RAPPORT dwar djalogu attiv maċ-ċittadini dwar l-Ewropa

MOZZJONI GĦAL RIŻOLUZZJONI TAL-PARLAMENT EWROPEW

NOTA SPJEGATTIVA

OPINJONI tal-Kumitat għall-affarijiet kostituzzjonali (26.1.2009)

OPINJONI tal-Kumitat għall-Affarijiet Barranin (12.2.2009)

OPINJONI tal-Kumitat għas-Suq Intern u l-Ħarsien tal-Konsumatur (23.1.2009)

OPINJONI tal-Kumitat għall-Iżvilupp Reġjonali (13.2.2009)

OPINJONI tal-Kumitat għad-Drittijiet tan-Nisa u l-Ugwaljanza bejn is-Sessi (20.1.2009)

OPINJONI tal-Kumitat għall-Petizzjonijiet (11.2.2009)

RIŻULTAT TAL-VOTAZZJONI FINALI FIL-KUMITAT

26.2.2009 - (2008/2224(INI))

Kumitat għall-Kultura u l-Edukazzjoni
Rapporteur: Gyula Hegyi
Rapporteur għal opinjoni (*):
Sylvia-Yvonne Kaufmann, Kumitat għall-Affarijiet Kostituzzjonali
(*) Kumitat Assoċjat – Artikolu 47 tar-Regoli ta' Proċedura

Proċedura : 2008/2224(INI)

Ċiklu ta' ħajja waqt sessjoni

Ċiklu relatat mad-dokument :

A6-0107/2009

Testi mressqa :

A6-0107/2009

Dibattiti :

PV 23/03/2009 - 23
CRE 23/03/2009 - 23

Votazzjonijiet :

PV 24/03/2009 - 4.9
CRE 24/03/2009 - 4.9
Spjegazzjoni tal-votazzjoni
Spjegazzjoni tal-votazzjoni

Testi adottati :

P6_TA(2009)0154

MOZZJONI GĦAL RIŻOLUZZJONI TAL-PARLAMENT EWROPEW
NOTA SPJEGATTIVA
OPINJONI tal-Kumitat għall-affarijiet kostituzzjonali
OPINJONI tal-Kumitat għall-Affarijiet Barranin
OPINJONI tal-Kumitat għas-Suq Intern u l-Ħarsien tal-Konsumatur
OPINJONI tal-Kumitat għall-Iżvilupp Reġjonali
OPINJONI tal-Kumitat għad-Drittijiet tan-Nisa u l-Ugwaljanza bejn is-Sessi
OPINJONI tal-Kumitat għall-Petizzjonijiet
RIŻULTAT TAL-VOTAZZJONI FINALI FIL-KUMITAT

dwar djalogu attiv maċ-ċittadini dwar l-Ewropa

(2008/2224(INI))

Il-Parlament Ewropew,

- wara li kkunsidra d-Dikjarazzjoni Konġunta tal-Parlament Ewropew, il-Kunsill u l-Kummissjoni "Nikkomunikaw l-Ewropa fi Sħubija' iffirmata fit-22 ta' Ottubru 2008,

- wara li kkunsidra l-Komunikazzjoni mill-Kummissjoni tat-2 ta' April 2008 'Niddibattu l-Ewropa – Nibnu fuq l-Esperjenza tal-Pjan D għad-Demokrazija, id-Djalogu u d-Dibattitu' (Pjan D) (COM(2008)0158),

- wara li kkunsidra l-Komunikazzjoni mill-Kummissjoni tal-24 ta' April 2008 'Komunikazzjoni tal-Ewropa permezz ta' mezzi tax-xandir awdjoviżivi', SEC(2008) 0506),

- wara li kkunsidra l-Komunikazzjoni mill-Kummissjoni tal-21 ta' Diċembru 2007 'Nikkomunikaw dwar l-Ewropa permezz tal-Internet – Ninvolvu liċ-ċittadini' (SEC(2007)1742),

- wara li kkunsidra d-dokument ta' ħidma tal-Kummissjoni tat-3 ta' Ottubru 2007 'Proposta għal ftehima Inter-Istituzzjonali dwar Nikkomunikaw l-Ewropa fi Sħubija' (COM(2007)0569),

- wara li kkunsidra d-Deċiżjoni Nru 1904/2006/KE tal-Parlament Ewropew u tal-Kunsill tat-12 ta' Diċembru 2006 li tistabbilixxi għall-perjodu 2007 sal-2013 il-programm 'L-Ewropa għaċ-Ċittadini' biex tkun promossa ċittadinanza Ewropea attiva[1],

- wara li kkunsidra l-Komunikazzjoni mill-Kummissjoni tal-1 ta' Frar 2006 'White Paper dwar Politika Ewropea ta' Komunikazzjoni', (COM(2006) 0035),

- wara li kkunsidra l-Komunikazzjoni mill-Kummissjoni tat-13 ta' Ottubru 2005 "Il-kontribut tal-Kummissjoni għall-perjodu ta' riflessjoni u lil hinn minnu: il-Pjan D għad-Demokrazija, id-Djalogu u d-Dibattitu' (COM(2005)0494),

- wara li kkunsidra r-riżoluzzjoni tiegħu tas-16 ta’ Novembru 2006 dwar il-White Paper dwar politika ta' komunikazzjoni Ewropea[2],

- wara li kkunsidra r-riżoluzzjoni tiegħu tat-12 ta' Mejju 2005 dwar l-implimentazzjoni tal-istrateġija ta' informazzjoni u ta' komunikazzjoni tal-Unjoni Ewropea[3],

- wara li kkunsidra r-Regola 45 tar-Regoli ta’ Proċedura tiegħu,

- wara li kkunsidra r-rapport tal-Kumitat għall-Kultura u l-Edukazzjoni u l-opinjonijiet tal-Kumitat għall-Affarijiet Kostituzzjonali, il-Kumitat għall-Affarijiet Barranin, il-Kumitat għas-Suq Intern u l-Protezzjoni tal-Konsumatur, il-Kumitat għall-Iżvilupp Reġjonali, il-Kumitat għad-Drittijiet tan-Nisa u l-Ugwaljanza bejn is-Sessi kif ukoll il-Kumitat għall-Petizzjoni (A6-0107/2009),

A. billi Unjoni Ewropea demokratika u trasparenti tiddependi mill-progress tad-djalogu bejn iċ-ċittadini u l-istituzzjonijiet Ewropej, inkluż il-Parlament, iżda wkoll mid-dibattitu kostanti dwar l-Ewropa fil-livell Ewropew, nazzjonali u lokali,

B. billi wara li ġie miċħud it-Trattat Kostituzzjonali fi Franza u fl-Olanda, 53.4% tal-poplu Irlandiż ivvota f'referendum kontra r-ratifikazzjoni tat-Trattat ta' Liżbona u billi nies li jifhmu b'mod adegwat il-politiki tal-Unjoni Ewropea u t-Trattati x'aktarx li jopponuhom aktar,

C. billi l-istħarriġ tal-Ewrobarometru 69 wera li 52% taċ-ċittadini tal-Unjoni jemmnu b'mod ċar li s-sħubija ta' pajjiżhom mal-UE hija ħaġa tajba, filwaqt li huma biss 14% li jemmnu bil-kontra,

D. billi l-għarfien tal-Unjoni Ewropea, kemm tal-politiki tagħha u kif taħdem, kif ukoll tad-drittijiet garantiti mit-Trattati, huwa fundamentali sabiex iċ-ċittadini jerġgħu jiksbu l-fiduċja fl-istituzzjonijiet Ewropej,

E. billi Kummissarju separat għall-istrateġija tal-komunikazzjoni kien maħtur għall-ewwel darba fl-2004, għalkemm l-ebda politika ta' komunikazzjoni bħala tali għadha ma ġiet adottata minħabba n-nuqqas ta' bażi legali xierqa fit-Trattati,

L-opinjoni pubblika

1. Ifakkar li l-eżerċizzji ta' stħarriġ juru li anqas ma ċittadin tal-Unjoni jkun edukat u anqas ma jkun għani, aktar ikun hemm il-possibilità li jopponi li sseħħ aktar integrazzjoni Ewropea, ħaġa li tindika li l-idea Ewropea, minkejja l-isforzi kollha preċedenti, prinċipalment tilħaq lill-parti tas-soċjetà Ewropea li hi edukata tajjeb u għanja; iqis djalogu attiv bejn l-Unjoni Ewropea u ċ-ċittadini tagħha bħala essenzjali biex iwettaq fil-prattika l-prinċipji u l-valuri tal-proġett tal-Unjoni Ewropea, iżda jagħraf li s’issa m'għamilx suċċess kbir;

2. Jiddispjaċih għall-fatt li, minkejja l-isforzi u l-ideat tajba tal-Kummissjoni, is-suċċess miksub fiż-żieda tal-livell ta' għarfien u interess taċ-ċittadini Ewropej fi kwistjonijiet Ewropej kien limitat ħafna, xi ħaġa li sfortunatament dehret fir-referendum Irlandiż;

3. Jenfasizza l-importanza partikolari tal-ħolqien ta' kollegamenti koeżivi ta' komunikazzjoni b'kontenut maħsub għal udjenzi partikolari kemm bejn l-UE u r-reġjunijiet b'karatteristiċi partikolari kif ukoll bejn l-UE u gruppi soċjali partikolari;

4. Jinnota li, skont stħarriġ riċenti tal-opinjoni pubblika, il-maġġoranza l-kbira tal-Ewropej huma favur li l-Unjoni Ewropea titkellem b'leħen wieħed dwar kwistjonijiet ta' politika barranija; jenfasizza l-fatt li ġiet inkluża stqarrija dwar dan b'talba taċ-ċittadini Ewropej fl-ittra miftuħa/rakkomandazzjonijiet mill-parteċipanti fil-konferenza ta' konklużjoni tas-sitt proġetti taċ-ċittadini tal-"Pjan D" fid-9 ta' Diċembru 2007; jenfasizza li 27 rakkomandazzjoni stipulati f'din l-ittra miftuħa jinkludu wkoll sejħa għall-Unjoni biex tieħu azzjoni aktar effettiva fil-qasam tal-politika soċjali u l-koeżjoni soċjali, b'mod partikulari bil-għan li jitnaqqsu d-disparitajiet bejn il-pagi u titrawwem l-ugwaljanza bejn l-irġiel u n-nisa, u, b'mod aktar ġenerali, biex tingħata attenzjoni speċifika għall-kwistjonijiet marbuta mal-ugwaljanza, li ta' spiss huma minsija; jissuġġerixxi li huwa importanti għalhekk li tingħata ħarsa lejn x’qegħdin jikkomunikaw l-azzjonijiet u jitqabbel kif dan qiegħed ivarja mill-messaġġ li l-UE trid twassal liċ-ċittadini tagħha;

5. Jinnota li l-maġġoranza tan-nisa ivvutaw ‘le’ fl-aħħar referenda dwar l-Unjoni Ewropea: 56 % fi Franza (Flash Eurobarometer 171), 63 % fl-Olanda (id. 172) u 56% fl-Irlanda (id. 245); jemmen li wieħed mill-fatturi wara l-votazzjoni negattiva ġejja, fost l-oħrajn, minn involviment dgħajjef tal-istituzzjonijiet Ewropej fil-politiki li jikkonċernaw b’mod dirett in-nisa u li huma l-bażi ta’ inugwaljanzi persistenti bejn is-sessi, bħalma huma l-politiki fir-rigward tar-rikonċiljazzjoni bejn il-ħajja tax-xogħol u dik tal-familja u fir-rigward tal-għajnuna għall-persuni dipendenti ;

