dwar finanzjament innovattiv fil-livell globali u Ewropew

(2010/2105(INI))

Il-Parlament Ewropew,

–   wara li kkunsidra l-konklużjoni tal-Kunsill tal-Ewropa tas-17 ta' Ġunju 2010 u l-konklużjonijiet tal-Kunsill tal-Ewropa tal-11 ta' Diċembru 2009,

–   wara li kkunsidra l-minuti tal-laqgħa tal-ECONFIN tad-19 ta' Ottubru 2010 u r-rapport tal-Kunsill tal-Ewropa li hemm ikkwotat fihom,

–   wara li kkunsidra l-programm tal-Presidenza Belġjana, b'mod partikolari l-proposti dwar finanzjament innovattiv,

–   wara li kkunsidra r-Riżoluzzjoni tiegħu tal-10 ta' Marzu 2010 dwar it-taxxi fuq it-tranżazzjonijiet finanzjarji – nagħmluhom jaħdmu(1),

–   wara li kkunsidra r-riżoluzzjoni tiegħu tal-20 ta' Ottubru 2010 dwar il-Kriżi Finanzjarja, Ekonomika u Soċjali(2),

–   wara li kkunsidra r-riżoluzzjoni tiegħu tat-22 ta' Settembru 2010 dwar Awtoritajiet Superviżorji Ewropej(3) u speċifikament ir-riżoluzzjionijiet tiegħu tat 22 ta' Settembru 2010 dwar l-Awtorità Ewropea tal-Assigurazzjoni u l-Pensjonijiet tax-Xogħol(4), tat-22 ta' Settembru 2010 dwar l-Awtorità Bankarja Ewropea(5), tat-22 ta' Settembru 2010 dwar u l-Awtorità Ewropea tat-Titoli u s-Swieq(6), u tat-22 ta' Settembru 2010 dwar is-sorveljanza makroprudenzjali tas-sistema finanzjarja u l-istabbiliment ta' Bord Ewropew dwar ir-Riskju Sistemiku(7).

–   wara li kkunsidra d-dokument ta’ ħidma tal-istaff tal-Kummissjoni dwar finanzjament innovattiv fil-livell globali u Ewropew (SEC(2010)0409) u l-Komunikazzjoni tal-Kummissjoni dwar tassazzjoni tas-settur finanzjarju (COM(2010)0549/5), flimkien mad-dokument ta’ ħidma tal-istaff li jakkumpanjahom (SEC(2010)1166),

–   wara li kkunsidra l-proposta tal-Kummissjoni għal regolament tal-Parlament Ewropew u tal-Kunsill dwar id-derivattivi OTC, il-kontropartijiet ċentrali u r-repożitorji kummerċjali, SEC(2010)0484/5),

–   wara li kkunsidra l-Komunikazzjoni tal-Kummissjoni dwar Fondi ta’ Riżoluzzjoni Bankarja (COM(2010)0254),

–   wara li kkunsidra d-Dikjarazzjoni tal-G20 magħmula fil-15 ta' Novembru 2008 f'Washington, id-Dikjarazzjoni tal-G20 magħmula fit-2 ta' April 2009 f'Londra u l-Istqarrija tal-Mexxejja tas-Samit tal-G20 tal-25 ta' Settembru 2009 f'Pittsburgh,

–   wara li kkunsidra r-rapport 2010 tal-FMI għall-G20 dwar it-Tassazzjoni tas-Settur Bankarju,

–   wara li kkunsidra l-karta tal-Kumitat Konsultattiv tat-Trejdjunjins tal-OECD bl-isem "'The parameters of a financial transaction tax and the OECD global public good resource gap, 2010-2020' tal-15 ta' Frar 2010,

–   wara li kkunsidra r-rapport tal-OECD tal-2010 bl-isem 'The elephant in the room: the need to deal with what banks do',

–   wara li kkunsidra l-istudju tal-Istitut Awstrijak ta' Riċerka Ekonomika (WIFO) bl-isem 'A General Financial Transaction Tax: Motives, Revenues, Feasibility and Effects' tat-8 ta' Marzu 2008,

–   wara li kkunsidra l-karta tal-Fondazzjoni tal-Istudji Progressivi Ewropej bl-isem 'Financial Transaction Taxes: Necessary, Feasible and Desirable' ta' Marzu 2010,

–   wara li kkunsidra l-istudju taċ-Ċentru tar-Riċerka ta' Politika Ekonomika bl-isem 'Benefits of a Financial Transactions Tax' ta' Diċembru 2008,

–   wara li kkunsidra r-rapport mill-Kummissjoni - Klassifika tal-għajnuna mill-Istat - Ir-rapport dwar l-iżviluppi riċenti tal-għajnuna lis-settur finanzjarju fil-kuntest tal-kriżi (COM(2010)0255),

–   wara li kkunsidra l-istudju ta' Notre Europe bl-isem "'An ever less carbonated Union? Towards a better European Taxation against climate change',

–   wara li kkunsidra d-dokument tar-riżulati tal-Laqgħa Plenarja ta' Livell Għoli tal-Assemblea Ġenerali tan-Nazzjonijiet Uniti: ‘Keeping the promise: united to achieve the Millennium Development Goals' ta' Settembru 2010,

–   wara li kkunsidra d-Dikjarazzjoni maħruġa fis-Seba' Laqgħa Plenarja tal-Grupp ta' Tmexxija dwar il-Finanzjament Innovattiv għall-Iżvilupp li saret f'Santiago f'Jannar 2010,

–   wara li kkunsidra r-Rapport 2010 tal-Kumitat ta' Esperti tat-Taskforce dwar Transażżjonijiet Finanzjarji Internazzjonali għall-Iżvilupp 'Globalising Solidarity: The Case for Financial Levies',

–   wara li kkunsidra l-Artikolu 48 tar-Regoli ta’ Proċedura tiegħu,

–   wara li kkunsidra r-rapport tal-Kumitat għall-Affarijiet Ekonomiċi u Monetarji u l-opinjonijiet tal-Kumitat għall-Iżvilupp u l-Kumitat għall-Industrija, ir-Riċerka u l-Enerġija (A7-0036/2011),

A. billi l-kriżi globali finanzjarja u ekonomika bla preċedenti fl-2007 kixfet disfunzjonijiet sinifikanti fil-qafas regolatorju u superviżorju tas-sistema finanzjarja globali, li jistgħu jiġu deskritti bħala kombinazzjoni ta' swieq finanzjarji mhux regolati, prodotti komplessi ż-żejjed u ġurisdizzjonijiet mhux trasparenti; billi l-Ewropa teħtieġ swieq finanzjarji aktar trasparenti u effiċjenti,

B.  billi s-swieq ħielsa huma l-bażi tal-ħolqien tal-ġid madwar id-dinja, u billi l-ekonomiji tas-suq u l-kummerċ ħieles joħolqu l-ġid u joħorġu n-nies mill-faqar,

C. billi ż-żieda spettakolari fil-volum ta’ tranżazzjonijiet finanzjarji fl-ekonomija globali matul l-aħħar għaxar snin - volum li fl-2007 laħaq livell 73.3 darba ogħla mill-PDG nominali tad-dinja, l-aktar minħabba l-boom tas-suq tad-derivattivi - tispjega n-nuqqas ta’ konnessjoni li qed jikber bejn it-tranżazzjonijiet finanzjarji u l-bżonnijiet tal-ekonomija reali,

D. billi s-settur finanzjarju jiddependi ħafna fuq mudelli ta’ kummerċ, bħalma hu l-kummerċ bi frekwenza kbira (HFT), li jimmiraw l-aktar lejn qligħ f’terminu qasir ta’ żmien u huma esposti għal livell għli ta' ingranaġġ, li kienet waħda mill-bosta kawżi tal-kriżi finanzjarja; billi dan ikkawża volatilità eċċessiva tal-prezzijiet u devjazzjonijiet persistenti ta’ prezzijiet ta’ ishma u prodotti bażiċi (commodities) mil-livelli fundamentali tagħhom,

E.  billi l-kapaċità tan-negozji, tal-gvernijiet u tal-individwi li jissellfu u jsellfu wieħed lill-ieħor hija fattur kruċjali għall-ekonomija globali; billi l-kriżi finanzjarja pprovdiet eżempji ta’ karatteristiċi sfortunati tas-suq internazzjonali tal-kapital; billi minħabba dik ir-raġuni jeħtieġ li jintlaħaq bilanċ bejn il-ħtieġa tat-teħid ta' passi li jgħinu biex tinżamm stabbiltà finanzjarja u l-ħtieġa li tinżamm il-kapaċità tal-banek li jipprovdu kreditu lill-ekonomija;

F.  billi fis-samits tal-G20 li saru f’Washington fl-2008 u f’Pittsburgh fl-2009 kien intlaħaq ftehim li jiġu implimentati riformi biex jisaħħu s-sorveljanza u s-sistemi regolatorji tas-swieq finanzjarji sabiex iġiegħlu lill-istituzzjonijiet finanzjarji jerfgħu s-sehem ġust ta’ responsabbiltà tagħhom għall-inkwiet,

G. billi l-ispejjeż prinċipali tal-kriżi s’issa kellhom ibatuhom dawk li jħallsu t-taxxi, li l-flus tagħhom, f’ħafna partijiet tad-dinja, użawhom il-gvernijiet biex isalvaw il-banek privati u istituzzjonijiet finanzjarji oħra; billi qed ikun hemm dejjem iktar sejħiet biex l-istituzzjonijiet finanzjarji u l-partijiet interessati, li gawdew għal ħafna snin minn dħul eċċessiv minn ishma u minn ħlasijiet eċċessivi ta’ bonus annwali u kienu jikkostitwixxu l-akbar parti tal-profitti korporattivi globali, jikkontribwixxu s-sehem ekwu tagħhom biex jiġu koperti l-ispejjeż,

H. billi b’mod partikolari fl-UE l-ispiża tas-salvataġġi aggravat u aċċellerat il-bidu ta' kriżi fiskali u tad-dejn li tefgħet piż mhux mistenni fuq il-baġits pubbliċi u pperikolat b’mod sever il-ħolqien tal-impjiegi, l-għoti ta’ għajnuniet soċjali statali u l-kisba tal-għanijiet tal-klima u tal-ambjent,

I.   billi t-tendenzi favur gwadann immedjat u l-ispekulazzjoni fis-suq tal-bonds tal-gvernijiet Ewropej, kienu fatturi aggravanti importanti fil-kriżi tad-defiċit sovran Ewropew fl-2009-2010 u esponew ir-rabtiet mill-qrib li hemm bejn l-iżvantaġġi fis-settur finanzjarju u l-problemi fil-garanzija tas-sostenibilità tal-finanzi pubbliċi fi żmien ta' defiċits baġitarji eċċessivi u dejn pubbliku u privat dejjem jikber,

J.   billi l-ineffiċjenza tal-Patt ta’ Stabilità u Tkabbir fil-forma attwali tiegħu u d-disparitajiet fil-kompetittività bejn l-Istati Membri qajmu d-diskussjoni attwali dwar il-governanza ekonomika Ewropea, li komponenti kruċjali tagħha għandhom ikunu miżuri biex jissaħħaħ il-Patt ta’ Stabilità u Tkabbir, prinċipalment id-dispożizzjonijiet preventivi tiegħu, tnedija mingħajr dewmien ulterjuri ta' riformi strutturali inevitabbli u koordinazzjoni tal-ġlieda kontra l-evitar, il-frodi u l-evażjoni fiskali sabiex tiġi ssalvagwarjata l-ġustizzja fiskali, filwaqt l-piż tat-taxxi jiġi ttraferit gradwalment minn fuq ix-xogħol għal fuq il-kapital u l-attivitajiet b’esternalitajiet negattivi qawwija,

K. billi l-kriżi enfasizzat il-bżonn li jiżdied dħul li jkun ġdid, b’bażi wiesgħa, ġust u sostenibbli u li jiġu infurzati l-leġiżlazzjonijiet eżistenti dwar l-evażjoni fiskali u titjieb l-effikaċja tagħhom sabiex jiġi żgurat li l-konsolidazzjoni fiskali tkun ikkombinata b'mod effikaċi mal-irkupru ekonomiku tul medda twila ta’ żmien u s-sostenibilità tal-finanzi pubbliċi, il-ħolqien tal-impjiegi u l-koeżjoni soċjali, li huma prijoritajiet ewlenin tal-aġenda UE 2020,

L.  billi l-limitazzjonijiet baġitarji serji b’riżultat tal-kriżi reċenti jaħbtu fi żmien meta l-UE daħlet għal impenji importanti ħafna fil-livell globali, prinċipalment fir-rigward ta' objettivi relatati mat-tibdil fil-klima, l-Għanijiet ta’ Żvilupp għall-Millennju (MDGs) u għajnuna għall-iżvilupp, b’mod partikolari għall-adattament għat-tibdil fil-klima u l-mitigazzjoni tiegħu fil-pajjiżi li qegħdin jiżviluppaw,

