dwar żviluppi u prospetti reċenti fir-rigward tal-liġi tal-kumpaniji

(2006/2051(INI))

Il-Parlament Ewropew,

–   wara li kkunsidra l-Komunikazzjoni tal-21 ta' Mejju 2003 mill-Kummissjoni lill-Kunsill u lill-Parlament Ewropew, bit-titolu "L-Immodernizzar tal-Liġi tal-Kumpaniji u t-Tisħiħ tat-Tmexxija Korporattiva fl-Unjoni Ewropea - Pjan għall-Avvanz" (COM(2003)0284 – C5-0378/2003),

– wara li kkunsidra l-Komunikazzjoni tal-Kummissjoni lill-Kunsill Ewropew tar-rebbiegħa: Naħdmu flimkien għat-tkabbir u l-impjiegi - Bidu ġdid għall-Istrateġija ta' Liżbona (COM(2005)0024),

– wara li kkunsidra l-Komunikazzjoni mill-Kummissjoni lill-Kunsill u lill-Parlament Ewropew bit-titolu “Azzjonijiet Komuni għat-Tkabbir u x-Xogħol: il-programm Komunitarju ta' Liżbona”(COM(2005)0330),

– wara li kkunsidra l-Komunikazzjoni mill-Kummissjoni lill-Kunsill u lill-Parlament Ewropew bit-titolu "Ir-riżultat ta' l-eżaminazzjoni tal-proposti leġiżlattivi pendenti quddiem il-Leġiżlatur" (COM(2005)0462),

–   wara li kkunsidra l-Komunikazzjoni mill-Kummissjoni lill-Kunsill, lill-Parlament Ewropew, lill-Kumitat Ekonomiku u Soċjali Ewropew u lill-Kumitat tar-Reġjuni li ġġib l-isem "L-Implimentazzjoni tal-programm Komunitarju ta' Liżbona: strateġija għas-simplifikazzjoni ta' l-ambjent regolatorju" (COM(2005)0535),

–   wara li kkunsidra l-Komunikazzjoni mill-Kummissjoni lill-Kunsill, lill-Parlament Ewropew, lill-Kumitat Ekonomiku u Soċjali Ewropew u lill-Kumitat tar-Reġjuni li ġġib l-isem "L-Implimentazzjoni tal-programm Komunitarju ta' Liżbona: politika SME moderna għat-tkabbir u l-impjieg" (COM(2005)0551),

–   wara li kkunsidra r-riżoluzzjoni tiegħu tal-21 ta' April 2004 dwar l-immodernizzar tal-liġi tal-kumpaniji u t-tisħiħ tat-tmexxija korporattiva(1),

–   wara li kkunsidra l-Artikolu 45 tar-Regoli ta' Proċedura tiegħu,

–   wara li kkunsidra r-rapport tal-Kumitat għall-Affarijiet Legali u l-opinjoni tal-Kumitat għall-Affarijiet Ekonomiċi u Monetarji (A6-0229/2006),

A  billi l-Pjan ta' Azzjoni propost fil-komunikazzjoni tal-21 ta' Mejju 2003 tal-Kummissjoni, hawn fuq imsemmija ("il-Pjan ta' Azzjoni ta' l-2003"), jiddefinixxi għanijiet importanti għall-immodernizzar tal-liġi tal-kumpaniji u tat-tmexxija korporattiva,

B.  billi diġà sar progress importanti biex jintlaħqu dawk l-għanijiet,

C. billi, minħabba li l-Pjan ta' Azzjoni ta' l-2003 għandu jiġi kkunsidrat fil-kuntest ta' l-Istrateġija mġedda ta' Liżbona, jridu jittieħdu miżuri biex jipprovdu għal mekkaniżmi fil-liġi tal-kumpaniji li jtejbu l-effiċjenza u l-kompetittivita` tan-negozju fl-Ewropa,

D. billi t-titjib tal-kompetittività tan-negozju Ewropew jirrikjedi metodu integrat fuq livell ta' l-UE,

E.  billi huwa essenzjali li jitjieb l-ambjent regolatorju għall-kumpaniji sabiex jintlaħqu l-għanijiet ta' l-Aġenda ta' Liżbona,

F.  billi sistema statutorjalment regolata ta’ parteċipazzjoni ta’ l-impjegat fuq livell ta’ intrapriżi, kif tinsab fil-biċċa l-kbira ta’ l-Istati Membri, għandha titqies li qed tifforma parti integrali mat-tmexxija Ewropea korporattiva li tagħti kontribuzzjoni biex jintlaħqu l-għanijiet ta’ l-Istrateġija ta’ Liżbona;

G. billi regolamentazzjoni aħjar hija ta' importanza partikolari għall-intrapriżi ta' daqs żgħir u medju ("SMEs"),

H. billi s-simplifikazzjoni ta' l-acquis tal-liġi tal-kumpaniji tista' tkun għodda effiċjenti għat-titjib ta' l-effettività tal-qafas leġiżlattiv; billi, pero`, simplifikazzjoni ma tfissirx deregolazzjoni,

Aspetti ġenerali

1.  Jitlob lill-Kummissjoni biex tiżgura li l-miżuri mmirati lejn immodernizzar fil-qasam tal-liġi tal-kumpaniji u t-tmexxija korporattiva jkunu konsistenti mal-miżuri fis-setturi relatati, bħas-servizzi finanzjarji, il-politika industrijali, il-politika soċjali u r-responsabilita` soċjali korporattiva,

2.  Jenfasizza l-importanza li titqies il-każistika tal-Qorti tal-Ġustizzja tal-Komunitajiet Ewropej dwar il-prinċipju tal-liberta` ta' l-istabiliment;

3.  Jitlob lill-Kummissjoni biex tikkunsidra l-mudell soċjali Ewropew meta tiddeċiedi fuq miżuri oħra għall-iżvilupp tal-liġi tal-kumpaniji, dan jkun jinvolvi wkoll l-parteċipazzjoni ta' l-impjegati;

