l-Unjoni Ewropea ddedikat biss, nill-1999, 15-il miljun EUR għall-għan ta' l-integrazzjoni, jiġifieri 0.5 EUR għal kull immigrant,

AE. billi l-ġlieda kontra l-ittraffikar tal-bnedmin marbut mal-migrazzjoni u l-ġlieda kontra l-iskjavitù u l-isfruttament sesswali tan-nisa u tat-tfal għandhom isiru prijorità ta' l-Unjoni Ewropea,

AF. billi n-nisa jirrappreżentaw 51% ta' l-immigranti fid-dinja żviluppata u 46% fil-pajjiżi li qed jiżviluppaw(12) filwaqt li jqis li l-informazzjoni mogħtija dwar ir-riskji ta' l-emigrazzjoni klandestina mhijiex suffiċjenti, u billi n-nisa migranti huma aktar esposti għall-isfruttament sesswali, għall-vjolenza, għad-diskriminazzjoni u għall-isfruttament fuq il-post tax-xogħol; u billi l-politiki tal-migrazzjoni ma jqisux l-irwol speċifiku tan-nisa,

AG. billi l-migrazzjoni tista' tagħti ċ-ċans lin-nisa li jtejbu ħajjithom, li jżidu l-awtonomija tagħhom, li jgħinu li min huwa mwarrab u li jeħilsu minn relazzjonijiet soċjali oppressivi,

AH. billi, madankollu, in-nisa huma spiss imġiegħla jemigraw minħabba żwieġ sfurzat, faqar, kunflitti armati, eċċ.,

AI. billi n-nisa migranti huma aktar esposti għall-isfruttament sesswali, għad-diskriminazzjoni, għall-isfruttament fuq il-post tax-xogħol u għat-telf tal-kapaċitajiet (brain drain), għall-vjolenza u għar-riskji sanitarji, għall-iżolament soċjali u għall-ittraffikar tal-bnedmin,

AJ. billi bħallissa numru sostanzjali ta' migranti bla dokumenti jgħixu fl-UE, fatt li jżid ir-riskju ta' sfruttament fuq il-post tax-xogħol, kif ukoll ir-riskju ta' sfruttament sesswali u ta' vjolenza sesswali għal dawk li huma esposti għal dawn il-perikli,

1.   Huwa tal-fehma li l-Unjoni Ewropea għandu jkollha rwol ewlieni sabiex il-migrazzjoni tinbidel fi strument ta' żvilupp;

2.   Jenfasizza li l-Unjoni għandha tipprovdi tweġiba globali, b'karattru reġjonali, għall-kwistjoni tar-rabta bejn l-iżvilupp u l-migrazzjoni, billi tagħti attenzjoni partikulari lill-Afrika u lill-migrazzjonijiet min-naħa tan-Nofsinhar għan-Nofsinhar; jitlob li l-kwistjoni tal-migrazzjoni titpoġġa fuq nett ta' l-aġenda u tad-djalogu politiku bejn l-Ewropa u r-reġjuni differenti li magħhom għandha relazzjonijiet, u jappoġġja l-organizzazzjoni ta' laqgħa għolja bejn l-Ewropa u l-Afrika bil-għan li tinstab tweġiba politika komuni;

3.   Iqis li l-politika Ewropea dwar il-migrazzjoni u l-iżvilupp għandha l-ewwelnett tkun ibbażata fuq il-prinċipji ta' solidarjetà mal-pajjiżi terzi u ta' żvilupp konġuntbil-għan li jiġu affrontati l-kawżi profondi tal-migrazzjoni, u b'mod partikulari sabiex jinqered il-faqar;

4.   Itenni l-appoġġ tiegħu għal kunċett ta' mobilit­ tal-bnedmin bħala dritt tal-bniedem li, għalhekk, ma jistax jinqafel ġo loġika tas-suq; jenfasizza li l-politika kollha f'dan il-qasam għandu kollha l-għan li tippromwovi l-mobilità li tkun saret bħala għażla, u mhux li ġiet sfurzata;

5.   Jenfasizza li soluzzjoni adegwata għall-fenomenu ta' l-immigrazzjoni fi ħdan l-Unjoni Ewropea tista' tinstab biss billi tinħoloq strateġija komuni li tistabbilixxi b'mod ċar l-għanijiet kif ukoll il-mekkaniżmi li jinsabu fid-dispożizzjoni ta' l-Istati Membri biex ikunu jistgħu jiffaċċjaw dan il-fenomenu flimkien u bi spirtu ta' solidarjetà;

6.   Jipproponi li l-kwistjoni tal-migrazzjoni tkun integrata fil-politiki barranin ta' l-Unjoni Ewropea, fuq l-eżempju tal-proċess ta' Barċellona;

7.   Jilqa' l-proposta tal-Kunsill li fl-2006 tiġi organizzata laqgħa ministerjali Euromed dwar l-immigrazzjoni; jappoġġja bl-istess mod il-laqgħa għolja Ewro-Afrikana dwar il-migrazzjonijiet, li għandu jinżamm f'Rabat f'Lulju 2006, bil-ħsieb li jiddiskuti l-migrazzjoni mill-pajjiżi tal-Magreb u dawk 'l isfel mis-Saħara lejn l-Ewropa;

8.   Jilqa' kull miżura oħra adottata bil-għan li ttejjeb il-politika dwar il-migrazzjoni u jenfasizza l-ħtieġa ta' approċċ globali b'viżjoni preċiża ta' l-azzjonijiet l-aktar importanti li għandhom jittieħdu fil-qasam tal-politika dwar il-migrazzjoni, aktar milli jiġu appoġġjati miżuri frammentati għall-iżvilupp ta' din il-politika;

9.   Jirrakkomanda li l-Kunsill jadotta miżuri xierqa bil-ħsieb li jiggarantixxi f'kull Stat Membru tisħiħ tal-koperazzjoni u tal-koordinazzjoni bejn is-servizzi kompetenti differenti fil-qasam tal-migrazzjoni u ta' l-iżvilupp.

10. Jenfasizza li ż-żieda ta' l-għajnuna għall-iżvilupp hija kundizzjoni meħtieġa, imma mhix biżżejjed biex il-migrazzjoni ssir strument ta' żvilupp; jitlob lill-Unjoni Ewropea u lill-Istati Membri biex jirrispettaw l-impenji politiċi li ħadu fl-2005;

11. Jirrakkomanda li l-migrazzjonijiet u l-impatt tagħhom fuq l-iżvilupp jiġu meqjusa b'mod transversali fil-kuntest tar-riflessjonijiet kollha u ta' l-azzjonijiet bil-għan li jitlaħqu l-Għanijiet tal-Millennju għall-Iżvilupp; ifakkar li strateġja globali tista' biss tagħti l-frott jekk ikun hemm qafas legali xieraq, kemm fil-livell ta' l-Unjoni Ewropea kif ukoll fil-pajjiżi ta' oriġini;

12. jenfasizza li l-fenomenu tal-migrazzjoni għandu jiġi integrat aħjar fil-politiki u l-pjanijiet ta' żvilupp u jirrakkomanda li, fuq livell nazzjonali, il-migrazzjoni tagħmel parti mid-dokumenti ta' strateġija għat-tnaqqis tal-faqar (PRSP);

13. jagħraf l-importanza tad-dijaspori fit-tisħiħ tar-relazzjonijiet bejn l-Unjoni Ewropea u l-pajjiżi ta' oriġini, b'mod partikulari fil-qasam tal-migrazzjoni; jitlob li jkun hemm koperazzjoni aktar mill-qrib bejn l-istituzzjonijiet tal-pajjiżi li qed jiżviluppaw u l-Istati Membri ta' l-Unjoni Ewropea, anke permezz tat-twettiq tal-proġetti ta' żvilupp konġunt;

14. Huwa ta' l-opinjoni li l-iżvilupp konġunt, jiġifieri li wieħed jagħraf u jappoġġja l-irwol tad-dijaspori għas-servizz ta' l-iżvilupp tal-pajjiżi ta' oriġini tagħhom, għandu jkun rikonoxxut b'mod sħiħ fuq livell Ewropew;

15. Jenfasizza li sabiex il-migrazzjoni ssir strument ta' żvilupp, l-Unjoni għandu jkollha żewġ strumenti prijoritarji :

-  fond speċifiku, b'immaniġġjar flessibbli biżżejjed u li jagħti rispons, u li b'hekk jagħmilha possibbli li jiġu ffinanzjati b'mod partikulari azzjonijiet ta' żvilupp konġunt,

-  fond ta' garanzija li jassigura l-vijabilità tal-mikro-proġetti tal-migranti u jagħmel impatt massimu fuq l-iżvilupp;

16. Iqis li l-programm AENEAS, bħall-programm li se jidħol fis-seħħ minfloku fl-2007, għandu jitpoġġa għas-servizz ta' strateġija ta' żvilupp, b'mod partikulari permezz tal-finanzjament ta' azzjonijiet ta' żvilupp konġunt, u li dan l-għan għandu jiġi rispettat bis-sħiħ sabiex jiġi evitat li, pereżempju, il-fondi jiġu ddedikati biex titkompla l-protezzjoni tal-fruntieri esterni ta' l-Unjoni;

17. Jenfasizza li dan il-programm għandu jsaħħaħ l-effikaċità tas-sistemi ta' l-immaniġġjar tal-flussi migratorji u l-appoġġ għall-pajjiżi ta' oriġini u għall-pajjiżi minn fejn jgħaddu l-migranti (pajjiżi tranżit); jirrakkomanda għal dan il-għan li dan il-programm ikollu l-karatteristiċi li ġejjin:

-   bosta linji ta' approprjazzjonijiet (żvilupp konġunt, studji, sigurtà, eċċ.) bil-possibilità ta' finanzjament ta' proġetti integrati fuq diversi livelli,

-   kriterji ta' għażla tal-proġetti u regoli dwar it-tip u l-ammont ta' għajnuna li tista' tiġi mogħtija,

-   kumitat għall-għażla tal-proġetti b'libertà sħiħa fid-deċiżjonijiet tiegħu fil-qafas definit,

-  reviżjoni tar-regoli imposti fuq l-NGO's fil-qasam tad-depożitu tal-fondi ta' garanzija;

18. Jipproponi pjanijiet ta' żvilupp reġjonali integrati, iffukati fuq iz-zoni prinċipali ta' emigrazzjoni Afrikana, biex jiffinanzjaw :

-  l-installazzjoni ta' infrastrutturi (ilma tax-xorb, elettriku, ċentri tas-saħħa, skejjel, toroq...)

-  li l-ispejjeż tal-ħidma jitħallsu parzjalment minn appoġġ baġitarju speċifiku;

azzjonijiet ta' l-istess tip jistgħu wkoll jitwettqu fil-postijiet ewlenin ta' l-emigrazzjoni fl-Amerika Latina u fl-Ażja;

19. Jinsisti dwar id-diffikultajiet u l-ispejjeż għoljin li jkollhom iħallsu l-immigranti biex jibgħatu l-flus lejn il-pajjiżi ta' oriġini tagħhom, u jenfasizza wkoll in-nuqqas ta' trasparenza tas-sistema extra-bankarja; jisħaq li jeħtieġ li tiwaqqaf sistema sikura li tiggarantixxi l-ħarsien tad-dejta ta' min jibgħat u ta' min jirċievi l-flus, sabiex dawn l-għotjiet jintbagħtu permezz ta' trasfermimenti regolarizzati, billi ċertu sistemi alternattivi li jirrikorri għalihom l-immigranti kultant huma verament sistemi ta' użura;  

20. Jitlob lill-Kummissjoni, lill-Istati Membri u lill-istituzzjonijiet finanzjarji nazzjonali u internazzjonali biex jimplimentaw politiki bil-għan li :

-  jiffavorixxu u jiffaċilitaw it-trasferimenti tal-fondi ta' l-immigranti, jagħmluhom inqas għoljin, aktar mgħaġġlin u iktar sikuri, sabiex iħajjru lill-migrant jużaw is-sistemi fomali ta' trasferiment;

-  iżidu l-aċċes tal-migranti għas-servizzi finanzjarji;

-  jidderieġu l-flus li l-immigranti jibgħatu lura lejn pajjiżhom lejn l-investiment produttiv, billi jħaffu l-aċċess għall-kreditu tal-mikro-kumpaniji u tal-SME's, u billi jinvestigaw prodotti finanzjarji innovatti mmirati lejn il-komunitajiet tad-dijaspora, bħall-"Pjan ta' tfaddil għall-iżvilupp";

-  jassiguraw it-trasparenza tat-tranżazzjonijiet finanzjarji magħmula permezz ta' "sistemi informali" bħal, b'mod partikulari, in-netwerk Hawala;

21. Jitlob lill-Kummissjoni biex tħejji proposta ta' qafas regolatroji bil-għan li tnaqqas l-ispejjeż u żżid it-trasparenza fil-proċess tat-trasferimenti ta' fondi mill-immigranti lejn il-pajjiż ta' oriġini tagħhom; ifakkar li dawn it-trasferimenti ta' flus jirrappreżentaw it-tieni sors ta' finanzjament estern għall-pajjiżi li qed jiżviluppaw u li sa 20% ta' l-ammont totali tagħhom jintefqu fi spejjeż biex isir it-trasferiment;

22. Jagħraf l-importanza ta' l-irwol ta' l-SME's fil-ħolqien ta' l-impjiegi u fl-iżvilupp; iħeġġeġ lill-Kummissjoni biex tiżviluppa, b'kollaborazzjoni mal-Bank Ewropew ta' l-Investiment, programmi li jinkoraġġixxu lill-migranti biex jivestu aktar f'dan it-tip ta' intrapriża;

23. Jitlob lill-Kummissjoni u lill-Istati Membri biex jiżviluppaw programmi bil-għan li jimmobilizzaw persuni kwalifikati tad-dijaspora biex jieħdu sehem fl-iżvilupp permezz ta' kumpens finanzjarju tas-salarji baxxi għall-migranti bi kwalifiki għolja li huma lesti jmorru lura f'pajjiżhom, jew billi jitwaqqfu sistemi ta' "doppja katedra" għall-ħaddiema tas-settur pubbliku tan-Nofsinhar (għalliema, riċerkaturi, tobba); jitlob lill-Kummissjoni li tagħmel studju dwar l-esperjenzi ta' l-Istati Membri fil-qasam ta' "doppja katedra";

