dwar l-irwol u l-effettività tal-politika ta' koeżjoni għat-tnaqqis tad-differenzi fl-iżvilupp fl-ifqar reġjuni ta' l-UE

(2006/2176 (INI))

Il-Parlament Ewropew,

–   wara li kkunsidra l-Artikoli 16, 87(3), 137, 141, 158 u 299(2) tat-Trattat KE,

–   wara li kkunsidra r-Regolament tal-Kunsill (KE) Nru 1083/2006 tal-11 ta’ Lulju 2006 li jistipula dispożizzjonijiet ġenerali dwar il-Fond Ewropew għall-Iżvilupp Reġjonali, il-Fond Soċjali Ewropew u l-Fond ta' Koeżjoni(1),

–   wara li kkunsidra d-Deċiżjoni tal-Kunsill 2006/702/KE tas-6 ta’ Ottubru 2006 dwar il-linji gwida strateġiċi Komunitarji dwar il-koeżjoni(2),

–   wara li kkunsidra l-konklużjonijiet tal-laqgħat tal-Kunsill Ewropew tat-23 u l-24 ta’ Marzu 2000 f’Liżbona, u l-15 u s-16 ta’ Ġunju 2001 f’Göteborg,

–   wara li kkunsidra l-Komunikazzjoni tal-Kummissjoni tat-30 ta’ Mejju 2007 bit-titolu 'Ir-Raba’ Rapport dwar il-Koeżjoni Ekonomika u Soċjali' (COM(2007)0273),

–   wara li kkunsidra l-Komunikazzjoni tal-Kummissjoni tat-12 ta' Ġunju 2006 bit-titolu “L-Istrateġija tat-Tkabbir Ekonomiku w l-Impjiegi u r-Riforma tal-politika Ewropea ta' koeżjoni: Ir-raba' rapport ta' progress dwar il-koeżjoni (COM(2006)0281),

–   wara li kkunsidra l-Komunikazzjoni tal-Kummissjoni ta’ l-1 ta’ Marzu 2006 bit-titolu “Il-pjan ta’ rotta għall-ugwaljanza bejn in-nisa u l-irġiel” (COM(2006)0092),

–   wara li kkunsidra l-Komunikazzjoni tal-Kummissjoni tal-5 ta’ Lulju 2005 bit-titolu ‘Politika ta’ Koeżjoni bħala Sostenn għat-Tkabbir u għall-Impjiegi: Il-Linji ta’ Gwida Strateġiċi tal-Komunità, 2007-2013’ (COM(2005)0299),

–   wara li kkunsidra l-Komunikazzjoni tal-Kummissjoni tas-17 ta’ Mejju 2005 bit-titolu ‘It-tielet rapport dwar il-progress fuq il-koeżjoni: Lejn sħubija ġdida għat-tkabbir, l-impjiegi u l-koeżjoni’ COM(2005)0192),

–  wara li kkunsidra l-Komunikazzjoni tal-Kummissjoni tas-26 ta’ Mejju 2004 bit-titolu 'Sħubija aktar b’saħħitha għall-ibgħad reġjuni' (COM(2004)0343),

–   wara li kkunsidra l-Komunikazzjoni tal-Kummissjoni tal-21 ta’ Frar 1996 bit-titolu “L-inkorporazzjoni ta’ opportunitajiet indaqs għan-nisa u l-irġiel fil-politiki u fl-attivitajiet kollha tal-Komunità” (COM(1996)0067),

–   wara li kkunsidra r-Rapport Speċjali Nru 10/2006 tal-Qorti ta’ l-Awdituri dwar l-evalwazzjonijiet ex-post ta’ programmi ta’ Objettivi 1 u 3 ta’ l-1994 sa l-1999 (Fondi Strutturali)(3),

–   wara li kkunsidra l-Artikolu 45 tar-Regoli ta’ Proċedura tiegħu,

–   wara li kkunsidra r-rapport tal-Kumitat għall-Iżvilupp Reġjonali (A6-0241/2007),

A. billi l-Artikolu 158 tat-Trattat KE jimplika li l-għan tal-Komunità hu li tippromwovi l-iżvilupp armonjuż u li tnaqqas id-differenzi fil-livelli ta’ żvilupp bejn id-diversi reġjuni u t-tardività tar-reġjuni l-aktar żvantaġġati permezz li jissaħħaħ it-tkabbir ekonomiku,

B.  billi l-ifqar reġjuni ta’ l-UE huma reġjuni li jaqgħu taħt l-objettiv ta’ konverġenza tal-politika ta’ koeżjoni, li l-PGD tagħhom ras għal ras huwa ta’ inqas minn 75% tal-medja tal-PGD ras għal ras ta’ l-UE kollha kemm hi,

C. billi l-kunċett ta’ koeżjoni ma ġiex definit b’mod ċar u jkopri ħafna attivitajiet tat-trawwim ta’ l-iżvilupp ekonomiku, soċjali u territorjali armonjuż fir-reġjuni ta’ l-UE,

D. billi l-konklużjonijiet tar-riżoluzzjoni tiegħu ta’ l-24 ta’ April 2007 dwar il-konsegwenzi tat-tkabbir tal-ġejjieni fuq l-effettività tal-politika ta' koeżjoni(4) isemmi li l-istruttura preżenti ta' l-iffinanzjar tal-politika ta' koeżjoni trid tiġi riveduta fid-dawl tat-tkabbir tal-ġejjieni; billi huwa jipproponi wkoll li l-iffinanzjar tal-kompetittività reġjonali u tal-koperazzjoni territorjali għandu jkun iktar iffukat fuq l-integrazzjoni fuq ekonomiji reġjonali u infrastruttura ta' importanza Ewropea u fuq l-għajnuna lil reġjuni sabiex dawn ikunu jistgħu jlaħħqu mal-globalizzazzjoni u mal-bidla demografika,

E.  billi wieħed mill-prinċipji fundamentali ta' l-Unjoni Ewropea huwa l-prinċipju tas-solidarjetà, li sservi sabiex jonqos l-isproporzjonalità fl-iżvilupp reġjonali ta' l-Unjoni,

F.   billi s’issa l-politika ta’ koeżjoni ta’ l-UE tat kontribut effettiv għall-iżvilupp ta' diversi reġjuni li qabel kienu pajjiżi ta’ koeżjoni (l-Irlanda, il-Greċja, il-Portugall u Spanja), minkejja li wħud mir-reġjuni għadhom sottożviluppati b’mod sinifikanti, u billi l-impatt tagħha mil-lat tal-konverġenza ta’ l-ifqar reġjuni għen sabiex tiżdied il-prosperità ta’ l-UE kollha kemm hi,

G. billi l-għan tal-politika ta' koeżjoni huwa li jagħmel lill-Istati Membri u lir-reġjunijiet viabbli ekonomikament, u għalhekk indipendenti minn għajnuna esterna, minkejja l-fatt li l-kisba ta' Fondi Strutturali mhix suġġetta għal limiti ta' żmien;

H.  billi hemm nuqqas ta' informazzjoni dettaljata u ta' studji komparattivi bi klassifiki dwar l-avvanz ta' reġjuni li jieħdu Fondi Strutturali;

