dwar ir-rakkomandazzjoni tal-Kummissjoni regolazzjoni ta’ kummerċ fi strumenti finanzjarji – ‘dark pools’ eċċ

(2010/2075(INI))

Il-Parlament Ewropew,

–   wara li kkunsidra d-Direttiva 2004/39/KE dwar swieq fl-istrumenti finanzjarji (MiFID)(1),

–   wara l- kkunsidra d-Direttiva dwar l-insider dealing u l-manipulazzjoni tas-swieq (abbuż tas-suq)(2),

–   wara li kkunsidra d-dikjarazzjonijiet tal-G20 tat-2 ta' April 2009 f'Londra, tal-25 ta' Settembru 2009 f'Pittsburgh u tas-26 u 27 ta' Ġunju 2010 f'Toronto,

–   wara li kkunsidra l-parir tekniku tas-CESR lill-Kummissjoni Ewropea fil-Kuntest tar-Reviżjoni tal-MiFID - Swieq tal-Isħma (Equity Markets: Ref: CESR/10-394),

–   wara li kkunsidra l-parir tekniku tas-CESR lill-Kummissjoni Ewropea fil-Kuntest tar-Reviżjoni tal-MiFID - Rappurtar ta' Transazzjonijiet (Ref.: CESR/10-292),

–   wara li kkunsidra l-parir tekniku tas-CESR lill-Kummissjoni Ewropea fil-Kuntest tar-Reviżjoni tal-MiFID - Protezzjoni tal-Investituri u l-Intermedjarji (Ref.: CESR/10-417),

–   wara li kkunsidra t-talba tas-CESR għal evidenza dwar kwistjonijiet mikro-strutturali tas-swieq tal-isħma Ewropej (Ref.: CESR/10-142),

–   wara li kkunsidra r-rapport tal-Ministru Franċiż tal-Ekonomija, l-Industrija u x-Xogħol dwar ir-reviżjoni tal-MiFID minn Frar 2010,

–   wara li kkunsidra r-rapport ta' konsultazzjoni tal-IOSCO dwar ‘Politiki għal aċċess elettroniku dirett’ ta' Frar 2009,

–   wara li kkunsidra r-rakkomandazzjoni tas-CPSS u l-IOSCO għal kontrapartijiet ċentrali ta' Novembru 2004,

–   wara li kkunsidra r-rilaxx ta' kunċett tas-Securities and Exchanges Commission dwar l-Istruttura tas-Suq tal-Isħma (Equity Market Structure) (Nru. 34-61358; File No. S7-02-10),

–   wara li kkunsidra l-parir tekniku tas-CESR lill-Kummissjoni Ewropea fil-Kuntest tar-reviżjoni tal-MiFID u r-risponsi għat-talba tal-Kummissjoni Ewropea għal aktar informazzjoni (Ref: CESR/10-802, Ref: CESR/10-799, Ref: CESR/10-808, Ref: CESR/10-859, Ref: CESR/10-860),

–   wara li kkunsidra l-Artikolu 48 tar-Regoli ta’ Proċedura tiegħu,

–   wara li kkunsidra r-rapport tal-Kumitat għall-Affarijiet Ekonomiċi u Monetarji (A7-0326/2010),

A. billi li l-G20 stipulaw li ebda istituzzjoni finanzjarja, ebda prodott finanzjarju u ebda territorju m'għandu jibqa' barra mill-ambitu ta' regolazzjoni intelliġenti u superviżjoni effettiva u ftiehmu li kull kuntratt derivattiv OTC standardizzat għandu jiġi kummerċjalizzat fis-swieq organizzati jew permezz ta’ pjattaformi tal-kummerċ elettroniku, fejn ikun xieraq,

B.  billi n-nuqqas ta’ trasparenza u l-opaċita li ġġib magħha tax-xejriet tar-riskji fis-sistema finanzjarja kienu fattur aggravanti tal-kriżi finanzjarja, u ffaċilitaw it-tifrix ta’ nuqqas ta’ fiduċja ġenerali u għaldaqstant ikkontribwew għal tnaqqis drastiku ta' flussi ta' likwidità,

C. billi l-protezzjoni tal-konsumatur, it-trasparenza, partikolarment rigward il-proċess tal-formazzjoni tal-prezzijiet, l-effiċjenza u s-swieq likwidi u l-kompetizzjoni b’kundizzjonijiet ugwali kienu l-objettivi kruċjali meta daħlet fis-seħħ l-MiFID iżda madankollu dawn l-objettivi għadhom ma ntlaħqux u għaldaqstant iridu jibqgħu prijorità; billi wara l-kriżi finanzjarja, il-limitazzjoni tar-riskju sistematiku jeħtieġ ukoll li tingħata prijorità fir-reviżjoni tal-MiFID,

D. billi kwalunkwe tibdil tal-MiFID irid iqis dejjem l-importanza tiegħu għar-regolamentazzjoni tal-flussi tal-kapital fl-ekonomija reali, u għaldaqstant l-impatt potenzjali fuq l-impjiegi, l-investimenti u l-penzjonijiet,

E.  billi sa 40% tal-volum ta' kummerċ għadu OTC; billi l-parteċipanti fis-suq għandhom ikunu mħeġġa jagħmlu aktar tranżazzjonijiet f'lokalitajiet ta' kummerċ organizzati;

F.  billi l-inklużjoni fl-MiFID ta’ konċessjonijiet għar-rekwiżiti ta’ trasparenza ta’ qabel il-kummerċ u t-twaqqif ta’ MTF u dark pools kienu maħsuba biex jiffaċilitaw bidla fid-direzzjoni lejn lokalitajiet aktar regolamentati u trasparenti,

G. billi l-MiFID tiddefinixxi l-kummerċ OTC bħala kummerċ ad hoc, irregolari, imwettaq ma' kontropartijiet bl-ingrossa u li jagħmel parti minn relazzjoni kummerċjali li minnha nnifisha hi kkaratterizzata minn tranżazzjonijiet akbar mid-daqs standard tas-suq, u fejn it-tranżazzjonijiet jitwettqu barra mis-sistemi li jintużaw normalment mill-kumpanija konċernata għan-negozju tagħha bħala internalizzatur sistematiku,

H. billi minkejja d-dispożizzjoni fl-MiFID ta’ konċessjonijiet li jippermettu dark trading fis-swieq organizzati, it-twaqqif ta' MTFs u Internalizzaturi Sistematiċi (SIs) u d-definizzjoni tal-kummerċ OTC bħala irregolari u ad hoc, il-kummerċ OTC li ma jitwettaqx fuq bażi SI għad għandu proporzjon kbir tal-kummerċ tal-ekwitajiet:38% tal-kummerċ kollu rappurtat skont CESR/10-394, u billi dan il-proporzjon ma naqasx minn meta ġiet implimentata l-MiFID; billi għandu jiġi żgurat infurzar aktar rigoruża u effikaċi tar-regoli u tal-konċessjonijiet tal-MiFID,

