dwar spinta ġdida għall-Istrateġija għall-Iżvilupp Sostenibbli tal-Akkwakultura Ewropea

(2009/2107(INI))

Il-Parlament Ewropew,

–   wara li kkunsidra l-Komunikazzjoni tal-Kummissjoni bit-titolu 'Il-bini ta' futur sostenibbli għall-akkwakultura: Spinta ġdida għall-Istrateġija għall-Iżvilupp Sostenibbli tal-Akkwakultura Ewropea (COM(2009)0162),

–   wara li kkunsidra r-Regolament tal-Kummissjoni (KE) Nru 710/2009 tal-5 ta' Awwissu 2009 li jemenda r-Regolament (KE) Nru 889/2008 li jistabbilixxi regoli ddettaljati għall-implimentazzjoni tar-Regolament tal-Kunsill (KE) Nru 834/2007, f’dak li għandu x’jaqsam mal-iffissar ta’ regoli ddettaljati dwar il-produzzjoni organika tal-annimali tal-akkwakultura u tal-alka tal-baħar(1),

–   wara li kkunsidra l-Proposta għal Regolament tal-Kunsill li jemenda r-Regolament (KE) Nru 708/2007 dwar l-użu ta' speċijiet aljeni u li ma jinstabux lokalment fl-akkwakultura (COM(2009)0541),

–   wara li kkunsidra r-Regolament tal-Kummissjoni (KE) Nru 257/2009 tal- 24 ta' Marzu 2009 li jemenda r-Regolament (KE) Nru 794/2004 dwar il-folja ta' informazzjoni supplimentari għan-notifikazzjoni tal-għajnuna għas-sajd u l-akkwakultura(2),

–   wara li kkunsidra r-Regolament tal-Kummissjoni (KE) Nru 248/2009 tad-19 ta’ Marzu 2009 li jistabbilixxi regoli dettaljati għall-applikazzjoni tar-Regolament tal-Kunsill (KE) Nru 104/2000 fejn jirrigwarda n-notifiki li jikkonċernaw l-għarfien tal-organizzazzjonijiet tal-produtturi, l-iffissar tal-prezzijiet u l-intervent fi ħdan l-iskop tal-organizzazzjoni komuni tas-suq tal-prodotti tas-sajd u tal-akkwakultura (Riformulazzjoni)(3),

–   wara li kkunsidra d-Direttiva tal-Kunsill 2006/88/KE, fir-rigward tar-rekwiżiti għall-kwarantina tal-annimali tal-akkwakultura, u d-Deċiżjoni tal-Kummissjoni 2008/946/KE tat-12 ta' Diċembru 2008 li timplimenta din id-direttiva(4),

–   wara li kkunsidra d-Direttiva 2000/60/KE tal-Parlament Ewropew u tal-Kunsill tat-23 ta' Ottubru 2000 li tistabbilixxi qafas għal azzjoni Komunitarja fil-qasam tal-politika tal-ilma(5),

–   wara li kkunsidra r-Regolament (KE) Nru 66/2010 tal-Parlament Ewropew u tal-Kunsill tal-25 ta' Novembru 2009 dwar skema ta’ Ekotikketta tal-UE(6),

–   wara li kkunsidra r-Regolament tal-Kunsill (KE) Nru 834/2007 tat-28 ta' Ġunju 2007 dwar il-produzzjoni organika u t-tikkettar ta' prodotti organiċi(7),

–   wara li kkunsidra r-Regolament tal-Kummissjoni (UE) Nru 271/2010 tal-24 ta' Marzu 2010 li jemenda r-Regolament (KE) Nru 889/2008 li jistabbilixxi regoli ddettaljati għall-implimentazzjoni tar-Regolament tal-Kunsill (KE) Nru 834/2007, f’dak li għandu x’jaqsam mal-logo tal-produzzjoni organika tal-Unjoni Ewropea(8),

–   wara li kkunsidra r-Regolament tal-Kummissjoni (KE) Nru 1251/2005 tat-12 ta’ Diċembru 2008 li jimplimenta d-Direttiva tal-Kunsill 2006/88/KE fir-rigward tal-kundizzjonijiet u r-rekwiżiti taċ-ċertifikazzjoni għat-tqegħid fis-suq u l-importazzjoni fil-Komunità ta’ annimali tal-akkwakultura u tal-prodotti tagħhom u li jistabbilixxi lista ta’ speċijiet li jgħaddu l-mard(9),

–   wara li kkunsidra l-komunikazzjonijiet tal-Kummissjoni bit-titlu ‘Linjigwida għal Strateġija Integrata għall-Politika Marittima: Lejn l-aqwa prassi fil-governanza marittima integrata u l-konsultazzjoni mal-partijiet interessati’ (COM(2008)0395), ‘Pjan ta’ Tmexxija għall-Ippjanar Spazjali Marittimu: Il-ksib ta' Prinċipji Komuni fl-UE’ (COM(2008)0791) u ‘Niżviluppaw id-dimensjoni internazzjonali tal-Politika Marittima Integrata għall-Unjoni Ewropea’ (COM(2009)0536), u r-Rapport tal-Progress tal-Politika Marittima Integrata tal-UE (COM(2009)0540),

–   wara li kkunsidra r-Rapporti u l-Opinjonijiet Xjentifiċi tal-Awtorità Ewropea dwar is-Sigurtà fl-Ikel (EFSA) tal-2008 dwar sitta mill-ispeċijiet ewlenin tal-ħut li jitrabbew għall-ikel fl-UE u l-Opinjonijiet Xjentifiċi tal-EFSA tal-2009 dwar il-benessri fil-punt tal-qatla ta’ tmien speċijiet ta’ ħut li jitrabbew għall-ikel,

–   wara li kkunsidra r-riżoluzzjoni tiegħu tal-25 ta' Frar 2010(10) dwar il-Green Paper tal-Kummissjoni dwar ir-riforma tal-politika komuni tas-sajd (COM(2009)0163),

–   wara li kkunsidra r-riżoluzzjoni tiegħu tal-4 ta' Diċembru 2008(11) dwar l-adozzjoni ta' Pjan Ewropew ta' Kontroll tal-Istokkijiet tal-Marguni,

–   wara li kkunsidra r-riżoluzzjoni tiegħu tat-2 ta' Settembru 2008(12) dwar is-Sajd u l-Akkwakultura fil-kuntest ta' Amministrazzjoni Integrata taż-Żona Kostali fl-Ewropa,

–   wara li kkunsidra r-riżoluzzjoni leġiżlattiva tiegħu tal-31 ta' Jannar 2008(13) dwar il-proposta għal regolament tal-Parlament Ewropew u tal-Kunsill dwar il-preżentazzjoni ta' statistiki mill-Istati Membri dwar l-akkwakultura,

–   wara li kkunsidra r-riżoluzzjoni tiegħu tat-12 ta' Diċembru 2007(14) dwar l-organizzazzjoni komuni tas-suq fis-settur tal-prodotti tas-sajd u tal-akkwakultura,

–   wara li kkunsidra r-riżoluzzjoni tiegħu tas-7 ta' Settembru 2006(15) dwar it-tnedija ta' dibattitu dwar approċċ Komunitarju rigward skemi ta' ekotikkettar għall-prodotti tas-sajd,

–   wara li kkunsidra r-riżoluzzjoni tiegħu tas-16 ta' Jannar 2003(16) dwar l-akkwakultura fl-Unjoni Ewropea: il-preżent u l-futur,

–   wara li kkunsidra l-Linji Gwida għall-eżaminar tal-għajnuna mill-Istat għas-sajd u għall-akkwakultura(17) u l-aċċettazzjoni tal-Linji Gwida mill-Istati Membri(18),

–   wara li kkunsidra t-Trattat FUE u r-riżoluzzjoni tiegħu tas-7 ta' Mejju 2009 dwar l-irwol u r-responsabilitajiet ġodda tal-Parlament fl-implimentazzjoni tat-Trattat ta' Lisbona(19),

–   wara li kkunsidra r-rapport tar-raba' Sessjoni tas-Sottokumitat tal-FAO dwar l-Akkwakultura(20),

–   wara li kkunsidra l-Kodiċi ta' Kondotta tal-FAO għal Sajd Responsabbli(21),

–   wara li kkunsidra l-Artikolu 48 tar-Regoli ta' Proċedura tiegħu,

–   wara li kkunsidra r-rapport tal-Kumitat għas-Sajd u l-opinjoni tal-Kumitat għall-Ambjent, is-Saħħa Pubblika u s-Sikurezza tal-Ikel (A7-0150/2010),