24. Jitlob lill-Kummissjoni u lill-Istati Membri biex jistħarrġu l-miżuri li jistgħu jieħdu biex jassiguraw it-trasferiment tad-drittijiet tal-pensjoni u tad-drittijiet tas-sigurtà soċjali tal-migranti li jerġgħu lura fil-pajjiż ta' oriġini tagħhom;

25. Jilqa' l-propsta tal-Kummissjoni sabiex jiġu kkunsidrati l-miżuri dwar it-trasferiment tad-drittijiet tal-pensjoni, ir-rikonoxximent tal-kwalifiki u t-tħaddim ta' mekkaniżmi li jiffaċilitaw il-mobilità tar-riċerkaturi u profesjonisti oħra sabiex ikunu jistgħu, meta jixtiequ, jirriturnaw lura lejn pajjiżhom u jerġgħu jintegraw b'suċċess;

26. Jitlob lill-Unjoni Ewropea u lill-Istati Membri biex jinkoraġġixxu l-migrazzjoni ċirkulari jew pendulari :

-  billi jimplimentaw, bi qbil mal-pajjiżi ta' oriġini, politiki u programmi ta' migrazzjoni temporarja, bħall-ħruġ ta' viża multipla għal ċertu persuni;

-  billi jissistemaw it-trasferiment ta' kontribuzzjonijiet għall-pensjoni u l-kontribuzzjonijiet soċjali kollha bejn il-pajjiż ta' oriġini u l-pajjiż ta' destinazzjoni, filwaqt li jassiguraw li l-ħaddiema għandhom aċċess effettiv għall-kontribuzzjonijiet (anqas minn 25% tal-migranti internazzjonali jgħixu f'pajjiżi marbuta bi ftehimiet ta' dan it-tip);

27. Jilqa' b'sodisfazzjon il-proposta tal-Kummissjoni biex tħeġġeġ migrazzjoni ċirkulari fejn il-migranti jivvjaġġaw bir-rirtorn bejn il-pajjiż ta' oriġini tagħhom u l-pajjiż tad-destinazzjoni, u b'hekk il-pajjiż ta' oriġini tagħhom ikun jista' jibbenefika mit-tagħlim u mill-esperjenza li kisbu; jenfasizza li jaqbel li l-migrazzjoni ċirkulari tkun akkumpanjata minn miżuri ta' integrazzjoni favur il-migranti meta huma joħroġu jew jidħlu fil-pajjiż; jenfasizza l-irwol li għandu jkollha s-soċjetà ċivili, l-NGO's u l-imsieħba soċjali f'dan il-proċess;

28. Jilqa' wkoll il-proposti tal-Kummissjoni biex isir djalogu dwar kwistjonijiet relatati mal- permessi ta' residenza u ta' xogħol, kif ukoll dwar it-tmexxija ta' programmi ta' mobilità tal-ħaddiema migranti li tgħaqqad il-kapaċitajiet ta' l-migranti u l-bżonnijiet tal-pajjiż li għadu qed jiżviluppa;

29. jistieden lill-awtoritajiet tat-Tramuntana u tan-Nofsinhar biex jinvestu fl-edukazzjoni u fil-formazzjoni taċ-ċittadini; itenni l-appoġġ tiegħu għall-għan "20/20": 20% ta' l-għajnuna pubblika tat-Tramuntana u 20% tal-baġits nazzjonali tan-Nofsinhar jiġu dedikata għas-servizzi soċjali baziċi;

30. Jistieden lill-Istati tan-Nofsinhar biex jiżviluppaw strateġiji biex "jiffurmaw u jżommu" ċ-ċittadini, b'mod partikulari billi jevalwaw għal darb'oħra l-oqsma professjonali b'karattru soċjali u billi jpoġġu l-enfasi fuq is-sitwazzjoni tan-nisa li ta' spiss isofru diskriminazzjoni fuq bażi ta' sess;

31. Jitlob lill-Unjoni biex tintegra b'mod konkret il-promozzjoni ta' xogħol deċenti fl-aġenda Ewropea fil-qasam ta' l-iżvilupp, b'mod partikulari billi :

-  jiġu inklużi klawżoli dwar ir-rispett tan-normi fundamentali tax-xogħol fil-ftehimiet kollha bilaterali ffirmati mill-Unjoni u l-Istati Membri tagħha,

-  jidħol fis-seħħ strument ta' kontroll ("osservaturi bilaterali"),

-  issir promozzjoni tax-xogħol deċenti bħala element fundamentali tad-disa' MDG;

jitlob, madankollu, li dan il-kunċett ma jiġix użat mit-Tramuntana biex isir "ostaklu li ma jikkonsistix f'tariffi" għall-aċċess għas-suq tagħhom;

32. Jitlob lill-Unjoni Ewropea u lill-Istati Membri biex jimplimentaw politiki bil-għan li jillimitaw il-konsegwenzi ekonomiċi u soċjali negattivi tat-telf ta' l-aħjar imħuħ fuq il-pajjiżi tan-Nofsinhar :

-  billi jerġgħu jorjentaw il-formazzjoni lejn l-oqsma li l-aktar isofru minn-nuqqas ta' ħaddiema,

-  billi jiffinanzjar programmi ta' investiment konġunt bejn imsieħba tat-Tramuntana u tan-Nofsinhar għall-pajjiżi u għall-oqsma partikularment affettwati mit-telf ta' l-aħjar imħuħ;

33. Jirrakkomanda l-adozzjoni ta' "kodiċi Ewropew ta' kondotta tajba" kif ukoll kodiċi nazzjonali fl-Istati Membri, bil-għan li jkun hemm sorveljanza dwar ir-reklutaġġ tal-ħaddiema;

34. Jilqa' l-intenzjoni tal-Kummissjoni li tipproponi programm speċifiku bħala rispons għall-kriżi tar-riżorsi umani fil-qasam tas-saħħa fl-Afrika;

35. Jilqa' l-pjan li jiġi żviluppat approċċ komprensiv u koerenti għal reklutaġġ etiku ta' staff f'setturi partikolarment vulnerabbli għat-telf ta' l-aħjar imħuħ;

36. Jilqa' l-konklużjonijiet tal-Presidenza tal-Kunsill Ewropew tal-15 u s-16 ta' Diċembru 2005 dwar "approċċ globali dwar il-kwistjoni tal-migrazzjoni" kif ukoll il-proposti reċenti tal-Kummissjoni dwar it-telf ta' l-aħjar imħuħ, dwar il-flus li jintbagħtu lejn il-pajjiżi ta' oriġini, dwar id-dijaspori, dwar il-migrazzjoni temporarja/ċirkulari, dwar id-drittijiet tas-sigurtà soċjali, dwar l-għoti ta' viża multipla, eċċ.;

37. Jenfasizza li "ċ-ċirkular" ta' l-imħuħ hija bażi ewlenija biex issaħħaħ il-kontribut pożittiv tal-migrazzjoni fuq l-iżvilupp, billi l-pajjiżi li qed jiżviluppaw jipparteċipaw b'mod sħiħ fl-iskambju ta' kapaċitajiet fis-suq tax-xogħol globali; jirrakkomanda lill-Kummissjoni u lill-Istati Membri biex jimpenjaw irwieħhom serjament f'din id-direzzjoni billi jijipproponu miżuri biex:

-  jippromwovu r-ritorn temporarju u virtwali, ibbażati fuq esperjenzi attwali tal-Komunità,

-  jinkoraġġixxu l-koperazzjoni istituzzjonali bejn organiżmi tal-pajjiżi li qed jiżviluppaw u Stati Membri ta' l-Unjoni Ewropea (istituti ta' riċerka, universitajiet, sptarijiet);

-  iħeġġu li l-kwalifiki jiġu rikonoxxuti b'mod reċiproku;

38. Jinnota l-fatt li ċerti kwalifiki vokazzjonali u/jew akkademiċi tal-ħaddiema li ġejjin minn pajjiżi terzi jew mhumiex rikonoxxuti jew huma rikonoxxuti b'diffikulta li tagħmilha aktar diffiċli għal ħaddiema bħal dawn sabiex jidħlu fis-suq tax-xogħol ta' l-Istati Membri ta' l-Unjoni Ewropea bl-istess kundizzjonijiet; jikkunsidra l-fatt li l-migranti għandu jkollhom aċċess għall-programmi ta' taħriġ meta jkunu impjegati fl-Unjoni Ewropea sabiex jiżviluppaw il-kompetenza professjonali tagħhom;

39. Jistieden lill-Kummissjoni tipproponi inizjattivi li jiffaċilitaw ir-rikonoxximent tal-kwalifiki professjonali u tistabbilixxi standards minimi rigward id-dħul fis-seħħ ta' sistema Ewropea ta' ekwivalenzi ta' diplomi barranin;

40. Jitlob li l-irwol speċifiku tan-nisa fil-migrazzjoni u fl-iżvilupp jiġi kkunsidrat u b'mod partikulari li :

-  id-dimensjoni tas-sessi tiġi integrata fil-programmi u fil-proġetti kollha dwar l-iżvilupp u dwar l-iżvilupp konġunt jew dwar l-iżvilupp konġunt marbut mat-tema tal-migrazzjoni,

-  in-nisa u l-assoċjazzjonijiet tan-nisa jiġu preferuti permezz ta' miżuri li għandhom l-għan li jagħtu responsabbiltà lill-komunitajiet tad-dijaspora u li jappoġġjaw il-proġetti tagħhom finanzjarjament;

-  jitniedu kampanji ta' informazzjoni fil-pajjiżi ta' oriġini dwar il-kundizzjonijiet ta' l-immigrazzjoni legali, dwar id-drittijiet tagħhom u dwar ir-riskji ta' l-immigrazzjoni klandestina, fosthom l-ittraffikar tal-bnedmin, il-vjolenza u l-isfruttament sesswali;

41. Jistieden lill-Istati Membri biex isaħħu l-mezzi li permezz tagħhom il-ħaddiema migranti nisa jiksbu l-emanċipazzjoni soċjopolitika, ekonomika u psikoloġika tagħhom, speċjalment rigward il-familji tagħhom u jiksbu t-tagħrif meħtieġ għall-integrazzjoni b'suċċess fil-pajjiż li qed jilqagħhom u li permezz tagħhom id-drittijiet, il-pużizzjoni u l-irwol tal-ħaddiema migranti nisa huma assigurati, filwaqt li jissaħħaħ l-irwol ta' l-NGOs li jaħdmu fuq il-kwistjoni ta' l-ugwaljanza bejn is-sessi kif ukoll il-ħidma tan-netwerks tal-migranti nisa;

42. Jistieden lill-Istati Membri sabiex jiżguraw li l-prinċipju kontra d-diskriminazzjoni huwa applikat f'dak li għandu x'jaqsam ma' l-aċċess u l-parteċipazzjoni tan-nisa migranti fis-suq tax-xogħol tal-Komunità u li jiggarantixxu li d-drittijiet bażiċi soċjali u ekonomiċi, b'mod partikulari d-dritt ta' ħlas indaqs, huma rispettati;

43. Jistieden lill-Istati Membri jagħtu attenzjoni partikulari lit-tfal tan-nisa migranti billi jiżguraw li dawn qed jibbenefikaw minn livell għoli ta' protezzjoni u aċċess eħfef għall-kura tas-saħħa u għall-edukazzjoni;

44. jappoġġja l-proposta tad-dikjarazzjoni u tal-pjan ta' azzjoni ta' Brussell adottati fit-13 ta' April 2006 mill-ministri tal-ACP inkarigati minn kwistjonijiet ta' kenn, migrazzjoni u mobilità, li jitolbu li jitwaqqaf osservatorju virtwali għall-migrazzjonijiet ACP bil-għan li tinġabar informazzjoni sħiħa u indipendenti mill-perspettiva ta' l-iżvilupp ta' soluzzjonijiet ACP għall-isfidi tal-migrazzjoni;

45. Jilqa' d-dħul fis-seħħ ta' strument ACP-UE dwar il-migrazzjonijiet minn issa sa l-aħħar ta' l-2006; jitlob, madankollu, lill-Kummissjoni biex tiċċara l-għanijiet tagħha u biex tiggarantixxi li dan l-istrument ma jiġix iddevjat mill-għan tiegħu ta' żvilupp;

46. Jiddubita minn kemm huma opportuni u effiċjenti l-ftehimiet u l-klawżoli dwar id-dħul mill-ġdid immirati biex jorbtu l-għajnuna finanzjarja u teknika mal-"prestazzjoni" tal-pajjiżi terzi fil-qasam ta' dħul mill-ġdid; jenfasizza li din il-politika ta' "għotja biex tpatti għal għotja oħra" thedded li tfaqqar il-pajjiżi li jiġġeneraw il-migranti;

47. Jitlob lill-Kummissjoni biex tipproponi miżuri biex issaħħaħ il-kapaċitajiet ta' l-Istati tan-Nofsinhar fl-immaniġġjar ta' politika migratorja awtonoma fil-qafas tal-fondi Ewropej dwar il-migrazzjoni jew ta' l-istrument ACP-EU;

48. Jenfasizza li l-Unjoni Afrikana u l-organizzazzjonijiet reġjonali Afrikani jista' jkollhom rwol importanti biex jidderieġu l-migrazzjonijiet ekonomiċi fl-Afrika, pereżempju permezz ta' ftehimiet ta' koperazzjoni għall-iżvilupp konġunt bejn l-Unjoni Ewropea u l-pajjiżi ta' oriġini tal-migranti, kif ukoll fil-qafas ta' ftehimiet bilaterali u multilaterali li jinkludu klawżoli dwar ir-rispett tad-drittijiet tal-bniedem u dwar l-istandards ta' l-ILO, u jqis li l-Unjoni Ewropea għandha tappoġġja dan it-tip ta' inizjattivi;