I.   billi l-frammettazzjoni tas-suq tal-kummerċ tal-ekwitajiet kellha impatt mhux mixtieq fuq il-likwidità u l-effiċjenza tas-suq - minħabba tnaqqis fit-trasparenza dovut għal żieda ta’ dark pools u CNs, iż-żieda fin-numru ta' lokalitajiet ta' kummerċ, kemm fil-boroż kif ukoll barra minnhom, u kummerċ dejjem aktar immexxi mit-teknoloġija - u naqqset sinifikattivament id-daqs medju tat-tranżazzjonijiet minn EUR 22 266 fl-2006 għal EUR 9 923 fl-2009, biż-żieda tal-kost totali tat-tranżazzjonijiet għal xi utenti,

J.   billi t-tnaqqis fid-daqs tat-tranżazzjonijiet wassal għal tnaqqis fil-kapaċità tal-parteċipenti fis-suq li jwettqu b'mod istantanju ordnijiet kbar f'suq partikulari u x-xewqa li jiġi evitat l-impatt fuq is-suq fil-każ ta’ ordnijiet kbar inkuraġġixxew l-espansjoni ta' kummerċ "dark pool"; billi anqas minn 10% tal-kummerċ kollu fl-ekwitajiet EEA fis-swieq organizzati jużaw il-konċessjonijiet ta' trasparenza ta' qabel il-kummerċ (CESR/10-394), filwaqt li dawn il-konċessjonijiet tal-MiFID taw lok għal kummerċ dark pool bħala alternattiva aktar trasparenti u aktar regolamentata mill-kummerċ dark trading fi spazju OTC iżda billi n-nuqqas ta' regolamentazzjoni suffiċjenti għat-tranżazzjonijiet OTC, inklużi Broker Crossing Networks, tipprovdi vantaġġ kompetittiv għall-ispazju OTC u jinkuraġġixxi żieda ta' kummerċ oskur li jhedded it-trasparenza b'mod ġenerali; billi bħala total kważi nofs l-attivitajiet ta' kummerċ m'humiex koperti mir-rekwiżiti tat-trasparenza ta' qabel il-kummerċ, iżda nofs it-tranżazzjonijiet OTC huma anqas mid-daqs tas-suq u għalhekk ma jeżigux protezzjoni kontra l-impatt fuq is-suq;

K. billi, sabiex ikunu żgurati kundizzjonijiet ekwi għal kulħadd, broker crossing networks (BCNs) għandhom ikunu suġġetti għal investigazzjoni fil-fond tal-mudelli ta' kummerċ tagħhom sabiex ikun żgurat li - fejn jipprovdu servizzi li jfisser li jkunu jiffunzjonaw essenzjalment bħala swieq regolati (RMs), faċilitajiet tal-kummerċ multilaterali (MTFs) jew bħala Internalizzaturi Sistematiċi - jiġu regolati bħala tali;

L.  billi l-benefiċċji tal-kompetizzjoni f'termini ta' infrastruttura ta' kummerċ aktar kompettittiva u innovattiva ma ġewx ippruvati minħabba li l-ispejjeż totali tat-tranżazzjoni ma tnaqqsux, u n-nuqqas ta’ trasparenza żdiedet filwaqt li fl-istess ħin jidher ċar li m'hemmx garanzija xierqa ta’ kwalità u integrità għall-parteċipanti kollha f'suq dejjem aktar frammentat,

M. billi, ġaladarba l-HFT għandu l-pretensjoni li jipprovdi likwidità lis-swieq finanzjarji, jkun siewi li niddeterminaw jekk hemmx-riskji assoċjati ma' sistemi ta' ordnijiet elettroniċi u s-sehem sinifikattiv fil-volumi ta' kummerċ attribwibbli għal ċerti strateġiji HFT, li jlaħħqu mas-70% fl-Istati Uniti, b'mod partikulari meta nqisu l-konklużjonijiet tal-Securities and Exchange Commission rigward il-"flash crash" fl-Istati Uniti tas-6 ta' Mejju 2010 meta l-provvedituri ta' likwidità HFT ħarġu mis-suq,

N. billi l-istrateġiji ta’ HFT huma fenomenu relattivament ġdid fl-Ewropa u hu stmat li issa jammontaw għal 35% tal-volum tas-suq,

O. billi aktar trasparenza permezz ta' rapputar ta' qabel il-kummerċ u ta' wara l-kummerċ tal-attività kummerċjali fost il-klassijiet kollha ta' assi għandha tiġi stabbilita biex tipprovdi twissija bikrija aħjar tal-akkumulazzjoni u l-iskala tal-problemi li jkunu qed jiżviluppaw, kif ukoll sabiex tittejjeb l-effiċjenza tal-proċess tal-formazzjoni tal-prezzijiet u tisseddaq il-fiduċja fost il-parteċipanti fis-suq,

P.  billi skont id-deċiżjonijiet tal-G20 tal-24 u l-25 ta’ Settembru 2009 f’Pittsburgh "kull kuntratt derivattiv OTC standardizzat għandu jiġi nnegozjat f’xi borża jew permezz ta’ pjattaformi tal-kummerċ elettroniċi",

Q. billi d-diverġenza fl-implimentazzjoni bejn l-Istati Membri wasslet għal applikazzjoni mhux kompluta tal-qafas MiFID,

Lokalitajiet ta' Kummerċ tal-MiFID

1.  Jagħraf li l-infrastrutturi tas-swieq żammew sod tul il-kriżi u jistieden lill-Kummissjoni sabiex issaħħaħ l-infrastrutturi tas-suq fil-lokalitajiet kollha ta' kummerċ u għas-sistemi kollha ta' approvazzjoni (clearing systems) sabiex ikunu jistgħu jittrattaw ir-riskji futuri permezz ta' trasparenza mseddqa, flessibilità aħjar u sorveljanza regolatorja tal-kummerċ aggregat kollu;

2.  Jilqa’ l-proposta tal-Kummissjoni għal Regolament dwar derivattivi OTC, kontropartijiet ċentrali u repożitorji tal-kummerċ bħala prerekwiżit meħtieġ biex tiżdied it-trasparenza u s-sikurezza fis-swieq fi strumenti finanzjarji u jqisha bħala l-ewwel pass lejn ridirezzjoni tal-proporzjonijiet sinifikanti ta’ kummerċ OTC lejn lokalitajiet tal-kummerċ suġġetti għal regolamentazzjoni tal-MiFID.

