dwar l-impatt tat-tkabbir tal-ġejjieni fuq l-effettività tal-politika ta' koeżjoni

(2006/2107(INI))

Il-Parlament Ewropew,

–   wara li kkunsidra r-riżoluzzjoni tiegħu tas-16 ta' Marzu 2006 dwar dokument ta' strateġija 2005 tal-Kummissjoni dwar it-tkabbir(1),

–   wara li kkunsidra l-Komunikazzjoni tal-Kummissjoni tat-8 ta' Novembru 2006 Strateġija għat-Tkabbir u Sfidi Ewlenin 2006-2007 li tinkludi rapport speċjali mehmuż dwar il-kapaċità ta' l-UE biex tintegra fi ħdanha membri ġodda" (COM(2006)0649),

–   wara li kkunsidra r-riżoluzzjoni tiegħu tat-13 ta' Diċembru 2006 dwar Komunikazzjoni tal-Kummissjoni dwar l-istrateġija ta' tkabbir u l-isfidi ewlenin għall-perjodu 2006-2007(2),

–   wara li kkunsidra r-riżoluzzjoni tiegħu tat-13 ta' Diċembru 2006 dwar aspetti istituzzjonali tal-kapaċità ta' l-Unjoni Ewropea li tintegra Stati Membri ġodda(3),

–   wara li kkunsidra l-Komunikazzjoni tal-Kummissjoni tat-3 ta' Mejju 2006: 'Tkabbir, Sentejn Wara - Suċċess Ekonomiku' (COM(2006)0200),

–   wara li kkunsidra r-riżoluzzjoni tiegħu tat-28 ta' Settembru 2005 dwar il-ftuħ tan-negozjati mat-Turkija(4),

–   wara li kkunsidra l-Konklużjonijiet tal-Kunsill dwar l-Affarijiet Ġenerali u Relazzjonijiet Esterni tat-3 ta' Ottubru 2005 dwar il-ftuħ tan-negozjati mal-Kroazja(5),

–   wara li kkunsidra l-Konklużjonijiet tal-Presidenza tal-Kunsill Ewropew tal-15-17 ta' Ġunju 2006(6),

–   wara li kkunsidra r-riżoluzzjoni tiegħu tas-27 ta' Settembru 2006 dwar il-progress tat-Turkija lejn l-adeżjoni(7),

–   wara li kkunsidra l-Ftehima Interistituzzjonali bejn il-Parlament Ewropew, il-Kunsill u l-Kummissjoni Ewropea tas-17 ta' Mejju 2006 dwar id-dixxiplina baġitarja u t-tmexxija finanzjarja soda(8),

–   wara li kkunsidra t-Tielet rapport tal-Kummissjoni dwar il-koeżjoni ekonomika u soċjali tat-18 ta' Frar 2004 (COM(2004)0107),

–   wara li kkunsidra l-Komunikazzjoni tal-Kummissjoni tat-12 ta' Ġunju 2006 dwar l-Istrateġija tat-Tkabbir Ekonomiku w l-Impjiegi u r-Riforma tal-politika Ewropea ta' koeżjoni: ir-Raba' rapport ta' progress dwar il-koeżjoni (COM(2006)0281),

–   wara li kkunsidra l-Konklużjonijiet tal-Presidenza tal-Kunsill Ewropew tal-21 u t-22 ta' Ġunju 1993 f'Kopenhagen, tas-16 u s-17 ta' Diċembru 2004 u ta' l-14 u l-15 ta' Diċembru 2006 fi Brussell,

–   wara li kkunsidra l-Artikolu 49 tat-Trattat UE u l-Artikolu 158 tat-Trattat KE,

–   wara li kkunsidra l-Artikolu 45 tar-Regoli ta’ Proċedura tiegħu,

–   wara li kkunsidra r-rapport tal-Kumitat għall-Iżvilupp Reġjonali u l-opinjoni tal-Kumitat għall-Baġit (A6-0087/2007),

A.  billi, skond l-Artikolu 2 tat-Trattat UE, il-koeżjoni soċjali, ekonomika u territorjali hija għan importanti ta' l-Unjoni Ewropea u tipprovdi ċ-ċittadini b'sinjal viżibbli ta' solidarjetà Ewropea,

B.  billi l-politika ta' koeżjoni ta' l-Unjoni Ewropea gawdiet suċċessi konsiderevoli fil-kisba ta' għanijiet ta' koeżjoni soċjali, ekonomika u territorjali, kif juri b'mod partikolari r-Raba' Rapport ta' progress tal-Kummissjoni dwar il-koeżjoni,

C. billi t-tkabbir ta' l-UE fil-passat ikkontribwixxa biex jiġu żgurati l-paċi, is-sigurtà, l-istabilità, id-demokrazija u l-istat tad-dritt, kif ukoll l-iżvilupp u l-prosperità fl-Unjoni kollha kemm hi, benefiċċji li għenu lill-UE ssir ekonomija aktar kompetittiva u dinamika u li għalhekk jridu jiġi kkunsidrati meta jittieħdu deċiżjonijiet dwar tbabbir futur,

D.  billi, madanakollu, jridu jsiru aktar sforzi sabiex tintlaħaq il-konverġenza tal-pajjiżi ta' l-Ewropa Ċentrali u tal-Lvant, peress li l-punt ta' tluq ekonomiku tagħhom kien aktar baxx minn dak tal-fażijiet ta' tkabbir preċedenti, filwaqt li fl-istess ħin kellha sseħħ bidla radikali fis-sistemi politiċi u ekonomiċi tagħhom,

E.   billi l-effetti tal-globalizzazzjoni jtaqqlu l-proċess ta' konverġenza u jikkawżaw ukoll problemi ta' lokazzjoni għal negozji ġodda fl-Unjoni kollha,

F.   billi, bħala riżultat ta' tkabbir futur, l-UE trid tindirizza tliet sfidi kbar fil-politika ta' koeżjoni, li huma id-differenzi fl-iżvilupp li dejjem jikbru, l-ispostament lejn il-lvant taċ-ċentru tal-gravità tal-politika ta' koeżjoni, u l-inugwaljanza li qed tippersisti fost l-UE-15,

G.  billi l-pressjoni fuq il-baġits tal-gvern, billi ħafna Stati Membri qed jiksru l-kriterji ta' stabilità u billi t-tendenzi demografiċi qed iżidu piż addizzjonali fuq il-baġits u jdgħajfu t-tkabbir,

H.  billi l-UE għandha tibqa' komunità miftuħa u l-kwistjonijiet ta' politika strutturali ma jistgħux ikunu ta' xkiel għat-tkabbir futur, sakemm riformi neċessarji jiggarantixxu l-kapaċità ta' integrazzjoni,