49. Iqis li s-sħubija ACP-UE toffri qafas f'pożizzjoni lli jipproponi tweġibiet komuni għall-kwistjoni tal-migrazzjoni, skond l-Artikolu 13 tal-Ftehima ta' Cotonou; jitlob lill-Kummissjoni biex, fin-negozjati li qed isiru dwar il-ftehimiet ta' sħubija ekonomika (EPA) jew fin-negozjati futuri dwar il-ftehimiet ta' dħul mill-ġdid, tinkludi l-għanijiet li ġejjin:

-  trattament ugwali fil-qasam tas-sigurtà soċjali għaċ-ċittadini mill-ACP, li diġà giet prevista mill-Konvenzjoni ta' Lomé iżda baqgħet ma twettqitx,

-  aċċess aħjar għall-viżi mogħtija għal żmien qasir għaċ-ċittadini tal-pajjiżi ta' l-ACP, u regolamenti li jiffavorixxu aktar il-mobilità tal-ħaddiema temporarji,

-  id-dħul fis-seħħ ta' programm ta' informazzjoni fil-pajjiżi ACP immirat lejn dawk li qed jaħsbu biex jemigraw lejn l-Unjoni Ewropea;

50. jitlob lill-Kummissjoni biex tfassal strateġija maħsuba biex tgħin lill-pajjiżi tad-destinazzjoni u l-pajjiżi tranżit li jiffaċċjaw flussi migratorji kbar u biex jeżaminaw flimkien mal-pajjiżi konċernati programmi ta' azzjoni rigward emigranti f'dawk il-'poli migratorji' u ż-żoni ta' tranżitu identifikati, u jiffukaw fuq dawk fost il-popolazzjonijiet migratorji l-aktar vulnerabbli (nisa, tfal waħedhom) b'dawn l-iskopijiet:

–  li jgħinu lill-popolazzjoni biex tikseb awtonomija u biex isibu l-milja tagħhom mingħajr il-bżonn ta' mobilità ,

–  - li jtejbu l-kundizjonijiet ta' għixien tal-migranti in transit, b'mod partikolari f'Sahel (ċentri ta' informazzjoni, ċentri ta' għajnuna għal migranti barranin),

–   li jipproponu attività ta' prevenzjoni u ta' kura tal-mard sesswali kontaġġjuż (MST) u ta' l-Aids fil-poli u fir-rotot migratorji, b'kunsiderazzjoni għar-rabta li teżisti bejn it-tixrid tal-MST u ċ-ċaqliq tal-popolazzjoni;

51. Jitlob li dawn il-programmi ta' azzjoni jikkonċentraw partikularment fuq l-analiżi ta' l-impatt soċjali u psikoloġiku tal-migrazzjonijiet u ta' l-espulsjonijiet, kif ukoll fuq l-appoġġ għan-nisa u tfal li jsofru minn dan l-impatt negattiv;

52. Jitlob li l-Unjoni tappoġġja l-inizjattivi tal-komunità internazzjonali biex jiġu ċċarati l-kunċetti ta' refuġjat politiku, refuġjat ekonomiku u refuġjat ambjentali u biex joffru lil kull waħda minn dawn il-kategoriji l-protezzjoni u l-għajnuna xierqa; iqis li nies spustjati jeħtieġ li jibbenefikaw minn protezzjoni daqs dik li tista' tingħata lir-refuġjati permezz tal-Konvenzjoni dwar l-istatus tar-refuġjati tat-8 ta' Lulju 1951; jitlob lill-Istati Membri u lill-komunità internazzjonali biex iħarsu "il-prinċipji gwida dwar l-ispostamenti interni" tan-Nazzjonijiet Uniti u jirrakkomanda li dawn in-normi ta' protezzjoni ta' nies spustjati jiġu stabbiliti bħala konvenzjoni internazzjonali;

53. Huma mħasseb bid-diffikultajiet finanzjarji li qed issib l-HCR, u huwa tal-parir li l-Kummissjoni għandha ssaħħaħ l-appoġġ finanzjarju tagħha għall-proġetti mmexxija mill-HCR u li l-Unjoni Ewropea, il-kontributur prinċipali għall-baġit tal-HCR, għandha tagħmel pressjoni fuq il-kontributuri l-oħra sabiex l-HCR ikollha l-mezzi biex twettaq il-missjoni fl-aħjar kundizzjonijiet possibbli;

54. Jitlob lill-Kummissjoni sabiex bi sħab mal-HCR u mal-pajjiżi jew organizzazzjonijiet reġjonali konċernati tiżviluppa proġetti :

–  għar-ripatrijazzjoni volontarja tar-refuġjati u tan-nies spustjati,

–  għat-twaqqif ta' proġetti ta' għajnuna għar-rilokazzjoni ta' dawn il-popolazzjonijiet;

55. Jinkuraġġixxi lill-pajjiżi ta' oriġini u lill-pajjiżi tul ir-rotta (transit) biex jieħdu parti attiva fl-approċċ ġdid għal migrazzjoni u l-iżvilupp tiegħu;

56. Jistieden lill-Kummissjoni biex tibda djalogu mal-pajjiżi ta' oriġini u biex jitlobhom biex jipprojbixxu l-użanzi li jmorru kontra d-drittijiet tal-bniedem bħalma huma l-mutilazzjonijiet ġenitali tan-nisa, iż-żwieġ bil-fors, il-poligamija u d-divorżju mingħajr kunsens reċiproku;

57. Jistieden lill-Kummissjoni biex tagħmel evalwazzjoni kwantitattiva u kwalitattiva tan-nefqa fuq programmi ta' għajnuna għall-iżvilupp f'pajjiżi terzi, kif ukoll bilanċ tar-riżultati li jinkisbu minn dan, bil-fehma li jkun hemm titjib fil-qagħda tal-mara fil-pajjiżi minn fejn joriġinaw il-migranti;

58. Jistieden lill-Istati Membri biex jeżaminaw partikularment iktar l-impatt li l-ispostamenti li jirriżultaw minn kunflitti jistgħu jkollhom fuq is-sitwazzjoni soċjali, fiżika u psikoloġika tal-migranti nisa, li minħabba l-prekarjità tal-qagħda tagħhom, huma l-iktar nies suxxettibbli li jisfaw vittmi tal-vjolenza;

59. Jitlob lill-Istati Membri u lill-Unjoni Ewropea biex jiggarantixxu li n-nisa vittmi tal-vjolenza jiġu infurmati sewwa bid-drittijiet tagħhom, li jkollhom aċċess tabilħaqq għall-għajnuna legali u li jkunu jistgħu jitolbu status uffiċjali indipendenti u li jiksbu permess ta' residenza u biex jaħdmu;

60. Jistieden lill-Kummissjoni u lill-Kunsill, bl-intervent ta' rappreżentanti u ambaxxati lokali, biex jinfurmaw lin-nisa li jixtiequ jemigraw lejn l-UE dwar il-kundizzjonijiet marbutin ma' l-immigrazzjoni legali, dwar id-drittijiet u l-obbligi li jkollhom, u dwar il-prinċipji u l-valuri fundamentali li fuqhom huma msejsa s-soċjetajiet Ewropej;

61. Jistieden lill-Istati Membri biex fl-istess ħin jiżviluppaw politiki u programmi speċifiċi ta' żvilupp maħsuba biex jiggarantixxu l-forniment ta' assistenza medika, soċjali u psikoloġika għan-nisa li jisfaw spustjati minħabba kunflitti, u nies oħra migranti li jbagħtu konsegwenzi mentali, fiżiċi u soċjali bħala nies spustjati;

62. Jinsisti fuq l-importanza ta' skambji ta' metodi ta' prattika tajba, kemm bejn l-Istati Membri kif ukoll ma' pajjiżi terzi, b'mod partikolari ma' pajjiżi li qegħdin jiżviluppaw;

63. Jiddeplora li l-Kummissjoni ma tatx każ tad-dimensjoni li għandha x'taqsam mad-differenza ta' sess fil-komunikazzjoni tagħha, "Il-Migrazzjoni u l-Iżvilupp: orjentazzjonijiet konkreti"; jipproponi li qabel ma jiġu adottati miżuri fil-qasam tal-politika għall-immigrazzjoni, jinħoloq grupp ta' ħidma interistituzzjonali ta' livell għoli, inkarigat biex jissorvelja l-iżvilupp tal-politika Komunitarja għall-immigrazzjoni mill-aspett tad-differenza ta' sess, u biex jimplimenta mezzi ta' evalwazzjoni ta' l-impatt marbut mad-differenza ta' sess;

64. Jitlob lill-Kunsill u lill-Kummissjoni biex fil-qasam tal-politika għall-immigrazzjoni, u fl-evalwazzjoni regolari tal-politiki mill-aspett ta' differenza ta' sess, jadottaw linji gwida, kif ukoll objettivi u indikaturi Ewropej konkreti u mmirati lejn l-aspett tad-differenza ta' sess;

65. Jitlob lill-Kunsill, lill-Kummissjoni u lill-Istati Membri biex jistabbilixxu qafas legali li jiggarantixxi lin-nisa migranti d-dritt li jkollhom passaport u permess ta' residenza individwali, u li jippermettu li jiġi meqjus kriminalment risponsabbli kulmin jikkonfiska dawn id-dokumenti;

66. Jistieden lill-Kummissjoni u lill-Istati Membri biex jintensifikaw id-djalogu mal-pajjiżi ta' oriġini tan-nisa migranti, bl-iskop li jippromwovu r-rispett tad-drittijiet tan-nisa u l-ugwaljanza bejn is-sessi, kif ukoll il-ġlieda kontra l-faqar u d-dipendenza ekonomika tan-nisa;

67. Jenfasizza li l-migrazzjoni u l-integrazzjoni huma intimament marbutin ma' xulxin u li sabiex jiġi żgurat li migrazzjoni tirnexxi u li minnha jibbenefikaw il-partijiet kollha kkonċernati, l-istrateġiji għall-migrazzjoni jridu jkunu akkumpanjati minn strateġiji ħollistiċi u multidimensjonali;

68. Jiddeplora n-nuqqas ta' progress dwar kwistjonijiet ta' integrazzjoni minn wara s-Samit ta' Tampere fl-1999 u jqis li l-Unjoni Ewropea trid minn issa 'l quddiem tassumi r-responsabbiltajiet tagħha f'dan il-qasam; jifraħ f'dan ir-rigward bit-twaqqif tal-Fondi Ewropew għall-integrazzjoni ta' ċittadini ta' pajjiżi terzi; jistqarr li jaqbel li għandu jitwaqqaf malajr osservatur Ewropew għall-migrazzjonijiet biex iħaffef l-isforzi ta' l-Unjoni Ewropea u ta' l-Istati Membri fil-kwistjoni ta' l-integrazzjoni;

69. Jenfasizza li l-migranti huma rikkezza għall-pajjiżi li jilqgħuhom u jisħaq li dan l-irwol għandu jkun rikonoxxut aħjar u msaħħaħ; jinsisti fuq il-fatt li ċ-ċittadini Ewropej, kif ukoll il-ħaddiema migranti, għandhom dmirijiet u drittijiet li għandhom dejjem jiġu rrispettati;

70. Jistieden lill-Istati Membri biex jieħdu dawn l-aspetti pożittivi u jagħmlu minnhom elementi tal-kampanja nazzjonali ta' informazzjoni;

71. Jistieden lill-Istati Membri biex jistabbilixxu proċedura ġusta u trasparenti li tiffaċilita għall-migranti l-aċċess għal xogħol li l-kundizzjonijiet ta' iġene u ta' sigurtà tiegħu, kif ukoll il-kundizzjonijiet ta' kif jiġu impjegati, joffrulhom garanzija sħiħa għad-dinjità tagħhom;

72. Jistieden lill-Kummissjoni u lill-Istati Membri biex iwettqu għadd ta' programmi ta' skambji għaż-żagħżagħ fil-qasam tar-riċerka u biex jippromwovu rabtiet iktar mill-qrib fil-qasam tal-kultura u ta' l-edukazzjoni mal-pajjiżi terzi kkonċernati sabiex jiġu żviluppati sinerġiji bejn organizzazzjonijiet ta' l-edukazzjoni ta' l-Unjoni Ewropea u dawk ta' pajjiżi li qed jiżviluppaw, kif ukoll biex jappoġġjaw il-miżuri għar-riintegrarazzjoni;

73. Jistieden lill-Kummissjoni sabiex tippromwovi u ssaħħaħ, flimkien ma' l-Istati Membri, il-programmi ta' skambji ta' studenti u żgħażagħ gradwati minn pajjiżi li qegħdin jiżviluppaw biex bi programmi bħal Erasmus, Erasmus-Mundus, Comenius, Socrate u Leonardo da Vinci, jilħqu l-objettivi tal-migrazzjoni temporanja, kif ukoll it-trasferiment ta' prattiki tajbin u ta' kompetenzi għall-pajjiżi ta' oriġini;

74. Jistieden lill-Kummissjoni u lill-Istati Membri sabiex itejbu l-aspett mhux finanzjarju tal-kontribuzzjoni għall-iżvilupp soċjo-professjonali billi jeżaminaw l-irwol taż-żagħżagħ u jiffavorixxu l-integrazzjoni u ċ-ċittadinza tagħhom billi jġibu flimkien il-parteċipanti differenti fil-qasam tal-migrazzjoni ekonomika, bħalma huma l-oganizzazzjonijiet li m'humiex statali u l-imsieħba soċjali tal-pajjiżi ta' oriġini u tal-pajjiżi ospitanti;

75. Jistieden lill-Unjoni Ewropea u lill-Istati Membri biex, fir-relazzjonijiet tagħhom ma' pajjiżi terzi, ma jħarsux lejn il-kwistjoni tal-migrazzjonijiet bħala t-tkomplija tal-politiki restrittivi tagħhom għall-migrazzjonijiet; jiddikjara li hu kontra kull "esternalizzazzjoni" tal-politika Ewropea u ta' l-Istati Membri għall-migrazzjoni li tikkonsisti biss filli titfa' lura fuq il-pajjiżi tan-Nofsinhar ir-responsabbiltà tal-kwistjoni tal-migrazzjonijiet;

