dwar Basel II u r-reviżjoni tad-Direttivi dwar ir-Rekwiżiti tal-Kapital (CRD 4)

(2010/2074(INI))

Il-Parlament Ewropew,

–   wara li kkunsidra d-Direttivi(1) dwar ir-Rekwiżiti tal-Kapital u d-Direttiva 2009/111/KE tal-Parlament Ewropew u tal-Kunsill tas-16 ta' Settembru 2009 li temenda d-Direttivi 2006/48/KE, 2006/49/KE u 2007/64/KE dwar il-banek affiljati ma' istituzzjonijiet ċentrali, ċerti elementi ta' fondi proprji, skoperturi kbar, arranġamenti superviżorji, u ġestjoni tal-kriżijiet(2),

–   wara li kkunsidra l-proposta tal-Kummissjoni għal direttiva tal-Parlament Ewropew u tal-Kunsill li temenda d-Direttivi 2006/48/KE u 2006/49/KE dwar ir-rekwiżiti kapitali għall-kotba tal-kummerċ u għar-rititolizzazzjonijiet, u r-reviżjoni superviżorja tal-politiki dwar ir-rimunerazzjoni (COM(2009)0362),

–   wara li kkunsidra d-dokument ta' ħidma tal-istaff tal-Kummissjoni tas-26 ta' April 2010 dwar aktar bidliet possibbli għad-Direttiva dwar ir-Rekwiżiti tal-Kapital,

–   wara li kkunsidra l-ftehim Basel II(3),

–   wara li kkunsidra l-Kumitat ta' Basel dwar dokumenti konsultattiv tas-Superviżjoni Bankarja dwar it-tisħiħ tal-kapaċità tas-settur bankarju(4) u tal-qafas internazzjonali għall-kejl tar-riskju tal-likwidità, l-istandards u l-monitoraġġ(5),

–   wara li kkunsidra l-karti tal-Bord tal-Istabbiltà Finanzjarja,

–   wara li kkunsidra l-komunikati maħruġa mill-G20 fis-samits tagħha f'Washington, f'Londra u f'Pittsburgh,

–   wara li kkunsidra r-rapport tiegħu tal-15 ta' Ġunju dwar id-derivattivi OTC(6),

–   wara li kkunsidra l-komunikazzjoni mill-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew, lill-Qorti Ewropea tal-Ġustizzja u lill-Bank Ċentrali Ewropew dwar Qafas tal-UE għall-Immaniġġjar Transkonfinali tal-Kriżijiet fis-Settur Bankarju (COM( 2009) 1561) u d-dokument ta' ħidma tal-istaff mehmuż magħha (SEC(2009)1407),

–   wara li kkunsidra l-komunikazzjoni mill-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew, u lill-Bank Ċentrali Ewropew dwar il-fondi ta’ riżoluzzjoni bankarja (COM(2010)0254),

–   wara li kkunsidra r-Regolament tal-Kummissjoni (KE) Nru 1126/2008 tat-3 ta' Novembru 2008 li jadotta ċerti standards internazzjonali tal-kontabilità skont ir-Regolament (KE) Nru 1606/2002 tal-Parlament Ewropew u tal-Kunsill(7),

–   wara li kkunsidra l-Artikolu 48 tar-Regoli ta' Proċedura tiegħu,

–   wara li kkunsidra r-rapport tal-Kumitat għall-Affarijiet Ekonomiċi u Monetarji (A7-0251/2010),

A. billi s-swieq u l-istituzzjonijiet finanzjarji qawwija, stabbli u effiċjenti huma kruċjali biex jintlaħqu l-ħtiġijiet finanzjarji tal-parteċipanti ekonomiċi differenti tal-UE u biex it-tkabbir u l-impjiegi, l-innovazzjoni u l-kompetitività tal-ekonomija Ewropea jingħataw spinta; billi l-funzjoni ta’ finanzjament hija partikolarment importanti għall-irkupru ekonomiku; billi r-riforma regolatorja fis-settur finanzjarju għandu jkollha l-objettiv tal-istabilità finanzjarja u t-tkabbir sostenibbli,

B.  billi għandhom jiġu adottati rekwiżiti kapitali rieżaminati u aktar stretti f’dak li għandu x’jaqsam maċ-ċiklu ekonomiku u l-irkupru ekonomija li għaddej bħalissa,

C. billi l-Kumitat ta’ Basel ma jagħmilhiex possibbli li jitqiesu l-istakeholders kollha jew il-prinċipju tar-reċiproċità,

D. billi s-swieq, l-atturi u l-istrumenti finanzjarji kollha għandhom ikunu mmonitorjati u rregolati kif inhu meħtieġ għall-infrastrutturi finanzjarji sistemikament importanti kollha bħalma huma s-sistemi, il-mekkaniżmi u l-pjattaformi tal-pagament, tal-ikklerjar u tas-saldar, u l-għoti assoċjat ta’ servizzi ta’ kustodja, għall-preservazzjoni tal-istabilità finanzjarja li huwa beni pubbliku kruċjali; billi l-kriżi aċċentwat li l-kapital bankarju kien evidentement insuffiċjenti f’dak li għandu x’jaqsam mas-solvibilità u s-solvenza;

E.  billi l-istandards ta' prudenza għandhom jissaħħu u jiġu eżegwit kif jixraq u n-nuqqasijiet dwar il-kwalità u l-ammont ta' kapital, il-ġestjoni tal-likwidità, id-dgħjufijiet tal-mudelli interni u n-natura proċiklika ta' Basel II u s-CRD li ġew żvelati bil-kriżi għandhom jiġu indirizzati,

F.  billi huwa neċessarju li jkun hemm espansjoni għas-superviżuri tal-gamma ta’ għodod għall-ġestjoni tal-kriżi bl-anqas intervent possibbli;

G. billi għandu jsir kull sforz biex tinkiseb separazzjoni ċara jew firewalling bejn is-settur tal-bejgħ bl-imnut u s-settur bankarju tal-investimenti bl-iskop li jkun żgurat li d-depożiti assigurati ma jintużawx bħala garanzija għall-attivitajiet ta’ trading,

H. billi l-istandards il-ġodda għandhom jieħu kont tad-daqs ta’ bank u l-profil tar-riskju u l-mudell tiegħu ta’ negozju,

I.   billi, madankollu, għandu jitqies l-impatt kumulattiv tal-elementi rilevanti tal-qafas rivedut ta' Basel II u ta' inizjattivi regolatorji oħra dwar l-ekonomija reali u t-tkabbir ekonomiku,

J.   billi l-lakuni mingħajr preċedenti tas-suq u tar-regolamentazzjoni wasslu lill-G20, fil-laqgħat tiegħu ta’ Londra, Pittsburgh u Toronto, jiddeċidi li jinkcrementa l-kwalità tal-kapitali, jirrafforza l-kopertura tar-riskji, jattenwa l-proċikliċità, jintroduċi l-akkantonamenti preventivi għat-telfiet fuq il-krediti, jiskoraġġixxi l-effett lieva eċċessiv u jintroduċi indiċi ta’ lieva finanzjarja supplementari fil-qafas ta’ Basel II bbażat fuq ir-riskju bl-objettiv li jgħaddi għat-trattament tal-pilastru 1, u jirrafforza l-istandards f’dak li għandu x’jaqsam mal-likwidità,