Aspetti kostituzzjonali u interistituzzjonali

6. Jisħaq fuq il-bżonn li jitlesta l-proċess tar-ratifika tat-Trattat ta' Liżbona, ħaġa li se tkompli żżid it-trasparenza tal-UE u l-involviment taċ-ċittadini fil-proċessi tat-teħid tad-deċiżjonijiet; ifakkar f'dan il-kuntest fl-opportunitajiet ġodda għal demokrazija parteċipattiva li t-Trattat ta’ Liżbona se jipprovdi, speċjalment l-inizjattiva taċ-ċittadini;

7. Jenfasizza l-bżonn għal sforzi koordinati u azzjoni konġunta mill-istituzzjonijiet tal-UE kollha u mill-Istati Membri biex jikkomunikaw maċ-ċittadini tal-UE dwar kwistjonijiet Ewropej; jilqa' b'sodisfazzjon u jieħu nota tad-Dikjarazzjoni Konġunta msemmija hawn fuq tat-22 ta' Ottubru 2008, li tistipula objettivi ċari għat-titjib tal-komunikazzjoni tal-UE min-naħa tal-Parlament Ewropew, tal-Kunsill, tal-Kummissjoni u tal-Istati Membri; huwa tal-opinjoni li jista' jkun aktar ambizzjuż, ladarba l-Parlament kien talab għal ftehima Interistituzzjonali dwar il-politika tal-komunikazzjoni bejn l-istituzzjonijiet kollha;

8. Jemmen li l-istituzzjonijiet tal-UE għandhom jibdew diskussjonijiet ulterjuri dwar l-Ewropa, u immedjatament iwettqu fil-prattika l-kunċetti stabbiliti fid-Dikjarazzjoni Konġunta msemmija hawn fuq, fil-Komunikazzjoni tal-Kummissjoni tal-1 ta' Frar 2006 u fid-Dokument ta' Ħidma tal-Kummissjoni tat-3 ta' Ottubru 2007;

9. Huwa tal-istess opinjoni bħall-Kummissjoni li demokrazija parteċipattiva tista’ tissupplimenta b’użu d-demokrazija rappreżentattiva; jenfasizza madankollu li demokrazija parteċipattiva mhux biss tfisser li wieħed jisma’ liċ-ċittadin, iżda jfisser ukoll li ċ-ċittadini jingħataw opportunitajiet reali biex jinfluwenzaw il-politika Ewropea. jiġbed l-attenzjoni li sabiex jinkisbu dawn l-għanijiet imsemmija hawn fuq, l-istituzzjonijiet għandhom ikun ħafna aktar miftuħa u jadottaw l-approċċi meħtieġa sabiex jippermettu liċ-ċittadini u l-organizzazzjonijiet tagħhom jipparteċipaw b'mod effettiv f'kull stadju meta jkun hemm dibattitu dwar kwistjonijiet tal-UE; jinnota wkoll li l-aċċess pubbliku għal dokumenti prodotti mill-istituzzjoijiet jeħtieġ li jingħata fuq bażi kemm jista’ jkun wiesgħa, minħabba li dan huwa rekwiżit essenzjali biex issir influwenza;

10. Jisħaq dwar l-importanza u l-valur tal-proċess ta' konsultazzjoni bħala għodda effettiva sabiex iċ-ċittadini jingħataw aktar setgħat billi jkunu jistgħu jagħtu l-kontribut tagħhom b'mod dirett lill-proċess politiku fil-livell tal-UE; jistieden lill-Kummissjoni biex tieħu passi ulterjuri biex ixxerred tagħrif fil-ħin dwar il-konsultazzjonijiet futuri tal-UE permezz tal-midja u forums xierqa oħra fil-livelli nazzjonali, reġjonali u lokali, biex titwessa' l-medda tal-opinjonijiet tal-partijiet interessati li jkunu ħarġu matul il-konsultazzjonijiet dwar il-leġiżlazzjoni tal-UE u biex tirreklama b'mod aktar wiesa' l-konsultazzjonijiet tal-Internet dwar il-politiki u l-inizjattivi tal-UE sabiex ikun żgurat li l-partijiet interessati kollha, speċjalment l-impriżi żgħar u ta' daqs medju u l-organizzazzjonijiet lokali mhux governattivi (NGOs) ikunu involuti fid-dibattitu; jenfasizza l-importanza tar-rappreżentanti tas-soċjetà ċivili, bħalma huma n-netwerks tal-professjonisti u tal-konsumaturi fil-livelli kollha, kemm transnazzjonali u kemm dawk lokali, li jipprovdu pjattaformi għal skambju ta' opinjonijiet infurmat dwar il-politiki tal-UE u b'hekk jikkontribwixxu għal kwalità ta' leġiżlazzjoni tal-UE aħjar; jagħraf il-problemi fl-implimentazzjoni u fl-infurzar tal-leġiżlazzjoni u jħeġġeġ lill-konsumaturi u lin-negozjanti biex jeżerċitaw id-drittijiet tagħhom u biex jirrappurtaw il-problemi attwali lill-istituzzjonijiet tal-UE;

11. Jemmen li l-istituzzjonijiet tal-UE u l-Istati Membri għandhom jikkoordinaw l-isforzi ta' komunikazzjoni tagħhom u jibnu sħubija mas-soċjetà ċivili sabiex ikunu sfruttati s-sinerġiji possibbli; jisħaq fuq il-bżonn għall-koordinazzjoni bejn l-istituzzjonijiet u x-xewqa li jinħolqu rabtiet bejn l-istazzjonijiet tat-televixin tal-Kummissjoni u tal-Parlament; jistieden lill-Kummissjoni sabiex ittejjeb il-koperazzjoni u l-koordinazzjoni bejn ir-rappreżentazzjonijiet tagħha fl-Istati Membri u l-uffiċċji tal-informazzjoni tal-Parlament; jitlob lill-Kummissjoni u lir-rappreżentanzi tal-Parlament fl-Istati Membri biex itejbu l-kooperazzjoni fir-rigward tal-konsultazzjoni maċ-ċittadini, it-tixrid tal-informazzjoni, l-għarfien u l-ideat dwar l-UE u l-għoti ta' opportunitajiet lill-votanti biex jiltaqgħu ma' MEPs eletti f'pajjiżi differenti u ma' uffiċjali tal-UE;

12. Jilqa’ b’sodisfazzjon il-fatt li l-Kummissjoni tappoġġja l-irwol tal-Parlament u tal-partiti politiċi Ewropej, u jirrikonoxxi l-bżonn li jitnaqqas id-distakk bejn il-politiki nazzjonali u Ewropej, speċjalment matul il-kampanji elettorali Ewropej;

13. Jistieden lit-tliet istituzzjonijiet ewlenin biex jikkunsidraw il-possibilità li jsiru diskussjonijiet konġunti miftuħa li jiżdiedu mad-dibattiti miftuħa tal-Parlament, li fihom jindirizzaw suġġetti li jolqtu lill-konsumaturi u l-ħajja tagħhom ta' kuljum u dan sabiex tissaħħilhom il-fiduċja fis-suq intern u fil-protezzjoni tal-konsumatur; jenfasizza li l-intergruppi tal-Parlament iwettqu bis-sħiħ l-irwol tagħhom bħala intermedjarji maċ-ċittadini'', strumenti reali ta' kollegament bejn l-isfera politika u s-soċjetà ċivili;

14. Jinnota b’sodisfazzjon li l-Kummissjoni kkunsidrat ħafna mill-ideat li l-Parlament diġà ressaq, bħall-forums taċ-ċittadini, kemm fuq livell Ewropew u kemm fuq livell nazzjonali, irwol iktar prominenti għall-organizzazzjonijiet tas-soċjetà ċivili u l-użu innovattiv ta’ mezzi ġodda tal-midja;

Ħidma lokali

15. Jistieden lill-Kummissjoni biex testendi d-djalogu tagħha fil-livelli kollha billi tadatta l-messaġġ tagħha għall-gruppi mmirati differenti skont il-kuntest soċjali li ġejjin minnu; għalhekk jipproponi li d-djalogu bejn l-Unjoni Ewropea u ċ-ċittadini tagħha għandu jissaħħaħ billi tkun ipprovduta l-istess informazzjoni, imfassla għal gruppi mmirati individwali, għal kulħadd u li tiffaċilita d-dibattitu fost u maċ-ċittadini infurmati; iqis li l-istituzzjonijiet tal-UE għandhom jinkorporaw il-konklużjonijiet tad-dibattiti lokali organizzati taħt l-awspiċju tal-Pjan D fil-politiki tagħhom, u jqisu dak li jistennew iċ-ċittadini mill-UE meta jkunu qed jiddeċiedu dwar leġiżlazzjoni ġdida;

16. Jistieden lill-Istati Membri biex iniedu kampanji effettivi ta' komunikazzjoni tal-UE fil-livelli kollha; nazzjonali, reġjonali u lokali; jistieden lill-Kummissjoni biex ixxerred l-aħjar prattiki identifikati minn kampanji ta' dan it-tip u jipproponi l-ħolqien ta' sistema ta' komunikazzjoni permanenti u interattiva bejn l-istituzzjonijiet tal-UE u ċ-ċittadini, b'kampanji frekwenti ta' natura lokali u reġjonali mill-UE, bl-assistenza tal-midja reġjonali u l-parteċipazzjoni attiva tas-soċjetà ċivili, tal-NGOs, tal-kmamar tal-kummerċ, tat-trejdunjins u tal-organizzazzjonijiet tal-professjonisti;

17. Jisħaq li l-politika ta' koeżjoni tal-UE hija l-bażi tal-integrazzjoni Ewropea u tas-solidarjetà soċjali; iqis, għaldaqstant, li ċ-ċittadini għandhom ikun konxji fil-ħajja tagħhom ta' kuljum bl-isforzi u s-suċċessi tal-politiki tal-Komunità, li jenfasizzaw il-kontribuzzjoni tal-UE u l-vantaġġi dovuti għall-proġett Ewropew komuni; jixtieq f'dan il-kuntest li l-awtoritajiet lokali jaqdu aħjar l-obbligi tagħhom tal-informazzjoni dwar l-għajnuna li jkunu rċevew mill-Unjoni Ewropea; jenfasizza wkoll li l-volontarjat ta' dawk li ġew eletti fuq livell lokali u reġjonali huwa meħtieġ għall-iżvilupp tal-informazzjoni u għall-edukazzjoni; jilqa' b'sodisfazzjon f'dan ir-rigward il-ħolqien ta' parti mill-programm Erasmus għall-politiċi fuq livell lokali u reġjonali;

18. Jenfasizza li l-involviment tal-imsieħba fit-tħejjija u l-implimentazzjoni tal-programmi operattivi, skont l-Artikolu 11 tar-Regolament Ġenerali dwar il-Fondi Strutturali (FSE) 2007-2013, jikkontribwixxi b'mod sinifikanti biex tkun promossa l-politika ta' koeżjoni tal-UE u twassalha biex tkun aktar qrib taċ-ċittadini; jenfasizza li dawn l-imsieħba għandhom opportunità unika biex jaraw personalment il-kwistjonijiet reali li l-aktar jikkonċernaw liċ-ċittadini; jistieden għalhekk, lill-Kummissjoni biex tiżgura li l-prinċipju tas-sħubija jkun implimentat b'mod ġust fil-livell nazzjonali, reġjonali u lokali; jenfasizza l-importanza għall-awtoritajiet nazzjonali u reġjonali biex jagħmlu użu mill-possibilitajiet finanzjarji eżistenti pprovduti mill-FSE (ESF), sabiex jitjiebu l-ħiliet ta' dawn l-imsieħba, speċjalment fir-rigward tat-taħriġ; jinnota l-irwol sinifikanti li kellhom il-fondi strutturali biex ikattru l-koperazzjoni transkonfinali permezz ta' proġetti u programmi tal-komunità, li ħeġġeġ l-iżvilupp ta' ċittadinanza attiva u demokrazija parteċipattiva; jistieden lill-Kummissjoni biex tkompli tappoġġja u taħdem fi sħubija ma' proġetti u programmi ta' dan it-tip;