I.   billi wara t-tkabbir għal 27 Stat Membru, l-UE issa għandha popolazzjoni li kibret u saret kważi 493 miljun persuna(5), li madwar 30%(6) minnhom jgħixu fill-100 reġjun ta’ l-objettiv ta’ konverġenza attwali, u billi d-differenzi bejn ir-reġjuni f’termini ta’ PGD fl-UE tas-27 bħalissa huma akbar ħafna minn dawk li kienu fl-UE tal-15, b’medja ta’ PGD ras għal ras ta’ bejn 24% (ix-Xlokk tar-Rumanija ) għal 303% (iċ-ċentru ta’ Londra) tal-medja tal-PGD ta’ l-UE,

J.   billi fl-UE tas-27, l-ifqar reġjuni ta’ l-objettiv ta’ konverġenza jinsabu prinċipalment fl-Istati Membri l-ġodda, fejn l-implimentazzjoni tal-politika ta' koeżjoni għadha kemm inbdiet riċentement, u għalhekk huwa impossibbli li jiġi evalwat is-suċċess tagħha mil-lat tat-tnaqqis tad-differenzi;

K. billi fl-ifqar Stati Membri it-tkabbir ekonomiku mhux imqassam b’mod inqas, u hemm it-tendenza li jkun ikkonċentrat madwar zoni urbani, filwaqt li f'dawn il-pajjiżi, parti sostanzjali tal-popolazzjoni tgħix fiz-zoni rurali,

L.  billi reġjuni li jsofru minn faqar ekonomiku b’riżultat ta’ nuqqas ta’ infrastruttura bażika, aċċess ristrett għas-servizzi pubbliċi u rata għolja ta’ qgħad qed jiġi dipopolati b’rata aktar mgħaġġla minn reġjuni oħra u billi dan il-fatt, min-naħa tiegħu, idgħajjef il-ħila tagħhom li jiżviluppaw ġenwinament,

M. billi l-Artikolu 299(2) tat-Trattat KE jirrikjedi li l-Kommunità taġġusta l-politiki tagħha u li tapplika miżuri speċjali u speċifiċi għall-ibgħad reġjuni, minħabba s-sitwazzjoni speċifika ta’ dawn ir-reġjuni, li ħafna minnhom huma fost l-ifqar reġjuni ta’ l-UE, fattur li jxekkel ħafna l-iżvilupp tagħhom minħabba l-effetti mħallta u dejjiema ta’ l-iżvantaġġi strutturali u ġeografiċi,

N. billi f'xi wħud mill-Istati Membri l-ġodda, it-teħid tal-fondi għall-ifqar reġjuni tal-politika ta’ koeżjoni kien baxx waqt il-perjodu 2004-2006,

O.  billi sabiex l-iffinanzjar strutturali ta’ l-UE jiġi implimentat b’suċċess, tinħtieġ koordinazzjoni mill-qrib bejn l-awtoritajiet fil-livell lokali, reġjonali, nazzjonali u Komunitarju,

P.  billi l-fatt li l-finanzjament ikun ingħata ma jiggarantix li dan ikun ser jintuża tajjeb, u billi l-awtoritajiet f’reġjuni foqra sikwit ma jkollhomx il-ħiliet u l-esperjenza xierqa u l-fondi proprji neċessarji sabiex ikunu jistgħu jagħmlu użu sħiħ mill-fondi tal-koeżjoni li huma intitolati għalihom,

Q. billi hemm numru ta’ raġunijiet għalfejn l-ekonomija ta’ reġjuni individwali baqgħet lura, u billi l-ifqar reġjuni ta’ l-UE fuq kollox m'għandhomx l-infrastruttura basika essenzjali għall-iżvilupp sostenibbli bilanċjat u għal aktar investiment, u lanqas m'għandhom riżorsi umani adegwati u inċentivi adegwati għall-edukazzjoni, it-tagħlim tul il-ħajja kollha u l-innovazzjoni,

R.  billi l-ekwità privata, il-kapital ta’ sogru, il-fondi li jduru u l-mikro-krediti għal intrapriżi li jkunu għadhom qed jibdew għandhom irwol essenzjali bħala l-forza ewlenija għall-intraprenditorija, l-innovazzjoni u l-ħolqien ta’ l-impjiegi,

S.  billi l-esklużjoni soċjali u r-rati ta’ qgħad għolja ħafna u fuq medda twila ta’ snin huma prevalenti b’mod partikulari fl-ifqar reġjuni, speċjalment fost in-nisa, l-anzjani u l-persuni b’diżabilità u gruppi etniċi vulnerabbli,

T.  billi d-drittijiet fundamentali taċ-ċittadini jinkludu l-aċċess indaqs għan-nisa u għall-irġiel għall-utilitajiet kollha, opportunitajiet indaqs fis-suq tax-xogħol u aċċess indaqs għall-edukazzjoni, il-kultura u servizzi tas-saħħa u dawk soċjali,

1.  Iħeġġeġ li tittieħed azzjoni riżoluta sabiex jonqsu l-aktar nuqqasijiet kbar ta’ l-iżvilupp fl-ifqar reġjuni ta’ l-UE, u jinnota b’mod partikulari li l-Istati Membri l-ġodda, li saru jaqgħu taħt il-politika ta’ koeżjoni sa mill-2004, jirrikjedu appoġġ speċjali minħabba d-diffikultajiet istituzzjonali, amministrattivi u ekonomiċi kontinwi tagħhom;

2.  Jenfasizza l-importanza li jiġu analizzati l-iżviluppi storiċi fil-pajjiżi ta’ koeżjoni ta’ l-UE-15; jistieden lill-Kummissjoni biex, f'koperazzjoni ma' l-Istati Membri kkonċernati, ir-reġjuni tagħhom, l-awtoritajiet lokali u partijiet oħra interessati, tenfasizza b'mod ċar, minn banda, miżuri għat-tkabbir fir-reġjuni li kellhom suċċess (bħall-Irlanda) u mill-banda l-oħra, l-ostakoli prinċipali fir-reġjuni li għadhom lura, sabiex dawn l-impedimenti ma jerġgħux jinqalgħu fir-reġjuni ta' l-Istati l-Membri l-ġodda;

3.  Jiġbed l-attenzjoni tal-Kummissjoni u ta' l-Istati Membri għas-sitwazzjoni fir-reġjuni li, minkejja li huma l-ifqar fl-UE-15 u minkejja n-nuqqas ta’ titjib fid-dejta ta' l-iżvilupp tagħhom, m'għadhomx meqjusa bħala l-ifqar reġjuni ta' l-UE-27 għal raġunijiet purament statistiċi; jirrakkomanda li titqies is-sitwazzjoni speċifika ta’ dawn ir-reġjuni;

4.  Huwa tal-fehma li d-diffikultajiet fit-teħid tal-finanzjament huma preokkupazzjoni importanti u urġenti, b’mod partikulari għall-Istati Membri l-ġodda, li qed isibuha diffiċli li jissodisfaw ir-rekwiżiti kumplikati tal-politika ta’ koeżjoni u li spiss ma jkollhomx biżżejjed kapital ta’ kontribut (privat jew pubbliku) sabiex jiffinanzjaw minn qabel l-għotjiet tal-Komunità, minħabba d-diffikultajiet proċedurali u r-restrizzjonijiet tal-ħin involuti fl-implimentazzjoni tal-proġetti. B’riżultat ta’ dan, il-benefiċjarji potenzjali ma jkunux jistgħu jieħdu jew jitolbu fondi li huma jistgħu jagħmlu użu tajjeb minnhom;

