dwar il-pjan ta’ rotta għall-ugwaljanza bejn in-nisa u l-irġiel 2006-2-10

(2006/2132(INI))

Il-Parlament Ewropew,

–    wara li kkunsidra l-komunikazzjoni tal-Kummissjoni bl-isem "Il-pjan ta’ rotta għall-ugwaljanza bejn in-nisa u l-irġiel 2006-2010" (COM(2006)0092)(1),

–    wara li kkunsidra d-deċiżjoni tal-Kunsill 2001/51/KE ta' l-20 ta' Diċembru 2000 li tistabbilixxi programm ta' azzjoni komunitarju dwar strateġija komunitarja rigward l-ugwaljanza bejn in-nisa u l-irġiel (2001-2005)(2), kif ukoll ir-riżoluzzjoni tal-Parlament(3) stess fuq l-istess suġġett,

–    wara li kkunsidra l-istrumenti ġuridiċi tan-Nazzjonijiet Uniti fil-qasam tad-drittijiet tal-bniedem, u b'mod speċjali tad-drittijiet tan-nisa, u partikularment il-konvenzjoni dwar l-eliminazzjoni ta' kull sura ta' diskriminazzjoni kontra n-nisa, kif ukoll l-istrumenti l-oħra tan-Nazzjonijiet Uniti rigward vjolenza kontra n-nisa, bħad-dikjarazzjoni tal-programm ta' azzjoni ta' Vjenna adottat mill-Konferenza Dinjija dwar id-Drittijiet tal-Bniedem, ir-riżoluzzjonijiet ta' l-Assemblea Ġenerali tan-Nazzjonijiet Uniti 48/104 ta' l-20 ta' Diċembru 1993 dwar l-eliminazzjoni tal-vjolenza fuq in-nisa, 58/147 tad-19 ta' Frar 2004 dwar l-eliminazzjoni tal-vjolenza domestika fuq in-nisa, 57/179 tat-30 ta' Jannar 2003 dwar miżuri li għandhom jittieħdu biex jiġu evitati delitti ta' l-unur li jsiru fuq in-nisa, 52/86 tat-2 ta' Frar 1998 dwar miżuri rigward il-prevenzjoni ta' delitti u dwar il-liġi penali biex tiġi evitata l-vjolenza kontra n-nisa,

–    wara li kkunsidra l-Programm ta' Azzjoni adottat waqt ir-Raba' Konferenza Dinjija dwar in-Nisa organizzata f'Peking fil-15 ta' Settembru 1995, kif ukoll ir-riżoluzzjonijiet tal-Parlament Ewropew tat-18 ta' Mejju 2000 dwar l-Iżviluppi tal-Programm ta' Azzjoni ta' Peking(4) u ta' l-10 ta' Mejju 2005 dwar l-iżviluppi tal-Programm ta' Azzjoni tar-Raba' Konferenza dinjija dwar in-Nisa (Peking+10)(5),

–    wara li kkunisdra r-rapport tas-Segretarju Generali tan-Nazzjonijiet Uniti tad-9 ta' Ottubru 2006 dwar "il-forom kollha ta' vjolenza kontra n-nisa",

–    wara li kkunsidra r-rapport finali ta' Marzu 2005 tad-49 sessjoni tal-Kummissjoni dwar l-Istejtus tan-Nisa ta' l-Assemblea Ġenerali tan-Nazzjonijiet Uniti,

–    wara li kkunsidra l-Protokoll rigward id-Drittijiet tan-Nisa fl-Afrika, magħruf ukoll bl-isem "Il-Protokoll ta' Maputo", li daħal fis-seħħ fis-26 ta' Ottubru 2005 u li jsemmi b'mod partikulari l-abolizzjoni ta' kull forma ta' mutilizzjoni ġenitali,

–    wara li kkunsidra r-Riżoluzzjoni tal-Kunsill tas-Sigurtà tan-Nazzjonijiet Uniti tal-31 ta' Ottubru 2000 dwar in-nisa, il-paċi u s-sigurtà, li jaħseb għal parteċipazzjoni akbar tan-nisa fil-prevenzjoni ta' konflitti armati u l-kisba tal-paċi,

–    wara li kkunsidra r-rapport ta' Mejju 2003 tal-Kumitat Konsukltattiv tal-Kummissjoni dwar Opportunitajiet Indaqs għall-Irgiel u n-Nisa rigward l-integrazzjoni fil-baġits nazzjonali tad-dimensjoni tal-ġeneru,

–    wara li kkunsidra l-konklużżjonijiet tal-Presidenza tal-Kunsill Ewropej ta' Liżbona tat-23 u l-24 ta' Marzu 2000, tas-Stokkolma tat-23 u l-24 ta' Marzu 2001, ta' Barċellona tal-15 u s-16 ta' Mejju, ta' Brussell ta' l-20 u l-21 ta' Marzu 2003 u ta' Brussell tal-25 u s-26 ta' Marzu 2004,

–    wara li kkunsidra d-deċiżjoni 2005/600/CE tal-Kunsill tat-12 ta' Lulju 2005 rigward Linji Gwida għall-politiki għall-impjiegi ta' l-Istati Membri(6)

–    wara li kkunsidra r-riżoluzzjoni tad-19 ta' Jannar 2006 dwar il-futur ta' l-Istrateġija ta' Liżbona rigward il-perspettiva dwar id-differenza bejn is-sessi(7)

–    wara li kkunsidra r-riżoluzzjoni tal-Parlament Ewropew tad-9 ta’ Marzu 2004 dwar il-ksib ta’ bilanċ aħjar bejn il-ħajja professjonali, il-ħajja privata u l-ħajja tal-familja(8),

–    wara li kkunsidra r-riżoluzzjoni tal-Parlament Ewropew tal-11 ta' Frar 2004 dwar l-użu tal-ħin tax-xogħol (reviżjoni tad-direttiva 93/104/KE)(9),

–    wara li kkunsidra r-riżoluzzjoni tal-Parlament Ewropew tat-2 ta' Frar 2006 dwar is-sitwazzjoni attwali tal-ġlieda kontra l-vjolenza fuq in-nisa u l-attività possibbli fil-futur(10),

– wara li kkunsidra r-riżoluzzjoni tiegħu tas-17 ta' Jannar 2006 dwar l-istrateġiji għall-prevenzjoni tat-traffikar ta' nisa u tfal u l-vulnerabilità tagħhom għall-esplojtazzjoni sesswali(11),

–    wara l-kkunsidra r-riżoluzzjoni tal-Parlament Ewropew ta' l-24 ta' Ottubru 2006 dwar l-immigrazzjoni tan-nisa: l-irwol u l-post in-nisa migranti fl-Unjoni Ewropea(12) ,

–    wara li kkunsidra d-dikjarazzjoni konġunta adottata fl-4 ta' Frar 2005 mill-Ministri ta' l-Unjoni Ewropea risponsabbli għall-politiki dwar l-ugwaljanza bejn l-irġiel u n-nisa,

–    wara li kkunsidra l-Patt Ewropew għall-Ugwaljanza bejn in-Nisa u l-Irġiel, adottat mill-Kunsill Ewropew f'Marzu 2006,

–    wara li kkunsidra l-Pjan ta' Rotta għall-Ugwaljanza bejn is-Sessi 2005-2015 adottat mill-Commonwealth,

–    wara li kkunsidra l-Artikolu 45 tar-Regoli ta' Proċedura tiegħu,

–    wara li kkunsidra r-rapport tal-Kumitat għad-Drittijiet tan-Nisa u l-Ugwaljanza bejn is-Sessi u l-opinjonijiet tal-Kumitat għall-Iżvilupp, il-Kumitat għall-Impjiegi u l-Affarijiet Soċjali, il-Kumitat għall-Industriji, ir-Riċerka u l-Enerġija u l-Kumitat għall-Libertajiet Ċivili, il-Ġustizzja u l-Affarijiet Interni (A6-0033/2007),

A. billi d-Dikjarazzjoni ta' Vienna, adottata fil-25 ta' Ġunju 1993 mill-Konferenza tan-Nazzjonijiet Uniti dwar id-Drittijiet tal-Bniedem tistqarr li "id-drittijiet tal-bniedem għan-nisa u għal-bniet u tfajliet huma parti inaljenabbli, integrali u li ma tistax tinfired mid-drittijiet universali tal-bniedem, u billi l-ugwaljanza bejn l-irġiel u n-nisa huwa dritt u prinċipju fundamentali ta’ l-UE, rikonoxxuti mit-Trattat ta’ l-Unjoni Ewropea u ċ-Charter tad-Drittijiet Fundamentali ta’ l-Unjoni Ewropea; billi minkejja l-progress notevoli li sar f’dan il-qasam għad baqa’ bosta inugwaljanzi bejn l-irġiel u n-nisa.

B.   billi l-vjolenza kontra n-nisa tikkostitwixxi l-ksur l-aktar mifrux tad-drittijiet tal-bniedem, mingħajr distinzjoni ġeografika, ekonomika jew soċjali, u billi minkejja l-isforzi magħmula fil-livell nazzjonali, komunitarju u internazzjonali, in-numru ta' vittmi nisa ta' vjolenza huwa allarmanti(13),

C.  billi jqis li t-terminu "vjolenza kontra n-nisa" jindika l-atti kollha ta' vjolenza diretti lejn is-sess femminil u li jikkawżaw, jew jistgħu jikkawżaw preġudizzju kontra n-nisa jew tbatija fiżika, sesswali jew psikoloġika, inkluż it-theddid ta' atti bħal dawn, ir-restrizzjoni jew iċ-ċaħda arbitrarja tal-libertà, kemm jekk dan ikun fil-ħajja pubblika, kemm jekk fil-ħajja privata,

D.  billi l-periklu tal-faqar jaffettwa aktar lin-nisa, inklużi n-nisa li jaħdmu, u partikularment lil nisa xjuħ, nisa risponsabbli għal familji b'ġenitur wieħed, tfajliet ommijiet u nisa li jaħdmu f'negozji tal-familja, minħabba diskriminazzjoni sesswali u nuqqas ta' ugwaljanza rigward taħriġ, servizzi personali, aċċess għall-impjiegi, responsabbiltajiet tal-familja, drittijiet għall-pensjoni u salvagwadji legali fil-każijiet ta' separazzjoni jew divorzju, speċjalment fejn jintlaqtu nisa li huma dipendenti ekonomikament,

E    billi t-totalità tal-prinċipji u l-valuri kulturali u soċjali li fuqhom hija msejsa l-Unjoni Ewropea u l-Istati Membri tagħha, bħalma huma r-rispett għad-drittijiet tal-bniedem, id-dinjità tal-persuna umana, l-ugwaljanza, id-djalogu, is-solidarjetà u l-parteċipazzjoni hija wirt li jgawdu minnu ċ-ċittadini u r-residenti kollha ta' l-Unjoni u li l-assimilazzjoni tiegħu hija prijorità għall-Unjoni Ewropea u fattur fl-emnċipazzjoni u fl-integrazzjoni, speċjalment għal nisa u bniet li huma iżolati minħabba lingwa, kultura jew ostakli reliġjużi,

F.   billi jqis li l-integrazzjoni tad-dimensjoni dwar għarfien tad-differenzi bejn is-sessi fil-baġits nazzjonali għandha tingħata kunsiderazzjoni akbar sabiex ikun hemm governanza effikaċi tal-politiki għall-ugwaljanza ta' opportunitajiet u billi jqis li l-kompetenzi u l-esperjenzi f'din il-kwistjoni f'livell Ewropew, nazzjonali jew reġjunali jkun jista' jippermetti l-applikazzjoni tagħha minn issa fil-baġit u fil-programmi komunitarji, sa mill fażijiet ta' tfassil, ta' implimentazzjoni u ta' evalwazzjoni(14),

G.  billi jqis li l-Artikolu 3, paragrafu 2 u l-Artikoli 13 u 152 tat-Trattat KE jiddefinixxu l-irwol tal-Komunità fit-twettiq ta' l-ugwaljanza bejn is-sessi fil-politiki ta' ħarsien tas-saħħa tal-bniedem,

H.  billi biex jintlaħqu l-miri ta' Liżbona rigward l-impjiegi għan-nisa jkun meħtieġ li tittieħed aktar azzjoni skond il-metodu miftuħ tal-koordinazzjoni, ibbażat fuq prattiki ezistenti fil-livell nazzjonali u reġjunali b'rikonoxximent tal-fatt li politiki ta' taħriġ u aċċess għall-impjieġi, politiki għal ħajja u xogħol ibbalanċjati, servizzi, u l-promozzjoni tal-parteċipazzjoni tan-nisa fit-teħid tad-deċiżjonijiet huma ħoloq ta' relazzjoni interdipendenti; billi f'din il-perspettiva għandu jsir sforz partikulari biex tiġi żgurata l-koeżjoni soċjoekonomika sabiex tingħeleb il-firda diġitali u biex jippromwovi l-irwol tan-nisa fix-xjenza,

I.    billi jqis li minkejja l-leġiżlazzjoni komunitarja u d-dispożizzjonijiet nazzjonali rigward l-ugwaljanza fil-pagi, id-differenza bejn il-pagi tan-nisa u ta' l-irġiel għadha sostanzjalment hemm għaliex in-nisa fl-UE bħala medja jaqilgħu 15% anqas mill-irġiel, differenza li qed titnaqqas ħafna aktar bil-mod minn dik li hemm bejn ir-rati ta' impjieġi rispettivi bejn l-irġiel u n-nisa,