M. billi fis-17 ta’ Ġunju 2010 l-Kunsill tal-Ewropa ddikjara li l-UE għandha tmexxi sforzi sabiex jiġi stabbilit approċċ globali għall-introduzzjoni ta’ imposti u taxxi fuq istituzzjonijiet finanzjarji u talbet li l-kwistjoni tal-introduzzjoni ta’ Taxxi fuq Tranżazzjonijiet Finanzjarji globali (TTF) tiġi eżaminata u żviluppata aktar,

N. billi diġà talab lill-Kummissjoni twettaq valutazzjoni tal-impatt u tipprovdi analiżi tal-merti pożittivi ta' TTF; u għaldaqstant, iddeċieda li jistenna din l-analiżi qabel ma jieħu kwalunkwe azzjoni ulterjuri,

1.    Jieħu nota tax-xogħol li sar sa issa mill-Kummissjoni b'reazzjoni għat-talba li għamel il-Parlament fir-riżoluzzjoni tiegħu ta’ Marzu 2010 sabiex isir studju ta’ fattibilità dwar taxxi fuq tranżazzjonijiet finanzjarji fil-livell globali u f'dak tal-UE; jenfasizza l-bżonn tal-valutazzjoni tal-impatt komprensiva u jitlob li r-riżultat tal-valutazzjoni tal-impatt u proposti konkreti possibbli jsiru pubbliċi sas-Sajf tal-2011, kif imħabbar fil-komunikazzjoni tal-Kummissjoni dwar it-Tassazzjoni tas-Settur Finanzjarju, jenfasizza li studju ta’ fattibilità bbilanċjat u bir-reqqa dwar TTF tal-UE għandu jkun il-bażi li fuqha għandha tiġi implimentata l-proċedura għall-introduzzjoni ta’ tali taxxa;

2.    Jenfasizza li żieda fir-rati, l-ambitu tal-għodod ta’ tassazzjoni eżistenti u aktar tnaqqis fl-ispiża pubblika ma jistgħu jkunu soluzzjoni la suffiċjenti u lanqas sostenibbli biex jiġu indirizzati l-isfidi prinċipali li ġejjin fil-livell Ewropew u f'dak globali; jenfasizza li, fl-indirizzar ta' dawn l-isfidi u d-diskussjonijiet dwar sistemi ġodda ta' finanzjament, waħda mill-prijoritajiet ewlenin għandha tkun il-ħolqien ta’ mezzi biex jissaħħu l-kompetittività u t-tkabbir ekonomiku Ewropew;

3.  Jenfasiżża li suq uniku li jiffunzjona tajjeb huwa l-aktar għodda prezzjuża tal-UE f’dinja globalizzata u kompetittiva u l-forza prinċipali tat-tkabbir Ewropew; jenfasizza li l-punt fokali għandu jkun fuq it-tisħiħ tas-suq intern u fuq kif jistgħu jintefqu r-riżorsi nazzjonali u Ewropej b’mod aktar intelliġenti billi tittieħed viżjoni olistika tar-riforma baġitarja, li tkopri kemm l-infiq kif ukoll id-dħul tal-baġit; jinnota li l-infiq jeħtieġ isir b’mod li jkun imfassal biex iġib ir-riżultati u strumenti finanzjarji ġodda għat-twettiq tal-baġit għandhom ikunu intelliġenti, integrati u flessibbli;

4.  Jenfasizza li t-tneħħija tal-ostakli li fadal fis-suq intern hija l-aħjar mod biex jiġu promossi politiki ta’ tkabbir reali li jagħtu r-riżultati; jinnota li l-istudji juru li jistgħu jiġu ffrankati bejn 200 sa 300 biljun euro kull sena kieku kellhom jitneħħew l-ostakli kollha għall-erba’ libertajiet;

5.  Jenfasizza l-importanza tat-tnedija mill-ġdid tas-Suq Uniku u jenfasizza li l-UE trid tfassal u timplimenta b’mod effettiv regoli komuni biex is-Suq Uniku ikun jista' jservi ta’ vettur għat-tkabbir strutturali; jenfasizza li l-isforzi jridu jiffukaw fuq il-forza mexxejja tal-ekonomija Ewropea: l-20 miljun negozju Ewropew speċjalment dawk żgħar u ta’ daqs medju mmexxija minn intraprendituri u persuni oħrajn bi spirtu kreattiv;

6.  Jenfasizza li wieħed mill-assi l-aktar importanti tal-Unjoni Ewropea huwa d-daqs tagħha u dan il-vantaġġ irid jintuża b'mod sħiħ billi jiġi sfruttat il-potenzjal tas-Suq Uniku u billi jintużaw il-fondi mill-baġit tal-UE sabiex jinkiseb valur miżjud fl-isforzi tas-settur pubbliku biex jiġu stimulati l-forzi tat-tkabbir;

7.  Jenfasizza li l-Kummissjoni għandha tadotta qafas ta’ strateġija komuni, li jindika strateġija komprensiva ta’ investiment li tittrasforma l-miri u l-objettivi tal-Ewropa 2020 fi prijoritajiet ta’ investiment, u tidentifika l-ħtiġijiet tal-investimenti fir-rigward tal-miri u l-proġetti ewlenin u r-riformi meħtieġa biex jiġi mmassimizzat l-impatt tal-investiment appoġġat mill-politika ta’ koeżjoni;

8.  Jenfasizza li wieħed mill-vantaġġi prinċipali tal-għodod ta' finanzjament innovattiv huwa li jista' jkollhom benefiċċju doppju, minħabba li jistgħu jikkontribwixxu sabiex jintlaħqu objettivi ta’ politika importanti, bħalma hi l-istabilità u t-trasparenza tas-suq finanzjarju, u fl-istess ħin joffru potenzjal ta’ dħul sinifikanti; jenfasizza, f’dan il-kuntest, li għandhom jiġu kkunsidrat wkoll l-effetti ta’ dawn l-għodod fuq l-esternalitajiet negattivi prodotti mis-settur finanzjarju;

It-tasazzjoni tas-settur finanzjarju

9.  Ifakkar li l-ħsara finanzjarja kkawżata mill-evażjoni u l-frodi fiskali fl-Ewropa hija stmata bejn 200 u 250 biljun euro fis-sena; iqis, għalhekk, li t-tnaqqis tal-livelli ta’ frodi fiskali għandu jgħin biex jonqsu d-defiċits pubbliċi mingħajr ma jiżdiedu t-taxxi; jinnota, b'dan l-isfond, li l-finanzjament innovattiv għandu jagħti saħħa mill-ġdid lill-isforzi tal-Istati Membri, l-UE u l-komunità internazzjonal fil-ġlieda kontra l-evażjoni u l-frodi fiskali kif ukoll forom oħrajn ta' għejbien illegali ta’ kapital li għandhom impatt baġitarju sinifikanti;

10. Jenfasizza li wara l-effetti tal-kriżi l-UE jeħtiġilha tikkonvinċi liċ-ċittadini tagħha li għandha r-rieda u l-għodda biex timxi ’l quddiem b’taħlita bbilanċjata ta’ strateġija ta' konsolidazzjoni fiskali u politiki ta’ stimulu sabiex tissalvagwardja rkupru ekonomiku fit-tul;

11. Iqis li, filwaqt li riċentement sar progress kbir kemm min-naħa regolatorja kif ukoll min-naħa superviżorja, il-politika fiskali hija d-dimensjoni nieqsa fl-approċċ tal-UE għas-settur finanzjarju;

12. Jilqa’ r-rikonoxximent tal-Kummissjoni li s-settur finanzjarju mhux intaxxat biżżejjed, b’mod partikolari minħabba li ma tiġi imposta l-ebda VAT fuq il-biċċa l-kbira tas-servizzi finanzjarji, u jitlob li jittieħdu miżuri ta' finanzjament innovattivi biex jinġabar aktar minn dan is-settur u biex il-piż tat-tassazzjoni jiġi jitneħħa minn fuq in-nies li jaħdmu;

13. Jikkunsidra li l-introduzzjoni ta' TTF tista' tgħin biex jiġu indirizzati l-mudelli ta' kummerċ li qed jiżdiedu u li huma ta' dannu kbir fis-swieq finanzjarji, bħalma huma t-tranżazzjonijiet b'xejriet lejn profitti b'terminu ta' żmien qasir u t-tranżazzjonijiet awtomatizzati tat-tip HFT, u biex titrażżan l-ispekulazzjoni; jenfasizza li TTF b’hekk ikollha l-potenzjal li ttejjeb l-effiċjenza tas-suq, iżżid it-trasparenza, tnaqqas il-volatilità eċċessiva tal-prezzijiet u toħloq inċentivi għas-settur finanzjarju sabiex jagħmel investimenti fit-tul b’valur miżjud għall-ekonomija reali;

14. Jenfasizza l-istimi ta’ dħul attwali għal rata baxxa ta' TTF li tkun tista’, bil-bażi wiesgħa ta’ taxxa tagħha, trendi kważi 200 biljun euro fis-sena fil-livell tal-UE u $650 biljun fil-livel globali; iqis li din tista' tikkostitwixxi kontribuzzjoni sostanzjali mis-settur finanzjarju għall-ispiża tal-kriżi u għas-sostenibilità tal-finanzi pubbliċi;

15. Jinnota l-evuluzzjoni rapida tad-dibattitu dwar it-TTF u l-fehmiet differenti fir-rigward tal-fattibilità, l-effiċjenza u l-effikaċja ta’ taxxa bħal din, kif ukoll id-diskussjoni li qed tiżviluppa dwar it-Taxxa fuq l-Attivitajiet Finanzjarji (FAT), iżda jinnota li s'issa l-G20 ma rnexxilux jippromwovi inizjattivi konġunti sensibbli dwar din il-kwistjoni; jistieden lill-mexxejja tal-G20 jħaffu n-negozjati għal ftehim dwat l-elementi komuni minimi ta' TTF globali u jipprovdu gwida dwar il-futur mixtieq ta’ dawn id-diversi tipi ta’ tassazzjoni;

16. Huwa favur l-introduzzjoni ta’ taxxa fuq it-tranżazzjonijiet finanzjarji, li ttejjeb il-funzjonament tas-suq billi tnaqqas l-ispekulazzjoni u tgħin biex jiġu ffinanzjati l-beni pubbliċi globali u jitnaqqsu d-defiċits pubbliċi; jikkunsidra li l-introduzzjoni ta' taxxa fuq it-tranżazzjonijiet finanzjarji għandha tkun b'bażi kemm jista' jkun wiesgħa; jistieden lill-Kummissjoni twettaq malajr studju ta’ fattibbiltà, filwaqt li jitqies il-bżonn ta' kundizzjonijiet globali ugwali, u tippreżenta proposti leġiżlattivi konkreti;

17. Jinnota li fl-eżami tal-possibilitajiet ta' taxxi fuq is-settur finanzjarju fil-livell globali u f'dak tal-UE, għandhom jiġu kkunsidrati l-lezzjonijiet li ttieħdu mill-introduzzjoni ta’ taxxi fuq tranżazzjonijiet settorjali fil-livell tal-Istati Membri;

18. Jenfasizza wkoll li l-fluss ta’ tranżazzjonijiet sempliċement spekulattivi lejn ġurisdizzjonijiet oħrajn għandhom ftit effetti detrimentali, imma jista’ jkollhom il-potennzjal li jikkontribwixxu għal aktar effiċjenza tas-suq; jenfasizza wkoll li mhux l-azzjonijiet kollha meqjusa spekulattivi għandhom jiġu kkundannati, minħabba li ċerti forom ta' teħid tar-riskju jistgħu jżidu l-istabilità tas-swieq finanzjarji tal-UE;

19. Jenfasizza li fi ħdan is-suq ċentralizzat Ewropew, is-servizzi ċentrali ta’ approvazzjoni u ħlas finali (clearing and settlement services) jistgħu jiffaċilitaw l-introduzzjoni ta’ TTF li tkun irħisa f’termini amministrattivi u sempliċi biex tiġi implimentata; ifakkar, madankollu, li n-natura globali u interkonnessa tal-industrija finanzjarja għandha tiġi kkunsidrata fit-tfassil tal-aspetti tekniċi tat-TTF;

20. Jinnota l-Komunikazzjoni riċenti tal-Kummissjoni bħala l-ewwel pass biex jiġi indirizzat dan is-suġġett; jikkunsidra li l-oneru tal-prova rigward il-vantaġġu u/jew l-iżvantaġġi possibbli tal-introduzzjoni ta' TTF fil-livell tal-UE huwa tal-Kummissjoni u l-valutazzjoni tal-impatt tagħha;

21. Jinnota li l-Komunikazzjoni riċenti tal-Kummissjoni ħabbret valutazzjoni tal-impatt ta' diversi possibilitajiet ta' tassazzjoni tas-settur finanzjarju u jistieden lill-Kummissjoni sabiex fl-istudju ta’ fattibilità tagħha tindirizza wkoll l-assimetrija ġeografika tat-tranżazzjonijiet u d-dħul, u l-possibilità ta’ rata gradata jew differenzjata abbażi tal-katerġorija tal-assi, l-inċidenza tat-taxxa, in-natura tal-attur involut jew in-natura ta’ terminu qasir u spekulattiva ta' xi tipi ta' tranżazzjonijiet; jitlob lill-Kummissjoni tutilizza r-riċerka kollha disponibbli;