5.  Huwa mħasseb li f'xi reġjuni ma tantx tiġi mmirata l-għajnuna Komunitarja, bir-riżultat li s-sitwazzjoni f’dawk ir-reġjuni ma titjiebx, minkejja l-bosta snin ta' iffinanzjar u li r-riżorsi tal-Komunità jinħlew;

6.  Jissuġġerixxi li l-politika ta' koeżjoni ta' l-UE għandha tqis kif jixraq id-diversità tal-ħtiġijiet ta' l-ifqar reġjuni, filwaqt li l-għajnuna titfassal għall-fatturi speċifiċi tagħhom u l-potenzjal tagħhom jiġi sfruttat, sabiex jiġu mwettqa proġetti li jipproduċu riżultati dejjiema u żvilupp ġenwin fuq il-bażi ta’ pjanijiet plurijennali ta’ żvilupp li jqisu kif jixraq lill-pjanijiet għall-iżvilupp mil-lat ta’ spazju;

7.  Jirrakkomanda li l-politika ta’ koeżjoni ta’ l-UE tiġi adattata għall-ibgħad reġjuni kif hemm referenza f’Artikolu 299(2) peremzz ta’ miżuri speċjali u speċifiċi;jappoġġja l-istrateġija li użat l-UE sabiex tgħin lill-ibgħad reġjuni, u jitlob lill-Kummissjoni sabiex tagħti malajr dettalji tas-sustanza ta' l-'isħubija iktar b'saħħitha' li hija annunċjat, b'mod partikulari fir-rigward tat-titjib tal-kompetittività ta’ l-ibgħad reġjuni, u l-pjan ta' azzjoni tagħha għall-viċinat usa';

8.  Jirrakkomanda li, bil-għan li jitħaffef it-tkabbir ekonomiku u li jkun hemm aktar investiment u żvilupp sostenibbli bilanċjat fl-ifqar reġjuni, ir-reġjuni u l-Istati Membri għandhom jagħtu prijorità lil proġetti mfassla sabiex jagħmlu lir-reġjuni aktar aċċessibbli billi jipprovdulhom l-infrastruttura bażika, b’mod partikulari fl-oqsma tat-trasport u ta’ l-ITC, b’qies kif jixraq għall-impatt soċjali u ambjentali ta’ dan it-tip ta’ proġetti;

9.  Jistieden lill-Istati Membri u lill-awtoritajiet reġjonali u lokali sabiex jagħtu qies xieraq lill-ħtieġa għall-iżvilupp bilanċjat fi ħdan ir-reġjuni individwali meta jippjanaw programmi ġejjiena għall-iżvilupp reġjonali; jemmen li huwa partikolarment importanti li jitqiesu l-ħtiġijiet speċifiċi ta’ zoni urbani, filwaqt li tiġi segwita politika urbana adegwata inkluża politika tad-djar għal “kwartieri fqar” u politika rurali adegwata;

10. Jemmen li huwa partikularment importanti li jingħataw aktar kompetenzi fil-politika tal-koeżjoni lill-ibliet, sabiex dawn ikunu jistgħu jirreaġixxu bi sħab mal-ħtiġijiet speċifiċi taz-zoni urbani; f’dan il-kuntest, jistieden lill-Kummissjoni u lill-Istati Membri sabiex jisfruttaw b’mod sħiħ il-potenzjal ta’ pjanijiet integrati ta’ żvilupp fejn il-politika ta’ koeżjoni tista’ tiġi marbuta b’mod dirett ma’ l-ippjanar urban;

11. Jinkoraġġixxi lill-Istati Membri sabiex jagħmlu l-ifqar reġjuni aktar attraenti għall-investituri billi jużaw il-vantaġġi naturali u kulturali ta’ dawk ir-reġjuni sabiex jiżviluppaw forom tradizzjonali ta’ attivitajiet ekonomiċi speċifiċi għal kull reġjun u sabiex joħolqu forom ġodda ta’ attività ekonomika; għalhekk iħeġġeġ lill-Kummissjoni sabiex tikkonċentra iktar fuq miżuri ta' identifikazzjoni u ta' appoġġ sabiex jiġu kkonservati l-ħiliet u l-abitudnijiet speċifiċi li għadhom jeżistu f'reġjuni iżolati ta' l-Ewropa li għadhom lura;

12. Jilqa’ bi pjaċir il-fokus fuq l-użu tal-politika ta’ koeżjoni għal titjib fil-kapaċità komunitarja għall-innovazzjoni tul il-perjodu 2007 sa l-2013; jinnota li dan l-objettiv għandu japplika wkoll għall-ifqar reġjuni; ipoġġi enfasi partikulari fuq il-ħtieġa li titnaqqas id-differenzi fit-teknoloġija fi ħdan u bejn ir-reġjuni u l-Istati Membri permezz billi jtejbu n-netwerks ta’ koperazzjoni teknoloġika;

13. Ifakkar lill-Kummissjoni u lill-Istati Membri li kwalunkwe valutazzjoni tal-politika ta' koeżjoni għandha twassal għal titjib fil-politika innovattiva ta' koeżjoni f'Unjoni mkabbra fil-ġejjieni; ifakkar il-ħtieġa li jkun hemm fokus fuq kunċetti ġodda ta’ żvilupp territorjali u ideat aktar speċifiċi għall-appoġġ ta’ l-iżvilupp ta’ massa kritika reġjonali madwar inħawi urbani u għenieqed (clusters) reġjonali oħra; ifakkar ukoll il-ħtieġa li jintuża approċċ divrenzjat għall-użu tal-Fondi Strutturali speċifiċi għall-ħtiġijiet tar-reġjuni kollha;

14. Jistieden lill-Kummissjoni u lill-Istati Membri sabiex jappoġġjaw proġetti li jżidu l-kapaċità reġjonali għall-ġenerazzjoni u għall-assorbiment ta’ teknoloġiji ġodda, b’mod partikulari dawk relatati mal-ħarsien ta’ l-ambjent u l-iżvilupp tar-riżorsi naturali, u li jinvolvu t-tixrid ta’ mudelli msejsa fuq konsum aktar baxx ta’ enerġija u l-użu ta’ enerġiji li jiġġeddu, sabiex ir-reġjuni jkunu jistgħu jiżviluppaw tmexxija fl-eko-innovazzjoni mingħajr ma jkollhom jiffaċċjaw aspetti negattivi ta' żvilupp mhux sostenibbli li ffaċċjaw reġjuni oħra fiċ-ċiklu ta' żvilupp tagħhom;

15. Jenfasizza l-importanza tal-koperazzjoni territorjali (transkonfinali, transnazzjonali u interreġjonali) fil-kuntest tal-politika ta' koeżjoni sabiex jiġi promoss żvilupp ibbilanċjat; iħeġġeġ f'dan ir-rigward li jitwaqqfu netwerks ta' koperazzjoni reġjonali u settorjali, li jinvolvu, b'mod speċjali, lill-ifqar reġjunijiet;