76. Josserva barra minn hekk li l-immaniġġjar tal-flussi migratorji m'għandux ikun prirekwiżit għal kull ftehim ta' assoċjazzjoni;

77. Jitlob lill-Kumissjoni u lill-Istati Membri biex jipproponu inizjattivi konkreti biex jiġi żviluppat l-aċċess għall-proċeduri għall-immigrazzjoni legali biex hekk jikkumbattu s-suq ta' xogħol illegali u l-esplojtazzjoni li jaqgħu vittmi tagħha il-ħaddiema migranti;

78. Jitlob lill-Istati Membri biex jimplimentaw politika ġenwina biex jintlaqgħu l-migranti bbażata fuq ir-rispett tad-drittijiet tal-bniedem u tal-liġi internazzjonali;

79. Iħeġġeġ kemm lill-Istati Membri kif ukoll lill-Unjoni biex ilkoll jirratifikaw il-Konvenzjoni internazzjonali dwar il-ħarsien tad-drittijiet tal-migranti u biex jirrispettaw kompletament l-impenji internazzjonali tagħhom dwar il-protezzjoni tal-migranti u tal-familji tagħhom;

80. Josserva li l-ħaddiema migranti qed jiġu esplojtati dejjem iktar u jistieden lill-Istati Membri biex jiggarantixxu l-applikazzjoni tal-leġiżlazzjonijiet Ewropej u nazzjonali rigward l-impjiegi, u biex jipprovdu lill-ħaddiema migranti kollha l-protezzjoni legali u ċivili meħtieġa kontra l-abbuż u l-esplojtazzjoni;

81. Jitlob lill-Unjoni u lill-Istati Membri biex jaħdmu biex "iqarrbu l-istatus" tal-barranin li jinsabu legalment fl-Unjoni Ewropea ma' dak taċ-ċittadini ta' l-Istati Membri, u li jagħtuhom l-ikbar sigurtà legali possibbli biex jintlaħaq l-objettiv tat-twettiq ta' ċittadinanza miftuħa għall-extra-komunitarji;

82. Jagħraf kemm huma importanti li jiġi talanqas garantit livell minimu ta' drittijiet komuni għaċ-ċittadini kollha ta' pajjiżi terzi li jinsabu fit-territorji kollha ta' l-Unjoni Ewropea; jifraħ sadanittant bil-proġetti kollha maħsuba biex jinħoloq pedament għall-immigrati kollha li jidħlu fis-swieq tax-xogħol ta' l-Unjoni;

83. Jifraħ bil-proġett sabiex tinħoloq proċedura ġusta u trasparenti biex jidħlu l-ħaddiema staġunali u biex jingħatawlhom id-drittijiet tagħhom; huwa konvint li wieħed għandu jagħti l-akbar attenzjoni li tixirqilhom lill-ħaddiema migranti xi ftit kwalifikati u dawk anqas kwalifikati; iqis li hu importanti li tingħata protezzjoni lill-din il-kategorija ta' ħaddiema li huma partikularment vulnerabbli, vittmi tad-diskriminazzjoni u l-esplojtazzjoni;

84. Jitlob lill-Istati Membri biex, ġaladarba tkun ġiet aċċettata rijunifazzjoni familjari, jiggarantixxu li jagħtu l-istatus ta' awtonomija u permess biex wieħed jista' jaħdem lis-sieħeb u lit-tfal ta' min jikseb l-istatus uffiċjali prinċipali, biex hekk jiġu garantiti u mħarsa bis-sħiħ id-drittijiet tagħhom u biex titħaffef l-integrazzjoni soċjali tagħhom;

85. Jitlob lill-Istati Membri biex jikkunsidraw in-nominazzjoni ta' ombudsman f'livell nazzjonali jew lokali biex jittratta t-talbiet u l-ilmenti ta' l-immigranti dwar il-kundizzjonijiet tax-xogħol tagħhom, is-sigurtà legali tagħhom jew it-trattamenmt diskriminatorju u jitlob lill-Kummissjoni biex teżamina l-prattiki tajbin nazzjonali u reġjonali ta' l-Istati Membri f'din il-kwistjoni;

86. Jiddeplora n-nuqqas ta' għarfien tar-rabtiet li jeżistu bejn l-iskjavitù u l-migrazzjoni; jinnota li bosta nisa vittmi ta' l-iskjavitù m'għandhom ebda aċċess għal protezzjoni legali jew soċjali; jitlob lill-Kummissjoni u lill-Istati Membri biex jikkonċentraw fuq strateġiji biex jikkumbattu l-iskjavitù u li jirrigwardaw il-privenzjoni u l-protezzjoni tal-vittmi; jappella lill-Istati Membri biex jagħtu lil dawn in-nisa viża għal żmien twil;

87. Jitlob lill-Kummissjoni u lill-Kunsill biex il-ġlieda kontra t-traffikar tal-bnedmin li għandha x'taqsam mal-migrazzjoni tiġi meqjusa bħala prijorità għall-Unjoni Ewropea u li l-mezzi finanzjarji adegwati jiġu allokati għaliha; iqis li l-pjan ta' azzjoni li qed jiġi mħejji għandu jirrifletti din il-prijorità, jagħti importanza partikulari lill-persuni l-iktar vulnerabbli, b'mod partikolari lin-nisa u lill-minorenni, u jinsisti dwar il-kollaborazzjoni neċessarja mal-pajjiżi ta' oriġini u mal-pajjiżi ta' tranżitu;

88. Jistenna mingħand il-Kummissjoni li waqt l-adozzjoni tal-miżuri kontra t-traffikar organizzat tal-bnedmin li ġejjin minn pajjiżi li qed jiżviluppaw ma tikkriminalizzax lill-vittmi, imma tagħmel enfasi fuq l-ikkastigar tal-ħatjin; jinnota li bosta nisa vittmi ta' l-iskjavitù m'għandhom ebda aċċess għal protezzjoni legali jew soċjali; jistieden lill-Istati Membri biex jiggarantixxu lil dawn in-nisa l-possibbiltà li tingħatalhom viża għal żmien twil;

89. Jitlob lill-Kunsill biex idaħħal ir-rakkomandazzjonijiet ta' din ir-riżoluzzjoni fil-pożizzjoni komuni li qed titħejja għad-djalogu ta' livell għoli dwar il-migrazzjonijiet internazzjonali u dwar l-iżvilupp organizzat min-Nazzjonijiet Uniti f'Settembru 2006;

90. Jitlob lill-President tiegħu biex jgħaddi r-riżoluzzjoni preżenti lill-Kunsill, lill-Kummissjoni u lill-gvernijiet ta' l-Istati Membri, lill-pajjiżi kandidati ta' l-ACP, lill-Kunsill ta' l-ACP-UE u lill-Assemblea Parlamentari konġunta ACP-UE.

(1) ĠU L 317, 15.12.2000, p. 3. (2) ĠU L 287, 29.5.1998, p. 4. (3) ĠU L 164, 29.5.1998, p. 46. (4) http://www.worldbank.org/globaloutlook (5) www.gci.org, Ottubru 2005. (6) Imqabbla mal-livelli ta' l-2004, dan huwa ekwivalenti għal irduppjar ta' l-għajnuna. (7) Testi adottati, 17.11.2005, P6_TA(2005)0445.. (8) Testi adottati, 15.11.2005, P6_TA(2005)0427. (9) Testi adottati, 26.10.2005, P6_TA(2005)0408. (10) Testi adottati, 9.6.2005, P6_TA(2005)0235. (11) ĠU C 33, E 9.2.2006, p 311. (12) ILO: Preventing discrimination, exploitation and abuse of women migrant workers: an information guide – booklet 1: why the focus on women international workers, Ġinevra, 2003, OIT, p. 9.

L-objettiv ta' dan ir-rapport dwar l-inizjattiva huwa li janalizza r-rabta bejn il-migrazzjonijiet internazzjonali u l-iżvilupp sabiex joħroġ rakkomandazzjonijiet għall-politika ta' kopereazzjoni u l-iżvilupp ta' l-Unjoni Ewropea.

Fil-bidu tas-Seklu 21 fid-dinja hawn 175 miljun migrant (3% tal-popolazzjoni tad-dinja). Din iċ-ċifra kważi ttriplikat ruħha fi żmien 40 sena.

40% tal-migranti jgħixu f'pajjiżi li qegħdin jiżvilupaw.

Il-mottivazzjonijiet tal-migranti huma diversi. Id-demografija u l-faqar jibqgħu l-fatturi essenzjali. Imma l-istorja tal-popli, ir-rabtiet kulturali, il-prossimità lingwistika jew ir-reġimi anti-demokratiċi huma wkoll fatturi importanti fid-dinamika tal-migrazzjoni.

L-Unjoni Ewropea għandha rwol ewlieni sabiex il-migrazzjoni ssir strument ta' żvilupp. Dan ir-rapport huwa mfassal bħala "kaxxa ta' l-għodda" li minnha wieħed ikun jista' jinqeda biex jintlaħaq dan l-iskop.

Imma dan ir-rapport ma jistax ikun ezawrjenti għal żewġ raġunijiet.

-     L-iskop tiegħu ma hux li jagħmel dikjarazzjoni dwar il-politika għall-migrazzjoni ta' l-UE u ta' l-Istati Membri.

-     Fuq il-qasam ta' l-iżvilupp innifsu, dan ir-rapport ma jippretendix li jkopri totalment suġġett hekk vast; ċerti riflessjonijiet u ċerti rakkomandazzjonijiet ma humiex għajr abbozzi u jkun jeħtieġ li jiġu żviluppati fil-futur.

I)  Il-kwistjoni tal-migrazzjonijiet: sfida għall-politika ta' koperazzjoni ta' l-UE

A - Approċċ ġdid

Il-politika għall-migrazzjoni ta' l-Unjoni tistrieħ fuq żewġ illużjonijiet.

l-illużjoni li aħna nistgħu nagħmlu l-fruntieri inpenetrabbli.

L-Unjoni Ewropea u l-Istati Membri ma jħarsux lejn il-kwistjoni tal-migrazzjonijiet fir-relazzjonijiet tagħhom ma' pajjiżi terzi jekk mhux bħala t-tkomplija tal-politiki restrittivi tagħhom għall-migrazzjonijiet. Dan hu li joħloq il-perspettiva ffukata għal kollox fuq id-difiża u s-sigurtà u li jwassal biex il-piż tar-risponsabbiltà jintefa' fuq l-Istati tan-Nofsinhar ("l-esternalizzazzjoni" tal-politika tagħna għall-migrazzjonijiet).

Din il-kwistjoni ma tirriżultax minn din il-konnessjoni. Ir-rapporteur madankollu jrid jenfasizza li logika bil-maqlub ta' din biss tkun tista' tippermetti li l-UE taħdem fuq dawn l-implikazzjonijiet li jirriżultaw mill-migrazzjonijiet u l-iżvilupp.

L-illużjoni li l-kawża ta' l-immigrazzjonijiet hija biss il-faqar.

Kuntrarjament għal dak li wieħed jista' jifhem, l-iżvilupp fil-fażi inizjali tiegħu jġib intensifikazzjoni tal-migrazzjonijiet iktar milli tnaqqis. Iż-żieda fl-għajnuna weħedha għalhekk ma hix soluzzjoni. Hija kundizzjoni meħtieġa, imma weħedha mhix biżżejjed.

Għalhekk l-approċċ ta' l-Unjoni Ewropea jeħtieġ li jiġi rivedut.

Jeħtieġ li jkollu l-appoġġ ta' mekkaniżmi innovattivi biex jagħraf u jippromwovi l-irwol tal-migranti fil-ġlieda kontra l-faqar u favur l-iżvilupp. Jeħtiġilna li nibdlu l-loġika tagħna minn "iktar żvilupp biex ikun hemm anqas migrazzjonijiet" għal "immaniġġjar aħjar tal-migrazzjonijiet biex ikun hemm iktar żvilupp"

Dan għandu jkun ikkonċentrat l-iktar fuq l-Afrika u fuq il-migrazzjonijiet min-Nofsinhar għan-Nofsinhar.

J.         L-Unjoni Afrikana għażlet il-migrazzjoni bħala waħda mit-temi ta' azzjoni ewlenin tagħha, taħt it-tmexxija tal-President tal-Kummissjoni ta' l-Unjoni Afrikana, A. Konaré. L-UE għandha tqiegħed il-kwistjoni tal-migrazzjonijiet fuq nett fl-aġenda u fid-djalogu politiku bejn l-Ewropa u l-Afrika.

B - Strumenti Ġodda

L-Unjoni dawn l-aħħar xhur għamlet analiżi pertinenti dwar il-kwistjoni tal-migrazzjonijiet u ta' l-iżvilupp. Imma llum għad m'għandha ebda strument adattat biex tilħaq l-objettivi tagħha.

1 - Preambolu :

Ir-rispett għall-impenji politiċi li l-UE assumiet fl-2005 fil-qasam ta' l-għajnuna għall-iżvilupp (0.7% tal-PGD sa l-2015, l-irduppjar ta' l-għajnuna għall-Afrika sa l-2010).

2 - Żewġ objettivi :

a) L-integrazzjoni tal-kwistjoni tal-migrazzjonijiet u l-impatt tagħhom fuq l-iżvilupp fl-ODM

Għaliex għalkemm il-kwistjoni tal-migrazzjonijiet hija s-sinsla ta' l-ODM kollha, ebda waħda ma ssemmiha espiliċitament b'isimha. b) It-tqegħid tal-migrazzjonijiet fil-qalba tas-sħubija ACP-UE.

Inizjattivi għall-migrazzjonijiet għandhom jidħlu fin-neguzjati li għaddejin bħalissa, skond l-Artikolu 13 tal-ftehima ta' Cotonou.