I.   billi minn Ottubru 2005 il-Komunità qed ikollha negozjati ta' adeżjoni miftuħa mat-Turkija u l-Kroazja, u f'Diċembru 2005 l-Kunsill Ewropew ta lill-Ex-Repubblika Jugoslava tal-Maċedonja status ta' kandidat; billi l-istati l-oħra tal-Balkani tal-Punent (l-Albanija, il-Bosnija-Ħerżegovina, il-Montenegro u s-Serbja (inkluż il-Kosovo)) huma meqjusa bħala kandidati potenzjali għas-sħubija; billi l-proċess ta' riforma f'dawn il-pajjiżi kollha diġà qed jirċievi għajnuna minn programmi ta' qabel l-adeżjoni li fihom komponenti ta' politika strutturali,

J.   billi, bid-dħul tar-Rumanija u l-Bulgarija, daħlu fis-seħħ regoli speċjali biex jintalbu approprjazzjonijiet mill-Fondi Strutturali, u l-effetti kollha ta' din l-adeżjoni fuq il-politika strutturali għad iridu jiġu determinati,

K.  billi l-pajjiżi kollha li qed jirċevu għajnuna ta' qabel l-adeżjoni mill-UE kif ukoll valutazzjoni sħiħa tar-Rumanija u l-Bulgarija teħtieġ EUR 150 biljun oħra fil-perjodu ta' ffinanzjar attwali fuq il-bażi tal-politika strutturali fis-seħħ, billi, madanakollu, l-adeżjoni tal-pajjiżi kollha li qed jirċevu għajnuna ta' qabel l-adeżjoni mhux se sseħħ fl-istess waqt,

L.   billi l-adeżjoni tar-Rumanija u l-Bulgarija żiedet iz-zona ta' l-UE-25 eliġibbli għal fondi strutturali ta' l-UE b' 9% u l-popolazzjoni tagħha b'6% u naqqset il-GDP per capita tagħha b'5%; billi l-adeżjoni tal-Kroazja se żżid iz-zona ta' l-UE-27 b'1.3% u l-popolazzjoni tagħha b'0.9%, waqt li se żżid il-GDP per capita tagħha b'0.6%; billi l-adeżjoni tat-Turkija se żżid iz-zona ta' l-UE-27 b'18.3% u l-popolazzjoni tagħha b'14.7%, waqt li se żżid il-GDP per capita tagħha b'10.5%; billi l-adeżjoni tal-istati l-oħra tal-Balkani tal-Punent se żżid iz-zona ta' l-UE-27 b'4.8% u l-popolazzjoni tagħha b'4%, waqt li se żżid il-GDP per capita tagħha b'3.5%;

M.  billi hemm bżonn b'mod urġenti ta' riforma istituzzjonali, finanzjarja u politika ta' l-istituzzjonijiet ta' l-Unjoni Ewropea li fuqhom hija msejsa l-kapaċità ta' integrazzjoni ta' l-UE; billi l-adeżjoni għall-Unjoni Ewropea hija kompletament dipendenti fuq l-ilħuq tal-kriterji ta' Kopenhagen u b'hekk ta' l-iżvilupp demokratiku fil-pajjiżi msemmija fil-premessa I,

N.  billi, f'Unjoni Ewropea b'34 membru, il-Kroazja tkun responsabbli għal 7% biss ta' dan l-iffinanzjar strutturali addizzjonali, ikkalkulati skond ir-regoli eżistenti, u l-istati l-oħra tal-Balkani tal-Punent, li attwalment qed jirċievu l-għajnuna ta' qabel l-adeżjoni ta' 9.2%, waqt li t-Turkija waħedha tirċievi 63%,

O.  billi l-adeżjoni ta' l-Istati tal-Balkani tal-Punent meta jitqiesu fuq bażi individwali, anke waqt il-qafas finanzjarju attwali, mhu se toħloq l-ebda effett statistiku fuq l-eliġibilità tar-reġjuni ta' l-Istati Membri u lanqas m'hi se toħloq xi impatt finanzjarju drammatiku fuq il-politika ta' koeżjoni ta' l-UE b'27 Stat Membru minħabba d-daqs, il-popolazzjoni u l-iżvilupp ekonomiku tagħhom; billi l-Kroazja, li magħha hemm negozjati l-aktar avvanzati u li hi aktar żviluppata f'termini soċjo-ekonomiċi minn xi Stati Membri attwali, f'termini komparati tkun tippreżenta l-iżgħar piż finanzjarju għall-Unjoni meta wieħed iqis id-daqs, il-popolazzjoni u l-livell ta' żvilupp ekonomiku tal-pajjiż u mhu se toħloq l-ebda effett statistiku fir-rigward taz-zoni eliġibbli fil-livell reġjonali u nazzjonali, anki fil-perjodu finanzjarju attwali,

P.   billi bl-adeżjoni tat-Turkija l-politika ta' koeżjoni Ewropea tieħu dimensjoni kompletament ġdida, li għadha qatt ma ġiet applikata għal pajjiż ta' kobor bħal dan, b'livell ta' żvilupp ekonomiku daqshekk baxx u b'diverġenzi reġjonali kbar,

Qbilli f'Ġunju 2006 il-Konklużjonijiet tal-Presidenza saħqu, li, l-Unjoni Eropeja, meta tilqa' fi ħdana Stati Membri ġodda, għandha tibqa' f'pożizzjoni li żżomm id-dinamika ta' integrazzjoni Ewropea u 'li għandu jsir kull sforz biex il-koeżjoni u l-effettività ta' l-Unjoni jkunu protetti',

R.   billi fil-Komunikazzjoni tat-8 ta' Novembru 2006, il-Kummissjoni titlob li qabel ma jkun hemm tkabbir fil-ġejjieni jiġu analizzati sew l-impatti fuq il-baġit ta' l-UE waqt li jitqies l-iżvilupp futur ta' l-oqsma ta' politika relevanti bħall-politika dwar l-agrikultura u l-koeżjoni,

S.   billi l-politika reġjonali, bħala waħda mill-akbar assi tal-baġit ta' l-UE, se tkun diskussa b'mod partikolarment intensiv - mhux l-inqas f'dawk li huma kriterji ta' effiċjenza - fir-reviżjoni tal-qafas finanzjarju ta' l-UE previst għall-2008-2009,

T.   billi, f'Unjoni li għadha qed tikber, hemm bżonn aktar minn qatt qabel ta' l-effiċjenza tal-politiki Komunitarji, peress li l-effettività tal-politika ta' koeżjoni u l-valur miżjud ġenwin u ppruvat tagħha huma dipendenti ħafna fuq ir-riżorsi finanzjarji disponibbli; billi, għalhekk, għandha tingħata l-akbar attenzjoni għar-reviżjoni tas-sistema Komunitarja għar-riżorsi proprji,