16. Jinkoraġġixxi lill-Kummissjoni, lill-Istati Membri u lill-awtoritajiet lokali sabiex jippromwovu l-intraprenditorija fl-ifqar reġjuni permezz ta’ sistema integrata ta’ inċentivi ekonomiċi u soċjali għall-investituri, u jiġbed l-attenzjoni dwar il-ħtieġa li l-proċeduri amministrattivi jiġu simplifikati, b’mod partikulari fir-rigward tal-ħolqien ta’ attivitajiet ekonomiċi ġodda u l-espansjoni ta’ attivitajiet ekonomiċi eżistenti;

17. Jinkoraġġixxi lill-Istati Membri sabiex jippromwovu l-intraprenditorija fl-iskejjel u li jappoġġjaw skemi ta’ taħriġ għal intraprendituri futuri, liema skemi jkunu mmirati b’mod partikulari għaż-żgħażagħ, in-nisa, il-persuni anzjani u l-minoranzi esposti għall-esklużjoni soċjali;

18. Jilqa’ b’sodisfazzjon strumenti ġodda bħall-inizjattiva JEREMIE (Joint European Resources for Micro to Medium Enterprises) u l-inizjattiva JESSICA (Joint European Support for Sustainable Investment in City Areas); madankollu jsemmi l-fatt li dawn l-istrumenti waslu tard wisq biex jiġu użati b’mod sħiħ, u li l-kuxjenza dwar il-possibilitajiet tagħhom fil-livell lokali u reġjonali hija baxxa ħafna; jinnota l-ħtieġa urġenti li dan it-tip ta’ strumenti jiġu mxerrda u applikati bl-aktar mod wiesa’ possibbli fl-Istati Membri, u applikati skond is-sitwazzjoni reali f'dawn l-Istati, filwaqt li jitqiesu l-bżonnijiet reali tal-benefiċjarji potenzjali u l-kapaċità tagħhom, f'termini prattiċi, illi jagħmlu użu minn dawn l-istrumenti,

19. Jistieden lill-Kummissjoni sabiex iżżid l-isforzi sabiex tipprovdi assistenza teknika lill-Istati Membri u lir-reġjuni billi toħloq programmi xierqa ta’ taħriġ; jilqa’ b’sodisfazzjon l-inizjattiva JASPERS (Joint Assistance in Supporting Projects in European Regions) li tipprovdi assistenza fl-implimentazzjoni ta’ proġetti kbar;

20. Jilqa’ bi pjaċir l-inizjattiva introdotta riċentement “Reġjuni għall-bidla ekonomika” u l-impenn msemmi fiha għat-tifrix ta’ l-aħjar prattiki li, fil-passat, kellhom impatt li b’mod ċar kien pożittiv u li taw kontribut għat-tkabbir ekonomiku reġjonali; jistieden, għaldaqstant, lill-Kummissjoni, sabiex tiżgura li l-ifqar reġjuni ta’ l-UE jiġu inklużi fin-netwerk ta’ skambji ta’ l-aħjar prattiki, filwaqt illi jiddeskrivu dan it-tip ta’ prattiki fuq websajt pubbliku fil-lingwi uffiċjali kollha ta' l-UE;

21. Jinkoraġġixxi lill-Istati Membri sabiex joħolqu sħubiji pubbliċi-privati (PPPs) bħala mezz effettiv ta’ kif jinvolvu kapital privat fil-finanzjament ta’ proġetti għall-iżvilupp reġjonali; jissuġġerixxi, f’dan is-sens, li jiġi stipulati regoli sempliċi u trasparenti li jiggvernaw it-twaqqif ta’ dan it-tip ta’ sħubiji, minħabba l-impatt tagħhom fuq medda twila ta’ żmien, fuq il-finanzi pubbliċi;

22. Jistieden lill-Kummissjoni sabiex iżżid l-isforzi tagħha sabiex tagħmel direttivi, regoli u linji gwida li jkunu eħfef biex wieħed jifhimhom, bil-għan li tevita li jkun hemm miżinterpretazzjonijiet u li tiffaċilita l-implimentazzjoni tal-programmi;

23. Jinkoraġġixxi lill-Istati Membri u lill-istituzzjonijiet tal-Komunità sabiex jissimplifikaw aktar il-proċeduri bil-għan li jiżguraw li l-fondi jiġu allokati b’mod trasparenti u effiċjenti, u jgħaddu b’ħeffa għand il-benefiċjarji finali; f’dan il-kuntest, jissuġġerixxi wkoll li l-kunċett ta’ punti ta’ kuntatt waħdiena jiġu sfruttati bis-sħiħ, u li jissaħħu l-proċeduri ta’ kontroll fuq l-użu tal-fondi; jinkoraġġixxi wkoll lill-Istati Membri sabiex jikkonformaw ma' l-Inizjattiva Ewropea għat-Trasparenza u mar-responsabilità ta' l-awtorità ta' l-immaniġġjar għall-organizzazzjoni tal-publikazzjoni, elettronika jew b'mod ieħor, tal-lista tal-benefiċjarji, l-ismijiet ta' l-operazzjonijiet u l-ammont ta' fondi pubbliċi allokati għall-operazzjonijiet, kif stipulat f'Artikolu 7(2)(d) tar-Regolament tal-Kummissjoni (KE) Nru 1828/2006fn tat-8 ta’ Diċembru 2006;

24. Jistieden lill-Istati Membri sabiex jiżguraw koordinazzjoni politika, teknika u amministrattiva effettiva u osservanza effettiva mal-prinċipju ta' sħubija bil-għan li l-fondi jiġu mmaniġġjati sewwa; jesprimi tħassib għan-nuqqas ta’ mekkaniżmi ta’ koordinazzjoni u ta' sħubija li jiffunzjonaw sewwa fl-ifqar reġjuni;

25. Jiġbed l-attenzjoni tal-Kummissjoni u ta’ l-Istati Membri għall-fatt li, bil-għan li jiġi żgurat żvilupp bilanċjat, jeħtieġ li jiġu stabbiliti sinerġiji bejn id-dimensjonijiet ekonomiċi, soċjali u ambjentali, li jagħmlu użu minn analiżi tar-raġunijiet għalfejn baqgħet lura l-ekonomija, b’referenza partikolari għall-qgħad u għall-istrutturi relatati tiegħu, b’mod speċjali fl-ifqar reġjuni;

26. Jisħaq li r-rata tal-qgħad f’uħud mill-ifqar reġjuni ta’ l-UE hija ogħla minn 20%; jesprimi t-tħassib tiegħu dwar il-fatt li l-qgħad huwa problema li jaffettwa l-ifqar reġjuni b’mod partikulari, u li għadu ogħla fost in-nisa u fost minoritajiet esposti għall-esklużjoni soċjali; jistieden lill-Istati Membri sabiex jipprovdu appoġġ għan-nisa fis-suq tax-xogħol, u li jillivellaw id-differenzi fil-pagi bejn l-irġiel u n-nisa; iktar minn hekk, jitlob li tingħata attenzjoni lis-sitwazzjoni ferm speċifika tal-poplu Roma, li għalih il-problema ta' qgħad għal żmien twil hija kritika;

27. Jenfasizza l-ħtieġa li l-Fond Soċjali Ewropew jintuża sew, li jsir investiment fil-kapital uman fl-ifqar reġjuni billi jiġi żgurat provvediment aħjar ta' edukazzjoni u livelli dejjem akbar ta' kwalifiki, b’mod partikulari fost iż-żgħażagħ, in-nisa u l-anzjani, u minoritajiet esposti għall-esklużjoni soċjali, u billi jsir investiment f’azzjonijiet kumplimentari u s-servizzi relevanti ta appoġġ u servizzi tal-komunità u servizzi ta' kura li jtejbu l-opportunitajiet ta' impjieg;