3.  Jissuġġerixxi li fl-interess tat-trattament ekwu, l-MTFs għandhom ikunu suġġetti għall-istess livell ta' sorveljanza, u għalhekk ikunu regolati b'mod komparabbli, għax il-kompetizzjoni bejn l-MTFs u l-RMs għandha ssir b’kundizzjonijiet ugwali, filwaqt li jitqies ir-rwol importanti tal-MTFs għad-dħul fis-swieq;

4.  Jitlob li l-ESMA tagħmel investigazzjoni dwar il-funzjonament u l-iskop tal-iskema SI (Internalizzatur Sistematiku) u li jiġi ssuġġerit titjib għall-mod kif din il-kategorija hija regolata sabiex jiġi żgurat li jiżdied b'mod sustanzjali l-użu ta' din l-iskema fit-twettiq ta’ ordnijiet fuq bażi bilaterali mal-kontraparti finanzjarja;

5.  Jitlob li ditti ta' investiment li jipprovdu servizz ta' mmaniġġjar ta' portafolli u li jaġixxu fil-kapaċità ta’ ġestjoni tal-portafolli jridu jkunu pprovduti bl-aħjar eżekuzzjoni mid-ditti ta' investiment lil min jagħtu l-ordni, minkejja l-fatt li l-maniġer tal-portafoll jkun kategorizzat mill-MiFID bħala kontraparti eliġibbli;

6.  Jitlob li l-AETS twettaq reviżjoni dwar jekk l-aħjar twettiq ta' ordni wara ordni jeħtigx li jkun moqdi aħjar b'regolament fir-rigward tad-disponibilità tad-data, kemm wara l-kummerċjalizazzjoni kif ukoll rigward il-kwalità ta' eżekuzzjoni, u rigward teknoloġija tas-suq, bħala huma routers ta' ordnijiet u konnessjonijiet bejn lokalitajiet;

7.  Jitlob li jkun hemm infurzar bir-reqqa tad-dispożizzjonijiet fl-MIFID sabiex ikun żgurat li l-BCNs li jkunu qed iwettqu attivitajiet ekwivalenti għal RM, MTF jew SI jiġu regolamentati bħala tali u li sabiex ikun faċilitat dan l-infurzar, jinsisti li l-BCNs kollha għandhom ikunu meħtieġa jissottomettu lill-awtoritajiet kompetenti l-informazzjoni kollha meħtieġa, inklużi:

a) deskrizzjoni tas-sistema, is-sjieda u l-klijenti,

b) dettalji dwar l-aċċess għas-sistema,

c) ordnijiet imqabbla fis-sistema,

d) metidoloġiji ta' kummerċ u diskrezzjoni tal-brokers,

e) arranġamenti għar-rappurtar immedjat wara l-attività ta' kummerċ;

8.  Jitlob li ssir investigazzjoni dwar il-kummerċ OTC tal-ekwitajiet u jitlob li jkun hemm titjib għall-mod kif hu regolamentat il-kummerċ OTC sabiex ikun żgurat li l-użu ta’ MTFs fl-eżekuzzjoni tal-ordnijiet fuq bażi multilaterali u ta’ SIs fl-eżekuzzjoni ta’ ordnijiet fuq bażi bilaterali jiżdied, u li l-proporzjon ta’ kummerċ fl-ekwitajiet li jitwettaq OTC jonqos b’mod sosotanzjali;

9.  Jitlob li ssir investigazzjoni mill-Kummissjoni dwar l-effetti tal-iffissar ta’ daqs minimu tal-ordnijiet għal tranżazzjonijiet dark pool kollha u jekk dan jistax tiġi infurżat b'mod rigoruż sabiex jinżamm fluss adegwat ta' kummerċ permezz tal-lokalitajiet li joperaw b'mod trasparenti fl-interess tad-determinazzjoni tal-prezzijiet;

Konċessjonijiet dwar Trasparenza Qabel Attività ta' Kummerċ

10. Jitlob li l-Kummissjoni twettaq rieżami tal-konċessjonijiet tal-MiFID dwar trasparenza ta' qabel attività ta' kummerċ sabiex:

a) jiġi kkunsidrat jekk limitu speċifikat minimu xieraq għandux jiddaħħal għall-konċessjoni ta' Prezz ta' Referenza sabiex jinkuraġġixxi l-użu ta' lokalitajiet lit,

(b) titqis l-espansjoni tal-konċessjoni tal-Prezz ta' Referenza sabiex tinkludi attivita ta' kummerċ li taqa' fi ħdan il-firxa attwali fis-suq ta' referenza;

(c) tintroduċi volum massimu ta’ tranżazzjonijiet li jistgħu jużaw konċessjonijiet ta’ trasparenza ta’ qabel il-kummerċ, biex tkun żgurata skoperta effiċjenti tal-prezzijiet,

(d) tagħti l-possibilità lill-AETS li tadatta u tillimita l-konċessjonijiet ta' qabel il-kummerċ skont il-ħtieġa, filwaqt li jitqies l-impatt tad-dark trading fuq l-effiċjenza tas-swieq,

11. Jitlob li jkun hemm applikazzjoni uniformi tal-konċessjonijiet ta' qabel l-attività ta' kummerċ fl-Istati Membri kollha sabiex tillimita d-differenzi fl-implimentazzjoni li jistgħu jwasslu għall-inċertezza, arbitraġġ regolatorju u kundizzjonijiet li ma jkunux ekwi għal kulħadd; jissuġġerixxi li l-istandards tekniċi definiti mill-AETS jista' jkunu mod xieraq biex jinkiseb dan, bi qbil mal-kunċett ta' ġabra waħda ta' regoli għas-servizzi finanzjarji;

Tejp Konsolidat

12. Jilqa’ l-avviż reċenti mill-parteċipanti tas-swieq li se jiżvelaw id-data ta' qabel u wara l-kummerċ u jitlob li jsiru aktar sforzi lejn standards komuni dwar id-data u disponibilità aħjar tad-data;

13. Jistieden lill-Kummissjoni sabiex tistabbilixxi grupp ta' ħidma sabiex jingħelbu d-diffikultajiet li qed iżommu lura l-konsolidazzjoni tad-data tas-swieq fl-Ewropa u l-partikolarment l-kwalità fqira tar-rappurtaġġ tad-data dwar it-tranżazzjonijiet kollha;