19. enfasizza l-bżonn, fil-kuntest tal-elezzjonijiet Ewropej li ħa jsiru dalwaqt, għall-informazzjoni f'livell lokali u reġjonali għal ċittadini, speċjalment għaż-żgħażagħ u dawk li ħa jivvutaw għall-ewwel darba; f'kuntest iktar ġenerali, jenfasizza l-importanza tal-involviment tal-MEPs, flimkien mal-uffiċjali eletti fuq livell lokali u reġjonali, fil-proċess ta' konsultazzjoni maċ-ċittadini fir-reġjuni tagħhom, minħabba li huma l-vuċi tal-pubbliku fl-UE; jappoġġja l-isforzi tal-Kumitat tar-Reġjuni biex isaħħaħ il-konsultazzjoni f'livell reġjonali u biex jinkludi netwerks reġjonali u parteċipanti lokali u reġjonali prinċipali f'dan il-proċess sabiex jinkoraġġixxi dibattitu iktar qrib iċ-ċittadini, b'tali mod illi wieħed ikun jaf l-opinjonijiet u l-interessi tagħhom;

20. Jisħaq fuq il-ħtieġa li Membri tal-Parlament jinvolvu ruħhom aktar mill-qrib fil-proċess ta' komunikazzjoni maċ-ċittadini tal-Unjoni Ewropea u li jsiru aktar bidliet għall-organizzazzjoni tax-xogħol tal-Parlament sabiex il-Membri jkunu jistgħu jimpenjaw ruħhom fi djalogu maċ-ċittadini fl-aktar livell lokali possibbli; jixtieq li, filwaqt li jkunu qed iseħħu l-kampanji tal-partiti politiċi, il-Membri parlamentari Ewropej ikunu involuti mill-qrib u fuq il-post fil-kampanja tal-elezzjonijiet Ewropej;

21. Jistieden lill-Kummissjoni biex tniedi kampanji ta' komunikazzjoni lokali u fuq skala żgħira bl-involviment ta' parteċipanti lokali, u biex tippromwovi attivitajiet li jippermettu liċ-ċittadini li jkunu infurmati aħjar dwar il-pajjiżi ta' oriġini tal-immigranti kif ukoll biex dawn ikunu infurmati aħjar bid-drittijiet u d-doveri marbuta maċ-ċittadinanza tal-UE, bħala l-iktar mod effettiv u sinifikattiv ta' kif jistgħu jinkisbu dawn l-għanijiet ta' komunikazzjoni, u anki biex jitkomplew l-isforzi li saru fil-kuntest tas-Sena Ewropea għad-Djalogu Interkulturali 2008.

L-Edukazzjoni, il-Midja u l-ICT, iċ-Ċittadinanza attiva

22. Jenfasizza l-importanza li l-politika u l-istorja Ewropeja jiddaħħlu fil-kurrikulum tal-iskejjel ta' kull Stat Membru sabiex jissaħħu l-valuri Ewropej, u jiġu żviluppati dipartimenti ta' Studji Ewropej fil-programmi universitarji; jistieden lill-Kummissjoni biex tipprovdi appoġġ finanzjarju għall-promozzjoni ta' dawn il-proġetti; jistieden lill-Istati Membri biex jippromwovu kors tal-iskola dwar l-istorja tal-integrazzjoni Ewropea u l-funzjonament tal-UE, biex jifforma l-bażi ta' għarfien Ewropew komuni;

23. Jenfasizza l-irwol partikolari tal-edukazzjoni ċivika bħala l-forza essenzjali li timbotta ċ-ċittadinanza attiva; jinnota l-bżonn għal appoġġ ta’ mudell attiv għall-edukazzjoni ċivika li tipprovdi liż-żgħażagħ opportunitajiet fejn ikunu involvuti b'mod dirett mal-ħajja pubblika, mar-rappreżentanti politiċi fil-livell nazzjonali, fil-livell lokali kif ukoll fil-livell Ewropew, mar-rappreżentanti ta' NGOs u ma' inizjattivi ċiviċi; jissuġġerixxi li l-Kummissjoni tappoġġja proġetti pilota li jippromwovu mudell ta’ edukazzjoni ċivika bħal dan fl-Istati Membri;

24. Jirrakkomanda li l-programmi bħal Erasmus, Leonardo da Vinci, Grundtvig u Comenius ikunu promossi b’mod aktar effettiv, permezz ta' komunikazzjoni aktar wiesgħa, u organizzata sabiex jitħeġġu l-aktar nies possibbli biex jipparteċipaw, tiżdied il-parteċipazzjoni minn ċittadini inqas affluwenti u biex tkun iffaċilitata l-mobilità tagħhom fl-UE; jiġbed l-attenzjoni lejn il-fatt li dawn il-programmi b'mod partikolari huma popolari ħafna maż-żgħażagħ u jagħtu kontribut importanti għas-suċċess tal-integrazzjoni Ewropea;

25. Jilqa' b'sodisfazzjon il-Komunikazzjoni tal-Kummissjoni msemmija hawn fuq tal-21 ta' Diċembru 2007 li tagħti objettivi ċari dwar kif il-websajt 'Europa' tista' tinbidel f'sit web 2.0 orjentat għas-servizzi; iħeġġeġ lill-Kummissjoni biex tkompli l-bini tas-sit il-ġdid sa mill-2009 u jemmen li l-websajt il-ġdida għandha tipprovdi forum biex iċ-ċittadini jaqsmu mal-oħrajn il-fehmiet tagħhom u jipparteċipaw fi stħarriġiet li jsiru onlajn fejn l-NGOs, l-istituzzjonijiet pubbliċi u l-individwi kollha jistgħu jaqsmu l-esperjenzi tagħhom tal-proġetti ta' komunikazzjoni tal-UE tagħhom; jistieden lill-Kummissjoni biex tiġbor u tippubblika fuq din il-paġna tal-web l-esperjenzi ta' dawk li jkunu bbenefikaw mill-attivitajiet finanzjati skont il-Pjan D;

26. Jilqa' b'sodisfazzjon l-idea tal-'EU Tube', peress li bi kważi 1.7 miljun spettatur, huwa għodda unika li biha jkunu kkomunikati l-politiki tal-UE fost l-utenti tal-Internet; jistieden ukoll lill-Kummissjoni biex tħejji linji gwida dwar kampanji effiċjenti tal-Internet u biex dawn taqsamhom ma' istituzzjonijiet oħra tal-UE;

27. Jistieden lill-Kummissjoni biex tagħmel użu aħjar tal-materjal awdjoviżiv li hemm disponibbli dwar l-Ewropa bis-Satellita billi jkunu stabbiliti rabtiet ma' stazzjonijiet tat-televiżjoni lokali u ma' midja komunitarja li jkunu interessati li jakkwistaw materjal bħal dan għax-xandir, sabiex tintlaħaq udjenza aktar wiesgħa;

28. Jidhirlu li n-netwerk 'Europe Direct' huwa għodda importanti biex ikunu mwieġba l-mistoqsijiet taċ-ċittadini fuq punti partikulari bil-posta jew b'telefonati bla ħlas minn kulfejn ikunu fl-UE, għodda li għandha tkompli tkun irreklamata aktar;

29. Iqis li l-oqsma tal-politika dwar il-ħarsien tal-konsumatur u s-suq intern huma ta' importanza kbira biex issir komunikazzjoni dwar l-Ewropa mal-konsumaturi u man-negozji; jitlob lill-Istati Membri biex iżidu l-isforzi tagħhom fil-komunikazzjoni tal-benefiċċji tas-Suq Uniku fil-livell nazzjonali, reġjonali u lokali; jistieden lill-Kummissjoni u lill-Istati Membri biex jippromwovu u jsaħħu l-komunikazzjoni u l-informazzjoni interattiva għal djalogu effikaċi bejn il-konsumaturi, in-negozji u l-istituzzjonijiet permezz ta' mezzi elettroniċi varji bi strumenti moderni u biex jikkontribwixxu għal żvilupp fil-kummerċ elettroniku (e-commerce);

30. Jitlob lill-Kummissjoni biex issaħħaħ l-isforzi tagħha ta' koordinazzjoni fl-oqsma tal-edukazzjoni u tal-informazzjoni tal-konsumatur dwar id-drittijiet u l-obbligi tal-konsumatur permezz ta' żieda fir-riżorsi finanzjarji u umani; jistieden lill-Istati Membri biex isaħħu r-riżorsi finanzjarji u umani allokati lin-Netwerk Ewropew taċ-Ċentri tal-Konsumatur sabiex titqajjem kuxjenza u tkun żgurata l-applikazzjoni tad-drittijiet tal-konsumatur tal-UE u jħeġġeġ lill-Istati Membri, minħabba l-kriżi finanzjarja internazzjonali u l-livelli dejjem jogħlew tad-dejn tal-konsumaturi, biex isiru sforzi li jtejbu l-livell ta' litteriżmu finanzjarju tal-konsumaturi b'mod partikulari rigward d-drittijiet u l-obbligi tagħhom kif ukoll il-mezzi ta' rikors li jirrigwardaw it-tifdil u l-kreditu;

31. Jistieden lill-Istati Membri biex iżidu r-riżorsi umani u finanzjarji allokati għan-netwerk SOLVIT li jagħmluha possibbli li jissolvew problemi li jinħolqu minn applikazzjoni ħażina jew in-nuqqas ta' applikazzjoni tal-leġiżlazzjoni tal-Komunità mingħajr ħlas; jitlob lill-Kummissjoni biex tħaffef is-simplifikazzjoni tas-servizzi varji għall-għoti ta' informazzjoni u ta' pariri dwar is-Suq Uniku; għalhekk, jappoġġja l-kunċett li jinsab fil-Komunikazzjoni tal-Kummissjoni tal-20 ta' Novembru 2007 bl-isem "Suq Uniku għall-Ewropa tas-Seklu 21" (COM(2007)0724) ta' strateġija integrata fil-għoti ta' Servizzi ta' Assistenza għas-Suq Uniku permezz tat-twaqqif ta' paġna fl-internet (single-entry); jinnota l-inizjattivi tal-Kummissjoni dwar it-tnaqqis tal-piżijiet amministrattivi u dwar ir-regolamentazzjoni aħjar; b'mod partikolari, jitlob li jkun hemm titjib fl-appoġġ għall-impriżi żgħar u ta' daqs medju li jirrapreżentaw sors importanti ta' impjiegi fl-Ewropa.