28. Jisħaq li l-opportunitajiet indaqs għan-nisa u l-irġiel għandhom jiġu promossi fl-istadji kollha tat-tfassil u tat-twettiq ta’ proġetti li jagħmlu parti mill-politika ta’ koeżjoni ta’ l-UE;

29. Jinnota li l-2007 ġiet imsejħa Sena Ewropea għall-Opportunitajiet Indaqs għal Kulħadd, u jistieden lill-Kummissjoni u lill-Istati Membri sabiex jippromwovu proġetti għall-qawmien ta’ kuxjenza dwar l-integrazzjoni sistematika tal-ġeneri fil-programmi kollha tal-Komunità, b’mod partikulari dawk b’impatt fuq il-koeżjoni ekonomika u soċjali;

30. Jistieden lill-Kummissjoni sabiex ittejjeb is-sistema wżata għall-evalwazzjoni tal-politika ta’ koeżjoni, u sabiex toħloq mezz ġdid ta' kif jitkejjel l-iżvilupp reġjonali, li ma jkunx ibbażat biss fuq il-PGD iżda wkoll fuq indikaturi oħra bħalma huma r-rati tal-qgħad u indikaturi kwantittattivi u kwalitattivi oħra, filwaqt illi tittejjeb il-metodoloġija għall-kalkolu tal-Parità ta’ Kapaċità għall-Infiq, jiġifieri permezz ta' l-iżvilupp ta' indikaturi reġjonali pjuttost milli nazzjonali;

31. Jistieden lill-Kummissjoni sabiex regolarment tipprovdilu statistiċi aġġornati, affidabbli u kumparabbli li jagħmluha possibbli li b’mod preċiż jiġi evalwat l-iżvilupp fl-ifqar reġjuni ta’ l-UE;

32. Jistieden lill-Kummissjoni sabiex tanalizza l-impatt tal-politika għall-koeżjoni u tistudja r-raġunijiet ta’ kwalunkwe riżultati negattivi tal-politiki komunitarji fir-reviżjoni ta’ nofs it-terminu ta’ l-2009 tal-baġit komunitarju, u fir-rapport li ġej dwar il-koeżjoni ekonomika u soċjali, bil-għan li jiġi żgurat li l-politika ta’ koeżjoni tkun effettiva daqskemm huwa possibbli tul il-perjodu ta' programmar ta' bejn 2007-2013;

33. Jagħti istruzzjonijiet lill-President tiegħu sabiex jgħaddi din ir-riżoluzzjoni lill-Kunsill u lill-Kummissjoni.

(1) ĠU L 210, 31.7.2006, p 25 Corrigendum ippublikat ĠU L 239, 1.9.2006, p. 248. (2) ĠU L 291, 21.10.2006, p 11 (3) ĠU C 302, 12.12.2006, p 1. (4) Testi Adotatti, P6_TA(2007)0130. (5) 492 852 386. Sors: Eurostat/Uffiċċju taċ-Ċensimenti ta’ l-Istati Uniti. (6) Sors: Eurostat, Statistiċi fil-Fokus – Ekonomija u Finanzi 17/2006.

Il-politika ta' l-UE għall-koeżjoni dieħla f'perjodu ieħor ta' programmar. Din hija l-ewwel sena tal-perjodu ta’ perspettiva finanzjarja 2007-2013 li fiha japplikaw regolamenti ġodda tal-politika għall-koeżjoni. Ġew adottati linji gwida strateġiċi, u l-linji ġenerali tal-politika ġew stipulati. Issa wasal iż-żmien li jiġu mressqa rakkomandazzjoni xierqa bil-għan li l-politika l-ġdida għall-koeżjoni tkun effettiva kemm jista’ jkun. Fuq il-bażi ta’ l-istatistiċi li juru l-impatt li kellha l-politika għall-koeżjoni s’issa u b’għarfien tal-problemi li żammew lil xi pajjiżi milli jgawdu b’mod sħiħ mill-benefiċċji tal-fondi strutturali fil-passat, dan ir-rapport b’inizjattiva proprja qed jipprova jiżgura li l-politika għall-koeżjoni tkun effettiva kemm jista’ jkun fil-perjodu ta’ programmazzjoni 2007-2013, sabiex l-impatt tagħha jkun viżibbli u perċettibbli kemm jista’ jkun, b’mod partikulari fl-ifqar reġjuni ta’ l-UE.

Huwa importanti ħafna li jitpoġġa enfasi fuq il-prinċipji li fuqhom l-Istati Membri u l-UE jistgħu jibbażaw azzjoni sabiex titjieb l-effettività tal-politika ta’ koeżjoni fl-ifqar reġjuni u sabiex jiġu żgurati l-aħjar riżultati possibbli mil-lat ta’ koeżjoni soċjali, ekonomika u territorjali f’dawn ir-reġjuni. Diġà ġew ippjanati l-fondi għar-reġjuni li jaqgħu taħt l-Objettiv ta’ Konverġenza fil-perspettiva finanzjarja 2007-2013, u issa jrid jiġi żgurat li l-fondi fil-fatt jinġabru bil-għan li l-ifqar reġjuni mill-inqas jilħqu l-livell medju ta’ żvilupp għall-UE tas-27. Dan għandu jagħmilha possibbli li d-differenzi bejn l-ogħna u l-ifqar reġjuni ta’ l-UE, li bħalissa huma enormi, biż-żmien jitnaqqsu.

Ħafna mill-ifqar reġjuni jinsabu fl-Istati Membri l-ġodda, li sikwit m'għandhomx il-kapaċità amministrattiva, il-ħiliet u l-esperjenza meħtieġa sabiex jagħmlu użu mill-fondi disponibbli. Dan ir-rapport fih numru ta’ rakkomandazzjonijiet u rimarki mmirati sabiex itejbu t-teħid u l-użu tal-fondi strutturali, u b’hekk jinkiseb żvilupp sostenibbli fl-ifqar reġjuni.

L-għan ewlieni tal-politika ta’ koeżjoni ta’ l-UE hu li jonqsu d-differenzi fl-iżvilupp fost ir-reġjuni; l-iżvilupp mgħaġġel ta’ l-ifqar reġjuni huwa fl-interess ta’ l-Unjoni kollha kemm hi. Bħalissa, 100 minn dawk li huma meqjusa bħala l-ifqar reġjuni – jiġifieri dawk li l-PGD tagħhom ras għal ras huwa ta’ inqas minn 75% tal-medja ta’ l-UE - jaqgħu taħt l-Objettiv ta’ Konverġenza tal-politika ta’ koeżjoni.

Id-differenzi bejn ir-reġjuni mil-lat ta’ PGD ras għal ras huma kbar ħafna, u huma ogħla fl-UE tas-27 milli kienu fl-UE tal-15. Dawn id-differenzi jidhru fit-Tabella 1 hawn taħt.

Tabella 1: PGD reġjonali ras għal ras fl-UE tas-27 – figuri ta’ l-2004 figures (f’PPS, l-UE tas-27 = 100)

Sors: Stqarrija għall-aħbarijiet 23/2007ta’ l-Eurostat – 19 ta’ Frar 2007.