Mogħnija b'25 miljun EURO, il-faċilità ACP-UE għall-migrazzjonijiet li se tibda taħdem fi tmiem l-2006, għandha tippermetti li jissaħħu l-kapaċitajiet tal-pajjiżi ta' l-ACP fil-qasam tal-migrazzjonijiet.

3 - Żewġ strumenti prioritarji :

a) Fond speċifiku li jkollu mmaniġġjar flessibbli biżżejjed u kapaċi jirreaġixxi biex jiffinanzja azzjonijiet ta' żvilupp konġunt.

L-UE llum għandha l-programm AENEAS iżda dan jintuża l-iktar għal attivitajiet ta' protezzjoni tal-fruntieri u għal studji li l-iskop tagħhom kultant ikun dubbjuż. Dan il-programm, bħal dak li jeħodlu postu fl-2007, għandu fil-fatt jitqiegħed għad-dispożizzjoni ta' strateġija ta' tisħiħ tal-kontribuzzjoni tal-migrazzjonijiet għall-iżvilupp, b'mod partikolari għall-finanzjament ta' mikro-proġetti ta' żvilupp konġunt.

b) Fond ta' garanzija sabiex jassigura l-vijabilità tal-mikro-proġetti tal-migranti u jagħmel impatt massimu fuq l-iżvilupp.

Din il-kwistjoni ta' garanzija hija fundamentali. Fid-dispożizzjonijiet kollha attwali, dan huwa l-istrument li jonqos biex "ngħaddu għall-istadju li jmiss" u biex jippermetti lill-mikro-intraprendituri biex jiżviluppaw l-attività tagħhom u joħolqu SMEs.

(II).  Il-migranti għas-servizz ta' l-iżvilupp tal-pajjiżi ta' oriġini

A - Il-promozzjoni ta' żvilupp konġunt u l-konsakrazzjoni tiegħu fit-testi Ewropej

L-iżvilupp konġunt huwa definit bħala l-valorizzazzjoni tal-potenzjal li jirrapreżentaw il-komunitajiet ta' migranti stabbiliti f'pajjiżi sinjuri u għas-servizz ta' l-iżvilupp tal-pajjiż ta' oriġini tagħhom. Dan għandu l-ħila jittrasforma l-migrazzjonijiet f'għodda potenzjali għall-iżvilupp, grazzi għall-għajnuna reċiproka bejn il-popli.

B - Għanjuna għat-trasferiment ta' fondi

It-trasferiment ta' fondi għall-pajjiżi ta' oriġini (232 miljardi ta' dollari fl-2005, li minnhom 167 mibgħuta lill-PVE) jaqbżu bil-bosta l-APD, u dan mingħajr ma wieħed iqis it-traserimenti informali li huma stmati li talanqas jilħqu l-50% taċ-ċifra uffiċjali. Il-biċċa l-kbira minn dawn il-fondi jservu biex jitimgħu l-familji, u ħafna drabi biex dawn ma jmutux bil-ġuħ. Parti żgħira biss minn dawn it-trasferimenti jmorru biex jiffinanzjaw investimenti. Il-politika ta' l-UE jeħtieġ tkabbar għall-massimu l-kontribuzzjoni tagħhom għall-iżvilupp tal-pajjiżi ta' oriġini billi:

-     tgħin biex tiffaċilita t-trasferiment ta' fondi għall-migranti.

-     tkabbar ta' l-aċċes tal-migranti għas-servizzi finanzjarji.

-     tindirizza l-flus li l-migranti jibagħtu lura f'pajjiżhom lejn investimenti produttivi.

C - Il-prevenzjoni tat-telf ta' l-aħjar imħuħ u l-mitigazzjoni ta' l-impatt negattiv fuq l-iżvilupp.

Għal ħafna pajjiżi tan-Nofsinhar, il-migrazzjonijiet huma sinonimi mat-tluq ta' ċittadini l-iktar kwalifikati jew l-iktar intraprenditorjali. Dan "it-telf ta' l-aħjar imħuħ" iċaħħad lill-Istati tan-Nofsinhar mid-dħul finanzjarju u jċaħħadhom milli japprofittaw mill-'profitt mill-investiment' li jkun sar fl-edukazzjoni ta' dawn il-persuni.

Imma dak li huwa iktar gravi hu li meta jintlaqtu professjonisti fis-setturi tas-saħħa jew ta' l-edukazzjoni, il-migrazzjoni tikkomprometti l-proviżżjoni u l-kwalità ta' serviżżi essenzjali fil-pajjiżi tan-Nofsinhar. Il-gravità tal-kriżi tas-sistemi tas-saħħa fl-Afrika titlob soluzzjoni urġenti u speċifika. Fin-Nofsinhar jeħtieġ li jitwettqu strateġiji biex "iħarrġu u jżommu".

Fit-Tramuntana jeħtieġ li jiġu adottati miżuri fil-qafas ta "kodiċi ta' kondotta tajba" Ewropej u nazzjonali, biex jiġi organizzat l-impjegar ta' ħaddiema min-Nofishar.

L-iskop prioritarju għandu jkun "iċ-ċirkulazzjoni" ta' l-imħuħ biex tpatti għall-effetti negattivi tat-"telf" tagħhom. L-iktar triq promettenti f'din id-direzzjoni tinsab fid-dispożizzjonijiet għal "karigi doppji" li għandhom jippermettu għar-riċerkaturi, l-għalliema u r-rappreżentati tal-korp mediku tan-Nofinhar li jiddedikaw nofs il-ħin tagħhom lil organizzazzjoni f'pajjiżhom.

D - L-adattament tal-politika għall-migrazzjoni għall-ħtiġijiet ta' l-iżvilupp

L-iskop hu li wieħed jinkuraġġixxi l-migrazzjonjiet ċirkulari jew "pendulari" li jagħtu l-iktar kontribuzzjoni sinifikkativa għall-iżvilupp tal-pajjiżi ospitanti jew tat-tluq.

III)   Ħidma dwar migrazzjonijiet min-Nofisnhar għan-Nofinhar.

A - It-tisħiħ tal-ħiliet fil-pajjiżi tan-Nofsinhar biex jimmaniġġjaw il-politika tagħhom għall-migrazzjoni.

Jeħtieġ li jiġi rikonoxxut id-dritt tal-pajjiżi tan-Nofsinhar li jmexxu politika awtonoma għall-migrazzjoni u li ma jisfawx l-istrument ta' politika għall-migrazzjopni dettata mit-Tramuntana, u jeħtieġ li l-ħiliet ta' dawn l-Istati f'dan il-qasam jiġu appoġġjati.

B - Appoġġ għall-inizjattivi ta' organizzazzjonijiet reġjonali

Fl-ispazju taċ-ċirkulazzjoni ħielsa uffiċċjali (tat-tip CEDEAO) huwa meħtieġ li wieħed iħallas biex jaqsam fruntiera internazzjonali. L'UA u l-organizzazzjonijiet reġjonali Afrikani jistgħu jkollhom rwol importanti fl-għoti ta' direzzjoni lill-migrazzjoni ekonomika fl-Afrika, permezz pereżempju ta' għadd ta' ftehimiet bilaterali jew multilaterali, flimkien ma' għażla ta' klawsoli dwar id-drittijiet tal-bniedem u man-normi ta' l-ILO.

C - It-tnedija ta' "mini Marshal Plans" reġjonali fiż-żoni prinċipali ta' emigrazzjoni fl-Afrika

Il-ġlieda kontra l-immigrazzjoni illegali tista' ssib effikaċità ġdida fi ħdan approċċ reġjonali integrat, iffukat fuq għadd ta' żoni kruċjali.

D - Azzjonijiet li jimmiraw lejn il-poli migratorji u ż-żoni ta' tranżitu tal-migranti.

Ikun utli li wieħed jidentifika l-"poli migratorji" li jfissru daqstant spażji fejn l-interventi huma possibbli. Il-poli migratorji jistgħu jiġu definiti bħala l-postijiet tal-konverġenza u tad-diverġenza tal-flussi ta' migranti volontarji. Dawn jistgħu jkunu nazzjonijiet (il-Gabon, in-Niġerja, il-Kosta ta' l-Avorju u l-Libja) jew bliet kbar (Dakar, Akkra, Cotonou, Doula, Nairobi...) li għandhom mezzi ta' trasport u ta' komunikazzjoni moderni, artijiet fejn jistgħu jospitaw, artijiet tat-tluq u ta' tranżitu li joħolqu "id-dehra" ta' rotta migratorja attiva ħafna (l-art fit-Tramuntana ta' Sahel).

Dawn l-azzjonijiet ikunu intiżi biex jgħinu lill-popolazzjoni tal-migranti l-iktar vulnerabbli (nisa, tfal weħedhom) biex jgħinuhom isiru awtonomi u jiksbu l-milja tagħhom mingħajr il-bżonn ewlieni tal-mobilità.

E - Il-kunsiderazzjoni li l-aħjar tittieħed: l-irwol speċifiku tan-nisa fil-migrazzjonijiet u fl-iżvilupp

Il-politiki għall-migrazzjoni ma jqisux, jew ftit iqisu, l-irwol speċifiku tan-nisa. Sadanittant, kważi nofs il-migranti internazzjonali (48.6%) huma nisa. Għadd ta' studji wrew ukoll li appoġġ li jingħata għal proġetti mmexxija minn nisa jagħti kontribut tajjeb ħafna għall-iżvilupp. Il-programmi jridu b'mod partikolari jappoġġjaw il-banek ta' l-irħula u l-gruppi femminili għat-tifdil li taw xhieda tajba tal-kontribut tagħhom għall-iżvilupp.

F - Investiment fl-edukazzjoni u fit-taħriġ

Il-Parlament ilu bosta snin jirrakkomanda li 20% tal-fondi għall-iżvilupp jiġu allokati għal skopijiet ta' edukazzjonu u ta' saħħa bażika. Ninsabu bogħod minn dan... L-istess, għall-pajjiżi ta' l-ACP, is-somma għall-edukazzjoni u s-saħħa fi ħdan il-FED (4.98% fl-2004) hija bogħod ħafna minn dan l-ammont ta' riferenza.

G - Il-promozzjoni ta' "xogħol deċenti"

Bħala protagonist fix-xena dinjija, l-UE għandha tkun wieħed mid-difensuri prinċipali ta' aġenda favur xogħol deċenti u pensjoni deċenti għal kulħadd. "Xogħol deċenti" għandu referenza doppja għall-migranti :

-     dik fit-Tramuntana, fejn il-pajjiżi sinjuri jmisshom joffri xogħol deċenti għal kulħadd,

-     dik fin-Nofsinhar, fejn sħubija għall-iżvilupp immirata fuq xogħol deċenti tkun tista' tippermetti interventi fuq il-migrazzjonijiet.

IV) Il-problema speċifika tar-refuġjati u n-nies "spustjati"

A - In-nies "spustjati" : vittmi minsija ta' kriżijiet minsija...

Fl-2005 fid-dinja hawn kważi 9.2 miljun refuġjat u 25 miljun ta' nies "spustjati fl-intern ta' pajjiżhom stess" minħabba gwerer u persekuzzjonijiet, u nofshom jinsabu fl-Afrika. Miljuni ta' ċittadini huma wkoll imtarrfin minn djarhom minħabba katakliżmi, bħalma huma n-nuqqas ta' xita u s-sitwazzjonijiet ta' kriżi minħabba deforestazzjoni u d-deżertifikazzjoni. Dan in-numru jista' jilħaq il-50 miljun minn hawn u ftit snin oħra.

Is-sistema attwali ta' protezzjoni għar-refuġjati ma tippermettix li tingħata għajnuna lil dawn il-popolazzjonijiet, hekk li qed toħloq ġerarkija intollerabbli tal-vittmi. Mingħajr il-mandat biex tagħmel dan, l-HCR qiegħda tgħin 5.6 miljuni ta' nies spustjati, minnbarra l-attività tagħha fost 9.2 miljun refuġjat.

L-UE jeħtieġ li ssosni l-attività tagħha u tisħaq fuq il-komunità internazzjonali sabiex tiċċara l-kunċetti ta' refuġjat politiku, ekonomiku u ambjentali u biex toffri lil kull waħda minn dawn il-kategoriji l-protezzjoni u l-għajnuna xierqa.

Jeħtieġ li tingħata lin-nies "spustjati" immedjatament u b'urgenza l-protezzjoni prevista mill-Konvenzjoni tal-1951 għar-refuġjati.

B - Appoġġ għal operazzjonijiet ta' ripatrijazzjoni u ta' rijallokazzjoni volontarja tar-refuġjati u tan-nies spustjati bi sħubija ma' l-HCR u mal-pajjiżi jew l-organizzazzjonijiet reġjonali kkonċernati.

V) Il-migrazzjonijiet, id-dinjità u d-drittijiet tal-bniedem

Il-migranti huma l-ewwel vittmi ta' sitwazzjoni prekarja minħabba żewġ raġunijiet : l-inugwaljanza soċjali u d-diskriminizzazzjoni, l-inugwaljanzi bejn il-pajjiżi u d-dominazzjoni tan-Nofisnhar mit-Tramuntana.

A - Il-protezzjoni tad-drittijiet tal-migranti

Ebda Stat Ewropew għadu ma rratifika l-iktar strument komprensiv għad-drittijiet tal-ħaddiema migranti : il-Konvenzjoni internazzjonali għall-protezzjoni tad-drittijiet tal-migranti adottatata fit-18 ta' Diċembru mill-Assemblea Ġenerali tan-NU u li daħlet fis-seħħ fl-1 ta' Lulju 2003. Dan għandhom jagħmluh mill-iktar fiss.

B - Attività favur l-integrazzjoni tal-migranti.

Ċifra waħda hija biżżejjed biex turi n-nuqqas ta' involviment ta' l-UE fil-kwistjoni ta' l-integrazzjoni : 15 miljun EURO ntefqu mill-1999 'l hawn fuq programmi għall-integrazzjoni ta' l-immigranti legali, jiġifieri 0.5 EURO għal kull immigrant...