32. Jinnota li Sena Ewropea tal-Volontarjat tkun opportunità ideali għall-istituzzjonijiet tal-UE biex tibni relazzjoni maċ-ċittadini; jinnota li hemm aktar minn 100 miljun voluntiera fl-UE, u jistieden lill-Kummissjoni biex tħejji l-bażi sabiex l-2011 tiġi ddikjarata bħala s-Sena Ewropea billi tressaq proposta leġiżlattiva xierqa għal dan il-għan kemm jista' jkun malajr;

33. Jenfasizza l-importanza li jitqiesu l-opinjonijiet taċ-ċittadini dwar l-Ewropa bħala figura globali, li tqis b'mod partikulari l-irwol prominenti tal-Parlament Ewropew f'dak il-qasam; għaldaqstant jinkoraġġixxi l-involviment tal-Membri tal-Parlament Ewropew u l-membri tal-Kunsill fiż-żjariet ta' "Pjan D" minn Membri tal-Kummissjoni, minħabba li dawn għandhom irwol importanti biex jintlaħqu l-parlamenti nazzjonali, is-soċjetà ċivili, il-mexxejja tan-negozju u tal-junjins u l-awtoritajiet reġjonali u lokali tal-Istati Membri;

34. Jinsab sodisfatt li d-dinja b'mod ġenerali qed turi interess li dejjem jiżdied fil-proġett Ewropew, u li l-UE u ċ-ċittadini tagħha qed isiru wkoll iktar konxji tal-vantaġġi tal-qsim tal-esperjenza supranazzjonali tagħhom ma' pajjiżi u reġjuni oħra, speċjalment mal-ġirien tal-UE; għaldaqstant jitlob lill-Kummissjoni biex tiżviluppa, permezz tad-Delegazzjonijiet tagħha f'pajjiżi terzi, modi ta' kif tista' tavviċina liċ-ċittadini ta' dawk il-pajjiżi u tinfurmahom dwar il-possibiltajiet li toffri l-Unjoni Ewropea, pereżempju permezz tal-midja u ta' forom oħra ta' kultura, edukazzjoni, tagħlim tal-lingwa u mobilità jew programmi ta' skambju bħalma hu Erasmus Mundus;

35. Jinnota li, partikolarment fil-kuntest taż-żieda fl-għadd ta' ċittadini ta' pajjiżi terzi fl-UE u l-fatt li qed jinħolqu soċjetajiet multikulturali, li sar ukoll kontribut minnhom, għandhom isiru sforzi ikbar biex ikun hemm provvediment għall-integrazzjoni tal-immigranti fl-UE, jingħatalhom aċċess aħjar għall-informazzjoni dwar x'tinvolvi ċ-ċittadinanza tal-EU, pereżempju, billi jissaħħu r-rabtiet ta' sħubija bejn livelli differenti ta' gvern (lokali, reġjonali u nazzjonali) u parteċipanti mhux governattivi (eż. min iħaddem, is-soċjetà ċivili, assoċjazzjonijiet tal-migranti, il-midja u l-organizzazzjonijiet mhux governattivi li jagħtu appoġġ lill-migranti); iqis li suċċess fl-integrazzjoni sservi ta' appoġġ għal aktar żvilupp ta' kuxjenza Ewropea multikulturali msejsa fuq it-tolleranza, id-djalogu u l-ugwaljanza;

36. Jitlob lill-Kummissjoni biex tippromwovi programmi u kampanji (bħalma huma ‘Id-dinja mill-perspettiva tan-nisa’) li jinkoraġġixxu l-attivitajiet soċjali, politiċi u kulturali tan-nisa, filwaqt li jiġi kkunsidrat l-irwol tan-nisa fid-djalogu bejn il-ġenerazzjonijiet, is-sostenibilità u l-prosperità tas-soċjetà; jistieden għalhekk lit-tfajliet u n-nisa biex jingħataw tagħrif aħjar dwar il-kunċett ta' ċittadinanza Ewropea u d-drittijiet marbuta magħha, partikolarment f'reġjuni iżolati soċjalment u ġeografikament; jenfasizza li l-għan ta' dawn il-kampanji ta' informazzjoni għandhom ikunu biex titjieb il-parteċipazzjoni tan-nisa fil-ħajja politika u fil-proċessi tat-teħid tad-deċiżjonijiet; jenfasizza l-bżonn li jiġu promossi l-miżuri bil-għan li jiġu eliminati d-distakki diġitali tal-ġeneru sabiex jingħataw lin-nisa, bl-istess kondizzjonijiet, l-għodod tal-parteċipazzjoni għad-djalogu dwar l-Ewropa; jifraħ lill-Kummissjoni dwar l-għażla tal-proġetti li għandhom jiġu kofinanzjati mill-Pjan D, mir-rappreżentazzjonijiet tagħha, li jinkludu ħafna proġetti mmexxija minn organizzazzjonijiet tan-nisa u bosta proġetti li jinvolvu lin-nisa; jinsisti fuq il-bżonn li tiġi promossa l-parteċipazzjoni taċ-ċittadini fl-oqsma tal-vjolenza relatata mal-ġeneru jew it-traffikar tal-bniedem, fejn l-involviment tas-soċjetà hija vitali jekk għandu jsir progress biex tissolva l-problema; jirrikonoxxi l-kompetenzi tan-nisa fir-rigward tas-soluzzjoni tal-problemi u tal-kunflitti u jħeġġeġ lill-Kummissjoni biex issaħħaħ il-parteċipazzjoni tan-nisa fit-task forces u fil-gruppi ta' ħidma involuti fi kwistjonijiet marbuta mal-ħajja familjali, il-kura tat-tfal, l-edukazzjoni, eċċ.;

37. Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill Ewropew, lill-Kummissjoni kif ukoll lill-Kunsill, lill-Qorti tal-Ġustizzja, lill-Qorti tal-Awdituri, lill-Kumitat tar-Reġjuni, lill-Kumitat Ekonomiku u Soċjali u lill-gvernijiet u lill-parlamenti tal-Istati Membri.

[1] ĠU L 378, 27.12.2006, p.32
[2] ĠU C 314 E, 21.12.2006, p.369.
[3] ĠU C 92 E, 20.4.2006, p.403.

L-Ewropa hija l-Kontinent l-Antik għal dawk li l-antenati tagħhom fl-imgħoddi kienu telqu minnha biex ifittxu kenn jew futur aħjar. L-Ewropa hija l-Kontinent tat-Tama għal dawk li jaslu hawn mill-faqar jew mit-tirannija. L-Ewropa hija Wegħda għal dawk l-Ewropej li jgħixu fil-Balkani jew fl-Ewropa tal-Lvant, u li jemmnu li l-adeżjoni li għad trid issir mal-Unjoni Ewropea se ddaħħalhom fil-klabb tal-ipprivileġġjati. U l-Ewropa hija l-Unjoni Ewropea, l-alleanza tas-sebgħa u għoxrin Stat Membru, li ċ-ċittadini tagħha rari jaqsmu l-istess illużjonijiet ottimistiċ li jkollhom il-barranin dwar l-UE: x'aktarx li spiss jikkritikaw jew anke jiċħdu l-vantaġġi tal-Unjoni. Il-professjonisti tal-komunikazzjoni tal-UE jagħmlu ħilithom kollha biex ixerrdu l-frott tal-integrazzjoni Ewropea, imma l-isforzi tagħhom xi drabi aktar jixbhu lil xi diskors milli djalogu maċ-ċittadini. Għal din ir-raġuni, ir-Rapporteur jinkoraġġixxi lill-Istituzzjonijiet Ewropej biex jagħtu bidu għal djalogu attiv maċ-ċittadini, li fih huma - iċ-ċittadini komuni, ir-rappreżentanti tal-NGOs, il-ġurnalisti u l-ħaddiema tal-midja - ikunu jistgħu jgħidulna kif huma kieku kienu jikkomunikaw il-vantaġġi tal-integrazzjoni Ewropea. Ir-Rapporteur organizza konferenzi mar-rappreżentanti ta' NGOs, attivisti Ħodor(Greens) u ġurnalisti fl-Ungerija, kif ukoll ġabar ir-rakkomandazzjonijiet tagħhom permezz ta' e-mails. Waħda minn dawk il-konferenzi saret f'Budapest b'aktar minn mitt parteċipant attiv, l-oħrajn saru f'Miskolc u f'Békéscsaba. Il-limitu ta' żmien u l-kapaċità tar-Rapporteur ma ppermettewx li konferenzi bħal dawn ikunu organizzati fi Stati Membri oħra, imma jkun utli ħafna jekk dan isir fil-ġejjieni.

Dawk li huma involuti fi kwistjonijiet Ewropej jew jistudjawhom, is-soltu jafu u jifhmu t-tifsira ta' integrazzjoni Ewropea. Madankollu, stħarriġiet tal-Ewrobarometru juru li anqas ma jkollhom skola ċ-ċittadini u anqas ma jkunu għonja, aktar ikun probabbli li jopponu li tkompli ssir aktar integrazzjoni Ewropea. L-idea Ewropea l-aktar li tilħaq hija t-taqsima tas-soċjetà Ewropea li hija edukata tajjeb u li hija għanja. Iċ-ċittadini ta' anqas skola u li huma anqas għanja ftit jirċievu tagħrif dwar il-politiki Ewropej, ħaġa li, barra minn hekk, timmira li tilħaq l-aktar lill-istudenti u lill-professjonisti żgħażagħ. Dik hija r-raġuni li għaliha r-Rapporteur iħeġġeġ lill-Kummissjoni biex testendi d-djalogu tagħha għal gruppi speċifikati ġodda billi tfassal pjanijiet ta' komunikazzjoni speċifikati u mhux elitisti, u b'hekk tkun tista' tinvolvu fl-affarijiet tal-UE lil nies li jkunu jgħixu fi bliet u rħula żgħar, lill-klassi tal-ħaddiema u lil nies irtirati. Li jkun hemm pjanijiet ta' komunikazzjoni li jkunu biss għall-klassi elitista u għall-istudenti m'huwiex biżżejjed: in-nies tal-kampanja, il-ħaddiema tal-id u l-pensjonanti għandhom ikunu wkoll fil-mira ta' dawn il-pjanijiet.

It-televiżjoni hija waħda mill-għodda l-aktar importanti biex jintlaħqu ċ-ċittadini ordinarji u komuni. Għalhekk, ir-Rapporteur jistieden lill-Kummissjoni biex tqiegħed għad-dispożizzjoni tal-pubbliku, permezz ta' kuntratti ta' servizz li jkunu jiżguraw indipendenza editorjali sħiħa, programmi tat-televiżjoni dwar kwistjonijiet Ewropej f'kull waħda mit-23 lingwa uffiċjali. Din il-ħaġa tkun tikkontribwixxi għaż-żieda fil-proporzjon ta' aħbarijiet marbuta mal-UE fil-midja, li fil-preżent huwa ta' 10% fl-Istati Membri u dan il-proporzjoni jerġa' huwa inqas minn dak tal-aħbarijiet marbuta mal-Istati Uniti tal-Amerika. Peress li l-ġurnalisti tagħna m'humiex agħar jew ta' talent anqas minn dawk Amerikani, stazzjon televiżiv bħal dan, li jista' jkun il-Euronews, għandu jilħaq l-influwenza, l-istandard professjonali u l-popolarità tas-CNN. Hija ħaġa inaċċettabbli wkoll li l-Euronews – proġett kofinanzjat mill-UE – ma jxandarx fil-lingwi uffiċjali kollha tal-Istati Membri. Il-Kummissjoni għandha ssib riżorsi finanzjarji għal dan il-għan. Il-Euronews għandu jirrealizza wkoll – u juri fil-programmi tiegħu – li l-Ewropa m'hijiex ugwali ma' xi pajjiżi Ewropej tal-Punent kbar; il-Finlandja, l-Ungerija jew il-Bulgarija wkoll jiffurmaw parti mill-Ewropa komuni tagħna.

