dwar il-proposta għal regolament tal-Kunsill li jemenda r-Regolament tal-Kunsill (KE) Nru 332/2002 li jistabbilixxi faċilità li tipprovdi għajnuna finanzjarja għal żmien medju għall-bilanċi ta' pagament tal-Istati Membri

(COM(2009)0169 – C6-0134/2009 – 2009/0053(CNS))

(Proċedura ta' konsultazzjoni)

Il-Parlament Ewropew,

–   wara li kkunsidra l-proposta tal-Kummissjoni lill-Kunsill (COM(2009)0169),

–   wara li kkunsidra l-Artikolu 308 tat-Trattat KE, skont liema artikolu ġie kkonsultat mill-Kunsill (C6-0134/2009),

–   wara li kkunsidra r-Regolament tal-Kunsill (KE) Nru 332/2002 tat-18 ta' Frar 2002 li jistabbilixxi faċilità li tipprovdi għajnuna finanzjarja għal żmien medju għall-bilanċi tal-pagamenti tal-Istati Membri(1) u l-pożizzjoni tiegħu tas-6 ta' Settembru 2001 dwar il-proposta għal regolament tal-Kunsill li jistabbilixxi faċilità dwar għajnuna finanzjarja għal żmien medju għall-bilanċi ta' pagament tal-Istati Membri(2),

–   wara li kkunsidra l-pożizzjoni tiegħu tal-20 ta' Novembru 2008(3) dwar il-proposta għal regolament tal-Kunsill li jemenda r-Regolament (KE) Nru 332/2002 u r-riżoluzzjoni tiegħu tal-istess jum dwar it-twaqqif ta’ faċilità li tipprovdi għajnuna finanzjarja għal żmien medju għall-bilanċi ta' pagament tal-Istati Membri(4),

–   wara li kkunsidra l-opinjoni tal-Bank Ċentrali Ewropew tal-20 ta' April 2009 dwar il-proposta għal regolament tal-Kunsill li jemenda r-Regolament (KE) Nru 332/2002 li jistabbilixxi faċilità li tipprovdi għajnuna finanzjarja għal żmien medju għall-bilanċi ta' pagament tal-Istati Membri,

–   wara li kkunsidra l-Artikoli 51 u 134 tar-Regoli ta' Proċedura tiegħu,

–   wara li kkunsidra r-rapport tal-Kumitat għall-Affarijiet Ekonomiċi u Monetarji (A6-0268/2009),

1.  Japprova l-proposta tal-Kummissjoni kif emendata;

2.  Jistieden lill-Kummissjoni sabiex konsegwentement tbiddel il-proposta tagħha, skont l-Artikolu 250(2) tat-Trattat KE;

3.  Jistieden lill-Kunsill biex jinfurmah jekk ikollu l-ħsieb li jitbiegħed mit-test approvat mill-Parlament;

4.  Jitlob lill-Kunsill biex jerġa' jikkonsultah jekk ikollu l-ħsieb li jemenda l-proposta tal-Kummissjoni b'mod sustanzjali;

5.  Jagħti istruzzjonijiet lill-President tiegħu sabiex jgħaddi l-pożizzjoni tal-Parlament lill-Kunsill, lill-Kummissjoni u lill-gvernijiet tal-Istati Membri.

(1) ĠU L 53, 23.2.2002, p. 1. (2) ĠU C 72 E, 21.3.2002, p. 312. (3) Testi adottati, P6_TA(2008)0560. (4) Testi adottati, P6_TA(2008)0562.

Ir-Regolament tal-Kunsill (KE) Nru 332/2002 jistabbilixxi, fuq il-bażi tal-Artikoli 119 u 308 tat-Trattat, faċilità li tipprovdi għajnuna finanzjarja għal żmien medju għall-bilanċi tal-pagament tal-Istati Membri, li tieħu post l-istrument preċedenti maħluq mir-Regolament tal-Kunsill Nru 1969/88. Din il-faċilità timplimenta l-mekkaniżmu previst fl-Artikolu 119 tat-Trattat, li bih il-Komunità tista’ tagħti għajnuna reċiproka lil Stat Membru "li jinsab f'diffikultajiet jew li jkun mhedded serjament b’diffikultajiet fir-rigward tal-bilanċ tal-pagamenti tiegħu bħala riżultat ta' skwilibriju ġenerali fil-bilanċ tal-pagamenti tiegħu jew bħala riżultat tat-tip ta’ munita li jkollu għad-dispożizzjoni tiegħu”, sakemm dan l-Istat Membru ma jkunx jagħmel parti miż-żona tal-ewro.

Bl-adozzjoni ta' dan ir-Regolament fi Frar 2002 il-limitu minimu li kien jeżisti fir-regolament preċedenti tniżżel minn EUR 16-il biljun għal EUR 12-il biljun minħabba d-dħul fis-seħħ tal-ewro, u b'hekk il-Membri li kienu jinsabu fiż-żona tal-ewro ma kinux aktar eliġibbli għad-dispożizzjonijiet tal-Artikolu 119 marbuta mal-bilanċ tal-pagamenti. Minn dak iż-żmien l-UE kibret u l-għadd ta' Stati Membri li ma jipparteċipawx fl-Unjoni Ekonomika u Monetarja żdied b'mod sostanzjali. F’dak l-isfond u minħabba l-evoluzzjoni tal-kuntest finanzjarju internazzjonali, il-Kunsill iddeċieda li jżid, fil-bidu ta’ Diċembru 2008, il-limitu massimu tal-għajnuna finanzjarja ġenerali għal EUR 25 biljun mit-EUR 12-il-biljun oriġinali, bil-Parlament Ewropew jagħti opinjoni favorevoli permezz ta’ proċedura urġenti.

Barra minn hekk, il-Kunsill Ewropew tad-19 u l-20 ta’ Marzu stieden lill-Kummissjoni u lill-Kunsill biex jieħdu miżuri meħtieġa sabiex ikunu ppreparati, jekk ikun meħtieġ, biex jaġixxu każ b’każ, fuq il-bażi tal-istrumenti kollha disponibbli u fejn xieraq f’koperazzjoni mill-qrib mal-Istituzzjonijiet Finanzjarji Internazzjonali, waqt li enfasizza li “b’mod partikolari, il-Komunità tinsab lesta biex tipprovdi għajnuna għall-bilanċ tal-pagamenti lil Stati Membri eliġibbli li jeħtiġuha u, għal dan il-għan, tilqa’ b’sodisfazzjon l-intenzjoni tal-Kummissjoni li tressaq proposta biex tirdoppja l-limitu massimu tal-faċilità ta’ appoġġ tal-Unjoni ta’ għajnuna għall-bilanċ tal-pagamenti, għal EUR 50 biljun”. Il-proposta l-ġdida tal-Kummissjoni li tirdoppja l-limitu massimu għandha bħala sfond il-prospetti finanzjarji internazzjonali li qegħdin jeħżienu u n-negozjati għal għajnuna finanzjarja għal żmien medju għar-Rumanija, li għaliha l-UE għandha l-ħsieb li tipprovdi sa EUR 5 biljun.

S’issa, l-UE laħqet ukoll ftehim li tagħti self BoP ta’ EUR 6.5 biljun lill-Ungerija u ta’ EUR 3.1 biljun lil-Latvja.

Ir-rapporteur tqis li hu raġonevoli li l-limitu massimu jkun irdoppjat, u jitla’ għal EUR 50 biljun, u li jkunu ċċarati xi kompiti u responsabilitajiet.