K. billi l-Ewropa tapplika s-CRD fl-istituti finanzjarji kollha u fis-soċjetajiet kollha ta’ investiment li joperaw f’serje ta’ mudelli ta’ attività; billi pajjiżi oħrajn jillimitaw l-applikazzjoni tar-regoli ta’ Basel II għal ċertu numru ta’ banek li għandhom mudell ta’ impriża speċifiku; billi tali disparitajiet fil-kamp ta’ applikazzjoni jissollevaw problemi f’materja ta’ kompatibilità, parità ta’ kondizzjonijiet u riskju ta’ potenzjali arbitraġġ normattiv;

L.  billi hemm speċifiċitajiet Ewropej importanti, bħall-fatt li s-settur korporattiv fl-Ewropa huwa fil-biċċa l-kbira ffinanzjat minn self bankarju; billi r-regoli riveduti ta' Basel għandhom iqisu speċifiċitajiet bħal dawn; billi jkun awspikabbli li s-self bankarju jkun immirat lejn oqsma speċifiċi bħalma huwa s-self lill-SMEs, u li l-impriżi akbar ikunu inkoraġġiti joħorġu obbligazzjonijiet destinati direttament għall-investituri;

M. billi approċċ "daqs wieħed" li ma jqisx il-profili tar-riskju speċifiku tal-banek u tad-diversità tas-settur bankarju jkunu ta’ ħsara għall-istess settur bankarju Ewropew u għandu mnejn iwassal, bħala konsegwenza, li jiddanneġġa t-tkabbir u l-irkupru ekonomiku,

N. billi bħalissa l-UE għaddejja minn riforma estensiva tar-regolament finanzjarju, għandu jkun hemm konsistenza bejn ir-riformi u, barra minn hekk, id-dati ta' implimentazzjoni għandhom iqisu l-impatt kumulattiv tal-miżuri fuq l-ekonomija reali u ma għandhomx ifixklu l-irkupru ekonomiku,

O. billi l-konverġenza għal sett uniku ta' standards ta' kwalità għolja tal-kontabilità globali hija essenzjali biex ikun hemm l-istess kundizzjonijiet għal kollha u tiġi żgurata komparabbiltà tad-data b'mod globali; billi dawn l-istandards għandhom jiġu aġġornati b'mod xieraq biex jitqiesu l-lezzjonijiet li ttieħdu mill-kriżi,

P.  billi l-ħtieġa għar-rispett rigoruż tal-prinċipju tal-‘prevalenza tas-sustanza fuq il-forma’ għandu jitqies mill-awtoritajiet relevanti kollha għall-fini li jkunu evitati riżultati mhux approprijati,

Q. billi l-konverġenza internazzjonali bejn ir-rappurtar għal għanijiet ta' kontabilità u r-rappurtar għall-finijiet regolatorji u fiskali hija essenzjali sabiex jiġi żgurat li s-superviżuri u l-investituri jiġu pprovduti bl-istess informazzjoni trasparenti u ċara, u billi r-rappurtar doppju għandu jiġi minimizzat; billi dan ma jeskludix filtri prudenzjali, basta jkunu preżenti fil-kontijiet kollha,

R.  »

«billi l-banek għandhom jikkonċentraw aktar fuq il-core business li jservi għall-ekonomija reali;

billi l-Kumitat ta’ Basel u l-Kummissjoni għandhom jinkoraġġixxuh dan,

S.  billi r-riformi inklużi fir-reviżjoni ta’ Basel II għandu jmorru pari passu mar-riformi strutturali tal-viġilanza bankarja rrikmandati mill-Parlament Ewropew u, eventwalment, bl-indikazzjoni ta’ perkors għall-elaborazzjoni u l-attwazzjoni koerenti ta’ miżuri analogi għal dawk tal-pilastru 2,

Kwestjonijiet ġenerali

1.  Jilqa' b'sodisfazzjon l-impenn tal-G20 biex tiżdied il-kwalità u l-kwantità tal-kapital, jiġu introdotti standards tal-ġestjoni tal-likwidità, tiġi indirizzata l-proċikliċità u jitjiebu l-istandards prudenzjali globali bi tweġiba għall-kriżi finanzjarja;

2.  Jilqa’ l-isforzi magħmulin mill-Kumitat ta’ Basel u tal-Kummissjoni; b'danakollu jissottolinja n-neċessità li jkunu elaborati u implimentati b’attenzjoni regoli ġodda dwar ir-rekwiżiti patrimonjali, kif ukoll li jiġu analizzati l-effetti fuq il-qafas usa’ tar-reviżjoni tar-regolamentazzjoni;

3.  Jitħasseb dwar id-defiċits strutturali u l-iżbilanċi fil-proposta attwali, kif ukoll dwar ir-riskju li ssir ħsara lill-irkupru ekonomiku u t-tkabbir ekonomiku; huwa tal-fehma li, meta titqies is-sitwazzjoni ekonomika attwali, se jkun neċessarju li jkun hemm viġilanza għalbiex il-banek ma jiskarikawx il-kostijiet tal-proposta li daqt ġejja fuq l-utenti finali tas-servizzi finanzjarji;

4.  Jissottolinja n-neċessità li tissaħħaħ l-interazzjoni bejn il-proċess ta' kontroll prudenzjali (Pilastru 2) u l-informattiva (Pilastru 3), filwaqt li lill-pubbliku jsiru disponibbli r-r-riżultati tal-provi ta’ reżistenza u r-rekwiżiti patrimonjali aġġuntivi;

5.  Ifakkar l-ispeċifiċitajiet importanti tas-settur bankarju Ewropew, bħall-varjetà ta' mudelli tan-negozju li joperaw taħt forom legali differenti u l-fatt li s-settur korporattiv Ewropew hu ffinanzjat b'mod predominanti permezz ta' self bankarju, u għalhekk jitlob li jkun hemm eżami komplessiv tal-konsegwenzi mikro- u makro-ekonomiċi tar-regoli l-ġodda proposti;

6.  Iħeġġeġ lill-Kumitat ta’ Basel u lill-Kummissjoni jqisu tali speċifiċità u d-diversi tipi ta’ riskju li jolqtu lis-settur bankarju; jissottolinja n-neċessità li ssir differenzjazzjoni b'mod ċar bejn l-investiment u s-servizzi tradizzjonali bankarji kif ukoll is-servizzi ta’ tranżazzjoni, fir-regoli riveduti ta' Basel II;

7.  Jistieden lill-Kummissjoni tkun aktar pro-attiva fil-proċess ta' riforma tar-regoli ta' Basel II, tippromwovi attivament u tissalvagwarda l-interessi Ewropej, tikkoordina l-approċċi tal-Istati Membri biex jinkisbu l-aħjar riżultati għall-ekonomija Ewropea u tipprovdi regolarment lill-Parlament rapporti dwar in-negozjati li għaddejjin bħalissa u tinvolvih attivament fil-proċessi ta’ negozjati;

8.  Jirrikonoxxi l-importanza tal-kooperazzjoni u tal-koordinament internazzjonali għall-fini li tinkiseb il-parità ta’ kondizzjonijiet f’livell internazzjonali u jkun evitat arbitraġġ normattiv; jissottolinja, b’danakollu, li tali objettiv ma għandux iqiegħed lill-ekonomija u lis-settur bankarju tal-Ewropa f’pożizzjoni di żvantaġġ kompetittiv u jirritieni li jeħtieġ li tkun salvagwardata d-diversità tas-settur bankarju;