J.    billi jqis li n-nisa għandhom ħafna drabi dritt għal pensjonijiet iżgħar mill-irġiel, kemm minħabba li l-pagi li jaqilgħu huma anqas, kemm minħabba l-fatt li l-karrieri professjonjali tagħhom huma aqsar u jisfaw interrotti minħabba obbligi tal-familja,

K   billi jqis li politiku għall-ksib ta' bilanċ bejn l-ħajja tal-familja u l-ħajja tax-xogħol għandhom ikunu mmirati kemm għan-nisa, kif ukoll għall-irġiel u li għalhekk dawn jeħtiġilhom approċċ globali li jagħti każ tad-diskriminazzjoni kontra n-nisa u jħares lejn il-ġenerazzjonijiet li tilgħin u jqishom bħala ta' benefiċċju għas-soċjetà ġenerali kollha,

L    billi minkejja li n-nisa jirrapreżentaw 52% tal-popolazzjoni Ewropea, dan il-proporzjon m’hix rifless fuq il-post tax-xogħol, la f'dak li hu aċċess u lanqas f'dik li hu parteċipazzjoni; billi r-rappreżentanza tas-soċjetà kollha kemm hi huwa element li jsaħħaħ il-goveranza u l-pertinenza tal-politiki vis à vis l-aspettativi tal-popolazzjoni u billi, barra minn hekk, tezisti wkoll għażla ta' soluzzjonijiet fil-livell nazzjonali (liġijiet, ftehimiet u inizjattivi privati) biex tiġi konkretizzata r-rappreżentanza tan-nisa fiċ-ċentri fejn jittieħdu d-deċiżjonijiet,

M.  billi l-qafas strateġiku "i2010" (dwar is-Soċjetà ta' l-Informatika Ewropea) propost mill-komunikazzjoni tal-Kummissjoni (COM(2005)(0229) jimmira fost affarijiet oħra għat-titjib fil-kwalità tal-ħajja hekk li jkun hemm il-parteċipazzjoni tas-soċjetà kollha ta' l-informatika,

1.   Jieħu nota tad-determinazzjoni tal-Kummissjoni biex issegwi l-istrateġija għal opportunitajiet indaqs fuq strateġija mifruxa fuq tul ta' bosta snin, għaliex dan jgħin fit-twettiq ta' strateġija mifruxa fuq perjodu twil ta' żmien sabiex tippromwovi l-ugwaljanza fil-livell Ewropew, iżda jindika l-fatt li l-Pjan ta' Rotta ma jinkludi qas biss proposta waħda ġdida għall-leġiżlazzjoni u jonqos milli jispeċifika r-responsabbiltajiet tal-Kummissjoni u ta' l-Istati Membri rigward l-implimentazzjoni u l-informazzjoni għaċ-ċittadini, jew rigward fondi li se jiġu allokati biex jiġu implimentati r-rakkomandazzjonijiet,

2.   Jagħraf li l-promozzjoni ta' l-ugwaljanza ta' opportunitajiet teħtieġ approċċ doppju għaliex l-ugwaljanza trid tiġi integrata fil-politiki kollha waqt li fl-istess ħin tkun qed issir promozzjoni ta' l-ugwaljanza permezz ta' miżuri speċifiċi;

3.   Jitlob lill-Kummissjoni sabiex tfassal qafas ġenerali għall-evalwazzjoni tal-politiki u l-programmi biex jippromwovu l-ugwaljanza bejn is-sessi li jinkludi l-politiki nazzjonali li jirriżultaw minnhom, b'mod partikolari jitlob li ssir evalwazzjoni bir-reqqa tal-qafas ta' strateġija tal-Komunità għall-ugwaljanza bejn is-sessi (2001-2005) (COM(2000)0335) u biex issir analiżi ta' l-implimentazzjoni tad-direttivi dwar opportunitajiet indaqs, b'mod speċjali d-Direttivi 86/613/EEK(15), 89/391/EEK(16) 92/85/EEK(17) u 2003/41/EK(18) bl-iskop li jiġi stabbilit, permezz ta' dejta u statistika affidabbli, programmazzjoni koerenti, l-implimentazzjoni, il-monitoraġġ u l-evalwazzjoni tal-Pjan ta' Rotta; għal dan il-għan jemmen li l-Istitut Ewropew għall-Ugwaljanza bejn is-Sessi jeħtieġ li jiġi mwaqqaf kemm jista' jkun malajr sabiex jgħin fil-progress u l-monteraġġ kontinwu tal-Pjan ta' Rotta.

4.   Jitlob lill-Kummissjoni biex jittattaw politiki rigward ugwaljanza bejn is-sessi, mhux biss bħala prijorità ta' l-UE, imma wkoll u fuq kollox, bħala rekwiżit indispensabbli għar-rispett tad-drittijiet ta' l-individwu; iqis li approċċ bħal dan għandu jwassal għal sforz biex jiġu koordinati u msaħħa miżuri Ewropej u Nazzjonali għal protezzjoni bil-liġi tan-nisa u tat-tfal, u b'mod partikulari:

–    f'każijiet fejn nisa jinsabu fil-jasar, jew f'dawk il-f'każijiet fejn in-nisa jkunu involuti f'delitti bbażati fuq l-unur jew fuq it-tradizzjoni, delitti ta' vjolenza, traffikar, mutilazzjoni ġenitali tan-nisa, żwieġ ta' bil-fors, poligamija jew deprivazzjoni ta' l-identità (pereżempju, meta nisa jkunu mġiegħla jilbsu l-burka, in-niqab jew maskra), li għalihom m'għandu jkun hemm ebda lok għal toleranza;

–    f'każijiet ta' divorzju jew separazzjoni, speċjalment għal nisa ekonomikament dipendenti, pereżempju, b'miżuri għat-tnaqqis dirett mis-salarji jew biex isiru pagamenti magħmulin minn terzi persuni fil-każ ta' min jaħdem għal rasu, sabiex isiru pagamenti ta' manteniment fuq ordni tal-qorti;

u jitlob lill-Kummissjoni sabiex:

–    tagħmel riċerka dwar il-kawżiet bażiċi ta' vjolenza bbażata fuq il-ġeneru; jiġu żviluppati indikaturi għan-numru tal-vittmi, u biex, jekk tiġi determinata bażi legali għaliha, tippreżenta proposta għal direttiva biex tiġġieled il-vjolenza kontra n-nisa;

–    tiġbor kemm jista' jkun malajr dejta affidabbli u li tista' titqabbel dwar it-traffikar tal-persuni bil-ħsieb li jitnaqqsu n-numru tal-vittmi u sabiex isir ukoll studju dwar il-korrelazzjoni kawżali bejn il-leġiżlazzjoni dwar il-prostituzzjoni u t-traffikar għal skop ta' esplojtazzjoni sesswali, u sabiex tinxterred l-aħjar prattika, inkluża dwar azzjoni rigward l-aspett tad-domanda;

u jistieden lill-Istati membri sabiex:

–    jintroduċi leġiżlazzjoni dwar atti ta' mutilazzjoni ġenitali tan-nisa magħmula minn persuni involuti fil-kura tas-saħħa u biex titneħħa l-liċenzja ta' tobba li jipprattikawha;

5.   Jitlob lill-Kummissjoni biex tippromwovi l-adozzjoni ta' Charter Ewropea għad-drittijiet tan-nisa li tiġbor fiha l-prinċipji li jolqtu d-dritt għall-ugwaljanza ta' opportunitajiet li joħorġu mill-impenji internazzjonali ta' l-Istati Membri, mil-leġiżlazzjoni Ewropea u minn dik ta' l-Istati Membri u li tidentifika l-istituzzjonijiet u l-organi ta' riferiment fil-livell nazzjonali, komunitarju u internazzjonali li ċittadini nisa ta' l-Unjoni Ewropea jew nisa li joqogħdu fl-UE, jistgħu jirrikorru għandhom fil-każ ta' ksur tad-drittijiet tagħhom;

6.   Jitlob lill-Istati Membri li għadhom m'għamlux dan biex jirrattifikaw mingħajr aktar dewmien il-Protokoll addizzjonali kontra t-traffikar tal-migranti bl-art, bil-baħar u bl-ajru tal-Konvenzjoni tan-Nazzjonijiet Uniti kontra l-Kriminalità Transnazzjonali Organizzata ("il-protokoll ta' Palermo") kif ukoll il-Konvenzjoni tal-Kunsill ta' l-Ewropa dwar il-Glieda kontra t-Traffikar tal-Bnedmin, u biex jimplimentaw ukoll id-direttiva 2004/81/KE tal-Kunsill tad-29 ta' April 2004 dwar permessi ta' residenza maħruġa għal ċittadini ta' pajjiżi terzi li jkunu vittmi tat-traffikar tal-bnedmin jew li jkunu involuti f'attività favur l'immigrazzjoni illegali u li jikkoperaw ma' l-awtoritajiet kompetenti(19),

7.   Iqis li fin-neguzjati għas-sħubija tal-pajjiżi kandidati r-rispett għad-drittijiet tan-nisa hija eżigenza fundamentali daqs kemm hi għad-drittijiet l-oħra tal-bniedem u għalhekk jitlob lill-Kummissjoni biex tikkontrolla u tikkomunika lill-Parlament Ewropew u lill-Kunsill tagħrif dwar atti ta' diskriminazzjoni u ta' vjolenza bħal dawn li jisfaw vittmi tagħhom in-nisa f'dawn il-pajjiżi u biex tħeġġeġ attivament il-parteċipazzjoni fil-programmi komunitarji PROGRESS u DAPHNE tal-pajjiżi li sejrin jissieħbu ;

8.   Jenfasizza li r-rispett għad-drittijiet tan-nisa għandu jkun kundizzjoni essenzjali tal-politika għall-viċinat Ewropea, il-politika barannija u dik għall-iżvilupp, u f'dan ir-rigward:

–    jirrakkomanda li fil-qafas ta' dawn il-politiki l-UE għandha turi impenn akbar għal djalogu politiku ma' pajjiżi terzi u tagħti appoġġ finanzjarju marbut ma' l-iżvilupp bl-iskop li tippromwovi l-ugwaljanza bejn is-sessi;

–    jenfasizza l-karattru speċifiku tal-femminizzazzjoni tal-faqar u jinsisti li s-suċċess tal-MDGs huwa ppernjat fuq il-promozzjoni ta' l-ugwaljanza bejn is-sessi fil-firxa ta' l-etajiet kollha;

–    jitlob li tingħata attenzjoni partikulari lit-2 u t-3 MDG u biex tiġi promossa l-edukazzjoni tal-bniet fil-livelli kollha, kif ukoll biex jiġi żgurat aċċess ugwali għal programmi ta' taħriġ li jrawmu l-intrapranditorjat fost in-nisa, partikularment għal SMEs bħala mezz għat-tnaqqis tal-faqar, għat-titjib tas-saħħa u l-benessere, kif ukoll għal promozzjoni ta' żvilupp ġenwin u sostenibbli;

–    jitlob li jittieħdu passi biex ma jħallux li n-nisa jiġu marġinalizzati rigward programmi ta' żvilupp billi jiġi garantit lilhom aċċess ugwali għas-swieq tax-xogħol, għal impjiegi permamenti u ta' kwalità aħjar, u għal mezzi ta' produzzjoni bħalma huma proprjetà, kreditu u teknoloġija;

–    iħeġġeġ lill-Kummissjoni u lill-Istati Membri biex bħala parti mill-politiki għall-koperazzjoni fl-iżvilupp, jadottaw miżuri xierqa biex jinkuraġġixxu rappreżentanza aħjar tan-nisa billi jiżguraw li n-nisa jkollhom l-istess opportunitajiet bħall-irġiel u billi jinkuraġġixxu, jekk hemm bżonn permezz ta' kwoti speċifiċi, il-parteċipazzjoni tagħhom f'assoċjazzjonijiet professjonali u f'korpi għall-ippjanar politiku u għat-teħid ta' deċiżjonijiet;

–    jistieden lill-Kummissjoni u lill-Istati Membri biex fil-programmi għall-iżvilupp tagħhom jikkunsidraw metodi ta' prevenzjoni biex jiġġieldu l-vjolenza sesswali u t-traffikar tal-bnedmin bi skop ta' esplojtazzjoni sesswali, biex jiskuraġġixxu l-vjolenza kontra n-nisa u biex ikun hemm garanzija ta' għajnuna medika, soċjali, legali u psikoloġika, kemm għal nisa refuġjati kif ukoll għal tipi ta' migranti nisa oħrajn;

      –    jistieden lill Kummissjoni biex tagħmel evalwazzjoni kwantitattiva u kwalitattiva tan-nefqa fuq għajnuna għall-iżvilupp u għal programmi f'pajjiżi terzi;

9.   Jitlob lill-Kummissjoni biex tieħu miżuri li jiggarrantixxu lin-nisa d-drittijiet tagħhom għas-saħħa, inkluża s-saħħa sesswali u s-saħħa riproduzzjonali, kif ukoll għas-servizzi tas-saħħa; jerġa’ jisħaq li hu essenzjali, b'mod partikulari fil-ġlieda kontra l-HIV/AIDS, li jitkabbar l-aċċess għal informazzjoni dwar is-saħħa sesswali u riproduzzjonali, kif ukoll dwar is-servizzi tas-saħħa;