Nies żgħażagħ u edukati tajjeb jistgħu, aktar minn kull ħaġa oħra, jintlaħqu permezz tal-Internet. Il-Komunikazzjoni dwar 'Nikkomunikaw dwar l-Ewropa permezz tal-Internet – Ninvolvu liċ-ċittadini', tagħti objettivi ċari dwar il-qlib tal-websajt Europa f'sit web 2.0 li jkun orjentat għas-servizzi, ħaġa li tkun tagħti l-opportunità għar-reazzjonijiet fuq il-bażi tal-fehmiet taċ-ċittadini u l-opportunità għal djalogu attiv. Is-sit il-ġdid għandu jinfetaħ qabel l-elezzjonijiet tal-Parlament Ewropew tal-2009 biex ikun kapaċi li jgħarraf liċ-ċittadini b'mod effettiv dwar kwistjonijiet Ewropej. L-EUTube ukoll huwa proġett interessanti, madankollu għandu anqas minn 8000 abbonat u jżuruh għadd kemxejn żgħir ta' utenti meta mqabbel mal-programmi tal-Youtube, għalhekk irid ikun imtejjeb biex jilħaq aktar spettaturi.

L-Ewropa għandha storja komuni, imma hija mgħallma u mifhuma b'modi differenti fl-Istati Membri, u anke f'din il-ħaġa hemm id-differenza bejn ir-reġjuni. Għalhekk, ir-Rapporteur qed jipproponi li jkun imfassal kurrikulu Ewropew komuni ta' sena dwar l-istorja tal-Ewropa wara l-1945 biex ikun utilizzat fl-edukazzjoni sekondarja, żviluppat b'mod konsenswali mill-esperti tal-Istati Membri fit-23 lingwa uffiċjali. Dan il-kurrikulu għandu jkopri wkoll l-istorja u l-mekkaniżmu tal-funzjonament tal-Unjoni Ewropea, inklużi d-drittijiet tal-ħaddiema. Dan il-kurrikulu jista' jkun adottat b'mod volontarju fl-Istati Membri biex jifforma l-bażi ta' għarfien Ewropew komuni fl-iskejjel sekondarji. Ir-Rapporteur jilqa' b'sodisfazzjon ukoll l-idea li jinfetaħ Mużew tal-Istorja Ewropea fi Brussell, qrib il-bini tal-Parlament Ewropew. Ir-Rapporteur jilqa' b'sodisfazzjon l-idea ta' professur Ungeriż, u fuq il-parir tiegħu, jipproponi l-fondazzjoni ta' Università Miftuħa Ewropea (European Open University). Din għandha tkun miftuħa u mingħajr ħlas għaċ-ċittadini Ewropej kollha, huma x'inhuma n-nazzjonalità, l-età jew il-kwalifiki tagħhom. Il-kurrikulu komprensiv tal-Università Miftuħa Ewropea jkun ikopri l-istorja, l-objettivi, l-istituzzjonijiet, il-politiki u l-ġejjieni possibbli tal-Unjoni Ewropea. L-Università tkun tista' taħdem fil-bini ta' istituzzjonijiet edukattivi eżistenti f'koperazzjoni mal-Kummissjoni, u tkun waħda mill-mezzi li bihom titqiegħed fil-prattika d-Dikjarazzjoni Konġunta riċenti dwar 'Nikkomunikaw l-Ewropa fi Sħubija'. Madankollu, għandha tuża wkoll it-teknoloġiji l-aktar żviluppati, bħal m'huma d-diversi forom ta' tagħlim elettroniku (e-learning) u ta' webinar, sabiex jintlaħaq l-akbar għadd possibbli tal-pubbliku, u b'hekk kulħadd, kulmin irid, ikun jista' jattendi l-korsijiet.

Ftit huma ċ-ċittadini Ewropej li jagħrfu l-għanijiet komuni u l-fehmiet differenti tal-partiti politiċi Ewropej. Jekk id-differenzi politiċi fost il-Partiti Ewropej ikunu jidhru, din il-ħaġa tkun tista' tgħin liċ-ċittadini jidentifikaw ruħhom ma' diversi kunċetti dwar il-ġejjieni tal-Ewropa. Għalhekk, ir-Rapporteur jipproponi li l-Partiti Ewropej kollha jħabbru l-manifest tagħhom għall-Elezzjonijiet tal-Parlament Ewropew tal-2009 f'verżjoni twila u oħra qasira wkoll, sabiex jintlaħqu taqsimiet differenti tas-soċjeta.

għall-Kumitat għall-Kultura u l-Edukazzjoni

dwar djalogu attiv maċ-ċittadini dwar l-Ewropa
(2008/2224(INI))

Rapporteur għal opinjoni (*): Sylvia-Yvonne Kaufmann(*) Kumitat assoċjat - Artikolu 47 tar-Regoli ta' Proċedura

SUĠĠERIMENTI

Il-Kumitat għall-Affarijiet Kostituzzjonali jistieden lill-Kumitat għall-Kultura u l-Edukazzjoni, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

1. Jilqa’ b’sodisfazzjon il-komunikazzjoni tal-Kummissjoni dwar bini fuq l-esperjenza ta’ pjan D, li jenfasizza l-importanza ta’ komunikazzjoni interattiva maċ-ċittadini Ewropej;

2. Jistieden lill-Kummissjoni sabiex tinvolvi gruppi interessati kbar fid-djalogu billi tipprepara pjanijiet ta’ komunikazzjoni li jkollhom l-kapaċità li jġiegħlu lir-residenti ta’ insedjamenti żgħar u lin-nies ta’ standards ta’ għixien varji u ta’ etajiet differenti jipparteċipaw fi kwistjonijiet Ewropej; jipproponi l-adottazzjoni ta’ approċċ fuq żewġ fażi sabiex jissaħħaħ id-djalogu bejn l-Unjoni Ewropea u ċ-ċittadini tagħha billi l-ewwel tiġi provduta l-informazzjoni u billi aktar tard jiġu faċilitati dibattiti fost u ma’ ċittadini infurmati;

3. Jinnota b’sodisfazzjon li l-Kummissjoni kkunsidrat ħafna mill-ideat li l-Parlament diġà ressaq, bħall-forums taċ-ċittadini, kemm fuq livell Ewropew u kemm fuq livell nazzjonali, irwol iktar prominenti għall-organizzazzjonijiet tas-soċjetà ċivili u l-użu innovattiv ta’ mezzi ġodda tal-midja;

4. Jiddispjaċih għall-fatt li, minkejja l-isforzi u l-ideat tajba tal-Kummissjoni, is-suċċess miksub fiż-żieda tal-livell ta' għarfien u interess taċ-ċittadini Ewropej fi kwistjonijiet Ewropej kien limitat ħafna, xi ħaġa li sfortunatament dehret fir-referendum Irlandiż;

5. Huwa tal-istess opinjoni bħall-Kummissjoni li demokrazija parteċipattiva tista’ tissupplimenta b’użu d-demokrazija rappreżentattiva; jenfasizza madanakollu li demokrazija parteċipattiva mhux biss tfisser li wieħed jisma’ liċ-ċittadin, iżda jfisser ukoll li ċ-ċittadini jingħataw opportunitajiet reali biex jinfluwenzaw il-politika Ewropea.

6. Jiġbed l-attenzjoni li sabiex jinkisbu l-għanijiet imsemmija hawn fuq, l-istituzzjonijiet għandhom ikun ħafna aktar miftuħa u jadottaw l-approċi meħtieġa sabiex jippermettu liċ-ċittadini u l-organizzazzjonijiet tagħhom jipparteċipaw b'mod effettiv f'kull stadju meta jkun hemm dibattitu dwar kwistjonijiet tal-UE; jinnota wkoll li l-aċċess pubbliku għal dokumenti prodotti mill-istituzzjoijiet jeħtieġ li jingħata fuq bażi kemm jista’ jkun wiesgħa, minħabba li dan huwa rekwiżit essenzjali biex issir influwenza;

7. Ifakkar fl-opportunitajiet ġodda għal demokrazija parteċipattiva li t-Trattat ta’ Liżbona se jipprovdi, speċjalment l-inizjattiva taċ-ċittadini;

8. Jilqa’ b’sodisfazzjon il-fatt li l-Kummissjoni tappoġġja l-irwol tal-Parlament u tal-partiti politiċi Ewropej, u jirrikonoxxi l-bżonn li jitnaqqas id-distakk bejn il-politiki nazzjonali u Ewropej, speċjalment matul il-kampanji elettorali Ewropej;

9. Jenfasizza l-bżonn għal sforzi koordinati u azzjoni konġunta mill-istituzzjonijiet tal-UE kollha u mill-Istati Membri biex jikkomunikaw maċ-ċittadini tal-Ewropa dwar kwistjonijiet Ewropej; jilqa’ b’sodisfazzjon id-dikjarazzjoni politika konġunta dwar komunikazzjoni adottata f’Ottubru; ifakkar, madanakollu li l-Parlament talab li jkun hemm ftehima Interistituzzjonali dwar il-politika ta’ komunikazzjoni bejn l-istituzzjonijiet kollha;

10. Jenfasizza l-irwol partikolari tal-edukazzjoni ċivika bħala l-forza essenzjali li timbotta ċ-ċittadinanza attiva; jinnota l-bżonn għal appoġġ ta’ mudell attiv għall-edukazzjoni ċivika li tipprovdi liż-żgħażagħ opportunitajiet fejn ikunu involvuti b'mod dirett mal-ħajja pubblika, mar-rappreżentanti politiċi fil-livell nazzjonali, fil-livell lokali kif ukoll fil-livell Ewropew, mar-rappreżentanti ta' NGOs u ma' iniżjativi ċiviċi; jissuġġerixxi li l-Kummissjoni tappoġġja proġetti pilota li jippromwovu mudell ta’ edukazzjoni ċivika bħal dan fl-Istati Membri;

11. Jistieden lill-Kummissjoni sabiex ittejjeb il-koperazzjoni u l-koordinazzjoni bejn ir-rappreżentazzjonijiet tagħha fl-Istati Membri u l-uffiċċji tal-informazzjoni tal-Parlament Ewropew.