9.  Jissottolinja li l-irkupru tal-ekonomija Ewropea jirrikjedi swieq finanzjarji dinamiċi li jistgħu jiffinanzjaw l-investimenti u l-innovazionijiet; iwissi kontra regoli u rekwiżiti li għandu mnejn joħolqu stretta kreditizja ġdida, b’effetti destabilizzanti għall-iżvilupp ekonomiku u s-swieq tax-xogħol tal-Ewropa;

10. Jenfasizza li l-impenn sħiħ tal-partijiet kollha involuti fil-proċess ta' Basel u tal-G20 għal kalendarju ta' implimentazzjoni ċar u koerenti huwa prekondizzjoni għal riforma li tirnexxi, li tiżgura l-istess kundizzjonijiet għal kulħadd fil-qasam internazzjonali u li tevita arbitraġġ regolatorju; iħeġġeġ lill-Kummissjoni u lill-Kumitat ta’ Basel jiżguraw li l-istandards li dwarhom isir qbil jiġu applikati b’mod sinkronizzat;

11. Ifakkar li l-Ftehim ta’ Basel II, u r-reviżjoni imminenti tiegħu, huma intiżi bħala standard globali; huwa għalhekk imħasseb bil-bosta dwar il-possibilità li l-limitazzjonijiet stabbiliti f’varji liġijiet nazzjonali adottati b’risposta għall-kriżi (b’mod partikolari l-liġi Amerikana ta’ riforma ta’ Wall Street u ta’ ħarsien tal-konsumaturi, li tillimita r-rikonoxximent tar-ratings esterni) iwasslu għal frammentazzjoni gravi tal-applikazzjoni ta' dan l-istandard globali; iħeġġeġ, għalhekk, lill-Kumitat ta’ Basel kif ukoll lill-Kummissjoni jivvalutaw fis-sħiħ u jiġbdu l-konsegwenzi ta’ tali leġiżlazzjoni għall-finijiet tal-applikazzjoni ta’ Basel II u tan-negozjati dwar ir-reviżjoni ta’ Basel II u jissolleċita lill-Kummissjoni tikkomunika r-riżultati lill-Parlament;

12. Iħeġġeġ lill-Kummissjoni tintensifika d-djalogu transatlantiku f’dak li għandu x’jaqsam mar-regolamentazzjoni finanzjarji mal-Istati Uniti;

13. Jissottolinja li l-kalendarju ta’ attwazzjoni għandu jirrifletti l-impatt globali tar-reviżjoni tal-istandards fuq is-settur, fuq il-kapaċità tiegħu li jikkonċedi krediti favur l-ekonomija reali u fuq il-proċess ta’ rkupru fl-Ewropa; jissottolinja li ma għandhomx jiġu esklużi l-akkordji ta’ salvagwardja, gradwalità ta’ miżuri, u jekk tkun neċessarja, reviżjoni tal-kalendarju għalbiex tkun iggarantita tranżizzjoni fluwida għall-istandards il-ġodda;

14. Ifakkar fil-bżonn li l-Parlament, bħala l-korp Ewropew elett demokratikament, ikun involut fin-negozjati, u jħeġġeġ lill-Kummissjoni u lill-Kumitat ta' Basel jieħdu l-passi meħtieġa biex jinvolvuh fuq bażi permanenti;

15. Ifakkar fit-tħassib tiegħu dwar il-limitazzjonijiet tas-suppożizzjonijiet dwar il-korrelazzjonijiet magħmula minn banek li jiffurmaw il-bażi tal-aspetti tal-metodoloġija għall-kalkolu tal-kapital regolatorju; jissottolinja f'dan il-kuntest l-importanza ta’ viġilanza prudenzjali adegwata u l-monitoraġġ tal-valutazzjoni internalizzata tal-banek, bl-użu tal-approċċ IRB; jinnota, barra minhekk, li jeħtieġ li jkunu evitati l-inċentivi perversi;

16. Jistieden lill-Kummissjoni tkompli tintegra s-superviżjoni tal-UE tas-settur bankarju billi twaqqaf Sistema Ewropea ta’ Superviżjoni Finanzjarja u Bord Ewropew għar-Riskju Sistemiku ġodda;

17. Jistieden lill-Kummissjoni, qabel ma tapplikahom, tagħmel valutazzjoni korretta tal-impatt probabbli tar-regoli rivisti ta' Basel II fuq l-ekonomija reali, b'attenzjoni partikoalri għall-finanzjament tal-SMEs u għall-kapaċitajiet ta’ rkupru tas-settur bankarju f’sitwazzjonijiet ta’ stress;

18.  Iqis li huwa neċessarju li jkunu estiżi l-gamma ta’ għodod ta’ intervent minimu tal-ġestjoni tal-kriżi li jiddisponu minnhom is-sorveljanti lilhinn mid-dispożizzjonijiet tal-Artikolu 136 tad-Direttiva 2006/48/KE, ħalli jkunu inklużi mill-anqas il-poteri li ġejjin: rikjesti għall-addattamenti ta’ kapital, likwidità, taħlita ta’ attività u proċessi interni; rakkomandazzjoni jew impożizzjoni ta’ bidliet fost il-maniġers; limitazzjoni tat-termini tal-liċenzji bankarji; impożizzjoni ta’ pjanijiet ta’ likwidazzjoni (living wills); impożizzjoni tal-bejgħ totali jew parzjali; ħolqien ta’ "pont bankarju” jew distinzjoni bejn “bank tajjeb"/"bank ħażin"; rekwiżit tat-trasformazzjoni tad-debiti f’titoli b’haircuts approprijati; impożizzjoni tar-rekwiżiti u r-restrizzjonijiet fuq il-profitt u r-retenzjoni tad-dividendi għall-fini tal-konsolidament tar-rekwiżiti kapitali u jkun żgurat li l-azzjonisti jitħallsu qabel it-taxpayers; ristrutturazzjoni u trasferiment tal-attiv u l-passività lejn stabbilimenti oħrajn għall-fini tal-assikurazzjoni tal-kontinwità tal-operazzjonijiet importanti mill-punt sistemiku; għemil ta' kriterji għall-valutazzjoni tal-attivi deterjorati; nazzjonalizzazzjoni temporanja; likwidazzjoni tal-banek falluti;

19. Jistieden lill-Kummissjoni toħloq inċentivi għas-settur bankarju għall-ġestjoni tar-riskju u l-profitt bil-ħsieb li jinkisbu riżultati fit-tul u tinkoraġġixxi l-banek iżommu interess attiv u kontinwu fis-self fil-kotba tagħhom stess mingħajr titolizzazzjoni eċċessiva jew għal strutturi barra l-bilanċ u li jiġu kkonsolidati xi partiti li ma jidhrux fil-karti tal-bilanċ, bħal SPVs;

20. Jinnota li l-investimenti fit-tul, bħalma hija l-infrastruttura għad-distribuzzjoni tal-enerġija, jiddependu mit-titolizzazzjoni;