14. Jistieden lis-CESR sabiex tfassal standards komuni ta' rappurtar u formati għar-rappurtar ta' data kollha ta’ wara l-kummerċ, kemm fil-każ ta’ lokalitajiet tal-kummerċ organizzati kif ukoll dwar OTCs, sabiex jiffavorixxu l-konsolidazzjoni tad-data;

15. Jitlob li l-lokalitajiet ta' kummerċ kollha jkunu mistennija jisseparaw id-data ta’ wara l-kummerċ minn mad-data ta’ qabel il-kummerċ sabiex l-informazzjoni tkun tista' tkun disponibbli għall-parteċipanti kollha fis-suq bi spiża kummerċjalment raġonevoli u komparabbli; jitlob ukoll lill-Kummissjoni sabiex tikkunsidra l-introduzzjoni ta’ Arranġamenti ta’ Pubblikazzjoni Approvata (APAs) sabiex jintroduċu standards ta’ kwalità għall-pubblikazzjoni tal-kummerċ u jnaqqsu n-numru ta' lokalitajiet fejn jiġu rappurtati attivitajiet ta' kummerċ, kif ukoll l-użu ta’ paġni tal-internet li huma ostaklu għall-konsolidazzjoni;

16. Jitlob li jitnaqqas il-limitu ta' żmien għall-pubblikazzjoni diferita sabiex it- tranżazzjonijiet ikunu rrappurtati lir-regolaturi fi żmien erbgħa u għoxrin siegħa wara li jkunu saru; huwa tal- feham li fir-rigward tal-pubblikazzjoni tat- tranżazzjonijiet elettroniċi, f'ċirkustanzi ordinarji, dewmien ta' aktar minn minuta għandu jkun ikkunsidrat bħala inaċċettabbli

17. Jemmen li hu essenzjali li jiġi analizzat ir-rendikont u l-mudelli tan-negozju tal-kummerċ OTC, u għaldaqstant jitlob li introduzzjoni ta' bnadar speċifiċi tat-trasparenza ta’ qabel u ta' wara l-kummerċ għall-kummerċ OTC sabiex jiġu mifhuma aktar il-karatteristiċi ta’ tali kummerċ OTC u ssir valutazzjoni ta’ liema tipi ta’ tranżazzjonijiet jistgħu jsiru b'mod leġittimu OTC minħabba l-karatteristiċi speċifiċi tagħhom;

Kwistjonijiet mikro-strutturali

18. Jinsisti li wara l-"flash crash" li seħħ, il-pjattaformi kollha ta' kummerċ iridu jkunu jistgħu juru lis-superviżuri nazzjonali tagħhom li t-teknoloġija u s-sistemi ta' sorveljanza tagħhom kapaċi jifilħu għat-tip ta’ biżibilju ordnijiet esperjenzati fis-6 ta’ Mejju sabiex jiżguraw li jkunu jistgħu jittrattaw b'suċċess l-attività assoċjata mal-HFT u kummerċ algoritmiku f'ċirkustanzi estremi u juru li jistgħu joħolqu mill-ġdid ir-reġistri tal-ordnijiet tagħhom sal-aħħar tal-ġurnata tax-xogħol, sabiex il-kawżi ta’ attività tas-suq mhux tas-soltu jkunu jistgħu jiġu identifikati, flimkien ma’ kwalunkwe abbuż suspettat tas-suq;

19. Jitlob lill-AETS twettaq eżami tal-ispejjeż u l-benefiċċji tal-kummerċ algoritmiku u ta’ frekwenza għolja (HFT) fuq is-swieq u l-impatt tiegħu fuq utenti oħrajn tas-swieq, partikolarment investituri istituzzjonali, sabiex jiġi determinat jekk il-fluss tas-suq sinifikanti ġġenerat awtomatikament qiegħedx jipprovdi likwidità reali għas-suq u x'effett dan għandu għad-determinazzjoni ġenerali tal-prezzijiet, kif ukoll il-potenzjal għal abbużi bil-manipulazzjoni tal-prezzijiet tas-suq li jwasslu għal kundizzjonijiet mhux ugwali bejn il-parteċipanti tas-suq, u l-impatt tiegħu fuq l-istabilità ġenerali tas-suq;

20. Jitlob li l-prattika ta’ “layering” jew “quote stuffing” tiġi definita b’mod espliċitu bħala abbuż tas-suq;

21. Jitlob li jkun hemm investigazzjoni jekk għandhomx jiġu regolati kumpaniji li jimxu fuq strateġiji ta' HFT sabiex jiġi żgurat li għandhom sistemi u kontrolli b'saħħithom b'reviżjonijiet regolatorji konsistenti tal-algoritmi li jużaw, il-kapaċità għal monitoraġġ u interrogazzjoni tul l-istess jum dwar pożizzjonijiet pendenti u effett ta' lieva (leverage) f'ħin reali u li kapaċi juru li għandhom stabbiliti proċeduri maniġerjali b'saħħithom għal okkorenzi anormali;

22. Jitlob għal eżami tal-isfidi HFT f’termini ta’ monitoraġġ tas-suq; jirrikonoxxi l-ħtieġa li r-regolaturi jkollhom il-mezzi xierqa biex jiskopru u jimmoniterjaw mġiba abbużiva potenzjali; f’din il-perspettiva, jitlob li jsir rappurtar lill-awtoritajiet kompetenti dwar l-ordnijiet kollha li jirċievu s-swieq regolamentati u l-MTFs, kif ukoll tal-kummerċ magħmul permezz ta’ dawn il-pjattaformi;

23. Jitlob li l-lokalitajiet kollha ta' kummerċ li jippermettu ko-lokazzjoni ta' servers, kemm direttament u kemm permezz ta' partijiet terzi li jipprovdu d-dejta, jiżguraw li jinżamm aċċess ugwali lill-klijenti kollha ko-lokati u fejn ikun possibbli taħt l-istess arraġamenti infrastrutturali dwar dewmien sabiex ikunu konformi mal-prattiki non-diskriminatorji mfissra fil-MiFID;

24. Jitlob lir-regolaturi sabiex jimmoniterjaw u jirregolaw il-provvediment ta' aċċess sponsorjat u jitlob lill-Kummissjoni sabiex tqis miżuri addizzjonali li jinkludu:

a) il-projbizzjoni espressa ta' aċċess mhux iffiltrat sponsorjat għall-kumpaniji, indipendentement minn jekk jagħmlux parti mill-istess grupp korporattiv tal-isponsor;