RIŻULTAT TAL-VOTAZZJONI FINALI FIL-KUMITAT

għall-Kumitat għall-Kultura u l-Edukazzjoni

dwar djalogu attiv maċ-ċittadini dwar l-Ewropa
(2008/2224(INI))

Rapporteur għal opinjoni: Maria Badia i Cutchet

SUĠĠERIMENTI

Il-Kumitat għall-Affarijiet Barranin jistieden lill-Kumitat għall-Kultura u l-Edukazzjoni, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

1. Jilqa' id-Dikjarazzjoni Konġunta bit-titolu "Nikkomunikaw l-Ewropa fi Sħubija", iffirmat fit-22 ta' Ottubru 2008, bl-għanijiet ċari li jintlaħqu ċ-ċittadini tal-Ewropa permezz ta' titjib tal-komunikazzjoni tal-UE min-naħa tal-Parlament Ewropew, il-Kunsill, il-Kummissjoni u l-Istati Membri;

2. Jinnota li, skont stħarriġ riċenti tal-opinjoni pubblika, il-maġġoranza kbira tal-Ewropej huma favur li l-Ewropa titkellem b'leħen wieħed dwar kwistjonijiet ta' politika barranija; Jenfasizza l-fatt li ġiet inkluża stqarrija dwar dan b'talba taċ-ċittadini Ewropej fl-ittra miftuħa/rakkomandazzjonijiet mill-parteċipanti fil-konferenza ta' konklużjoni tas-sitt proġetti taċ-ċittadini "Pjan D" fid-9 ta' Diċembru 2007[1];

3. Jenfasizza l-importanza li jitqiesu l-opinjonijiet taċ-ċittadini dwar l-Ewropa bħala figura globali, li tqis b'mod partikulari l-irwol prominenti tal-Parlament Ewropew f'dak il-qasam; għaldaqstant jinkoraġġixxi l-involviment tal-Membri tal-Parlament Ewropew u l-membri tal-Kunsill fiż-żjariet ta' "Pjan D" minn Membri tal-Kummissjoni, minħabba li dawn għandhom rwol importanti biex jintlaħqu l-parlamenti nazzjonali, is-soċjetà ċivili, il-mexxejja tan-negozju u tal-unjins u l-awtoritajiet reġjonali u lokali tal-Istati Membri; jistieden lir-rappreżentanti tal-Kummissjoni u lill-Parlament Ewropew fl-Istati Membri biex itejbu l-koperazzjoni rigward il-konsultazzjoni maċ-ċittadini, il-qsim ta' informazzjoni, l-għarfien u l-ideat dwar l-UE u jipprovdu opportunitajiet għall-votanti biex jiltaqgħu mal-MEPs eletti f'pajjiżi differenti u mal-uffiċjali tal-UE;

4. Għaldaqstant iħeġġeġ lill-Kummissjoni biex teżamina l-possibilità li fi żmien erba' snin jiġi introdott mekkaniżmu għall-konsultazzjoni ġenerali taċ-ċittadini tal-UE organizzata fuq bażi regolari dwar kwistjonijiet essenzjali li jirrigwardaw l-attivitajiet tal-UE, bħala mod biex l-UE titqarreb lejn iċ-ċittadini;

5. Jinsab sodisfatt li d-dinja b'mod ġenerali qed turi interess li dejjem jiżdied fil-proġett Ewropew, u li l-UE u ċ-ċittadini tagħha qed isiru ukoll iktar konxji tal-vantaġġi tal-qsim tal-esperjenza supranazzjonali tagħhom ma' pajjiżi u reġjuni oħra, speċjalment mal-ġirien tal-UE; għaldaqstant jistieden lill-Kummissjoni biex tiżviluppa, permezz ta' Delegazzjonijiet ma' pajjiżi terzi, metodi biex jitqarrbu lejn iċ-ċittadini ta' dawn il-pajjiżi u jinfurmawhom dwar l-opportunitajiet fl-Unjoni Ewropea, eżempju dwar il-medja u forom oħra ta' kultura, edukazzjoni, tagħlim ta' lingwi u mobilità jew programmi ta' skambju bħall-Erasmus Mundus;

6. Jenfasizza l-importanza li l-politika u l-istorja Ewropeja jiddaħħlu fil-kurrikulum tal-iskejjel ta' kull Stat Membru sabiex jissaħħu l-valuri Ewropej, u jiġu żviluppati dipartimenti ta' Studji Ewropej fil-programmi universitarji; jistieden lill-Kummissjoni biex tipprovdi appoġġ finanzjarju għall-promozzjoni ta' dawn il-proġetti;

7. Jistieden lill-Kummissjoni biex tipprovdi appoġġ finanzjarju għal proġetti li għandhom l-għan li jippromwovu l-ideat tal-UE; iqis li dawn il-programmi għandhom ikunu mfassla għal studenti fl-edukazzjoni sekondarja u terzjarja li jistgħu jinkludu l-komunitajiet lokali (villaġġi u kunsilli lokali) u jżidu l-familjarità tan-nies lokali mal-valur tal-Komunitajiet Ewropej;

8. Jinnota li, partikolarment fil-kuntest taż-żieda fl-għadd ta' ċittadini ta' pajjiżi terzi fl-UE u l-fatt li qed jinħolqu soċjetajiet multikulturali, li sar ukoll kontribut minnhom, għandhom isiru sforzi ikbar biex ikun hemm provediment għall-integrazzjoni tal-immigranti fl-UE, jingħatalhom aċċess aħjar għall-informazzjoni dwar x'tinvolvi ċ-ċittadinanza tal-EU, pereżempju, billi jissaħħu r-rabtiet ta' sħubija bejn livelli differenti ta' gvern (lokali, reġjonali u nazzjonali) u parteċipanti mhux governattivi (eż. min iħaddem, is-soċjetà ċivili, assoċjazzjonijiet tal-migranti, il-midja u organizzazzjonijiet mhux governattivi li jagħtu appoġġ lill-migranti); iqis li integrazzjoni ta' suċċess għandha tkun ta' appoġġ għal aktar żvilupp ta' kuxjenza Ewropea multikulturali msejsa fuq it-tolleranza, id-djalogu u l-ugwaljanza;

9. Jistieden lill-Kummissjoni biex tniedi kampanji ta' komunikazzjoni lokali u fuq skala żgħira bl-involviment ta' parteċipanti lokali, u biex tippromwovi attivitajiet li jippermettu liċ-ċittadini li jkunu infurmati aħjar dwar il-pajjiżi ta' oriġini tal-immigranti, bħala l-iktar mod effettiv u sinifikattiv ta' kif jistgħu jinkisbu dawn l-għanijiet ta' kommunikazzjoni, u anki biex jitkomplew l-isforzi li saru fil-kuntest tas-Sena Ewropea għad-Djalogu Interkulturali 2008.

RIŻULTAT TAL-VOTAZZJONI FINALI FIL-KUMITAT

[1] Ara l-Punt 17: "F'dinja globali, jagħmel sens li l-UE tieħu fuqha nnifisha iktar responsabilità milli għandha llum fil-qasam tal-azzjoni militari, għajnuna barranija u r-relazzjonijiet diplomatiċi. L-UE għandha tkun tista' titkellem b'leħen wieħed fuq livell globali biex tiddefendi l-valuri tagħha."

għall-Kumitat għall-Kultura u l-Edukazzjoni

dwar djalogu attiv maċ-ċittadini dwar l-Ewropa
(2008/2224(INI))

Rapporteur għal opinjoni: Magor Imre Csibi

SUĠĠERIMENTI

Il-Kumitat għas-Suq Intern u l-Ħarsien tal-Konsumatur jistieden lill-Kumitat għall-Kultura u l-Edukazzjoni, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

1. Iqis li l-oqsma tal-politika dwar il-ħarsien tal-konsumatur u s-suq intern huma ta' importanza kbira biex issir komunikazzjoni dwar l-Ewropa mal-konsumaturi u man-negozji; jitlob lill-Istati Membri biex iżidu l-isforzi tagħhom fil-komunikazzjoni tal-benefiċċji tas-Suq Uniku fil-livell nazzjonali, reġjonali u lokali; jistieden lill-Kummissjoni u lill-Istati Membri biex jippromwovu u jsaħħu l-komunikazzjoni u l-informazzjoni interattiva għal djalogu effikaċi bejn il-konsumaturi, in-negozji u l-istituzzjonijiet permezz ta' mezzi elettroniċi varji bi strumenti moderni u biex jikkontribwixxu għal żvilupp fil-kummerċ elettroniku;

2. Jilqa' b'sodisfazzjon il-Komunikazzjoni tal-Kummissjoni tat-2 ta' April 2008 bl-isem "Niddibattu l-Ewropa – nibnu fuq l-esperjenza ta' Pjan D għal Demokrazija, Djalogu u Dibattitu" (COM(2008)0158) bħala inizjattiva utli biex terġa' tinkiseb il-fiduċja taċ-ċittadini fil-Proġett Ewropew Konġunt wara r-riżultati negattivi tal-aħħar referenda; jitlob li jkun hemm qafas ta' komunikazzjoni effikaċi bejn is-soċjetà ċivili u l-Unjoni Ewropea li jagħti ċans liċ-ċittadini biex ikunu jistgħu jipparteċipaw b'mod attiv fi kwistjonijiet Ewropej; iqis li huwa essenzjali li l-Membri kollha tal-Parlament Ewropew, il-Membri tal-Kummissjoni, u l-persunal tal-Istituzzjonijiet Ewropej jistgħu jivvjaġġaw madwar l-Unjoni Ewropea biex jiddjalogaw maċ-ċittadini tal-Istati Membri kollha, jifhmu aħjar is-sitwazzjoni tagħhom u jispjegawlhom ix-xogħol leġiżlattiv li jkun għaddej;

3. Jistieden lill-Kummissjoni biex twessa' l-limiti tal-opinjonijiet tal-partijiet interessati li nstemgħu waqt il-konsultazzjonijiet tal-leġiżlazzjonijiet tal-UE; f'dan il-kuntest jenfasizza l-importanza tar-rappreżentanti tas-soċjetà ċivili, bħalma huma n-netwerks tal-professjonisti u tal-konsumaturi fil-livelli kollha, kemm dawk transnazzjonali kif ukoll dawk lokali, li jipprovdu pjattaformi għal skambju ta' opinjonijiet infurmat dwar il-politiki tal-UE u b'hekk jikkontribwixxu għal kwalità aħjar ta' leġiżlazzjoni tal-UE; jagħraf il-problemi fl-implimentazzjoni u fl-infurzar tal-leġiżlazzjoni u jħeġġeġ lill-konsumaturi u lin-negozjanti biex jeżerċitaw id-drittijiet tagħhom u biex jirrappurtaw il-problemi attwali lill-istituzzjonijiet tal-UE;

4. Jistieden lill-Istati Membri biex iżidu r-riżorsi umani u finanzjarji allokati lin-netwerk għas-soluzzjoni tal-problemi, is-SOLVIT li jippermetti li jiġu solvuti problemi ta' applikazzjoni ħażina tal-leġiżlazzjoni Komunitarja jew nuqqas ta' applikazzjoni tagħha bla ħlas; jitlob lill-Kummissjoni biex tħaffef is-simplifikazzjoni tas-servizzi varji li jagħtu informazzjoni u pariri dwar is-Suq Uniku; għalhekk, jappoġġja l-kunċett li jinsab fil-Komunikazzjoni tal-Kummissjoni tal-20 ta' Novembru 2007 bl-isem "Suq Uniku għall-Ewropa tas-Seklu 21" (COM(2007)0724) ta' strateġija integrata fil-għoti ta' Servizzi ta' Assistenza għas-Suq Uniku permezz tat-twaqqif ta' paġna fl-internet ta' darba;

5. Jitlob lill-Kummissjoni biex issaħħaħ l-isforzi tagħha ta' koordinazzjoni fl-oqsma tal-edukazzjoni u tal-informazzjoni tal-konsumatur dwar id-drittijiet u l-obbligi tal-konsumatur permezz ta' żieda fir-riżorsi finanzjarji u umani; jistieden lill-Istati Membri biex iżidu r-riżorsi finanzjarji u umani allokati għan-Netwerk Ewropew taċ-Ċentri tal-Konsumatur sabiex isiru magħrufa u applikati aħjar id-drittijiet tal-konsumatur tal-UE;

6. Iħeġġeġ lill-Istati Membri, meta jitqiesu l-kriżi finanzjarja globali u l-livelli ta' dejn tal-konsumaturi li dejjem qed jiżdiedu, biex jagħmlu sforz ħalli jtejbu l-livell ta' litteriżmu finanzjarju tal-konsumaturi b'mod partikulari rigward id-drittijiet u l-obbligi tagħhom kif ukoll il-possibiltajiet ta' rikors tagħhom fi kwistjonijiet dwar it-tifdil u l-kreditu;

7. Jistieden lit-tliet istituzzjonijiet ewlenin biex jikkunsidraw il-possibilità li jsiru diskussjonijiet konġunti miftuħa li jiżdiedu fuq id-dibattiti miftuħa tal-Parlament Ewropew, li fihom jindirizzaw suġġetti li jolqtu lill-konsumaturi u l-ħajja tagħhom ta' kuljum u dan sabiex tissaħħilhom il-fiduċja fis-suq intern u fil-protezzjoni tal-konsumatur;

8. Jinnota l-inizjattivi tal-Kummissjoni dwar it-tnaqqis tal-piżijiet amministrattivi u dwar ir- regolamentazzjoni aħjar; b'mod partikulari, jitlob li jkun hemm titjib fl-appoġġ għall-impriżi żgħar u ta' daqs medju li jirrappreżentaw sors ta' impjiegi importanti fl-Ewropa.