1.   Iqis li l-kapaċità ta' integrazzjoni ta' l-Unjoni Ewropea tfisser b'mod partikolari li għandha tkun f'pożizzjoni, fid-dawl tar-realtajiet tal-baġit, li tfittex li tilħaq l-objettiv ta' koeżjoni soċjali, ekonomika u territorjali; għalhekk iqis li, fil-waqt ta' l-adeżjoni ta' kull pajjiż kandidat, hemm bżonn li jiġi deċiż jekk l-UE hix kapaċi tintegra l-istat konċernat;

2.   Iqis li riforma istituzzjonali, finanzjarja u politika hi wkoll neċessarja fil-kuntest ta' evalwazzjoni tal-qafas finanzjarju ta' l-UE; b'rabta ma' dan, jemmen li hemm bżonn isir tqabbil bejn l-effetti ta' l-istrumenti prinċipali varji għall-iffinanzjar (il-Fond Ewropew għall-Iżvilupp Reġjonali, il-Fond Soċjali Ewropew, il-Fond ta' Koeżjoni, il-Fond Agrikolu Ewropew għall-Iżvilupp Rurali) dwar l-iżvilupp ta' l-UE-27, biex hekk ikunu jistgħu jittieħdu d-deċiżjonijiet baġitarji xierqa;

3.   Iqis li tkabbir futur m'għandux iwassal sabiex dejjem aktar reġjuni jitilfu d-dritt għall-iffinanzjar mill-politika ta' koeżjoni taħt l-Objettiv 1 attwali bħala riżultat ta' l-effett ta' l-istatistika u mingħajr ma jiġu eliminati verament inugwaljanzi eżistenti;

4.   Jenfasizza li politika ta' koeżjoni onesta u effiċjenti hija impossibbli mingħajr żieda fin-nefqa ta' l-UE għal 1,18% tal-GNI ta' l-UE, kif mistqarr mill-Parlament fir-riżoluzzjoni tiegħu tat-8 ta' Ġunju 2005 dwar Sfidi politiċi u Mezzi Baġitarji ta' l-Unjoni wara t-tkabbir 2007-2013(9);

5.   Jiddispjaċih, għalhekk, li l-Kummissjoni, fil-Komunikazzjoni tat-8 ta' Novembru 2006, ma toffri l-ebda analiżi dettaljata tal-konsegwenzi finanzjarji ta' tkabbir futur;

6.   Jistieden lill-Kummissjoni biex tippreżenta analiżi dettaljata ta' l-impatt sabiex tippermetti li ssir evalwazzjoni kif suppost ta' l-effetti kollha fuq il-politika strutturali ta' l-adeżjoni tar-Rumanija u tal-Bulgarija;

7.   Jistieden ukoll lill-Kummissjoni, b'rabta mat-tkabbir li jmiss, biex tikkalkula b'mod regolari, b'ċifri separati għal kull pajjiż, l-infiq fil-politika reġjonali li l-UE jista' jkollha tagħmel bl-applikazzjoni tal-kriterji kurrenti kif ukoll dawk emendati u mwessgħa, u l-konsegwenzi dan ikollu fuq l-eligibilità eżistenti ta' ffinanzjar ta' reġjuni; f'dan ir-rigward, jinnota li jistgħu jintużaw ukoll id-databases u l-istrumenti analitiċi ta' ESPON; jemmen li għandu jiġi kkunsidrat it-titjib ta' l-integrazzjoni ta' l-istrumenti varji ta' l-UE għall-iffinanzjar;

8.   Iqis li hemm bżonn ta' studji li ma jaqtgħux ibbażati fuq l-esperjenza miksuba minn tkabbir preċedenti u li jinkludi it-titjib soċjo-ekonomiku li se jseħħ waqt il-perjodu attwali ta' programmar, biex jiġu żviluppati xenarji għall-iffinanzjar tal-politika ta' koeżjoni ta' l-UE fil-futur;

9.   Jisħaq dwar l-importanza ta' approċċ iebes ħafna f'termini ta' valutazzjoni kwantitattiva u kwalitattiva fl-użu tal-Fondi Strutturali li jinvolvi immaniġġjar sod u sorveljanza xierqa biex, fl-interess taċ-ċittadini ta' l-Unjoni, jitjib il-bilanċ ta' l-ispejjeż u l-benefiċċji fl-ispiża ta' koeżjoni ta' l-UE;

10. Jistieden lill-Kummissjoni biex tiddedika kapitolu fir-raba rapport ta' koeżjoni l-ġdid tagħha għall-opinjoni tagħha dwar is-sostenibilità tal-politika ta' koeżjoni attwali, u għall-miżuri li jistgħu fil-ġejjieni , fejn xieraq, iħallu effett fuq il-politika ta' koeżjoni;

11. Iqis li, minħabba l-istat preżenti tas-sistema tar-riżorsi ta' l-UE, se jkun diffiċli li tiffinanzja xi tkabbir futur mingħajr ma tipperikola l-effettività tal-politika ta' koeżjoni attwali;

12. Iħeġġeġ lill-Kummissjoni biex toħroġ komunikazzjoni li tfassal proposta għal mudell gradwat għall-politika ta' koeżjoni, li tippermetti li ssir distinzjoni oħra bejn l-għajnuna ta' qabel l-adeżjoni u sħubija, u li tagħti l-possibilità lill-kandidati potenzjali ta' adeżjoni li jirċievu għajnuna effettiva għall-iżvilupp reġjonali, soġġetta għall-progress politiku, qabel sħubija possibbli fl-Unjoni Ewropea;

13. Jistieden għal approċċ gradwat għat-Turkija b'mod partikolari, li jikkonċentra aktar mill-viċin fuq l-iffinanzjar ta' aspetti tematiċi speċifiċi (bħall-gruppi ta' industriji, il-bini ta' istituzzjonijiet u l-ugwaljanza) u r-reġjuni, sabiex jiġu evitati miżuri mekkanizzati ta' ffinanzjar għall-adeżjoni mingħajr ir-riflessjoni neċessarja u sabiex jintlaħqu effetti ta' koeżjoni u tkabbir aktar preċiżi;

14. Jinnota li approċċ gradwat għall-politika reġjonali li jiddependi fuq il-progress politiku tal-pajjiżi kandidati jista' jiġi ppreżentat bħala forma speċjali ta' sħubija fl-UE jew sħubija 'EEA+' b'valur aktar qawwi;

15. Jitlob biex ikun involut fil-proċess ta' kodeċiżoni fl-evalwazzjoni u r-riforma ta' l-għajuna ta' qabel l-adeżjoni mill-2010 'l quddiem;

16. Jistieden lill-Kummissjoni biex tiddefinixxi f'aktar dettall dak li trid tfisser bit-'tisħiħ tal-Politika Ewropea tal-Viċinat', u, f'dan il-kuntest, biex tikkunsidra aktar strumenti ta' ffinanzjar strutturali;