A. billi fil-preżent mhemmx qafas leġiżlattiv speċifiku u armonizzat għas-settur tal-akkwakultura: billi minflok, dan is-settur huwa kopert minn diversi testi leġiżlattivi tal-UE f'oqsma differenti (l-ambjent, is-saħħa pubblika, eċċ.) u minn leġiżlazzjoni nazzjonali li tista' tvarja b'mod notevoli minn Stat Membru għal ieħor, u b'hekk tinħoloq konfużjoni bejn l-operaturi fis-settur, apparti li tikkawża diskriminazzjoni u tgħawwiġ fis-suq,

B.  billi, f’dan il-kuntest, l-aktar pass xieraq hu li l-Kummissjoni tipproponi regolament li jistipula r-regoli għas-settur tal-akkwakultura u b’hekk iddaħħal iċ-ċarezza leġiżlattiva meħtieġa,

C. billi s-settur tal-akkwakultura huwa settur ekonomiku, innovattiv u potenzjalment ta' teknoloġika sofistikata li jirrikjedi investiment strutturali u riċerka intensiva u ppjanar għal żmien twil operattiv u finanzjarju, u għaldaqstant jeħtieġ ukoll ċertezza legali u oqsfa leġiżlattivi ċari u stabbli,

D. billi s-settur tal-akkwakultura jinteraġixxi b'mod dirett ma' oqsma tal-politika li huma importanti ħafna għas-soċjetà tagħna, bħall-ambjent, it-turiżmu, l-ippjanar urban, l-iżvilupp reġjonali, is-saħħa pubblika u l-ħarsien tal-konsumatur; billi għaldaqstant huwa essenzjali li jitqiesu sewwa l-interessi tas-settur u li dan is-settur jiġi ttrattat b'mod ġust,

E.   billi l-forom kollha tal-akkwakultura għandhom ikunu sostenibbli u ġusti soċjalment u, b’konsegwenza ta’ dan, m’għandha ssir l-ebda ħsara lill-ekosistemi biż-żieda fil-konċentrazzjonijiet tas-sustanzi naturali u fil-konċentrazzjonijiet tas-sustanzi li jiġu prodotti mill-bniedem, bħal kimiċi mhux degradabbli u diossidu tal-karbonju, u permezz ta’ tfixkil fiżiku,

F.  billi l-Komunikazzjoni tal-Kummissjoni tal-2002 uriet ċar li mhix adegwata biex tinkuraġġixxi lill-Istati Membri sabiex jagħtu spinta sinifikanti lill-iżvilupp tas-settur tal-akkwakultura tal-UE, filwaqt li f'dawn l-aħħar għaxar snin kien hemm tkabbir sostanzjali tas-settur mad-dinja kollha, flimkien ma' tkabbir fid-domanda għall-prodotti tas-sajd, kemm għal dawk tal-akkwakultura u kemm għall-ħut selvaġġ, b'żieda kbira fl-importazzjoni ta' prodotti bħal dawn minn pajjiżi ta' barra l-UE,

G. billi l-UE hija importatur nett tal-prodotti tas-sajd u tal-akkwakultura, u d-domanda għal dawn il-prodotti qed tiżdied kemm globalment, minħabba ż-żieda fil-popolazzjoni dinjija, kif ukoll fuq livell Komunitarju minħabba l-adeżjonijiet tal-imgħoddi u ġejjiena fl-UE ta’ pajjiżi li fihom din it-tendenza ta’ domanda hija aktar aċċentwata, kif ukoll minħabba li x-xejriet tal-konsum qed jinbidlu lejn ikel ibbażat fuq prodotti aktar tajbin għas-saħħa,

H.  billi, barra minn hekk, hemm bżonn ta’ sistema ta’ ċertifikazzjoni affidabbli għall-prodotti tal-akkwakultura,

I.   billi s-settur tal-akkwakultura sostenibbli tal-Komunità jista' jagħti kontribut kbir biex jiżgura provvisti tal-ikel ta' kwalità għolja fir-rigward tal-prodotti tal-ħut u b'hekk inaqqas il-pressjoni fuq l-ispeċijiet selvaġġi billi jiddiversifika l-provvista tal-prodotti tas-sajd u tal-akkwakultura, apparti li għandu rwol importanti fir-rigward tas-sigurtà tal-ikel, tal-attivitajiet ekonomiċi u tal-impjiegi, b'mod speċjali f'reġjuni rurali u tal-kosta,

J.   billi l-UE għandha għaldaqstant tagħti importanza strateġika akbar lis-settur tal-akkwakultura sostenibbli u lill-iżvilupp tiegħu, filwaqt li tipprovdi lis-settur bl-għajnuna finanzjarja meħtieġa, filwaqt li jibqa’ jitqies li t-teknoloġija għolja meħtieġa mill-attivitajiet tal-akkwakultura spiss tinvolvi investiment sostanzjali minn kumpaniji, ikunu ta’ liema daqs ikunu,

K. billi, minħabba l-importanza li jiġi żviluppat settur tal-akkwakultura, il-Kummissjoni hija mħeġġa li tiddedika parti mill-Fond Ewropew għas-Sajd għal dan il-għan; billi l-istrumenti relevanti jeħtieġ li jkunu flessibbli u effikaċi biżżejjed biex jiggarntixxu l-iżvilupp tas-settur, inkluża r-riċerka xjentifika,

L.  billi r-riċerka kunsiderevoli u l-innovazzjoni teknoloġika meħtieġa biex tkun żgurata l-kompetittività u s-sostenibilità tal-akkwakultura u biex ikun possibbli li l-operaturi jagħmlu suċċess fis-settur jinsabu lil hinn mill-possibilitajiet ta' bosta kumpaniji fis-settur, irrelevanti jekk dawn ikunux SMEs jew impriżi kbar,

M. billi, biex tkun effettiva, politika tal-akkwakultura sostenibbli jeħtieġ tkun strutturata b'mod li tgawdi u tippromwovi l-involviment multidixxiplinarju u kkoordinat tas-setturi kollha relatati mal-attività,

N. billi l-UE diġà qed tapplika politika ta' appoġġ għall-agrikoltura organika u għall-prodotti tal-akkwakultura orġaniċi permezz tal-implimentazzjoni tar-Regolamenti Nri 834/2007, 889/2008 u 710/2009, bħala ċ-ċavetta għal settur tal-akkwakultura Ewropew, li jkun sostenibbli, li hija marbuta mill-qrib mal-idea li l-prodott jitjieb kemm jista' jkun ħalli jsir aktar kompetittiv u titjieb il-ħarsien tal-konsumaturi u anke l-informazzjoni u l-libertà tal-għażla tal-konsumaturi,

O. billi kwalunkwe politika tal-akkwakultura sostenibbli, fil-livell Komunitarju u kemm fil-livell lokali, trid tqis id-distinzjonijiet bejn id-diversi tipi ta' prodotti tal-akkwakultura (il-ħut tal-ilma baħar, il-ħut tal-ilma ħelu, il-molluski, il-krustaċji, l-algi u l-ekinodermi), b'miżuri adatti kif jixraq għall-istrutturi u għall-kwistjonijiet tas-swieq u tal-kompetizzjoni,

P.  billi l-miżuri għall-promozzjoni tal-iżvilupp tal-akkwakultura sostenibbli għandhom f’xi każijiet iqisu l-ħtieġa li jitnaqqsu kemm jista’ jkun il-livelli ta' stress ikkawżati mid-densità tal-farm jew tat-trasport u li jinstabu metodi ta' qtil inqas krudili, u l-benessri tal-ħut b'mod ġenerali,

Q. billi l-Artikolu 13 tat-Trattat dwar il-Funzjonament tal-Unjoni Ewropea jagħraf lill-ħut bħala ħlejjaq senzjenti u jipprevedi li l-Unjoni u l-Istati Membri għandhom, meta jfasslu u jimplimentaw il-politiki tagħhom dwar is-sajd, iqisu bis-sħiħ il-ħtiġijiet ta’ benessri tal-annimali,

R.  billi f'ħafna pajjiżi tal-UE, l-operaturi tal-akkwakultura huma mtaqqla minn ostakli burokratiċi eċċessivi u piżijiet amministrattivi li jirriżultaw mill-qafas legali eżistenti, li jillimitaw il-produttività u l-kompetittività tal-impriżi tagħhom, u b'hekk jiskuraġġixxu lill-investituri,

S.  billi l-ħut huma d-dieta naturali ta’ ħafna speċijiet ta’ ħut imrobbija fil-farms u l-biċċa l-kbira tal-farms jiddependu fuq dieti li fihom xi ikel mill-ħut jew żejt tal-ħut,