21. Jipproponi li jkun hemm l-integrazzjoni tal-Kumitat ta’ Basel, tal-Organizzazzjoni Internazzjonali tal-Kummissjonijiet tat-Titoli (IOSCO) u tal-Bord tal-Istandards Internazzjonali tal-Kontabilità (IASB), eċċ fi struttura globali – possibilment il-FMI – biex tkun stabbilita organizzazzjoni vera tal-finanza, tkun assikurata l-parteċipazzjoni tas-suġġetti kollha interessati fl-elaborazzjoni tar-regoli u tkun iggarantita l-kapaċità ta’ verifika tal-attwazzjoni tagħhom;

22. Huwa tal-fehma li jeħtieġ li tkun affrontata ll-kwestjoni tal-istituti finanzjarji "kbar wisq biex ifallu" u għalhekk li r-rekwiżiti patrimonjali u li r-riżervi antiċikliċi ta’ di fondi proprji għandhom ikunu proporzjonati għad-dimensjoni u għal-livell ta’ riskju tal-mudell ta’ impriża ta’ istituzzjoni finanzjarja;

Il-kwalità tal-kapital

23. Jappoġġa l-inizjattiva biex titjieb il-kwalità u jogħla l-livell tal-kapital bi tweġiba għall-kriżi; ifakkar li din il-kwistjoni hija intimament marbuta mar-regoli tal-kontabilità li jagħmlu neċessarju approċċ koerenti li jirrispetta l-ispirtu tal-konverġenza ġenerali;

24. Jinnota d-deċiżjoni tal-Kumitat ta’ Basel li tippermetti minn (tmiem) Lulju 2010 ċertu rikonoxximent prudenti tal-interessi tal-minoranza, it-trattament tal-krediti fiskali u investimenti fl-istituti finanzjarji l-oħra; huwa tal-fehma li jistgħu jkunu opportuni aktar adegwamenti;

25. Jissottolinja li, sabiex tkun iggarantita parità ta’ kundizzjonijiet ħalli ma jiġux żvantaġġati ċerti mudelli ta' negozju ta' kumpaniji ta' titoli mhux konġunti, b'mod partikolari kooperattivi, mutwi, u banek tat-tfaddil, il-kapital għandu jkun, irrispettivament mill-forma ġuridika, definit b'mod bilanċjat fuq il-bażi tal-kwalità tal-istrumenti ta' kapital (jiġifieri l-permanenza, l-assorbiment tat-telf, il-flessibbiltà tal-pagamenti);

26. Iħeġġeġ lill-Kumitat ta’ Basel u lill-Kummissjoni jqisu, huma u jiddefinixxu l-istrumenti ta’ kapital ammissibbli, in-neċessità u l-pekuljaritajiet tas-soċjetà mhux b’azzjonijiet (jiġifieri l-kooperattivi, il-mutwi, u l-banek ta’ tifdil), li jirrappreżentaw parti kbira mis-settur bankarju Ewropew;

27. Iħeġġeġ lill-Kummissjoni tirrevedi l-kriterji proposti ta’ ammissibilità għall-kapital ta' bażi tal-Livell 1 waqt li tillimita ruħha għal dawk neċessarji li jiggarantixxu l-kwalità tal-kapital (jiġifieri, l-permanenza, l-assorbiment tat-telf, il-flessibbiltà tal-pagamenti);

28. Iħeġġeġ lill-Kumitat ta' Basel u lill-Kummissjoni biex jiżguraw li, fil-kalkoli tal-kapital konsolidat, kemm ir-riskju kif ukoll il-kapital jitqiesu b'mod ibbilanċjat u prudenti, u li b’mod partikolari jiġi rikonoxxut adegwatament il-kapital riċevut mill-minoranzi li jgħaddi direttament fl-istituzzjonijiet ta’ kreditu tal-istess grupp bankarju (jiġifieri, l-interess tal-minoranza) u li jkunu esklużi l-parteċipazzjonijiet fil-kooperattivi u fil-banek tat-tifdil reġjonali fl-istituti ċentrali tagħhom (fi kliem ieħor, na għandux ikun hemm deduzzjonijiet mill-fondi proprji);

29. Jissottolinja r-rwol importanti żvolt mill-kapital kontinġenti matul il-kriżi; jistieden lill-Kummissjoni u lill-Kumitat ta’ Basel jirrikonoxxu r-rwol flessibbli tal-kapital kontinġenti fis-sitwazzjonijiet tal-kriżi u jimmonitorjaw l-aċċettazzjoni tal-istrumenti konvertibbli min-naħa tas-suq;

30. Jistieden lill-Kummissjoni tqis kif jixraq id-differenzi eżistenti bejn it-taxxa u l-karti tal-bilanċ tal-kontijiet sabiex jiġi evitat kull żvantaġġ kompetittiv possibbli;

31. Jitlob lill-Kumitat ta’ Basel u lill-Kummissjoni jikkjarifikaw it-trattament tal-akkordji reċiproċi ta' parteċipazzjoni finanzjarja msallba;

32. Jitlob lill-Kummissjoni tqis trattament ekwilibrat bejn it-telf u l-profitti mhux realizzati, għall-fini li tikkontjeni l-volatilità u l-proċikliċità;

33. Jistieden lill-Kummissjoni tmexxi indaġni approfondita tal-istrumenti ta’ kapital qabel u wara l-kriżi għall-fini li tivvaluta l-importanza tal-istrumenti speċifiċi u r-rilevanza tagħhom f’sitwazzjoni ta’ kriżi;

Standards ta' likwidità

34. Iqis l-iżvilupp ta' standards ta' likwidità ta' kwalità għolja bħala parti ewlenija mir-reazzjoni għall-kriżi; huwa tal-fehma li l-istandards ta’ likwidità għandhom ikunu differenzjati biżżejjed ħalli jinżamm kont tal-pekularitajiet tal-mudell ta’ impriża u tal-profil ta' riskju tal-banek; huwa tal-fehma wkoll li għandu jkun hemm rikonoxximent tal-fatt li r-riskju ta' ċerta attività jista' jvarja fiż-żmien kif ukoll il-mekkaniżmi li bihom jiġi affrontat;

35. Jinnota li t-trasformazzjoni tal-iskadenzi tesponi intrinsikament lill-banek għal riskju ta’ likwidità għat-terminu t-twil/qasir;

36. Huwa tal-fehma li, biex ma jkunux żvantaġġati l-banek rikonoxxuti bħala konglomerati finanzjarji li għandhom parteċipazzjonijiet fis-soċjetajiet tal-assigurazzjoni, il-problema tal-komputu doppju tal-fondi proprji bejn il-banek u l-kumpaniji tal-assigurazzjoni għandha tiġi affrontata fil-qafas tar-reġim attwali previst mid-Direttiva dwar il-Konglomerati Finanzjarji;

37. Iħeġġeġ lill-Kumitat ta’ Basel u lill-Kummissjoni jirrikunsidraw il-kalibrazzjoni tar-ratios ta’ likwidità u ta’ finanzjament;

