dwar proposta għal deċiżjoni tal-Parlament Ewropew u tal-Kunsill dwar il-mobilizzazzjoni tal-Fond Ewropew ta' Aġġustament għall-Globalizzazzjoni, f'konformità mal-punt 28 tal-Ftehim Interistituzzjonali tas-17 ta' Mejju 2006 bejn il-Parlament Ewropew, il-Kunsill u l-Kummissjoni dwar id-dixxiplina baġitarja u l-ġestjoni finanzjarja soda

(COM(2010)0685 – C7-0389/2010 – 2010/2279(BUD))

Il-Parlament Ewropew,

–   wara li kkunsidra l-proposta tal-Kummissjoni lill-Parlament Ewropew u lill-Kunsill (COM(2010)0685 – C7-XXXX/2010),

–   wara li kkunsidra l-Ftehim Interistituzzjonali tas-17 ta' Mejju 2006 bejn il-Parlament Ewropew, il-Kunsill u l-Kummissjoni dwar id-dixxiplina baġitarja u l-amministrazzjoni finanzjarja soda(1), (IIA tas-17 ta' Mejju 2006), u b'mod partikolari l-Punt 28 tiegħu,

–   wara li kkunsidra r-Regolament (KE) Nru 1927/2006 tal-Parlament Ewropew u tal-Kunsill tal-20 ta' Diċembru 2006 li jistabbilixxi l-Fond Ewropew ta' Aġġustament għall-Globalizzazzjoni(2) (ir-Regolament dwar il-FEAG),

–   wara li kkunsidra l-ittra tal-Kumitat għall-Impjiegi u l-Affarijiet Soċjali,

–   wara li kkunsidra r-rapport tal-Kumitat għall-Baġits (A7-0353/2010),

A. billi l-Unjoni Ewropea stabbiliet l-istrumenti leġiżlattivi u baġitarji xierqa biex tipprovdi għajnuna addizzjonali lill-ħaddiema li qed ibatu mill-konsegwenzi ta’ bidliet strutturali maġġuri fix-xejriet kummerċjali dinjija u biex tgħin l-integrazzjoni tagħhom mill-ġdid fis-suq tax-xogħol,

B.  billi l-ambitu tal-FEAG twessa’ għall-applikazzjonijiet imressqa mill-1 ta’ Mejju 2009 ’l quddiem biex jinkludi s-sostenn għall-ħaddiema li ngħataw is-sensja bħala riżultat dirett tal-kriżi finanzjarja u ekonomika globali,

C. billi l-assistenza finanzjarja tal-Unjoni lill-ħaddiema li ġew issensjati għandha tkun dinamika u disponibbli kemm jista’ jkun malajr u b’mod effiċjenti kemm jista’ jkun, skont id-Dikjarazzjoni Konġunta tal-Parlament Ewropew, il-Kunsill u l-Kummissjoni adottata waqt il-laqgħa ta' konċiljazzjoni fis-17 ta' Lulju 2008, u b'kunsiderazzjoni xierqa għall-Ftehim Interistituzzjonali tas-17 ta’ Mejju 2006 rigward l-adozzjoni ta' deċiżjonijiet biex jiġi mmobilizzat il-FEAG,

D. billi r-Renju tal-Pajjiżi l-Baxxi talab l-għajnuna fir-rigward ta’ każijiet li jikkonċernaw 613 sensja f'żewġ impriżi li joperaw fis-settur tat-Taqsima 46 tar-Reviżjoni 2 tan-NACE (Kummerċ bl-imnut, ħlief għall-vetturi bil-mutur u muturi) fir-reġjun NUTS II ta' Noord Holland fil-Pajjiżi l-Baxxi,