22. Jistieden lill-Kummissjoni tanalizza, fl-istudju ta’ fattibilità tagħha, l-għażliet differenti possibbli għal TTF tal-UE u l-impatti tagħhom, inklużi l-benefiċċji għall-ekonomija u s-soċjetà ta' tnaqqis tat-tranżazzjonijiet finanzjarji spekulattivi, li attwalment qed jikkawżaw tgħawwiġ serju tas-suq;

23. Jenfasizza li TTF għandu jkollha l-aktar bażi wiesgħa possibbli sabiex tiggarantxxi kundizzjonijiet ekwi għal kulħadd fis-swieq finanzjarji u mhux timbotta t-tranżazzjonijiet lejn strumenti anqas trasparenti; iqis, għalhekk, li l-istudju ta' fattibilità tal-Kummissjoni għandu jesplora t-tranżazzjonijiet kollha b’assi finanzjarji, bħalma huma t-tranżazzjonijiet fil-pront (spot transactions) innegozjati f’Borża, kif ukoll it-tranżazzjonijiet ta' derivattivi li jsiru fis-swieq u barra l-Borża (OTC); jinnota li l-gradazzjoni ta’ TTF, b’rati differenzjati fid-diversi postijiet tan-negozju, tista’ ssaħħaħ aktar l-istabilità tas-suq billi toħloq inċentivi pożittivi għall-atturi finanzjarji biex jirrilokaw it-tranżazzjonijiet lil hinn mill-istrumenti tal-OTC lejn postijiet aktar trasparenti u rregolati tajjeb;

24. Jilqa' f’dan il-kuntest, il-proposti reċenti tal-Kummissjoni dwar derivattivi OTC u bejgħ bin-nieqes (short selling) li jimponu rekwiżiti ta’ kustodja espliċiti għal servizzi ta’ approvazzjoni u ħlas finali għat-tranżazzjonijiet kollha ta’ derivattivi OTC, li b’hekk jagħmlu teknikament fattibbli l-implimentazzjoni ta’ din it-TTF b’bażi wiesgħa tal-UE;

25. Jinsisti li jiġi stabbilit min fil-fatt se jħallas it-taxxa, billi l-piż normalment jgħaddi fuq il-konsumaturi, li f’dan il-każ ikunu l-investituri bl-imnut u individwi; jenfasizza l-ħtieġa ta' regoli komprensivi dwar eżenzjonijiet u limiti, sabiex jiġi żgurat li dan ma jiġrix;

26. Jilqa' l-proposti reċenti tal-FMI, appoġġati mill-Kummissjoni, għal taxxa fuq l-assi tal-banek sabiex kull pajjiż ikun jista’ jiġbor imposti ta’ bejn 2 u 4% tal-PDG sabiex jiffinanzja mekkaniżmi għas-soluzzjoni ta’ kriżijiet futuri; jemmen li imposti tal-banek għandhom ikunu proporzjonati għas-sinifikat sistemiku tal-istituzzjoni ta’ kreditu konċernata u għal-livell ta’ riskju involut fl-attività;

27. Jinnota li l-imposti tal-banek, Taxxa fuq l-Attivitajiet Finanzjarji u Tassazzjoni fuq it-Tranżazzjonijiet Finanzjarji kollha jservu objettivi ekonomiċi differenti u għandhom potenzjal differenti biex jiġġeneraw id-dħul; jenfasizza madankollu li billi huma bbażati fuq pożizzjonijiet fuq il-karta tal-bilanċ, l-imposti tal-banek ma jistgħux jassumu rwol ta’ trażżin ta’ spekulazzjoni finanzjarja u jirregolamentaw aktar ix-xogħol ta’ banek “parallel”; barra minn hekk jenfasizza, f'dan ir-rigward, l-importanza ta’ mekkaniżmi ta’ superviżjoni finanzjarja u trasparenza fit-tisħiħ tar-reżiljenza u l-istabilità tas-sistema finanzjarja;

28. Jinnota l-proposta tal-FMI dwar Taxxa fuq l-Attivitajiet Finanzjarji (FAT), u l-impenn riċenti tal-Kummissjoni biex tagħmel valutazzjoni tal-impatt komprensiva tal-potenzjal tagħha; jenfasizza li Taxxa fuq l-Attivitajiet Finanzjarji hija strument fiskali orjentat biss lejn id-dħul immirat għas-settur finanzjarju, u tippermetti li jiġu ntaxxati renti ekonomiċi u profitti minn teħid ta’ riskju eċċessiv, u għaldaqstant tista' tipprovdi soluzzjoni għall-eżenzjoni attwali tal-VAT tas-settur finanzjarju;

29. Huwa konxju tal-għażliet differenti għall-ġestjoni ta’ dħul addizzjonali ġġenerat mit-tassazzjoni tas-settur finanzjarju, kemm fil-livell nazzjonali kif ukoll f'dak Ewropew; jenfasizza li, jeħtieġ li tissolva l-kwistjoni dwar l-iskop li għalih għandu jmur id-dħul iġġenerat minn TTF u li, sabiex tingħata stampa adegwata lil dawk li jħallsu t-taxxa tar-razzjonal wara t-tassazzjoni addizzjonali tas-settur finanzjarju, il-valutazzjoni u l-prijoritizzazzjoni ta' l-għażliet differenti għandhom jidhru bħala element essenzjali fid-dibattitu ġenerali dwar il-finanzjament innovattiv; jenfasizza li, minħabba n-natura globali tiegħu, id-dħul iġġenerat minn TTF globali għandu jintuża biex jiġi pprovdut finanzjament għal għanijiet ta’ politika globali bħall-iżvilupp u t-tnaqqis tal-faqar fil-pajjiżi li qed jiżviluppaw u l-ġlieda kontra t-tibdil fil-klima; jinnota l-għan tal-Kummissjoni li żżid il-volum tal-baġit tal-UE permezz ta’ strumenti ta' finanzjament innovattiv; huwa konvint li sabiex ikun salvagwardat il-valur miżjud Ewropew tal-istrumenti ta’ finanzjament innovattiv, parti minn dak id-dħul jista’ jkun allokat sabiex jiffinanzja proġetti u politiki tal-UE; ifakkar li l-Komunikazzjoni riċenti tal-Kummissjoni dwar eżami mill-ġdid tal-baġit tal-UE tikkunsidra t-tassazzjoni tal-UE tas-settur finanzjarju bħala sors possibbli ta' riżorsi proprji; jitlob dibattitu wiesa’ bl-involviment tal-istituzzjonijiet tal-UE, il-parlamenti nazzjonali, il-partijiet interessati tal-UE u r-rappreżentanti tas-soċjetà ċivili dwar l-għażliet disponibbli rigward dawn il-politiki, il-partijiet tad-dħul li jridu jkunu allokati fil-livell tal-UE f'dak nazzjonali u d-diversi modi kif dan jinkiseb; jinnota, fir-rigward tal-ġestjoni tal-parti tad-dħul allokata fil-livell nazzjonali, li għandhom jiġu vvalutati l-fakultajiet kollha possibbli, inkluża l-allokazzjoni ta' dħul għall-konsolidazzjoni tal-finanzi pubbliċi;

30. Jenfasizza li l-introduzzjoni possibbli ta’ dawn l-għodod ġodda ta’ tassazzjoni fis-settur finanzjarju għandha tiġi analizzata fil-kuntest tal-ambjent tat-taxxa eżistenti f’dak is-settur, billi jitqiesu l-effetti sekondarji u jinżamm punt fokali speċjali fuq l-identifikazzjoni ta' sinerġiji bejn it-taxxi qodma u dawk ġodda;

31. Jinnota l-għan tal-Kummissjoni li żżid il-volum tal-baġit tal-UE permezz tal-użu ta’ strumenti finanzjarji innovattivi u jirrikonoxxi l-benefiċċji potenzjali tal-istimulu tal-finanzjament tas-settur privat bi flus pubbliċi; huwa konxju, madankollu, li l-użu ta’ strumenti ta’ skop speċjali għall-finanzjament ta’ proġetti jista’ jirriżulta f’responsabilitajiet dejjem iżjed kontinġenti; jemmen, għalhekk, li tali miżuri għandhom ikunu akkumpanjati minn żvelar trasparenti sħiħ flimkien ma’ linji gwida xierqa għall-investiment, ġestjoni tar-riskju, limiti ta’ espożizzjoni, u proċeduri ta’ skrutinju u sorveljanza, li kollha jridu jiġu stabbiliti b’mod demokratikament responsabbli;

Eurobonds u bonds ta’ proġetti Ewropej

32. Jinnota li qed ikun hemm dejjem iżjed riferenza għall-Eurobonds bħala strument ta’ ġestjoni tad-dejn; jinnota l-proposti u l-inizjattivi riċenti kollha b'dak l-effett; jistieden lill-Kunsill Ewropew u lill-Kummissjoni jipprovdu reazzjoni immedjata għas-sejħa li l-Parlament għamel fir-riżoluzzjoni tiegħu dwar mekkaniżmu ta' kriżi permanenti (P7_TA-PROV(2010)0491) sabiex jingħata s-sinjal politiku neċessarju biex il-Kummissjoni tinvestiga sistema futura ta' Eurobonds, bl-għan li jiġu stabbiliti l-kundizzjonijiet li bihom tali sistema tkun ta' benefiċċju għall-Istati Membri parteċipanti kollha u għaż-żona tal-euro b'mod ġenerali;

33. Jappoġġa l-idea li jinħarġu bonds ta’ proġetti Ewropej komuni sabiex jiffinanzjaw il-bżonnijiet infrastrutturali Ewropej li huma sinifikanti u proġetti strutturali fil-qafas tal-aġenda UE 2020, l-istrateġija l-ġodda antiċipati tal-UE, bħalma hi l-Istrateġija l-ġdida dwar l-Iżvilupp tal-Infrastruttura tal-Enerġija, u proġetti oħrajn fuq skala kbira; jemmen li l-bonds ta’ proġetti tal-UE jistgħu jassiguraw l-investiment meħtieġ u joħolqu fiduċja suffiċjenti biex ikunu jistgħu jsiru proġetti ta’ investiment kbir sabiex jiġbdu l-appoġġ meħtieġ u għalhekk isiru mekkaniżmu importanti għall-istimulu massimu tal-appoġġ pubbliku; ifakkar li, biex l-Ewropa titpoġġa fuq bażi sostenibbli, dawn il-proġetti jridu jikkontribwixxu wkoll għat-trasformazzjoni ekoloġika tal-ekonomiji tagħna, billi jwittu t-triq għall-ekonomija mingħajr karbonju;

34. Jenfasizza li għandu jsir użu ikbar tal-baġit tal-UE biex jiġi stimulat l-investiment; jenfasizza li n-norma għal proġetti b’potenzjal kummerċjali fit-tul għandha tkun dik li l-fondi tal-UE jintużaw bi sħubija mas-settur bankarju privat, partikolarment permezz tal-Bank Ewropew għall-Investiment (BEI) u l-Bank Ewropew għall-Iżvilupp u r-Rekostruzzjoni (BERŻ);

35. Jistieden lill-Kummisjoni u lill-Bank Ċentrali Ewropew biex jinvestigaw l-implikazzjonijiet tal-periklu morali għall-Istati Membri tal-finanzjament ta’ proġetti ta’ infrastruttura kruċjali permezz ta’ bonds ta’ proġetti tal-UE jew Eurobonds, speċjalment meta tali proġetti ta’ infrastruttura jkollhom skop transnazzjonali;

Taxxa fuq il-karbonju

36. Jenfasizza li l-mudell attwali ta’ tassazzjoni għandu jħaddan bis-sħiħ il-prinċipju ta' min iniġġes iħallas bl-użu ta’ għodod ta’ finanzjament innovattiv sabiex il-piż tat-taxxi jgħaddi gradwalment għal fuq attivitajiet li jniġġsu l-ambjent, joħolqu emissjonijiet konsiderevoli ta' gassijiet b'effett serra jew jużaw volumi konsiderevoli ta' riżorżi;

37. Jappoġġa għalhekk, tisħiħ tal-Iskema tal-Iskambju ta' Kwoti ta' Emissjonijiet (ETS), u reviżjoni komprensiva tad-direttiva dwar tassazzjoni tal-enerġija sabiex l-emissjonijiet tad-CO2 u l-kontenut tal-enerġija jkunu kriterji bażiċi għat-tassazzjoni ta’ prodotti tal-enerġija;

38. Jenfasizza li ż-żewġ għodod għandhom benefiċċju doppju qawwi, billi jipprovdu inċentivi maġġuri sabiex min-naħa neqilbu għal sorsi tal-enerġija mingħajr karbonju, sostenibbli u rinnovabbli u min-naħa l-oħra jkun hemm dħul addizzjonali sinifikanti; ifakkar, madankollu, li l-mottiv ewlieni għall-introduzzjoni tat-taxxa tal-karbonju hu biex jinbidlu l-imġiba u l-istrutturi tal-produzzjoni, ladarba d-dħul mistenni se jonqos meta x-xejriet ta’ produzzjoni jgħaddu għal sorsi ta’ enerġija sostenibbli u rinnovabbli;