38. Huwa tal-fehma li l-'proprzjon tal-kopertura tal-likwidità' għandu jqis aktar ir-riskju ta' konċentrazzjoni tal-assi eliġibbli fi kwalunkwe buffer tal-likwidità, għandu jinkoraġġixxi d-diversifikazzjoni u jiskoraġġixxi l-konċentrazzjoni eċċessiva fi klassi waħda partikolari tal-attiv, inkluż id-dejn tal-gvern; jikkunsidra li r-riżervi ta’ likwidità għandhom ikunu kkostitwiti, kemm jista’ jkun, minn attivitajiet li jibqgħu estremament likwidi fil-perijodi ta’ stress għoli u li tali indiċi, jekk ikkonċepit sew, għandu jtejjeb ir-resiljenza tal-entijiet għar-riskju tal-likwidità;

39. Jistieden lill-Kummissjoni tiżgura li, fil-proposta tagħha li jmiss ta’ reviżjoni tad-direttivi dwar ir-rekwiżiti patrimonjali (CRD 4), il-passivitajiet ta’ barra l-bilanċ ikunu koperti bi standards ta’ likwidità;

40. Jitlob li, jekk kemm-il darba jiġi ffissat standard fuq il-likwidità strutturali (jiġifieri indiċi nett ta’ stabilità tal-finanzjamenti), ikun hemm rikonoxximent adegwat tal-għejjun stabbli ta’ finanzjament speċifiċi għall-Ewropa (jiġifieri l-Pfandbriefe); huwa tal-fehma li l-awtoritajiet nazzjonali tal-Istati Membri t’akkoljenza għandu jkollhom aċċess għall-informazzjonijiet fuq is-sitwazzjoni ta’ likwidità tal-filjali f’kwalsiasi każ;

41. Jitlob lill-Kummissjoni tiddefinixxi l-kriterji relattivi għall-attivitajiet likwidi ta’ kwalità elevata skont id-definizzjoni tal-attivi eliġibbli tal-Bank Ċentrali Ewropew għall-operazzjonijiet ta’ politika monetarja (repo facility);

42. Iħeġġeġ lill-Kummissjoni tinkludi d-debitu sovran kollu taz-zona euro fil-kategorija ta’ attivitajiet likwidi ta’ kwalità elevata, indipendentement mir-rating speċifiku, ħalli jitnaqqas l-impatt sproporzjonat tal-operat tal-aġenziji tar-rating;

43. Jiġbed l-attenzjoni, iżda, għall-possibilità li l-attivitajiet likwidi ta’ kwalità elevata jistgħu jsiru malajr illikwidi fil-perijodi ta’ stress qawwi u jitlob għalhekk li l-entijiet kreditizji jeffettwaw testijiet ta' stress li jmorru lilhinn mill-kopertura tal-likwidità u mill-indiċi nett ta' stabilità tal-finanzjamenti;

Miżuri kontroċikliċi

44. Jilqa' b'sodisfazzjon l-isforz għal-limitazzjoni tat-tkabbir ta' kreditu eċċessiv u r-riskju tal-bżieżaq ta' kreditu;

45. Jinsab imħasseb dwar in-natura proċikliċa possibbli ta' buffer fiss għall-konservazzjoni tal-kapital speċifiku għall-banek; huwa tal-fehma li kemm il-buffers ta’ konservazzjoni tal-kapital kemm il-buffers antiċikliċi għandhom ikunu jistgħu jassorbu t-telfiet matul il-perijodi ta’ stress; huwa tal-fehma li, biex il-buffers ikunu effikaċi, jeħtieġ li jkunu mfasslin u żviluppati b’mod parallel;

46. Jilqa' t-tentattiv biex jiġu identifikati sett ta' varjabbli makroekonomiċi armonizzati biex jinbġdid buffers kontroċikliċi effiċjenti;

47. Jirrikonoxxi l-benefiċċji tal-provvedimenti lunġimiranti (l-approċċ tat-telf mistenni) bħala miżura addizzjonali possibbli biex titnaqqas il-proċikliċità u jiġi inkoraġġut ir-rikonoxximent tat-telf ta' kreditu mistenni fir-rigward taċ-ċiklu tan-negozju;

48.  Iqis li l-futura Awtorità Bankarja Ewropea għandha tiżvolġi rwol minn ta’ quddiem fir-redazzjoni u l-implimentazzjoni tal-miżuri relattivi għar-rekwiżiti tal-fondi proprji u għall-istandards relattivi għar-riżervi antiċikliċi tal-fondi proprji f’livell ta’ Unjoni;

49. Jitlob għal konverġenza internazzjonali bejn ir-rappurtar tal-kontijiet u r-rappurtar għal skopijiet regolatorji, partikolarment fir-rigward ta' approċċ tat-telf mistenni fil-profitt żvelat, biex jitqiesu l-lezzjonijiet li ttieħdu mill-kriżi u biex jiġi żgurat li l-istess sett ta' regoli ċari u trasparenti jintużaw meta tiġi ġġenerata informazzjoni għas-superviżuri u l-investituri; iwissi dwar in-neċessità tal-imminizzar tar-rappurtar doppju iqis li tali sforzi għandhom jiġu rivolti fuq kollox lejn l-innovazzjonijiet bħalma huma l-paġna regolamentari jew il-filtri prudenzjali fil-kontijiet ħalli jkunu eżaminati ulterjorment;

50. Jissottolinja li r-regolamentazzjoni antiċiklika tirrikjedi kriterji armonizzati biex tkun iggarantita viġilanza globali u attenta tas-swieq finanzjarji u tal-ambjent tas-swieq da parti tal-awtoritajiet ta’ viġilanza inklużi, fost l-oħrajn, l-iskambju tal-informazzjonijiet kollha, is-sinkronizzazzjoni tal-miżuri ta' regolamentazzjoni kif ukoll il-kontroll f'temp reali tal-espożizzjonijiet u tar-riskji, li jkunu jitolbu, fost l-oħrajn, id-definizzjoni ta' atar ta' reviżjoni kontabbli fuq it-tranżazzjonijiet kollha tas-suq finanzjarju;

Proporzjon ta' lieva (LR)

51. Jinnota, meta titqies il-komplessità tas-sistema finanzjarja, il-kunċett ta’ lieva finanzjarja 'kruda' bħala tarka utli, sempliċi u diffiċli li tkun manipolata kontra lieva finanzjarja eċċessiva u teħid eċċeissv ta' riskji; iwissi li indiċi ta’ lieva finanzjarja uniku forfettarju, biex ikun effikaċi, għandu jkun ponderat b’mod li jippermetti li jinqabdu d-differenzi bejn il-mudelli ta’ impriża u l-profili ta’ riskju tal-entijiet kreditizji;

52. Hu tal-fehma li proporzjon bħal dan, biex ikun effettiv, għandu jinkludi l-partiti u l-prodotti derivati kollha li ma jidhrux fil-karti tal-bilanċ, għandu jkunu definit b'mod ċar, sempliċi u paragunabbli fuq livell internazzjonali u għandu jqis il-kumpensazzjoni regolamentari u l-istandards varji ta’ kontabilità f’livell internazzjonali;