T.  billi fl-istess waqt, ħafna pajjiżi tal-UE mgħandhomx pjanijiet tal-iżvilupp nazzjonali jew reġjonali speċifiċi li jirregolaw l-impjanti f'żoni kontinentali, kostali jew marittimi u li jiddefinixxu b'mod ċar iż-żoni disponibbli għall-impjanti tal-akkwakultura, bil-għan li jiġu evitati l-kunflitti ta' interess faċilment prevedibbli mal-politiki tal-ħarsien ambjentali u setturi ekonomiċi oħra, bħat-turiżmu, l-agrikoltura u s-sajd mal-kosta,

U. billi politika tal-akkwakultura sostenibbli tista' teżisti flimkien ma' żoni Natura 2000 u tista' anke tikkontribwixxi b'mod pożittiv għall-ġestjoni tagħhom f'każijiet fejn l-għanijiet tal-konservazzjoni tas-sit jippermettu, u għall-benessri tal-popolazzjonijiet ikkonċernati meta tittratta attivitajiet tradizzjonali tas-sajd għall-frott tal-baħar jew meta tipprovdi għal impjanti tal-akkwakultura ta’ daqs xieraq li għalihom mhemmx siti alternattivi, li jirrispettaw ir-regoli Komunitarji dwar l-istimi tal-impatt ambjentali u huma kompatibbli mad-dispożizzjonijiet dwar il-ħarsien tal-ħabitats,

V. billi l-prodotti tal-UE fil-mument qegħdin iħabbtu wiċċhom ma' kompetizzjoni qawwija minħabba l-importazzjonijiet minn pajjiżi ta' barra l-UE, b'mod speċjali mit-Turkija, miċ-Ċilì, mill-Vjetnam u miċ-Ċina, fejn il-kumpaniji jistgħu joperaw b'ħafna inqas spejjeż peress li mhumiex soġġetti għall-istess limitazzjonijiet legali, għall-istess liġijiet ambjentali u fitosanitarji stretti, u jistgħu iħallsu salarji baxxi (dumping soċjali), u b'hekk ipoġġu lis-settur tal-akkwakultura tal-UE taħt aktar pressjoni, u dan jaffettwa l-kwalità tal-ikel u jipperikola s-saħħa tal-konsumaturi,

W. billi l-attivitajiet tal-akkwakultura għandhom impatt ambjentali aktar baxx minn ta’ setturi primarji oħrajn, u għaldaqstant il-prodotti tal-akkwakultura huma aktar sostenibbli; billi sezzjoni tas-soċjetà ċivili Ewropea mhix konxja ta’ dan il-fatt, li jista’ jwassal għal preġudizzji bla bażi dwar dawn il-prodotti,

X. billi l-ħsara minħabba l-marguni qed thedded, f’ħafna żoni, l-attività tradizzjonali u naturali tas-sajd fl-għadajjar tal-ħut,

ĠENERALI

1.  Jilqa' l-inizjattiva tal-Kummissjoni li tressaq il-Komunikazzjoni COM(2009)0162 imsemmija hawn fuq, bħala indikazzjoni li qiegħda tingħata aktar attenzjoni lis-settur tal-akkwakultura sostenibbli, u jittama li din se twassal għal reviżjoni leġiżlattiva li tkun aktar adatta għall-ħtiġiet u l-isfidi li qiegħed iħabbat wiċċu magħhom is-settur, bil-għan li jiġi kkonsolidat fil-livell globali;

2.  Jirrimarka li bid-dħul fis-seħħ tat-Trattat ta' Lisbona, il-Parlament Ewropew ma għadux entità konsultattiva fis-settur tas-sajd, u li sar koleġiżlatur fis-settur tal-akkwakultura wkoll;

3.  Iqis li kwalunkwe riforma leġiżlattiva tas-settur tal-akkwakultura għandha tkun kumpatibbli, b'mod faċli u kumplimentari, mal-proċess attwali tar-riforma tal-PKS;

4.  Jindika li l-Parlament fil-imgħoddi diġà kien ġibed l-attenzjoni rigward il-ħtieġa ta' leġiżlazzjoni aktar konċiża, konsistenti u trasparenti dwar l-akkwakultura;

5.  Jesprimi l-fehma li settur tal-akkwakultura sostenibbli u b'saħħtu jista' jkun katalist għall-iżvilupp ta' ħafna nħawi remoti, kostali u rurali fl-Istati Membri u jgħin fl-iżvilupp tal-produzzjoni relatati, b’benefiċċji sinifikanti għall-konsumaturi wkoll, f’sura ta’ prodotti tal-ikel ta’ kwalità għolja, tajbin għas-saħħa u prodotti b’mod sostenibbli;

6.  Iqis li l-kompetittività tal-akkwakultura tal-Komunità għandha tissaħħaħ permezz ta’ appoġġ qawwi, attiv, kostanti u li jkun iffukat għar-riċerka u għall-iżvilupp teknoloġiku, li hu prerekwiżit essenzjali għall-iżvilupp ta' settur tal-akkwakultura li jkun sostenibbli, modern, effiċjenti, ekonomikament vijabbli u b'kuxjenza ambjentali; jinnota wkoll li n-netwerks ta’ riċerka, il-gruppi ta’ riċerka multidixxiplinarji, it-trasferiment tat-teknoloġija u l-koordinament bejn is-settur u x-xjenzjati permezz ta’ pjattaformi tat-teknoloġija huma essenzjali biex jiggarantixxu li l-investiment fl-R&Ż jagħtu riżultati tajbin;

7.  Jilqa’ l-ħolqien tal-Pjattaforma Ewropea għat-Teknoloġija u l-Innovazzjoni fl-Akkwakultura, filwaqt li titqies il-ħtieġa li s-settur tal-akkwakultura jkun appoġġjat bl-eċċellenza fir-riċerka u l-innovazzjoni sabiex jirrispondi għall-isfidi li jinħolqu;

8.  Iqis li s-suċċess tas-settur tal-akkwakultura sostenibbli Ewropew se jiddependi ħafna mill-bini, fil-livell nazzjonali u lokali, ta' ambjent li jiffaċilita aktar in-negozju, u għaldaqstant jistieden lill-Istati Membri biex, mingħajr dewmien iħaffu f’xogħolhom għal dan il-għan u jippromwovu l-iskambji tal-esperjenzi u tal-aħjar prattiki fil-livell tal-UE;

9.  Jenfasizza li t-tnaqqas tal-burokrazija jinkuraġġixxi l-investiment fis-settur u jqis li hu essenzjali li l-Istati Membri, f’kooperazzjoni mill-qrib mal-awtoritajiet lokali, jimplimentaw proċeduri ta' simplifikazzjoni amministrattiva malajr kemm jista' jkun, filwaqt li jintroduċu proċeduri ta' konċessjoni trasparenti u standardizzati fir-rigward tal-applikazzjonijiet għall-ħolqien ta' impjanti ġodda tal-akkwakultura;

10. Iqis li settur tal-akkwakultura sostenibbli u organiku għandu jkun f'pożizzjoni li jipprovdi lill-konsumaturi prodotti tal-ikel ta' kwalità għolja li jiżguraw nutriment tajjeb għas-saħħa u bbilanċjat;

11. Iqis li s-sistemi tal-akkwakultura li jnaqqsu l-qabda tas-sajd jew li jniġġsu l-baħar max-xtut għandhom jitqiesu bħala mhux sostenibbli u li l-akkwakultura Ewropea għandha tagħti prijorità lil speċijiet erbivori u lil speċijiet karnivori li jistgħu jgħixu fuq konsum imnaqqas ta’ ikel li ġej mill-ħut u ta’ żejt tal-ħut;

12. Jenfasizza li, sabiex tikber l-industrija tal-akkwakultura fl-Ewropa, is-settur jiddependi minn żvilupp kontinwu biex il-fattur tal-konverżjoni tal-għalf għall-prodott (FCR) tal-proteina miksuba mis-sajd fis-selvaġġ; isemmi l-fatt li l-istokkijiet tal-ħut selvaġġ adatt għall-produzzjoni tal-għalf huma limitati u f’ħafna każijiet isir wisq sajd fihom u għaldaqstant, l-iżvilupp tal-akkwakultura għandu jiffoka aktar fuq l-ispeċijiet erbivori u fuq l-ispeċijiet li jieklu l-ħut, biex b’hekk jonqos aktar il-fattur tal-għalf;

13. Iqis li huwa urġenti u indispensabbli li jiġu introdotti u msaħħa l-kriterji rigorużi u trasparenti dwar il-kwalità u t-traċċabilità tal-prodotti tal-akkwakultura tal-UE, li jitjieb l-għalf, u li jiddaħħlu u jissaħħu l-kriterji tat-tikkettar għall-prodotti tal-akkwakultura ta' kwalità għolja u għall-produzzjoni tal-akkwakultura organika;