10. Jagħraf li l-bniet huma vulnerabbli b'mod partikulari għall-vjolenza u għad-diskriminazzjoni u jitlob li jsiru sforzi akbar biex jipproteġu l-bniet minn kull għamla ta' vjolenza, inkluż l-istupru, l-esplojtazzjoni sesswali u l-ingaġġ fl-armati, u sabiex jiġu inkuraġġuti politiki u programmi biex jippromwovu l-protezzjoni tad-drittijiet tagħhom f'sitwazzjonijiet ta' konflitt u ta' wara l-konflitt;

11. Jitlob li l-Kummissjoni tirrispetta l-impenn hi hija ħadet li tippreżenta komunikazzjoni dwar "Viżjoni Ewropea dwar l-Ugwaljanza bejn l-Irġiel u n-Nisa fil-Kooperazzjoni u fl-Iżvilupp";

12. Jitlob li l-Kummissjoni tiżgura l-koordinazzjoni bejn l-UE u n-NU dwar politiki għal opportunitajiet indaqs u d-drittijiet tal-bniet; jisħaq fuq l-importanza li jkun hemm promozzjoni mill-qrib bejn istituzzjonijiet Ewropej, internazzjonali, reġjunali u/jew bilaterali, inklużi korpi fi ħdan in-NU, sabiex jiġu armonizzati approċċi rigward ġeneru fl-oqsma ta' l-għajnuna umanitarja u l-kooperazzjoni għall-iżvilupp, b'mod speċjali billi tissaħħaħ ir-rabta bejn il-Pjattaforma għall-Azzjoni ta' Peking u l-programm għall-Azzjoni tal- Kajr, il-Konvenzjoni għall-Eliminazzjoni tal-Għamliet Kollha ta' Diskriminazzjoni kontra n-Nisa (CEDAW) u l-protokoll mhux obligatorju tagħha, u l-Għanijiet ta' Żvilupp għall-Millennju (MDGs);

13. jitlob lill-Kummissjoni biex, fil-qafas tal-politiki għall-Afrika u għall-istrateġiji nazzjonali għall-iżvilupp tal-pajjiżi Afrikani, jiġu inkurraġġuti r-ratifika u l-implimentazzjoni tal-Protokoll ta' Maputo mill-pajjiżi kollha ta' l-Afrika, waqt li tingħata attenzjoni parikulari għall-Artikolu 5 li jikkundanna u jipprojbixxi kull forma ta' mutilazzjoni ġenitali;

14. Jilqa' b'sodisfazzjon l-impenn li ħadet il-Kummissjoni li tippromwovi l-implimentazzjoni tar-riżoluzzjoni 1325 tal-Kunsill tas-Sigurtà tan-Nazzjonijiet Uniti, diġà msemmija, u li tfassal fl-2006 l-linji gwida għall-integrazzjoni tad-dimensjoni tal-ġeneru fl-attivitajiet għat-taħriġ ta' l-immaniġġjar tal-kriżijiet;

15. Jitlob lill-Istati Membri u lill-Kummissjoni biex jadottaw inizjattivi konkreti għall-emanċipazzjoni u l-integrazzjoni ekonomika u soċjali tan-nisa immigrati, b'mod partikulari fi ħdan il-programm ta' qafas komuni għall-integrazzjoni taċ-ċittadini ta' pajjiżi terzi u b'attività ta' appoġġ għat-tagħlim tal-lingwi, tad-drittijiet u d-doveri li joħorġu mill-acquis komunitarju, minn konvenzjonijiet internazzjonali, minn prinċipji u leġiżlazzjonijiet attwali tal-pajjiżi ospitanti (li, fost oħrajn tinkludi l-projbizzjoni tal-poligamija taħt pretest ta' rijunifikazzjoni tal-familji) u tal-valuri fondamentali ta' l-Unjoni, billi jitfasslu politiki għat-taħriġ speċifiku rigward opportunitajiet indaqs, li ma jkunx hemm diskriminazzjoni marbuta mal-ġeneru u li fl-attività jiġi meqjus il-ġeneru permezz ta' programmi għall-ġlieda kontra d-diskriminazzjoni fl-aċċesss għall-impiegi u fuq ix-xogħol, permezz ta' appoġġ għal proġetti għal intrapriżi minn nisa immigrati li jgħinu biex tiġi ppriservata u mifruxa r-rikkezza kulturali tal-pajjiżi ta' oriġini tagħhom u bil-ħolqien ta' spazji pubbliċi għall-parteċipazzjoni għan-nisa immigrati li fihom huma jkunu rappreżentati attivament;

16. Jirrakkomanda lill-Istati Membri u lill-Kummissjoni biex jipprovdu għall-finanzjament ta' programmi biex fil-pajjiżi ta' oriġini jxerrdu informazzjoni dwar prirekwiżiti għall-wasla ta' immigranti fl-Unjoni Ewropea u għar-residenza tagħhom, kif ukoll dwar ir-riskji ta' l-immigrazzjoni illegali;

17. Jitlob lill-Kummissjoni biex tniedi l-ewwel proġetti pilota dwar l-integrazzjoni ta' l-aspett tal-ġeneru fil-baġit ġenerali ta' l-Unjoni Ewropea u fil-programmi komunitarji, b'mod speċjali fil-Fondi Struttutrali, s-Seba’ Programm ta’ Qafas (2007-2013) tal-Komunità Ewropea għar-riċerka, l-iżvilupp teknoloġiku u l-attivitajiet ta’dimostrazzjoni, il-programm ta' azzjoni komunitarju fil-qasam tas-saħħa u l-protezzjoni tal-konsumaturi (2007-013) u l-Programm ta' Azzjoni Komunitarju fil-qasam tas-saħħa pubblika (2003-2008); iqis li dawn il-proġetti jridu jikkunsidraw l-impatt tal-baġit ġenerali fuq l-ugwaljanza tas-sessi (approċċ orizzontali), l-effikaċja tal-kwoti jew riservi speċifikċi għan-nisa jew għal proġetti proposti minn nisa, kif ukoll analiżi tad-diffikultajiet li n-nisa jiffaċċjaw biex jipparteċipaw f'dawn il-programmi (approċċ speċifiku);

18. Jitlob lill-Istati Membri biex iżidu jew isaħħu l-pjanijiet tagħhom nazzjonali għall-impjiegi u l-integrazzjoni soċjali sabiex jiġu inklużi miżuri biex jgħinu lin-nisa jidħlu fis-suq tax-xogħol fuq bażi ta' dinjità ugwali u pagi ugwali għal xogħol ugwali, miżuri biex jippromwovu l-attività imprenditorjali fost in-nisa u biex jidentifikaw u jappoġġjaw opportunitajiet ġodda ta' xogħol fis-setturi soċjali u s-setturi tas-saħħa u fis-servizzi personali u għall-familja, fejn il-ħaddiema impjegati huma kwazi kollha nisa, l-għarfien tad-drittijiet soċjali u d-dinjità ta' dawk li jipprovdu dawn is-servizzi u sabiex jgħinu biex jitnaqqas il-faqar; iqis li minħabba l-pożizzjoni żvantaġġata tan-nisa fl-oqsma soċjali u ekonomiċi li huma kkaratterizzati b'livelli għoljin ta' qagħad u pagi aktar baxxi minn ta' l-irġiel, hemm riskju akbar għan-nisa ta' esplojtazzjoni u għalhekk jitlob li jkun hemm sanzjonijiet akbar kontra esplojtaturi fost min iħaddem;

19. Jitlob lill-Istati Membri biex jimplimentaw strateġiji konkreti biex isaħħu s-sens ta' intrapriża fost in-nisa, bl-użu pereżempju ta' l-opportunitajiet li toffri l-ICT, u miżuri biex jiffaċilitaw l-aċċess għal intraprendituri nisa għal self u serviżżi minn banek, b'mod partikulari rigward miżuri u majkrofinanzjament bħala appoġġ għal netwerks ta' intraprendituri nisa;

20. Jinnota li d-diffikultajiet li jsibu ma' wiċċhom l-Istati Membri u l-Unjoni Ewropea fil-qasam ta' l-ugwaljanza bejn l-irġiel u n-nisa huma dejjem akbar minħabba l-kompetizzjoni ekonomika dinjija li dejjem qed tintensifika ruħha u minħabba domanda għal ħaddiema dejjem aktar flessibbli u mobbli li tirriżulta minn dan; jenfasizza li n-nisa qed ikomplu jkunu vittmi ta' diskriminazzjoni soċjali u professjonali u ta' tipi ta' diskriminazzjonijiet oħrajn u li l-eżiġenzi msemmija ġeneralment ikollhom aktar effetti ħżiena fuq in-nisa milli fuq l-irġiel; iqis li din is-sitwazzjoni m'għandhiex titħalla tixħet dubju fuq l-ugwaljanza bejn l-irġiel u n-nisa u fuq id-drittijiet li għandhom in-nisa rigward riproduzzjoni;

21. Jitlob lill-Istati Membri biex jinnominaw uffiċjal nazzjonali responsabbli għall-ugwaljanza bejn is-sessi rigward l-implimentazzjoni ta' l-istrateġija ta' Liżbona ("Ms. Liżbona") bl-inkariku li jipparteċipa fit-tfassil u r-reviżjoni tal-pjanijiet nazzjonali differenti u biex jimmoniterja l-implimentazzjoni tagħhom sabiex jgħin fil-qasam tal-ġeneru, b'mod partikulari fil-baġit u fil-politiki u l-objettivi kif ikunu definiti f'dawn il-pjanijiet;

22. Jiddeplora li d-differenza fil-pagi bejn l-irġiel u n-nisa għadha tilħaq il-15% u jitlob lill-Kummissjoni biex terga' tikkunsidra bi prijorità id-direttiva 75/117/KEE(20), b'mod speċjali rigward kwistjonijiet marbutin ma' spettorati ta' xogħol u l-mezzi għall-irmedju disponibbli fil-każ ta' diskriminazzjoni; jistieden ukoll lill-Kummissjoni biex tara li din id-direttiva tiġi implimentata b'mod li n-nisa ma jsofrux diskriminazzjonijiet minħabba perjodi iqsar ta' esperjenza tax-xogħol minħabba trobbija ta' tfal;

23. Jitlob lill-Kummissjoni biex, b'kollaborazzjoni ma' l-Istati Membri u l-imsieħba soċjali tagħha, tinkoraġġixxi l-ħolqien ta' politiki għar-rikonċiljazzjoni tal-ħajja tal-familja mal-ħajja tax-xogħol billi:

–    tiżgura li l-prezz tal-maternità u l-paternità jinġarr mis-soċjetà kollha kemm hi sabiex b'hekk tinqered l-imġiba diskrimiatorja fuq ix-xogħol u sabiex tgħin biex tikber ir-rata ta' twelid u biex tiffaċilita l-impjegar tan-nisa;

–    ssir kampanja ta' għarfien akbar u bl-introduzzjoni ta' proġetti pilota biex jgħinu il-parteċipazzjoni bbilanċjata tan-nisa u l-irġiel f'xogħol professjonali u fil-ħajja tal-familja;

–    fi ħdan il-qafas ta' l-objettivi ta' Barċellona li jimmiraw biex jagħmlu aktar aċċessibli u flessibbli s-servizzi ta' kura u għajnuna għal dawk li ma jistgħux jikkuraw lilhom infushom (tfal, persuni b'diżabbilitajiet jew b'mard kroniku u l-anzjani) jiġu stabbiliti rekwiżiti minimi għall-assistenza u l-kura li jinkludu li l-faċilitajiet jibqgħu miftuħin bil-lejl sabiex jiġu sodisfatti l-ħtiġijiet li huma kkawżati mill-ħajja tax-xogħol u l-ħajja fil-familja;

–    jiġu mħeġġa l-missirijiet u l-imsieħba rġiel sabiex jagħmlu użu minn possibiltajiet għall-użu ta' ħinijiet ta' xogħol flessibbli li jkunu disponibbli u biex jintrigaw minn xogħol tad-dar u xogħol għall-familja, billi pereżempju tiġi stabbilita forma inizjali obbligatorja ta' liv għall-paternità u billi tinbeda r-reviżjoni mistennija tad-Direttiva tal-Kunsill 96/34/EK(21),

–    jiġu definiti metodi alternattivi li jiżguraw li l-pensjonijiet tan-nisa jibqgħu jkunu mħarsa f'każijiet meta l-karriera professjonali tagħhom ma tipprovdix penzjoni xierqa għaliex tkun qasira wisq jew għaliex tkun interrotta minħabba żieda fir-risponsabbiltajiet tal-familja;

–    jiġu mfissra u mxerrda l-aħjar prattiki rigward tnaqqisiet għat-taxxa tad-dħul li għandhom ikunu pprovduti għal ommijiet żagħżagħ li jaħdmu, għaliex jemmen li tnaqqisiet għat-taxxa tal-korporazzjonijiet għandhom ikunu permessi għall-benefiċċju ta' impenji biex jitwaqqfu day-care centres fuq il-post tax-xogħol;

24. Jitlob lill-Kummissjoni biex tieħu ħsieb li l-analiżi ta' l-impatt ta’ l-ugwaljanza bejn l-irġiel u n-nisa tiġi meqjusa fir-reviżjoni jew it-tfassil tat-testi leġiżlattivi komunitarji, bħal fid-direttiva 93/104/KE, u li l-Kummissjoni taġixxi kif xieraq jekk impatt negattiv ikun probabbli, bħal fil-każ ta' din id-direttiva; jitlob lill-Kunsill biex ineħħi l-possibiltà ta' derogi għal din id-direttiva għaliex dan jagħmel ħsara aktar lin-nisa milli lill-irġiel u jfixkel il-bilanċ bejn ix-xogħol u l-ħajja tal-familja;