53. Huwa, madankollu, imħasseb li indiċi ta’ lieva finanzjarja krud ma jqisx biżżejjed ir-riskju u jista' jippenalizza entitajiet li jipprovdu servizzi bankarji tradizzjonali ta' riskju żgħir (bħall-finanzjament bl-imnut, soċjetarju, immobiljarju u servizzi ta’ tranżazzjonijiet bankarji) jew ekonomiji fejn is-settur korporattiv hu ffinanzjat prinċipalment permezz ta' self; jissottolinja għalhekk li hu importanti li l-awtoritajiet ta’ viġilanza nazzjonali jikkontrollaw il-modifiki tal-lieva finanzjarja kif ukoll il-livelli ġenerali relattivi, ladarba l-modifiki importanti jistgħu jkunu sinjal ta’ awment fir-riskji; hu mħasseb, barra minhekk, mill-fatt li fih innifsu indiċi ta’ lieva finanzjarja ‘krud’ (indifferenzjat) jista’ joħloq inċentivi perversi għall-ispostament tal-attivi lejn espożizzjonijiet aktar riskjużi;

54. Jitlob lill-Kumitat ta’ Basel u lill-Kummissjoni jivvalutaw b’mod adegwat l-opzjonijiet tar-ratio tal-effett tal-lieva applikabbli għal-Livell u għal-Livell 2, billi jqisu l-ispeċifiċitajiet tas-settur bankarju tal-Unjoni;

55. Jistieden lill-Kumitat ta’ Basel u lill-Kummissjoni jivvalutaw ukoll il-possibilità li jintroduċu limiti ta’ konteniment għal-linji ta’ negozju, l-attivi ponderati f’funzjoni tar-riskji u l-portafolli; jemmen li valutazzjoni tal-attivi bħala totali netti jew grossi għandhom ikunu eżaminati f’dan il-kuntest;

56. Jitlob lill-Kumitat ta’ Basel u lill-Kummissjoni li barra minn kulma ntqal jeżaminaw possibilità ta’ element ta’ proporzjonalità fl-indiċi tal-lieva finanzjarja krud b’rikors għal solli predefiniti għall-intervent regolamentari;

57. Huwa favur indiċi ta’ lieva finanzjarja marbut mal-Pilastu 1 fil-qafas tal-Kumitat ta’ Basel;

58. Jinnota li l-indiċi tal-lieva finanzjarja huwa strument indispensabbli għall-kalkolu tal-espożizzjoni komplessiva tal-banek, għad li xorta jħeġġeġ lill-Kummissjoni telabora strumenti regolmentari intiżi li jillimitaw b’mod effikaċi l-effett lieva eċċessiv (b’mod partikolari, ir-rikors eċċessiv għall-finanzjament fit-terminu l-qasir u fuq skala wiesgħa);

59. Jitlob li jkun hemm eżami ulterjuri tal-modalitajiet alternattivi ta’ indiċi ta’ lieva finanzjarja fil-pilastru 2; jindika li l-indiċi tal-lieva finanzjarja jista' pereżempju jkunu marġini flessibbli u l-awtoritajiet ta' viġilanza għandu jkollha l-fakoltà tintervjenix jew le f'każ ta’ vjolazzjoni tal-limiti;

60. Iħeġġeġ lill-Kummissjoni tiżgura li proporzjon ta' lieva ma jwassalx għal titolizzazzjoni inadegwata tat-tip li nġieb għad-dawl mill-kriżi finanzjarja, jew sostituti u anqas kreditu, partikolarment tal-krediti favur l-ekonomija reali (billi dawn huma mezzi li x'aktarx jużaw il-banek biex inaqqsu l-proporzjon ta' lieva tagħhom);

Riskju tal-kreditu tal-kontroparti (CCR)

61. Jitlob għal standards imtejba f'dak li jirrigwarda t-testijiet ta' reżistenza, il-back-tests u l-indirizzar tar-riskji għan-naħa l-ħażina kif ukoll valutazzjoni tar-riskji soċjali u ambjentali fit-tul konnessi ma’ impriżi u proġetti li jirċievu self bankarju;

62. Iħeġġeġ lill-Kumitat ta’ Basel u lill-Kummissjoni jesploraw alternattivi għal approċċ aħjar tar-riskju ta' rettifika tal-valur tal-kreditu b'segwitu għad-deterjorament tal-kwalità tal-kreditu tal-kontroparti tal-banek;

63. Iqis li l-Credit Default Swaps (CDS) ma għandhomx ikunu utlizzati għalbiex jiġu elużi r-rekwiżiti patrimonjali;

64. Jitlob trattament tar-riskju tal-kreditu tal-kontroparti proporzjonat għar-riskju u r-rekwiżiti patrimonjali aktar elevati għat-tranżazzjonijeit li ma humiex kumpensati f’livell ċentrali mqabblin ma’ tranżazzjonijiet permezz ta' kontroparti ċentrali (CCP), sakemm is-CCP tissodisfa r-rekwiżiti ta' livell għoli li għandhom jiġu definiti fil-leġiżlazzjoni Ewropea filwaqt li jitqiesu l-istandards miftiehma fil-livell internazzjonali, b'attenzjoni xierqa għall-ispejjeż potenzjali għas-settur korporattiv għall-użu ta' derivattivi biex jitħarsu l-attivitajiet kummerċjali tiegħu jitlob li jkunu inċentivati l-ogħla standards f’każ ta’ kumpensazzjoni bilaterali;

65. Jenfasizza li l-kriżi wriet li l-interkonnettività bejn l-istituzzjonijiet finanzjarji hija ikbar mill-interkonnettività bejn l-istituzzjonijiet finanzjarji u l-kumpaniji, u hu tal-fehma li r-rekwiżiti tal-kapital għal CCR għandhom ikunu aktar stretti fir-rigward tar-riskji tal-istituzzjonijiet finanzjarji versu istituzzjonijiet finanzjarji oħra kif ukoll jirriflettu n-natura dinamika ta’ dak ir-riskju mal-mixja taż-żmien; jisħaq li l-monitoraġġ bl-attenzjoni tal-interkonnettività huwa neċessarju għalbiex tinstab konċentrazzjoni ta’ transazzjonijiet bejn atturi ta’ daqs kbir u li għandhom jittieħdu miżuri regolamentarji ulterjuri dwar il-CCR;

°

° °

66. Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill, lill-Kummissjoni, lill-gvernijiet u lill-parlamenti tal-Istati Membri, lill-Grupp tal-Euro u lill-Bank Ċentrali Ewropew.

NOTA SPJEGATTIVA

Ibbażat fuq l-impenn qawwi tal-G20 u l-konklużjonijiet milħuqa fis-samits tal-G20 ta' Washington, Londra u Pittsburgh, il-Kumitat ta' Basel (aktar tard imsemmi bħala "Kumitat") nieda ħidma biex jirriforma l-qafas Basel II biex tissaħħaħ ir-reżistenza tas-sistema bankarja.

Il-proposta tal-Kumitat għandha l-għan li ttejjeb il-kwalità tal-bażi tal-kapital, testendi u ssaħħaħ il-kopertura tal-qafas ta' kapital (bħar-riskju ta' kreditu tal-kontroparti li jirriżulta minn derivattivi, repos, eċċ). Il-Kumitat għandu wkoll l-intenzjoni li jintroduċi proporzjon ta' lieva biex jgħin l-akkumulazzjoni eċċessiva ta' lieva fis-sistema u miżuri kontroċikliċi supplimentari bħal buffers ta' kapitali li għandhom jinbnew fi żminijiet tajbin. Fl-aħħar iżda mhux l-anqas, qegħdin jiġu proposti standards globali għall-ġestjoni tal-likwidità.