39. Jemmen li t-taxxa tal-karbonju u r-reviżjoni tad-direttiva dwar it-tassazzjoni tal-enerġija għandhom jistabbilixxu rekwiżiti minimi mandatorji għall-Istati Membri kollha, u jħalluha fil-kompitenza ta’ kull Stat Membru biex jimxi ’l quddiem jekk dan jiddeċiedi li jkun xieraq;

40. Jenfasizza li għandhom jiġu stipulati perjodi ta’ tranżizzjoni adegwati sabiex tiġi evitata r-rilokazzjoni tal-karbonju u biex jiġi evitat li jintefax piż li ma jinfelaħx fuq konsumaturi bi dħul baxx; barra minn hekk, jikkunsidra li jkun utli li jkun hemm provvediment għal miżuri speċifiċi mmirati favur familji bi dħul baxx u jissaħħaħ l-investiment fl-infrastruttura tas-settur pubbliku u fl-effiċjenza tal-enerġija fid-djar;

41. Iqis, madankollu, li għandu jiġi esplorat b'mod sħiħ l-ambitu ta' ftehim globali fil-livell tal-G20 jew fi ħdan id-WTO qabel ma tiġi imposta tali taxxa fuq importazzjonijiet minn barra lejn l-UE sabiex jiġi żgurat li din l-għodda ta’ aġġustament ta’ tassazzjoni konfinali ma tirriżultax fi skarsezza ta' materja prima, fuq naħa waħda, u miżuri ta’ ritaljazzjoni minn pajjiżi terzi kontra l-esportazzjonijiet tal-UE, fuq in-naħa l-oħra;

42. Jistieden lill-Kummissjoni biex tirriċerka l-fattibilità ta’ taxxa miżjuda tal-karbonju Ewropea simili għall-VAT, imposta fuq kull prodott fis-suq intern, li taf tkun għodda b'inqas tgħawwiġ u iktar ġusta; jitlob lill-UE tqajjem il-kwistjoni ta' taxxa tal-karbonju globali sabiex teskludi l-iżvantaġġi kompetittivi għas-suq intern u ssaħħaħ il-ġlieda biex tiġi stabbilita produzzjoni tal-enerġija bla karbonju, sostenibbli u rinnovabbli;

43. Jiġbed l-attenzjoni, fid-dawl tat-talba dejjem akbar għall-enerġija fil-pajjiżi emerġenti, għall-ħtieġa imperattiva tal-UE li tagħmel investimenti adegwati fl-oqsma ta' provvista tal-enerġija u l-effiċjenza tal-enerġija li jsaħħu l-infrastruttura tal-enerġija tagħha u jnaqqsu kemm jista' jkun id-dipendenza fuq il-fluttwazzjonijiet tas-suq li jista' jkollhom konsegwenzi negattivi għall-ekonomija tal-UE u għall-miri UE 2020;

44. Jitlob lill-Istati Membri jikkunsidraw li jallokaw xi dħul mit-tassazzjoni tat-tibdil fil-klima biex jiffinanzjaw miżuri tal-iżvilupp u r-riċerka li jkollhom l-għan li jnaqqsu l-emissjoinijiet tal-karbonju u jiġġieldu t-tisħin globali, jistimulaw l-effiċjenza tal-enerġija, jittrattaw il-faqar tal-enerġija u jtejbu l-infrastruttura tal-enerġija fl-UE u fil-pajjiżi li qed jiżviluppaw; ifakkar, f'dan il-kuntest, li skont id-Direttiva dwar l-ETS tal-anqas 50% tad-dħul mill-irkanti tal-emissjonijiet tad-diossidu tal-karbonju fl-ETS tal-UE għandu jkun riservat għal miżuri li jikkumbattu t-tibdil fil-klima, inkluż fil-pajjiżi li qed jiżviluppaw;

45. Jinnota li l-istrumenti finanzjarji rotanti għal miżuri tal-effiċjenza tal-enerġija jirrappreżentaw mod inovattiv ta' finanzjament ta' proġetti favur l-ambjent; jilqa' l-introduzzjoni ta' faċilità finanzjarja speċifika li tista' wkoll tħajjar investituri privati (fil-qafas ta' sħubijiet bejn il-pubbliku u l-privat (PPPs)), li tuża fondi mhux impenjati mir-Regolament dwar Programm Ewropew tal-Enerġija għall-Irkupru (EEPR) biex jiġu appoġġati inizjattivi ta' effiċjenza tal-enerġija u enerġija rinnovabbli; jitlob lill-Kummissjoni tivvaluta bir-reqqa l-effikaċja ta' dan l-istrument u tanalizza l-potenzjal għall-applikazzjoni ta' approċċ simili, inklużi inizjattivi dwar l-enerġija, l-effiċjenza tal-enerġija u l-materja prima, għal fondi li fil-ġejjieni ma jkunux intefqu fil-baġit tal-UE;

46. Jinnota l-importanza tal-effiċjenza tal-enerġija u jħeġġeġ għalhekk lill-Kummissjoni u lill-Istati Membri jagħmlu użu effikaċi tal-Fondi Strutturali biex iżidu l-effiċjenza enerġetika fil-binjiet, b'mod partikolari fid-djar; jitlob li jkun hemm użu effikaċi tal-finanzjament mill-BEI u minn korpi oħra ta' finanzjament pubbliku, kif ukoll koordinament bejn il-fondi tal-UE u dawk nazzjonali u forom oħra ta' għajnuna li jistgħu jistimulaw l-investiment fl-effiċjenza tal-enerġija bl-għan li jintlaħqu objettivi tal-UE;

47. Ifakkar lill-Istati Membri dwar il-possibbiltà li japplikaw rati mnaqqsa tal-VAT għal servizzi li joffru titjib tad-djar u aktar effiċjenza tal-enerġija;

48. Jikkunsidra wkoll li l-użu ekonomiku tar-riżorsi kif ukoll l-innovazzjoni fit-teknoloġiji l-ħodor huma ta' importanza maġġuri f'termini ta' kompetittività;

49. Jenfasizza l-ħtieġa, hekk kif tiġi żviluppata u eventwalment introdotta tassazzjoni ġdida u innovattiva, ta' evalwazzjoni ġenerali, transkonfinali u transsettorjali ta’ tipi differenti ta’ finanzjament eżistenti u ppjanat, tassazzjoni u sussidji għall-attivitajiet ambjentali u klimatiċi, li tista' tissejjaħ id-'de Larosière tal-finanzjament ambjentali', sabiex jiġu mmirati dawn l-għodod ġodda b'mod iktar effikaċi u tiġi eliminata l-possibilità ta' politiki doppji u/jew konfliġġenti;

50. Jirrikonoxxi li taxxa tal-karbonju tkun strument biex jitnaqqsu l-emissjonijiet aktar milli sors ta’ dħul fuq perjodu ta’ żmien twil, minħabba li dan is-sors eventwalment jispiċċa jekk dak l-istrument ikun effettiv;

Finanzjament għall-iżvilupp

51. Jitlob affermazzjoni mill-ġdid min-naħa tal-Istati Membri rigwar l-impenn tagħhom li jallokaw 0.7% tad-dħul nazzjonali gross tagħhom għall-Għajnuna Uffiċjali għall-Iżvilupp (ODA); jiddeplora l-fatt li li filwaqt l-Istati Membri tal-UE kollha aċċettaw din il-mira ta’ 0.7% tal-GNI għall-infiq, l-Isvezja, il-Lussemburgu, id-Danimarka u l-Pajjiżi l-Baxxi biss laħqu jew qabżu din il-mira fl-2008;

52. Ifakkar li, minkejja l-kriżi globali, l-Unjoni Ewropea fit-totalità tagħha, inklużi l-Istati Membri tagħha, tibqa’ d-donatur ewlieni ta’ għajnuna għall-iżvilupp, billi tikkontribwixxi 56% tat-total dinji, li ammonta għal 49 biljun euro fl-2009, ammont li huwa kkonfermat mill-wegħda kollettiva tal-gvernijiet tal-UE li jallokaw 0.56% u 0.70% tad-Dħul Nazzjonali Gross għall-Għajnuna Uffiċjali għall-Iżvilupp sal-2010 u l-2015 rispettivament;

53. Jenfasizza l-importanza enormi tal-ġestjoni finanzjarja soda rigward l-għajnuna għall-iżvilupp u umanitarja kollha tal-UE, b'mod partikolari minħabba li l-istituzzjonijiet Ewropej involuti fit-teħid tad-deċiżjonijiet u fl-implimentazzjoni ta’ din l-għajnuna jridu jkunu kontabbli bis-sħiħ għaċ-ċittadini u l-kontributuri tat-taxxa Ewropej;

54. Jenfasizza li l-finanzjament innovattiv għall-iżvilupp jista’ jikkomplementa l-mekkaniżmi ta’ għajnuna tradizzjonali għall-iżvilupp u b'hekk jgħinhom jiksbu l-għanijiet tagħhom fil-ħin; ifakkar li l-istrumenti ta’ finanzjament innovattiv għandhom ikunu addizzjonali għall-mira tan-NU ta’ 0,7% tal-PDG iddedikat għall-korporazzjoni għall-iżvilupp; jenfasizza li l-finanzjament innovattiv għall-iżvilupp għandu jkun ikkaratterizzat mid-diversità tal-finanzjament sabiex jintlaħaq potenzjal massimu ta’ dħul, iżda għandu jkun imfassal ukoll bis-sħiħ għall-prijoritajiet ta’ kull pajjiż, bi sjieda qawwija tal-pajjiż; jenfasizza , fl-istess ħin, il-ħtieġa li l-pajjiżi li qed jiżviluppaw iżidu l-isforzi tagħhom stess fil-qasam tat-tassazzjoni, prinċipalment fir-rigward tal-ġbir tat-taxxi u l-ġlieda kontra l-evażjoni fiskali, li huma kruċjali biex tinkiseb politika fiskali soda;

55. Jenfasizza li t-twassil effettiv u ta’ kwalità għolja tal-għajnuna għall-iżvilupp jeħtieġ sforz partikolari firrigward tal-koordinazzjoni tad-donatur u l-arranġamenti ta' governanza; jemmen li l-indirizzar tal-problema ta’ frammentazzjoni fil-għajnuna Ewropea għall-iżvilupp, li tikkawża ineffiċjenzi b'konsegwenzi kemm finanzjarji kif ukoll politiċi, jista’ jġib qligħ permezz tal-effiċjenza stmat li jlaħħaq 6 biljun euro fis-sena għall-Istati Membri u jiffaċilita x-xogħol tal-amministrazzjonijiet tal-pajjiżi sħab;

56. Ifakkar li se jkunu meħtieġa USD 300 biljun biex jintlaħqu l-Għanijiet ta’ Żvilupp tal-Millennju sal-2015; jiddispjaċih mill-fatt li, minkejja d-dikjarazzjoni riċenti tagħhom fis-Samit ta’ Livell Għoli tan-Nazzjonijiet Uniti dwar l-Għanijiet ta' Żvilupp tal-Millennju f'Settembru 2010, maġġoranza tan-nazzjonijiet żviluppati għandhom ma onorawx l-impenn tagħhom għall-2005 li jżidu l-għajnuna għall-iżvilupp u jinnota li jrid isir sforz wisq aktar koordinat; jenfasizza li mhux aċċettabbli li l-mekkaniżmi ta' finanzjament innovattiv jafu jitqiesu li qed jinkoraġġixxu lil ċerti pajjiżi jirrifjutaw l-għajnuna uffiċjali għall-iżvilupp; jenfasizza li l-impenji tal-għajnuna uffiċjali għall-iżvilupp u l-mekkaniżmi ta' finanzjament innovattiv iridu jiġu mifhuma bħala essenzjali u komplementari fil-ġlieda kontra l-faqar;

57. Jenfasizza li s-superviżjoni pubblika u t-trasparenza ta' sistemi ta' finanzjament innovattiv huma sine qua non għall-introduzzjoni tagħhom, u jirriflettu l-lezzjonijiet tal-kriżi finanzjarja u dik tal-ikel li seħħew dan l-aħħar;

58. Jenfasizza l-bżonn urġenti li titjieb il-koordinazzjoni tal-UE fil-qasam tal-miżuri ta' ħolqien tal-ġid fis-swieq lokali u li l-promozzjoni ta' finanzjament innovattiv għall-iżvilupp m'għandhiex tiffoka biss fuq iż-żieda tat-taxxi imma għandha tesplora wkoll modi oħra, bħalma hu t-tkattir tad-dħul domestiku, li jista' jinkiseb l-aħjar permezz tar-rikonoxximent u l-protezzjoni tad-drittijiet ta' proprjetà, bil-kartografija tal-artijiet, u bit-titjib tal-ambjent tan-negozju u tal-investiment fil-pajjiżi li qed jiżviluppaw;