Regolamentazzjoni aħjar u simplifikazzjoni

4.  Jenfasizza l-importanza ta' regolamentazzjoni aħjar biex tipprovdi qafas leġiżlattiv aktar effettiv; jenfasizza li huwa importanti li titjieb il-kwalita` tal-leġiżlazzjoni permezz ta' konsultazzjonijiet sistematiċi mal-parteċipanti dwar l-inizjattivi kollha fil-futur, konformita` stretta mal-prinċipju tas-sussidjarjeta`, għażla ta' strumenti li jkunu ta' inqas piż fuq il-kumpaniji u li jħallulhom l-ikbar flessibilita` possibbli, u evalwazzjoni komprensiva ta' l-impatt rigward kwalunkwe inizjattiva leġislattiva ġdida;

5.  Jenfasizza li d-direttivi tal-KE dwar il-liġi tal-kumpaniji, li huma fis-seħħ, m'għandhomx jiġu diskussi: għandhom ikunu ssimplifikati biss f'każijiet ta' eċċezzjoni u ġustifikati b'mod xieraq, meta ma jkunux jitrattaw kwistjonijiet sensittivi ħafna jew meta ma jkunux riżultat ta' kompromessi diffiċli, biex ma jkunx hemm effett negattiv fuq il-kumpaniji kkonċernati;

6.  Jitlob lill-Kummissjoni biex tispjega fid-dettall il-pjanijiet biex tippreżenta konsolidazzjoni kompleta tad-direttivi dwar il-liġi tal-kumpaniji f'att wieħed, jenfasizza f'dan il-kuntest li għandha tingħata prijorita` lill-għan li tinkiseb ċarezza u konsistenza fl-acquis tal-liġi tal-kumpaniji fl-oqsma differenti tal-liġi tal-kumpaniji; jitlob lill-Kummissjoni biex tispeċifika, partikolarment, liema direttivi se jkunu riformulati, liema se jkunu revokati, liema se jkunu kodifikati u liema se jkunu modifikati;

Intrapriżi żgħar u ta' daqs medju

7.  Jilqa' l-inizjattiva tal-Kummissjoni li toħloq ambjent regolatorju aħjar għall-SMEs;

8.  Jitlob lill-Kummissjoni biex teżamina d-dimensjoni ta' l-SME meta tevalwa l-impatt tal-proposti leġiżlattivi fil-qasam tal-liġi tal-kumpaniji u biex tiżgura li l-bżonnijiet ta' l-SMEs ikunu meqjusa kif xieraq u sistematikament;

9.  Jenfasizza li, partikolarment, l-ostakoli ffaċċjati mill-SMEs f'termini tal-piż amministrattiv għandhom jitneħħew;

10. Jitlob lill-Kummissjoni sabiex tikkonsidra aktar l-bżonnijiet ta’ l-SMEs fi proposti leġiżlattivi futuri jew reviżjonijiet futuri ta’ leġiżlazzjoni eżistenti; ifakkar li l-SMEs joħolqu x-xogħol u huma l-mutur tat-tkabbir ekonomiku;

Tmexxija korporattiva

11. Jenfasizza l-importanza li jkunu żviluppati l-aħjar prattiki li jirrispettaw it-tradizzjonijiet u s-sistemi differenti fl-Istati Membri;

12. Jinnota li l-Forum Ewropew dwar it-Tmexxija Korporattiva u l-Grupp Konsultattiv dwar it-Tmexxija Korporattiva ġew stabbiliti, u jitlob lill-Kummissjoni biex iżżomm lill-Parlament infurmat regolarment dwar ir-riżultati tax-xogħol ta' dawn il-korpi u dwar id-deċiżjonijiet meħuda fuq il-bażi ta' dawn ir-riżultati;

13. Jiddispjaċih li l-Kummissjoni ma żviluppatx viżjoni ċara tat-tmexxija tan-neġozji Ewropej imma tidher li qed tieħu miżuri fuq aspetti dispari fuq bażi ad hoc; itenni l-konklużjonijiet tar-riżoluzzjoni tagħha hawn fuq imsemmija tal-21 ta’ April 2004 u jistieden lill-Kummissjoni biex tieħu azzjoni dwarhom;

14. Jenfasizza li tmexxija korporattiva mhix biss dwar ir-relazzjoni bejn azzjonisti u maniġment, imma li parteċipanti oħra fi ħdan il-kumpanija huma importanti għal proċess ibbilanċjat ta’ teħid ta’ deċiżjonijiet u għandhom ikunu kapaċi jikkontribwixxu għad-deċiżjonijiet dwar strateġija tal-kumpanija; Jirrimarka, b’mod partikolari, li għandu jkun hemm spazju għad-dispożizzjoni ta’ informazzjoni lill-impjegati kif ukoll jiġu kkonsultati;

15. Jesprimi dubji dwar il-bżonn ta’ inizzjattiva Ewropea fil-qasam tad-dritt speċjali ta’ investigazzjoni ta’ azzjonisti, peress li dan jaffettwa direttament is-separazzjoni tal-kompetenzi bejn diretturi , li jmexxu l-kumpanija, u azzjonisti, li hu tema tipikament indirizzat mill-liġijiet nazzjonali korporattivi; jikkonsidra wkoll li kull inizjattiva oħra għandha tiġi evalwata fid-dawl tal-proċess leġiżlattiv li jkun qed iseħħ; jirrimarka li l-proposta riċenti għal direttiva dwar id-drittijiet ta’ l-azzjonisti diġà tipprovdi għad-dritt li wieħed iżid punti fuq l-aġenda tal-laqgħa ġenerali u tressiq ta’ riżoluzzjonijiet;

Il-liġi tal-kumpaniji

16. Jilqa' l-proposta, hawn fuq imsemmija, tal-Kummissjoni għal direttiva tal-Parlament Ewropew u tal-Kunsill dwar l-eżerċizzju tad-drittijiet tal-vot mill-azzjonisti ta' kumpaniji li għandhom l-uffiċċju rreġistrat tagħhom fi Stat Membru u li l-ishma tagħhom huma aċċettati għall-kummerċ f'suq regolat u li temenda d-Direttiva 2004/109/KE (2005/0265(COD));