Ir-rapporteur huwa konvint li l-kriżi stabbiliet każ ċar għal reviżjoni mill-qiegħ tal-qafas regolatorju attwali. Għalhekk jilqa' l-isforzi tal-Kumitat ta' Basel biex jaġġorna l-qafas b'mod ġenerali.

Minkejja l-appoġġ ġenerali tiegħu għar-riforma tal-qafas, ir-rapporteur huwa imħasseb ferm dwar nuqqasijiet li jidhru fil-proċess tan-negozjati dwar il-qafas rivedut, u li l-qafas, kif attwalment ippreżentat, b'mod ċar jitfa' l-ekonomija Ewropea fi żvantaġġ kompetittiv.

Ir-raġuni prinċipali għal dan ir-rapport huwa għalhekk sejħa tal-Parlament Ewropew biex il-Kumitat ta' Basel jiġi inkluż bil-mod xieraq fin-negozjati li għaddejjin u sejħa biex isiru l-aġġustamenti meħtieġa għall-qafas biex l-industrija u l-ekonomija Ewropea ma jkunux żvantaġġati.

Il-Parlament Ewropew għandu jkollu rwol attiv u jinfluwenza bil-qawwa r-reviżjoni tar-regoli li jinsabu fil-proċess tan-negozjati fil-Kumitat ta' Basel. Ir-rapporteur jemmen li, kif il-Parlament Ewropew huwa l-korp Ewropew elett demokratikament li iktar tard se jikkoleġiżla dwar il-proposta tal-Kummissjoni għad-Direttiva dwar ir-Rekwiżiti tal-Kapital (id-Direttiva CRD 4), għandu jkun involut fil-proċess tan-negozjati fi stadju bikri, u jitlob lill-Kumitat ta' Basel u lill-Kummissjoni jieħdu l-passi meħtieġa f'dan ir-rigward.

Għalkemm hemm impenn internazzjonali qawwi biex jiġi rivedut il-qafas ta' Basel, huwa importanti li reviżjoni bħal din tilħaq bilanċ ġust bejn diversi mudelli ta' negozju, investiment u servizzi bankarji tradizzjonali bl-imnut, forom legali differenti u l-finanzjament predominanti tas-settur korporattiv permezz ta' self bankarju fl-Ewropa. Filwaqt li l-ekonomija Amerikana hija prinċipalment iffinanzjata permezz tas-suq tal-kapital, is-settur korporattiv Ewropew iserraħ fuq il-kapaċità ta' self tas-settur bankarju. 80% tal-investiment u tas-self fl-Ewropa hu bbażat fuq il-krediti bankarji. Ir-regoli riveduti għandhom iqisu dawn id-differenzi mingħajr ma jippenalizzaw ċerti swieq jew mudelli ta' negozju. Inkella, hemm riskju li ssir ħsara lill-ekonomija u lill-industrija Ewropea.

Ir-rapporteur jaqbel mal-importanza li jkun hemm l-istess kundizzjonijiet għal kulħadd fil-qasam internazzjonali fir-rigward tal-qafas rivedut Basel II bil-kundizzjoni li qafas bħal dan ma jpoġġix l-ekonomija Ewropea fi żvantaġġ kompetittiv.

Fi ħdan il-Kumitat ta' Basel hemm bżonn li jkun hemm impenn qawwi mill-partijiet kollha involuti għal kalendarju ta' implimentazzjoni ċar u koerenti. Ir-rapporteur huwa tal-fehma li din hija prekondizzjoni għal riforma li tirnexxi u għall-prevenzjoni ta' arbitraġġ regolatorju. Ir-rapporteur jistieden lill-Kummissjoni u lill-Istati Membri biex jikkoordinaw aħjar fl-interess tal-Unjoni Ewropea.

Il-kalendarju ta' implimentazzjoni għandu jqis l-impatt tal-elementi kollha tal-qafas rivedut Basel II u tar-riformi kollha li għaddejjin dwar l-ekonomija reali. Speċjalment, il-finanzjament tal-SMEs u tas-settur korporattiv għandu jiġi żgurat, peress li l-SMEs huma waħda mill-forzi ta' spinta għat-tkabbir u l-impjiegi fl-Ewropa.

Barra minn hekk, il-proposta li jmiss tas-CRD4 għandha tkun konformi ma' awtorità superviżorja b'saħħitha.

Ir-rapporteur huwa mħasseb dwar ir-rabta li hemm bejn il-komponenti differenti tal-proposta ġejjiena – it-tisħiħ tal-kwalità tal-kapital hekk kif jogħla l-livell tal-kapital għandu jsir b'mod kawt.

Ir-rapporteur huwa tal-fehma li, bħala l-għan bażiku tar-riforma, il-banek għandhom jiffokaw aktar fuq il-ġestjoni tar-riskju u l-qligħ lejn riżultati fit-tul. Il-proposta ġejjiena għandha ssib mod biex jinħolqu inċentivi għall-banek biex iżommu l-krediti fil-kotba tagħhom mingħajr l-użu eċċessiv ta' titolizzazzjoni u ta' partiti li ma jidhrux fil-karti tal-bilanċ.

IL-KWESTJONIJIET FID-DETTALL:

Il-kwalità tal-kapital

Ir-rapporteur jappoġġa bis-sħiħ l-idea tat-tisħiħ tal-kwalità u l-kwantità tal-kapital bħala reazzjoni għall-kriżi. Huwa jilqa' l-approċċ għar-reviżjoni tad-definizzjoni ta' kapital lejn il-kwalità tal-istrumenti tal-kapital ibbażati fuq il-permanenza, l-assorbenza tat-telf u l-flessibilità tal-pagamenti imma għandu dubji dwar il-konċentrazzjoni indiretta lejn ċerti forom legali. Barra minn hekk, id-definizzjoni ta' strumenti ta' kapital eliġibbli m'għandhiex tiżvantaġġa ċerti mudelli ta' negozju ta' kumpaniji b'titoli mhux konġunti, b'mod partikolari kooperattivi u banek tat-tfaddil, li jirrappreżentaw il-parti l-kbira tal-industrija bankarja Ewropea.

Ir-rekwiżiti kollha tal-kapital għandhom ikunu konformi mal-għan ġenerali ta' Basel dwar is-sensittività tar-riskju billi jiġu evitati l-iżbilanċi fit-tnaqqis tal-kapital, li għandhom iqisu kemm ir-riskju kif ukoll il-kapital b'mod ibbilanċjat (jiġifieri, l-interessi tal-minoranza).

Standards ta' likwidità

Ir-rapporteur huwa tal-fehma li t-tisħiħ tal-istandards ta' likwidità huwa parti ewlenija tar-rekwiżiti riveduti ta' Basel bħala reazzjoni għall-kriżi. Waħda mil-lezzjonijiet mill-kriżi bħala kriżi tal-likwidità hi li hija meħtieġa aktar likwidità biex tkun tista' tlaħħaq mas-sitwazzjonijiet ta' tensjoni kemm f'qasir żmien kif ukoll fit-tul.