L-objettiv jibqa' li tiġi implimentata ċittadinaza Ewropea miftuħa għall-extra-komunitarji ("ċittadinanza ċivili"). Sakemm dan iseħħ, tajjeb li "jitqarreb l-istatus" tal-barannin li jinsabu fl-Unjoni Ewropea ma' dak taċ-ċittadini ta' l-Istati Membri u li tingħatalhom l-akbar sigurtà legali.

C - Il-ġlieda kontra t-traffikar marbut mal-migrazzjonijiet

L-għeluq tal-fruntieri ħoloq ekonomija ta' traffiku klandestin li nbidel fi traffiku mafjuż ta' l-immigrazzjoni, tad-dokumenti foloz u tal-forniment ta' ħaddiema.

L-UE jeħtieġ li tagħmel prijorità mill-ġlieda kontra t-traffikar tal-bnedmin marbut mal-migrazzjonijiet. Fil-pjan ta' azzjoni tagħha l-Kummissjoni għandha tagħti importanza partikulari lill-persuni l-iktar vulnerabbli, b'mod partikolari lin-nisa u lill-minorenni, u tinsisti fuq il-kollaborazzjoni neċessarja mal-pajjiżi ta' oriġini u mal-pajjiżi ta' tranżitu;

PROPOSTI

Il-Kumitat għall-Impjiegi u l-Affarjiet Soċjali jistieden lill-Kumitat għall-Iżvilupp, bħala l-kumitat risponsabbli, biex jinkludi fil-proposta għal riżoluzzjoni li se jadottaw is-suġġerimenti li ġejjin:

1.  Jilqa' l-konklużjonijiet tal-Presidenza tal-Kunsill Ewropew tal-15 u s-16 ta' Diċembru 2005 dwar "approċċ globali dwar il-kwistjoni tal-migrazzjoni" kif ukoll il-proposti reċenti tal-Kummissjoni dwar it-telf ta' l-aħjar imħuħ, dwar il-flus li jintbagħtu lejn il-pajjiżi ta' oriġini, dwar id-dijaspori, dwar il-migrazzjoni temporanja/ċirkulari, dwar id-drittijiet tas-sigurtà soċjali, dwar l-għoti ta' viża multipla, eċċ.;

2.  jinkuraġġixxi lill-pajjiżi minn fejn joriġinaw u l-pajjiżi tul ir-rotta (transit) biex jieħdu parti attiva fl-approċċ ġdid għal migrazzjoni u l-iżvilupp tiegħu;

3.  jenfasizza l-importanża tat-traferiment ta' fondi lejn il-pajjiżi ta' oriġini u jinsisti fuq il-ħtieġa li jiġu definiti l-metodi li jippermettu li dawn il-fondi jaslu iktar malajr, b'mod għad sigur u b'anqas spejjeż għal min jirċevihom, li għandu jikkontribwixxi wkoll biex jiffaċilita l-investiment produttiv fil-pajjiżi li qegħdin jiżviluppaw;

4.  Jagħraf l-importanza tad-dijaspori fit-tisħiħ tar-relazzjonijiet bejn l-Unjoni Ewropea u l-pajjiżi ta' oriġini, b'mod partikulari fil-qasam tal-migrazzjoni; jitlob li jkun hemm koperazzjoni iktar mill-qrib bejn l-istituzzjonijiet tal-pajjiżi li qed jiżviluppaw u l-Istati Membri ta' l-Unjoni Ewropea, anke fit-twettiq tal-proġetti ta' żvilupp komuni;

5.  Jifraħ bl-inizjattivi li għandhom l-iskop li jwaqqfu t-telf ta' l-aħjar imħuħ minn ċerti pajjiżi partikulari u f'setturi preċiżi, hekk li jevolvuhom f'migrazzjoni ċirkulari, u jitlob li jiġi inkoraġġut it-twaqqif ta' koperazzjoni reċiproka bejn l-Unjoni Ewropea u l-pajjiżi ta' oriġini, pereżempju b'istituzzjonijiet u programmi bħall-AENEAS;

6.  jitlob li tkun rikonoxxuta l-importanza ta' l-irwol tan-nisa għall-immigrazzjoni u għall-iżvilupp tal-komunità ta' oriġini tagħhom u jinsisti li tkun ikkunsidrata l-ugwaljanza tas-sessi fil-programmi u l-proġetti kollha bbażati fuq l-iżvilupp u l-immigrazzjonijiet;

7.  jipproponi li l-kwistjoni tal-migrazzjoni tkun integrata fil-politiki barranin ta' l-Unjoni Ewropea, fuq l-eżempju tal-proċess ta' Barċellona;

8.  jirrikonoxxi l-bżonn ta' ftehimiet ta' koperazzjoni u tad-dħul mill-ġdid bejn l-UE u l-pajjiżi ta' oriġini u ta' tranżitu ta' l-emigranti, skond il-prinċipji universali tad-drittijiet tal-bniedem u ta' tmexxija tajba.

9.  jilqa' l-proposta tal-Kunsill li fl-2006 tiġi organizzata laqgħa ministerjali Euromed dwar l-immigrazzjoni; jappoġġja bl-istess mod il-laqgħa għolja Ewro-Afrikana dwar il-migrazzjonijiet, li għanda tinżamm f'Rabat f'Lulju 2006, bil-ħsieb li tiddiskuti l-migrazzjoni mill-pajjiżi tal-Magreb u dawk 'l isfel mis-Saħara lejn l-Ewropa;

10. jirrakkomanda li l-Kunsill jadotta miżuri xierqa bil-ħsieb li jiggarantixxi f'kull Stat Membru tisħiħ tal-koperazzjoni u tal-koordinazzjoni bejn is-servizzi kompetenti differenti fil-qasam ta' l-immigrazzjoni u ta' l-iżvilupp.

PROĊEDURA

PROPOSTI

Il-Kumitat għall-impjiegi u l-affarjiet soċjali jistieden lill-kumitat għall-iżvilupp, bħala l-kumitat responsabbli, jinkludi fil-proposta għal riżoluzzjoni li jadottaw is-suġġerimenti li ġejjin:

1.  huwa ta' l-opinjoni li politika ċara u tajba definita mill-immigrazzjoni ekonomika tista' twassal għal soluzzjoni parzjali għal żmien qasir għan-nuqqas ta' ħaddiema li jaffetwaw lis-swieq tax-xogħol ikkawżat mit-tibdiliet demografiċi li għaddejja minnhom il-popolazzjoni Ewropea; iqis li politika ugwali ma għandix tevita milli tieħu azzjoni u tuża bl-aħjar mod ir-riżerva ta' ħidma eżistenti fis-swieq nazzjonali tax-xogħol ( nazzjonali u immigrati diġà stabbiliti);

2.  Jistieden lill-Istati Membri biex jistabbilixxu proċedura ġusta u trasparenti li tiffaċilita għall-migranti l-aċċess għal xogħol li l-kundizzjonijiet ta' iġene u ta' sigurtà tiegħu, kif ukoll il-kundizzjonijiet ta' kif jiġu impjegati, joffrulhom garanzija sħiħa għad-dinjità tagħhom;

3.  Jenfasizza li l-migrazzjoni u l-integrazzjoni huma intimament marbutin ma' xulxin u li sabiex jiġi żgurat li migrazzjoni tirnexxi u li minnha jibbenefikaw il-partijiet kollha kkonċernati, l-istrateġiji għall-migrazzjoni jridu jkunu akkumpanjati minn strateġiji ħollistiċi u multidimensjonali;

4.  Jinnota li l-biċċa kbira tal-migranti - ikun liema jkun l-istatus uffiċjali tagħhom - jgħixu fl-ibliet u li l-ibliet jeħtieġ li jagħrfu l-isfidi u jesplojtaw il-vantaġġi li jiġu mill-migrazzjoniji, indipendentement mill-kompetenzi u r-riżorsi disponibbli; iqis li dan għandu jirrifletti ruħu fil-programmi kollha u fil-politiki kollha li jikkonċernaw il-migrazzjoni u l-iżvilupp, inklużi l-programmi bħal AENEAS u Europe Aid;

5.  Jagħraf li l-fenomenu tat-"telf ta' kapaċitajiet", li jwassal għall-ftaqir tar-riżorsi intellettwali, akkademiċi u professjonali ta' pajjiżi terzi minħabba l-migrazzjoni lejn l-Unjoni Ewropea, għandu impatt negattiv fuq l-iżvilupp ġenerali ta' dawn il-pajjiżi billi jaħlilhom ir-riżorsi professjonali tagħhom; iqis madankollu li jaqbel li wieħed joqgħod attent għal aġenżiji bla skrupli li jirrekrutaw staff kwalifikat bi pretensjonijiet foloż; lqa' b'sodisfazzjon il-proposta tal-Kummissjoni biex tħeġġeġ migrazzjoni ċirkulari fejn il-migranti jivvjaġġaw bir-rirtorn bejn il-pajjiż ta' oriġini tagħhom u l-pajjiż tad-destinazzjoni, u b'hekk il-pajjiż ta' oriġini tagħhom ikun jista' jibbenefika mit-tagħlim u mill-esperjenza li kisbu; jenfasizza li jaqbel li l-migrazzjoni ċirkulari tkun akkumpanjata minn miżuri ta' integrazzjoni favur il-migranti meta huma joħroġu jew jidħlu fil-pajjiż; jenfasizza l-irwol li għandu jkollha s-soċjetà ċivili, l-NGO's u l-imsieħba soċjali f'dan il-proċess; iqis li l-Istati Membri li jattiraw parti mill-migrazzjoni jridu wkoll jikkontribwixxu u jirrispondu għall-ħtiġijiet ta' pajjiżi terzi fil-qasam tal-edukazzjoni; iqis li hu essenzjali li jittieħdu miżuri biex jipprevjenu l-migrażżjoni ta' bil-fors u partikularment jipprevjenu, jikkontrollaw u jillimitaw it-traffikar tal-bnedmin;

6.  Jilqa' wkoll il-proposti tal-Kummissjoni sabiex tħejji djalogu dwar kwistjonijiet relatati mal-permessi ta' residenza u ta' xogħol, kif ukoll dwar it-tmexxija ta' programmi ta' mobilità tal-ħaddiema migranti li tgħaqqad il-kapaċitajiet ta' l-migranti u l-bżonnijiet tal-pajjiż li għadu qed jiżviluppaw;

7.  Jinnota li billi ċerti kwalifiki vokazzjonali u/jew akkademiċi tal-ħaddiema li ġejjin minn pajjiżi terzi jew mhumiex rikonoxxuti jew huma rikonoxxuti b'diffikultà id-dħul ta' ħaddiema bħal dawn sabiex jidħlu fis-suq tax-xogħol ta' l-Istati Membri ta' l-Unjoni Ewropea bl-istess kundizzjonijiet huwa aktar diffiċli; jikkunsidra l-fatt li l-migranti għandu jkollhom aċċess għall-programmi ta' taħriġ meta jkunu impjegati fl-Unjoni Ewropea sabiex jiżviluppaw il-kompetenza professjonali tagħhom;

8.  Jitlob lill-Kummissjoni sabiex tibda djalogu mingħajr dewmien mal-gvernijiet tal-pajjiżi ta' oriġini, sabiex jikseb leġiżlazzjoni bilanċjata, kif ukoll assistenza finanzjarja u teknika, li tagħmel il-migrazzjoni possibbli u tippermetti l-iżvilupp ta' l-esperjenza professjonali; bl-istess mod jitlobha, fil-kuntest ta' dan id-djalogu, issaħħaħ l-iżvilupp ta' miżuri speċifiċi speċjalment fis-setturi affettwati mit-telf ta' l-aħjar imħuħ (per eżempju: il-kura tas-saħħa, l-edukazzjoni u t-taħriġ), b'koperazzjoni mal-pajjiżi kkonċernati; għalhekk iħeġġeġ lill-Kummissjoni tifformula programmi speċifiċi għall-pajjiż, li jistgħu jġibu lura fil-pajjiżi li għadhom qed jiżviluppaw il-kapital uman, finanzjarju, ekonomiku u soċjali sabiex jissaħħaħ l-iżvilupp demokratiku u r-rispett tal-valuri fundamentali;

9.  Jinnota li l-migranti jistgħu jikkontribwixxu b'mod sinifikanti għall-iżvilupp ta' pajjiżhom permezz ta' l-esperjenza li jkunu kisbu mix-xogħol u mill-istudju fl-Unjoni Ewropea, iżda għandu jkun rikonoxxut il-fatt li għandha tkun l-għażla libera tal-migranti dwar jekk iridux u b'liema mod jistgħu jikkontribwixxu għall-iżvilupp ta' pajjiżhom;

10. Jikkunsidra li l-flus li jintbagħtu mill-migranti jikkostitwixxu dħul finanzjarju importanti ħafna għall-pajjiżi li għadhom qed jiżviluppwa u jilqa' l-propsti tal-Kummissjoni li jiġu ssimplifikati u jitraħħsu t-trasferimenti u li jinfetħu opportunitajiet għall-migranti li jkunu jixtiequ jużaw parti mill-kontribuzzjonijiet tagħhom għal kull tip ta' investiment li jappoġġja l-iżvilupp f'pajjiżhom;

11. Jilqa' l-proposta tal-Kummissjoni sabiex jiġu kkunsidrati l-miżuri dwar it-trasferiment tad-drittijiet tal-pensjoni, ir-rikonoxximent tal-kwalifiki u t-tħaddim ta' mekkaniżmi li jiffaċilitaw il-mobilità tar-riċerkaturi u professjonisti oħra sabiex ikunu jistgħu, meta jixtiequ, jirriturnaw lura lejn pajjiżhom u jerġgħu jintegraw b'suċċess;

12. Jistenna mingħand il-Kummissjoni li bl-adozzjoni tal-miżuri kontra t-traffikar organizzat tal-bnedmin li ġejjin minn pajjiżi li qed jiżviluppaw, ma tikkriminalizzax lill-vittmi, imma tagħmel l-enfasi fuq il-penalizzazzjoni tal-ħatjin; jinnota li bosta nisa vittmi tat-traffikar tal-bnedmin m'għandhom ebda aċċess għal protezzjoni legali jew soċjali; jappella lill-Istati Membri biex jiggarantixxu lil dawn in-nisa l-possibiltà li tingħatalhom viża għal żmien twil;