(b) l-eżiġenza li broker-dealers u l-kumpaniji tal-investiment jistabbilixxu, jiddokumentaw u jżommu sistema ta' kontrolli għall-immaniġġjar tar-riskju, kemm ta' qabel il-kummerċ u kemm ta' wara l-kummerċ, u proċeduri superviżorji biex jimmanġġjaw ir-riskji finanzjarji, regolatorji u riskji oħrajn relatati mal-aċċess tagħha għas-suq;

25. Minkejja l-applikazzjoni meħtieġa ta’ salvagwardji, jitlob lill-AETS sabiex tinvestiga aktar jekk l-aċċess sponsorjat jaqbiżx il-limitu tal-aċċess mhux diskriminatorju,

26. Jitlob li l-Kummissjoni tadotta l-prinċipji li qed jiżviluppa l-Kumitat Tekniku tal-IOSCO rigward aċċess elettroniku dirett, inkluż aċċess sponsorjat, li se jkopru l-kriterji għall-għażla ta' klijenti li jistgħu jingħataw aċċess sponsorjat u r-relazzjoni kontrattwali bejn il-pjattaforma, il-membru u l-klijent, u se jiddefinixxu r-responsabbiltajiet rispettivi rigward l-użu tagħhom permezz ta' kontrolli u filtri adatti;

27. Huwa tal-fehma li sabiex ikun hemm konformità mal-prinċipju li l-investituri kollha għandhom jiġu ttrattati b'mod ugwali, il-prattika ta' ordnijiet flaxx għandha tiġi pprojbita espliċitament;

28. Jitlob li ssir investigazzjoni mill-AETS dwar l-istruttura tal-ħlasijiet sabiex jiġi żgurat li l-ħlasijiet għat-twettiq ta' kummerċ, ħlasijiet anċillari u inċentivi oħrajn relatati jkunu trasparenti, non-diskriminatorji u konsistenti ma' formazzjoni affidabbli ta' prezzijiet u ma jkunux imfasslin u implimentati b'mod li ma jinkuraġġixxix kummerċ għal skopijiet mhux kif suppost, u sabiex tevalwa jekk għandhiex tiġi imposta tariffa minima għall-utenti li jagħmlu l-ordnijiet, indipendement minn jekk l-ordnijiet jitwettqux jew le, minħabba li dawn l-ordnijiet jeħtieġ jiġu proċessati mill-infrastruttura tas-swieq;

29. Jissuġġerixxi li jsir studju mill-AETS fuq il-mudell ta' ħlasijiet tip "maker/taker" sabiex jiġi stabbilit jekk min jirċievi l-istruttura ta' ħlasijiet aktar favorevoli ta' "maker", għandux ikun suġġett ukoll għall-obbligazzjonijiet u s-superviżjoni ta' "maker" formali tas-suq;

30. Jitlob li jkun hemm superviżjoni mill-AETS u definizzjoni permezz tal-implimentazzjoni ta’ atti interrutturi u circuit breakers għall-volatilità b'saħħithom li jaħdmu simultanjament fil-lokalitajiet kollha ta' kummerċ tal-UE sabiex jevitaw l-okkorrenza ta' "flash crash" bħal dik li ġrat fl-Istati Uniti;

Ambitu

31. Jitlob li ebda parteċipant mhux regolat tas-suq ma jkun jista' jikseb aċċess sponsorjat dirett jew mhux iffiltrat għall-lokalitajiet ta' kummerċ u li parteċipanti sinifikanti tas-suq li jinnegozjaw indipendentement ikun jeħtieġ li jirreġistraw mar-regolatur u jippermettu li l-attivitajiet ta' kummerċ tagħhom ikunu suġġetti għal livell xieraq ta' superviżjoni u skrutinju għal skopijiet ta’ stabilità;

32. Jitlob li tranżazzjonijiet rigward attivitajiet ta' negozju ta' akkont proprju (proprietary trading) li jsiru permezz ta' strateġiji algoritmiċi minn entitajiet mhux regolati jsiru biss permezz ta' kontraparti finanzjarja regolata;

33. Jitlob għal estensjoni fl-ambitu tar-reġim ta’ trasparenza tal-MiFID għal strumenti kollha li jixxiebħu ma' ekwitajiet ("equity-like") inkużi DRs (depository receipts), ETFs (exchange traded funds ), EDCs (exchange traded commodities) u ċertifikati;

34. Jitlob li l-Kummissjoni u l-AETS jikkunsidraw l-introduzzjoni ta' rekwiżit ta' trasparenza qabel il-kummerċ u wara l-kummerċ għall-istrumenti kollha finanzjarji non-ekwità (non-equity), inklużi swieq ta' bonds tal-gvern u ta' korporazzjonijiet u derivattivi CCP eliġibbli, li jiġi applikat b'mod divrenzjat fejn ikun xieraq skont il-klassijiet tal-assi u li jingħaqad fl-istess ħin ma' miżuri li jwasslu għal aktar standardizzazzjoni tal-prodotti derivattivi OTC sabiex tkun possibbli l-applikazzjoni ta' aktar trasparenza;;

35. Huwa tal-fehma li, filwaqt li tqis il-kwistjonijiet esperjenzati fir-rigward tal-kwalità tad-data u l-konsolidazzjoni tad-data ta’ wara l-kummerċ għall-ekwitajiet Ewropej, il-Kummissjoni għandha tiżgura li d-data ta’ wara l-kummerċ għal prodotti li mhumiex ekwitajiet tiġi pprovduta f’sura li tkun tista' tiġi kkonsolidata faċilment;

36. Jaqbel mal-intenzjoni tal-Kummissjoni li tapplika firxa wiesgħa ta’ dispożizzjonijiet tal-MiFID għal strumenti derivattivi billi l-kummerċ ta' tali prodotti qiegħed jgħaddi dejjem aktar lejn lokalitajiet ta' kummerċ formali u huma suġġetti għal standardizzazzjoni dejjem akbar u għal rekwiżiti ta' approvazzjoni ċentrali;

37. Jitlob li jkun hemm proposta mill-Kummissjoni li tiżgura li l-kuntratti kollha ta’ derivattivi OTC li jistgħu jiġu standardizzati jiġu kummerċjati fil-boroż jew pjattaformi tal-kummerċ elettroniku, sabiex ikun żgurat li l-prezz ta’ tali kuntratti jiġi stabbilit b’mod trasparenti, ġust u effiċjenti, mingħajr kunflitti ta’ interess,

38. Jitlob li ssir reviżjoni tal-istandards tal-IOSCO għall-aġenziji ta' approvazzjoni, is-sistemi ta' likwidazzjoni ta' ishma u sistemi ta' pagament importanti sistematikament bil-għan li titjieb it-trasparenza tas-swieq;

39. Jemmen li jeħtieġ li r-regolaturi kollha tas-swieq tal-komoditajiet fiżiċi u finanzjarji differenti jkollhom aċċess għall-istess data sabiex jidentifikaw ix-xejriet u r-rabtiet inkroċjati, u jistieden lill-Kummissjoni tikkoordina l-isforzi kemm fi ħdan l-UE kif ukoll b’mod globali.

40. Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill, lill-Kummissjoni u lill-Bank Ċentrali Ewropew.

(1) ĠU L 145, 30.4.2004, p.1. (2) ĠU L 96, 12.4.2003, p.16.

Is-swieq tal-kapital Ewropej għaddew minn perjodu ta' bidla bħal qatt qabel, kemm minħabba ambjent regolatorju li nbidel wara l-implimentazzjoni tal-MiFID, u kemm minħabba l-progress teknoloġiku li sar tul l-istess perjodu. L-introduzjoni tal-MiFID żvolġiet fl-istess perjodu ta' votalità imposta esternament minħabba l-kriżi finanzjarja. B'riżultat ta' dan, ukoll kieku kien hemm disponibbli dejta tas-suq affidabbli fil-lokalitajiet kollha tal-kummerċ, id-dejta kwantitattiva ma tirriflettix biss l-impatt regolatorju.

F'dawn l-aħħar ħames snin il-pożizzjoni monopolistika tal-boroż primarji nbidlet. Anqas minn 60% tal-volum ta' kummerċ fil-FTSE tar-Renju Unit isir fil-LSE, filwaqt li 30% tal-CAC40 illum qed isir barra l-Eurotext f'Pariġi u 25% tal-kummerċ fid-DAX30 isir barra d-Deutche Bourse fi Frankfurt. Jidher li fost il-parteċipanti kollha hemm rikkonoxximent li l-abolizzjoni tal-lolakità primarja għall-kummerċ tal-isħma rnexxilha tikseb aktar kompetizzjoni bejn il-pjattaformi tal-kummerċ.

Dan l-iskop kruċjali tal-MiFID, li jippromwovi kompetizzjoni fost il-lokalitajiet tal-kummerċ għat-twettiq tas-servizzi, wassal għal aktar għażla għall-investitur, naqqas l-ispiża tat- tranżazzjonijiet u għen biex tiżdied l-effiċjenza tal-proċess tal-formazzjoni tal-prezzijiet. Issa hemm 136 MTFs li joperaw fl-UE, kif ukoll il-boroż primarji li flimkien jiffurmaw l-lokalitajiet organizzati ta' kummerċ. Dawn il-lokalitajiet organizzati jkopru madwar 60% tal-volum ta' kummerċ u l-bqija jsir minn broker-dealers, li flimkien jissejħu OTC. Negozjati bilaterali, fejn il-klijent jagħti lill-broker ordni u hu jsiblu pariġġaha, inbidlu minn ordnijiet primarjament verbali għal ordnijiet predominantament elettroniċi. Għalkemm skont id-definizzjoni tiegħu stess il-kummerċ fl-OTC m'hemmx trasparenza għalih, ir-regoli tal-MiFID jeżiġu li dan jiġi rrappurtat ukoll.

Il-frammentazzjoni tas-suq madankollu wasslet għal trasparenza fqira għal wara l-kummerc minħabba t-tifrix tan-negozju fost lokalitajiet varji u b'mod partikulari għal kwalità tad-dejta ta' wara l-kummerċ. Jeħtieġ qafas regolatorju aktar effettiv għal informazzjoni konsolidata ta' wara l-kummerċ li jkun jinkludi kodiċi tekniċi ġodda fil-proċess ta' likwidazzjoni sabiex jirrifletti aħjar ambjent fejn min jinneġozja jkun jista' jesegwixxi f'lokalitajiet multipli. Ir-regolaturi jeħtieġ li jiżguraw li fi kwalunkwe ħin ikunu jistgħu jerġgħu joħolqu r-reġistru tal-ordnijiet sabiex jifhmu d-dinamika tas-suq u l-involviment tal-parteċipanti. Intervenzjoni regolatorja jidher li hija meħtieġa wkoll sabiex jitneħħew l-ostakoli li baqa' għall-konsolidazzjoni tad-dejta ta' wara l-kummerċ sabiex tiġi stabbilita sistema ta' Tejp Konsolidat Ewropew ġestit mill-privat.

Il-kost tad-dejta fl-Istati Uniti huw sinifikattivament aktar baxx milli hi fl-UE u jista' jkun saħansitra $50 fix-xahar għall-pjattaformi kollha, filwaqt li fl-UE jitla' sa $500. Dan huwa dovut primarjament għar-raggrupament ta' dejta ta' wara l-kummerċ mill-lokalitajiet tal-kummerċ u hu għalhekk li jeħtieġ li dawn is-sorsi ta' dejta jinħallu u b'hekk jitnaqqas il-kost b'mod sinifikanti. Il-kwalità inkonsistenti tad-dejta u n-nuqqas ta' formati komuni ta' rappurtar ta' dejta komplew jikkomplikaw il-problemi u s-soluzzjoni tista' tinstab billi jitfasslu standards u formati komuni ta' rappurtar ta' dejta ta' wara l-kummerċ.

Il-MiFID tat dettalji wkoll għal dewmien permissibbli għar-rappurtar ta' wara l-kummerċ u meta jitqies l-użu akbar tat-teknoloġija, jidher xieraq li għall-iskopijiet tal-formazzjoni tal-prezzijiet dan il-limitu jitnaqqas sabiex ebda tranżazzjoni ma tista' tiġi rrapurtata aktar minn 24 siegħa wara li tkun saret, u f'dak li jirrigwarda tranżazzjonijiet elettroniċi, dewmien ta' aktar minn minuta għandu jitqies bħala inaċċettabbli.

Minbarra l-kriżi, ħafna bidliet oħrajn fis-suq seħħew ukoll minn wara l-introduzzjoni tal-MiFID, bħall-wasla ta' teknoloġija ġdida u l-użu li issa huwa mifrux ħafna ta' negozju b'algoritmiċi elettroniċi, inkluz l-HFT. F'din l-era ġdida teknoloġika u b'rikonoxximent tar-rekwiżit akbar għat-trasparenza, interessanti wieħed jinnota li l-volum tal-kummerċ li jsir OTC ma naqasx bħala persentaġġ tal-volum tal-kummerċ ġenerali minn meta feġġew in-numru akbar ta' lokalitajiet. Madankollu, is-suq aġġusta ruħu għall-użu ta' ‘dark pools’ għall-ordnijiet kbar ta' kummerċ (BCNs) u l-użu tal-eżenzjonijiet tal-MiFID għal azzjonijiet bħal dawn meta jsiru permezz ta' lokalitajiet ta' kummerċ organizzati ( tranżazzjonijiet oskuri - 'dark transactions').