59. Ifakkar li l-mard pandemiku maġġuri - l-AIDS, it-tuberkulosi u l-malarja - li jolqot lill-pajjiżi li qed jiżviluppaw, u b’mod partikolari l-Afrika sub-Saħarjana, jikkostitwixxi sfida mill-akbar għall-Għanijiet ta' Żvilupp tal-Millennju; ifakkar f’dan il-kuntest li kontribuzzjoni ta’ solidarjetà imposta fuq il-biljetti tal-ajru hija għodda finanzjarja importanti għall-indirizzar tal-problemi tas-saħħa u waħda li teħtieġ tkompli tiġi żviluppata aktar; jistieden, b’mod partikolari, lill-Kummissjoni tkompli teżamina aktar il-mekkaniżmi ta’ finanzjament maħsuba biex jindirizzaw kwistjonijiet globali tas-saħħa, u tiffaċilita l-aċċess għall-mediċini fil-pajjiżi l-fqar;

60. Jinnota li t-tibdil fil-klima se jaffettwa lill-pajjiżi li qed jiżviluppaw b'mod partikolari, u huwa tal-fehma li l-finanzjament ta' miżuri biex itaffu l-impatt tat-tibdil fil-klima u jnaqqsu l-faqar tal-enerġija jkompli jikkontribwixxi għall-ilħiq tal-Għanijiet ta' Żvilupp tal-Millennju;

61. Jilqa’ l-fatt li d-Dikjarazzjoni Finali tas-Samit tan-NU dwar l-Għanijiet ta’ Żvilupp tal-Millennju, adottata fit-22 ta’ Settembru 2010, għall-ewwel darba tirreferi speċifikament għar-rwol tal-finanzjament innovattiv fl-ilħiq tal-Għanijiet ta’ Żvilupp tal-Millennju;

62. Jenfasizza s-suċċess li kellhom s’issa l-mekkaniżmi ta’ finanzjament innovattiv, partikolarment il-faċilità internazzjonali UNITAID għax-xiri ta’ sostanzi mediċinali, il-Faċilità Internazzjonali ta’ Finanzjament għall-Immunizzazzjoni (IFFIm) u l-impenn antiċipat tas-suq (AMC) għat-tilqim kontra l-marda tal-pnewmokokkus, li sal-ġurnata tal-lum tellgħu ’l fuq minn USD 2 biljun; jinnota li hemm mekkaniżmi oħra ta’ finanzjament innovattiv li taw prova tal-effettività tagħhom, pereżempju t-tpartit tad-dejn għan-natura (debt-for-nature swap) jew it-tpartit tad-dejn għas-saħħa (debt-for-health swap) jew it-taxxi tal-karburant tal-bastimenti;

63. Ifakkar fl-appoġġ sod mogħti minn għadd ta’ Kapijiet ta’ Stat jew ta' Gvern Ewropej għall-implimentazzjoni ta’ taxxa fuq it-tranżazzjonijiet finanzjarji waqt is-Samit tan-NU dwar l-Għanijiet ta’ Żvilupp tal-Millennju f’Settembru 2010 u jistenna azzjoni deċiżiva mingħandhom b’appoġġ għal dan l-impenn;

64. Jistieden lill-Istati Membri li għadhom mhumiex parti mill-grupp pilota dwar il-finanzjament innovattiv li ġie stabbilit fl-2006 jingħaqdu ma’ dan il-grupp u jipparteċipaw fil-mekkaniżmi eżistenti kollha, inkluża l-kontribuzzjoni ta’ solidarjetà fuq il-biljetti tal-ajru;

65. Iħeġġeġ lill-Kummissjoni tipproponi l-implimentazzjoni ta’ mekkaniżmi innovattivi ta’ finanzjament tal-iżvilupp fil-livell tal-UE;

66. Jistieden lill-gvernijiet tal-UE u lill-istituzzjonijiet jeżaminaw mill-qrib il-possibilità li tinħoloq lotterija mad-dinja kollha li tkun maħsuba biex tiffinanzja miżuri biex jiġi miġġieled il-ġuħ, kif propost mill-Programm Dinji tal-Ikel, fuq il-linji tal-Proġett tal-Ikel;

67. Hu tal-fehma li l-għajnuna uffiċjali għall-iżvilupp mhux se jirnexxielha teqred il-faqar jekk il-G20, l-UE u l-istituzzjonijiet finanzjarji ma jiħdux pożizzjoni determinata biex jopponu l-amministrazzjonijiet korrotti fil-pajjiżi li jirċievu l-għajnuna; jisħaq, għalhekk, fuq il-ħtieġa li jitgħolla l-livell tal-assistenza tal-UE fil-qasam tat-tisħiħ tal-awtoritajiet tat-taxxa, il-ġudikatura u l-aġenziji ta’ kontra l-korruzzjoni fil-pajjiżi li qed jiżviluppaw; iħeġġeġ lill-Istati Membri tal-UE jikkumbattu t-tixħim imwettaq mill-kumpaniji domiċiljati fil-ġurisdizzjonijiet tagħhom, imma li għandhom operazzjonijiet f’pajjiżi li qed jiżviluppaw;

68. Ifakkar li madwar EUR 800 biljun, jiġifieri 10 darbiet l-ammont tal-għajnuna uffiċċjali għall-iżvilupp, jintilfu kull sena mill-pajjiżi li qed jiżviluppaw permezz ta' prattiki illegali bħalma huma l-flussi ta’ kapital illegali u l-evażjoni fiskali, li l-prevenzjoni u t-tnaqqis tagħhom jisgħu jkunu deċiżivi biex jintlaħqu l-Għanijiet ta' Żvilupp tal-Millenju; iħeġġeġ lill-UE u lill-Istati Membri biex ipoġġu l-ġlieda kontra r-rifuġji fiskali, il-korruzzjoni u l-istrutturi fiskali dannużi fil-quċċata tal-aġenda tagħhom fil-fora internazzjonali kollha sabiex jagħmluha possibbli għall-pajjiżi li qed jiżviluppaw li jipproduċu dħul domestiku;

69. Ifakkar fir-responsabilità kollettiva li għandu l-G20 li jtaffi l-impatt tal-kriżi minn fuq il-pajjiżi li qed jiżviluppaw, li ntlaqtu ħażin ħafna mill-effetti indiretti tal-kriżi;

70. Iħeġġeġ li, sabiex tinkiseb trasparenza fl-Għajnuna Uffiċjali għall-Iżvilupp, għandha tiġi promossa r-responsabilizzazzjoni permezz tat-tisħiħ tal-mekkaniżmi nazzjonali ta' kontroll u l-iskrutinju parlamentari tal-għajnuna; jistieden lill-UE u lill-G20 jsegwu l-aġenda tagħhom li jieħdu azzjoni ħarxa kontra r-rifuġji fiskali u kontra s-segretezza fiskali, filwaqt li jippromwovu rappurtar pajjiż b'pajjiż;

71. Jistieden lill-Kunsill u lill-Kummissjoni jippromwovu u jaħdmu favur l-implimentazzjoni ta' strumenti ta' finanzjament innovattiv għall-iżvilupp bħal taxxa fuq it-tranżazzjonijiet finanzjarji, taxxi fuq it-trasport, miżuri kontra l-flussi ta’ kapital illegali u t-tnaqqis jew it-taffija tal-ispejjeż tar-rimessi;

72. Jinnota li l-kriżi ekonomika u finanzjarja se titfa’ ħafna pajjiżi li qed jiżviluppaw fi kriżi ġdida ta’ dejn, u jistieden lill-Kummissjoni u lill-Istati Membri jġeddu l-isforzi tagħhom sabiex itaffu l-piż tad-djun minn fuq il-pajjiżi li qed jiżviluppaw;

73. Ifakkar li l-pajjiżi li qed jiżviluppaw huma l-inqas mgħammra biex jiffaċċaw it-tibdil fil-klima, u, b’mod ġenerali, x’aktarx li jkunu l-vittmi prinċipali ta’ dan il-fenomenu; jitlob l-implimentazzjoni tal-wegħda finanzjarja tal-UE skont il-Qbil ta' Kopenħagen u fil-kuntest tal-Alleanza Globali Kontra t-Tibdil fil-Klima; iħeġġeġ lill-UE tassumi rwol ċentrali fl-inizjattivi konġunti mill-pajjiżi industrijalizzati billi tagħti kontribut akbar u aktar speċifiku lill-appoġġ għall-iżvilupp fit-tielet dinja, li lejha għandhom responsabilità storika;

74. Jagħti istruzzjonijiet lill-President tiegħu biex jgħaddi din ir-riżoluzzjoni lill-Kumitat għall-Isfidi tal-Politika tal-Parlament Ewropew, lill-Kummissjoni, lill-Kunsill Ewropew, lill-BEI, lill-BĊE, lill-FMI, u lill-Assemblea Parlamentari Konġunta AKP-UE.

(1) Testi adottati, P7_TA(2010)0056. (2) Testi adottati, P7_TA (2010)0376 (3) Testi adottati, P7_TA(2010)0336. (4) Testi adottati, P7_TA(2010)0334. (5) Testi adottati, P7_TA(2010)0337. (6) Testi adottati, P7_TA(2010)0339. (7) Testi adottati, P7_TA(2010)0335.

Il-qafas ġenerali li fi ħdanu qed isir id-dibattitu dwar finanzjament innovativ

Il-kriżi globali ekonomika u finanzjarja tal-2007-2009 kixfet id-dgħjufijiet severi tal-qafas regolatorju u superviżorju tas-sistema finanzjajrja globali. Tranżazzjonijiet finanzjarji llum huma karatterizzati b'żieda enormi fil-volum u b'diskrepanza notevoli bejn il-volum tat-tranżazzjonijiet finanzjarji u l-bżonnijiet sottostanti fid-"dinja reali". Barra minn hekk, mudelli ta' kummerċ ġodda bħalma huma investiment għal terminu qasir ta' żmien u kummerċ bi frekwenza kbira assumew rwol ċentrali fit-tendenzi finanzjarji globali u wasslu għal volatilità u teħid ta' riskju eċċesiv.

Jidher ċar li s-settur finanzjarju biddel sewwa r-rwol tiegħu ta' finanzjament tal-bżonnijiet tal-ekonomija reali għar-rwol ta' kisba ta' profitti f'terminu qasir ta' żmien permezz ta' operazzjonijiet li jistgħu jaffettaw severament il-prezzijiet tas-suq.

Fl-UE il-kriżi finanzjarj kienet segwita fl-2009-2010 minn kriżi fiskali li fattur importanti tagħha kienu l-pressjonijiet eċċessivi, u f'bosta każi mhux ġustifkati, tas-swieq kontra bonds nazzjonali. Darba kienu aktar it-tranżazzjonijiet għal terminu qasira ta' żmien u spekulattivi ħafna li kienu fil-qalba ta' dik il-kriżi u enfasizzaw ir-rabta ċara bejn regolamentazzjoni finanzjarja ineffiċjenti u s-susperviżjoni u s-sostenibilità tal-finanzi pubbliċi.

Il-problemi kkawżati minn din l-imġiba tas-swieq kellhom impatt sħiħ fuq finanzi u ċittadini madwar id-dinja, meta ntefqu triljuni ta' dollari meta faqqgħet il-kriżi sabiex isiru salvataġġi tal-atturi prinċipali tas-settur finanzjarju li kienu "kbar wisq biex jitħallew ifallu".

Il-ispejjeż ekonomiċi tal-kriżi għad iridu jiġu evalwati bis-sħiħ billi minbarra l-ispejjeż tas-salvataġġi, il-kriżi wasslet għal tnaqqis importanti fil-pass tal-ekonomija globali u kkawżat defiċits ta' gvernijiet tal-livelli mingħajr preċedenti (skont dejta tal-OECD għall-2010 id-daqs stmat tal-konsolidazzjoni fiskali huwa pproġġettat li jkun ta' bejn 300-370 biljun dollaru għas-snin li ġejjin).

Madankollu, dak li hu ċar sa issa hu li d-dinja u l-UE ma jistgħux jaffordjaw u ma'għandhomx jippermettu li jkun hemm kriżi oħra ta' daqs enormi simili. L-ewwel reazzjonijiet fil-livell globali (fis-samits tal-G20 li kien hemm wara li faqqgħet il-kriżi) iżda wkoll fil-livell tal-UE, kienu li jitkomplew bidliet regolatorji u superviżorji konkreti li jkunu jistgħu ifasslu ambjent finanzjarju aktar sikur u ma jħallux li jkun hemm kriżi simili fil-futur.

Iżda dan mhuwiex biżżejjed: illum min iħallas it-taxxi qed jassumni l-piż prinċipali tal-kriżi mhux biss permezz ta' kontribuzzjonijiet diretti, iżda wkoll minħabba l-qgħad li qed jiżdied, it-tnaqqis fid-dħul, anqas aċċess għas-servizzi soċjali u inugwaljanzi akbar.