E.  billi l-applikazzjoni tissodisfa l-kriterji ta' eliġibbiltà stabbiliti mir-Regolament dwar il-FEAG,

1.  Jitlob lill-istituzzjonijiet involuti jagħmlu l-isforzi meħtieġa biex iħaffu l-mobilizzazzjoni tal-FEAG;

2.  Ifakkar fl-impenn li għandhom l-istituzzjonijiet li jassiguraw proċedura rapida u bla xkiel għall-adozzjoni tad-deċiżjonijiet dwar il-mobilizzazzjoni tal-FEAG, jipprovdu appoġġ individwali ta’ darba u limitat fiż-żmien immirat biex jgħin lill-ħaddiema li jkunu sofrew sensji bħala riżultat tal-globalizzazzjoni u l-kriżi finanzjarja u ekonomika; jenfasizza r-rwol li l-FEAG jista’ jwettaq fir-reintegrazzjoni tal-ħaddiema ssensjati fis-suq tax-xogħol;

3.  Jenfasizza li, skont l-Artikolu 6 tar-Regolament dwar il-FEAG, għandu jkun żgurat li l-FEAG jappoġġa r-reintegrazzjoni individwali tal-ħaddiema ssensjati fix-xogħol; itenni li għajnuna mill-FEAG m'għandhiex tieħu post azzjonijiet li huma r-responsabbiltà tal-kumpaniji skont il-liġi nazzjonali jew ftehimiet kollettivi, u lanqas m’għandha tieħu post miżuri ta' ristrutturar ta’ kumpaniji jew setturi;

4.  Jinnota li l-informazzjoni pprovduta fuq il-pakkett ikkoordinat ta' servizzi personalizzati li għandu jiġi ffinanzjat mill-FEAG tinkludi tagħrif dettaljat dwar il-komplementarjetà ma' azzjonijiet iffinanzjati mill-Fondi Strutturali; itenni l-istedina tiegħu li tiġi ppreżentata evalwazzjoni komparattiva ta’ din id-data anki fir-rapporti annwali tiegħu;

5.  Jilqa' b'sodisfazzjon il-fatt li, fil-kuntest tal-mobilizzazzjoni tal-FEAG, ġie propost mill-Kummissjoni sors alternattiv ta' approprjazzjonijiet għall-ħlasijiet għall-Fond Soċjali Ewropew li ma jkunx intuża, wara t-tfakkiriet frekwenti mill-Parlament Ewropew li l-FEAG inħoloq bħala strument speċifiku separat bl-objettivi u l-iskadenzi tiegħu proprji u li linji baġitarji xierqa għat-trasferimenti għandhom għalhekk jiġu identifikati;

6.  Jinnota madankollu li, bil-għan li l-FEAG jiġi mmobilizzat għal dan il-każ, l-approprjazzjonijiet għall-ħlasijiet se jiġu ttrasferiti minn linja baġitarja ddedikata għall-appoġġ lill-SMEs u l-innovazzjoni; jiddispjaċih dwar in-nuqqasijiet severi tal-Kummissjoni fl-implimentazzjoni tal-programmi dwar il-kompetittività u l-innovazzjoni, partikolarment waqt kriżi ekonomika li għandha żżid b’mod sinifikanti l-bżonn ta’ appoġġ bħal dan;

7.  Ifakkar li t-tħaddim u l-valur miżjud tal-FEAG għandhom ikunu evalwati fil-kuntest tal-valutazzjoni ġenerali tal-programmi u ta’ strumenti varji oħra maħluqa mill-Ftehima Interistituzzjonali tas-17 ta’ Mejju 2006 fi ħdan il-proċess ta’ rieżami ta’ nofs il-perjodu tal-qafas finanzjarju multiannwali 2007-2013;

8.  Jilqa' b’sodisfazzjon il-format il-ġdid tal-proposta tal-Kummissjoni, li fil-memorandum ta' spjegazzjoni tagħha tippreżenta informazzjoni ċara u dettaljata dwar l-applikazzjoni, tanalizza l-kriterji ta' eliġibilità u tispjega r-raġunijiet li wasslu għall-approvazzjoni tagħha, li hu konformi mat-talbiet tal-Parlament;

9.  Japprova d-deċiżjoni annessa ma' din ir-riżoluzzjoni;

10. Jagħti istruzzjonijiet lill-President tiegħu biex jiffirma din id-deċiżjoni flimkien mal-President tal-Kunsill u biex jiżgura li tiġi ppubblikata f’Il-Ġurnal Uffiċjali tal-Unjoni Ewropea;

11. Jagħti istruzzjonijiet lill-President tiegħu biex jgħaddi din ir-riżoluzzjoni, flimkien mal-anness tagħha, lill-Kunsill u lill-Kummissjoni.