17. Jilqa' l-ftehimiet li ntlaħqu dwar il-proposti li ġejjin:

(a) proposta għal direttiva tal-Parlament Ewropew u tal-Kunsill li temenda d-Direttiva tal-Kunsill 77/91/KEE, fir-rigward tal-formazzjoni tal-kumpaniji pubbliċi b’responsabilità limitata u l-manteniment u l-bdil tal-kapital tagħhom (2004/0256(COD));

(b) proposta għal direttiva tal-Parlament Ewropew u tal-Kunsill li temenda d-Direttivi tal-Kunsill 78/660/KEE u 83/349/KEE li jikkonċernaw il-kontijiet annwali ta’ ċerti tipi ta’ kumpaniji u kontijiet konsolidati (2004/0250(COD));

18. Jistieden lill-Kummissjoni biex tipproponi miżuri li jtejbu d-disponibiltà ta’informazzjoni transkonfinali rigward l-iskwalifikazzjoni ta’ diretturi;

19. Jistqarr li m’hemmx il-bżonn għal inizjattiva Ewropea fil-qasam ta’ kummerċ ħażin peress li diġà hemm regolamenti rilevanti fl-Istati Membri; għalkemm dawn ir-regolamenti fl-Istati Membri jistgħu jvarjaw, id-differenżi nazzjonali ma jikkonstitwixxux ostaklu għas-suq intern;

20. Jistieden lill-Kummissjoni biex tippreżenta proposta għad-divrenzjar ta' l-obbligi ta' żvelar tal-livelli ta' proprjetà ta' ishma; kieku jilqa' divrenzjar li jipprovdi għall-passi ta' perċentaġġ li ġejjin: 3%, 5%, 10%, 15%, u 20%, kif ukoll obbligu ta' notifika għal kull punt ta' perċentaġġ 'l fuq minn 20%; jinnota li d-divrenzjar ta' obbligi ta' żvelar kieku jtejjeb it-trasparenza rigward il-proprjetà ta' ishma;

21. Jistieden lill-Kummissjoni biex toħloq regoli ċar għall-governanza ta' perjodu ta' tranżizzjoni, jiġifieri "l-intervall diċenti" li meta jintemm, il-membri attivi tal-bord tal-maniġment li jixtiequ, wara li jkunu telqu minn dan il-bord, li jittrasferixxu ruħhom għall-bord superviżorju (f'sistema dualistika) jew għall-bord non-eżekuttiv (fis-sistema monistika), ikunu jistgħu jagħmlu dan; jinnota li dawn il-perjodi tranżizzjonali jridu jkunu ta' l-anqas sentejn; jenfasizza l-importanza ta’ perjodi tranżizzjonali bħal dawn minħabba l-ħarsien ta’ l-indipendenza ta’ bords superviżorji;

22. Jistieden lill-Kummissjoni biex issolvi kwistjonijiet leġiżlattivi, bħall-indipendenza tad-diretturi, permezz ta' mezzi leġiżlattivi (direttivi) aktar milli b'rakkomandazzjonijiet, biex il-pubbliku u l-leġiżlatura jkunu involuti u biex ir-regoli riżultanti jirriflettu l-prattika attwali;

23. Iħeġġeġ lill-Kummissjoni biex toqgħod attenta minn kunflitti ta' interessi u l-akkumulazzjoni mhux proporzjonata ta' informazzjoni u influwenza ma' wħud mill-akbar protagonisti fil-katina ta' intermedjarji u konsulenti li huma involuti fl-eżerċitar tad-drittijiet tal-vot ta' l-azzjonisti f'kumpaniji, u jenfasizza l-bżonn tat-trasparenza u opportunitajiet ġusti għal dawk li jagħmlu l-ħruġ ta' ishma, biex jiddefendu lilhom infushom mill-konċentrazzjoni żejda u azzjoni koordinata ta' gruppi ta' azzjonisti;

24. Jitlob għal reġim regulatorju ċar għall-iżvelar u l-ħila tat-tqabbil ta' informazzjoni dwar remunerazzjoni individwali u l-politika ta' remunerazzjoni tad-diretturi, inklużi elementi bħalma huma skemi ta' pensjonijiet u skemi li joffru għażla għal xiri ta' ishma;

25. Jistieden lill-Kummisjoni biex tiżġura li kumpaniji jingħataw għażla bejn sistemi ta’ tmexxija differenti, inkluż is-sistemi ta’ fuq livell wieħed jew ta’ fuq żewġ livelli, mingħajr ma jkun hemm il-bżonn li jiġu adottati dispożizzjonijiet li jiddefenixxu il-poteri u l-obbligazzjonijiet tal-korpi ta’ tmexxija tal-kumpanija;

26. Jistieden lill-Kummissjoni biex teżamina l-possibilitajiet għal reviżjoni tar-regoli fl-Istatut għal kumpanija Ewropea (SE) dwar il-formazzjoni ta' dawn it-tip ta' kumpaniji, bil-ħsieb li tissimplifika dawk ir-regoli u tirranġahom biex ikunu konformi mal-ħtiġijiet tas-suq;

27. Jitlob lill-Kummissjoni biex tippreżenta proposta dwar il-kumpanija privata Ewropea sabiex taqdi l-bżonnijiet ta' l-SMEs;

28. Jiddeplora bil-qawwa l-fatt li l-Kummissjoni diġa` ddeċidiet li tirtira ż-żewġ proposti għal regolament dwar Statut għal assoċjazzjoni Ewropea (1991/0386(COD)) u għal regolament dwar Statut għal soċjeta` komuni Ewropea (1991/0390(COD)) u ż-żewġ proposti għal direttivi li jissuplimentaw dawk l-Istatuti fir-rigward ta' l-involviment ta' l-impjegati (1991/0387(COD) u 1991/0391(COD));

29. Jinnota, madanakollu, li fil-Pjan ta' Azzjoni tagħha għall-2003, il-Kummissjoni ħabbret l-intenzjoni tagħha li tappoġġja attivament il-proċess leġiżlattiv b'relazzjoni ma' dawk l-istatuti, b'rispons għax-xenqa li esprima l-Parlament biex tingħata attenzjoni sinifikanti għall-iżvilupp ta' forom legali ġodda ta' intrapriżi; iqis dawk il-proposti bħala strumenti utli għall-iżvilupp ta' l-attività ekonomika f'kull parti ta' l-Ewropa min-naħa ta' l-assoċjazzjonijiet u tas-soċjetajiet komuni;