Sabiex ikun hemm tweġibiet komprensivi u integrati għall-kriżi għandna bżonn għodod ġodda li jkunu jistgħu:

§ Irażżnu l-ispekulazzjoni u jerġgħu idaħħlu r-rwol prinċipali tas-settur finanzjarju sabiex ikopri l-bżonnijiet reali tal-ekonomija u jappoġġa l-investimenti għal terminu twil ta' żmien;

§ Jiggarantixxu distribuzzjoni ekwa tal-piż speċjalment bejn l-atturi finanzjarji kruċjali;

§ Joħolqu riżorsi addizzjonali sabiex jiffaċċaw l-isfidi kruċjali globali u Ewropej bħalma huma l-bidla fil-klima u l-għanijiet għall-iżvilupp u sabiex jinkiseb tkabbir akbar għal terminu twil ta' żmien fil-qafas tal-istrateġija EU 2020.

L-għażla ta' finanzjament innovattiv - "Il-Benefiċċju Doppju"

Sabiex nittattaw dawk it-tliet miriet għandna bżonn għodda li jistgħu jassumu rwoli multipli.

Għodod tradizzjonali ta' tassazzjoni, iffukati biss għall-ġbir ta' dħul, mhumiex suffiċjenti. Barra minn hekk, qtugħ fin-nefqiet pubbliċi u aktar żidiet fir-rati ta' tassazzjoni eżistenti ma jistgħux ikunu tweġiba sostenibbli meta titqies id-domanda attwali sabiex tingħata spinta għat-tkabbir globali u Ewropew. Aktar minn approċċ singolu ta' strateġija ta' awsterità, jeħtieġ li nagħżlu stimulu u f'dan is-sens id-diskussjoni dwar għodod ta' finanzjament innovattiv għandha ssir il-prijorità kruċjali tagħna.

Għodod ta' finanzjament innovattiv jistgħu jindirizzaw l-isfidi ta' llum għaliex fl-istess ħin jistgħu jassumu rwol regolatorju (pereżempju billi jsaħħu l-effiċjenza, it-trasparenza u l-istabilità tas-suq) u rwol biex jinġabar dħul (billi jiġġeneraw riżorsi ġodda u importanti għall-baġits tal-UE u l-baġits nazzjonali).

L-allokazzjoni ta' dħul addizzjonali

Dawk li jagħmlu l-politiki nazzjonali u tal-UE qed jiffukaw l-interess tagħhom fuq il-potenzjal ta' dħul li jirriżulta minn dawk l-għodod ġodda ta' finanzjament. Madankollu, ma rridux ninsew li biss wara li jintlaħaq ftehim dwar l-implimentazzjoni ta' għodda innovattiva nistgħu tabilħaqq niddiskutu b'mod konkret dwar id-dħul ġdid.

Hemm argumenti u għażliet differenti li jridu jsiru rigward il-ġestjoni ta' dak id-dħul. Madankollu, bħala prinċipju għandna naqblu li sabiex dawk l-għodod ta' finanzjament innovattiv ikollhom il-valur miżjud li għandna bżonn li jkollhom, parti sostanzjali ta' dak id-dħul għandu jkun allokat f'baġit tal-UE sabiex jiffinanzja proġetti u politiki tal-UE.

Wieħed ma jridx jinsa li l-punt kritiku llum huwa li jintlaħaq ftehim u jiġu implimentati għodod ta' finanzjament innovattiv; l-allokazzjoni tad-dħul għandu jiġi wara.

It-Tassazzjoni tas-Settur Finanzjarju

Kontra dak li japplika għal kwalunkwe industrija oħra li tipprovdi prodotti u servizzi għall-utent aħħari, is-settur finanzjarju fil-biċċa kbira tiegħu m'huwiex intaxxat. Fl-UE hemm approċċ ta' eżenzjoni ta' VAT bażika għall-attivitajiet finanzjarji bażiċi kollha. Sadanittant, l-attivitajiet finanzjarji kollha jlaħħqu mat-73.5% tal-PGD globali u għalhekk l-eżenzjoni tagħhom hija distorsjoni maġġuri tas-suq.

L-idea ta' tassazzjoni fuq tranżazzjonijiet finanzjarji (TTF) - diġà ssuġġerita sa mis-snin 1930 - tirrapreżenta vantaġġ importanti, speċjalment illum fiż-żmien ta' wara l-kriżi. Bl-impożizzjoni ta' TTF nistgħu inrażżnu l-ispekulazzjoni u nistabilizzaw is-swieq, nistgħu noħolqu inċentivi għal investimenti għal perjodu fit-tul ta' żmien, nistgħu noħolqu segwitu ta' verifika fuq kull tranżazzjoni u b'hekk insaħħu t-trasparenza, u nistgħu inġiegħlu lill-atturi finanzjarji jassumu s-sehem ekwu tagħhom għall-ispiża tal-kriżi. Barra minn hekk, billi l-potenzjal tad-dħul ta' TTF ta' 0.005% huwa kważi ta' 200 biljun Ewro fl-UE u ta' 650 biljun Ewro fil-livell globali, dan jista' jikkontribwixxi deċiżivament għall-bżonn ta' riżorsi godda u sostenibbli.

Il-kriżi globali kixfet l-bżonn għal tweġibiet globali u għalhekk l-introduzzjoni ta' skala globali ta' TTF hija naturalment l-aħjar mod biex nimxu 'l quddiem. Barra minn hekk, u minkejja l-fehmiet progressisti tas-samits tal-G20 eżattament wara l-kriżi, jidher li llum erġajna lura għal "business as usual". Jekk inħallu l-momentum jibqa' għaddej u nagħżlu li ma naġixxux, ma nkunux nistgħu nieħdu t-tagħlimiet tajbin mill-kriżi u nistgħu inlestu l-ekonomiji tagħna għal daqqa oħra fis-snin li ġejjin.

L-UE llum hija l-akbar suq finanzjarju fid-dinja u bħala tali huwa fl-interess tagħha stess li ma "tinħebiex" wara r-relluttanza tal-imsieħba internazzjonali tagħha u li tmexxi u turi t-triq hi, kemm fil-livell globali, kif ukoll fil-livell Ewropew.

L-evalwazzjoni tant mistennija tal-Kummissjoni tal-impatt dwar il-fattibilità ta' TTF - li diġà ntalbet mill-PE sa minn Marzu 2010 iżda li kienet nieqsa fil-Komunikazzjonijiet tal-Kummissjoni ta' April u Ottubru 2010 - għandha titressaq kemm jista' jkun malajr. Din għandha tikkostitwixxi l-ewwel pass lejn proposti leġiżlattivi għall-introduzzjoni ta' TTF tal-UE. Fl-istess ħin din tipprovdi mandat ċar għall-UE sabiex tagħmel pressjoni fil-livell ta' G20.

Dwar l-argument rigward ir-riskji possibli għall-kompetittività li jkunu kkawżati b'introduzzjoni unilaterali ta' TFF tal-UE, l-eżempji reċenti tat-taxxi tal-bolli tar-RU jew tat-TFF ta' Ħong Kong juru li TFF li tkun imfassla tajjeb tista' tittratta dan ir-riskju b'mod effiċjenti u tevita nuqqasijiet tat-tranżazzjonijiet. Barra minn hekk l-investituri mhumiex se jkunu tant lesti jagħżlu ġurisdizzjonijiet anqas magħrufa jew aktar dubjużi jekk l-ispiża ta' tranżazzjoni tkun baxxa. L-atturi prinċipali li jkollhom it-tentazzjoni li "jemigraw" ikunu kummerċjanti ta' tranżazzjonijiet fuq termini qasir estrem (li jassumu l-piż prinċipali), iżda wkoll jekk partijiet ta' tranżazzjonijiet għal terminu qasir joħorġu mill-UE, dan jista' jkun valur miżjud għall-ekonomija Ewropea.

L-elementi prinċipali ta' TTF għandhom ikunu:

§ Rata baxxa ta' bejn 0.01% u 0.05% sabiex ma jkunx hemm riskju importanti ta' nuqqasijiet tat-tranżazzjonijiet;

§ Bażi wiesgħa għat-taxxa li tinkludi kull tip ta' tranżazzjoni sabiex ikun jista' jkun hemm kundizzjonijiet ekwi għal kulħadd u jiġu evitati flussi lejn partijiet anqas regolati tas-settur finanzjarju;

§ Eżenzjonijiet u limiti massimi definiti b'mod ċar, hekk li tingħata kunsiderazzjoni għall-bżonnijiet ta' investituri żgħar u tal-imnut;

Flimkien mat-TTF, id-dibattittu attwali dwar tassazzjoni tas-settur finanzjarju jinkludi żewġ strumenti oħra: imposti fuq il-banek u Taxxa fuq Attivitajiet Finanzjarji (TAF).

It-tnejn li huma jidher li għandhom l-appoġġ tal-IMF u l-Kummissjoni. Mandankollu, apparti l-fatt li l-potenzjal ta' dħul tat-tnejn li huma huwa aktar baxx minn dak ta' TTF, il-karatteristika prinċipali fiż-żewġ każijiet huwa n-nuqqas ta' "valur regolatorju". La l-imposti fuq il-banek u lanqas it-TAF ma jistgħu jikkontribwixxu direttament biex irażżnu l-ispekulazzjoni u jsaħħu l-istabilità u l-effiċjenza tas-suq. Imposti fuq il-banek huma bbażati fuq pożizzjonijiet fuq il-karta tal-bilanċ li jħallu barra tranżazzjonijiet f'sistemi ta' banek paralleli u li huma dawk li jirrapreżentaw l-akbar riskju ta' leverage. TAF tikkostitwixxi tassazzjoni fuq profitti li jirriżultaw minn tranżazzjonijiet finanzjarji imma irrispettivament mill-"kwalità" tat-tranżazzjoni fiha nnifisha.

Għalhekk, ma tista' bl-ebda mod tikkostitwixxi alternattiva għal TTF. Kull wieħed minnhom jista' pero' jassumi rwol supplimentari:

Imposti fuq il-banek jaġixxu bħala għodda sabiex tiffinanzja fondi għar-risoluzzjoni ta' kriżijiet nazzjonali fis-settur bankarju hekk li jiżguraw li fil-każ li jkun hemm kriżi oħra l-ispejjeż tagħha jiġġarbu mis-settur innifsu.

It-TAF bħala għodda addizzjonali fil-każ li wara l-introduzzjoni ta' TTF ir-renti tas-settur finanzjarji jkomplu jkunu eċċessivament għoljin u l-prinċipju ta' ekwità ta' tassazzjoni jkunu jimplikaw taxxa addizzjonali.

L-Eurobonds

L-idea ta' strument finanzjarju Ewropew li jkun jippermetti ġestjoni komuni ta' djun permezz ta' tlaqqigħ konġunt ta' partijiet tad-dejn sovran ilu jiġi diskuss għal żmien twil. Madankollu, fid-dawl tal-kriżi finanzjarja u fiskali reċenti, il-bżonn tat-tisħiħ tal-governanza ekonomika u l-implimentazzjoni ta' għodod u mekkaniżmi permanenti sar aktar ċar minn qabel.

F'dan is-sens illum huwa aktar xieraq minn qatt qabel li ssir evalazzjoni fil-fond tal-impatt li tanalizza bis-sħiħ il-potenzjali differenti vis à vis Eurobonds.

Fl-istess ħin, saret konnessjoni tal-idea ta' Eurobonds mal-iffinanzjar ta' proġetti u infrastrutturi kruċjali fil-livell Ewropew. Dan huw potenzjal addizzjonali li nistgħu nilqgħu tajjeb u nitolbu li jkun inkluż fl-istudju ta' fattibilità msemmi qabel.

Billi l-Eurobonds issa qed jassumu rwol divers jkun ukoll ta' valur miżjud li tiġi evalwata bis-sħiħ il-possibilità li tiġi stabbilita istituzzjoni permanenti tal-UE li fuqha taqa' r-responsabbilità li toħroġ u ġġestixxi l-Eurobonds.

It-Tasazzjoni tas-settur tal-enerġija

Setturi bħas-settur tax-xogħol attwalment qed jassumu l-piż prinċipali tat-taxxi u setturi b'esternalitajiet importanti u negattivi bil-kontra mhumiex jassumu s-sehem ekwu tagħhom. Minbarra s-settur finanzjarju, is-settur ta' attivitajiet li jniġġsu l-ambjent jaqa' f'dik il-kategorija. Jeħtieġ li napplikaw il-prinċipju li min iniġġes iħallas sabiex il-piż tat-taxxi jgħaddi minn fuq spallejn il-ħaddiema għal fuq attivitajiet li jniġġsu.