14. Iqis li l-għan prijoritarju taċ-ċertifikazzjoni tal-kwalità ambjentali għall-prodotti tal-akkwakultura għandu jkun li l-promozzjoni tal-użu b'kuxjenza ambjentali tar-riżorsi akkwatiċi ħajjin fil-kuntest ta' żvilupp sostenibbli li jqis il-fatturi ambjentali, ekonomiċi u soċjali, bir-rispett dovut għall-prinċipji tal-Kodiċi ta' Kondotta għal Sajd Responsabbli(22) u għal-linji gwida ġejjiena tal-FAO;

15. Jistieden lill-Kummissjoni biex tintroduċi programm Ewropew ta’ tikkettar ekoloġiku għall-prodotti tas-sajd u tal-akkwakultura li jsegwi l-linji gwida tal-Komunità dwar it-tikkettar ekoloġiku; jenfasizza li t-tikkettar ekoloġiku mhux biss jagħti vantaġġ kompetittiv lill-prodotti tal-akkwakultura Ewropej, iżda wkoll jagħti trasparenza lil suq fejn il-proliferazzjoni ta’ ċertifikazzjonijiet privati jistgħu jfixklu lill-konsumaturi;

16. Jistieden lill-Kummissjoni biex tieħu azzjoni sabiex tiżgura li l-istokkjar tal-farms tal-akkwakultura ma jolqotx l-istatus naturali jew il-vijabilità tal-popolazzjonijiet selvaġġi, tal-ekosistemi tal-baħar u tal-bijodiversità b’mod ġenerali;

17. Iqis l-assistenza finanzjarja ta' kumpens għall-ħsara kkawżata minn annimali mħarsa bil-liġi bħala prekundizzjoni essenzjali għall-iżvilupp ta’ settur sostenibbli, modern u effiċjenti tal-akkwakultura;

18. Huwa tal-fehma li, filwaqt li kwalunkwe leġiżlazzjoni proposta tal-UE għandha tindirizza aspetti ġenerali bħall-valutazzjonijiet tal-impatt ambjentali, l-użu u l-ħarsien tal-ilma u t-traċċabilità tal-prodott, m'għandux jiġi adottat approċċ ġeneriku u mhux divrenzjat f'dik il-leġiżlazzjoni;

19. Jenfasizza l-ħtieġa għal impenn aktar sod mill-UE favur investimenti fl-akkwakultura sostenibbli, billi jingħata finanzjament addizzjonali mill-Fond Komunitarju għas-Sajd, u tingħata preferenza għall-aħjar prattika ambjentali; isemmi, madankollu, li l-finanzjament ġejjieni tal-attivitajiet relatati mal-akkwakultura għandhom ikunu possibbli biss bl-implimentazzjoni effikaċi tad-Direttiva dwar l-Istima tal-Impatt Ambjentali (EIA)(23), biex jiġi żgurat li l-proġetti ffinanzjati ma jwasslux għal degradazzjoni tal-ambjent jew tal-istokkijiet tal-ħut u tal-frott tal-baħar selvaġġ;

20. Jisħaq li r-rispett għall-bijodiversità għandu jkun stabbilit bħala prinċipju bażiku tal-politika tal-akkwakultura tal-UE, kemm għall-ibħra domestiċi kif ukoll għad-dimensjoni esterna tal-istrateġija tal-akkwakultura, u l-appoġġ jingħata lit-trobbija tal-ħut fil-każijiet biss fejn l-ispeċijiet involuti jkunu jew lokali jew ġa stabbiliti sew; jitlob li jkun hemm valutazzjoni xjentifika tar-riskju għal kull introduzzjoni non-nattiva u għal miżuri li jikkontjenu u jimmonitoraw l-ispeċijiet dannużi għall-ekoloġija;

21. Itenni l-ħtieġa li l-attivitajiet tas-sajd tradizzjonali tal-frott tal-baħar jiġu inklużi mal-bqija tas-settur tal-akkwakultura fil-Politika Komuni dwar is-Sajd, biex tiġi żgurata s-sostenibilità ekonomika, soċjali u ambjentali u biex dawn ikunu ggarantiti aċċess non-diskriminatorju għall-finanzjament Ewropew;

22. Iqis li huwa essenzjali li jittieħdu l-passi kollha xierqa biex jiġi żgurat li kwalunkwe prodott tal-akkwakultura li jkun importat fl-UE minn pajjiż terz, kemm għall-konsum kif ukoll għall-ipproċessar, ikun konformi bis-sħiħ mal-istess standards tas-saħħa pubblika u tas-sikurezza tal-ikel daqs prodott ekwivalenti tal-Komunità, u li kontrolli bir-reqqa fis-siti xierqa jgħinu b'mod effettiv biex jintlaħaq dan il-għan, mingħajr ma joħolqu ostakli ġodda għall-kummerċ u billi jħeġġu l-iskambju tal-aħjar prattiki mal-pajjiżi li qegħdin jiżviluppaw;

23. Jenfasizza li l-akkwakultura għandha tiġi meqjusa li hi kumplimentari għas-settur tal-qbid, b'mod partikolari rigward il-provvista tas-suq u l-impjegabilità;

KUNSIDERAZZJONIJIET SPEĊIFIĊI

Qafas leġiżlattiv, amministrattiv u finanzjarju

24. Jistieden lill-Kummissjoni li b'ħeffa tippreżenta proposta għal regolament li jikkonsolida f'test wieħed il-leġiżlazzjoni tal-UE li tirregola s-settur tal-akkwakultura, u sabiex tippromwovi l-koordinazzjoni bejn id-diversi Direttorati Ġenerali li għandhom responsabilità f’dan il-qasam;

25. Jistieden lill-Kummissjoni biex f'dak ir-regolament tistabbilixxi l-kriterji speċifiċi u r-regoli ġenerali bażiċi Ewropej għad-diversi kategoriji ta' prodotti, li jrid ikunu konformi magħhom kull stabbiliment tal-akkwakultura fil-Komunità, flimkien mad-dispożizzjonijiet għal armonizzazzjoni massima tal-kriterji tal-impatt ambjentali fil-livell Komunitarju sabiex tiġi evitata d-distorsjoni tal-kompetizzjoni bejn l-Istati Membri, filwaqt li tiġi ddelega r-responsabbiltà tal-fażi tal-implimentazzjoni u l-kontrolli tal-operat tal-istabbilimenti lill-awtoritajiet territorjali kompetenti, b'konformità sħiħa mal-prinċipju tas-sussidjarjetà; pereżempju l-parametri tal-impatt ambjentali, l-użu tar-riżorsi tal-ilma, it-tagħlif tal-ħut, tal-molluski u tal-krustaċji tat-trobbija fl-unitajiet tal-produzzjoni, it-traċċabilità u l-ittikkettar tal-prodott, kif ukoll l-istandards tas-saħħa u tal-benessri tal-ħut eċċ;

26. Jemmen li s-settur tal-akkwakultura għandu jkun sorveljat kif xieraq u għandu jkopri medda usa’ ta’ attivitajiet tal-baħar, bħat-trasport marittimu, it-turiżmu nawtiku, il-farms tal-enerġija mir-riħ offshore, is-sajd, eċċ.;

27. Jistieden lill-Kummissjoni taħdem biex tiżgura li l-Istati Membri jimpenjaw ruħhom b'mod formali biex jiddokumentaw u japplikaw il-leġiżlazzjoni eżistenti rigward l-ambjent u l-ħarsien tat-turiżmu tal-pajjiżi tagħhom u - fir-rigward ta' dawk iż-żoni li mhumiex soġġetti għal restrizzjonijiet - li jadottaw il-pjanijiet għall-iżvilupp meħtieġa għat-tmexxija taż-żoni tal-baħar, tal-kosta u tal-ilmijiet interni, b'mod li l-pjanijiet settorjali għall-akkwakultura jkunu jistgħu jiġu stabbiliti, filwaqt li jkunu identifikati biċ-ċar iż-żoni disponibbli għall-istabbiliment ta’ impjanti fis-settur;