30. Jistieden lill-Kummissjoni biex tressaq proposti ġodda għal statuti għal soċjetajiet komuni Ewropej u assoċjazzjonijiet Ewropej;

31. Jisħaq li t-trasferiment ta' uffiċċju rreġistrat illum huwa jew impossibbli jew imxekkel mir-rekwiżiti imposti fuq il-livell nazzjonali, tant li direttiva f'dan il-qasam hija kruċjali għal-libertà ta' l-istabiliment, u li l-Erbatax-il Direttiva dwar il-Liġi tal-Kumpaniji, li ilha ħafna mistennija, timla vojt fis-sistema tas-suq intern għall-kumpaniji;

32. Għaldaqstant jitlob lill-Kummissjoni biex tippreżenta, fil-ġejjieni qrib, proposta rigward l-Erbatax-il Direttiva dwar il-Liġi tal-Kumpaniji dwar it-trasferiment bejn il-fruntieri ta' l-uffiċċju rreġistrat tal-kumpaniji ta' responsabilità limitata; jisħaq li t-trasferiment ta' uffiċċju rreġistrati m'għandux jintuża biex ħażin, pereżempju biex jirrestrinġi d-drittijiet tal-ħaddiema, b'mod partikolari fir-rigward tal-parteċipazzjoni ta' l-impjegati fid-deċiżjonijiet tal-kumpanija, jew biex titnaqqas il-protezzjoni tal-kredituri; jikkonsidra, b’mod partikolari, li s-salvagwardja tad-drittijiet akkwistati ta’ l-impjegati fir-rigward ta’ parteċipazzjoni fid-deċiżjonijiet tal-kumpanija jridu jkuni għan ddikjarat tad-direttiva;

33. Jitlob lill-Kummissjoni biex tissokta bit-tħejjija tagħha ta' leġiżlazzjoni Komunitarja li tipprovdi għal forom legali oħra ta' organizzazzjoni intraprenditorjali, bħalma hi l-fondazzjoni Ewropea.

34. Jirrakkomanda li l-Kummissjoni teżamina aktar jekk hemmx il-ħtieġa li tindirizza l-problemi li jikkonċernaw lill-gruppi u lill-piramidi, speċjalment rigward il-qafas għat-trasparenza ta' l-istrutturi ta' gruppi u għall-problemi speċjali relatati ma' strutturi piramida;

35. Jistieden lill-Kummissjoni biex tagħti aktar attenzjoni lill-kwistjoni tat-tneħħija mir-reġistri, u li jippreżentaw proposta leġiżlattiva għall-armonizzazzjoni futura fuq livell ta' l-UE; jinnota li, filwaqt li t-tneħħija mill-kwotazzjoni fuq il-borża (delisting) hija possibbli fl-Istati Membri, din tinvolvi spejjeż burokratiċi u legali kbar għan-negozji konċernati; jistieden, għalhekk, li l-privatizzazzjoni ssir possibbli, fil-futur, bl-inqas sforz burokratiku possibbli, filwaqt li jingħata qies partikulari lill-ħarsien ta' l-interessi finanzjarji ta' l-azzjonisti;

36. Jistieden lill-Kummissjoni biex tinvolvi lill-Parlament b'mod aħjar fid-diskussjonijiet dwar standards tal-kontabilità internazzjonali u Ewropej, u biex tirrinforza d-definizzjoni ta' approċċ Ewropew ibbażat fuq l-aħjar prattiki u tradizzjonijiet fl-Istati Membri, minflok ma' ssewgi b'għajnejn magħluqa t-tradizzjonijiet tal-verifika fl-Istati Uniti; jerġa jisħaq dwar il-bżonn ta' aktar rappreżentanti bi sfond Ewropew fil-korpi internazzjonali ta' l-issettjar ta' l-istandards, biex jilleġitimaw approċċ li jkun verament internazzjonali; jenfasizza li r-regolamenti dwar l-istandards tal-kontabilità għandhom impatt fuq il-liġi tat-taxxa u l-istrutturi tan-negozju;

37. Jiddeplora l-fatt li l-‘International Accounting Standard Board’ (IASB) huwa nieqes mill-kontroll demokratiku, u għaldaqstant jieħu deċiżjoniiet li ma jirriflettux b'mod adegwat ir-realtà ta' kumpaniji Ewropej u jonqsu, pereżempju, milli jirrispondu għall-bżonnijiet ta' kumpaniji żgħar jew medji; bħala eżempju, jikkwota r-rekwiżit, stipulat fl-IAS 32, li għandu jkun hemm distinzjoni fuq il-karti tal-bilanċ, bejn il-kapital tal-kumpanija u l-kapital li joriġina mis-self. Fil-każ ta' sħubiji, dan ir-rekwiżit wassal għal problemi materjali sinifikanti, bħal stampa mhux reali tal-kwalità tal-kreditu tagħhom; għalhekk jistieden lill-Kummissjoni biex tiżgura li aktar piż jingħata lid-deċiżjonijiet tal-Parlament fi ħdan l-IASB;

38. Jagħmel kjarifika dwar il-fatt li l-Kummissjoni m'għandha l-ebda awtorità biex tapprova l-Istandards Internazzjonali għar-Rappurtaġġ Finanzjarju għall-SMEs;

39. Jirtob lill-Kummissjoni biex tieħu aktar passi sabiex l-acquis tal-liġi tal-kumpaniji tibqa' tiġi eżaminata l-ħin kollu;

40. Jitlob lill-Kummissjoni biex timmoniterja bl-akbar reqqa t-traspożizzjoni ta' l-acquis tal-liġi tal-kumpaniji fil-pajjiżi li se jissieħbu, waqt il-perjodu ta' qabel is-sħubija, u biex tirrapporta dwar ir-riżultati ta' dak il-monitoraġġ;