Il-figuri t’hawn fuq ippubblikati mill-Eurostat juri li hemm qabża enormi fl-iżvilupp bejn l-ogħna u l-ifqar reġjuni ta’ l-UE, filwaqt li l-parti l-kbira ta’ l-ifqar reġjuni jinsabu fl-Istati Membri taċ-ċentru u ta’ l-lvant ta’ l-Ewropa, li ssieħbu ma’ l-Unjoni fl-aħħar żewġ tkabbiriet (2004 u 2007).

Din is-sitwazzjoni titlob għal azzjoni serja sabiex jitnaqqsu d-differenzi bejn l-ogħna u l-ifqar reġjuni. Bil-għan li jkun possibbli għalihom li jkollhom żvilupp bilanċjat, ir-reġjuni li għadhom lura mil-lat ta’ żvilupp, li għaddejjin minn ristrutturar jew li jsofru minn żvantaġġi ġeografiċi, ekonomiċi u soċjali speċifiċi, għandhom, flimkien mal-fondi disponibbli, jingħataw assistenza teknika sabiex ikunu jistgħu jiffaċċjaw id-diffikultajiet proċedurali ta' l-implimentazzjoni tal-politika ta’ koeżjoni ta’ l-UE.

Il-politika ta’ koeżjoni għamlitha possibbli li reġjuni ta’ l-UE li qabel kienu fqar jilħqu livell sodisfaċenti ta’ żvilupp. Bl-għajnuna tal-fondi strutturali u ta’ koeżjoni, l-erba’ pajjiżi li qabel kienu magħrufa bħala l-‘pajjiżi tal-koeżjoni’ (l-Irlanda, il-Greċja, il-Portugall u Spanja) esperjenzaw livelli notevoli ta’ tkabbir ekonomiku.

Tabella 2:

Il-progress li sar mill-pajiżi ta’ koeżjoni mil-lat ta’ PGD ras għal ras (EU =100)

                                  Spanja Portugall      Greċja Irlanda

Sors: It-Tlaħħiq fl-Ewropa: L-esperjenzi tal-Portugall, Spanja u l-Ġreċja fis-snin disgħin, Karl Aiginger; Dokumenti ta’ ħidma tad-WIFO (Österreichisches Institut für wirtschaftsforschung), Nru 212, Diċembru 2003, p. 4.

In-nuqqas ta’ statistiċi komprensivi jew kumparabbli biżżejjed dwar l-iżvilupp fl-ifqar reġjuni qed iwaqqaf il-possibilità li ssir analiżi preċiża tal-kontribut tal-fondi strutturali għall-iżvilupp reġjonali. Madankollu, analiżi ġenerali tal-figuri tal-PGD turi li fil-perjodu bejn "is-snin sittin u l-2002, il-PGD ta’ Spanja kiber minn 60.76% għal kważi 85% tal-medja komunitarja, dak tal-Portugall kiber minn 40% għal 69%, dak tal-Greċja kiber minn 44% għal 66%, filwaqt li dak ta' l-Irlanda kiber minn 65% għal 122%.

Fuq il-bażi ta’ dawn l-eżempji pożittivi, wieħed jista’ jassumi li l-Istati mebri li jaqgħu taħt l-Objettiv ta’ Konverġenza attwali, min-naħa tagħhom, ser japprofittaw mill-opportunitajiet li qed toffrilhom il-politika l-ġdida għall-koeżjoni, b’mod partikulari għaliex minkejja li l-PGD tagħhom huwa aktar baxx mill-medja ta’ l-UE, għandhom rata ta’ tkabbir ekonomiku li hija ogħla sew mill-medja ta’ l-UE, u għaldaqstant juru potenzjalment kbir ta’ żvilupp.

Tabella 3:

Rata reali tat-tkabbir tal-PGD

Rata tat-tkabbir tal-PGD – bidla fil-persentaġġi mis-sena preċedenti

(il-figuri għall-2006, l-2007 u l-2008 huma tħabbiriet)

1997 -98 -99 -00 -01 -02 -03 -04 -05 -06 -07 -08

Sors: Eurostat

Kif jidher f’Tabella 3, iż-żewġ pajjiżi li ssieħbu ma’ l-UE fl-2007 – il-Bulgarija u r-Rumanija – juri potenzjal partikularment kbir għal tkabbir ekonomiku. Jekk dan il-potenzjal għandu jiġi mwettaq b’mod sħiħ, jeħtieġ isiru, l-ewwel u qabel kollox, il-preparamenti xierqa, u dan jinkludi amministrazzjoni effettiva.

Madankollu, l-istatistiċi għat-teħid tal-fondi tul il-perjodu tas-sentejn inizjali juru li, minkejja li nkiseb progress ekonomiku kbir, l-Istati Membri li ssieħbu fl-2004 naqsu milli jagħmlu użu sħiħ tal-fondi disponibbli għalihom sa l-2006, prinċipalment minħabba dik li tista' tissejjaħ ineffiċjenza amministrattiva.

Tabella 4:

Sors: Preżentazzjoni ta’ Dalia Grybauskaitė, Kummissarju Responsabbli mill-Programmar Finanzjarju u l-Baġit, Brussell, 21 ta’ Settembru 2006

Hemm numru kbir ta’ eżempji li juru kif l-Istati Membri l-ġodda naqsu milli jagħmlu użu mill-fondi disponibbli. L-ifqar reġjuni għandhom it-tendenza li jkollhom l-akbar diffikultajiet sabiex jieħdu l-fondi. L-awtoritajiet f’dan ir-reġjuni sikwit ma jkollhomx il-ħiliet, l-esperjenza u l-fondi proprji meħtieġa sabiex jiffaċċjaw ir-rekwiżiti kumplikati tal-politika ta’ koeżjoni, u għaldaqstant ma jkunux jistgħu jagħmlu talba għall-fondi li huma, fil-prinċipju, huma intitolati għalihom.

Jeħtieġ li wieħed jisħaq li l-kapaċità istituzzjonali hija prekundizzjoni essenzjali għat-twettiq b'suċċess tal--rogrammi u tal-proġetti u għall-iżvilupp tar-riżorsi umani. Tul iż-żmien ta' l-għajnuna ta’ qabel is-sħubija, diversi programmi wrew numru kbir ta’ nuqqasijiet istituzzjonali, maniġerjali u amministrattivi min-naħa tal-benefiċjarji. Dawn in-nuqqasijiet ma ġewx kompletament megħluba, iżda jridu jiġi indirizzati fil-futur qarib ħafna sabiex il-fondi jiġu investiti u minfuqa tajjeb.

Għaldaqstant jeħtieġ ikun hemm:

- amministrazzjoni aħjar, sabiex tagħmilha possibbli għar-reġjuni li jieħu l-għajnuna u li jużawha effettivament;

- assistenza teknika, b’mod partikulari għall-preparazzjonijiet għat-twettiq ta’ proġetti ġodda;

- kwalità, kemm esterna fis-sura ta’ għarfien espert, kif ukoll interna, sabiex wieħed ikun jista’ jagħraf x'inhu meħtieġ verament;

- kontrolli tal-kwalità tal-proġetti u ta’ l-infiq, u evalwazzjoni tas-sostenibilità tal-proġetti li diġà ġew implimentati.