28. Jistieden lill-Istati Membri jaħdmu favur 'pjan ta' żvilupp marittimu' u l-ġestjoni integrata taż-żoni tal-kosta, kif previst mill-politika marittima ġdida tal-UE u b'mod konformi mal-valutazzjonijiet tal-impatt ambjentali, li tkopri l-kategoriji differenti kollha tal-prodotti fis-settur, bħas-sajd tal-frott tal-baħar, l-akkwakultura subkostali, l-akkwakultura tal-baħar u l-akkwakultura tal-ilma ħelu, u biex jimpenjaw ruħhom ħalli jnaqqsu l-ostakli burokratiċi eżistenti għall-kisba tal-permessi u tal-konċessjonijiet meħtieġa biex jibdew attività tal-akkwakultura sostenibbli, possibbilment billi joħolqu 'one-stop shops' li jiċċentralizzaw il-formalitajiet amministrattivi li jkollhom jagħmlu l-operaturi f'post wieħed; jistieden ukoll lill-Istati Membri sabiex ifasslu pjanijiet strateġiċi fuq żmien fit-tul biex jippromwovu l-iżvilupp sostenibbli ta’ din l-attività u lill-Kummissjoni abiex tressaq proposti għall-miżuri kollha meħtieġa biex tkun promossa l-kompetittività fis-settur, filwaqt li jitqiesu l-ispeċifiċitajiet ta' kull Stat Membru;

29. Jittama li l-Fond tas-Sajd Ewropew tal-ġejjieni b'appoġġ għall-Politika Komuni tas-Sajd riformata se jipprevedi linji baġitarji speċifiċi għall-iżvilupp ta' akkwakultura sostenibbli u appoġġ għall-investiment f'dak is-settur, li jsegwi l-aħjar prattika ambjentali, u li jippromwovi l-attività ekonomika u l-ambjent b'attenzjoni partikulari fuq impjanti teknoloġikament innovattivi li jkollhom inqas impatt ambjentali (pereżempju sistemi tat-tisfija tal-ilma biex jitneħħew ir-residwi u l-elementi niġġiesa), farms li jippromwovu s-saħħa u l-benessri tal-ħut u forom sostenibbli ta' akkwakultura; jenfasizza li dawn il-linji baġitarji għandhom jipprovdu għal finanzjament addizzjonali mill-Fond Ewropew għas-Sajd u m’għandux ikun finanzjat permezz ta’ tnaqqis ġenerali fl-infiq f’setturi oħra, partikolarment fis-sajd;

30. Jittama li dan il-Fond se jqis il-ħtieġa li jiġi pprovdut appoġġ finanzjarju għall-impriżi fis-settur, b'mod partikolari lill-SMEs u lill-impriżi familjari, abbażi tal-kontribut tagħhom għall-iżvilupp soċjali u ekonomiku tal-inħawi kostali u b’enfasi fuq l-inħawi remoti jew tal-konfini;

31. Jappoġġja lill-Istati Membri fis-simplifikazzjoni tal-proċeduri tal-għoti ta’ liċenzji li jinkuraġġixxu l-aċċess fit-tul għas-siti eżistenti, speċjalment fis-siti fejn joperaw l-SMEs u l-impriżi mmexxija mill-familji;

32. Jenfasizza wkoll il-ħtieġa li jkunu żgurati kontribuzzjonijiet finanzjarji ikbar għar-riċerka xjentifika, għall-innovazzjoni u għat-trasferiment tat-teknoloġija fil-qasam tal-akkwakultura tal-baħar u tal-ilma ħelu li tkun sostenibbli u organika, u għall-impriżi li jridu jikkonvertu l-produzzjoni konvenzjonali kollha tagħhom, jew parti minnha, għal produzzjoni organika, permezz ta' politiki settorjali li jkopru l-aspetti ewlenin kollha, mill-katina tal-provvista għall-ottimizzazzjoni u l-promozzjoni tal-prodotti fis-suq, b'ġestjoni aħjar ta' dawk l-aspetti fl-assi tematiċi stipulati mill-Fondi Strutturali u minn programmi Komunitarji;

33. Iħeġġeġ lill-Kummissjoni sabiex tipprovdi lis-settur tal-akkwakultura strument ekonomiku reali għas-sitwazzjonijiet ta’ kriżi u sabiex tidentifika sistemi ta’ appoġġ f’każ ta’ diżastri bijoloġiċi naturali (bħall-proliferazzjoni tal-fitoplankton tossiku), diżastri li ġejjin mill-bniedem (bħall-“Erika” u l-“Prestige”) jew fenomeni meteoroloġiċi estremi (ċikluni, għargħar, eċċ.);

34. Jistieden lill-Kummissjoni u lill-Istati Membri jappoġġjaw it-trobbija sperimentali ta' speċijiet awtoktoni, teknoloġiji għall-produzzjoni ta’ ħut b’saħħtu u sforzi biex jiġġieldu l-mard assoċjat mal-akkwakultura, fl-interess tad-diversifikazzjoni tal-produzzjoni tal-akkwakultura Komunitarja, biex din tkun tista' toffri prodotti ta' kwalità għolja u ta' valur miżjud ogħla, billi jitħeġġu r-riċerka u l-iskambji tal-aħjar prattiki fuq dawk l-ispeċijiet u fuq il-metodi ta' produzzjoni konċernati, sabiex il-prodotti tal-akkwakultura jkunu jistgħu jikkompetu aħjar ma' prodotti tal-ikel innovattivi oħra;

35. Jenfasizza l-ħtieġa li jittieħdu miżuri biex jiżguraw li l-istokks tal-ispeċijiet li qed isiru aktar skarsi fix-xmajjar jerġgħu lura għal-livelli ta’ qabel, b’mod partikulari l-ispeċijiet migratorji tradizzjonali b’impatt ekonomiku sinifikanti fuq il-popolazzjonijiet lokali (l-istorjun, l-alosa alosa, is-salamun, eċċ.) u ċerti speċijiet tal-baħar, u jiġbed l-attenzjoni tal-Kummissjoni u tal-Istati Membri għall-ħtieġa li jiġi ggarantit il-finanzjament meħtieġ għall-implimentazzjoni ta’ dawn l-inizjattivi;

36. Jistieden lill-Kummissjoni biex tqis it-tendenza lejn l-iżvilupp ta' faċilitajiet ta' akkwakultura offshore bħala soluzzjoni potenzjali għall-problema tad-disponibilità tal-ispazju fuq ix-xtut Ewropej, u sabiex tqis il-kundizzjonijiet ambjentali u klimatiċi diffiċli li fihom dan it-tip ta’ akkwakultura jitwettaq;

37. Jistieden lill-Kummissjoni u lill-Istati Membri jiggarantixxu taħriġ professjonali xieraq fil-qasam tal-akkwakultura, jagħtu spinta lill-kompetittività fis-settur, u jinkuraġġixxu l-possibilità ta' taħriġ mill-ġdid għall-membri professjonali tal-industrija tas-sajd f'metodi alternattivi tal-ġestjoni ta' ambjenti akkwatiċi, biex b’hekk jgħinu wkoll fil-ħolqien ta' impjiegi sikuri għaż-żgħażagħ f'żoni rurali u tal-kosta u fir-reġjuni l-aktar periferiċi, u b'mod speċjali fir-reġjuni li jiddependu ħafna mill-attivitajiet tas-sajd u tal-akkwakultura;

38. Jistieden lill-Istati Membri jikkunsidraw il-ħolqien ta' organizzazzjonijiet li jispeċjalizzaw fil-promozzjoni tal-prodotti tal-akkwakultura; jistieden ukoll lill-Kummissjoni testendi r-regoli dwar l-organizzazzjoni tas-suq komuni tas-settur tal-akkwakultura sostenibbli u tappoġġja u toffri inċentivi għal kampanji promozzjonali fil-livell tal-UE u tas-swieq esterni;

Politika tal-kwalità u tal-ħarsien tal-konsumatur

39. Huwa tal-fehma li l-iżvilupp tal-akkwakultura sostenibbli ma jistax jieħu preċedenza fuq politika tal-kwalità stretta, metodi tal-produzzjoni b'kuxjenza ambjentali li jirrispettaw il-benessri tal-annimali – fir-rigward tat-trasport tal-istokk tal-akkwakultura, tal-metodi tat-tbiċċir u tal-bejgħ ta’ ħut ħaj – standards tas-saħħa rigurużi u livell għoli ta' ħarsien tal-konsumatur;

40. Jistieden lill-Kummissjoni, għaldaqstant, tiżviluppa tikketta tal-kwalità speċifika tal-UE għall-prodotti tal-akkwakultura, flimkien ma' tikketta speċifika għall-akkwakultura organika, filwaqt li tistabbilixxi regoli stretti skont il-prinċipji tal-UE għall-produzzjoni organika ta' kwalità għolja, biex il-konsumatur ikun jista' jkun żgur mill-affidabilità tas-sistema tal-produzzjoni, tal-kontroll u tat-traċċabilità sħiħa tal-prodotti tal-akkwakultura; iħeġġeġ lill-Kummissjoni biex tikkunsidra li tuża strutturi ta’ tikkettar diġà eżistenti għall-produzzjoni ta’ akkwakultura organika ta’ kwalità għolja;