Kważi 10% tal-kummerċ kollu f'isħma ta' ekwitajiet EEA fi swieq organizzati jużaw il-konċessjonijiet rigward trasparenza ta' qabel il-kummerċ tal-MiFID u jistgħu jitqiesu bħala li qed jinnegozjaw "fl-oskur". Jeħtieġ iżda li jinstab bilanċ bejn il-bżonn ta' trasparenza qabel il-kummerċ sabiex jgħin fil-formazzjoni tal-prezzijiet u s-sitwazzjonijiet ġustifikati fejn ingħataw konċessjonijiet sabiex jiġi evitat moviment tas-suq mhux meħtieġ u biex jgħin fil-funzjonament tas-suq. Meta d-daqs medju ta' attività ta' kummerċ medja tnaqqset minn €22,266 fl-2006 għal €9,923 fl-2009 u 0.9% biss tal-kummerċ issa qiegħed isir taħt il-konċessjoni tal-‘Prezz ta' Referenza’ hemm lok għal reviżjoni tal-konċessjonijiet differenti.. Jeħtieġ li tingħata attenzjoni li jkun żgurat li jkun hemm applikazzjoni aktar uniformi tal-konċessjonijiet ta' qabel il-kummerċ fost l-Istati Membri sabiex ikunu limitati differenzi ta' implimentazzjoni; standards tekniċi jistgħu jkunu mod xieraq biex jinkiseb dan.

L-"esekuzzjoni" ta' kummerċ OTC permezz ta' "crossing networks" kienet teżisti qabel l-MiFID iżda issa saret predominantament pjattaformi elettroniċi għall-klienti. Il-BCNs huma aċċettati bħala żieda siewja għal-lokalitajiet tal-kummerċ b'mod partikolari għal ordnijiet ta' xiri u għalhekk għandhom jiġu rikonoxxuti bħala kategorija fi ħdan l-MiFID u jkunu suġġetti għal superviżjoni regolatorja sabiex timmoniterja l-attività tagħhom

Is-CESR bħalissa qiegħed jagħmel eżerċizzju ta' ġbir ta' dejta sabiex jevalwa sewwa l-volum ta' kummerċ li qed isir fl-oskur u jekk hemmx limitu għal liema volum ta' kummerċ, negozjat mingħajr żvelar ta' prezz qabel il-kummerċ, filfatt jibda jkollu impatt fuq il-proċess tal-formazzjoni tal-prezz innifsu. Is-suq tal-Istati Uniti għar-regolazzjoni tal-pjattaformi tal-kummerċ diversi huwa aktar avvanzat milli hu fl-UE u jeħtieġ li ninvestigaw jekk nistgħux nitgħallmu mill-Istati Uniti dwar trasparenza wara l-kummerċ għad-"dark pools", speċjalment għaliex bħalissa l-FSA tar-Renju Unit iqis li anqas minn 1% tal-kummerċ fl-ekwitajiet qiegħed isir fl-oskur b'kuntratti OTC, filwaqt li fl-Istati Uniti, "dark pools" ikopru qrib l-10% tal-volum tal-kummerċ.

Minn wara l-MiFID, il-fornituri tal-infrastruttura tas-suq saru pjattaformi teknoloġiċiki dejjem aktar dipendenti ħafna fuq sistemi tal-IT u li jikkompettu bejniethom sabiex jipprovdu l-aktar faċilitajiet ta' kummerċ effiċjenti, rapidi u flessibbli. Mingħajr ma jitqiesu l-bidliet regolatorji, l-impatt tat-teknoloġija ġdida u l-wasla ta' parteċipanti ġodda fis-suq wasslu għal ħeffa akbar tal-kummerċ, it-tkabbir tal-HFT u żieda fl-aċċess dirett tal-klijenti ta' membri ta' pjattaforma ta' kummerċ u għalhekk għal swieq ta' aktar ħeffa u dinamiċità.

Waħda mir-raġunijiet għat-tnaqqis konsistenti tad-daqs medju ta' attività ta' kummerċ hija li l-parteċipanti ġodda tas-suq jagħtu importanza akbar għat-twettiq immedjat tal-ordnijiet u mhux sabiex jintwerew ordnijiet kbar. Kwalunkwe suq li jiffunzjona kif suppost jeħtieġ ditti li lesti jipprovdu likwidità u li jippublikaw il-prezzijiet. Tradizzjonalment, speċjalisti u dawk li jaħdmu s-suq wettqu din il-funzjoni billi kkwottaw prezzijiet miż-żewġ naħat u ġġeneraw qligħ mill-firxa. Hekk kif evolva s-suq, il-mod kif il-forniment ta' likwidità jiġi implimentat inbidel. B'mod partikolari, mal-wasla tat-teknoloġija, ditti li jinnegozjaw bl-algoritmi issa qed jipprovdu likwidità fis-suq billi jdaħħlu ordnijiet miż-żewġ naħat fuq kotba tal-ordnijiet elettroniċi u jiddikjaraw prezz pubbliku. Dawk li jaħdmu s-suq tipikament ma jżommux investimenti għal xi tul ta' żmien u għalhekk l-istrateġiji HFT evolvew biex jikkapitalizzaw fuq din il-funzjoni. Jidher li jkun xieraq li ssir aktar analiżi dwar l-obbligi u r-responsabiltajiet li jistgħu jkunu meħtieġa minn dawn l-entitajiet informali ta' dawk li jaħdmu s-suq. Jekk qegħdin jibbenefikaw minn struttura ta' prezzar ta' dawk li jaħdmu s-suq, dawn għandhom ikunu obbligati jipprovdu prezz tas-suq meta jkun meħtieġ.

L-HFT mhix strateġija ta' kummerċ fiha nnifisha iżda tista' tiġi applikata għal diversi strateġiji ta' kummerċ li lkoll għandhom in komun portfolju ta' rendiment għoli. Ħafna minnhom kapaċi jipproċessaw sa 33,000 attività ta' kummerċ kull sekonda, b'esekuzzjoni kompleta ta' anqas minn millisekonda. Ilkoll jeħtieġu l-ħeffa u għalhekk huma sensittivi għad-dewmien, hekk li jeħtieġu kapaċità kbira ta' forniment ta' dejta tas-suq u tqabbil ta' kummerċ u inġenji ta' kwottazzjoni. Dawn jinqasmu tipikament f'żewġ kategoriji: ħidma tas-suq elettronika u arbitraġġ statistiku. Huwa stmat li l-volum ta' kummerċ li jsir minn traders HFT huwa ta' aktar minn 35% u dan dejjem qed jiżdied. Dan jitqabbel mal-volum ta' 70% li jsir fis-swieq tal-Istati Uniti fejn jiswa anqas flus biex tħaddem strateġija tal-HFT. Huwa mistenni li l-kost fl-UE għall-approvazzjoni u l-likwidazzjoni huwa ostaklu għal espansjoni akbar u għalhekk kwalunkwe tnaqqis fl-ispiża jista' jkollu effett addizzjonali fuq id-dinamika tas-suq.