Huwa wkoll importanti li l-fondi jitwasslu b’ħeffa lir-reġjuni eliġibbli. Xi drabi l-fondi jdumu wisq sabiex jaslu għand il-benefiċjarju, u dan iwassal għal spiża akbar tal-proġetti. It-twassil tal-fondi jrid ikun ibbażat fuq regoli trasparenti u kriterji ċari.

Huwa diffiċli li jiġu evitati mekkaniżmi kumplessi għall-implimentazzjoni tal-fondi strutturali, li fuqhom jagħmlu impatt tliet livelli differenti ta’ regolamentazzjoni, jiġifieri r-regoli komunitarji, l-oqsfa nazzjonali u l-prattiki reġjonali. Is-simplifikar tal-proċeduri hija kwistjoni li trid tiġi indirizzati fil-livelli kollha, sabiex tiġi evitata kwalunkwe interpretazzjoni sussegwenti u sabiex jiġi faċilitat u mħaffef it-twettiq tal-programmi.

L-immaniġġjar sod tal-fondi strutturali jitlob ukol għal koordinazzjoni fid-diversi livelli (politiku, tekniku u aministrattiv). Din hija problema urġenti b’mod partikulari għall-Istati Membri l-ġod, fejn jeħtieġ li tittieħed azzjon aktar effettiva. Id-diskussjonijiet biex tiġi żgurata l-koerenza bejn l-UE, l-Istati Membri, ir-reġjuni u l-lokalitajiet huma essenzjali, u l-ebda qasam ta' ggvernar m'għandu jitħalla barra minn dan id-djalogu strutturat.

Il-politika ta’ koeżjoni m'għandhiex x'taqsam biss ma' finanzjament. iżda hija wkoll dwar sħubiji bejn id-diversi partijiet interessati. L-azzjoni u l-koperazzjoni fuq livell wieħed mhumiex biżżejjed sabiex jissaħħaħ l-effett ta’ lieva. Is-sħubiji u l-flussi tajba ta’ informazzjoni għaldaqstant huma partikularment neċessari. Barra minn hekk, jeħtieġ jiġi stabbilit qafas li fih ikun jistgħu isiru l-interazzjonijiet neċessarji, jeħtieġ tiġi mwaqqfa sistema ta’ skambji ta’ esperjenzi. Dan jista’ jwassal għall-introduzzjoni ta’ regoli u standards li jtejbu l-kapaċitajiet amministrattivi b’konnessjoni ma’ l-implimentazzjoni tar-regoli u r-regolamenti.

It-tkabbir ekonomiku għandu tendenza li jkun konċentrat madwar ċerti zoni. Dan jidher ċar b’mod partikulari fil-pajjiżi taċ-ċentru u ta’ l-lvant ta’ l-Ewropa li għandhom reġjuni tal-bliet kapitali li qed jikbru b’rata mgħaġġla. It-tkabbir urban u l-kompetittività dejjem akbar jistgħu b’ħafna modi jservu ta’ katalista għall-iżvilupp tal-komunitajiet rurali ta’ madwarhom. Madankollu jibqa’ l-fatt li f’xi reġjuni jeżisti nuqqas ta’ tkabbir ekonomiku. Barra minn dan, anke l-qliebi ta’ l-iżvilupp infushom – il-bliet – għandhom l-problemi tagħhom fil-kwartieri l-fqar tagħhom, u għaldaqstant, politika urbana effettiva għandha tindirizza wkoll il-problemi tal-kwartieri mitluqa u l-esklużjoni soċjali. Barra minn dan, ir-reġjuni li jsofru minn faqar ekonomiku b’riżultat ta’ nuqqas ta’ infrastruttura bażika, aċċess ristrett għas-servizzi pubbliċi u rata għolja ta’ qgħad qed tonqsilhom il-popolazzjoni b’rata aktar mgħaġġla minn reġjuni oħra, u jeħtieġu politika li tippromwovi l-intraprenditorija u tħares il-bażi tal-popolazzjoni ta’ dan it-tip ta’ reġjuni, bil-għan li jinkiseb tkabbir ġenwin.

It-tħaffif tat-tkabbir ekonomiku fl-ifqar reġjuni huwa prekundizzjoni essenzjali għall-kisba u ż-żamma ta’ standards ta’ għixien għolja fl-Unjoni. Il-konverġenza reġjonali fi ħdan l-UE għandha importanza kruċjali jekk l-Unjoni trid tkun kompetittiva u b’saħħitha globalment fil-ġejjieni qarib. Madankollu hemm riskju li l-impatti tal-politika jonqsu jekk ir-reġjuni li qed jiffaċċjaw diffikultajiet fl-iżvilupp ikomplu jibqgħu lura, u b’hekk jikber il-volum ta’ l-infiq.

Il-ħtiġijiet speċifiċi ta’ l-ifqar reġjuni iridu jiġu identifikati u jeħtieġ jinstabu mezzi xierqa sabiex ikabbru l-iżvilupp tagħhom billi jużaw ir-riżorsi naturali, il-beni kulturali u l-ambjent tagħhom, fiwaqt li jagħtu l-attenzjoni kif jixraq lill-ħarsien u lill-iżvilupp tagħhom. Ir-rekwiżit fundamentali hu li jiġu stabbiliti l-ħtiġijiet ewlenin ta’ kull reġjun u li jiġu ffokati l-fondi fuq l-objettivi t-tajba.

Għall-pajjiżi ta’ koeżjoni, jeħtieġ li tinħoloq infrastrutturali għal aktar investimenti. Ma teżisti l-ebda kontradizzjoni inerenti bejn il-kompetittività u l-għan tal-koeżjoni; madankollu, huwa essenzjali li wieħed jifhem iċ-ċirkustanza li fihom l-effett ta’ lieva jagħti spinta lit-tkabbir. Sabiex jintlaħaq livell speċifiku ta’ kompetittività, ir-reġjuni fqar jeħtieġ li jkollhom infrastruttura bażika li tkun żviluppata biżżejjed. L-investiment fl-edukazzjoni u fil-bini tal-kapital uman fl-ifqar reġjuni huwa importanti wkoll għax ir-riżorsi umani għanhom influwenza deċiżiva fuq, fost affarijiet oħra, il-ħila ta’ reġjun li jattira l-investituri u li jiggarantixxi tkabbir ġejjien.

Hemm bżonn fundamentali li jsir aktar użu minn sħubiji pubbliċi-privati (PPPs) u li dawn jiġu promossi bil-għan li jiżviluppaw l-ifqar reġjuni. Ir-regoli li jiggvernaw l-implimentazzjoni tal-PPPs jeħtieġ li jiġu stipulati, u l-ostakoli li jsibu jeħtieġ li jitnaqqsu. Hemm nuqqas ta’ prattiki tajba fl-Istati Membri l-ġodda, u l-involviment tal-kapital privat għandu importanza kruċjali għall-ġenerazzjoni ta’ aktar investimenti. L-appoġġ finanzjarju għandu jintefaq b’mod trasparenti sabiex ikun possibbli li jiġi żgurat li dan l-appoġġ jgħin sabiex jintlaħqu l-objettivi li saru.