17. Iqis li huwa essenzjali biex il-politika ta' koeżjoni tkun effettiva ir-responsabbilà individwali ta' l-Istati Membri għandha tiżdied fil-futur permezz ta' rati nazzjonali ogħla ta' kofinanzjar, partikolarment fir-reġjuni li diġà irċevew fondi ta' l-UE f'diversi perjodi ta' programmi;

18. Jipproponi li, fil-kuntest tad-dibattitu dwar il-politika ta' koeżjoni tal-futur, l-UE għandha tagħmel użu akbar ta' l-effett ta' lieva ta' l-iffinanzjar ta' self - partikolarment fir-reġjuni li diġa irċevew fondi ta' l-UE għal ħafna snin - sabiex l-effettività ta' l-appoġġ Komunitarju titjieb, allavolja mhux se tissostitwih;

19. Iqis f'dan il-kuntest li għandhom jiġu ffissati kundizzjonijiet aktar favorevoli għall-iffinanzjar ta' self u għotjiet għar-reġjuni li għadhom l-aktar lura fl-UE;

20. Jistieden lill-Kummissjoni biex taħseb fi proposti għal politika ta' koeżjoni għall-ġejjieni li tkun adattata aktar mill-qrib għall-bżonnijiet reali tar-reġjuni, peress li huwa ċar li r-reġjuni li ilhom jirċievu għajnuna mill-fondi ta' l-UE għal 10, 20 jew 30 sena kisbu livell differenti ta' żvilupp minn dawk li għadhom ma rċevew l-ebda fondi; jemmen li t-tweġiba għall-isfida futura għall-politika ta' koeżjoni ta' l-UE possibilment tista' tkun differenzjar akbar;

21. Jesprimi tħassib għall-fatt li f'xi reġjuni l-għajnuna ta' l-UE mhix immirata sew, u bħala riżultat ta' dan is-sitwazzjoni f'dawk ir-reġjuni m'hix qed titjieb minkejja l-ħafna snin ta' appoġġ finanzjarju, jiġifieri r-riżorsi Komunitarji qed jinħlew; jitlob li jiddaħħal perjodu massimu ta' tul ta' żmien li fih ir-reġjuni jistgħu jirċievu fondi strutturali, bl-intenzjoni li jiġu evitati s-sitwazzjonijiet fejn ir-reġjuni li ilhom ħafna snin jirċievu appoġġ finanzjarju għadhom fl-istess livell baxx f'dak li għandu x'jaqsam ma' l-iżvilupp;

22. Jitlob li aktar fondi privati jintużaw bħala sors ta' kofinanzjar għall-fondi strutturali, u sabiex il-kofinanzjar privat ta' proġetti u programmi taħt il-Fondi Strutturali jiġi simplifikat b'mod sinifikattiv skond l-aħjar prassi;

23. Jitlob sabiex l-iffinanzjar strutturali futur ikun magħmul b'mod li jiġu evitati effetti ta' spustjar u ffinanzjar mill-UE ta' rilokazzjoni ta' kumpaniji, u jikkunsidra li l-Kummissjoni għandha tħares b'mod kritiku, fil-kuntest tal-politika ta' koeżjoni, dwar il-kwistjoni jekk sussidji li jingħataw lil kumpaniji humiex effettivi biex jinfluwenzaw deċiżjonijiet tan-negozju rigward il-lokazzjoni waqt li jitqies id-daqs tad-ditti konċernati;

24. Jinnota li s-suċċess tal-politika ta' koeżjoni hija konnessa mal-politiki ta' ekonomija nazzjonali u li f'dan ir-rigward l-implimentazzjoni ta' Pjanijiet ta' Azzjoni Nazzjonali għall-Agenda ta' Liżbona għandha influwenza partikolari fuq is-suċċess tal-politika ta' koeżjoni;

25. Jistieden, għaldaqstant, lill-Kummissjoni u lill-Kunsill biex jikkunsidraw li jorbtu l-għoti ta' fondi taħt il-politika ta' koeżjoni futura ma' politika favorevoli ta' tkabbir sostenibbli nazzjonali, li għandha tiġi definita permezz ta' indikaturi kwantitattivi u kwalitattivi li ma jkoprux biss il-GDP per capita, sabiex tingħata spinta lill-effettività tal-politika ta' koeżjoni;

26. Iħeġġeġ lill-Kummissjoni biex tiżgura li, fil-qafas ta' programmi futuri għal kompetittività reġjonali u għal kooperazzjoni territorjali, l-iffinanzjar ikun konċentrat aktar bir-reqqa fuq l-Ewropizzazzjoni ta' l-ekonomija reġjonali u fuq infrastrutturi ta' importanza Ewropea;

27. Jitlob għal użu akbar fil-ġejjieni tal-Fondi Strutturali biex itaffu l-effetti ta' bidliet demografiċi u l-migrazzjoni reġjonali konsegwenza ta' dan;

28. Iqis li għandu jsir użu akbar fil-futur mill-Fond Soċjali Ewropew bħala strument orizzontali, fost oħrajn, biex jgħin reġjuni ilaħħqu ma' l-isfidi soċjali tal-globalizzazzjoni kif ukoll ma' l-effetti ta' bidliet demografiċi;

29. Jenfasizza li r-riżultati tal-politika ta' koeżjoni jistgħu jiġu riveduti biss jekk l-għoti ta' Fondi Strutturali jseħħ b'mod trasparenti, u għalhekk jistieden lill-Unjoni Ewropea biex tapplika kriterji ta' trasparenza rigorużi ħafna għall-għoti ta' għajnuna finanzjarja;

30. Jitlob li jiġu applikati sanzjonijiet aktar ħorox f'każijiet fejn jiġi ppruvat abbuż mill-għajnuna finanzjarja u għal proċeduri aktar effettivi għall-irkupru ta' fondi;

31. Jinnota li ġlieda b'suċċess kontra l-korruzzjoni kif ukoll il-bini ta' kapaċitajiet amministrattivi li jkunu jistgħu jimplimentaw programmi ta' Fondi Strutturali b'mod trasparenti u effiċjenti huma prerekwiżiti kruċjali biex wieħed jirċievi ffinanzjar strutturali Ewropew; jitlob li l-istrumenti ta' kontroll jiġu applikati b'mod konsistenti u riġidu;

32. Jistieden lill-Kummissjoni u l-Istati Membri biex iqisu dawn il-punti kollha meta jagħmlu revizzjoni ta' nofs it-terminu tal-qafas finanzjarju attwali ta' l-UE;

33. Jagħti istruzzjonijiet lill-President tiegħu sabiex jgħaddi din ir-riżoluzzjoni lill-Kunsill, lill-Kummissjoni u lill-Kumitat tar-Reġjuni.