41. Jistenna b'ħerqa r-riżultati ta' l-istudju estern ikkummissjonat mill-Kummissjoni dwar il-proporzjonalità bejn il-proprjetà u l-kontroll ta' kumpaniji fl-UE li huma kkwotati fil-Borża, sakemm dan jagħmel analiżi oġġettiva ta' l-evidenza empirika u teoretika dwar l-effetti ta' mudelli differenti ta' proprjetà fl-Istati Membri fuq l-effiċjenza ekonomika, il-kontroll tas-sidien tal-kumpaniji, u l-possibilitajiet ta' tranzazzjonijiet transkonfinali, iżda wkoll analiżi soda tal-liġi korporattiva, f'dak li jirrigwarda il-kuntest usa' ekonomiku u legali fl-Istati Membri u mudelli differenti ta' governanza tal-kumpaniji; jisħaq li għandu jittieħed qies kif xieraq għal trasparenza fl-istruttura tad-drittijiet ta' kontroll;

42. Jistenna li l-Kummissjoni, jekk huwa xieraq, tagħmel proposta leġiżlattiva dwar il-prinċipju ta' "sehem wieħed vot wieħed" biss wara r-riżultat tar-reviżjoni u ta' l-evalwazzjoni tad-Direttiva 2004/25/KE tal-Parlament Ewropew u tal-Kunsill tal-21 ta' April 2004 dwar Attentati ta’ Akkwiżizzjonijiet(2), kif previst fl-Artikolu 20 tad-Direttiva, u evalwazzjoni tad-Direttiva;

43. Jitlob lill-Kummissjoni biex tipproponi miżuri għal aktar trasparenza fir-rigward ta' investituri istituzzjonali; ifakkar li t-trasparenza hija bżonjuża fir-rigward tal-politika ta' investiment u ta' vvutar, u l-proprjetà ta' l-ishma, u li din it-trasparenza m'għandhiex tkun limitata għar-relazzjoni bejn il-fondi u l-investituri individwali; ifakkar li għandu jkun hemm ukoll ċerti obbligi ta' żvelar min-naħa ta' l-investituri istituzzjonali lejn il-kumpaniji li huma nvoluti fihom, pereżempju fir-rigward ta' l-intenzjonijiet tagħhom u t-tul propost ta' l-involviment tagħhom;

44. Jitlob lill-Kummissjoni biex tgħarraf lill-Parlament dwar ir-riżultati tal-konsultazzjoni dwar il-prijoritajiet futuri għall-Pjan ta' Azzjoni 2003, li nidiet il-Kummissjoni f'Diċembru 2005, u biex tispjega fid-dettall id-deċiżjonijiet li ħadet il-Kummissjoni b'riżultat ta' dak li rriżulta minn dik il-konsultazzjoni;

45. Jitlob lill-Kummissjoni tanalizza l-problemi relatati ma' l-implimentazzjoni tal-leġiżlazzjoni attwali bil-għan li tqis ir-riżultati ta' dik l-analiżi meta tkun qed tikkunsidra proposti leġiżlattivi ġodda;

46. Jistieden lill-Kumitat għall-Affarijiet Legali u lill-Kumitat għall-Affarijiet Ekonomiċi u Monetarji biex jsegwu x-xogħol tal-Kummissjoni;

°

°         °

47. Jagħti istruzzjonijiet lill-President tiegħu sabiex jgħaddi din ir-riżoluzzjoni lill-Kunsill u lill-Kummissjoni.

(1) ĠU C 104 E, 30.4.2004, p. 714. (2)    ĠU L 142, 30.4.2004, p. 12.

Sfond

Bil-Komunikazzjoni tagħha dwar "L-Immodernizzar tal-Liġi tal-Kumpaniji u t-Tisħiħ tat-Tmexxija Korporattiva fl-Unjoni Ewropea - Pjan għall-Avvanz" (COM(2003)0284) tal-21 ta' Mejju 2003, il-Kummissjoni Ewropea spjegat għalfejn il-qafas regolatorju Ewropew għal-liġi tal-kumpaniji u għat-tmexxija korporattiva għandha bżonn tiġi mmodernizzata u ddefinixxiet l-għanijiet tal-politika importanti li għandhom jispiraw kull azzjoni futura li tittieħed fuq livell ta’ Unjoni Ewropea f’dawn l-oqsma.

Fi tmiem l-ewwel fażi ta' l-implimentazzjoni tal-Pjan ta’ Azzjoni, il-Kummissjoni Ewropea nidiet, f’Diċembru 2005, konsultazzjoni dwar prijoritajiet futuri għall-Pjan ta’ Azzjoni bi l-għan li jiġi rifless x'suppost isir fit-tieni fażi. Il-konsultazzjoni ingħalqet fil-31 ta’ Marzu 2006. Il-Kummissjoni avżat li se tippreżenta analiżi tar-riżultati tal-konsultazzjoni. Il-Kummissjoni avżat ukoll biex torganizza seduta ta' smiegħ pubblika fuq prioritajiet futuri għall-Pjan ta’ Azzjoni.

Aktar minn hekk, il-Kummissjoni Ewropea bil-Komunikazzjoni tal-25 ta’ Ottubru 2005 dwar “L-Implimentazzjoni tal-programm Komunitarju ta' Liżbonà: Strateġija għas-simplifikazzjoni ta' l-ambjent regolatorju" (COM(2005)0535) avżat bil-kodifikazzjoni sħiħa jew riformulazzjoni tad-direttivi tal-liġi tal-kumpaniji għas-sena 2006/2007.

Apparti dan, il-Kummissjoni ddeċidiet li tirtira erba’ proposti fil-qasam tal-ligi tal-kumpaniji li jikkonċernaw regolamnet dwar l-Istatut għal assoċjazzjoni Ewropea kif ukoll bħala regolament għal soċjetà komuni Ewropea u d-direttivi dwar il-parteċipazzjoni tal-ħaddiema li jiġu magħhom. Għalkemm il-Parlament esprima l-opinjoni li dawn il-proposti kienu ta’ importanza għas-setturi ikkonċernati u espliċitament ipprotesta kontra l-intenzjoni tal-Kummissjoni biex tirtira dawn il-proposti, il-Kummissjoni ddeċidiet li tirtira dawn l-erba’ proposti.