Ftit hemm dejta disponibbli dwar l-impatt li l-istrateġiji tal-HFT qed ikollhom fuq is-suq u partikolarment dwar jekk l-impatt aggregat tat-teknoloġija jistax ikollu impatt fuq il-flessibilità tas-suq innifsu. Jidher li jista' jkun li l-HFT żied il-likwdità u naqqas il-firxiet għall-investituri. madankollu jeħtieġ li ssir aktar investigazzjoni sabiex jinstab jekk il-kwalità ta' din il-likwidità hijiex utli għaliex bosta drabi l-volum fl-idejn ikun żgħir u jitqanqal dubju dwar il-validità tal-fond muri fuq il-kotba tal-ordnijiet. Jeħtieġ li ssir analiżi sabiex tiddetermina jekk kienx hemm impatt negattiv fuq il-formazzjoni tal-prezzijiet biż-żieda tal-HFT.

Saret l-osservazzjoni li ħafna mill-parteċipanti fil-HFT qed joperaw bħala aġenziji ta' negozju ta' akkont proprju u bħala tali huma entitajiet mhux regolati u għalhekk mhux obligati jikkonformaw mar-regoli tal-MiFID. Billi jidher li hemm xejra politika li l-parteċipanti kollha tas-suq ikunu regolati kif xieraq, nissuġġerixxu li dan għandu japplika għal dawn id-ditti, bil-ħtieġa, b'mod urġenti, tat-twessigħ tar-regoli tal-MiFID sabiex ikopru lil dawn l-entitajiet. B'mod partikolari jeħtieġ li jkun hemm sorveljanza tal-immaniġġjar tas-sistemi u tar-riskji kif intwera mill-‘flash crash’ fl-Istati Uniti fis-6 ta' Mejju. Ittestjar tal-istress tal-pjattaformi għandu jsir sabiex jiżgura li dawn kapaċi jittrattaw ‘algoritmi sfrattati’. Il-ġbir ta' dejta tal-ħtiġijiet kollha tal-attivitajiet tal-parteċipanti fis-suq jeħtieġ tingħata prijorità sabiex ir-regolaturi jkunu jistgħu jirrikostitwixxu l-kotba tal-ordnijiet, meta jkun meħtieġ, sabiex jimmoniterjaw il-funzjonament bla periklu u effiċjenti tas-swieq . Meta jitqies il-volum tat- tranżazzjonijiet, jidher li jista' jkun li dawn huma ta' riskju sistematiku li jeħtieġ jiġi investigat madwar l-UE kollha.

L-użu ta' ko-lokazzjoni qed ikun aktar komuni billi t-tqegħid ta' servers tal-klijenti viċin ħafna tas-servers tat-traders jgħin sabiex ditta li tkun qed tinnegozja tnaqqas il-ħin biex tirċievi dejta tas-suq mill-post tal-kummerċ u biex tesegwi ordni fis-suq, biex b'hekk tnaqqas id-dewmien u dan jgħin biex id-ditta tagħmel kummerċ aktar frekwentament. Dan jista' wkoll jinkiseb permezz ta' 'proximity hosting' ta' partijiet terzi. Għalkemm tiswa l-flus, l-għażla ta' ko-lokazzjoni ma jidhirx li attwalment hi diskrimintorja u għalkemm l-utenti kollha għandhom jiġu ttrattati ndaqs f'termini ta' distanza mis-servers u l-ipprezzar, jidher li hu meħtieġ ir-rekwiżit li tingħata informazzjoni dwar kif jiġu stabbiliti l-prezzijiet.

Aċċess sponsorjat jippermetti lit-traders li mhumiex membri tas-suq li jgħaddu l-ordnijiet tagħhom permezz ta' sistema ta' sponsors, bħal pereżempju broker-dealer jew GCM (general clearing member). Il-Pjattaformi tal-UE li attwalment jippermettu aċċess sponsorjat, li huma Chi-X, BATS Europe, LSE u NYSE Euronext, introduċew taħt is-superviżjoni tar-reglatur tagħhom rekwiżiti ta' filtri u kontrolli li l-membru jrid japplika qabel ma jiġu trasmessi l-ordnijiet. Madankollu, aċċess sponsorjat mhux iffiltrat (għeri) jippermetti li klijent intermedjarju jikkonnettja direttament mal-pjattaforma mingħajr ebda forma ta' superviżjoni oħra; din il-prattika hija ta' riskju mhux aċċettabbli għall-membru tas-suq u l-faċilità ta' approvazzjoni (clearing facility) tiegħu u għall-funzjonament ordinat tas-suq u għandu jkun ipprojbit fl-UE. Qed jiġi ssuġġerit li kontrolli tar-riskju ta' qabel il-kummerċ u sistemi ta' moniteraġġ ta' wara l-kummerċ xierqa jridu jiġu stabbiliti għal aċċess sponsorjat għall-pjattaformi, speċjalment għal dawk li jużaw ditta ta' approvazzjoni (clearing house) fejn klijenti sponsorjati jistgħu joperaw fis-swieq bl-użu sinifikanti b'effett ta' lieva li potenzjalment jikkawża riskju sistematiku għas-sistema meta jitqiesu l-pożizzjonijiet potenzjalment kbar li jkun hemm matul ġurnata waħda matul il-firxa tal-istrateġiji kollha.

Bħala konklużjoni, jidher li konsegwenza sinifikanti tal-kompetizzjoni li rriżultat bl-implimentazzjoni tal-MiFID kienet il-frammentazzjoni tas-suq li hi stess inkorraġiet l-isplużjoni tat-tkabbir tal-istrateġiji HFT. Ir-regolazzjoni jeħtieġ li tagħraf li dawn l-avvanzi teknoloġiċi jeħtigilhom dispożizzjoni xierqa fil-leġiżlazzjoni sabiex dawn ma jiżolqux mill-lakuni regolatorji u jikkawżaw mingħajr ebda intenzjoni riskju sistematiku għall-operat ġenerali tas-swieq.