RIŻULTAT TAL-VOTAZZJONI FINALI FIL-KUMITAT

għall-Kumitat għall-Kultura u l-Edukazzjoni

dwar djalogu attiv maċ-ċittadini dwar l-Ewropa
(2008/2224(INI))

Rapporteur għal opinjoni: Emmanouil Angelakas

SUĠĠERIMENTI

Il-Kumitat għall-Iżvilupp Reġjonali jistieden lill-Kumitat għall-Kultura u l-Edukazzjoni, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

1. Jemmen li r-reġjuni huma ċ-ċentri l-iktar xierqa biex jitħeġġeġ l-ideal Ewropew u li l-awtoritajiet lokali u reġjonali huma l-iktar korpi kompetenti biex jitħeġġeġ id-djalogu maċ-ċittadini minħabba li josservaw il-ħajja tagħhom ta' kuljum mill-qrib; jesprimi sodisfazzjon f'dan ir-rigward li l-UE adottat miżuri biex tiddeċentralizza l-politika dwar il-komunikazzjoni;

2. Jixtieq li l-awtoritajiet lokali jissodisfaw aħjar l-obbligi ta' informazzjoni tagħhom dwar l-għajnuna li jirċievu mill-Unjoni Ewropea u jenfasizza wkoll li l-proattività tar-rappreżentanti eletti lokali u reġjunali hija essenzjali għall-iżvilupp tal-informazzjoni u t-taħriġ; jifraħ f'dan ir-rigward bil-ħolqien ta' programm Erasmus għar-rappreżentanti eletti lokali u reġjonali;

3. Jisħaq li l-politika ta' koeżjoni tal-UE hija bażi ewlenija għall-integrazzjoni Ewropea u s-solidarjetà soċjali; iqis, għaldaqstant, li għandha titqajjem kuxjenza fost iċ-ċittadini dwar l-isforzi u l-effetti speċifiċi tal-politika tal-Komunità fuq il-ħajja tagħhom ta' kuljum, u b'hekk jiġi enfasizzat il-kontribut tal-UE u l-vantaġġi tal-proġett Ewropew komuni;

4. Jenfasizza li l-involviment ta' partijiet imsieħba fil-preparazzjoni u l-implimentazzjoni tal-programmi operattivi, skont l-Artikolu 11 tar-Regolament Ġenerali dwar il-Fondi Strutturali 2007-2013, jikkontribwixxi b'mod sinifikanti biex titħeġġeġ il-politika ta' koeżjoni tal-UE u biex titqarreb lejn iċ-ċittadini; jenfasizza li dawn il-partijiet imsieħba għandhom opportunità unika biex jaraw b'mod dirett il-kwistjonijiet reali li huma ta' interess prinċipali għaċ-ċittadini; jitlob għaldaqstant, lill-Kummissjoni biex tiżgura li l-prinċipju tas-sħubija jiġi implimentat korrettament f'livelli nazzjonali, reġjonali u lokali; jenfasizza li hu importanti li l-awtoritajiet nazzjonali u reġjonali jagħmlu użu mill-possibilitajiet finanzjarji eżistenti provduti mill-ESF, sabiex itejbu l-ħiliet tal-partijiet imsieħba, speċjalment fir-rigward tat-taħriġ;

5. Jappoġġja l-isforzi tal-Kumitat tar-Reġjuni biex isaħħaħ il-konsultazzjoni f'livell reġjonali u biex jinkludi netwerks reġjonali u parteċipanti lokali u reġjonali prinċipali f'dan il-proċess sabiex jinkoraġġixxi dibattitu fil-livell taċ-ċittadini li jqis l-opinjonijiet u l-interessi tagħhom;

6. Jipproponi l-ħolqien ta' sistema ta' komunikazzjoni permanenti u interattiva bejn l-istituzzjonijiet u ċ-ċittadini Ewropej b'kampanji frekwenti ta' natura lokali u reġjonali mill-UE, bl-assistenza tal-midja reġjonali u l-parteċipazzjoni attiva tas-soċjetà ċivili, l-NGOs, il-kmamar tal-kummerċ, it-trejdunjins u l-organizzazzjonijiet professjonali;

7. Jenfasizza l-bżonn, fil-kuntest tal-elezzjonijiet Ewropej li ħa jsiru dalwaqt, għall-informazzjoni f'livell lokali u reġjonali għaċ-ċittadini, u speċjalment għaż-żgħażagħ, u dawk li ħa jivvutaw għall-ewwel darba; f'kuntest iktar ġenerali, jenfasizza l-importanza tal-involviment tal-MEPs, flimkien mal-uffiċjali eletti lokali u reġjonali, fil-proċess ta' konsultazzjoni maċ-ċittadini fir-reġjuni tagħhom, minħabba li huma l-vuċi tal-pubbliku fl-UE;

8. Jenfasizza l-importanza u l-valur tal-proċess ta' konsultazzjoni bħala għodda effikaċi biex jiġu involuti ("empowering") iċ-ċittadini, billi jkunu mogħtija s-setgħa li jikkontribwixxu b'mod dirett fil-proċess politiku fil-livell tal-Unjoni Ewropea, jistieden lill-Kummissjoni biex tieħu miżuri ġodda biex ixxerred informazzjoni fil-waqt dwar konsultazzjonijiet futuri tal-UE permezz tal-midja u ta' fora oħra adegwati fil-livelli nazzjonali, reġjonali u lokali;

9. Jixtieq li, filwaqt li jkunu qed iseħħu l-kampanji tal-partiti politiċi, il-Membri Parlamentari Ewropej ikunu involuti mill-qrib u fuq il-post fil-kampanja istituzzjonali tal-Unjoni;

10. Jenfasizza l-importanza partikolari tal-ħolqien ta' kollegamenti koeżivi ta' komunikazzjoni b'kontenut maħsub għall-udjenzi partikolari kemm bejn l-UE u r-reġjunijiet b'karatteristiċi partikolari kif ukoll bejn l-UE u gruppi soċjali partikolari;

11. Jinnota li Sena Ewropea għall-Volontarjat tkun opportunità ideali biex l-Istituzzjonijiet tal-UE jikkomunikaw maċ-ċittadini, jirrimarka li l-UE għandha fi ħdanha 'l fuq minn 100 miljun volontarju; jistieden lill-Kummissjoni sabiex tħejji kollox sabiex l-2011 tkun is-Sena Ewropea għall-Volontarjat, billi tressaq mill-aktar fis proposta leġiżlattiva xierqa f'dan ir-rigward;

12. Jenfasizza l-irwol sinifikanti li kellhom il-Fondi Strutturali fit-trawwim tal-kooperazzjoni transkonfinali permezz ta' proġetti u ta' programmi Komunitarji; jenfasizza li dan inkoraġġixxa lill-iżvilupp ta' ċittadinanza attiva u ta' demokrazija parteċipattiva, jitlob lill-Kummissjoni biex tkopli tappoġġja proġetti u programmi ta' dan it-tip u taħdem fi sħab magħhom;

13. Japprova l-idea tal-ħolqien ta' Università Miftuħa Ewropea (European Open University), sakemm din ikollha rabtiet b'saħħithom mar-reġjuni tal-Istati Membri, bl-iskop li tiffaċilita t-taħriġ għaċ-ċittadini u l-informazzjoni, il-komunikazzjoni, l-interattività u l-kollegamenti bejn iċ-ċittadini kollha, partikolarment iż-żgħażagħ fir-reġjuni.

14. Jenfasizza li l-intergruppi tal-Parlament Ewropew iwettqu bis-sħiħ l-irwol tagħhom ta' intermedjarji għaċ-ċittadini, strument li ġenwinament jorbot l-isfera politika mas-soċjetà ċivili.

RIŻULTAT TAL-VOTAZZJONI FINALI FIL-KUMITAT

għall-Kumitat għall-Kultura u l-Edukazzjoni

dwar djalogu attiv maċ-ċittadini dwar l-Ewropa
(2008/2224(INI))

Rapporteur għal opinjoni: Claire Gibault

SUĠĠERIMENTI

Il-Kumitat għad-Drittijiet tan-Nisa u l-Ugwaljanza bejn is-Sessi jistieden lill-Kumitat għall-Kultura u l-Edukazzjoni, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

A. billi, minkejja li ċ-ċittadini huma dejjem iktar infurmati, ħafna drabi huma għadhom imwarrba mill-istrutturi politiki, speċjalment fil-kuntest tal-azzjonijiet imnidija mill-Unjoni Ewropea u fl-Unjoni Ewropea,

1. Ifakkar li l-maġġoranza tan-nisa ivvutaw ‘le’ fl-aħħar referenda dwar l-Ewropa: 56 % fi Franza (Flash Eurobarometre 171), 63 % fl-Olanda (id.172) u 56% fl-Irlanda (id. wara li kkunsidra li din il-votazzjoni negattiva ġejja, fost l-oħrajn, minn involviment dgħajjef tal-istituzzjonijiet Ewropej fil-politiki li jikkonċernaw b’mod dirett in-nisa u li huma l-bażi ta’ inugwaljanzi persistenti bejn is-sessi, bħalma huma l-politiki fir-rigward tar-rikonċiljazzjoni bejn il-ħajja tax-xogħol u dik tal-familja u fir-rigward tal-għajnuna għall-persuni dipendenti ;

2. Jenfasizza li fost is-27 rakkomandazzjoni tal-ittra miftuħa tal-parteċipanti tal-konferenza tal-għeluq tas-sitt proġetti taċ-ċittadini tal-pjan D, bl-isem “Il-futur tal-Ewropa – Proġett għaċ-Ċittadini”, l-Unjoni Ewropea intalbet tieħu azzjoni iktar effikaċi fil-qasam tal-politika soċjali u tal-koeżjoni soċjali, speċjalment bil-għan li jiġu miġġielda d-diskrepanzi fis-salarji u tiġi promossa l-ugwaljanza bejn in-nisa u l-irġiel, filwaqt li b’mod ġenerali tingħata attenzjoni speċifika għal dawn il-kwistjonijiet ta’ ugwaljanza li ħafna drabi huma skartati;

3. jitlob analizi sħiħa tal-parteċipazzjoni tan-nisa fil-proċess tat-teħid ta’ deċiżjoni fl-Ewropa sabiex jiġi identifikat u promoss l-irwol tagħhom bħala fattur li jgħaqqad fis-soċjetà;

4. Jinsisti fuq l-irwol tan-nisa fl-Unjoni u jinkoraġġixxi lill-istituzzjonijiet Ewropej jistabbilixxu, b’koperazzjoni mal-Istati Membri, sistemi sostenibbli li jikkunsidraw ir-relazzjonijiet soċjali u l-inugwaljanzi bejn l-irġiel u n-nisa fil-politiki pubbliċi kollha;