41. Huwa tal-fehma li l-produzzjoni responsabbli ta’ ingredjenti għall-għalf tal-ħut, inklużi ingredjenti mill-baħar, hija kundizzjoni għas-sostenibilità tal-akkwakultura;

42. Jistieden lill-Kummissjni torganizza u tippromwovi, b'kooperazzjoni mill-qrib mal-Istati Membri, kampanji ta' informazzjoni istituzzjonali ħalli tippromwovi l-prodotti tal-akkwakultura, inklużi prodotti tal-akkwakultura organika;

43. Itenni l-fehmiet li diġà esprima fir-riżoluzzjoni tiegħu dwar l-adozzjoni ta' Pjan Ewropew ta' Kontroll tal-Marguni, u jindika li t-tnaqqis fil-ħsarat ikkawżati mill-marguni u minn tajr ieħor tal-priża lid-ditti tal-akkwakultura huwa fattur importanti fl-ispejjeż ta’ produzzjoni tagħhom u għaldaqstant għas-sopravivenza u għall-kompetittività tagħhom; jiġbed l-attenzjoni għall-ħtieġa li jiġu stmati l-ħsarat ikkawżati mill-marguni u tajr ieħor tal-priża fis-settur tal-akkwakultura u sabiex jitfasslu pjanijiet għal azzjoni korrettiva f’dan is-settur;

44. Jistieden lill-Kummissjoni biex tieħu l-azzjonijiet mitluba fir-riżoluzzjoni tal-Parlament tal-4 ta’ Diċembru 2008(24), l-aktar fir-rigward tal-implimentazzjoni ta’ pjan ta’ kontroll tal-popolazzjoni tal-marguni fuq diversi stadji, ikkoordinat fuq livell Ewropew, u l-ġbir ta’ dejta xjentifika dwar id-daqs tal-popolazzjonijiet tal-margun; jistieden lill-Kummissjoni sabiex tressaq proposti għal-leġiżlazzjoni komprensiva f’dan il-qasam;

45. Jistieden lill-Kummissjoni biex, b’kooperazzjoni mill-qrib mal-Istati Membri u wara li tkun ikkunsidrat id-diversi kundizzjonijiet ġeografiċi u klimatoloġiċi, it-tekniki ta’ produzzjoni użati u n-natura partikulari tal-ispeċijiet imrobbija, tipproponi kriterji sostenibbli speċifiċi rigward il-benessri tal-ħut tat-trobbija, bħal livelli massimi ta' densità tat-trobbija, il-kwantità ta' proteini veġetali u annimali li jistgħu jintużaw f'għalf għall-ħut tat-trobbija fit-tipi differenti ta' fish farms, u li jqisu l-fatturi speċifiċi relatati mat-trobbija ta' speċijiet individwali, ir-rekwiżiti nutrittivi tal-ispeċijiet tal-ħut imrobbija, il-fażijiet taċ-ċiklu tal-ħajja tagħhom u l-kundizzjonijiet ambjentali, u biex tippromwovi prattiki tat-trasport u tal-qtil li jillimitaw l-elementi li joħolqu l-istress u t-tibdil tal-ilma fl-għadajjar tal-ħut b'mod li ma jkunx iddisturbat il-ħut li jitrabba fihom; jifhem li l-għan fit-tul irid ikun is-sostituzzjoni tal-proteini annimali bi proteini veġetali għall-ispeċi kollha fejn ikun possibbli, filwaqt li jitqiesu l-ħtiġijiet nutrittivi tagħhom, u li r-riċerka strateġika dwar is-sostituzzjoni għall-ingredjenti essenzjali għandha tkun l-ogħla prijorità, meta wieħed iqis li r-riċerka dwar in-nutrijenti essenzjali u dwar il-produzzjoni tagħhom minn sorsi alternattivi bħall-alka mikroskopika u l-ħmira jnaqqas il-ħtieġa ta' għalf magħmul mill-ħut fuq żmien twil;

46. Jistieden lill-Kummissjoni sabiex testendi l-kamp ta’ applikazzjoni tar-Regolament tal-Kunsill 1/2005 (KE) dwar il-ħarsien tal-annimali waqt it-trasport(25) sabiex jiġi limitat it-trasport tal-ħut fuq distanzi twal, u b’hekk jiġu promossi l-impjanti lokali tal-trobbija tal-ħut u biċċeriji qrib il-farms tal-ħut;

47. Jistieden lill-Kummissjoni biex taċċerta li l-provvista ta’ materja prima użata għal-għalf tal-ħut tkun tirrispetta prattika ambjentali aċċettabbli u ma jkollhiex impatti ħżiena fuq l-ekosistemi li minnhom jinġiebu l-ingredjenti;

48. Jistieden lill-Kummissjoni sabiex tiżgura li l-proċeduri ta’ qabel il-qatla li huma klassifikati mill-Awtorità Ewropea dwar is-Sigurtà fl-Ikel (EFSA) bħala ta’ ħsara għal benessri tal-ħut jiġu evitati; ċerti metodi ta’ qatla li, skont l-EFSA, iżommu lil ħut f’sensih għal ħin twil qabel ma jmut, bħall-asfissjazzjoni f’taħlita tas-silġ, għandhom jiġu pprojbiti;

49. Iħeġġeġ lill-Kummissjoni biex toħroġ linji gwida tekniċi speċifiċi dwar iċ-ċertifikazzjoni ta’ għalf sostenibbli tal-ħut;

Relazzjonijiet barranin

50. Jistieden lill-Kummissjoni u lill-Istati Membri jistinkaw ħalli jiżguraw li l-leġiżlazzjoni Komunitarja tkun applikata b'mod rigoruż matul il-katina kollha tal-prodotti tal-akkwakultura, fosthom l-għalf u l-materja prima għall-għalf, li jiġu importati minn pajjiżi terzi;

51. Jistieden lill-Kummissjoni sabiex tinvestiga hi stess u mhux permezz ta’ partijiet terzi l-metodi ta’ produzzjoni tal-fish farms barra mill-Unjoni Ewropea u tirrapporta dwar kwalunkwe periklu għas-saħħa;

52. Jisħaq dwar il-ħtieġa li l-prodotti tal-ikel akkwatiċi mmanifatturati fl-UE jew importati fl-UE jottemperaw ma’ standards għoljin ta’ ħarsien ambjentali u ta’ saħħet il-konsumatur u tas-sigurtà;

53. Jistieden lill-Kummissjoni tistinka ħalli tiżgura li l-prinċipju tar-rikonoxximent reċiproku u l-moviment ħieles tal-prodotti jiġi applikat għall-farmaċewtiċi ta' kura kif ukoll preventivi użati fl-akkwakultura, biex tippromwovi ftehimiet reċiproċi dwar għarfien avvanzat ma' pajjiżi terzi, u biex tippromwovi li pajjiżi oħra u entitajiet internazzjonali jintroduċu l-aħjar prattiki;

54. Itenni l-importanza li jsiru kontrolli sistematiċi fil-postijiet li joffru aċċess għas-suq intern u l-punti importanti tal-importazzjoni li jagħtu aċċess għas-suq intern ħalli l-konsumatur jingħata garanzija assoluta li l-prodotti tal-akkwakultura impurtati minn pajjiżi oħra jkunu soġġetti b'mod sistematiku għal kontrolli tal-kwalità stretti u li għaldaqstant ikunu konformi għalkollox mar-regoli tal-UE fil-qasam tal-iġjene u tas-saħħa pubblika;

55. Jistieden lill-Kummissjoni u lill-Istati Membri jippromwovu dawn il-prinċipji kemm fl-Organizzazzjoni Dinjija għall-Kummerċ u kemm fil-fora istituzzjonali rilevanti kollha;

56. Jistieden lill-Kummissjoni tisponsorja, bħala parti mill-politika tal-UE ta' kooperazzjoni mal-pajjiżi li qegħdin jiżviluppaw, miżuri ta' appoġġ u ta' taħriġ maħsuba biex jgħinu fil-promozzjoni tal-akkwakultura sostenibbli u ħalli l-kuxjenza tal-akkwakulturisti f'dawk il-pajjiżi titressaq lejn politika dwar kwalità u standards ogħla ta' produzzjoni, b'mod partikulari fir-rigward tal-ambjent, tal-iġjene u dawk soċjali fl-industrija;

57. Jistieden lill-Kummissjoni tippreżenta rapport dwar l-istandards ambjentali u soċjali fl-industrija tal-akkwakultura barra l-UE u sabiex tesplora metodi biex ittejjeb l-għoti ta’ informazzjoni lill-konsumaturi;

58. Jistieden lill-Kummissjoni biex tniedi stimi ta’ impatt ambjentali dwar l-effetti li l-ftehimiet kummerċjali tal-Komunità jista’ jkollhom fuq is-settur tal-akkwakultura;

59. Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill u lill-Kummissjoni.