Pożizzjoni tar-Rapporteur

Ir-rapport ta’ inizjattiva proprja dwar żviluppi riċenti u għanijiet prospettivi tal-liġi tal-kumpaniji, fuq naħa biex jirreaġixxi għal dawn l-attivitajiet tal-Kummissjoni Ewropea u fuq in-naħa l-oħra biex tkun żviluppata perspettiva strateġika tal-Parlament għal aktar azzjonijiet fil-qasam tal-liġi tal-kumpaniji.

Sar progress konsiderevoli fl-implimentazzjoni tal-Pjan ta’ Azzjoni 2003. L-għanijiet originali tal-Pjan ta’ Azzjoni li jħaddnu l-effiċċjenza u l-kompetittività tan-negozju u li jsaħħu d-drittijiet ta' l-azzjonisti jibqgħu importanti.

Minkejjadan, aktar azzjonijiet huma neċessarji, li għandhom jkunu gwidati minn objettivi stipulati fl-istrateġija ta’ Liżbona mġedda, l-impenn li jittejjeb it-tkabbir u l-impjieg, biex tissaħħaħ u tiżdied il-kompetittività industrijali u biex jitjieb l-ambjent tan-negozju, kif ukoll bl-impenn li tiġi promossa Ewropa Soċjali.

Regolamentazzjoni aħjar u simplifikazzjoni

Regolamentazzjoni aħjar u simplificazzjoni huma importanti ħafna sabiex tittejjeb il-koerenza u ċ-ċarezza tal-leġiżlazzjoni Komunitarja, b'mod partikulari fil-qasam tal-liġi tal-kumpaniji. Mandankollu, dan m’għandux ikun l-uniku objettiv. Għandha tingħata prijorità għall-identifikazzjoni ta’ dawk l-oqsma fejn aktar inizjattivi fuq livell ta’ l-UE huma neċessarji biex jintlaħqu l-objettivi hawn fuq imsemmija.

Għandu jsir eżami jekk hemmx il-bżonn għal konsolidazzjoni komprensiva tal-liġi tal-kumpaniji f’att legali waħdieni, jew jekk bħala l-ewwel pass biss ċertu oqsma tal-liġi tal-kumpaniji għandhom jiġu kkonsolidati. Meta jiġi ssimplifikat l-ambjent regolatorju, il-Kummissjoni għandha tispeċifika liema direttivi għandhom jkunu suġġetti għal revokazzjoni, kodifikazzjoni u liema għandhom jkunu modifikati.

L-irtirar ta’ proposti f’oqsma fejn l-Kummissjoni diġà identifikat interess tal-Kumpaniji f’oqsma kkonċernati ma jistgħux ikunu ġustifikati b’regolamentazzjoni aħjar.

Aktar proposti leġizlattivi għandhom jkunu bbażati fuq approċċ wiesa’ u koerenti bbażat fuq reviżjoni dettalljata tal-leġiżlazzjoni eżistenti u assessjar ta’ l-impatt fid-dettall.

IL-Parlament Ewropew għandhu kontinwament ikun involut matul il-proċess ta’ żvilupp, determinazzjoni u adozzjoni ta' miżuri ta' simplifikazzjoni.

Tmexxija korporattiva

Qafas Ewropew gat-tmexxija korporattiva għandu jistipula kundizzjonijiet proprji istituzzjonali għal kumpaniji biex jippromwovu profittabilità u prospetti ta’ impjieg fit-tul, jiddefenixxu mekkaniżmi li jipprevjenu mmaniġġjar ħażin u jiggarantixxu trasparenza u responsabiltà fir-rigward ta’ investimenti u ta’ dħul tagħhom.

Mudelli ta' l-azzjonist huma kkuntrastati ma mudelli tal-parteċipant. Iċċekjar u bilanċi huma bżonjużi biex kumpanija tkun tista’ tilħaq massimu fil-profitti tagħha fit-tul ta' żmien u taħdem bl-aħjar mod f'termini soċjali u ekonomiċi.

Wieħed m’għandux jinsa li l-ħaddiema jikkonstitwixxu l-'kapital uman’ ta’ kumpanija. Aktar minn hekk, il-ħaddiema m’humiex biss partijiet għal kuntratt ta' impjieg, imma fl-istess ħin huma investituri u ċittadini. Il-ħaddiema għandhom jitqiesu bħala parteċipanti fil-kumpanija, bħala azzjonisti, fis-sens li huma jġarbu riskji minn għażliet li tagħmel il-kumpanija.

Kodiċi ta’ tmexxija għandu jkun ibbażat fuq ftehim komuni mill-organizzazzjonijiet li jirrapreżentaw il-parteċipanti kollha tas-swieq finanzjarji u tax-xogħol rispettivi. Dawn il-kodiċi ta’ tmexxija għandhom jkunu msejsin fil-liġi permezz ta’ dispożizzjoni mandatorja ta’ 'aqbel jew spjega' ('comply or explain').

Responsabiltà korporali soċjali m’għandiex tkun ikkonsidrata aktar bħala sempliċi riżultat ta' tmexxija imma għandha tkun parti integrali fil-proċess tat-tmexxija.

Il-prinċipji ta’ l-OECD għandhom iservu bħala standard minimu li għandu jitħaddan fuq livell ta’ l-UE fil-leġiżlazzjoni Ewropea dwar il-liġi tal-kumpaniji u tmexxija korporattiva.

Il-liġi tal-kumpaniji

Il-Kummissjoni għandha tikkonsidra d-diversità tas-sistemi nazzjonali legali, u b’mod partikulari d-differenzi bejn pajjiżi b’sistemi ta’ bord b'livell wieħed jew b’żewġ livelli.

Il-Kummissjoni m’għandiex tibqa’ lura aktar biex tressaq l-14-id Direttiva tal-liġi tal-kumpaniji dwar it-trasferiment transkonfinali ta' l-uffiċċju rreġistrat tal-kumpaniji b’responsabilità limitata . Madankollu, it-trasferiment ta’ uffiċċji rreġistrati ma jridux jintużaw biex jiġu ristretti d-drittijiet tal-ħaddiema, b’mod partikulari l-parteċipazzjoni ta' l-impjegat.