25. Jappella lill-Kummissjoni biex tikkunsidra r-rizultati tal-Konferenza fuq l-Ugwaljanza bejn l-Irġiel u n-Nisa organizzata mill-Presidenza Finlandiża ta' l-Unjoni, kif ukoll l-irwol ta' l-irġiel fit-twettiq ta' l-ugwaljanza bejn is-sessi;

26. Jitlob lill-Kummissjoni, fl-isfond tal-ħidma ta' l-Istitut Ewropew għall-Ugwaljanza bejn is-Sessi u l-progress magħmul immonitorjat mid-dejta bank fuq it-teħid ta' deċiżjonijiet(22) , biex tevalwa prattiki internazzjonali, nazzjonali jew reġjunali tajbin li jippermettu l-parteċipazzjoni tan-nisa fit-teħid ta' deċiżjonijiet, u biex dawn jinfirxu u jiġu adottati, inter alia, billi jingħata appoġġ għal netwerk ta' nisa involuti fil-proċess tat-teħid ta' deċiżjonijiet;

27. Iħeġġeġ lill-Istati Membri biex jiffissaw u jikkonkretizzaw objettivi u skadenzi ċari rigward it-tkabbir tal-parteċipazzjoni tan-nisa f'kull għamla ta' teħid ta' deċiżjonijiet u biex tissaħħaħ ir-rappreżentanza tan-nisa fil-ħajja pubblika;

28. Iqis li huwa importanti li l-preżenza tan-nisa fil-karrieri xjentifiċi u fis-settur tar-riċerka tiġi inkurraġġuta; iqis ukoll li jkun jaqbel li għal dan il-għan jiġu previsti politiki u strumenti li flimkien jiżguraw bilanċ bejn l-irġiel u n-nisa u l-eċċellenza ta' dawn il-karrieri;

29. Iqis li jeħtieġ li l-preżenza tan-nisa fil-karrieri xjentifiċi tiġi inkurraġġuta, b'mod partikulari billi jiġu pprovduti soluzzjonijiet kontrattwali bħal ma huma boroż ta' studju jew xogħol fuq bażi part-time sabiex huma jkunu jistgħu jirrikonċiljaw il-ħajja professjonali tagħhom mal-ħajja tal-familja;

30. Jemmen li jekk il-midja xxandar bi prominenza eżempji tajbin, kemm ta' rwoli tan-nisa fis-soċjetà kif ukoll tar-riżultati miksuba minnhom fis-setturi kollha, u jekk dawn jiġu enfasizzati hekk li jinħolqu immagini pożittivi tan-nisa u li jinkuraġġixxu l-involviment ta' nisa u rġiel oħrajn sabiex tinkiseb l-ugwaljanza bejn is-sessi u l-bilanċ bejn il-ħajja tax-xogħol u l-ħajja tal-familja, dan ikun ta' għajnuna kbira fil-ġlieda kontra l-isterjotipi negattivi li jiffaċċjaw in-nisa; jitlob lill-Kummissjoni għalhekk sabiex tfassal miżuri skond il-programm Midja 2007 pereżempju, sabiex jitqajjem għarfien aħjar fil-midja, pereżempju permezz ta' fora ta' konsultazzjoni permanenti ma' membri ta' dan is-settur, dwar l-isterjotipi li dawn jirrapreżentaw u sabiex jippromwovu opportunitajiet indaqs, b'mod partikulari bil-għan li jinfurmaw u jqajmu għarfien akbar fost iż-żagħżagħ, irgiel u nisa;

31. Iħeġġeġ lill-Istati Membri biex jieħdu miżuri biex jeliminaw sterjotipi dwar il-ġeneru, b'mod partikulari fis-suq tax-xogħol u biex jippromwovu l-preżenza ta' l-irġiel fis-setturi u fit-tipi ta' xogħol okkupati b'mod predominanti min-nisa, bħal fl-iskjejjel primarji u f'faċilitajiet għall-kura;

32. Jitlob b'insistenza lill-Kummissjoni biex tinkludi fil-Pjan ta' Rotta d-drittijiet ta' persuni transesswali u l-problemi li dawn jiffaċċjaw, skond d-deċiżjonijiet li ngħataw reċentement mill-Qorti tal-Ġustizzja tal-Komunità Ewropea;

33. Jistieden lill-Kummissjoni biex timplimenta taħriġ obbligatorju dwar l-integrazzjoni ta' l-aspett tal-ġeneru u dwar is-sensibilizzazzjoni dwar kwistjonijiet ta' ġeneru għall-Membri tal-Kummissjoni u għall-funzjonarji għoljin, kif ukoll biex dawn l-aspetti jiġu inklużi f'kull taħriġ rigward amministrazzjoni għall-funzjorarji Ewropej;

34. Jitlob lill-Kummissjoni biex tippromwovi l-użu ta’ terminoloġija mhux sessista, hekk li tilħaq il-kulturi kollha konċernati, fid-dokumenti kollha uffiċjali u sabiex tiġi interpretata fil-lingwi kollha uffiċjali ta' l-Unjoni Ewropea;

35. Iħeġġeġ lill-istituzzjonijiet u lill-aġenziji Ewropej biex jippromwovu l-ugwaljanza bejn l-irgiel in-nisa u fil-livelli amministrattivi u sabiex jiffissaw l-objettiv li tintlaħaq ugwaljanza bejn l-irġiel u n-nisa fl-impjegar u fil-ħatriet, b'mod partikulari għal pożizzjonijiet ta' xogħol ta' livell għoli;

36. Jitlob lill-Kummissjoni biex fir-Rapport Annwali tal-Pjan ta' Rotta tiddedika kapitlu separat dwar opportunitajiet indaqs għan-nisa u l-irġiel fl-Unjoni Ewropea u sabiex f'dan il-kapitlu jingħata rapport dwar il-progress li sar dwar dan;

37. Jitlob lill-Kummissjoni sabiex tinforma regolarment lill-kumitat(i) kompetenti tal-Parlament Ewropew dwar il-moniteraġġ tal-progress li jsir fil-Pjan ta' Rotta, b'mod partikulari permezz ta' rapporti pubbliċi magħmula minn kull pajjiż individwali;

38.  Jagħti istruzzjonijiet lill-President tiegħu sabiex jgħaddi din ir-riżoluzzjoni lill-Kunsill, lill-Kummissjoni, lill-Kumitat Ekonomiku u Soċjali, lill-Kumitat għar-Reġjuni, kif ukoll lill-organi eżekuttivi u organi eletti responsabbli għall-qasam ta' l-opportunitajiet indaqs fil-livelli lokali, reġjunali u nazzjonali.

(1) ĠU C 104, 03.05.2006, p. 19. (2) ĠU C 17, 19.01.2001, p. 22. (3) ĠU C 223 8.8.2001, p. 153. (4) ĠU C 59, 23.2.2001, p. 258. (5) ĠU C 320 E, tal-15.12.2005, p. 247. (6) ĠU C 205, 6.08.2005, p. 21. (7) ĠU C 287 E, ta' l-24.11.2006, p. 323. (8) ĠU C 102 E, tat-28.04.2004, p. 492. (9) ĠU C 97 E, ta' 22-4.3.2004, p. 566. (10) ĠU C 288 E, ta' l-25.11.2004, p. 66. (11) ĠU C 287 E, ta' l-24.11.2006, p. 75. (12) Testi adottati ta' din id-data, P6_TA(2006)0437. (13) Skond dejta tal-UNIFEM waħda minn kull tliet nisa soffriet xi għamla ta' vjolenza matul ħajjitha. (14) Cf. Fost oħrajn: ix-xogħol ta' l-OCDE, tal-UNIFEM, tal-Bank Dinji, tas-Sekretarjat tal-Commonwealth għall-ugwaljanza ta' opportunitajiet, kif ukoll l-istudji u proġetti magħmula mill-Kunsill ta' l-Ewropa, il-Kunsill tal-Ministri Nordiċi, kif ukoll il-Ministeru tax-Xogħol u l-Affarijiet Soċjali ta' l-Olanda. (15) Id-Direttiva tal-Kunsill 86/613/EEC tal-11 ta' Diċembru 1986 dwar l-applikazzjoni tal-prinċipju tat-trattament ugwali għall-irġiel u n-nisa fuq ix-xogħol, inkluż min jaħdem fl-agrikultura jew bħala ħaddiema għal rashom, u dwar il-protezzjoni għal nisa li jaħdmu għal rashom meta jkunu tqal jew meta jsiru ommijiet. (16) Direttiva tal-Kunsill 89/391/EEK tat-12 ta' Ġunju 1989 dwar l-introduzzjoni ta' miżuri biex iħeġġu titjib fis-sikurezza u s-saħħa ta' ħaddiema fuq ix-xogħol. (17) Id-Direttiva 2004/41 tal-Parlament Ewropew u tal-Kunsill tat-3 ta' Ġunju 2003 dwar l-attivitajiet u l-moniteraġġ ta' istituzzjonijiet li jipprovdu għall-irtirar mix-xogħol. (18) Direttiva tal-Kunsill 92/85/EEK tat-19 ta' Ottubru 1992 dwar l-introduzzjoni ta' miżuri biex iħeġġu titjib fis-sikurezza u s-saħħa ta' ħaddiema nisa tqal u ħaddiema li jkunu għadhom kif welldu jew ikunu qed ireddgħu. (19) ĠU C 261, 6.08.2004, p. 19. (20) Id-Direttiva 75/117/KEE tal-Kunsill ta' l-10 ta' Frar 1975 dwar it-tqarrib tal-liġijiet ta' l-Istati Membri li jirrigwardaw l-applikazzjoni tal-prinċipju ta' pagi ndaqs għal ħaddiema rġiel u nisa. (21) Id-Direttiva tal-Kunsill 96/34/KE tat-3 ta' Ġunju 1996 dwar il-ftehim ta' qafas dwar liv parentali milħuq bejn l-UNICE, is-CEEP u l-ETUC. (22) Proġatt tad-DĠ "Xogħol u Affarijiet Soċjali" tal-Kummissjoni, li jiġbor u janalizza l-parteċipazzjoni tan-nisa fil-proċess għat-teħid ta' deċiżjonijiet (istituzzjonijiet politċi, amministrazzjoni pubblika, imsieħba soċjali u NGOs prinċipali). Indirizz url: http://ec.europa.eu/employment_social/women_men_stats/index_en.htm

A. IL-PJAN TA' ROTTA

Il-Pjan ta' Rotta 2006-2010 għall-ugwaljanza bejn in-nisa u l-irġiel propost mill-Kummissjoni(1) jidentifika sitt oqsma ta' azzjoni prijoritarja li huma maqsuma f'serje ta' azzjonijiet kruċjali u jinkludi żewġ annessi li jispeċifikaw l-indikaturi għall-moniteraġġ tal-progress u l-unitajiet u l-kumitati tal-Kummissjoni li huma risponsabbli għall-ugwaljanza bejn is-sessi.

Il-Kummissjoni għamlet evalwazzjoni ta' l-impatt ta' dan il-Pjan ta' Rotta(2) li jiddeskrivi s-sitwazzjoni attwali fl-Ewropa rigward l-ugwaljanza bejn is-sessi, b'referenza partikulari għall-oqsma prijoritarji identifikati fih.

Id-dokument tal-Kummissjoni jaħseb għal titjib fil-governanza billi jsaħħaħ l-istrutturi interni tal-Kummissjoni u bil-ħolqien ta' Istitut Ewropew għall-Ugwaljanza bejn is-Sessi.

1. Oqsma prijoritarji

1. Il-kisba ta’ indipendenza ekonomika jndaqs bejn in-nisa u l-irġiel:

a) Jintlaħqu l-objettivi ta' Liżbona;

b) Inkorraġġiment ta' l-involviment tan-nisa fil-kummerċ;

c) Ugwaljanza bejn is-sessi fil-ħarsien soċjali u fil-ġlieda kontra l-faqar

d) L-għarfien ta' l-aspett tal-generu fil-qasam tas-saħħa

e) Il-ġlieda kontra d-diskriminazzjoni multipla, b’mod partikolari kontra l-immigranti nisa u li jagħmlu parti minn minoranza etnika

2. Għajnuna biex jisseddaq bilanċ bejn l-attività professjonali u l-ħajja tal-familja:

a) Arranġamenti flessibbli għax-xogħol kemm għan-nisa kif ukoll għall-irġiel,

b) Żieda fis-servizzi ta’ kura;

c) Politiki aħjar għal bilanċ bejn xogħol u ħajja, kemm għan-nisa kif ukoll għall-irġiel;

3. Il-promozzjoni ta’ Parteċipazzjoni Indaqs tan-Nisa u ta’ l-Irġiel fit-Teħid ta’ Deċiżjonijiet:

a) Il-parteċipazzjoni tan-nisa fil-politika;

b) In-nisa fit-teħid ta’ deċiżjonijiet ekonomiċi;

c) In-nisa fix-xjenza u t-teknoloġija;

4. L-eradikazzjoni tal-vjolenza marbuta mas-sess u t-traffikar tal-bnedmin:

a) It-tneħħija ta’ vjolenza relatati ġeneru;

b) Tneħħija tat-traffikar tal-bnedmin;

5. It-tneħħija ta’ l-isterjotipi tas-sessi fis-soċjetà :

a) It-tneħħija ta’ l-isterjotipi relatati mal-ġeneru fl-edukazzjoni, fit-taħriġ u fil-kultura;

b) It-tneħħija ta’ l-isterjotipi relatati mal-ġeneru fis-suq tax-xogħol;

c) It-tneħħija ta’ l-isterjotipi relatati mal-ġeneru fil-midja;

6. Il-promozzjoni ta' l-ugwaljanza bejn is-sessi barra mill-Unjoni Ewropea:

a) It-tisħiħ tal-leġiżlazzjoni ta’ l-UE fil-pajjiżi li sejrin jissieħbu, dawk li huma kandidati biex jissieħbu u dawk li huma kandidati potenzjali(3);

b) Il-promozzjoni ta' l-ugwaljanza bejn is-sessi fil-politika Ewropea għall-Viċinat (ENP).