(1) ĠU L 204, 6.8.2009, p. 15. (2) ĠU L 81, 27.3.2009, p. 15. (3) ĠU L 79, 25.3.2009, p. 7. (4) ĠU L 337, 16.12.2008, p. 94. (5) ĠU L 327, 22.12.2000, p. 1. (6) ĠU L 27, 31.1.2010, p. 1. (7) ĠU L 189, 20.7.2007, p. 1. (8) ĠU L 84, 31.3.2010, p. 19. (9) ĠU L 337, 16.12.2008, p. 41. (10) Testi adottati, P7_TA(2010)0039. (11) ĠU C 21E, 28.1.2010, p. 11. (12) ĠU C 295E, 4.12.2009, p. 1. (13) ĠU C 68E, 21.3.2009, p. 39. (14) ĠU C 323E, 18.12.2008, p. 271. (15) ĠU C 305E, 14.12.2006, p. 233. (16) ĠU C 38E, 12.2.2004, p. 318. (17) ĠU C 84 , 3.4.2008, p. 10. (18) ĠU C 115, 20.5.2009, p. 15. (19) Testi adottati, P6_TA(2009)0373. (20) Laqgħa fi Puerto Varas (Iċ-Ċilì) bejn is-6 u l-10 ta' Ottubru 2008, http://www.fao.org/fishery/nems/36393/en (21) Kodiċi ta' Kondotta tal-FAO adottat fil-31 ta' Ottubru 1995. (22) Adottati mill-FAO fil-31 ta' Ottubru 1995. (23) Direttiva 85/337/KEE, kif emendata mid-Direttiva 97/11/KE u 2003/35/KE (id-Direttiva dwar l-EIAs) (24) Riżoluzzjoni tal-Parlament Ewropew ta' l-4 ta' Diċembru 2008 dwar l-adozzjoni ta' "Pjan Ewropew ta' kontroll tal-istokkijiet tal-marguni" sabiex jitnaqqas l-effett dejjem jiżdied tal-marguni fuq l-istokkijiet tal-ħut, is-sajd u l-akwakultura , P6_TA(2008)0583, rapport ta’ Heinz Kindermann (2008/2177(INI)). (25) ĠU L 3, 5.1.2005, p. 1.

Dan ir-rapport għandu l-għan li jkun ta' kontribut sinjifikanti għall-iżvilupp ta' strateġija ġdida tal-UE fil-qasam tal-akkwakultura maħsuba biex tippromwovi l-iżvilupp sostenibbli tagħha għal tul ta' żmien medju u twil. Ir-riżoluzzjoni tipprovdi wkoll sensiela ta' linji gwida operattivi u talbiet konkreti, indirizzati lill-Kunsill u lill-Kummissjoni Ewropea, filwaqt li tistieden lill-Kummissjoni Ewropea biex fil-ġejjieni qarib tippreżenta proposta leġiżlattiva adegwata.

Is-settur tal-akkwakultura Ewropea jinkludi fih 'il fuq minn 16 500 ażjenda b'valur tal-bejgħ totali annwali ta' aktar minn EUR 3.5 biljun, u jiġġenera, b'mod dirett jew indirett, madwar 64 000 impjieg(1). Il-produzzjoni Ewropea tas-settur, minkejja li rduppjat bejn l-1981 u l-2001, meta laħqet 1.3 miljun tunnellata, baqgħet kważi l-istess (+0,5%) sal-2008, filwaqt li l-produzzjoni dinjija fl-istess perjodu kibret b'rati għoljin ħafna (+7.6% fis-sena)(2). F'kuntest globali ta' domanda għolja għall-prodotti tal-akkwakultura, l-Ewropa tikkontribwixxi 2% biss tal-produzzjoni dinjija tal-akkwakultura(3), filwaqt li konsum intern tagħha jaqbeż il-5 miljun tunnellata fis-sena; għaldaqstant, l-UE jkollha timporta żewġ terzi tal-prodotti li teħtieġ minn pajjiżi li mhumiex fl-UE; għaldaqstant, l-UE jkollha timporta żewġ terzi tal-prodotti li teħtieġ minn pajjiżi li mhumiex fl-UE.

Ma hemm l-ebda leġiżlazzjoni tal-UE dwar is-settur tal-akkwakultura fil-preżent - is-settur għadu kopert permezz ta' pletora ta' leġiżlazzjoni tal-UE u ta' regoli nazzjonali li jistgħu jvarjaw bil-kbir bejn stat u ieħor, filwaqt li joħolqu qafas legali mhux trasparenti u sitwazzjonijiet diskriminatorji u tgħawwiġ fis-suq li ma tantx jgħinu biex jitħeġġeġ l-investiment fis-settur. Il-Kummissjoni adottat komunikazzjoni inizjali fl-2002(4), li kienet is-suġġett ta' riżoluzzjoni leġiżlattiva tal-Parlament Ewropew f'Jannar 2003(5), li ma żiditx it-trasparenza tal-qafas regolatorju. Għall-kuntrarju, il-Kummissjoni u l-Kunsill komplew jadottaw, sikwit bl-użu tal-proċedura ta' komitoloġija(6), regoli dettaljati applikabbli għall-akkwakultura (organika u mhix), li dwarhom il-Parlament ma kellu ebda opportunità jagħti l-fehma tiegħu b'mod dirett. Il-komunikazzjoni riċenti tal-Kummissjoni ta' April 2009 li tagħmel parti mis-suġġett ta' dan ir-rapport għaldaqstant tipprovdi ċ-ċans li jiġi vvalutat kemm huwa xieraq li jiġi introdott qafas speċifiku tal-UE għas-settur tal-akkwakultura, filwaqt li l-għan aħħari jibqa' l-iżvilupp strutturat ta' industrija Ewropea tal-akkwakultura sostenibbli li tirrispetta l-bilanċi ambjentali, iżżid il-valur ekonomiku tal-operaturi tal-akkwakultura u l-komunitajiet lokali tagħha u toffri aktar garanziji lill-konsumaturi. Ikun xieraq ukoll li jkunu vvalutati s-sinerġiji rilevanti – fil-livell leġiżlattiv u fil-livell operattiv – bejn il-proposti mħejjija mill-industrija tal-akkwakultura u t-tħejjija ta' qafas ġdid għall-PKS li qiegħed jiġi żviluppat bħalissa għall-perjodu ta' wara s-sena 2012.

(1) Framian (2009) 'Definizzjoni tal-ħtiġijiet f'termini ta' ġbir ta' data għall-akkwakultura'. (2) Il-Kummissjoni Ewropea, 'Studju tar-riżultati ekonomiċi u tal-kompetittività tas-settur tal-akkwakultura Ewropea, Diċembru 2008', Diċembru 2008. (3) FAO (2009) Fishstat Plus Database "Aquaculture production 1950-2007". (4) "Strateġija għall-iżvilupp sostenibbli tal-akkwakultura Ewropea", COM(2002)511 finali. (5) Rapport ta' Hugues Martin (A5-0448/2002, 2002/2058(INI)), adottat fis-sessjoni plenarja fis-16.01.2003. (6) Pereżempju r-Regolament (KE) 710/2009, ippubblikat fil-ĠU tal-5 ta' Awwissu 2009, u Regolament 834/2007 li jemenda.