Attwalment l-EU ETS tkopri biss partijiet speċifiċi tal-ekomomija Ewropea u prinċipalment is-setturi industrijali. Fl-istess ħin, id-Direttiva dwar Tassazzjoni tal-Enerġija ma tagħmilx differenza bejn servizzi b'kontenut għoli jew baxx ta' CO2 u lanqas ma tuża l-kriterju ta' kontenut ta' enerġija jew effiċjenza ta' energija. Dan l-approċċ newtrali jikkostitwixxi żvantaġġ dwar fjuwils li huma effiċjenti rigward enerġija, attivitajiet u prodotti bla karbonju u huwa kompletament inkonsistenti mal-għanijiet prinċipali rigward klima tal-UE,

Xi Stati Membri diġà ttrattaw din l-inkonsistenza fil-livell nazzjonali bl-introduzzjoni ta' taxxa tal-karbonju. Għalkemm għandna nilqgħu inizjattivi bħal dawn, hemm bżonn ta' approċċ sostanzjali tal-UE għall-funzjonament tas-suq intern,

Jeħtieġ li nirrevedu d-Direttiva dwar Tassazzjoni tal-Enerġija sabiex tinkludi l-kriterji tal-emissjonijiet ta' CO2 u kontenut tal-enerġija. Barra minn hekk, sabiex inħarsu l-kompetittività tas-suq intern tal-UE, għandhom jitqiesu bis-sħiħ għażliet differenti dwar prodotti mhux tal-UE li jidħlu fis-suq intern u li ma jkunux konformi ma' dawn il-kriterji. In-negozjar ta' Aġġustament ta' Tassazzjoni Konfinali fi ħdan il-qafas tad-WTO tista' tkun waħda mill-għażliet. Iżda l-aktar soluzzjoni komprensiva tkun li jkun hemm Taxxa Addizzjonali tal-Karbonju komuni tal-UE fuq kull prodott fis-suq Ewropew.

Izda dak li jrid jiġi kkunsidrat bis-sħiħ huwa li ebda waħda minn dawn l-għażliet m'għandha tkun ta' ħsara għal konsumaturi vulnerabbli u lanqas ma twassal għal forom ġodda ta' faqar fl-enerġija. L-eżempju reċenti tar-rifjut tal-qorti kostituzzjonali Franċiża ta' proposta għal taxxa tal-karbonju fuq il-bażi li dinkienet tqiegħed piz kbir wisq fuq il-familji huwa sinjal ċar li kwalunkwe proposta għandha tkun bilanċjata sew u jkollha s-salvagwardja ta' perjodu ta' tranżizzjoni ġust.

It-Tassazzjoni għall-Iżvilupp

Politiki ta' għajnuna għall-iżvilupp bħalma huma l-Għanijiet ta’ Żvilupp għall-Millennju jistgħu jużaw l-għodod innovattivi msemmija hawnfuq bħala sorsi ta' ġbir ta' dħul. Fl-istess ħin, hemm il-possibilitajiet ta' għodod ta' finanzjament innovattiv speċjalizzati li marbutin biss mal-politiki għall-iżvilupp bħalma huma l-proposta reċenti tal-Kummissjoni għal Mekkaniżmu ta’ Finanzjament Globali għall-Bidla fil-Klima favur il-pajjiżi li qed jiżviluppaw li huma l-ifqar u l-aktar vulnerablli, u l-imposti fuq biljetti tal-ajru. Fi kwalunkwe każ, dak li hu importanti hu li tiġi salvagwardata s-sjieda qawwija ta' pajjiż u allinjament sħiħ mal-prijoritajiet ta' kull pajjiż.

(*) Kumitati assoċjati – Artikolu 50 tar-Regoli ta' Proċedura

SUĠĠERIMENTI

Il-Kumitat għall-Iżvilupp jistieden lill-Kumitat għall-Affarijiet Ekonomiċi u Monetarji, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

1.  Ifakkar li se jkunu meħtieġa $300 biljun biex jintlaħqu l-Għanijiet ta’ Żvilupp tal-Millennju sal-2015; jiddispjaċih mill-fatt li, minkejja d-dikjarazzjoni riċenti tagħhom fis-Samit ta’ Livell Għoli tan-Nazzjonijiet Uniti dwar l-Għanijiet ta' Żvilupp tal-Millennju f'Settembru 2010, maġġoranza tan-nazzjonijiet żviluppati għandhom ma onorawx l-impenn tagħhom għall-2005 li jżidu l-għajnuna għall-iżvilupp u li jrid isir sforz wisq aktar koordinat; jenfasizza li mhux aċċettabbli li l-mekkaniżmi ta' finanzjament innovattiv x'aktarx jitqiesu li qed jinkoraġġixxu lil ċerti pajjiżi biex jirrifjutaw l-għajnuna uffiċjali għall-iżvilupp; jenfasizza li l-impenji tal-għajnuna uffiċjali għall-iżvilupp u l-mekkaniżmi tal-finanzjament innovattiv iridu jiġu mifhuma bħala essenzjali u kumplementari fil-ġlieda kontra l-faqar;

2.  Jenfasizza li s-superviżjoni pubblika u t-trasparenza ta' sistemi innovattivi tal-finanzjament huma kundizzjoni sine qua non għall-introduzzjoni tagħhom, li jinkorporaw il-lezzjonijiet tal-kriżijiet finanzjarji u tal-ikel li seħħew dan l-aħħar;

3.  Jenfasizza l-bżonn urġenti li titjieb il-koordinazzjoni tal-UE fil-qasam tal-miżuri ta' ħolqien tal-ġid fis-swieq lokali u li l-promozzjoni tal-finanzjament innovattiv għall-iżvilupp m'għandux jinsab biss f'żieda tat-taxxi imma għandha tesplora wkoll modi oħra, bħalma hu t-tkattir tad-dħul domestiku, ħaġa li tista' tinkiseb l-aħjar permezz tar-rikonoxximent u l-protezzjoni tad-drittijiet ta' proprjetà, it-tfassil ta' mapep tal-artijiet, u t-titjib tal-ambjent tan-negozju u tal-investiment tal-pajjiżi li qed jiżviluppaw;

4.  Ifakkar li l-mard pandemiku maġġuri - l-AIDS, it-tuberkulosi u l-malarja - li jolqot lill-pajjiżi li qed jiżviluppaw, u b’mod partikolari l-Afrika sub-Saħarjana, jikkostitwixxi sfida mill-akbar għall-Għanijiet ta' Żvilupp tal-Millennju; ifakkar f’dan il-kuntest li kontribuzzjoni ta’ solidarjetà imposta fuq il-biljetti tal-ajru hija għodda finanzjarja importanti għall-indirizzar tal-problemi tas-saħħa u waħda li teħtieġ tkompli tiġi żviluppata aktar; jistieden, b’mod partikolari, lill-Kummissjoni tkompli teżamina aktar il-mekkaniżmi ta’ finanzjament maħsuba biex jindirizzaw kwistjonijiet globali tas-saħħa, u tiffaċilita l-aċċess għall-mediċina fil-pajjiżi l-fqar;

5.  Jinnota li l-objettiv fundamentali tal-mekkaniżmi ta' finanzjament innovattiv, bħalma hija taxxa internazzjonali fuq it-tranżazzjonijiet finanzjarji jew sehem mid-dħul iġġenerat mill-irkant tal-emissjonijiet tal-karbonju, huwa l-allokazzjoni ta' riżorsi finanzjarji addizzjonali, barra mill-għajnuna pubblika għall-iżvilupp, sabiex jiġu ffaċċjati l-isfidi dinjija l-kbar fil-qasam tat-tibdil fil-klima u l-politika tal-iżvilupp, u b’hekk possibilment jgħinuna nilħqu l-Objettivi ta' Żvilupp tal-Millennju u nħabbtu wiċċna mat-tibdil fil-klima; jinnota li dawn il-mekkaniżmi jagħmluha possibbli li nistrieħu fuq riżorsi aktar stabbli li huma ajtar prevedibbli mill-għajnuna pubblika għall-iżvilupp u huma adattati partikolarment għas-servizzi mhux finanzjarji li huma essenzjali għall-iżvilupp bħas-saħħa u l-edukazzjoni;

6.  Jilqa’ b’soisfazzjon il-fatt li d-Dikjarazzjoni Finali tas-Samit tan-NU dwar l-Għanijiet ta’ Żvilupp tal-Millennju, adottata fit-22 ta’ Settembru 2010, għall-ewwel darba tirreferi speċifikament għar-rwol tal-finanzjament innovattiv bil-għan li jitwettqu l-Għanijiet ta’ Żvilupp tal-Millennju;

7.  Jenfasizza s-suċċess li kellhom s’issa l-mekkaniżmi ta’ finanzjament innovattiv, partikolarment il-faċilità internazzjonali UNITAID għax-xiri ta’ sostanzi mediċinali, il-Faċilità Internazzjonali ta’ Finanzjament għall-Immunizzazzjoni (IFFIm) u l-impenn antiċipat tas-suq (AMC) għat-tilqim kontra l-mard tal-pnewmokokkus, li sal-ġurnata tal-lum tellgħu ’l fuq minn USD 2 biljun; jinnota li hemm mekkaniżmi oħra ta’ finanzjament innovattiv li taw prova tal-effettività tagħhom, pereżempju t-tpartit tad-dejn għan-natura (debt-for-nature swap) jew it-tpartit tad-dejn għas-saħħa (debt-for-health swap) jew it-taxxi tal-fjuwil tal-banker;

8.  Jinnota li għadd ta’ Stati Membri wrew ruħhom favur li ssir taxxa fuq is-servizzi finanzjarji;

9.  Ifakkar fl-appoġġ sod mogħti minn għadd ta’ Kapijiet ta’ Stat jew ta' Gvern Ewropej għall-implimentazzjoni ta’ taxxa fuq it-tranżazzjonijiet finanzjarji waqt is-Samit tan-NU dwar l-Għanijiet ta’ Żvilupp tal-Millennju f’Settembru 2010 u jistenna azzjoni deċiżiva mingħandhom b’appoġġ għal dan l-impenn;

10. Jistieden lill-Istati Membri li għadhom mhumiex parti mill-grupp pilota dwar il-finanzjament innovattiv li ġie stabbilit fl-2006 jingħaqdu ma’ dan il-grupp u jipparteċipaw fil-mekkaniżmi eżistenti kollha, inkluża l-kontribuzzjoni ta’ solidarjetà fuq il-biljetti tal-ajru;

11. Iħeġġeġ lill-Kummissjoni tipproponi l-implimentazzjoni ta’ mekkaniżmi innovattivi ta’ finanzjament tal-iżvilupp fil-livell tal-UE;

12. Jistieden lill-gvernijiet tal-UE u lill-istituzzjonijiet jeżaminaw mill-qrib il-possibilità li tinħoloq lotterija mad-dinja kollha li tkun maħsuba biex tiffinanzja miżuri biex jiġi miġġieled il-ġuħ, kif propost mill-Programm Dinji tal-Ikel, fis-sura tal-Proġett tal-Ikel;

13. Hu tal-fehma li l-għajnuna uffiċjali għall-iżvilupp mhux se jirnexxilha teqred il-faqar jekk il-G20, l-UE u l-istituzzjonijiet finanzjarji ma jiħdux pożizzjoni determinata biex jopponu l-amministrazzjonijiet korrotti fil-pajjiżi li jirċievu l-għajnuna; jisħaq, għalhekk,,fuq il-ħtieġa li jitgħolla l-livell tal-assistenza tal-UE fir-rigward tat-tisħiħ tal-awtoritajiet tat-taxxa, il-ġudikatura u l-aġenziji ta’ kontra l-korruzzjoni fil-pajjiżi li qed jiżviluppaw; iħeġġeġ lill-Istati Membri tal-UE jikkumbattu t-tixħim kommess mill-kumpaniji domiċiljati fil-ġurisdizzjonijiet tagħhom imma li għandhom operazzjonijiet f’pajjiżi li qed jiżviluppaw;

14. Iqis li madwar EUR 800 biljun, i.e. 10 darbiet daqs l-għajnuna uffiċċjali għall-iżvilupp, jintilfu kull sena mill-pajjiżi li qed jiżviluppaw b'mezzi illegali bħall-flussi ta’ kapital illeġittimi u l-evażjoni tat-taxxa, li l-prevenzjoni u t-tnaqqis tagħhom jisgħu jkunu deċiżivi biex jintlaħqu l-Għanijiet ta' Żvilupp tal-Millenju; iħeġġeġ lill-UE u lill-Istati Membri biex ipoġġu l-ġlieda kontra r-rifuġji fiskali, il-korruzzjoni u l-istrutturi fiskali dannużi fil-quċċata tal-aġenda tagħhom fil-fora internazzjonali kollha sabiex jagħmluha possibbli għall-pajjiżi li qed jiżviluppaw li jipproduċu dħul domestiku;

15. Ifakkar fir-responsabilità kollettiva li għandu l-G20 li jtaffi l-impatt tal-kriżi minn fuq il-pajjiżi li qed jiżviluppaw, li ntlaqtu ħażin ħafna mill-effetti indiretti tal-kriżi; ifakkar, barra minn hekk, li għalkemm il-kriżi finanzjarja tal-2008 ġiet ikkawżata minn nuqqas ta’ regolazzjoni u minn eċċessi fis-settur finanzjarju, is-servizzi finanzjarji huma eżentati mill-VAT; jilqa’, konsegwentement, il-proposta tal-Kummissjoni li fil-programm ta’ ħidma tagħha tal-2011 tikkunsidra taxxa fuq l-attivitajiet finanzjarji (FAT) bħala reazzjoni għall-isfidi globali u Ewropej;