2. Evalwazzjoni ta' l-impatt

L-evalwazzjoni ta' l-impatt tal-Kummissjoni jagħraf espliċetament li l-impatt ta' l-azzjonijiet proposti huwa impossibbli li jiġi kkalkulat minn qabel u għalhekk hija tagħti biss sommarju tad-dokumenti ta' sfond meħtieġa biex jitfassal il-Pjan ta' Rotta.

B. L-ISTRATEĠIJA TA' QAFAS PREĊEDENTI

L-istrateġija ta' qafas komunitarja rigward l-ugwaljanza bejn in-nisa u l-irġiel għall-perjodu 2001-2005 iddefinixxa wkoll l-oqsma prijoritarji u l-attivitajiet kruċjali. Programm ta' appoġġ finanzjarju għall-istrateġija ġie adottat mill-Kunsill permezz tal-proċedura ta' konsultazzjoni mal-Parlament.

1. Objettivi prijoritarji

- Il-promozzjoni ta' l-ugwaljanza fil-ħajja ekonomika;

- Il-promozzjoni ta' l-ugwaljanza fil-parteċipazzjoni u r-rappreżentanza;

- Il-promozzjoni ta' l-ugwaljanza fl-aċċess u l-użufrutt sħiħ tad-drittijiet soċjali għan-nisa u l-irġiel;

- Il-promozzjoni ta' l-ugwaljanza fil-ħajja ċivili;

- Il-promozzjoni ta' l-iżvilipp ta' l-irwoli u biex jingħelbu l-isterjotipi.

2. Evalwazzjoni

Il-Kummissjoni għamlet evalwazzjoni ta' nofs it-terminu tal-programm ta' appoġġ għall-istrateġija ta' qafas li ntużat ukoll fl-evalwazzjoni ta' l-impatt tal-Pjan ta' Rotta. Din l-evalwazzjoni tillimita ruħha li ssemmi biss l-attivitajiet tal-programm ta' qafas implimentati sa tmien l-2004.

Barra minn hekk, l-analiżi li fuqu tistrieħ l-evalwazzjoni ta' l-impatt (li saret minn esperti esterni) għamlet għadd ta' rakkomandazzjonijiet, li huma li l-programm ta' qafas għall-istrateġija jsir aktar ċar u aktar relevanti, li titjib is-sinerġija bejn il-prijoritajiet differenti u li jiġu diffużi aħjar ir-riżultati pożittivi u l-prattiki tajbin.

Ir-rakkomandazzjonijiet jindikaw b'mod ċar li jeħtieġ li jitjiebu l-programazzjoni, l-implimentazzjoni u l-evalwazzjoni. Ir-rapporteur tqis li dan it-tijib huwa ta' importanza prijoritarja.

C. TEMI PRIJORITARJI TAR-RAPPORT

Approċċ: Nibdew mid-drittijiet!

Ir-rapporter tipproponi li tiffoka "l-ispirtu" tal-Pjan ta' Rotta fuq id-drittijiet fundamentali tan-nisa sabiex iċ-ċittadini Ewropej jitħeġġu sabiex jassimilaw il-kunċett ta' ugwaljanza bejn is-sessi. Il-politiki komunitarji dwar opportunitajiet indaqs mhumiex biss il-frott tal-kompetenzi li jistabbilixxi t-Trattat, imma huma fuq kollox maħsuba biex jilħqu ma' l-eżiġenza tar-rispett tad-drittijiet tal-bniedem tal-mara. Dan l-approċċ għandu l-intenzjoni li jerġa' jagħti nifs politiku lill-Unjoni u lill-Istati Membri u biex tiġi stabbilita definizzjoni ċara ta' l-integrazzjoni ta' l-aspett tal-ġeneru, jiġifieri metidoloġija strumentali dwar r-rispett tad-drittijiet fundamentali.

Minn din il-persperttiva l-Pjan ta' Rotta jikkostitwixxi strument ta' azzjoni u sors ta' proposti li għandhom l-għan li tabilħaqq tinkiseb ugwaljanza "reali" bejn l-irġiel u n-nisa, li l-bażi tagħha tinsab fir-rispett tad-drittijiet tal-bniedem.

L-ewwel pass li għandu jittieħed f'din id-direzzjoni huwa l-evalwazzjoni ta' l-implimentazzjoni tad-direttivi mniżżla fil-proposta li huma meħtieġa biex tiġi determinata l-"fiżżjonomija" preċiża tal-fenomenu tad-dikriminazzjoni, il-kuntest ta' dan u kemm huwa mifrux.

L-attenzjoni tiffoka l-aktar fuq in-nisa immigrati li ħafna drabi jiffaċċjaw l-aktar forom koroh ta' diskriminazzjoni, li jagħmel aktar diffiċli l-integrazzjoni sħiħa tagħhom u l-aċċess għal servizzi essenzjali bħalma huma s-saħħa u l-edukazzjoni. Ir-rapporteur tipproponi li l-isforzi jikkonċentraw ruħhom fuq l-użu ta' l-għerf bħala l-mezz ta' emanċipazzjoni. It-tama hi l-għerf tkun eżiġenza obbligatorja li talanqas tippermetti d-diffużżjoni fost in-nisa l-għarfien tad-drittijiet inaljenabbli tagħhom u tal-kapaċitajiet lingwistiċi.

L-integrazzjoni ta' l-aspett tal-ġeneru fil-baġits nazzjonali

L-integrazzjoni ta' l-aspett tal-ġeneru fil-baġits nazzjonali huwa l-mezz l-aktar utli, imma l-anqas li jintuża, biex ikun hemm applikazzjoni ta' opportunitajiet indaqs fil-politiki pubbliċi, il-pern ta' l-implimentazzjoni fil-livell Ewropew ta' opportunitajiet indaqs. F'din il-perspettiva, il-Pjan ta' Rotta m'għandux jillimita ruħu biss biex ifassal skedi għall-evalwazzjoni tal-vijabbilità, li wara kollox diġà saru mill-Kumitat Konsultattiv għall-Opportunijiet Indaqs, imma għandu iniedi proġetti pilota u jipproponi li jkun hemm "orkestratur" ewlieni għall-inizjattivi ta' integrazzjoni ta' l-aspett tal-ġeneru fil-baġits nazzjonali, u b'hekk jiggarantixxi diffużżjoni omoġenja ta' l-aħjar prattiki.

L-Istrateġija ta' Liżbona u l-bilanċ bejn il-ħajja tal-familja u l-ħajja tax-xogħol

Li jkun hemm aktar nisa jaħdmu huma fundamentali biex jintlaħqu l-objettivi ta' Liżbona. Madankollu, biex nisa jkunu jistgħu jidħlu jaħdmu u jibqgħu fis-suq tax-xogħol jeħtieġ li jitneħħew il-forom kollha ta' diskriminazzjoni li għadhom jeżistu, bħal ma huma d-differenzi fil-pagi, implimentazzjoni diżugwali ta' skemi ta' sigurtà soċjali, u l-fatt li l-irġiel ma jassumux responsabbiltajiet biżżejjed fil-ħajja tal-familja.

Ir-rapporteur għalhekk tissuġġerixxi li jiġi adottat approċċ ġenerali li jitlaq mill-Istrateġija ta' Liżbona u jikkunsidra l-aspetti kollha fejn id-dikriminazzjoni tista' sseħħ, ibda mit-taħriġ u spiċċa fl-irtirar. Miżuri bħar-reviżjoni tad-direttiva dwar pagi ndaqs u dwar liv għal min isir ġenitur, kif ukoll objettivi ġodda għal servizzi ta' kura u għajnuna għal persuni li mhumiex kapaċi jieħdu kura tagħhom infushom, jistgħu min-naħa jgħinu fl-aċċessibiltà għax-xogħol u min-naħa l-oħra, billi dawn jikkontribwixxu għall-bilanċ bejn il-ħajja tax-xogħol u l-ħajja tal-familja, jgħinu wkoll biex in-nisa jkomplu jaħdmu.

Għal dan il-għan, ir-rapporteur tissuġġerixxi li kull Stat Membru jinnomina persuna nazzjonali, "Ms Liżbona", li tkun uffiċjalment risponsabbli għal kwistjonijiet dwar opportunitajiet indaqs u li fil-qafas ta' l-implimentazzjoni u tar-reviżjoni ta' l-istrateġija tieħu ħsieb tiggarantixxi integrazzjoni tabilħaqq ta' l-aspett tal-ġeneru fil-politiki għall-implimentazzjoni u li tagħmel mod li fil-livell politiku tingħata dejjem kunsiderazzjoni għall-aspett ta' l-ugwaljanza bejn l-irġiel u n-nisa.

Parteċipazzjoni u sterjotipi

L-inizjattivi tad-DG tal-Kummissjoni għall-Impiegi u Affarijiet Soċjali biex toħloq database dwar il-parteċipazzjoni tan-nisa fil-proċess għat-teħid ta' deċiżjonjiet huwa l-ewwel pass prattiku li jista' jwassal biex l-inizjattivi nazzjonali u tal-Komunità jimxu f'din id-direzzjoni.

Id-dejta dispondibbli tagħti stampa diżugwali ħafna, b'persentaġġi differenti ħafna bejn pajjiż u ieħor u bejn settur u ieħor. Ir-rapporteur qiegħda għalhekk titlob lill-Kummissjoni biex tadotta miżuri f'dan ir-rigward bl-iskop li jkun hemm skambju ta' l-aħjar prattiki bejn l-Istati Membri, kif ukoll djalogu ma' msieħba mhux Ewropej li rnexxilhom isibu soluzzjonijiet effikaċi biex iżidu l-preżenza tan-nisa fiċ-ċentri fejn jittieħdu d-deċiżjonijiet. Il-xogħol tal-Kummissjoni għandu jkun li tagħmel xogħol ta' evalwazzjoni, ta' diffużżjoni u ta' sinteżi sabiex il-popolazzjoni Ewropea tkun tabilħaqq rappreżentata fil-livelli kollha, fil-pajjiżi kollha ta' l-Unjoni, f'dawk il-postijiet fejn jittieħdu d-deċiżjonijiet (ta' natura intraprenditorjali, elettivi jew eżekuttivi) u fl-Istituzzjonijiet Ewropej.

(1) COM(2006)0092. (2) SEC(2006)0275. (3) L-Albanija, Il-Bosnia-Herżegovina, il-Montenegro u s-Serbja, inkluż il-Kosovo. Cf. ukoll COM(2005)0561.

f'isem il-Kumitat għad-Drittijiet tan-Nisa u l-Ugwaljanza bejn is-Sessi

dwar il-pjan direzzjonali għall-ugwaljanza bejn in-nisa u l-irġiel 2006-2010

(2006/2132(INI))

Rapporteur għal opinjoni: Elena Valenciano Martínez-Orozco

SUĠĠERIMENTI

Il-Kumitat għall-Iżvilupp jistieden lill-Kumitat għad-drittijiet tan-Nisa u għall-Ugwaljanza bejn is-Sessi bħala l-kumitat responsabbli, sabiex jinkorpora s-suġġerimenti li ġejjin fil-mozzjoni għal riżoluzzjoni li se jadotta:

1.   Jilqa' b'sodissfazzjon l-impenn tal-Kummissjoni sabiex timbotta l-aġenda għall-ugwaljanza bejn in-nisa u l-irġiel billi tinforza s-sħubija ma' l-Istati Membri u partijiet oħrajn u sabiex tinkoraġġixxi l-implimentazzjoni tagħha u l-attivitajiet ta' l-organizzazzjonijiet u n-netwerks tan-nisa;

2.   Jitlob lill-Kummissjon sabiex tirrispetta l-impenn tagħha fl-2006 li tippreżenta komunikazzjoni dwar 'Viżjoni Ewropea għall-ugwaljanza bejn in-nisa u l-irġiel fil-Koperazzjoni għall-Iżvilupp';

3.   Jilqa' b'sodisfazzjon l-impenn tal-Kummissjoni sabiex tippromwovi l-implimentazzjoni tar-Riżoluzzjoni 1325/2000 tal-Kunsill tas-Sigurtà tan-Nazzjonijiet Uniti dwar in-Nisa u l-Paċi u s-Sigurtà, u sabiex tfassal linji gwida fl-2006 dwar l-integrazzjoni fuq livell ta' l-ugwaljanza bejn is-sessi ta' l-attivitajiet ta' taħriġ għal tmexxija waqt kriżijiet;