Id-diskussjoni ta’ “demokrazija ta’ l-azzjonisti” għandha titpoġġa fi ħdan objettiv aktar wiesa’ li għandu jiġi definit bħala twaqqif ta' ambjent regolatorju li jagħmel konformi l-interessi finanzjarji ta' azzjonisti b’interess fit-tul tal-kumpanija u l-konstitwenti principali tagħha, bħal l-impjegati.

Il-Parlament għandu kontinwament ikun involut f'dibattitu dwar aktar prijoritajiet fil-liġi tal-kumpaniji u fit-tmexxija korporattiva. Dan jinkludi li l-Parlament ikun regolarment infurmat dwar ir-riżultat tad-diskussjoni fil-gruppi esperti, bħall-Forum tat-Tmexxija Korporattiva u l-Grupp Konsultattiv u dwar deċiżjonijiet meħuda mill-Kummissjoni bħala riżultat tax-xogħol ta’ dawn il-gruppi.

(*)    Koperazzjoni aktar mill-qrib bejn il-kumitati - Artikolu 47 tar-Regoli ta' Proċedura

SUĠĠERIMENTI

Il-Kumitat għall-Affarijiet Ekonomiċi u Monetarji jistieden lill-Kumitat għall-Affarjiet Legali, bħala l-kumitat responsabbli, sabiex jinkorpora s-suġġerimenti li ġejjin fil-mozzjoni tiegħu għal riżoluzzjoni:

1.  Jistenna b'ħerqa r-riżultati ta' l-istudju estern ikkummissjonat mill-Kummissjoni dwar il-proporzjonalità bejn il-proprjetà u l-kontroll ta' kumpaniji fl-UE li huma kkwotati fil-Borża, sakemm dan jagħmel analiżi oġġettiva ta' l-evidenza empirika u teoretika dwar l-effetti ta' mudelli differenti ta' proprjetà fl-Istati Membri fuq l-effiċjenza ekonomika, il-kontroll tas-sidien tal-kumpaniji, u l-possibilitajiet ta' tranzazzjonijiet transkonfinali, iżda wkoll analiżi soda tal-liġi korporattiva, f'dak li jirrigwarda il-kuntest usa' ekonomiku u legali fl-Istati Membri u mudelli differenti ta' governanza tal-kumpaniji; jisħaq li għandu jittieħed qies kif xieraq għal trasparenza fl-istruttura tad-drittijiet ta' kontroll;

2.  Jistenna li l-Kummissjoni, jekk huwa xieraq, tagħmel proposta leġiżlattiva dwar il-prinċipju ta' "sehem wieħed vot wieħed" biss wara r-riżultat tar-reviżjoni u ta' l-evalwazzjoni tad-Direttiva 2004/25/KE tal-21 ta' April 2004, kif previst fl-Artikolu 20 tad-Direttiva;

3.  Jenfasizza li, biex tiġi promossa l-governanza korporattiva li hija effettiva u sostenibbli fit-tul, huwa importanti li tintrebaħ il-lealtà ta' l-azzjonisti;

4.  Jiddispjaċih li l-Kummissjoni ma żviluppatx viżjoni ċara tat-tmexxija tan-neġozji Ewropej imma tidher li qed tieħu miżuri fuq aspetti dispari fuq bażi ad hoc; itenni l-konklużjonijiet tar-riżoluzzjoni tagħha hawn fuq imsemmija tal-21 ta’ April 2004(1) u jistieden lill-Kummissjoni biex tieħu azzjoni dwarhom;

5.  Jistieden lill-Kummissjoni biex tinvolvi lill-Parlament b'mod aħjar fid-diskussjonijiet dwar standards tal-kontabilità internazzjonali u Ewropej, u biex tirrinforza d-definizzjoni ta' approċċ Ewropew ibbażat fuq l-aħjar prattiki u tradizzjonijiet fl-Istati Membri, minflok ma' ssewgi b'għajnejn magħluqa t-tradizzjonijiet tal-verifika fl-Istati Uniti; jerġa jisħaq dwar il-bżonn ta' aktar rappreżentanti bi sfond Ewropew fil-korpi internazzjonali ta' l-issettjar ta' l-istandards, biex jilleġitimaw approċċ li jkun verament internazzjonali; jerġa jisħaq dwar il-bżonn ta' aktar rappreżentanti bi sfond Ewropew fil-korpi internazzjonali ta' l-issettjar ta' l-istandards, biex jilleġitimaw approċċ li jkun verament internazzjonali; jenfasizza li r-regolamenti dwar l-istandards tal-kontabilità għandhom impatt fuq il-liġi tat-taxxa u l-istrutturi tan-negozju;

6.  Jiddeplora l-fatt li l-International Accounting Standard Board (IASB) huwa nieqes mill-kontroll demokratiku, u għaldaqstant jieħu deċiżjoniiet li ma jirriflettux b'mod adegwat ir-realtà ta' kumpaniji Ewropej u jonqsu, pereżempju, milli jirrispondu għall-bżonnijiet ta' kumpaniji żgħar jew medji; Bħala eżempju, jikkwota r-rekwiżit, stipulat fl-IAS 32, li għandu jkun hemm distinzjoni fuq il-karti tal-bilanċ, bejn il-kapital tal-kumpanija u l-kapital li joriġina mis-self. Fil-każ ta' sħubiji, dan ir-rekwiżit wassal għal problemi materjali sinifikanti, bħal stampa mhux reali tal-kwalità tal-kreditu tagħhom; jistieden lill-Kummissjoni, għaldaqstant, biex tiżgura li d-deċiżjonijiet tal-Parlament ikunu meqjusa aħjar fl-IASB;

7.  Jagħmel kjarifika dwar il-fatt li l-Kummissjoni m'għandha l-ebda awtorità biex tapprova l-Istandards Internazzjonali għar-Rappurtaġġ Finanzjarju għall-SMEs;