(1) ĠU L 139, 14.6.2006, p. 1. (2) ĠU L 406, 30.12.2006, p. 1.

ta’ xxx

dwar il-mobilizzazzjoni tal-Fond Ewropew ta' Aġġustament għall-Globalizzazzjoni, b'konformità mal-punt 28 tal-Ftehim Interistituzzjonali tas-17 ta' Mejju 2006 bejn il-Parlament Ewropew, il-Kunsill u l-Kummissjoni dwar id-dixxiplina baġitarja u l-ġestjoni finanzjarja soda (applikazzjoni EGF/2010/012 NL/Noord Holland ICT mill-Pajjiżi Baxxi)

IL-PARLAMENT EWROPEW U L-KUNSILL TAL-UNJONI EWROPEA,

Wara li kkunsidraw it-Trattat dwar il-Funzjonament tal-Unjoni Ewropea,

Wara li kkunsidraw il-Ftehim Interistituzzjonali tas-17 ta' Mejju 2006 bejn il-Parlament Ewropew, il-Kunsill u l-Kummissjoni dwar id-dixxiplina finanzjarja u l-ġestjoni finanzjarja soda(1), u b'mod partikulari l-punt 28 tiegħu,

Wara li kkunsidraw ir-Regolament (KE) Nru 1927/2006 tal-Parlament Ewropew u tal-Kunsill tal-20 ta' Diċembru 2006 li jistabbilixxi l-Fond Ewropew ta' Aġġustament għall-Globalizzazzjoni(2), u b'mod partikolari l-Artikolu 12(3) tiegħu,

Wara li kkunsidra l-proposta mill-Kummissjoni Ewropea(3),

Billi

(1)      Il-Fond Ewropew ta’ Aġġustament għall-Globalizzazzjoni (FAEG) twaqqaf biex jipprovdi sostenn addizzjonali għall-ħaddiema li ngħataw is-sensja b’riżultat ta’ bidliet strutturali maġġuri fix-xejriet kummerċjali dinjija minħabba l-globalizzazzjoni u biex jgħinhom fir-reintegrazzjoni tagħhom fis-suq tax-xogħol.

(2)      L-ambitu tal-FEAG twessa’ għall-applikazzjonijiet imressqa mill-1 ta’ Mejju 2009 ’l quddiem biex jinkludi s-sostenn għall-ħaddiema li ngħataw is-sensja bħala riżultat dirett tal-kriżi finanzjarja u ekonomika globali.

(3)      Il-Ftehim Interistituzzjonali tas-17 ta’ Mejju 2006 jippermetti l-mobilizzazzjoni tal-FEAG sal-limitu massimu annwali ta’ EUR 500 miljun.

(4)      Ir-Renju tal-Pajjiżi l-Baxxi ressaq applikazzjoni għall-mobilizzazzjoni tal-FEAG, fir-rigward ta' sensji f’żewġ intrapriżi li joperaw fit-Taqsima 46 tar-Reviżjoni 2 tan-NACE (Kummerċ bl-imnut, ħlief għall-vetturi bil-mutur u muturi) fir-reġjun NUTS II ta' Noord Holland (NL32) fit-8 ta’ April 2010 u ssupplimentaha b’tagħrif addizzjonali sal-5 ta’ Awwissu 2010. Din l-applikazzjoni tikkonforma mar-rekwiżiti sabiex jiġu ddeterminati l-kontribuzzjonijiet finanzjarji stabbiliti fl-Artikolu 10 tar-Regolament (KE) Nru 1927/2006. Il-Kummissjoni, għalhekk, tipproponi li jiġi mobilizzat l-ammont ta' EUR 2,557,135.