4.   Jistieden lill-Kummissjoni biex twettaq evalwazzjoni kwantitattiva u kwalitattiva tan-nefqa u tal-programmi ta' għajnuna għall-iżvilupp ta' pajjiżi terzi, u biex tindirizza l-bilanċ tar-riżultati ta' l-Istrateġija ta' Qafas għall-ugwaljanza bejn in-nisa u l-irġiel għall-perjodu 2001-2005 u jinsisti li dawn ir-riżultati jiġu ppubblikati;

5.   Jisħaq fuq l-importanza li tiġi promossa kollaborazzjoni mill-qrib ma' l-istituzzjonijiet Ewropej u internazzjonali, reġjonali u/jew bilaterali, inklużi l-organi tan-Nazzjonijiet Uniti, sabiex jiġu armonizzati l-approċċi fil-qasam ta' l-ugwaljanza bejn is-sessi fl-oqsma tal-koperazzjoni għall-iżvilupp u għall-għajnuna umanitarja, speċjalment bit-tisħiħ tar-rabta bejn il-Pjattaforma ta' Azzjoni ta' Pekin u l-Programm ta' Azzjoni tal-Kajr, il-Konvenzjoni dwar l-Eliminazzjoni tal-Forom kollha ta' Diskriminazzjoni kontra n-Nisa (CEDAW) u l-protokoll fakultattiv tagħha, u l-Objettivi tal-Millennju għall-Iżvilupp (MDGs);

6.   Jenfasizza l-bżonn li tiġi appoġġjata l-integrazzjoni sistematika tad-dimensjoni nisa-irġiel bħala strateġija biex tingħata setgħa lin-nisa u tinkiseb l-ugwaljanza bejn is-sessi u biex tiġi promossa d-dimensjoni ta' l-ugwaljanza fil-politiki fundamentali kollha fl-oqsma tal-koperazzjoni, l-iżvilupp u l-għajnuna umanitarja; jenfasizza l-importanza li tkun promossa l-kwistjoni transversali ta' l-ugwaljanza bejn is-sessi fil-qafas tal-finanzjament Komunitarju għall-iżvilupp;

7.   Jenfasizza l-karattru speċifiku tal-femminizzazzjoni tal-faqar u jinsisti fuq il-fatt li r-realizzazzjoni ta' l-MDGs tiddipendi fuq il-promozzjoni ta' l-ugwaljanza bejn is-sessi fl-etajiet kollha bis-saħħa tat-titjib fil-qagħda tan-nisa u bl-emanċipazzjoni tagħhom, li huma mezzi essenzjali għat-tnaqqis tal-faqar, il-ġuħ u l-malnutrizzjoni, u jenfasizza l-importanza li jiġi promoss l-iżvilupp reali u sostenibbli tal-pajjizi li għadhom qed jiżviluppaw;

8.   Jitlob sabiex tingħata importanza partikulari lill-Objettivi tal-Millenju 2 u 3 u li tiġi promossa l-edukazzjoni tal-bniet fil-livelli kollha, bħala mezz indispensabbli għat-tkabbir tal-produttività u t-tnaqqis tal-faqar, għat-titjib tal-kundizzjonijiet tas-saħħa u l-benesseri tal-familji tagħhom u biex jingħata kontribut għall-iżvilupp sostenibbli tas-soċjetajiet tagħhom;

9.   Jitlob lill-Kummissjoni biex tieħu miżuri biex tiggarantixxi li n-nisa jkollhom id-drittijiet tagħhom għas-saħħa, inklużi s-saħħa sesswali u dik riproduttiva; jisħaq li huwa essenzjali, b'mod partikulari fil-kuntest tal-ġlieda kontra l-HIV/AIDS, li jiżdied l-aċċess għall-informazzjoni dwar is-saħħa sesswali u riproduttiva u għas-servizzi tas-saħħa;

10. Iħeġġeġ lill-Kummissjoni u lill-Istati Membri biex, bħala parti mill-politika tagħhom dwar il-koperazzjoni għall-iżvilupp, jieħdu miżuri xierqa biex iħeġġu rappreżentazzjoni aħjar tan-nisa billi jiżguraw li n-nisa jkollhom l-istess opportunitajiet bħall-irġiel u billi jinkuraġġixxu l-parteċipazzjoni tagħhom f'għaqdiet professjonali u f'korpi ta' ppjanar u ta' deċiżjoni politika, fejn hemm bżonn permezz ta' kwoti speċifiċi li jiggarantixxu l-parteċipazzjoni tan-nisa fil-livelli kollha tal-ħajja politika;

11. Jenfasizza l-ħtieġa li titkattar l-parteċipazzjoni tan-nisa fil-midja u fil-pjattaformi ta' opinjoni pubblika sabiex jiżdiedu l-parteċipazzjoni u l-kontribuzzjoni tagħhom lejn l-iżvilupp;

12. Jenfasizza l-ħtieġa li n-nisa, li ta' spiss wisq għadhom jiġu marġinalizzati fil-programmi ta' l-iżvilupp, jingħataw l-opportunità li jtejbu l-qagħda tagħhom u tal-familji tagħhom, billi jkun garantit li jingħataw aċċess ugwali għas-swieq tax-xogħol u għal impjiegi permanenti u ta' kwalità aħjar, kif ukoll għall-mezzi ta' produzzjoni inklużi l-art, il-kreditu u t-teknoloġija billi jingħata appoġġ finanzjarju u tekniku xieraq; jenfasizza l-irwol pożittiv tal-mikrokreditu fit-tisħiħ tal-pożizzjoni tan-nisa, u jistieden lill-Kummissjoni u lill-Istati Membri biex jieħdu miżuri biex jinkoraġġixxu l-użu tiegħu;

13. Jistieden lill-Kummissjoni u lill-Istati Membri biex jippromwovu miżuri mmirati lejn aċċess aktar ugwali għal programmi u servizzi ta' taħriġ vokazzjonali billi jiġu orjentati lejn l-attivitajiet produttivi mmaniġġjati min-nisa, inklużi intrapriżi żgħar u ta' daqs medju (SMEs);

14. Jenfasizza l-fatt li l-Kunsill u l-Kummissjoni għandhom jindirizzaw, b'mod regolari u sistematiku, il-kwistjoni ta' l-ugwaljanza tas-sessi fil-laqgħat tagħhom kif ukoll fil-kuntest tad-djalogu politiku ma' pajjiżi terzi, filwaqt li jirreferu għall-klawsola dwar id-demokrazija u d-drittijiet tal-bniedem fil-każ ta' ksur serju tad-drittijiet tan-nisa;

15. Huwa tal-fehma li l-ugwaljanza bejn is-sessi m'għandhiex tieqaf fil-fruntiera, u li għandu jkun garantit r-rispett għad-drittijiet tal-bniedem, u d-difiża tagħhom, tal-migranti u l-ħaddiema migranti u l-familji tagħhom; jiddispjaċih li l-Kummissjoni naqset milli tqis d-dimensjoni irġiel-nisa fil-komunikazzjoni tagħha bit-titolu 'Il-Migrazzjoni u l-iżvilupp: xi orjentazzjonijiet konkreti' u jitlob li dik id-dimensjoni titqies fl-implimentazzjoni u fl-iżvilupp tagħha;

16. Jirrakkomanda lill-Istati Membri u lill-Kummissjoni biex jagħmlu dispożizzjoni għall-iffinanzjar ta' programmi mmirati lejn l-għoti ta' informazzjoni fil-pajjiżi ta' oriġini dwar ir-rekwiżiti meħtieġa għall-wasla u għal matul iż-żmien li l-immigranti jkunu fl-UE u dwar il-perikli assoċjati ma' l-immigrazzjoni irregolari;

17. Jitlob lill-Istati Membri biex isaħħu l-istrutturi konsulari u diplomatiċi tagħhom sabiex jimmaniġġjaw aħjar u b'iktar effiċjenza l-ħtiġijiet ta' l-immigrazzjoni u biex jikkunsidraw l-integrazzjoni ta' l-ugwaljanza tas-sessi fl-għoti ta' viżi speċjali għan-nisa li jisfaw vittmi ta' persekuzzjoni jew ta' vjolenza bbażata fuq il-ġeneru fil-pajjiżi tagħhom ta' l-oriġini jew ta' residenza;

18. Jistieden lill-Istati Membri biex jiżviluppaw politiki u programmi speċifiċi ta' żvilupp biex jiggarantixxu għajnuna medika, soċjali, legali u psikoloġika lin-nisa li kellhom iħallu djarhom minħabba kunflitti, u lil tipi oħra ta' nisa migranti;

19. Jenfasizza l-ħtieġa li l-Kummissjoni tikkunsidra miżuri li jiskoraġġixxu u jwaqqfu forom ta' vjolenza kontra nisa li qed jitolbu kenn u kontra l-migranti fil-pajjiżi ta' l-oriġini tagħhom, kemm jekk ikunu nisa mhedda mill-familja jew minn żwieġhom, kif ukoll jekk kienu irrinegati ta' spiss, jew nisa li jsofru forma ta' vjolenza soċjali minħabba l-impożizzjoni ta' normi morali jew reliġjużi diskriminatorji;

20. Jappoġġja l-ħtieġa li jissaħħu l-azzjonijiet fil-kuntest tal-koperazzjoni għall-iżvilupp immirati lejn l-iżvilupp ta' metodi preventivi fil-ġlieda kontra l-vjolenza sesswali u t-traffikar tal-persuni biex jiġu sfruttati sesswalment, u biex tiġi mmonitorjata l-implimentazzjoni ta' dawn il-metodi;

21. Jirrikonoxxi li l-bniet huma partikularment vulnerabbli għall-vjolenza u għad-diskriminazzjoni, u jitlob li jsiru sforzi akbar biex il-bniet jitħarsu minn kull tip ta' vjolenza, inklużi l-istupru, l-isfruttament sesswali u r-reklutaġġ fil-forzi armati, u biex jitħeġġu politiki u programmi li jippromwovu l-ħarsien tad-drittijiet tal-bniet f'sitwazzjonijiet ta' kunflitt u ta' wara l-kunflitt;

22. Jitlob lill-Kummissjoni u lill-Istati Membri biex jimplimentaw programmi mmirati lejn l-eliminazzjoni ta' prattiċi u drawwiet tradizzjonali li huma ta' ħsara għas-saħħa tan-nisa, b'mod partikulari l-mutilazzjoni tal-ġenitali femminili, iż-żwiġijiet f'età żgħira u sfurzati u d-delitti mwettqa għall-unur;

23. Jemmen li jekk il-miżuri indikati fil-Pjan Direzzjonali jiġu bbażati fuq politika li tagħti prijorità lir-regoli tas-suq u tikkonċentra fuq il-kisba ta' vantaġġ kompetittiv għall-UE fl-ekonomija globalizzata, il-promozzjoni ta' l-ugwaljanza bejn is-sessi se tibqa' marġinalizzata; jesprimi tħassib li proċeduri li jikkonċentraw fuq it-tisħiħ tal-kompetittività ta' l-UE għandhom mnejn jagħmlu ħsara lill-interessi tan-nisa f'pajjiżi li għadhom qed jiżviluppaw;

24. Jistieden lill-Kummissjoni biex tagħti attenzjoni partikulari għall-immigrazzjoni tan-nisa u s-sitwazzjoni ta' l-immigranti nisa fl-Ewropa; jenfasizza li għandhom jittieħdu miżuri speċjali sabiex tiġi faċilitata l-integrazzjoni tagħhom fis-soċjetà ospitanti;

SUĠĠERIMENTI

Il-Kumitat għall-Impjiegi u l-Affarijiet Soċjali jistiden lill-Kumitat għad-Drittijiet tan-Nisa u l-Ugwaljanza bejn is-Sessi, bħala l-kumitat responsabbli, sabiex jinkorpora s-suġġerimenti li ġejjin fil-mozzjoni għal riżoluzzjoni li ser jadotta:

1.   Jaqbel li l-ugwaljanza bejn is-sessi hija dritt fundamentali u valur komuni ta' l-UE, iżda jinnota li għalkemm sar progress sinifikanti f' dan il-qasam, għad fadal ħafna inugwaljanzi bejn in-nisa u l-irġiel;

2.   Jaqbel li l-ugwaljanza bejn is-sessi hija dritt fundamentali u valur bażiku ta' l-UE; iżda jinnota li għalkemm sar progress sinifikanti f'dan il-qasam, għad fadal ħafna inugwaljanzi bejn n-nisa u l-irġiel; iqis li minħabba l-pożizzjoni sfavorevoli tan-nisa fil-qasam soċjali u ekonomiku, b'livelli ogħla ta' qgħad u b'pagi inqas minn ta' l-irġiel, ir-riskju li n-nisa jiġu sfruttati huwa ikbar u għal din ir-raġuni jitlob li jiġu imposti sanzjonijiet stretti kontra dawk li jisfruttawhom waqt li jkunu qed jimpjegawhom;

3.   Jenfasizza li l-konformità mal-leġiżlazzjoni tal-KE dwar it-trattament ugwali ta' l-irġiel u tan-nisa, l-użu effettiv tal-Fondi Strutturali u l-mekkaniżmi l-ġodda għall-iffinanzjar jistgħu jtejbu t-taħriġ, jagħtu spinta lill-impjiegi u jippromwovu l-imprenditorjat;