Ir-rapporteur hu tal-fehma li l-istandards tal-likwidità l-ġodda m'għandhomx jinkoraġġixxu l-konċentrazzjoni ta' assi eliġibbli f'buffer ta' likwidità fi klassi partikolari, iżda minflok għandhom jinkoraġġixxu d-diversifikazzjoni f'assi ta' likwidità ta' kwalità għolja. Ir-rapporteur huwa mħasseb dwar l-istruttura tal-Proporzjon tal-Finanzjament Stabbli. Is-sitwazzjoni fir-rigward ta' ċerti bonds tal-gvern turi li l-ebda klassi ta' assi ma hija fiha nnifisha waħda stabbli.

Ir-rapporteur jemmen li hemm bżonn aktar flessibilità f'termini tal-assi likwidi eliġibbli ta' kwalità għolja li huma disponibbli fl-Ewropa billi jitqiesu l-ispeċifiċitajiet u jiġu rikonoxxuti kif jixraq is-sorsi stabbli ta' speċifiċitajiet ta' finanzjament fl-Ewropa.

Miżuri kontroċikliċi

Il-Kumitat ta' Basel jipprevedi l-introduzzjoni ta' sett ta' miżuri biex jinkoraġġixxu l-banek jibnu buffers ta' kapital fi żminijiet tajba biex jinħarġu fi żminijiet ħżiena.

Ir-rapporteur jilqa' b'sodisfazzjon l-isforzi tal-Kumitat biex jillimita t-tkabbir tal-kreditu eċċessiv u l-ħolqien ta' bżieżaq tal-kreditu, u miżuri bħal dawn għandhom ikunu maħsuba biex itaffu n-natura proċiklika tal-qafas regolatorju eżistenti. Ir-rapporteur hu madankollu mħasseb dwar in-natura proċikliċa persistenti tal-possibilità ta' buffer fiss ta' konservazzjoni speċifikament għall-banek.

Ir-rapporteur jappoġġa bis-sħiħ il-kunċett ta' provvedimenti għal waqt iċ-ċiklu li jħarsu 'l quddiem bħala miżura kontroċiklika possibbli. F'dan ir-rigward huwa jenfasizza l-importanza tal-konverġenza bejn l-istandards tar-rappurtar għall-iskopijiet ta' kontabilità u għal skopijiet prudenzjali b'mod partikolari fir-rigward ta' approċċ tat-telf mistenni fil-profitt żvelat, u jwissi dwar l-impatt negattiv tar-rappurtar doppju.

Għandu jiġi miżjud li l-isforzi għall-kisba ta' konverġenza globali tal-istandards tal-kontabilità lejn sett ta' standards internazzjonali ta' kwalità għolja (IFRS) huma ta' importanza kbira għat-twettiq b'suċċess tal-aġenda tal-G20, biex tiġi żgurata l-komparabbiltà tal-informazzjoni għall-investitur u tal-istess kundizzjonijiet fil-livell internazzjonali.

Proporzjon tal-lieva

Ibbażat fuq il-konklużjonijiet tal-G20, il-Kumitat ta' Basel qiegħed imexxi l-kunċett ta' proporzjon 'approssimattiv' tal-lieva. L-għan tal-proporzjon hu li jkun backstop li jipprevjeni l-akkumulazzjoni ta' lieva eċċessiva fis-sistema.

Ir-rapporteur hu mħasseb sew dwar dan il-proporzjon. Barra minn hekk, huwa tal-fehma li dan il-proporzjon, sabiex ikun effettiv, għandu jkopri oqsma enfasizzati mill-kriżi bħal ma huma l-partiti li ma jidhrux fil-karti tal-bilanċ u d-derivattivi, u jkun komparabbli fil-qasam internazzjonali. Ladarba l-istruttura tal-LR tkun ġiet stabbilita, jeħtieġ jiġu kkunsidrati kwistjonijiet oħrajn, bħall-inklużjoni tal-LR fil-pilastru 1 jew pilastru 2, u l-impatt fuq servizzi bankarji b'riskju żgħir, bħall-proprjetà immobiljarji u l-finanzjament korporattiv.

Riskju tal-kreditu tal-kontroparti (CCR)

Il-kriżi kixfet ċerti nuqqasijiet fil-mod kif qegħdin isiru t-testijiet ta' reżistenza u l-back-testing u kif qiegħed jiġi indirizzat ir-riskju għan-naħa żbaljata. Barra minn hekk, il-kriżi wriet x'impatt devastanti jista' jkollu n-nuqqas ta' trasparenza u ċarezza fuq il-kummerċ tad-derivattivi mwettaq permezz tas-swieq tal-OTC. Il-Kumitat ta' Basel jipproponi sett ta' bidliet li jindirizzaw problemi ewlenin fejn il-ġestjoni tas-CCR dehret li kienet defiċjenti.

Ir-rapporteur jappoġġa bis-sħiħ l-isforzi tal-Kumitat biex jissaħħu l-istandards dwar it-testijiet ta' reżistenza, il-back-testing u l-indirizzar tar-riskju għan-naħa żbaljata.

Huwa jilqa' l-isforz tal-Kumitat li jinċentiva l-ikklerjar tal-kummerċ tal-OTC permezz ta' kontroparti ċentrali (CCP) u huwa tal-fehma li r-rekwiżiti tal-kapital għandhom jiddistingwu bejn ir-riskji ta' tranżazzjoni mwettqa permezz tas-CCP u dik ta' tranżazzjoni tal-OTC bil-kundizzjoni li CCP bħal din tkun tissodisfa standards ta' livell għoli. L-istandards għandhom jiġu żviluppati mill-Kummissjoni Ewropea filwaqt li jitqiesu l-iżviluppi internazzjonali.

Ir-rapporteur jinnota wkoll it-tħassib tas-settur korporattiv li juża d-derivattivi biex il-kumpaniji jitħarsu mir-riskji kummerċjali tagħhom dwar l-ispejjeż possibbli ta' tariffi fuq il-kapital għal derivattivi li ma jkunux ikklerjati b'mod ċentrali u jitlob lill-Kummissjoni tqis l-impatt possibbli u l-ispejjeż relatati għall-kumpaniji meta ssir distinzjoni bejn it-tariffi fuq il-kapital bejn tranżazzjonijiet tal-OTC u tranżazzjonijiet ta' derivattivi kklerjati mis-CCP.

RIŻULTAT TAL-VOTAZZJONI FINALI FIL-KUMITAT

(1) Direttiva 2006/48/KE (ĠU L 177, 30.6.2006, p. 1) u d-Direttiva 2006/49/KE (ĠU L 177, 30.6.2006, p. 201). (2) ĠU L 302, 17.11.2009, p. . 97. (3) Basel II: Il-Konverġenza Internazzjonali tal-Kejl tal-Kapital u l-Istandards tal-Kapital: Qafas Ri-eżaminat – Verżjoni Komprensiva ta’ Ġunju 2006, http://www.bis.org/publ/bcbs128.htm. (4) Proposti konsultattivi tal-Kumitat ta’ Basel biex tissaħħaħ l-elastiċità tas-settur bankarju, is-17 ta' Diċembru 2009, http://www.bis.org/press/p091217.htm. (5) Il-proposti konsultattivi tal-Kumitat ta’ Basel dwar qafas internazzjonali għall-kejl tar-riskju tal-likwidità, l-istandards u l-monitoraġġ mis-16.12.2009, http://www.biz.org/publ/bcbs165.htm. (6) Testi adottati, P7_TA(2010)0206. (7) ĠU L 320, 29.11.2008 p. 1.