(1) ĠU C 291E, 30.11.2006, p. 402. (2) Testi adottati, P6_TA(2006)0568. (3) Testi adottati, P6_TA(2006)0569. (4) ĠU C 227E, 21.9.2006, p.163. (5) 12877/05, 4.10.2005. (6) 10633/1/06, 17.6.2006. (7) Testi adottati, P6_TA(2006)0381. (8) ĠU C 139, 14.6.2006, p.1. (9) ĠU C 124 E, 25.5.2006, p. 373.

I. Suġġett u definizzjoni ta' "tkabbir tal-ġejjieni"

Ir-rapport ta' inizjattiva għandu jiffoka fuq il-kwistjoni ta' kif it-tkabbir tal-ġejjieni ta' l-UE se jeffettwa l-effettività tal-politika ta' koeżjoni u kif dan għandu jiġi effettwat fil-futur, biex ikunu jistgħu jintlaħqu l-effetti mixtieqa orjentati lejn il-bilanċ u t-tkabbir.

Fir-rapport reċenti tiegħu dwar l-istrateġija tat-tkabbir, il-Parlament Ewropew dan l-aħħar saħaq, bl-appoġġ ta' ħafna gruppi politiċi, biex fit-tkabbir tal-ġejjieni wieħed josserva b'iktar reqqa l-kapaċità għat-tkabbir tal-Komunità(1). Dan għandu jinkludi l-kapaċità ta' l-Unjoni Ewropea, li tfittex li tilħaq l-għan ta' koeżjoni soċjali, ekonomika u territorjali, fid-dawl tar-realtajiet tal-baġit.

Il-politika strutturali għandha bżonn tkun ikkunsidrata fl-isfond tar-reviżjoni tal-baġit ta' l-UE li hi ppjanata għall-2008/2009 (Rapport tal-Kummissjoni dwar ir-reviżjoni li hu maħsub għall-bidu ta' l-2009), Issa li l-effiċjenza qed tiġi diskussa fil-Ftehima Interistituzzjonali dwar il-baġit 2007-2013, il-politika strutturali u reġjonali se tkun diskussa b'mod intensiv bħala waħda mill-akbar assi tal-baġit(2). Hu għalhekk importanti li wieħed jibda jikkunsidra modi u possibilitajiet dwar kif tista' tissaħħaħ l-effiċjenza tal-politika ta' koeżjoni.

Bħala tkabbir tal-ġejjieni Dan ir-rapport janalizza l-adeżjoni tar-Rumanija u tal-Bulgarija, li seħħet fl-1 ta' Jannar 2007 bħala sfidi għall-ġejjieni. Dawn l-adeżjonijiet ma jaqgħux b'mod formali taħt "tkabbir tal-ġejjieni", peress li dan it-tkabbir diġà ġie kkunsidrat fil-perspettiva finanzjarja l-ġdida għall-perjodu 2007-2013. Madankollu, huwa sinifikattiv mill-perspettiva tal-politika reġjonali u strutturali, li l-effett ta' l-istatistika ta' dawn il-pajjiżi ekonomikament dgħajfa, fir-rigward ta' l-eliġibilità ta' reġjuni oħra, għadu ma ġiex ikkalkolat u mhux se jkun jinħass sa l-2014.

Il-kunċett ta' tkabbir "tal-ġejjieni" japplika wkoll għall-Istati li jgawdu minn stat uffiċjali ta' kandidati u li magħhom l-Unjoni Ewropea diġà bdiet in-negozjati għall-adeżjoni, anke jekk ir-riżultati ma jistgħux ikunu garantiti minn qabel: Dan jinkludi min-naħa waħda t-Turkija u min-naħa l-oħra l-Kroazja.

L-Istati l-oħra tal-Balkani tal-Punent (ir-Repubblika ex-Jugoslava tal-Maċedonja, l-Albanija, il-Bożnja u Ħerżegovina, il-Montenegro, is-Serbja (inkluż il-Kosovo) jgħoddu bħala kandidati aderenti potenzjali, li, l-istess bħall-pajjiżi kandidati, diġà huma pajjiżi li qed jirċievu l-għajnuna ta' l-istrument IPA (Strument ta'Għajnuna ta' qabel l-Adeżjoni). Fit-22 ta' Marzu 2004 l-Maċedonja ressqet talba għall-adeżjoni fl-Unjoni Ewropea u minn dak inhar 'il quddiem saret l-uniku pajjiż tal-Balkani tal-Punent li għandu stat ta' kandidat(3).

Flimkien dawn id-disa' msemmija hawn fuq qed jiġu meqjusa bħala pajjiżi aderenti u pajjiżi kandidati (PAK-9). Dan ir-rapport jikkonċerna l-PAK-9 flimkien, li kull wieħed minnhom jista' jsir membru ta' l-UE f'perjodu ta' żmien medju, għalkemm mhux neċessarjament fl-istess ħin. Madankollu, il-materjal li fuqu huwa bbażat dan ir-rapport jiddistingwi bejn il-pajjiżi differenti tal-PAK-9, li huma miġbura fi gruppi flimkien skond il-livell li jkunu laħqu n-negozjati.

L-Istati l-oħra li magħhom l-UE għamlet ftehimiet ta' sħubija (l-Ukraina u r-Russja), jiġifieri li huma mdaħħlin fl-Istrument Ewropew ta' Viċinat u ta' Sħubija (ENPI), mhumiex inklużi f'dan ir-rapport peress li dawn għandhom prospettiva għal tul sew ta' żmien bħala kandidati potenzjali.

Kundizzjonijiet ta' qafas għall-politika reġjonali tal-ġejjieni

Progress tal-konverġenza fl-UE

Il-politika Ewropea ta' koeżjoni tista' tixhed għal suċċess konsiderevoli. Eżempju ta' dan hu l-appoġġ għat-tkabbir ta' l-UE lejn in-Nofsinhar. Minħabba l-effetti kumulattivi tal-Fond Strutturali l-prodott gross domestiku tal-Greċja, tal-Portugal u ta' l-Irlanda bejn l-1989 u l-1999 seta' jiżdied b'10 fil-mija minn 63.5% għal iktar minn 70% mill-medja ta' l-UE(4). Ħafna mir-reġjuni li qabel kienu kandidati jinsabu fl-iskala bejn il-75% u d-90%.

Il-bilanċi tat-tkabbir lejn il-Lvant huma ftit iktar limitati. L-isfida hija wkoll ikbar b'mod sproporzjonat: il-livell ta' bażi ekonomiku li għandu jiġi adattat kien inqas u fl-istess ħin kellha ssir bidla radikali fis-sistema politika. Bit-tkabbir minn 15 għal 25 Stat Membru t-territorju ta' l-UE żdied bi 23%, il-popolazzjoni b'20%, imma l-valur miżjud b'5% biss. Għalkemm id-dħul medju ta' l-UE-10 żdied minn 44% fl-1997 għal 50% fl-2005 mid-dħul medju ta' l-UE-15(5), il-Kummissjoni mhix qed tistenna l-armonizzazzjoni tal-kundizzjonijiet tal-ħajja (l-ilħiq ta' l-iskala 75%) sas-sena 2040. Diversi awtoritajiet ekonomiċi qed jassumu li l-progress ta' l-Istati ta' l-UE-10 jista' jonqos sew, u li allura l-proċess ta' armonizzazzjoni jista' jitwal b'mod konsiderevoli(6).