4.   Jikkunsidra li l-istituzzjonijiet Ewropej għandhom jikkomunikaw aktar dwar il-politika żviluppata fil-livell Ewropew sabiex jiġu promossi l-ugwaljanza bejn is-sessi u d-drittijiet tan-nisa, u l-progressi li dik il-politika għamlet possibbli;

5.   Jipproponi li l-Istati Membri jiżviluppaw strateġija għall-impjiegi li tneħħi x-xkiel għall-aċċess li n-nisa jkollhom għas-suq tax-xogħol, billi jippromwovu l-kundizzjonijiet ta' pagi indaqs u jieħdu azzjoni kontra d-diskriminazzjoni fil-pensjonijiet li tinħoloq minn waqfiet mix-xogħol fuq il-bażi ta' leave għal maternità u leave ta' ġenitur;

6.   Jenfasizza l-irwol kruċjali li għandhom l-istituzzjonijiet Ewropej u nazzjonali fil-promozzjoni ta' soċjetà bbażata fuq l-ugwaljanza bejn is-sessi; jistieden lill-istituzzjonijiet nazzjonali sabiex jorganizzaw kampanji ta' informazzjoni u ta' qawmien ta' kuxjenza pubblika dwar l-aspetti kollha tar-relazzjonijet bejn is-sessi (fir-rigward tal-ħajja professjonali, familjari u politika u tas-saħħa, sabiex jiġu miġġielda l-forom kollha ta' vjolenza kontra n-nisa, inkluż it-traffikar tan-nisa);

7.   Jenfasizza li l-intrapriżi, li huma fundamentali għall-iżvilupp ekonomiku u għall-ħolqien ta' l-impjiegi, għandhom jikkontribwixxu fi ħdan il-qafas tar-responsabilità soċjali korporattiva għall-qerda tad-diskriminazzjoni li spiss in-nisa jisfaw vittmi tagħha u b'mod partikulari billi jippromwovu l-aċċess għall-impjiegi, għat-taħriġ u għall-iżvilupp vokazzjonali; jinsisti fuq l-importanza ta' l-irwol ta' l-imsieħba soċjali u tad-djalogu soċjali;

8.   Ifakkar li t-taħlita ta' kompetittività ekonomika u ġustizzja soċjali hija fil-qalba tal-mudell Ewropew ta' żvilupp;

9.   Jinnota li l-isfidi iffaċċjati mill-Istati Membri u l-UE fil-qasam ta' l-ugwaljanza bejn is-sessi qed jiżdiedu bħala riżultat ta' kompetizzjoni ekonomika aktar intensa u minħabba d-domanda sussegwenti għal ħaddiema aktar flessibli u mobbli; jenfasizza li n-nisa għadhom ibatu minn diskriminazzjoni soċjali, fl-impjiegi u taħt forom oħra u li ċ-ċans hu li dawn ir-rekwiżiti jkollhom impatt aktar qawwi fuq in-nisa milli fuq l-irġiel; iqis li din is-sitwazzjoni m'għandhhiex titħalla ddgħajjef l-ugwaljanza bejn is-sessi u d-drittijiet tan-nisa għar-riproduzzjoni;

10. Iqis li l-isfidi attwali għall-bidla demografika jistgħu jiġu affrontati aħjar jekk in-nisa jkollhom aċċess akbar għas-suq tax-xogħol bażat fuq ħinijiet tax-xogħol flessibbli flimkien ma' sigurtà tax-xogħol, sigurtà soċjali, opportunitajiet għal edukazzjoni u faċilitajiet għall-kura tat-tfal, fatturi li jippermettu bilanċ aħjar bejn ix-xogħol u l-ħajja u żieda fl-opportunitajiet għal impjiegi għan-nisa;

11. Jindika li l-parteċipazzjoni tan-nisa fis-settur ta' riċerka, fix-xjenzi u t-teknoloġija jistgħu jikkontribwixxu biex tiżdied l-innovazzjoni;

12. Jappoġġja l-azzjonijiet fundamentali mressqa fil-Komunikazzjoni tal-Kummissjoni, Il-Pjan direzzjonali għall-ugwaljanza bejn in-nisa u l-irġiel (COM(2006)0092) (il-Pjan Direzzjonali) f'sitt oqsma prijoritarji li jirrigwardaw: il-kisba ta' indipendenza ekonomika għan-nisa, l-enfasizzar ta' l-irwol fundamentali tal-fondi soċjali għall-edukazzjoni globali fil-qasam ta' teknoloġiji ġodda li jirrikonċiljaw ix-xogħol u l-ħajja fil-familja; il-promozzjoni tal-parteċipazzjoni ugwali bejn in-nisa u l-irġiel fit-teħid tad-deċiżjonijiet; il-qerda tal-vjolenza u t-traffikar bbażati fuq ġeneru, b'attenzjoni partikulari għall-jasar; l-abolizzjoni ta' l-isterjotipi bbażati fuq ġeneru fis-soċjetà u l-promozzjoni ta' l-ugwaljanza bejn is-sessi barra l-UE; għalhekk jistenna li l-Kummissjoni tqajjem kuxjenza permezz ta' l-iskambju ta' l-aħjar prassi, l-appoġġ tar-riżultati ta' riċerka u segwitu; madankollu jemmen li sabiex dawn l-azzjonijiet ikunu effettivi, hemm bżonn li l-politiki soċjali u ekonomiċi ta' l-UE jiżguraw li n-nisa, l-irġiel u t-tfal kollha jkunu jistgħu jgħixu fid-dinjità u ħielsa mill-faqar;

13. Jistieden lill-Kummissjoni sabiex tagħmel kull sforz sabiex tassigura li l-miżuri sostnuti f'din il-kommunikazzjoni jissarrfu f'azzjoni; jenfasizza li, fil-passat, l-ammont konsiderevoli ta' diskussjoni dwar l-ugwaljanza bejn is-sessi rriżulta fi ftit li xejn miżuri konkreti, u issa huwa ż-żmien li jiġu applikati b'mod effettiv il-leġiżlazzjoni Ewropea u l-prinċipji stipulati fil-komunikazzjonijiet u d-direttivi ppubblikati dwar dan is-suġġett; iqis li hija essenzjali wkoll, biex dawn il-miżuri differenti jkunu jistgħu jiġu applikati b'mod effettiv, li tittejjeb is-sħubija ma' l-Istati Membri u s-soċjetà ċivili;

14. Jemmen fermament li biex jinkisbu l-objettivi ta' tkabbir u kompetittività stipulati fl-Istrateġija ta' Liżbona hemm bżonn li jintużaw il-mezzi ta' produzzjoni kollha u li n-nisa jridu jitħeġġu biex jieħdu sehem fuq l-istess livell bħall-irġiel;

15. Jemmen ukoll li l-azzjonijiet li jipprovdi għalihom il-Pjan direzzjonali għall-ugwaljanza bejn in-nisa u l-irġiel iridu jiġu inkorporati f'kull politika ekonomika u fi ħdan dan il-qafas iridu jsiru sforzi sabiex jissaħħu l-imprenditorjat fost in-nisa, l-aċċess aħjar għall-finanzjament u l-iżvilupp ta' netwerks imprenditorjali tan-nisa;

16. Jemmen li l-ugwaljanza bejn is-sessi, peress li hija waħda mill-iktar valuri bażiċi importanti ta' l-Unjoni Ewropea, hija għan li ta' min wieħed jiksbu mhux biss għal raġunijiet ta' effiċjenza ekonomika imma, b'mod partikulari, għal raġunijiet ta' ġustizzja soċjali u biex tintlaħaq dinja aktar ġusta u bilanċjata; għal din ir-raġuni l-ugwaljanza bejn is-sessi trid tkun parti tal-politiki kollha ta' l-Unjoni u ta' l-Istati Membri;

17. Jindika l-fatt li l-ugwaljanza bejn is-sessi fuq il-post tax-xogħol hija relatata mill-qrib mal-fatt li jrid jiġi żgurat li jkun hemm ir-rispett għad-drittijiet tal-ħaddiema f'sistemi flessibli;

18. Jitlob lill-Kummissjoni sabiex tippromwovi, fid-dokumenti kollha ta' l-UE, lingwaġġ li huwa sensittiv fir-rigward ta' ġeneru u li huwa kapaċi li jindirizza l-kulturi kollha involuti;

19. Jitlob lill-Kummissjoni sabiex tassigura li l-impatt fil-kuntest ta' ġeneru jkun kkunsidrat sew meta tiġi riveduta jew żviluppata leġiżlazzjoni tal-KE, bħal ma hi d-Direttiva dwar il-ħinijiet tax-xogħol, u li l-Kummissjoni taġixxi b'mod xieraq meta jkun mistenni impatt negattiv fil-kuntest ta' ġeneru bħal ma hu l-każ tad-Direttiva dwar il-ħinijiet tax-xogħol; jistieden lill-Kunsill sabiex ineħħi l-esklużjoni volontarja mid-Direttiva dwar il-ħinijiet tax-xogħol, peress li hi ta' dannu akbar għan-nisa milli għall-irġiel u tagħmilha aktar diffiċli li jiġu rikonċiljati x-xogħol u l-ħajja fil-familja;

20. Jitlob lill-Kummissjoni sabiex tinkoraġġixxi lill-Istati Membri sabiex jirrikonoxxu l-valur ekonomiku, soċjali u edukattiv ta' xogħol mhux imħallas fil-familja u fid-dar, billi joħolqu mekkaniżmi ta' kontribuzzjonijiet għas-sistema tal-ħarsien soċjali u sistemi għal pensjonijiet fuq bażi volontarja;

21. Jitlob lill-Kummissjoni sabiex tinkoraġixxi - permezz ta' azzjonijiet u politiki - il-parteċipazzjoni tan-nisa f'oqsma tax-xogħol tradizjonalment dominati mill-irġiel bil-ħsieb li jippromwovu l-ugwaljanza bejn is-sessi u l-pagi ndaqs;

22. Jenfasizza li n-nisa għandhom riskju akbar ta' qgħad, sfruttament u faqar mill-irġiel u għalhekk jistieden lill-Kummissjoni biex tagħti prijorità għall-iżvilupp ta' strateġiji biex titnaqqas il-femminizzazzjoni tal-faqar u l-qgħad u jistieden lill-Istati Membri biex jimplimentaw dawn l-istrateġiji għan-nisa fil-proċessi tal-ħarsien soċjali u l-inklużjoni soċjali;

23. Jiddispjaċih li l-Pjan direzzjonali ma jagħtix biżżejjed importanza lill-irwol li għandu t-taħrig sabiex tintlaħaq l-ugwaljanza sħiħa; huwa tal-fehma li għandhom jiġu intensifikati l-isforzi tat-taħriġ għan-nisa li huma bla xogħol jew li huma f'impjieg temporanju jew li qed jaħdmu f'xogħol ta' grad inferjuri; barra minn hekk jemmen li għandhom ikunu offerti inċentivi akbar sabiex in-negozji jipprovdu t-taħriġ fuq ix-xogħol meħtieġ għan-nisa li l-kwalifiki professjonali tagħhom huma ta' livell aktar baxx; jikkunsidra, fl-aħħar, li t-taħriġ għandu ikun partikolarment iffukat fuq in-nisa li jgħixu f'inħawi rurali b'mod speċjali fir-rigward ta' l-użu tat-teknoloġiji ġodda;

24. Jindika l-importanza ta' l-irwol li għandhom id-diversi awtoritajiet gvern u l-imsieħba soċjali (intrapriżi u trade unions) biex jiġu segwiti azzjonijiet pożittivi li jagħmlu l-ħajja aktar ġusta u bilanċjata; jisħaq li huwa essenzjali li jiġi assigurat l-involviment tas-settur privat u li l-awtoritajiet għandhom jagħtu l-inkoraġġiment meħtieġ sabiex ditti li jippromwovu bilanċ bejn ix-xogħol u l-ħajja jingħataw rikonoxximent uffiċjali, kemm jekk fuq livell lokali, reġjonali, nazzjonali jew Ewropew;

25. Jikkunsidra li hi xi ħaġa tajba, jekk wieħed iqis l-esperjenzi ta' dan l-aħħar fi Stati Membri bħal m'hi Spanja, li l-miżuri li qed jiġu rakkomandati mill-Kummissjoni għandhom jippermenttu li jsir tnaqqis mit-taxxa fuq id-dħul favur l-ommijiet żgħar li jaħdmu; jemmen li, b'mod simili, hemm bżonn li jiġi permess it-tnaqqis mit-taxxa korporattiva sabiex igawdu l-intrapriżi li jistabbilixxu ċentri għal kura tat-tfal matul il-ġurnata fuq il-post tax-xogħol;

26. Jistieden lill-Kummissjoni sabiex tieħu miżuri speċifiċi sabiex tiżgura li s-suggerimenti li saru fil-Pjan direzzjonali lill-Istati Membri jiġu verament implimentati, peress li l-Istati Membri huma responsabbli li tiġi integrata l-ugwaljanza bejn is-sessi fil-politika tal-gvern u, ta' spiss, li tiġi applikata l-leġiżlazzjoni Ewropea;

27. Jitlob lill-Unjoni Ewropea għal politiki speċifiċi u għal ċentru ta' monitoraġġ sabiex jinżamm il-prinċipju ta' l-ugwaljanza għall-immigranti nisa, li spiss ikunu suġġetti għal diskriminazzjoni doppja, fuq il-bażi kemm ta' razza kif ukoll ta' ġeneru;

28. Jenfasizza l-bżonn li l-istituzzjonijiet Ewropej jiksbu dejta u statistika affidabbli sabiex ifasslu politiki effettivi fl-oqsma ta' l-impjiegi u l-affarijiet soċjali.