8.  Jitlob lill-Kummissjoni biex tipproponi miżuri għal aktar trasparenza fir-rigward ta' investituri istituzzjonali; ifakkar li t-trasparenza hija bżonjuża fir-rigward tal-politika ta' investiment u ta' vvutar, u l-proprjetà ta' l-ishma, u li din it-trasparenza m'għandhiex tkun limitata għar-relazzjoni bejn il-fondi u l-investituri individwali; ifakkar li għandu jkun hemm ukoll ċerti obbligi ta' żvelar min-naħa ta' l-investituri istituzzjonali lejn il-kumpaniji li huma nvoluti fihom, pereżempju fir-rigward ta' l-intenzjonijiet tagħhom u t-tul propost ta' l-involviment tagħhom, jinnota li l-pressjonijiet tas-suq qed iwasslu lill-investituri istituzzjonali biex jiżvelaw informazzjoni; u jitlob lill-Kummissjoni biex tagħmel monitoraġġ u tqis l-iżvilupp tal-prattika tas-suq;

9.  Jistieden lill-Kummissjoni biex tipproponi miżuri biex iżżid id-disponibilità transkonfinali ta' informazzjoni dwar l-iskwalifika ta' diretturi;

10. Jistieden lill-Kummissjoni biex tippreżenta proposta għad-divrenzjar ta' l-obbligi ta' żvelar tal-livelli ta' proprjetà ta' ishma; kieku jilqa' divrenzjar li jipprovdi għall-passi ta' perċentaġġ li ġejjin: 3, 5, 10, 15, u 20%, kif ukoll obbligu ta' notifika għal kull punt ta' perċentaġġ 'l fuq minn 20%; jinnota li d-divrenzjar ta' obbligi ta' żvelar kieku jtejjeb it-trasparenza rigward il-proprjetà ta' ishma;

11. Jistieden lill-Kummissjoni biex toħloq regoli ċar għall-governanza ta' perjodu ta' tranżizzjoni, jiġifieri "l-intervall diċenti" li meta jintemm, il-membri attivi tal-bord tal-maniġment li jixtiequ, wara li jkunu telqu minn dan il-bord, li jittrasferixxu ruħhom għall-bord superviżorju (f'sistema duwalistika) jew għall-bord non-eżekuttiv (fis-sistema monistika), ikunu jistgħu jagħmlu dan; jinnota li dawn il-perjodi ta' tranżizzjoni għandhom ikunu mill-inqas ta' sentejn, u jisħaq fuq l-importanza ta' tali perjodi ta' tranżizzjoni għall-preservazzjoni ta' l-indipendenza tal-bords ta' superviżjoni;

12. Jistieden lill-Kummissjoni biex issolvi kwistjonijiet leġiżlattivi, bħall-indipendenza tad-diretturi, permezz ta' mezzi leġiżlattivi (direttivi) aktar milli b'rakkomandazzjonijiet, biex il-pubbliku u l-leġiżlatura jkunu involuti u biex ir-regoli riżultanti jirriflettu l-prattika attwali;

13. Iħeġġeġ lill-Kummissjoni biex toqgħod attenta minn kunflitti ta' interessi u l-akkumulazzjoni mhux proporzjonata ta' informazzjoni u influwenza ma' wħud mill-akbar protagonisti fil-katina ta' intermedjarji u konsulenti li huma involuti fl-eżerċitar tad-drittijiet tal-vot ta' l-azzjonisti f'kumpaniji, u jenfasizza l-bżonn tat-trasparenza u opportunitajiet ġusti għal dawk li jagħmlu l-ħruġ ta' ishma, biex jiddefendu lilhom infushom mill-konċentrazzjoni żejda u azzjoni koordinata ta' gruppi ta' azzjonisti;

14. Jisħaq li l-governanza korporattiva ma tinvolvix biss ir-relazzjoni bejn l-azzjonisti u l-maniġment, iżda wkoll li partijiet interessati oħra fi ħdan il-kumpanija huma wkoll importanti għal proċess bilanċjat tat-teħid tad-deċiżjonijiet, u għandhom ikunu jistgħu jagħtu kontribut għad-deċiżjonijiet dwar l-istrateġija tal-kumpaniji; b'mod partikulari, għandu jkun hemm lok li l-impjegati jiġu infurmati u kkonsultati;

15. Jitlob għal reġim regulatorju ċar għall-iżvelar u l-ħila tat-tqabbil ta' informazzjoni dwar remunerazzjoni individwali u l-politika ta' remunerazzjoni tad-diretturi, inklużi elementi bħalma huma skemi ta' pensjonijiet u skemi li joffru għażla għal xiri ta' ishma;

16. Jisħaq dwar il-bżonn ta' involviment tar-regulaturi u s-superviżuri tas-suq finanzjarju fl-iżvilupp ta' regoli u rakkomandazzjonijiet ċari ta' governanza korporattiva, u għal koordinazzjoni mill-qrib tal-politiki fil-qasam tar-regolazzjoni tas-suq finanzjarju fuq in-naħa l-waħda, u l-liġi korporattiva fuq in-naħa l-oħra;

17. Jitlob lill-Kummissjoni biex tieħu aktar qies tal-bżonnijiet ta' l-SMEs fi proposti leġiżlattivi futuri, jew fir-reviżjoni futura ta' leġiżlazzjoni eżistenti; ifakkar li l-SMEs joħolqu l-impjiegi u huma mutur tat-tkabbir ekonomiku;

18. Jistieden lill-Kummissjoni biex tagħti aktar attenzjoni lill-kwistjoni tat-tneħħija mir-reġistri, u li jippreżentaw proposta leġiżlattiva għall-armonizzazzjoni futura fuq livell ta' l-UE; jinnota li, filwaqt li t-tneħħija mill-kwotazzjoni fuq il-borża (delisting) hija possibbli fl-Istati Membri, din tinvolvi spejjeż burokratiċi u legali kbar għan-negozji konċernati; jistieden, għalhekk, li l-privatizzazzjoni ssir possibbli, fil-futur, bl-inqas sforz burokratiku possibbli, filwaqt li jingħata qies partikulari lill-ħarsien ta' l-interessi finanzjarji ta' l-azzjonisti;

19. Jistieden lill-Kummissjoni biex tqis is-sitwazzjoni speċjali ta' l-SMEs fl-Ewropa, meta jevalwaw l-impatt ta' leġislazzjoni futura.

PROĊEDURA

(1) Testi adottati ta' dik id-data, P6_TA(2004)0346.