(5)      Il-FEAG għandu, għalhekk, jiġi mmobilizzat sabiex jipprovdi kontribuzzjoni finanzjarja għall-applikazzjoni mressqa mill-Pajjiżi l-Baxxi.

IDDEĊIDEW KIF ĠEJ:

Artikolu 1

Għall-baġit ġenerali tal-Unjoni Ewropea għas-sena finanzjarja 2010, il-Fond Ewropew ta' Aġġustament għall-Globalizzazzjoni (FEAG) għandu jiġi mobilizzat biex jipprovdi s-somma ta' EUR 2,557,135 f'approprjazzjonijiet għall-impenji u f’approprjazzjonijiet għall-ħlasijiet.

Artikolu 2

Din id-Deċiżjoni għandha tiġi ppubblikata f'Il-Ġurnal Uffiċjali tal-Unjoni Ewropea.

Magħmul fi,

Għall-Parlament Ewropew                          Għall-Kunsill

Il-President                                                   Il-President

(1)               ĠU L 139, 14.6.2006, p. 1. (2)               ĠU L 406, 30.12.2006, p. 1. (3)               ĠU C […], […], p. […].

I. Sfond

Il-Fond Ewropew ta’ Aġġustament għall-Globalizzazzjoni (FEAG) inħoloq bil-għan li jipprovdi għajnuna addizzjonali għall-ħaddiema li qed ibatu mill-konsegwenzi ta’ bidliet strutturali maġġuri fix-xejriet kummerċjali dinjija.

Skont id-dispożizzjonijet tal-punt 28 tal-Ftehim Interistituzzjonali tas-17 ta' Mejju 2006 dwar id-dixxiplina baġitarja u l-ġestjoni finanzjarja soda(1) u tal-Artikolu 12 tar-Regolament (KE) Nru 1927/2006(2), il-Fond ma jistax jaqbeż ammont massimu ta’ EUR 500 miljun, miġbuda minn kwalunkwe marġni li jinsab taħt il-limitu massimu tan-nefqa globali mis-sena preċedenti, u/jew mill-approprjazzjonijiet għall-impenji mħassra mis-sentejn preċedenti, bl-esklużjoni ta’ dawk relatati mal-Intestatura 1b. L-ammonti xierqa jiddaħħlu fil-baġit bħala dispożizzjoni hekk kif ikunu ġew identifikati l-marġni suffiċjenti u/jew l-impenji mħassra.

Rigward il-proċedura, sabiex jiġi attivat il-Fond, fil-każ ta’ valutazzjoni pożittiva ta’ applikazzjoni, il-Kummissjoni tippreżenta lill-awtorità baġitarja proposta għall-mobilizzazzjoni tal-Fond u, fl-istess ħin, tagħmel talba korrispondenti għat-trasferiment. B’mod parallel, jista' jiġi organizzat trijalogu bil-għan li jinstab qbil fuq l-użu tal-Fond u fuq l-ammonti meħtieġa. It-trijalogu jista' jsir f'forma ssimplifikata.

II. Is-sitwazzjoni attwali: il-proposta tal-Kummissjoni

Fil-23 ta' Novembru 2010 l-Kummissjoni adottat proposta ġdida għal deċiżjoni dwar il-mobilizzazzjoni tal-FEAG favur il-Pajjiżi Baxxi sabiex tappoġġa l-integrazzjoni mill-ġdid fis-suq tax-xogħol ta' ħaddiema li tilfu xogħolhom minħabba l-kriżi finanzjarja u ekonomika globali.