SUĠĠERIMENTI

Il-Kumitat għall-Industrija, ir-Riċerka u l-Enerġija jistieden lill-Kumitat għad-Drittijiet tan-Nisa u għall-Ugwaljanza bejn is-Sessi, bħala l-kumitat responsabbli, sabiex jinkorpora s-suġġerimenti li ġejjin fil-mozzjoni għal riżoluzzjoni tiegħu:

A. billi n-nisa jokkupaw proporzjon żgħira ħafna ta' postijiet ta' taħriġ u ta' studju fil-maġġoranza ta' l-oqsma xjentifiċi u teknoloġiċi, b'mod partikulari fit-tekonologiji ta' l-informatika u tal-komunikazzjoni (ICT),

B.  billi, sabiex jinkisbu l-objettivi ta' Liżbona, l-UE għandha bżonn ittejjeb ir-riżorsi umani tagħha ddedikati għar-riċerka, u billi n-numru ta' nisa li jaħdmu fir-riċerka huwa ferm inqas min-numru ta' rġiel, b'mod partikulari f'ċerti oqsma tax-xjenza u tat-teknoloġija,

C. billi s-Seba' Programm ta' Qafas għal riċerka, żvilupp teknoloġiku u attivitajiet ta' dimostrazzjoni li wasal biex jitnieda, se jmexxi l-politika dwar ix-xjenza ta' l-UE għas-seba' snin li ġejjin, u għalhekk dan huwa ż-żmien propizju biex jiġu korretti l-inugwaljanzi bejn is-sessi fil-qasam tax-xjenza u t-teknoloġija,

1.  Jisħaq dwar l-opinjoni li l-Ugwaljanza bejn is-Sessi hija parti integrali mill-politika soċjali, u din ta' l-aħħar hija waħda mill-oqsma prinċipali li jaqgħu fi ħdan il-qasam tal-"kompetenza kondiviża" kif definita fl-Abbozz tat-Trattat li jistabbilixxi Kostituzzjoni għall-Ewropa, u b'hekk għandha tiġi ttrattata fil-kuntest tal-politiki ta' l-impjieg ta' l-Istati Membri, li għandhom impatt dirett fuq il-potenzjal produttiv ta' l-UE;

2.  Jemmen li l-kompetittività ta' l-industrija ta' l-UE hija korrelatata ma' l-isfidi demografiċi li l-UE taffaċċja llum u li ser jinħassu aktar fil-futur qarib; jemmen li, f'dan il-kuntest, il-promozzjoni ta' l-ugwaljanza bejn is-sessi u ta' bilanċ aħjar bejn ix-xogħol u l-ħajja għan-nisa u għall-irġiel tikkontribwixxi għat-tnaqqis ta' l-effetti negattivi ta' l-iżbilanċi demografiċi;

3.  Jistieden lill-Kummissjoni biex tippromwovi inizjattivi biex jiżdied in-numru ta' nisa li jistudjaw fl-oqsma tax-xjenza u t-teknoloġija, fil-livelli kollha;

4.  Jiġbed l-attenzjoni għall-fatt li l-prinċipju ta' "l-istess ħlas għall-istess xogħol" huwa prinċipju ġust li jippromwovi produttività fix-xogħol u l-kompetittività ta' l-industriji li huma miftuħa għall-kompetizzjoni internazzjonali u li t-tqarrib fil-firda bejn is-sessi huwa mod ta' kif l-isforz jiġi ppremjat u ta' kif jiġu miġġielda l-isterjotipi fis-sessi fuq il-post tax-xogħol;

5.  Jistieden lill-Kummissjoni sabiex tikkummissjona studju ta' fattibilità li jiddeskrivi l-impatt potenzjali li politika ta' l-UE li tapplika diskriminazzjoni pożittiva favur l-impjieg tan-nisa fis-settur privat ikollha fuq is-sistemi ta' l-assistenza soċjali u tal-pensjonijiet fl-Istati Membri;

6.  Jirrikonoxxi l-approċċ doppju għall-promozzjoni ta' l-ugwaljanza fejn l-oqsma kollha tal-politika għandhom jiġu integrati fl-istess żmien meta l-miżuri speċifiċi jiġu implimentati biex tiġi promossa l-ugwaljanza; jirrakkomanda f'dak ir-rigward li uffiċjali tal-Kummissjoni u tal-Parlament jagħmlu taħriġ ulterjuri sistematiku, kumprensiv u obbligatorju u li l-proposti ta' politika jiġu kollha integrati u suġġetti għal evalwazzjonijiet ta' l-impatt tagħhom fuq l-ugwaljanza;

7.  Jappoġġja kwalunkwe skema ta' l-UE li tista' titqies xierqa mill-Kummissjoni li tinkuraġġixxi u tippromwovi l-intraprenditorija tan-nisa, kif ukoll miżuri li jiżguraw li intraprendituri nisa, inklużi sidien ta' intrapriżi żgħar u mikrointrapriżi, jistgħu jieħdu vantaġġ mill-opportunitajiet offruti mit-teknoloġiji ta' l-informatika u tal-komunikazzjoni (ICT);

8.  Jitlob lill-Kummissjoni sabiex tkun favorevoli dwar l-opinjoni espressa mill-imsieħba soċjali li l-ugwaljanza tas-sessi teħtieġ evalwazzjoni ta' l-impatt għall-kwalunkwe politika riveduta jew ġdida ta' l-UE;

9.  Jistieden lill-Kummissjoni biex tipproponi u tadotta miżuri speċifiċi biex tikkoreġi l-inugwaljanzi bejn is-sessi fil-qasam tax-xjenza u t-teknoloġija u biex tinkiseb rapreżentazzjoni bilanċjata ta' rġiel u nisa fix-xjenza u t-teknoloġija kemm f'termini ta' riżorsi umani ddedikati għar-riċerka u kif ukoll f'korpi fejn jittieħdu deċiżjonijiet dwar politika tax-xjenza;

10. Jistieden lill-Kummissjoni biex tieħu passi biex ittemm il-qasma diġitali tas-sessi bħala parti mill-Istrateġija ta' Liżbona, bil-għan li titwessa' s-soċjetà ta' l-informatika, b'miżuri biex tiġi promossa l-ugwaljanza bejn l-irġiel u n-nisa, b'azzjonijiet biex jiġi pprovdut aċċess aktar faċli għan-nisa, billi tingħata spinta għall-kisba ta' kapaċitajiet elettroniċi, bit-twettiq ta' programmi li jipprovdu għal azzjonijiet speċifiċi biex jiġu inklużi nisa minn gruppi vulnerabbli u b'azzjonijiet biex jikkumpensaw għall-iżbilanċi bejn zoni urbani u rurali;

11. Jistieden lill-Kummissjoni biex tadotta miżuri, filwaqt li ssegwi l-eżempju ta' leġiżlazzjoni bħal dik introdotta fin-Norveġja, li jagħmluha possibbli li tinkiseb rappreżentazzjoni bilanċjata ta' rġiel u nisa fuq il-bordijiet ta’ l-immaniġjar ta' kumpaniji u intrapriżi kummerċjali.

SUĠĠERIMENTI

Il-Kumitat għal-Libertajiet Ċivili, il-Ġustizzja u l-Intern jistieden lill-Kumitat għad-Drittijiet tan-Nisa u l-Ugwaljanza bejn is-Sessi, bħala l-Kumitat responsabbli, sabiex jinkorpora s-suġġerimenti li ġejjin fil-mozzjoni għal riżoluzzjoni li se jadotta:

1.   Jilqa' b'sodisfazzjoni l-fatt li s-sitwazzjoni ġenerali fir-rigward ta' l-ugwaljanza bejn in-nisa u l-irġiel ittjiebed f'dawn l-aħħar snin u f'din il-konnessjoni jinnota li n-nisa jirrappreżentaw aktar minn 44% tal-ħaddiema, filwaqt li medja ta' 30% ta' l-intraprendituri u aktar minn 50% ta' l-istudenti huma nisa; jittama li din it-tendenza pożittiva tkompli;

2.   Jiddispjaċih li d-differenza fil-paga ta’ bejn is-sessi għadha 15% minkejja l-leġiżlazzjoni ta’ l-UE f'dan il-qasam; jitlob lill-Istati Membri biex jiffissaw mira għat-tnaqqis tagħha; jilqa' l-inizjattiva tal-Kummissjoni li tippreżenta komunikazzjoni dwar din il-kwistjoni fi żmien qasir; jirrakkomanda li din il-komunikazzjoni tiġi segwita b'miżuri attivi; jappella lill-Kummissjoni wkoll, sabiex tiżġura li d-direttiva dwar pagi indaqs tiġi applikata b'tali mod li n-nisa ma jsoffrux diskriminazzjoni minħabba l-fatt li jkollhom esperjenza iqsar fil-ħajja tax-xogħol minħabba t-trobbija tat-tfal tagħhom;

3.   Iħeġġeġ lill-Istati Membri biex jieħdu l-miżuri neċessarji kollha sabiex jilħqu l-objettivi ta' Barċellona għall-ħarsien tat-tfal u biex jiżviluppaw servizzi ta' ħarsien li wieħed jista' jaffordjahom għall-anzjani, għall-persuni b'diżabilità u għall-persuni dipendenti oħrajn;

4.   Jistieden lill-Kummissjoni sabiex tippromwovi politiki attivi u miżuri speċifiċi biex jittrattaw l-faqar fost nisa li huma parti minn gruppi żvantaġġati, bħal ommijiet waħidhom, nisa ta' età kbira u nisa immigranti;

5.   Jiddeplora d-diskriminazzjoni mifruxa u persistenti kontra n-nisa li m'humiex impjegati imma jiddedikaw ħinhom għat-trobbija tat-tfal u biex jieħdu ħsieb il-familji tagħhom, u jappella lill-Istati Membri biex jagħmlu sforz biex jibdlu dan, pereżempju billi jikkunsidraw il-perjodi tat-trobbija tat-tfal għall-iskop ta' kalkolu tal-pensjoni;

6.   Jistieden lill-Istati Membri biex jippromwovu l-irwol fundamentali ta' l-irġiel fil-kisba ta' bilanċ fost is-sessi, pereżempju bil-promozzjoni ta' inċentivi biex jieħdu liv ta' ġenitur jew liv patern u jaqsmu d-drittijiet ta' kura man-nisa; jitlob lill-Kummissjoni biex tagħmel riċerka fuq ir-raġunijiet għalfejn ftit irġiel jieħdu liv ta' ġenitur jew liv patern;

7.   Ifakkar fil-kundanna tiegħu tal-forom kollha ta' vjolenza bbażati fuq is-sess(1); jitlob lill-Kummissjoni biex tagħmel riċerka dwar il-kawżi li jwasslu għall-vjolenza bbażata fuq is-sess u sabiex tiżviluppa indikaturi dwar in-numru ta' vittmi;

8.   Jistieden lill-Kummissjoni biex tiġbor kemm jista' jkun malajr dejta paragunabbli u ta' min joqgħoq fuqha dwar traffikar ta' bnedmin sabiex jiġi evalwat il-fenomenu u tistipula miri biex jitnaqqas; ifakkar li diġà saqsa lill-UE biex taħdem ħalli tnaqqas bin-nofs in-numru ta' vittmi ta' traffikar fl-għaxar snin li ġejjin(2);

9.   Jitlob lill-Kummissjoni biex tfassal proposta għal kodiċi ta' mġiba għall-uffiċjali ta' l-istituzzjonijiet u l-korpi ta' l-UE, b'mod partikulari waqt li jkunu fuq missjoni f'pajjiżi terzi, li għandha tiddiżapprova x-xiri ta' servizzi sesswali, ta' forom oħrajn ta' sfruttar sesswali u tal-vjolenza bbażata fuq is-sess, u għandu jkun fiha sanzjonijiet mandatorji;

10. Jiddispjaċih li s-sitwazzjoni tal-bniet mhix tittieħed inkunsiderazzjoni biżżejjed; jitlob lill-Kummissjoni u lill-Istati Membri biex jieħdu l-miżuri neċessarji kollha sabiex jiżguraw l-implimentazzjoni tar-Riżoluzzjoni dwar il-bniet adottata mill-Assemblea Ġenerali tal-Ġnus Magħquda(3);

11. Jistieden lill-istituzzjonijiet u lill-aġenziji Ewropej biex jippromwovu ugwaljanza bejn is-sessi fuq livell amministrattiv u jimmiraw għall-parità bejn in-nisa u l-irġiel fir-reklutaġġi u fil-ħatriet, b'mod partikulari għal pożizzjonijiet ta' livell għoli.

(1) Riżoluzzjoni tat-2 ta' Frar 2006 dwar is-sitwazzjoni attwali fil-ġlieda kontra l-vjolenza kontra n-nisa u kull azzjoni futura, P6_TA-PROV(2006)0038. (2) Riżoluzzjoni tal-Parlament Ewropew dwar strateġiji biex jiġi evitat it-traffikar ta' nisa u ta' tfal li huma vulnerabbli għal sfruttament sesswali (2004/2216(INI), P6_TA(2006)0005). (3) Riżoluzzjoni A/RES/60/141 adottata fil-11 Jannar 2006.