Madanakollu fl-UE-15 ħafna problemi stutturali għadhom ma ssolvewx; u qed jidhru problemi ġodda marbuta mal-lokazzjonijiet tan-negozji bħala konsegwenza tal-globalizzazzjoni. Ħafna reġjuni qed ibatu minn għeluq ta' kumpaniji u minn qgħad għoli. Il-konverġenza msemmija hawn fuq hija parzjalment riżultat ta' tkabbir fl-UE-15 "l-antiki" relattivament dgħajjef.

Fil-maġġoranza ta' l-Istati Membri, l-adattament ekonomiku jitwettaq f'sitwazzjoni baġitarja ristretta. Sitta biss (il-Polonja, ir-Repubblika Ċeka, l-Ungerija, is-Slovakkja, Malta u Ċipru) mill-għaxar Stati Membri l-ġodda kisru l-Patt ta' Stabilità u Tkabbir(7). Anki l-baġits ta' l-Istati Membri kbar bħall-Ġermanja u Franza kellhom defiċit fl-aħħar snin li mhumiex kompatibbli mal-Patt ta' Stabilità. Dan se jkollu influwenza negattiva fuq il-possibilità u fuq x-xewqa ta' ħafna Stati Membri li jagħtu l-kontribut tagħhom lill-baġit ta' l-UE u b'hekk lill-politika ta' koeżjoni.

Barra minn hekk, l-infiq uffiċjali tal-ġejjieni se jkun akkumpanjat minn tibdil demografiku. Komunikazzjoni tal-Kunsill tal-Ministri ta' l-Ekonomija u l-Finanzi tat-13ta' Frar 2006(8) tbassar li l-proporzjon ta' l-infiq uffiċjali marbut ma' l-età fil-medja ta' l-UE se tiżdied b'4 fil-mija mill-PGD u li r-rata ta' tkabbir annwali medja għall-UE-25 se taqa' b'mod konsiderevoli, jiġifieri minn 2.2% fil-perjodu 2004-2010 għal 1.4% bejn l-2030 u l-2050.

Il-kapaċità għat-tkabbir u l-isfida tat-tkabbir tal-ġejjieni

F'deċiżjoni tal-Presidenza ta' l-UE(9) ġie ddikjarat li l-Unjoni Ewropea, meta tilqa' fi ħdana Stati Membri ġodda, għandha tibqa' f'pożizzjoni li żżomm id-dinamika ta' integrazzjoni Ewropea u "li għandu jsir kull sforz biex jiġu msaħħa l-koeżjoni u l-effettività ta' l-Unjoni". Fi kliem ieħor, fir-rigward tal-politika ta' koeżjoni, il-kapaċità għat-tkabbir tfisser li reġjuni/Stati "antiki” m'għandhomx jitilfu l-eliġibilità tagħhom għall-iffinanzjar bħala riżultat ta' l-effett ta' l-istatistika mingħajr ma titjib fil-kompetittività u s-sitwazzjoni strutturali jkunu saru aħjar.

In-nuqqas jew il-possibiltà ta' nuqqas ta' għajnuna strutturali kienu diġà problema għal ħafna reġjuni ta' l-UE-15 bħala riżultat tat-tkabbir lejn l-Lvant. Kieku l-PAK-9 kellhom jissieħbu llum, is-servizz ta' riċerka tal-Parlament Ewropew jikkalkola li aktar minn terz mir-reġjuni attwalment eliġibbli għall-iffinanzjar jitilfu l-istatus tagħhom ta' Objettiv-1(10). L-Istati Baltiċi u s-Slovakkja ma jitilfux reġjuni eliġibbli. Il-pajjiżi l-aktar effettwati jkunu l-Italja, il-Ġermanja, Malta, Spanja, il-Greċja u Franza. Il-Greċja, Ċipru u s-Slovenja jiġu esklużi mill-Fond ta' Koeżjoni (90%). Ir-Repubblika Ċeka mhijiex bogħod milli taqbeż l-iskala ta' 90%.

Stimi magħmula b'mod xjentifiku urew li kieku l-pajjiżi kollha tal-PAK-9 kellhom jissieħbu, ikollhom bżonn baġit ta' EUR 150.2 biljun biex ikunu jistgħu jsiru l-investimenti ta' fondi strutturali meqjusa neċessarji fil-preżent(11). Dan l-ammont m'għandu x'jaqsam xejn mal-kontribut potenzjali tal-PAK-9 għall-baġit strutturali (żieda ta' 4%)(12).

Żieda bħal din fil-mezzi għall-fondi strutturali mhijiex politikament realistika. Tnaqqis lineari fl-iffinanzjar tal-pajjiżi li qed jirċievu fondi bħalissa wkoll ftit jagħmel sens: dan ikun ifisser li l-Polonja, pereżempju, jkollha taċċetta tnaqqis ta' kważi 50% ta' l-iffinanzjar strutturali attwali tagħha.

Ta' min wieħed jinnota li dawn il-possibiltitajiet ta' tkabbir deskritti mhux se jseħħu kollha fl-istess ħin. L-unika ħaġa li fil-preżent hija ċerta hija li l-effetti ta' l-istatistika ta' l-adeżjoni tar-Rumanija u l-Bulgarija fl-2007 se jinħassu fil-perjodu ta' ffinanzjar li jmiss. Iżda l-istati kollha li qed jirċievu għajnuna ta' qabel l-adeżjoni qed iffitxu li jissieħbu ma' l-UE malajr. Fil-preżent ma jistgħux isiru previżjonijiet preċiżi la dwar perjodu ta' żmien fiss għall-adeżjoni tal-pajjiżi individwali u lanqas dwar l-iżvilupp ekonomiku ta' l-UE. Anki l-4% f'assorbiment tal-fondi strutturali, li qed jiġi kkalkolat, mhux mistenni li jseħħ immedjatament għal kull pajjiż. Madankollu, id-dimensjoni ta' l-adeżjonijiet li ġejjin, fl-isfond tar-regoli tal-politika strutturali attwali, trid tiġi ċċarata. Anki din l-istampa simplifikata turi li l-adeżjonijiet li ġejjin jitfgħu piż qawwi fuq il-Komunità jekk isiru f'daqqa u taħt il-kundizzjonijiet tal-politika strutturali attwali.