Din hi t-tlieta u għoxrin applikazzjoni li se tiġi eżaminata fil-baġit 2010 u tirreferi għall-mobilizzazzjoni ta' ammont globali ta' EUR 2 557 135 mill-FEAG għall-Pajjiżi l-Baxxi. Tikkonċerna 613 sensja (ilkoll identifikati għall-assistenza) f'żewġ impriżi li joperaw fit-Taqsima 46 tar-Reviżjoni 2 tan-NACE (Kummerċ bl-imnut, ħlief għall-vetturi bil-mutur u muturi) fir-reġjun NUTS II ta' Noord Holland fil-Pajjiżi l-Baxxi, matul il-perjodu ta' referenza ta' disa' xhur mill-1 ta' Mejju 2009 sal-31 ta' Jannar 2010.

L-applikazzjoni, il-każ FEAG/2010/012 NL/Noord Holland ICT, tressqet lill-Kummissjoni fit-8 ta’ April 2010 u ġiet issupplimentata b'tagħrif addizzjonli sal-5 ta' Awwissu 2010. L-applikazzjoni kienet ibbażata fuq il-kriterju ta' intervent tal-Artikolu 2(b) tar-Regolament dwar il-FEAG, li jirrikjedi li jkun hemm tal-anqas 500 sensja fuq perjodu ta' disa’ xhur f'impriżi li joperaw fl-istess taqsima tar-Reviżjoni 2 tan-NACE f’reġjun wieħed jew f’żewġ reġjuni kontigwi fil-livell NUTS II fi Stat Membru – u tressqet sal-iskadenza ta’ 10 ġimgħat (l-Artikolu 5 tar-Regolament).

Il-valutazzjoni tal-Kummissjoni kienet ibbażata fuq l-evalwazzjoni tar-rabta bejn is-sensji u l-bidliet strutturali maġġuri fix-xejriet kummerċjali dinjija jew il-kriżi finanzjarja, in-natura imprevedibbli tas-sensji kkonċernati, it-turija tal-għadd ta’ sensji u l-konformità mal-kriterji tal-Artikolu 2(a), l-ispjegazzjoni tan-natura imprevedibbli ta’ dawk is-sensji, l-identifikazzjoni tal-intrapriżi li taw is-sensji u tal-ħaddiema indikati għall-assistenza, it-territorju kkonċernat u l-awtoritajiet u l-partijiet interessati tiegħu, l-impatt għas-sensji fir-rigward tal-impjiegi lokali, reġjonali jew nazzjonali, il-pakkett koordinat ta’ servizzi personalizzati li għandhom jiġu ffinanzjati, inkluża l-kompatibilità tiegħu ma’ azzjonijiet iffinanzjati mill-Fondi Strutturali, id-dati li fihom is-servizzi personalizzati lill-ħaddiema affettwati nbdew jew kienu ppjanati li jibdew, il-proċeduri biex ikunu kkonsultati s-sħab soċjali, u s-sistemi ta' ġestjoni u kontroll.

Skont il-valutazzjoni tal-Kummissjoni, l-applikazzjoni tissodisfa l-kriterji tal-eliġibilità stabbiliti fir-Regolament dwar il-FEAG u tirrakkomanda lill-Awtorità Baġitarja li tapprova l-appikazzjoni.

Bil-għan li timmobilizza l-Fond, il-Kummissjoni ressqet lill-Awtorità Baġitarja talba ta’ trasferiment (DEC 48/2010) għal ammont globali ta' EUR 2 557 135 mir-riżerva tal-FEAG (40 02 43) f’impenji u mil-linja tal-baġit "Programm ta’ Qafas għall-Kompetittività u l-Innovazzjoni – Programm għall-intraprenditorija u l-innovazzjoni" (01 04 04) fi ħlasijiet għall-linji tal-baġit tal-FEAG (04 05 01).

Ir-Rapporteur għandha pjaċir tosserva li l-Kummissjoni kontinwament qed jirnexxilha tidentifika sorsi alternattivi ta' approprjazzjonijiet għall-ħlasijiet għall-Fondi mhux użati tal-FSE, b’konformità mat-talbiet li spiss saru mill-Parlament Ewropew fl-imgħoddi.