16. Iħeġġeġ li, sabiex tinkiseb it-trasparenza fl-għajnuna uffiċjali għall-iIżvilupp, tiġi promossa r-responsabilizzazzjoni permezz tat-tisħiħ tal-mekkaniżmi nazzjonali ta' kontroll u tal-iskrutinju parlamentari tal-għajnuna; jistieden lill-UE u lill-G20 jsegwu l-aġenda tagħhom li jieħdu azzjoni ħarxa kontra r-rifuġji fiskali u kontra s-segretezza fiskali, filwaqt li jippromwovu rappurtar pajjiż b'pajjiż;

17. Jistieden lill-Kunsill u lill-Kummissjoni jippromwovu u jaħdmu favur l-implimentazzjoni ta' strumenti ta' finanzjament innovattiv għall-iżvilupp bħal taxxa fuq it-tranżazzjonijiet finanzjarji, taxxi fuq it-trasport, il-ġlieda kontra l-flussi ta’ kapital illegali u t-tnaqqis jew it-taffija tal-ispejjeż tar-rimessi;

18. Jinnota li l-kriżi ekonomika u finanzjarja se titfa’ ħafna pajjiżi li qed jiżviluppaw fi kriżi ġdida ta’ dejn, u jistieden lill-Kummissjoni u lill-Istati Membri jġeddu l-isforzi tagħhom sabiex itaffu l-piż tad-djun minn fuq il-pajjiżi li qed jiżviluppaw;

19. Ifakkar li l-pajjiżi li qed jiżviluppaw huma l-inqas mgħammra biex jiffaċċaw it-tibdil fil-klima, u, b’mod ġenerali, x’aktarx li jkunu l-vittmi prinċipali ta’ dan il-fenomenu; iħeġġeġ l-implimentazzjoni tal-wegħda finanzjarja tal-UE skont il-Qbil ta' Kopenħagen u l-Alleanza Globali Kontra t-Tibdil fil-Klima; iħeġġeġ lill-UE tassumi rwol ċentrali fl-inizjattivi konġunti mill-pajjiżi industrijalizzati billi tagħti kontribut akbar u aktar speċifiku lill-appoġġ għall-iżvilupp fit-tielet dinja, li lejha għandhom responsabilità storika.

RIŻULTAT TAL-VOTAZZJONI FINALI FIL-KUMITAT

SUĠĠERIMENTI

Il-Kumitat għall-Industrija, ir-Riċerka u l-Enerġija jistieden lill-Kumitat għall-Affarijiet Ekonomiċi u Monetarji, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

1.  Jinnota li implimentazzjoni b'suċċess tal-miri fil-pakkett tal-enerġija u l-klima tirrikjedi impenn finanzjarju sostanzjali, b'mod partikolari investiment fl-innovazzjoni u r-riċerka, u modi ġodda ta' kif jiġi ssupplimentat il-finanzjament eżistenti għal inizjattivi dwar it-tibdil fil-klima, l-enerġija u l-isfidi tal-provvista tal-materja prima; jenfasizza, għalhekk, il-valur miżjud tal-adozzjoni ta' strumenti finanzjarji ġodda li jaqdu għan doppju billi jsibu bilanċ bejn, minn naħa waħda, il-ħolqien ta' riżorsi ġodda meħtieġa u, min-naħa l-oħra, il-formulazzjoni ta' politiki bażiċi dwar il-funzjonament tas-swieq, l-iżvilupp sostenibbli, is-sigurtà tal-provvista tal-enerġija u t-tibdil fil-klima; jilqa', f'dan ir-rigward, l-isforzi tal-Kummissjoni biex issib mezzi innovattivi għal-finanzjament u jinkoraġġixxi lil-Istati Membri jesploraw modi kif jistgħu jibdlu s-sistemi tat-tassazzjoni b'tali mod li jkunu bbażati fuq l-emissjonijiet tal-karbonju, minħabba li dan joħloq sew introjtu għall-awtoritajiet baġitarji kif ukoll inċentivi favur il-klima għall-konsumaturi u għall-industrija, u b'hekk inaqqas l-emissjonijiet tal-karbonju fl-ambjent; jenfasizza l-importanza tar-riprijotizzazzjoni tal-mezzi eżistenti u ta' qafas regolatorju adegwat li jinċentiva l-investiment privat;

2.   Jiġbed l-attenzjoni, fid-dawl tat-talba dejjem akbar għall-enerġija fil-pajjiżi emerġenti, għall-ħtieġa imperattiva tal-UE li tagħmel investimenti fil-provvista tal-enerġija u l-effiċjenza tal-enerġija li jsaħħu l-infrastruttura tal-enerġija tagħha u jnaqqsu kemm jista' jkun id-dipendenza fuq il-fluttwazzjonijiet tas-suq li jistgħu jkollhom konsegwenzi negattivi fuq l-ekonomija tal-UE u fuq l-ilħiq tal-miri UE 2020;

3.   Jinnota li t-tibdil fil-klima se jaffettwa lill-pajjiżi li qed jiżviluppaw b'mod partikolari, u huwa tal-fehma li l-finanzjament ta' miżuri biex itaffu l-impatt tat-tibdil fil-klima u jnaqqsu l-faqar tal-enerġija jkompli jikkontribwixxi għall-ilħiq tal-Għanijiet tal-Millennju għall-Iżvilupp;

4.  Jirrikonoxxi li f'xi Stati Membri diġà jeżistu forom ta' taxxi tal-karbonju u jwissi dwar ir-riskju li dan jirrappreżenta għall-kompetizzjoni fis-suq uniku; jemmen li jkun hemm benefiċjju akbar jekk l-introduzzjoni tat-tassazzjoni tal-karbonju ssir b'mod koordinat, abbażi ta' evalwazzjoni tal-aqwa prattiki tal-Istati membri kif ukoll valutazzjoni komprensiva tal-impatt; jitlob lill-Kummissjoni tirrakkomanda strumenti possibbli li jikkoordinaw it-tassazzjoni tal-karbonju għas-setturi li mhumiex fl-iskema tal-iskambju tal-kwoti tal-emissjonijiet (ETS) fil-livell tal-UE li jistgħu jkunu bbażati fuq rati minimi tal-UE; jitlob lill-Istati Membri biex jinformaw lill-Istati Membri l-oħra fil-Kunsill qabel ma jadottaw miżuri unilaterali;

5.   Jinnota li ċ-ċaqliq tal-piż tat-tassazzjoni għal fuq attivitajiet tat-tniġġis jista', fit-tul, inaqqas taxxi oħra u l-kosts tax-xogħol, biex b'hekk tikber il-kompetittività tal-UE;

6.   Jitlob lill-Istati Membri jikkunsidraw li jallokaw xi dħul mit-tassazzjoni tat-tibdil fil-klima biex jiffinanzjaw miżuri tal-iżvilupp u r-riċerka li jkollhom l-għan li jnaqqsu l-emissjoinijiet tal-karbonju u jiġġieldu t-tisħin globali, jistimulaw l-effiċjenza tal-enerġija, jittrattaw il-faqar tal-enerġija u jtejbu l-infrastruttura tal-enerġija tal-UE u fil-pajjiżi li qed jiżviluppaw; ifakkar, f'dan il-kuntest, li skont id-Direttiva dwar l-ETS tal-anqas 50% tad-dħul mill-irkanti tal-emissjonijiet tad-diossidu tal-karbonju fl-ETS tal-UE għandu jkun riservat għal miżuri li jikkumbattu t-tibdil fil-klima, inklużi fil-pajjiżi li qed jiżviluppaw;

7.  Jinnota li strumenti finanzjarji rotanti għal miżuri tal-effiċjenza tal-enerġija jirrappreżentaw mod inovattiv ta' finanzjament għal proġetti favur l-ambjent; jilqa' l-introduzzjoni ta' faċilità finanzjarja speċifika li tista' wkoll tħajjar investituri privati (fil-qafas ta' sħubijiet bejn il-pubbliku u l-privat (PPPs)) biex jużaw fondi mhux impenjati mir-Regolament EEPR għal-appoġġ ta' inizjattivi dwar l-effiċjenza tal-enerġija u dwar l-enerġija li tiġġedded; jitlob lill-Kummissjoni tivvaluta bir-reqqa l-effikaċja ta' dan l-istrument u tanalizza l-potenzjal għall-applikazzjoni ta' approċċ simili, inklużi inizjattivi dwar l-enerġija, l-effiċjenza tal-enerġija u l-materja prima, għal fondi li fil-ġejjieni ma jkunux minfuqa fil-baġit tal-UE;

8.   Jinnota l-merti potenzjali ta' "bonds tal-proġetti tal-UE" għall-finanzjament ta' infrastrutturi ġodda, inkluża dik tal-enerġija, li jistgħu jkollhom valur miżjud Ewropew; jitlob, madankollu, lill-Kummissjoni u lill-Bank Ċentrali Ewropew jinvestigaw l-impatt ta' tali bonds fuq is-swieq finanzjarji, it-trasparenza, it-teħid ta' riskji u r-responsabbiltà fis-suq kif ukoll l-implikazzjonijiet baġitarji għall-Istati Membri tal-finanzjament ta' proġetti infrastrutturali kritiċi permezz ta' bonds tal-proġetti tal-UE jew ta' Euro-bonds, speċjalment fejn dawn il-proġetti infrastrutturali jkollhom impatt transnazzjonali;

9.   Jilqa' l-isforzi magħmula mill-Kummissjoni u mill-Istati Membri biex jinvestigaw modi innovattivi ta' kif jistgħu jilħqu investiment fl-infrastuttura Ewropea u jindukraw l-innovazzjoni; jinnota l-kummenti tal-BEI fit-23 ta' Settembru 2010 fir-rapport tiegħu "Rapport dwar l-Azzjoni meħuda b'reazzjoni għar-Riżoluzzjoni tal-Parlament Ewropew" dwar il-proposta tal-Kummisjsoni Ewropea li żżid b'10% jew 20% l-volum tal-baġit tal-UE allokat, permezz ta' strumenti finanzjarji, għal-"leveraging" ta' fondi; jirrikonoxxi l-ħtieġa għal investiment fis-settur pubbliku biex jikkomplementa u jtejjeb il-finanzjament tas-settur privat fejn dan ikun possibbli, iżda huwa konxju li l-użu ta' vetturi għal-finijiet speċjali għall-finanzjament tal-proġetti jista' jwassal għal aktar obbigazzjonijiet mhux fuq il-karta tal-bilanċ kif ukoll għal żieda tal-kost tal-kapital għall-istituzzjonijiet Ewropej, għall-Unjoni Ewropea jew għall-Istati Membri; jemmen li miżuri bħal dawn għandhom ikunu akkumpanjati minn żvelar għalkollox trasparenti b'linji gwida, ġestjoni tar-riskju, limiti tal-espożizzjoni, proċeduri ta' skrutinju u sorveljanza adegwati, li lkoll għandhom jiġu stabbiliti b'mod demokratikament responsabbli;

10. Jinnota l-importanza tal-effiċjenza tal-enerġija u għaldaqstant iħeġġeġ lill-Kummissjoni u lill-Istati Membri jagħmlu użu effikaċi tal-fondi strutturali biex ikabbru l-effiċjenza tal-enerġija fil-binjiet. b'mod partikolari fir-residenzi; jitlob li jkun hemm użu effikaċi tal-finanzjament mill-BEI u minn korpi oħra tal-finanzjament pubbliku, kif ukoll koordinament bejn fondi tal-UE u dawk nazzjonali u forom oħra ta' għajnuna li jistgħu jiksbu "leveraging" tal-investiment bil-għan li jintlaħqu objettivi tal-UE;

11. Ifakkar lill-Istati Membri dwar il-possibbiltà li japplikaw rati mnaqqsa tal-VAT għal servizzi li joffru titjib tad-djar u aktar effiċjenza tal-enerġija;

12 Huwa tal-fehma li kwalunkwe inizjattiva tal-UE fil-qasam tal-attività finanzjarja għandha tiġi vvalutata sewwa mil-lat tal-implikazzjonijiet tagħha għall-ekonomija reali f'dak li jirrigwarda kif il-kosts jingħaddew 'l isfel u l-aċess għall-finanzjament; jinnota t-tħassib dwar il-possibbiltà li miżuri unilaterali għall-ġlieda kontra t-tibdil fil-klima jaffettwaw il-kompetittività tal-industriji Ewropej; iqis ukoll li l-użu ekonomiku tar-riżorsi u l-innovazzjoni f'teknoloġiji ħodor huma ta' importanza maġġuri f'dak li jirrigwarda l-kompetittività;

13. Jenfasizza li strumenti innovattivi għandhom jintużaw biex jappoġġaw sħubijiet bejn il-pubbliu u l-privat u għandhom jitqiesu bħala alternattiva għall-infiq pubbliku pur bħala mezz biex isir "leveraging" tal-fondi u biex jiġu inidirizzati fallimenti tas-suq.

RIŻULTAT TAL-VOTAZZJONI FINALI TAL-KUMITAT