SUĠĠERIMENTI

Il-Kumitat għall-Ambjent, is-Saħħa Pubblika u s-Sikurezza tal-Ikel jistieden lill-Kumitat għas-Sajd, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

A.  billi l-forom kollha tal-akkwakultura għandhom ikunu sostenibbli u ġusti soċjalment u, b’konsegwenza ta’ dan, m’għandha ssir l-ebda ħsara lill-ekosistemi biż-żieda fil-konċentrazzjonijiet tas-sustanzi naturali u fil-konċentrazzjonijiet tas-sustanzi li jiġu prodotti mill-bniedem, bħal kimiċi mhux degradabbli u diossidu tal-karbonju, u permezz ta’ tfixkil fiżiku,

B.   billi l-forom sostenibbli ta’ akkwakultura jistgħu jagħmlu kontribut pożittiv għall-ħarsien tal-ambjent u jipprovdu wkoll mezz alternattiv ta' kif tiġi ssodisfata d-domanda għall-prodotti tas-sajd,

C.  billi l-akkwakultura u l-faċilitajiet ta’ produzzjoni relatati magħha m’għandhomx iwasslu biex in-nies jiġu mċaħħda b'mod sistematiku milli jissodisfaw il-bżonnijiet bażiċi tagħhom fir-rigward tal-ikel, l-ilma u d-djar,

D.  billi l-ħut jista’ jbati minn uġigħ u stress, u li bosta forom ta’ akkwakultura ma jissodisfawx ir-rekwiżiti tal-UE għall-benesseri tal-annimali, u billi l-kunsiderazzjoni u l-implimentazzjoni kif għandu jkun tal-istandards tal-benessri tal-annimali jistgħu jwasslu għal benefiċċji sinifikanti, bħalma huma t-titjib fil-kwalità tal-prodott u anqas ħsara għall-ambjent,

E.   billi l-UE hija importatur nett tal-prodotti tal-akkwakultura; billi, barra minn hekk, hemm bżonn ta’ sistema ta’ ċertifikazzjoni affidabbli għall-prodotti tal-akkwakultura,

F.   billi qed jiġu prodotti aktar razez ta’ annimali u varjetajiet ta' pjanti ġodda għall-konsum permezz tal-akkwakultura,

G.  billi l-Kummissjoni dan l-aħħar ippubblikat Komunikazzjoni dwar ‘Strateġija għall-Iżvilupp Sostenibbli tal-Akkwakultura Ewropea’(1),

1.   Jiġbed l-attenzjoni tal-Kummissjoni għall-fatt li ħafna forom ta’ akkwakultura jista’ jkollhom impatt negattiv kemm fuq il-benesseri tal-annimali kif ukoll fuq is-saħħa tal-bnniedem, bħall-qerda tal-ħabitats, l-użu ta’ kimiċi kontra l-mard, it-tnaqqis u t-tmelliħ tal-ilma tax-xorb u tal-art agrikola, it-tniġġis tan-nutrijenti, l-aktar fil-lagi u f’żoni tal-baħar magħluqin jew parzjalment magħluqin bħalma huwa l-Baħar Baltiku, u t-tfixkil tal-bijodiversità meta jaħrab il-ħut tal-akkwakultura, u jistieden lill-Kummissjoni biex tintroduċi leġiżlazzjoni sabiex telimina dawn l-effetti negattivi;

2.   Jistieden lill-Kummissjoni biex tqis iktar il-benesseri tal-ħut (filwaqt li tqis ukoll l-abilità putattiva tagħhom li jaħsbu u jħossu) fl-istrateġija tagħha dwar l-akkwakultura sostenibbli, u wkoll biex twettaq riċerka dwar l-indikaturi tal-benesseri, dwar il-metodi ta' sturdament u ta’ qatla u dwar il-mekkaniżmi tat-trasport tal-ħut;

3.   Jistieden lill-Kummissjoni biex tintroduċi sistema ta’ ċertifikazzjoni sostenibbli għall-prodotti tal-akkwakultura li tmur lil hinn mir-Regolament (KE) Nru 1251/2008 u, minbarra s-saħħa tal-annimali, tipprovdi wkoll ċertifikazzjoni fir-rigward tal-effetti ambjentali u soċjali, is-sikurezza tal-ikel, il-benesseri tal-annimali u l-aspetti ekonomiċi u finanzjarji, u jiġbed l-attenzjoni tal-Kummissjoni għall-fatt li, fi ħdan il-qafas tal-FAO, diġà sar progress pożittiv lejn sistema ta’ ċertifikazzjoni bħal din;

4.   Josserva li hemm avariji regolatorji sostanzjali li jikkonċernaw l-akkwakultura, li jistgħu jqanqlu lill-impriżi sabiex jieħdu l-produzzjoni tagħhom f’imkejjen fejn japplikaw id-dispożizzjonijiet l-anqas ħorox, u jħeġġeġ lill-Kummissjoni tipprojbixxi mis-suq Ewropew il-prodotti li ma jissodisfawx l-istandards Ewropej tal-produzzjoni;

5.   Jiġbed l-attenzjoni tal-Kummissjoni għall-fatt li l-metodi ġodda ta’ produzzjoni użati fl-akkwakultura u/jew ir-razez tal-annimali u l-varjetajiet ta' pjanti ġodda li ddaħħlu fis-suq mill-15 ta’ Mejju 1997 jistgħu jaqgħu taħt ir-Regolament dwar Ikel Ġdid u, b’konsegwenza ta’ dan, jeħtieġu awtorizzazzjoni biex jitqiegħdu fis-suq.

6.   Jistieden lill-Kummissjoni sabiex tinvestiga hi stess u mhux permezz ta’ partijiet terzi l-metodi ta’ produzzjoni tal-fish farms barra mill-Unjoni Ewropea u tirrapporta dwar kwalunkwe periklu għas-saħħa;

7.   Jitlob lill-Kummissjoni tinsisti li l-faċilitajiet tal-akkwakultura barra mill-UE jiġu spezzjonati u mmonitorjati b'mod strett sabiex ikun żgurat li l-importazzjonijiet jikkonformaw mal-istandards tal-UE u li l-produtturi Ewropej jaffaċċaw kompetizzjoni ġusta;

8.    Jisħaq dwar il-ħtieġa li l-prodotti tal-ikel akkwatiċi mmanifatturati fl-UE jew importati fl-UE jottemperaw ma’ standards għoljin ta’ ħarsien ambjentali u ta’ saħħet il-konsumatur u tas-sigurtà;

9.   Jitlob lill-Kummissjoni tirrediġi, b’urġenza, kriterji u linji-gwida speċifiċi għas-settur tal-akkwakultura li jittratta l-interpetazzjoni u l-implimentazzjoni tad-direttivi tal-UE dwar il-valutazzjonijiet tal-impatt ambjentali; jisħaq li dan l-isforz ma għandux jimmina l-abilità tal-gvernijiet nazzjonali u l-awtoritajiet lokali li jistabbilixxu l-kriterji u l-linji-gwida tagħhom, billi jqisu l-kondizzjonijiet partikolari ta' sit partikolari;

10.  Jisħaq li r-rispett għall-bijodiversità għandu jkun stabbilit bħala prinċipju bażiku tal-politika tal-akkwakultura tal-UE, kemm għall-ibħra domestiċi kif ukoll għad-dimensjoni esterna tal-istrateġija tal-akkwakultura, u l-appoġġ jingħata lit-trobbija tal-ħut fil-każijiet biss fejn l-ispeċijiet involuti jkunu jew lokali jew ġa stabbiliti sew; jitlob li jkun hemm valutazzjoni xjentifika tar-riskju għal kull introduzzjoni non-nattiva u għal miżuri li jikkontjenu u jimmonitoraw l-ispeċijiet dannużi għall-ekoloġija;

11.  Jistieden lill-Kummissjoni toħroġ gwida dwar ir-riżoluzzjoni tal-kunflitti riżultanti mill-implimentazzjoni tad-Direttiva Qafas dwar l-Ilma dwar l-attivitajiet tal-akkwakultura; jisħaq, iżda, illi din il-gwida ma għandhiex tqiegħed fil-periklu l-objettiv komplessiv tal-istatus tajjeb tal-ilma, kif jingħad fid-Direttiva Qafas dwar l-Ilma(2);

12. Jistieden lill-Kummissjoni tippromwovi l-iżvilupp tal-Ippjanar tal-Ispazju Marittimu fil-kuntest tal-Politika Marittima Integrata tal-UE l-ġdida(3), bħala mezz ta’ koordinament ta’ azzjoni tal-Komunità fl-oqsma relatati, inkluża l-akkwakultura;

13. Iħeġġeġ lill-Kummissjoni tippromwovi r-riċerka u l-iżvilupp marbutin mal-akkwakultura, billi tqiegħed l-enfasi fuq is-sistemi integrati u magħluqin ta’ riċirkulazzjoni tal-ilma.

RIŻULTAT TAL-VOTAZZJONI FINALI FIL-KUMITAT

(1) COM(2009) 162 finali, Il-bini ta’ futur sostenibbli għall-akkwakultura: Spinta ġdida għall-Istrateġija għall-Iżvilupp Sostenibbli tal-Akkwakultura Ewropea. (2) Direttiva 2000/60/KE tal-Parlament Ewropew u tal-Kunsill tat-23 ta’ Ottubru 2000 li tistabbilixxi qafas għal azzjoni Komunitarja fil-qasam tal-politika tal-ilma, ĠU L 327, 22.12.2000. (3) Komunikazzjoni tal-Kummissjoni COM(2007) 575 finali – ‘Politika Marittima integrata għall-Unjoni Ewropea’.