Madankollu, tqis li d-direzzjoni li ttieħdet f’dawn l-aħħar każijiet (linja baġitarja ddedikata għall-appoġġ tal-intraprenditorija u l-innovazzjoni) mhijiex sodisfaċenti fid-dawl tan-nuqqasijiet serji li tiltaqa’ magħhom il-Kummissjoni meta timplimenta programmi dwar il-kompetittività u l-innovazzjoni. F’perjodu ta’ kriżi ekonomika dawn l-approprjazzjonijiet għandhom fil-fatt jiżdiedu mhux ħażin. Għladaqstant tistieden lill-Kummissjoni tkompli bl-isforz tagħha biex tidentifika linji tal-baġit aktar xieqa għall-ħlasijiet fil-ġejjieni.

Il-Ftehim Interistituzzjonali jippermetti l-mobilizzazzjoni tal-Fond sal-limitu massimu annwali ta’ EUR 500 miljun.

Fl-2010, l-Awtorità Baġitarja diġà approvat erba' u għoxrin proposta għall-mobilizzazzjoni tal-Fond u trasferiment għall-għajnuna teknika, għal ammont totali ta’ EUR 75 935 163, li meta jiżdied mal-ammont addizzjonali ta’ EUR 8 728 978 relatat mal-proposti l-oħra li qed jiġu diskussi (inkluża dik preżenti), iħalli disponibbli sal-aħħar tal-2010 l-ammont ta' EUR 415 335 859.

III. Proċedura

Il-Kummissjoni ppreżentat talba ta’ trasferiment(3) bil-għan li fil-baġit tal-2010 jiddaħħlu approprjazzjonijiet speċifiċi għall-impenji u għall-ħlasijiet, kif jesiġi l-Punt 28 tal-Ftehim Interistituzzjonali tas-17 ta' Mejju 2006.

It-trijalogu dwar il-proposta tal-Kummissjoni għal Deċiżjoni dwar il-mobilizzazzjoni tal-FEAG jista’ jieħu forma simplifikata (skambju ta’ ittri), kif dispost fl-Artikolu 12(5) tal-bażi legali, sakemm ma jkunx hemm qbil bejn il-Parlament u l-Kunsill.

Skont ftehim intern, il-Kumitat għall-Impjiegi u l-Affarijiet Soċjali (EMPL) għandu jkun assoċjat fil-proċess, sabiex jipprovdi appoġġ u kontribut kostruttivi għall-valutazzjoni tal-applikazzjonijiet mill-Fond.

Wara l-evalwazzjoni tiegħu, il-Kumitat EMPL tal-Parlament Ewropew se jagħti l-fehma tiegħu dwar il-mobilizzazzjoni tal-Fond, li se tkun annessa mar-rapport preżenti bħala ittra.

Id-Dikjarazzjoni Konġunta tal-Parlament Ewropew, il-Kunsill u l-Kummissjoni, adottata waqt il-laqgħa ta' konċiljazzjoni fis-17 ta' Lulju 2008, ikkonfermat kemm hu importanti li tiġi żgurata proċedura rapida bir-rispett dovut għall-Ftehim Interistituzzjonali għall-adozzjoni tad-deċiżjonijiet dwar il-mobilizzazzjoni tal-Fond.

(1) ĠU L 139, 14.6.2006, p. 1. (2) ĠU L 406, 30.12.2006, p. 1. (3) DEC 48/2010 tat-23 ta’ Novembru 2010

ES/jm

D(2010)60048

Is-Sur Alain Lamassoure

President tal-Kumitat għall-baġits

ASP 13E158

Suġġett: Opinjoni dwar il-mobilizzazzjoni tal-Fond Ewropew ta' Aġġustament għall-Globalizzazzjoni (FEAG) għall-każ EGF/2010/012 NL/Noord Holland ICT (COM(2010)685 finali)

Għażiż Sur Lamassoure,

Il-Kumitat għall-Impjiegi u l-Affarijiet Soċjali (EMPL) u l-Grupp ta' Ħidma dwar il-FAEG studjaw il-mobilizzazzjoni tal-FEAG għall-każ EGF/2010/012 NL/Noord Holland ICT u adottaw l-opinjoni li ġejja.