Jaspers, Jeremie u Jessica huma mezzi eċċellenti ta’ appoġġ, inter alia, għall-SMEs fil-livell reġjonali, iżda l-Istati Membri u l-Kummissjoni jeħtieġ li jagħmlu aktar sabiex jippromwovuhom, biex jiżguraw użu sħiħ u effettiv ta’ dawn l-inizjattivi, b’mod partikulari fl-ifqar reġjuni.

L-iżvilupp ekonomiku huwa marbut mill-qrib ma’ l-innovazzjoni, li hija fattur kruċjali ta' l-iżvilupp reġjonali. Il-politika ta’ koeżjoni ta’ l-UE, taħt l-istrateġija ta’ Liżbona, trid tkun immirata lejn iż-żieda tal-kapaċità ta’ l-innovazzjoni ta’ l-UE, u għaldaqstant huwa importanti għall-ifqar reġjuni li ma jiġu minsija fl-isforzi għall-kisba ta’ dan l-għan. Fattur importanti għall-promozzjon ta' l-innovazzjoni hija leġiżlazzjoni ta' kwalita aħjar fil-pajjiżi ta' l-UE, li għandha trawwem, aktar milli tibblokkja, proċessi ta' innovazzjoni f'setturi importanti ta' l-ekonomija. L-ifqar reġjuni aktarx ikunu l-iktar vulnerabbli f'dan ir-rigward.

Appoġġ attiv għall-intraprenditorija huwa importanti għal żvilupp sostenibbli fl-ifqar reġjuni, u dan jitlob għall-involviment tal-partijiet kollha interessati. L-intraprenditorija għandha tiġi promossa b’mod partikulari fost in-nisa u l-persuni deħlin fis-suq tax-xogħol, kif ukoll gruppi li huma soċjalment esklużi.

Jeħtieġ ikun hemm sinerġija bejn il-politiki kemm fil-livell Ewropew kif ukoll fil-livell nazzjonali. Il-politiki għandhom jikkumplimentaw lil xulxin u mhux jaħdmu kontra xulxin. Pereżempju, il-konċentrazzjoni tal-benefiċċji ta’ politiki oħra f’pajjiżi u f’reġjuni speċifiċi jistgħu inaqqsu l-impatt tal-politiki għall-iżvilupp. L-iżvilupp reġjonali jrid ikollu wkoll dimensjoni soċjali u ambjentali. Għaldaqstant, sabiex jingħataw spinta il-koeżjoni u l-iżvilupp effettiv fl-ifqar reġjuni, il-partijiet interessanti kollha jeħtieġ li jiġu mobilizzati u involuti b’mod sħiħ.

L-impatt ta' kwalunkwe problemi bejn il-politiki għandhom jitqiesu u jiġu analizzati fir-reviżjoni intermedja ta' l-2009 tal-Baġit Komunitarju u fir-raba' rapport dwar il-koeżjoni ekonomika u soċjali.

Minkejja li l-PGD huwa indikatur tajjeb tal-konverġenza ekonomika reġjonali, mhuwiex mezz adegwat għall-kejl tal-koeżjoni soċjali jew territorjali. Pereżempju, f’uħud mir-reġjuni l-fqar, it-tkabbir ekonomiku huwa sodisfaċenti iżda r-rata għolja ta’ qgħad hija problema, u dan qed ikollu impatt negattiv fuq l-iżvilupp demografiku tar-reġjuni. għaldaqstant huwa essenzjali li jiġu meqjusa indikaturi oħra sabiex tinħoloq stampa ċara tal-ħtiġijiet veri ta’ l-ifqar reġjuni. Id-diskussjonijiet tar-raba’ rapport dwar il-koeżjoni għandu jinkludi dibattitu dwar l-indikaturi tal-koeżjoni u kif għandu jitkejjel l-iżvilupp reġjonali.

Il-qgħad – li qed jolqot l-aktar lill-ifqar reġjuni – irid jiġi miġġieled. L-eżistenza tal-qgħad fuq medda twila ta’ żmien fost ċerti gruppi soċjali huwa partikolarment preokkupanti, bħalma hija preokkupanti l-problema direttament relatata ta’ l-esklużjoni soċjali. Bil-għan li tinkiseb koeżjoni soċjali, iridu jsiru wkoll sforzi sabiex jiżguraw l-aħjar integrazzjoni possibbli ta’ persuni b’diżabilitajiet. L-opportunitajiet indaqs għan-nisa u għall-irġiel fis-suq tax-xogħol huma wkoll fattur essenzjali tal-koeżjoni soċjali fi ħdan l-UE. Għad hemm differenzi sinjifikanti fis-salarji bejn l-irġiel u n-nisa, u dan ixekkel it-tkabbir ekonomiku. Attenzjoni lid-differenzi relatati mal-ġeneri ser ittejjeb l-effettività ta’ l-implimentazzjoni tal-politika għal-koeżjoni u tippermetti li jitwettqu proġetti li jkunu ħielsa mid-diskriminazzjoni tal-ġeneri u tagħmilha possibbli li jintlaħaq bilanċ bejn il-ħajja tal-familja u x-xogħol.

Hemm bżonn tiġi provduta informazzjoni dwar il-ħtieġa u l-mezzi ta’ implimentazzjoni ta’ approċċ ta’ ugwaljanza tal-ġeneri waqt l-implimentazzjoni u l-evawazzjoni ta’ programmi u proġetti, filwaqt li jsir użu aħjar mill-ustudji u l-analiżijiet eżistenti. Dawn il-prinċipji jistgħu jitpoġġew fil-prattika, pereżempju billi jiġi żgurat baġitjar tajjeb mil-lat ta' ġeneri (pereżempju billi jiġi ċċekkjat jekk il-baġit ikoprix b'mod xieraq miżuri dwar opportunitajiet indaqs), il-qawmien ta’ kuxjenza dwar il-ġeneri fost l-imsieħba soċjali u l-parteċipanti relevanti, u billi tiġi żgurata d-disponibilità ta’ ħiliet speċjalizzati relatati mal-ġeneri. Approċċ intelliġenti fir-rigward tal-kwistjonijiet tal-ġeneri fil-ħajja soċjali u ekonomika u l-evitar ta’ kwalunkwe sterjotipar ta’ rwoli soċjali msejsa fuq il-ġeneru għandhom importanza essenzjali sabiex jagħmlu l-politika ta’ koeżjoni aktar effettiva.

Sabiex jissolvew il-problemi li qed jikkumbattu magħhom l-ifqar reġjuni ta’ l-UE, huwa meħtieġ programm bilanċjat imfassal għall-fatturi speċifiċi tagħhom. L-awtoritajeit responsabbli għat-tfassil ta’ pjanijiet plurijennali għandhom jagħtu attenzjoni, l-ewwelu qabel kollox, għas-sostenibilità tal-proġetti mwettqa u l-impatt tagħhom fuq l-iżvilupp reġjonali. Għandha tingħata prijorità lil proġetti relatati ma’ l-aċċessibilità reġjonali u, għaldaqstant, għat-trasport u għall-infrastrutturi ta’ l-IT u t-telekomunikazzjonijiet. Il-ħolqien ta’ pjattaforma msejsa fuq l-inċentivi ekonomiċi xierqa ser iżid il-ħila ta’ reġjun partikulari li jattira l-investituri u jġib tkabbir ekonomiku sostenibbli li jgħin sabiex jonqsu d-differenzi fl-iżvilupp.