13. Josserva li l-ħaddiema migranti qed jiġu sfruttati dejjem aktar u jistieden lill-Istati Membri biex jiggarantixxu l-applikazzjoni tal-leġiżlazzjonijiet Ewropej u nazzjonali rigward l-impjiegi, u biex jipprovdu lill-ħaddiema migranti kollha l-protezzjoni legali u ċivili meħtieġa kontra l-abbuż u l-isfruttament;

14. Jenfasizza li r-riċerka u t-taħriġ li jkunu ħadu l-migranti li ġejjin mill-pajjiżi li għadhom qed jiżviluppaw mill-Unjoni Ewropea għandhom ikunu akkumpanjati minn kundizzjonijiet xierqa għal negozjanti żgħażagħ sabiex dawn ta' l-aħħar ikollhom motivazzjoni akbar li jinvestu f'pajjiżhom, bil-ħsieb li jiżguraw li t-trasferimenti tal-flus ikunu jistgħu jintużaw b'mod effettiv;

15. Jagħraf l-importanza ta' l-irwol ta' l-SME's fil-ħolqien ta' l-impjiegi u fl-iżvilupp; iħeġġeġ lill-Kummissjoni biex tiżviluppa, b'kollaborazzjoni mal-Bank Ewropew ta' l-Investiment, programmi li jħeġġu lill-migranti biex jivestu aktar f'dan it-tip ta' intrapriża;

16. Jirrikonoxxi li huwa essenzjali li ż-żgħażagħ jiġu mħeġġa li jżommu xi forma ta' relazzjoni ma' pajjiżhom u li jrabbu spirtu ta' impenn lejn l-iżvilupp ta' dak il-pajjiż; jistieden lill-Kummissjoni u lill-Istati Membri biex iwettqu għadd ta' programmi ta' skambji għaż-żagħżagħ fil-qasam tar-riċerka u biex jippromwovu rabtiet aktar mill-qrib fil-qasam tal-kultura u ta' l-edukazzjoni mal-pajjiżi terzi konċernati biex jiġu żviluppati sinerġiji bejn organizzazzjonijiet ta' l-edukazzjoni ta' l-Unjoni Ewropea u dawk ta' pajjiżi li qed jiżviluppaw, kif ukoll biex jappoġġjaw il-miżuri għar-riintegrarazzjoni;

17. Jirrikonoxxi wkoll il-bżonn ta' reviżjoni, fid-dawl ta' l-iżviluppi riċenti, tal-miżuri ristrettivi li jipprevjenu l-moviment ħieles tal-ħaddiema migranti mill-Istati Membri ġodda bil-ħsieb li jsir użu aħjar mill-forza tax-xogħol eżistenti fl-Unjoni Ewropea;

18. jistieden lill-Kummissjoni biex tippromwovi u ssaħħaħ, flimkien ma' l-Istati Membri, il-programmi ta' skambji ta' studenti u żgħażagħ gradwati minn pajjiżi li qegħdin jiżviluppaw biex bi programmi bħal Erasmus, Erasmus-Mundus, Comenius, Socrates u Leonardo da Vinci, jilħqu l-objettivi tal-migrazzjoni temporanja, kif ukoll t-trasferiment ta' prattiki tajbin u ta' kompetenzi lill-pajjiż ta' oriġini;

19. jistieden lill-Kummissjoni u lill-Istati Membri biex itejbu l-aspett soċjo-professjonali u mhux finanzjarju tal-kontribuzzjoni għall-iżvilupp, billi jgħinu lill-pajjiżi jiddefinixxu d-dijaspora tagħhom u jistabbilixxu rabtiet magħha filwaqt li jeżaminaw l-irwol taż-żgħażagħ u jiffavorixxu l-integrazzjoni u ċ-ċittadinanza tagħhom billi jġibu flimkien il-parteċipanti differenti fil-qasam tal-migrazzjoni ekonomika, bħalma huma l-oganizzazzjonijiet li m'humiex statali u l-imsieħba soċjali tal-pajjiżi ta' oriġini u tal-pajjiżi ospitanti;

NOTA SPJEGATTIVA

L-Unjoni Ewropea qed taffaċċja sfidi kbar, fosthom l-isfida importanti tal-bidliet demografiċi. Minħabba t-tixjiħ tal-popolazzjoni, l-Unjoni Ewropea fil-futur qrib mhijiex se tkun kapaċi tissodisfa t-talbiet tas-suq tax-xogħol tagħha. Għalhekk huwa neċessarju li jiġu żviluppati strateġiji u politiki ċari u definiti sewwa sabiex jipprevjenu jew għall-inqas jillimitaw il-konsegwenzi negattivi ekonomiċi u soċjali ta' dan il-fenomenu.

Wieħed mill-metodi possibbli li jwieġeb għat-talbiet tas-suq tax-xogħol ta' l-Unjoni Ewropea hija l-migrazzjoni ekonomika, li tkopri migrazzjoni mill-pajjiżi li għadhom qed jiżviluppaw lejn l-UE. Għalkemm il-politika ta' migrazzjoni minn dejjem kienet kompitu ta' l-Istati Membri, wasal iż-żmien li nwieġbu għall-isfidi li naffaċjaw fuq livell Ewropew.

Minkejja dan, hemm bżonn li wieħed jinnota li l-migrazzjoni ekonomika ma tistax tkun ħlief soluzzjoni proviżorja u li minnha għandhom japprofittaw mhux biss l-Unjoni Ewropea iżda wkoll il-pajjiżi ta' oriġini tal-miġranti.

Għalhekk, sabiex jitnaqqsu l-effetti negattivi mit-telf ta' l-aħjar imħuħ fil-pajjiżi ta' oriġini tal-migranti u sabiex jiġu mgħejjuna dawk il-pajjiżi biex b'mod effettiv jużaw numru ta' benefiċċji konsiderevoli li rċevew mingħand il-migranti li marru lura, l-UE għandha tinkoraġġixxi diversi miżuri, fosthom il-migrazzjoni ċirkulari, rabtiet aktar mill-qrib mad-dijaspora, il-promozzjoni ta' programmi ta' skambji kulturali u edukattivi għaż-żgħażagħ.

PROĊEDURA

PROPOSTI

Il-Kumitat għal-Libertajiet ċivili, il-Ġustizzja u l-Intern jistieden lill-Kumitat għall-Iżvilupp, bħala l-kumitat responsabbli, jinkludi fil-proposta għal riżoluzzjoni s-suġġerimenti li ġejjin:

A. billi l-integrazzjoni tal-migranti hija proċess bilaterali bbażat fuq ir-reċiproċità tad-drittijiet u ta' l-obligazzjonijiet tal-migranti legali u tas-soċjetà li qed tilqagħhom, li għandha l-għan li tiżgura li l-immigranti jkunu kapaċi jipparteċipaw f'din is-soċjetà,

1.  Jikkunsidra li d-dħul ta' migranti ekonomiċi jista' jkun ta' benefiċċju għall-partijiet kollha kkonċernati;

2.  Jikkunsidra li l-politika Ewropea dwar il-migrazzjoni u l-iżvilupp għandha l-ewwelnett tkun ibbażata fuq il-prinċipji ta' solidarjetà mal-pajjiżi terzi u ta' żvilupp konġunt bil-għan li jiġu affrontati l-kawżi profondi tal-migrazzjoni, u b'mod partikulari sabiex jinqered il-faqar;

3.  Jilqa' kull miżura oħra adottata bil-għan li ttejjeb il-politika dwar il-migrazzjoni u jenfasizza l-ħtieġa ta' approċċ globali b'viżjoni preċiża ta' l-azzjonijiet l-aktar importanti li għandhom jittieħdu fil-qasam tal-politika dwar il-migrazzjoni, aktar milli jiġu appoġġjati miżuri frammentati għall-iżvilupp ta' din il-politika;

4.  Jitlob lill-Istati Membri biex jimplimentaw politika ġenwina biex jilqgħu l-migranti bbażata fuq ir-rispett tad-drittijiet tal-bniedem u tal-liġi internazzjonali;

5.  Jitlob lill-Kumissjoni u lill-Istati Membri biex jipproponu inizjattivi konkreti biex jiġi żviluppat aċċess għall-proċeduri għall-immigrazzjoni legali biex hekk jikkumbattu s-suq ta' xogħol illegali u l-esplojtazzjoni li jaqgħu vittmi tagħhom il-ħaddiema migranti;

6.  Jenfasizza li l-Unjoni Ewropea għandha tintegra t-tmexxija konġunta tal-flussi migratorji b'mod aktar effettiv fir-relazzjonijiet tagħha mal-pajjiżi li għadhom qed jiżviluppaw u li l-ftehimiet ta' assoċjazzjoni għandhom jirriflettu l-impenn taż-żewġ partijiet sabiex jassumu l-obbligazzjonijiet tagħhom fil-kontroll tal-fruntieri u fit-tmexxija tal-flussi migratorji; jinsisti madanakollu, fuq il-fatt li dan għandu jsir fuq bażi ta' sħubija u li l-Unjoni Ewropea ma għandha fl-ebda ċirkustanza testernalizza t-tmexxija tal-fruntieri tagħha ma' pajjiżi terzi; josserva barra minn hekk li l-immaniġġjar tal-flussi migratorji m'għandux ikun prirekwiżit għal kull ftehim ta' assoċċjazzjoni;

7.  Jenfasizza l-effett pożittiv ta' l-involviment attiv tal-migranti fl-iżvilupp tal-pajjiż ta' oriġini tagħhom fuq l-integrazzjoni tagħhom fil-pajjiż ta' residenza; huwa konvint li approċċ ta' sħubija bejn l-Unjoni u l-pajjiżi ta' oriġini għandu jintegra l-politika migratorja; għalhekk jinkoraġġixxi lill-migranti jżommu u jiżviluppaw ir-rabtiet mal-pajjiżi ta' oriġini tagħhom;

8.  Jenfasizza l-bżonn ta' integrazzjoni effekaċi tal-migranti; madanakollu huwa konvint li huwa importanti li tkun rikonoxxuta l-"identità" doppja tal-migranti; jitlob f'dan il-qasam lill-Kummissjoni u lill-Istati Membri sabiex jevitaw in-nasba ta' assimilazzjoni sfurzata; jikkunsidra fi kliem ieħor, li l-migranti għandhom ikunu f'pużizzjoni li jipparteċipaw fil-ħajja ekonomika, soċjali, kulturali u ċivili tal-pajjiż li qed jilqagħhom u barra minn hekk, għandhom jirrispettaw ir-regoli u l-valuri fundamentali tas-soċjetà li qed tilqagħhom u jipparteċipaw b'mod attiv fil-proċess ta' integrazzjoni, mingħajr ma jkollhom għalfejn jitilfu l-identità tagħhom.

9.  Jiġbed l-attenzjoni dwar il-ħtieġa li jkun massimizzat l-impatt, f'termini ta' żvilupp, tal-migrazzjoni li tirritorna u tal-migrazzjoni ċirkulari; huwa favur l-idea li jeżamina l-miżuri possibbli sabiex jiġi simplifikat ir-ritorn ta' ex-migranti fil-pajjiż li kien jilqagħhom, u anke li jipprovdi mekkaniżmi u mezzi li jagħmluha possibbli għal migranti li jiċċaqilqu b'mod relattivament faċli bejn il-pajjiżi ta' oriġini u l-pajjiżi fejn iridu jmorru;

10. Jistieden lill-Kummissjoni tipproponi inizjattivi li jiffaċilitaw ir-rikonoxximent tal-kwalifiki professjonali u tistabbilixxi standards minimi rigward l-istabbiliment ta' sistema Ewropea ta' ekwivalenzi ta' diplomi barranin;

11. Jagħraf kemm huwa importanti li jiġi talanqas garantit livell minimu ta' drittijiet komuni għaċ-ċittadini kollha ta' pajjiżi terzi li jinsabu fit-territorji kollha ta' l-Unjoni Ewropea; jifraħ sadanittant bil-proġetti kollha maħsuba biex jinħoloq pedament għall-immigranti kollha li jidħlu fis-swieq tax-xogħol ta' l-Unjoni;

12. Jistieden lill-Kummissjoni u lill-Istati Membri jikkunsidraw il-possibiltà li jintroduċu programmi ta' migrazzjoni temporanji ppreparati bir-reqqa bħala mezz ta' kif jiġu indirizzati l-bżonnijiet ekonomiċi kemm tal-pajjizi ta' oriġini u kemm tal-pajjiżi li qed jilqgħu lill-migranti;

13. Jifraħ bil-proġett sabiex tinħoloq proċedura ġusta u trasparenti biex jidħlu l-ħaddiema staġunali u biex jingħatawlhom id-drittijiet tagħhom; huwa konvint li wieħed għandu jagħti l-akbar attenzjoni li tixirqilhom lill-ħaddiema migranti xi ftit kwalifikati u dawk anqas kwalifikati; iqis li hu importanti li tingħata protezzjoni lil din il-kategorija ta' ħaddiema li huma partikolarment vulnerabbli, vittmi tad-diskriminazzjoni u ta' l-isfruttament;

14. Jitlob lill-Kummissjoni u lill-Istati Membri biex jistħarrġu l-miżuri li jistgħu jieħdu biex jassiguraw it-trasferiment tad-drittijiet tal-pensjoni u tad-drittijiet tas-sigurtà soċjali tal-migranti li jerġgħu lura fil-pajjiż ta' oriġini tagħhom;

15. Jiffavorixxi l-idea li jiġu eżaminati miżuri possibbli li jagħmlu t-trasferimenti ta' flus irħas, iktar mgħaġġla u iktar siguri; jenfasizza minkejja dan, li l-ġlieda kontra l-ħasil tal-flus hija ta' importanza kbira u li hemm bżonn li tiġi evitata kull possibilità li jingħata xi appoġġ lill-organizzazzjonijiet terroristiċi;

16. jistieden lill-Kummissjoni biex issaħħaħ il-miżuri dwar it-trasferimenti tal-flus, sabiex ikunu konformi mal-proposta għal Regolament dwar informazzjoni relatata mal-pagatur li takkumpanja t-trasferimenti tal-flus; jiġbed l-attenzjoni li t-trasferimenti ta' flus uffiċjali u reġistrati huma preferuti minn flussi informali minħabba li jnaqqsu r-riskju li migranti u riċevituri jkunu esplojtjati minn ħasil ta' flus illegali;

17. Jilqa' l-pjan li jiġi żviluppat approċċ komprensiv u koerenti għal reklutaġġ etiku ta' staff f'setturi partikolarment vulnerabbli għat-telf ta' l-aħjar imħuħ.