Il-Kumitat EMPL u l-Grupp ta' Ħidma tiegħu dwar il-FEAG huma favur il-mobilizzazzjoni tal-Fond fir-rigward ta' din it-talba. F'dan ir-rigward, il-kumitat EMPL qed jippreżenta xi kummenti mingħajr, madankollu, ma jqajjem dubji dwar it-trasferiment tal-ħlasijiet.

Il-deliberazzjonijiet tal-Kumitat EMPL huma bbażati fuq il-kunsiderazzjonijiet li ġejjin:

A) Billi din l-applikazzjoni hija bbażata fuq l-Artikolu 2b tar-Regolament FEAG u tinkludi 613 sensja mogħtija matul il-perjodu ta' referenza ta' 9 xhur bejn l-1 ta’ Mejju u l-31 ta’ Jannar 2010 f’2 intrapriża involuti fil-kummerċ bl-imnut, ħlief tal-vetturi u l-muturi skont ir-Reviżjoni 2 tan-NACE fid-Diviżjoni 46 tar-Regolament (KE) Nru 1893/2006.

B) Billi dan is-settur, b'mod partikolari l-intrapriżi involuti fl-iżvilupp u l-bejgħ ta' hardware, kien effettwat b'mod negattiv mill-kriżi finanzjarja u ekonomika li rriżultat f'waqgħa sinifikanti fil-profitt taż-żewġ intrapriżi kkonċernati, li jfisser 25% għal Getronics u 17% għad-diviżjoni tal-PC ta' HP u 19% għad-diviżjoni tagħha tal-istampar, minħabba t-tnaqqis f'daqqa u mhux previst fil-baġits għall-investiment relatat mal-prodotti tat-teknoloġija tal-informazzjoni u tal-komunikazzjoni;

C) Billi l-awtoritajiet tal-Pajjiżi l-Baxxi jargumentaw li sa nofs l-2008 s-suq tat-teknoloġija tal-informazzjoni u tal-komunikazzjoni kien miexi relattivament sew, bi prospetti għat-tkabbir kemm għall-intrapriżi tal-teknoloġija tal-informazzjoni u tal-komunikazzjoni kif ukoll għas-swieq tal-konsumaturi tagħhom minkejja l-bidliet strutturali fis-suq dinji tat-teknoloġija tal-informazzjoni u tal-komunikazzjoni, b'mod partikolari dilokalizzazzjoni tal-produzzjoni lejn iċ-Ċina u l-Indja li rriżultat fi tnaqqis tas-sehem fis-suq tal-pajjiżi tal-OECD b'total ta' kummerċ tat-teknoloġija tal-informazzjoni u tal-komunikazzjoni minn 88% fl-1996 għal 56% fl-2006;

D) Billi s-sensji seħħew fil-provinċja ta' Noord-Holland, reġjun b'konċentrazzjoni għolja ta' intrapriżi tat-teknoloġija tal-informazzjoni u tal-komunikazzjoni u fejn dawn is-sensji se jaggravaw is-sitwazzjoni tal-impjieg li diġà ddeterjorat bħala konsegwenza tal-kriżi finanzjarja u ekonomika dinjija; Billi r-regolament FEAG jgħid, fi premessa 4, li għandu jiġi “żgurat li l-kontribuzzjoni finanzjarja mill-FEAG tkun ikkonċentrata fuq ħaddiema fir-reġjuni u fis-setturi ekonomiċi tal-Komunità li ntlaqtu bl-aktar b'mod serju”;