5. Jitlob li l-bniet u n-nisa jkunu infurmati aħjar dwar il-kunċett taċ-ċittadinanza Ewropea u drittijiet relatati magħha, speċjalment fir-reġjuni li huma soċjalment u ġeografikament iżolati; jenfasizza li l-kampanji ta' informazzjoni għandu jkollhom bħala objettiv il-parteċipazzjoni ikbar tan-nisa fil-ħajja politika u fil-proċess tat-teħid ta' deċiżjonijiet;

6. Jifraħ lill-Kummissjoni għall-għażla ta’ proġetti kofinanzjati, fil-qafas ta’ pjan D permezz tar-rappreżentazzjonijiet tagħha, proġetti li jinkludu diversi organizzazzjonijiet femminili u diversi proġetti li jikkonċernaw lin-nisa;

7. Jitlob lill-Kummissjoni biex tippromwovi programmi u kampanji (bħalma huma ‘Id-dinja mill-perspettiva tan-nisa’) li jinkoraġġixxu l-attivitajiet soċjali, politiċi u kulturali tan-nisa, filwaqt li jiġi kkunsidrat l-irwol tan-nisa fid-djalogu bejn il-ġenerazzjonijiet, id-durabilità u l-prosperità tas-soċjetà ;

8. Jinkoraġġixxi lill-istituzzjonijiet Ewropej biex jiżviluppaw iktar milli kampanji ta' komunikazzjoni u ta' marketing, politiki ekonomiċi u soċjali bħala reazzjoni għall-aspettattivi u għall-bżonnijiet taċ-ċittadini tal-Istati Membri; jappoġġja, per eżempju f'dan is-sens, il-proposti tal-Kummissjoni fil-qasam tal-liv parentali li għandhom l-għan li jsaħħu l-prinċipju ta' konċiljazzjoni bejn il-ħajja professjonali u l-ħajja familjali, filwaqt li jippermettu liċ-ċittadini Ewropej biex ikollhom in-numru ta' tfal li jixtiequ u b'hekk jirreaġixxu għad-defiċit demografiku li huma ta' theddida ekonomika u soċjali għall-kontinent tagħna;

9. Jirrikonoxxi l-kompetenzi tan-nisa fir-rigward tas-soluzzjoni tal-problemi u tal-kunflitti u jitlob b'mod immedjat lill-Kummissjoni biex issaħħaħ il-parteċipazzjoni tan-nisa fit-task forces u fil-gruppi ta' ħidma ddedikati għall-ħajja familjali, il-kura tat-tfal, l-edukazzjoni, eċċ.;

10. Jinsisti fuq il-bżonn li tiġi promossa l-parteċipazzjoni taċ-ċittadini nisa u rġiel fosthom fl-oqsma tal-vjolenza relatata mal-ġeneru jew it-traffikar tal-bniedem, għal min l-implikazzjoni tas-soċjetà hija indispensabbli biex javvanzaw fis-soluzzjoni għall-problemi ;

11. Jenfasizza l-bżonn li jiġu promossi l-miżuri bil-għan li jiġu eliminati d-distakki diġitali tal-ġeneru sabiex jingħata lin-nisa, bl-istess kondizzjonijiet, l-għodod tal-parteċipazzjoni għad-djalogu dwar l-Ewropa;

RIŻULTAT TAL-VOTAZZJONI FINALI FIL-KUMITAT

għall-Kumitat għall-Kultura u l-Edukazzjoni

dwar djalogu attiv maċ-ċittadini dwar l-Ewropa
(2008/2224(INI))

Rapporteur:Kathy Sinnott

SUĠĠERIMENTI

Il-Kumitat għall-Petizzjonijiet talab lill-Kumitat għall-Kultura u l-Edukazzjoni, bħala l-kumitat responsabbli, biex fil-mozzjoni tiegħu għal riżoluzzjoni jinkludi dawn is-suġġerimenti li ġejjin:

A. billi l-għarfien tal-Unjoni Ewropea, kemm dwar il-politiki tagħha u kif taħdem, kif ukoll dwar drittijiet garantiti mit-Trattati, huwa fundamentali sabiex iċ-ċittadini jerġgħu jiksbu l-fiduċja fl-istituzzjonijiet Ewropej,

B. billi Unjoni Ewropea demokratika u trasparenti tiddependi mill-progress tad-djalogu bejn iċ-ċittadini u l-istituzzjonijiet Ewropej, inkluż il-Parlament, kif wkoll mid-dibattitu kostanti dwar l-Ewropa fil-livell Ewropew, nazzjonali u lokali,

1. Iqis li hu essenzjali li jkun hemm djalogu attiv bejn l-Unjoni Ewropea u ċ-ċittadini tagħha biex jitwettqu fil-prattika l-prinċipji u l-valuri tal-proġett tal-Unjoni Ewropea, iżda jagħraf li s’issa l-komunikazzjoni ma kellhiex suċċess kbir;

2. Jikkunsidra li sabiex ikun hemm djalogu effettiv jeħtieġ li jkun hemm sistema ta' komunikazzjoni fiż-żewġ direzzjonijiet, li jfisser li għandu jingħata ċ-ċans li jinstema' leħen iċ-ċittadini u li jingħataw tweġibiet xierqa għat-tħassib tagħhom;

3. Jissuġġerixxi li huwa importanti wkoll li tingħata ħarsa lejn x’qegħdin jikkomunikaw l-azzjonijiet u jitqabbel kif dan qiegħed ivarja mill-messaġġ li l-UE trid twassal liċ-ċittadini tagħha;

4. Billi, skont l-Ewrobarometru, 85% tal-adulti jafu li għandhom id-dritt li jibagħtu petizzjonijiet lill-Kummissjoni Ewropea, l-Ombudsman Ewropew u lill‑Parlament Ewropew, bit-23 lingwa uffiċjali, jikkunsidra li l-petizzjonijiet imressqa miċ-ċittadini kif ukoll ix-xogħol tal-Kumitat għall-Petizzjonijiet huma mezzi ewlenin għall-komunikazzjoni diretta tal-UE maċ-ċittadini tagħha; jenfasizza li dan huwa rifless fiż-żieda qawwija fl-għadd ta’ petizzjonijiet imressqa miċ-ċittadini u jemmen li l-għadd u l-importanza tal-petizzjonijiet se jiżdiedu fil-ġejjieni;

5. Ifakkar li d-dritt tal-petizzjoni huwa strument demokratiku essenzjali li l-Unjoni Ewropea toffri liċ-ċittadini tagħha sabiex ikunu jistgħu jiddefendu d-drittijiet tagħhom u li fost il-prijoritajiet ta' kwalunkwe politika komuni għall-komunikazzjoni jeħtieġ li jkun hemm l-inkoraġġiment ta' dan id-dritt u li jiġi żgurat li dan id-dritt jintuża;

6. Ifakkar li l-Parlament, permezz tal-Kumitat għall-Petizzjonijiet, jirċievi l-ilmenti diretti taċ-ċittadini dwar il-ksur mill-awtoritajiet nazzjonali tad-drittijiet li jinsabu fit-Trattati u fil-liġi derivata; għalhekk jissuġġerixxi li l-UE tagħti messaġġ proattiv liċ-ċittadini tagħha billi tenfasizza l-importanza tax-xogħol tal-Kumitat għall-Petizzjonijiet;

7. Jipproponi li, biex dan isir, iridu jingħataw aktar riżorsi lis-Segretarjat tal-Kumitat għall-Petizzjonijiet, li diġà hu mgħobbi wisq b'xogħol, sabiex il-mod kif jiġu mistħarrġa l-petizzjonijiet iwassal għal soluzzjonijiet konkreti u mgħaġġla, biex hekk jintbagħat messaġġ ċar dwar l-Ewropa u jkun hemm l-ogħla livell possibbli ta' komunikazzjoni permezz tal-azzjoni;

8. Jilqa’ l-web-streaming tal-proċedimenti tal-Kumitat għall-Petizzjonijiet bħala żvilupp pożittiv u xieraq li se jżid il-kuntatt, il-fehim u t-trasparenza fil-qasam tal-komunikazzjoni u jżid il-parteċipazzjoni taċ-ċittadini fil-proġett tal-Unjoni Ewropea, kif tixhed iż-żieda fl-għadd ta’ petizzjonijiet sena wara l-oħra; jikkunsidra li din il-prospettiva ssaħħaħ aktar il-ħtieġa li jiġu allokati aktar riżorsi umani lill-Kumitat għall-Petizzjonijiet;

9. Jirrakkomanda li għandha tittejjeb il-proċedura tat-trattament tal-petizzjonijiet billi tiġi mħeġġa ħafna, sa mill-ewwel fażijiet tal-proċess, koperazzjoni istituzzjonalizzata mar-rappreżentanti uffiċjali tal-Istati Membri meta dan ikun meqjus meħtieġ mill-Kumitat għall-Petizzjonijiet;

10. Jagħraf li l-Kumitat għall-Petizzjonijiet għandu jagħti aktar attenzjoni lill-petizzjonijiet kollha, iżda jirrakkomanda tweġiba aktar proattiva għal-petizzjonijiet validi bl-involviment tal-Kumitat għall-Petizzjonijiet tul l-istadji kollha tal-proċess tal-petizzjoni sal-konklużjoni tagħha; jemmen li stħarriġ sistematiku bħal dan u li jkollu segwitu bir-reqqa, jista' jgħolli l-profil ta’ dan il-mezz ta' komunikazzjonijiet u jżied il-komunikazzjoni permezz tal-azzjoni;

11. Jemmen li għandha tingħata kunsiderazzjonijiet speċjali lill-Inizjattiva taċ-Ċittadini; iqis ukoll barra minn hekk li dan l-istrument ġdid ta’ parteċipazzjoni jista’ jitqies biss bħala demokratiku jekk il-Kummissjoni tkun obbligata tressaq proposti leġiżlattivi bħala reazzjoni għall-inizjattivi ffirmati minn miljun ċittadin; jemmen ukoll li l-Inizjattivi taċ-Ċittadini, bħala regola, għandhom ikunu referuti lill-Kumitat għall-Petizzjonijiet.

12. Jisħaq fuq il-ħtieġa li Membri tal-Parlament jinvolvu ruħhom aktar fil-proċess ta' komunikazzjoni maċ-ċittadini tal-Unjoni Ewropea, kif ukoll li jsiru bidliet fl-organizzazzjoni tax-xogħol tal-Parlament sabiex il-Membri Parlamentari jkunu jistgħu jimpenjaw ruħhom fi djalogu maċ-ċittadini fl-aktar l-livell lokali possibbli;

RIŻULTAT TAL-VOTAZZJONI FINALI FIL-KUMITAT

Data tal-adozzjoni

Riżultat tal-votazzjoni finali

+:

–:

0:

Membri preżenti għall-votazzjoni finali

Enrique Barón Crespo, Richard Corbett, Jean-Luc Dehaene, Andrew Duff, Anneli Jäätteenmäki, Aurelio Juri, Sylvia-Yvonne Kaufmann, Timothy Kirkhope, Jo Leinen, Íñigo Méndez de Vigo, Ashley Mote, Adrian Severin, József Szájer, Riccardo Ventre, Andrzej Wielowieyski

Sostitut(i) preżenti għall-votazzjoni finali

Costas Botopoulos, Panayiotis Demetriou, Roger Helmer, Klaus-Heiner Lehne, Gérard Onesta, Sirpa Pietikäinen, Kathy Sinnott, Mauro Zani

Avviż legali - Politika tal-privatezza