PROĊEDURA

PROPOSTI

Il-Kumitat għad-Drittijiet tan-Nisa u l-Ugwaljanza bejn is-Sessi jistieden lill-Kumitat għall-Iżvilupp, bħala l-kumitat responsabbli, jinkludi fil-proposta għal riżoluzzjoni s-suġġerimenti li ġejjin:

-    wara li kkunsidra l-istħarriġ dinji tan-Nazzjonijiet Uniti ta' l-2004 dwar l-irwol tan-nisa fl-Iżvilupp: In-nisa u l-Migrazzjoni Internazzjonali,

-    wara li kkunsidra r-regolament (KE) nru 2836/98 tal-Kunsill tat-22 ta' Diċembru 1998 dwar l-integrazzjoni ta' kwistjonijiet ta' ugwaljanza bejn is-sessi fil-koperazzjoni għall-iżvilupp,

-    wara li kkunsidra r-rakkomandazzjoni nru 151 ta' l-ILO dwar il-ħaddiema migranti,

A. billi n-nisa jirrappreżentaw 51% ta' l-immigranti fid-dinja żviluppata u 46% fil-pajjiżi li qed jiżviluppaw(1)

B.  billi l-migrazzjoni tista' tagħti ċ-ċans lin-nisa li jtejbu ħajjithom, li jżidu l-awtonomija tagħhom, li jgħinu li min huwa mwarrab u li jeħilsu minn relazzjonijiet soċjali oppressivi,

C. billi, madankollu, in-nisa huma spiss imġiegħla jemigraw minħabba żwieġ sfurzat, faqar, kunflitti armati, eċċ.,

D. billi n-nisa migranti huma aktar esposti għall-isfruttament sesswali, għad-diskriminazzjoni, għall-isfruttament fuq il-post tax-xogħol u għat-telf ta' l-aħjar imħuħ, għall-vjolenza u għar-riskji sanitarji, għall-iżolament soċjali u għall-ittraffikar tal-bnedmin,

E.  billi bħalissa numru sostanzjali ta' migranti bla dokumenti jgħixu fl-UE, fatt li jżid ir-riskju ta' sfruttament fuq il-post tax-xogħol, kif ukoll ir-riskju ta' sfruttament sesswali u ta' vjolenza sesswali għal dawk li huma esposti għal dawn il-perikli;

F. Jistieden lill-Istati Membri isaħħu l-mezzi li permezz tagħhom il-ħaddiema migranti nisa jiksbu l-emanċipazzjoni soċjopolitika, ekonomika u psikoloġika tagħhom, speċjalment rigward il-familji tagħhom u jiksbu t-tagħrif meħtieġ għall-integrazzjoni b'suċċess fil-pajjiż ospitu u li permezz tagħhom, id-drittijiet, il-pużizzjoni u l-irwol tal-ħaddiema migranti nisa huma assigurati, filwaqt li jissaħħaħ l-irwol ta' l-NGOs li jaħdmu fuq il-kwistjoni ta' l-ugwaljanza bejn is-sessi kif ukoll il-ħidma tan-netwerks tal-migranti nisa;

1.  Jitlob lill-Istati Membri biex, ġaladarba tkun ġiet aċċettata rijunifazzjoni familjari, jiggarantixxu li jagħtu l-istatus ta' awtonomija u permess biex wieħed jaħdem lis-sieħeb u lit-tfal ta' min jikseb l-istatus uffiċjali prinċipali, biex hekk jiġu garantiti u mħarsa bis-sħiħ id-drittijiet tagħhom u biex titħaffef l-integrazzjoni soċjali tagħhom;

2.  Jistieden lill-Istati Membri jiżviluppaw politiki u programmi li jikkunsidraw oqsma ta' l-ugwaljanza tas-sessi sabiex itejbulhom il-kundizzjonijiet tal-ħajja u tax-xogħol, speċjalment l-iġene u s-sikurezza u s-sitwazzjoni soċjali u ekonomika tan-nisa migranti, u jiggarantulhom aċċess aħjar għall-edukazzjoni, għas-servizzi soċjali u tas-saħħa, għat-taħriġ fil-lingwi u għat-taħriġ vokazzjonali u sabiex jinvolvu organizzazzjonijiet ta' nisa migranti fil-formulazzjoni, implimentazzjoni u evalwazzjoni ta' politiki bħal dawn;

3.  Jappella lill-Istati Membri u lill-Unjoni Ewropea jieħdu l-miżuri kontra l-fenomenu ta' ħela ta' l-aħjar imħuħ (brain waste), bħar-rikonoxximent tad-diplomi;

4.  Jistieden lill-Istati Membri sabiex jiżguraw li l-prinċipju kontra d-diskriminazzjoni huwa applikat f'dak li għandu x'jaqsam ma' l-aċċess u l-parteċipazzjoni tan-nisa migranti fis-suq tax-xogħol tal-Komunità u li jiggarantixxu li d-drittijiet bażiċi soċjali u ekonomiċi, inkluż id-dritt ta' ħlas indaqs huma rispettati;

5.  Jinsisti b'mod partikolari fuq il-bżonn li jkun permess li nisa migranti irregolari ikollhom aċċess għall-kura tas-saħħa u għall-assistenza legali u psikoloġika, partikolarment permezz ta' l-NGOs li jaħdmu għall-ugwaljanza bejn is-sessi u permezz tan-netwerks tan-nisa migranti;

6.  Jistieden lill-Istati Membri jagħtu attenzjoni partikolari lit-tfal tan-nisa migranti billi jiżguraw li dawn qed jibbenefikaw minn livell għoli ta' protezzjoni u aċċess eħfef għall-kura tas-saħħa u għall-edukazzjoni;

7.   Iħeġġeġ lill-Kummissjoni u lill-Istati Membri jieħdu l-passi meħtieġa favur ir-regolamentazzjoni tal-flussi migratorji u r-rikonoxximent tad-diplomi, partikolarment bil-ħsieb li jagħmilha possibbli kemm għall-migranti ħaddiema nisa u kemm irġiel li jagħtu lill-pajjiżi ta' oriġini l-benefiċċji tal-kompetenzi u l-kwalifiki li jkunu kisbu;

8.  jistieden lill-Kummisjoni biex jibda djalogu mal-pajjiżi ta' oriġini u biex jitlobhom biex jipprojbixxu l-użanzi li jmorru kontra d-drittijiet tal-bniedem bħalma huma il-mutilazzjonijiet ġenitali tan-nisa, iż-żwieġ bil-fors, il-poligamija u d-divorżju mingħajr kunsens reċiproku;

9.  Jinsisti b'mod partikolari fuq il-bżonn li jittejbu l-edukazzjoni u t-taħriġ tan-nisa fil-pajjiż ta' oriġini tagħhom u li tiġi faċilitata l-migrazzjoni ċirkulari sabiex jitnaqqsu l-konsegwenzi negattivi tal-fenomenu "telf ta' l-aħjar imħuħ" u jkun appoġġjat l-iżvilupp tal-pajjiżi ta' l-oriġini;

10. Jiddeplora n-nuqqas ta' għarfien tar-rabtiet li jeżistu bejn l-iskjavitừ u l-migrazzjoni; jinnota li bosta nisa vittmi ta' l-iskjavitừ m'għandhom ebda aċċess għal protezzjoni legali jew soċjali; jitlob lill-Kummissjoni u lill-Istati Membri biex jikkonċentraw fuq strateġiji biex jikkumbattu l-iskjavitù u li jirrigwardaw il-privenzjoni u l-protezzjoni tal-vittmi; jappella lill-Istati Membri biex jagħtu lil dawn in-nisa viża għal żmien twil;

11. Jistieden lill-Kummissjoni biex tagħmel evalwazzjoni kwantitattiva u kwalitattiva ta' l- infieq u tal-programmi ta' għajnuna għall-iżvilupp f'pajjiżi terzi, kif ukoll tagħmel bilanċ tar-riżultati li jinkisbu minn dan bil-fehma li jkun hemm titjib tal-qagħda tal-mara fil-pajjiżi minn fejn joriġinaw il-migranti;

12. Jistieden lill-Istati Membri biex b'mod partikulari jeżaminaw aktar l-impatt li l-ispostamenti li jirriżultaw minn kunflitti jistgħu jkollhom fuq is-sitwazzjoni soċjali, fiżika u psikoloġika tal-migranti nisa, li minħabba l-prekarjità tal-qagħda tagħhom, huma l-aktar suxxettibbli li jisfaw vittmi tal-vjolenza;

13. Jitlob lill-Istati Membri u lill-Unjoni Ewropea biex jiggarantixxu li n-nisa vittmi tal-vjolenza jiġu infurmati sewwa bid-drittijiet tagħhom, li jkollhom aċċess tabilħaqq għall-għajnuna legali u li jkunu jistgħu jitolbu status uffiċjali indipendenti u li jiksbu permess ta' residenza u biex jaħdmu,

14. Jistieden lill-Kummissjoni u lill-Kunsill, bl-intervent ta' rappreżentanti u ambaxxati lokali, biex jinfurmaw lin-nisa li jixtiequ jemigraw lejn UE dwar il-kundizzjonijiet marbutin ma' l-immigrazzjoni legali, id-drittijiet u l-obbligi li jkollhom u l-prinċipji u l-valuri fundamentali li fuqhom huma msejsa s-soċjetajiet Ewropej;

15. Jitlob sabiex jiġu mfakkra l-migranti li jmutu waqt li jkunu qed jippruvaw jilħqu x-xtut ta' l-Unjoni Ewropea, bħal fil-każ ta' kważi elef u ħames mitt migrant li ġejjin mill-pajjiżi 'l isfel mis-Sahara, fosthom nisa u tfal li ntilfu fil-baħar ħdejn il-gzejjer Kanari f'perjodu ta' 45 jum; jisħaq għal darb'oħra li l-Kummissjoni għandha tiddefinixxi u tiżviluppa strateġija li tappoġġja dawk iz-zoni ta' l-Unjoni Ewropea li jaffaċċjaw l-akbar pressjoni migratorja u li l-akbar bżonnijiet tagħhom huma meta jkunu jridu jipprovdu reazzjoni immedjata għal dan il-fenomenu;

16. Jistieden lill-Istati Membri biex fl-istess ħin jiżviluppaw politiki u programmi speċifiċi ta' żvilupp maħsuba biex jiggarantixxu l-forniment ta' assistenza medika, soċjali u psikoloġika għan-nisa li jisfaw imċaqalqa minħabba kunflitti, u nies oħra migranti li jbagħtu konsegwenzi mentali, fiżiċi u soċjali bħala refuġjati;

17. Jinsisti fuq l-importanza ta' skambji ta' metodi ta' prattika tajba, kemm bejn l-Istati Membri kif ukoll ma' pajjiżi terzi, b'mod partikolari ma' pajjiżi li qegħdin jiżviluppaw;

18. Jiddeplora li l-Kummissjoni ma' tatx kas ta' kwistjonijiet ta' differenza ta' sess fil-komunikazzjoni tagħha, "Il-Migrazzjoni u l-Iżvilupp: orjentazzjonijiet konkreti" jipproponi li jinħoloq grupp ta' ħidma interistituzzjonali ta' livell għoli inkarigat biex jissorvelja l-iżvilupp tal-politika Komunitarja għall-immigrazzjoni mill-aspett tad-differenza ta' sess, u biex jimplimenta mezzi ta' evalwazzjoni ta' l-impatt marbut mad-differenza ta' sess qabel ma jiġu adottati miżuri fil-qasam tal-politika għall-immigrazzjoni;

19. Jitlob lill-Kunsill u lill-Kummissjoni biex jadottaw linji gwida kif ukoll objettivi u indikaturi Ewropej konkreti u mmirati lejn l-aspett tad-differenza ta' sess fil-qasam tal-politika għall-immigrazjoni, u l-evalwazzjoni regolari tal-politiki mill-aspett ta' differenza ta' sess.

20. Jitlob lill-Kunsill, lill-Kummissjoni u lill-Istati Membri biex jistabbilixxu qafas legali li jiggarantixxi lin-nisa migranti d-dritt li jkollhom passaport u permess ta' residenza individwali u li jippermetti li jiġi meqjus kriminalment risponsabbli kulmin jikkonfiska dawn id-dokumenti;

21. Jistieden lill-Kummissjoni u lill-Istati Membri biex jintensifikaw id-djalogu mal-pajjiżi ta' oriġini tan-nisa migranti bl-iskop li jippromwovu r-rispett tad-drittijiet tan-nisa u l-ugwaljanza bejn is-sessi, kif ukoll il-ġlieda kontra l-faqar u d-dipendenza ekonomika tan-nisa;

22.  Iħeġġeġ lill-komunità internazzjonali tinkoraġġixxi l-sforzi sabiex jintlaħqu l-objettivi tal-Millenju għall-iżvilupp fl-oqsma tat-tnaqqis tal-faqar, l-emanċipazzjoni tan-nisa u l-ugwaljanza bejn is-sessi billi ssir enfasi partikolari fuq l-edukazzjoni tan-nisa, it-titjib tas-saħħa materna u l-aċċess tan-nisa għall-ħajja politika.

PROĊEDURA

(1) ILO: Preventing discrimination, exploitation and abuse of women migrant workers: an information guide – booklet 1: why the focus on women international workers, Ġinevra, 2003, OIT, p. 9.