E) Billi l-Pajjiżi l-Baxxi speċifikaw li ż-żewġ intrapriżi ssodisfaw l-obbligu li jikkonsultaw is-sħab soċjali dwar pjan soċjali f'każi ta' sensji kollettivi li jaqbżu t-30, ħaġa li f'iktar dettall tfisser li CA-ICT, li hija magħmula minn rappreżentanti ta' min iħaddem u tal-impjegati, kellha rwol importanti fil-preparazzjoni tal-miżura;

F) Billi l-awtoritajiet tal-Pajjiżi l-Baxxi speċifikawt li l-ħaddiema li ngħataw is-sensja jistgħu jikkwalifikaw għal żewġ proġetti speċifiċi tal-FSE għall-ħaddiema fis-settur tat-teknoloġija tal-informazzjoni u tal-komunikazzjoni u billi dawn jikkonfermaw li l-mekkaniżmi neċessarji huma implimentati biex jiġi evitat kwalunkwe riskju ta' ffinanzjar doppju mill-FAEG u minn strumenti finanzjarji oħra tal-UE;

G) Billi l-Pajjiżi l-Baxxi qed jitolbu għal appoġġ għall-ħaddiema kollha li sfaw sensjati, inklużi dawk 'il fuq minn 65 sena;

H) Billi 64.9% mill-ħaddiema sensjati kienu rġiel;

I) Billi 79.9% mill-ħaddiema huma professjonisti jew persunal tekniku;

J) Billi 24 ħaddiem (3.9%) mill-ħaddiema kollha għandhom problemi ta' saħħa li ilhom jeżistu jew diżabilità;

Għalhekk, il-Kumitat għall-Impjiegi u l-Affarijiet Soċjali jistieden lill-Kumitat għall-Baġits, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu dwar l-applikazzjoni tal-Pajjiżi l-Baxxi:

1. Jaqbel mal-Kummissjoni li l-kundizzjonijiet għal kontribuzzjoni finanzjarja skont ir-Regolament FEAG (1927/2006) huma ssodisfati;

2. Ifakkar li l-applikazzjonijiet riċenti EGF/2009/026 NL/Noord Holland u Utrecht id-Diviżjoni 18 dwar is-sensji f'79 intrapriża li joperaw fid-Diviżjoni 18 tar-Reviżjoni 2 tan-NACE (stampar u r-riproduzzjoni ta’ midja rrekordjata) fiż-żewġ reġjuni kontigwi NUTS II ta’ Noord Holland (NL32) u Utrecht (NL31) fil-Pajjiżi l-Baxxi u EGF/2009/024 NL/Noord Holland u Zuid Holland id-Division 58 fir-rigward ta' sensji fi tmien intrapriżi li joperaw fid-Diviżjoni 58 tar-Reviżjoni 2 tan-NACE (attivitajiet ta’ pubblikazzjoni) fiż-żewġ reġjuni kontigwi NUTS II ta’ Noord Holland (NL32) u Zuid Holland (NL33) fil-Pajjiżi l-Baxxi, li kkonċernaw l-istess reġjun bħall-applikazzjoni preżenti;

3. Jilqa' l-fatt li s-sħab soċjali kienu involuti b'mod attiv fit-tħejjija tal-miżuri;

4. Jinnota li l-miżuri huma diretti lejn integrazzjoni mill-ġdid malajr tal-ħaddiema fis-suq tax-xogħol li tkopri l-ewwel nett il-bżonnijiet immedjati ta' taħriġ għal impjegabilità aħjar u miżuri li jipprovdu għajnuna tit-tfittxija tal-impjiegi;

5. Jiddispjaċih li l-applikazzjoni ma tindikax jekk ġewx offruti xi miżuri speċjali lil ħaddiema bi problemi ta' saħħa li ilhom jeżistu u lil dawk li għandhom iktar minn 65 sena;

6. Jilqa’ l-approċċ li l-FEAG jintuża bħala kumplement għat-tħaddim tal-appoġġ tal-FSE; jiddispjaċih, madankollu, li l-applikazzjoni ma tindikax l-ispeċifiċità u l-valur miżjud tal-miżuri tal-FEAG.

Dejjem tiegħek,

Pervenche Berès