Madankollu, il-kalkoli juru wkoll li l-adeżjonijiet individwali ivarjaw b'mod sinifikattiv f'dawk li huma effetti fuq l-UE. It-Turkija hija każ speċjali minn kull aspett. Jekk wieħed jassumi li t-Turkija illum kienet Stat Membru ta' l-UE, tkun qed tirċievi 27.3% ta' l-approprjazzjonijiet tal-Fondi Strutturali. Dan ifisser total annwali ta' madwar € 16-il biljun, li jikkorrispondi ma' l-estimi tal-Kummissjoni Ewropea - ibbażati fuq rati ta' tkabbir ta' 4.5% għall-2024 flimkien ma' rata ta' assorbiment ta' 4% - ta' kontribut annwali ta' € 22.4 biljun(13). Skond estimi oħra, sa l-2005 it-Turkija tkun qed tirċievi sa € 26 biljun fis-sena għall-miżuri tal-Politika Strutturali biss. (14)

Kunsiderazzjonijiet tar-rapporteur

Il-previżjonijiet ta' żvilupp spjegati hawn fuq juru li l-adeżjoni tal-kandidati potenzjali għal darb'oħra tikkawża diskrepanzi reġjonali kbar f'termini ta' prosperità fi ħdan UE akbar. Din l-isfida għal politika ta' koeżjoni, li tfittex li tikseb ekwilibriju reġjonali, tikkomplika ruħha minħabba l-fatt li l-baġit ikollu jiġġebbed iżżejjed u minħabba l-kompetizzjoni globali dejjem tiżdied anki fost l-UE-27. Fl-istess ħin, qed jikbru l-aspettattivi għall-politika strutturali Ewropea biex tagħti kontribut effettiv għall-istrateġija ta' Liżbona. B'hekk l-isfidi għall-politika reġjonali Ewropea sejrin jiżdiedu f'miżura aktar qawwija mill-fondi disponibbli għall-politika reġjonali. L-għanijiet attwali tal-politika ta' koeżjoni jistgħu jintlaħqu biss permezz ta' approċċ gradwat lejn il-proċess ta' tkabbir u riformi li jagħtu spinta ta' effiċjenza lill- istrumenti eżistenti.

Mudelli ta' politika reġjonali gradwata

Sabiex jiġi mtaffi l-impatt fuq l-UE u fl-istess ħin tiġi offruta prospettiva interessanti lill-kandidati potenzjali indipendenti minn sħubija sħiħa fl-UE, il-Kummissjoni għandha tiżviluppa mudelli gradwati li jippermettu li ssir differenza bejn għajnuna ta' qabel l-adeżjoni u sħubija sħiħa tal-politika ta' koeżjoni. Dan jgħodd b'mod partikolari għat-Turkija. Pjanijiet ta' ffinanzjar strutturali ta' dan it-tip għandhom jitfasslu fid-dawl tal-progress ekonomiku u politiku li jkunu għamlu stati kandidati u jistgħu jirriflettu tip speċjali ta' sħubija fl-UE jew sħubija fl-EEA+ b'valur aktar qawwi. Għandu jkun ukoll possibbli li miżuri ta' politika strutturali jiġu revokati jew sospiżi. Barra minn hekk, il-komponenti tal-politika strutturali fil-“politika tal-Viċinat msaħħa” għandhom ikunu definiti b'aktar dettall.

Komponenti ta' politika reġjonali effiċjenti

L-effikaċja ta' politika reġjonali tista' tintlaħaq jew saħansitra tissaħħaħ permezz ta' l-effett ta' lieva ta' l-iffinanzjar ta' self, anki meta l-marġini għall-manuvra finanzjarja jkunu limitati. Effikaċja akbar ta' l-iffinanzjar Ewropew tista' wkoll tintlaħaq permezz ta' ishma ta' kofinanzjar nazzjonali ogħla u arranġamenti simplifikati għall-iffinanzjar privat ta' programmi Ewropej. Għandha tiġi kkunsidrata wkoll ir-rabta bejn l-effikaċja tal-politika ta' koeżjoni u l-politiki ekonomiċi nazzjonali. Il-Komunità tista' għalhekk torbot l-għoti ta' approprjazzjonijiet ma' politika tajba ta' tkabbir nazzjonali.

Għandha ssir reviżjoni radikali anki fil-kontenut tal-prijoritajiet ta' l-iffinanzjar. B'mod partikolari, programmi li jippromwovu l-kompetittività reġjonali għandhom jikkonċentraw aktar mill-viċin fuq l-internazzjonalizzazzjoni ta' l-ekonomija reġjonali u fuq il-bini ta' infrastrutturi internazzjonali ewlenin bil-ħsieb li jingħataw spinti akbar lit-tkabbir. Huwa essenzjali wkoll li l-fondi strutturali jkollhom rwol aktar importanti biex itaffu l-impatt demografiku u l-globalizzazzjoni. L-effikaċja tas-sussidji għan-negozji, mill-banda l-oħra, għandha tkunu suġġetta għal eżami kritiku, peress li probabbilment huma m'għandhomx rwol deċiżiv fid-determinazzjoni tal-lokazzjoni tan-negozju.

Fl-aħħarnett, hemm bżonn ta' aktar trasparenza fl-għoti ta' approprjazzjonijiet. Meta biss ikun hemm ċarezza biżżejjed dwar kif u fejn il-flus mill-fondi strutturali qed jintefqu, ikun possibbli li l-lista ta' objettivi politiċi tiġi riveduta. Anki l-ġlieda kontra l-korruzzjoni u l-abbużi hija indispensabbli u din għandha tkun prerekwiżit assolut għas-sħubija fil-politika ta' koeżjoni Ewropea.

Kriterji għal aktar żvilupp tal-politika ta' koeżjoni għandhom jiġu diskussi fir-reviżjoni tal-baġit 2008/2009 kif ukoll f'evalwazzjonijiet futuri tal-politika ta' koeżjoni u għajnuna ta' qabel l-adeżjoni.

(1) "Rapport tal-Kummissjoni dwar il-karta strateġika għat-tkabbir 2005" P6_TA(2006)0096, votazzjoni plenarja tas-16 ta' Marzu 2006; "Riżoluzzjoni dwar komunikazzjoni ta' l-Istrateġija tat-Tkabbir u l-Isfidi Ewlenin għall-perjodu 2006-2007", P6_TA_PROV(2006)0568, ibbażata fuq A6-0436/2006, votazzjoni plenarja tat-13 ta' Diċembru 2006; "Riżoluzzjoni dwar l-aspetti istituzzjonali tal-kapaċità ta' l-Unjoni Ewropea li tintegra fi ħdanha Stati Membri Ġodda" P6_TA-PROV(2006)0569 ibbażata fuq A6-0393/2006, Votazzjoni plenarja tat-13 ta' Diċembru 2006. (2) Ftehima Interistituzzjonali bejn il-Parlament Ewropew, il-Kunsill u l-Kummissjoni dwar id-dixxiplina baġitarja u t-tmexxija finanzjarja soda (GU 2006/C 139, p. 1). (3) "Il-konsegwenzi tat-tkabbir tal-ġejjieni fuq l-effettività tal-politika ta' koeżjoni". Komunikazzjoni tad-Dipartiment tal-Politika Strutturali u ta' Koeżjoni tal-31ta' Lulju 2006; PE 375.308 (4) "Sħubija ġdida għall-koeżjoni": It-Tielet rapport dwar il-koeżjoni ekonomika u soċjali, Kummissjoni Ewropea COM(2004) 107, Frar 2004 (5) "It-Tkabbir, sentejn wara: valutazzjoni ekonomika", Kummissjoni Ewropea, Karta okkażjonali Nru 24, Mejju 2006 (6) "Is-sitwazzjoni ekonomika attwali fil-pajjiżi ta' l-Ewropa Ċentrali, tal-Lvant u tan-Nofsinahr", Istitut għall-Istudji Ekonomiċi Internazzjonali ta' Vjenna, Lulju 2005; Informazzjoni mill-EUROSTAT 2006 (7) "L-Istati Membri ġodda u l-Patt ta' Stabilità u Tkabbir: bżonn ta' adattament fil-prospett ta' sħubija taz-zona euro?", Appendiċi rapport ta' l-EUROFRAME-EFN, rebbiegħa 2006. (8) "L-impatt tax-xjuħija fuq in-nefqa pubblika: pjanijiet ta' l-UE-25 Stat Membru dwar pensjonijiet, il-kura tas-saħħa, kura fuq perjodu twil ta' żmien, l-edukazzjoni u trasferimenti ta' nies qegħda (2004-2050)", Il-Kummissjoni Ewropeja, Direttorat-Ġenerali għall-Affarijiet Ekonomiċi u Finanzjarji, Rapport Speċjali nru 1/2006, 13.2.2006 (9) Il-Kunsill ta' l-Unjoni Ewropea, konklużjonijiet tal-Presidenza tal- 15./16.6.2006 (Dokument 10633/1/06 tas-17.7.2006) (10) "Tkabbir Futur u l-Politika ta' Koeżjoni", Nota minn Unità Speċjali għall-Politika Strutturali u l-Politika ta' Koeżjoni (Dipartment tal-Politika) IP/B/REGI/NT/2006_08, Novembru 2006, ara Tabella 3 fl-Anness (11) "Effetti ta' tkabbir futur fuq il-politika reġjonali ta' l-UE, kalkolazzjonijiet u osservazzjonijiet dwar id-distribuzzjoni fil-futur tal-Fondi Strutturali", GEFRA Gesellschaft für Finanz- und Regionalanalysen, Novembru 2006. (12) ara n-nota ta' qiegħ il-paġna ta' qabel. (13) "Kwistjonijiet li joħorġu mis-Sħubija possibbli tat-Turkija", Dokument ta' Ħidma ta' l-Uffiċċju tal-Kummissjoni SEC(2004) 1202, Ottubru 2004. (14) “Der EU-Beitritt der Türkei:Wie teuer die Gemeinsame Agrarpolitik", [Is-sħubija tat-Turkija fl-UE: Kemm se tiswa lill-politika agrikola?] Harald Grethe. Humboldt Universität Berlin, Agrarwirtschaft 54 (2005) Heft 2/ 2005

SUĠĠERIMENTI

Il-Kumitat għall-Baġit jistieden lill-Kumitat għall-Iżvilupp Reġjonali, bħala l-kumitat responsabbli, sabiex jinkorpora s-suġġerimenti li ġejjin fil-mozzjoni għal riżoluzzjoni li sejjer jadotta:

1.  Jinnota li l-Unjoni Ewropea, minħabba t-tkabbir tal-ġejjieni, trid tindirizza tliet sfidi ewlenin dwar il-politika ta' koeżjoni, jiġifieri l-aggravament tal-każi ta' disparità fl-iżvilupp, l-ispostament taċ-ċentru tal-gravità tal-politika ta' koeżjoni lejn il-lvant u l-inugwaljanzi li jkomplu jeżistu fi ħdan l-Ewropa tal-Ħmistax;2.  Ifakkar li għall-Perspettiva Finanzjarja 2007-2013, il-Kummissjoni pprevediet, għall-miżuri favur il-politika reġjonali fil-Bulgarija u r-Rumanija, baġit ta' 16.5 biljuni Euro (li jinkludi 11.858 biljun Euro għall-Fondi Strutturali u 4.643 biljun Euro għall-Fond ta' Koeżjoni) għall-perjodu 2010-2013(1);

3.  Hu tal-feħma li l-Kummissjoni u l-Kunsill iridu jressqu xenarji finanzjarji preliminari dwar il-politika ta' koeżjoni qabel ma jiddeċiedu li jidħlu f'negozjati ma' pajjiż kandidat, kif ukoll xenarji finanzjarji dettaljati matul il-proċess tan-negozjati ma' pajjiż kandidat;

4.  Jenfasizza l-importanza ta' approċċ strett ħafna f'termini ta' evalwazzjoni kwantitattiva u kwalitattiva ta' l-użu tal-Fondi Strutturali li jinvolvi mmaniġġjar tajjeb u kontroll xieraq sabiex, fl-interess taċ-cittadini Ewropej, titjieb kemm jista' jkun ir-relazzjoni bejn l-ispiża u l-benefiċċju ta' l-infiq ta' l-UE fil-qasam tal-koeżjoni;

5.  Jenfasizza l-importanza tar-rapporti tal-Qorti ta' l-Awdituri kif ukoll tar-rapporti ta' l-attivitajiet tal-Kummissjoni bħala strumenti li jikkontribwixxu għall-evalwazzjoni ta' l-immamiġġjar tajjeb tal-Fondi Strutturali u jikkunsidra, jekk ikun xieraq, li jieħu il-miżuri neċessarji fil-kuntest tal-proċedura tal-baġit annwali;

6.  Iqis li, minħabba l-istat attwali tas-sistema tar-riżorsi ta' l-UE, ikun diffiċli li jiġi ffinanzjat xi tkabbir ieħor tal-ġejjieni mingħajr periklu għall-effettività tal-politiki attwali ta' koeżjoni;

7.  Jenfasizza li fin-negozjar mill-ġdid ta' nofs il-perjodu trid tiġi kkunsidrata l-prospettiva ta' aktar tkabbir possibbli u jiġi evalwat l-impatt ekonomiku u baġitarju ta' dan it-tkabbir.

PROĊEDURA

(1) Kummissjoni Ewropea, Fiche Nru. 43 REV dwar il-Perspettiva Finanzjarja 2007-2013.