dwar il-ġestjoni attwali u futura tas-sajd fil-Baħar l-Iswed

(2010/2113(INI))

Il-Parlament Ewropew,

–   wara li kkunsidra t-Trattat dwar il-Funzjonament tal-Unjoni Ewropea (TFUE) u r-riżoluzzjoni tiegħu tas-7 ta' Mejju 2009 dwar l-irwol u r-responsabilitajiet ġodda tal-Parlament fl-implimentazzjoni tat-Trattat ta' Lisbona(1),

–   wara li kkunsidra r-riżoluzzjoni tiegħu tal-20 ta' Jannar 2011 dwar strateġija tal-UE għall-Baħar l-Iswed(2),

–   wara li kkunsidra r-riżoluzzjoni tiegħu tal-25 ta' Frar 2010 dwar il-Green Paper tal-Kummissjoni dwar ir-riforma tal-politika komuni tas-sajd (COM(2009)0163)(3),

–   wara li kkunsidra r-riżoluzzjoni tiegħu tal-21 ta' Ottubru 2010 intitolata "Il-politika marittima integrata – evalwazzjoni tal-progress li sar u sfidi ġodda"(4),

–   wara li kkunsidra r-Regolament tal-Kunsill (UE) Nru 1256/2010 tas-17 ta' Diċembru 2010 li jistabbilixxi l-opportunitajiet tas-sajd għal ċerti stokkijiet tal-ħut applikabbli fil-Baħar l-Iswed għall-2011(5),

–   wara li kkunsidra d-Direttiva tal-Kunsill 1992/43/KEE tal-21 ta' Mejju 1992 dwar il-konservazzjoni tal-habitat naturali u tal-fawna u tal-flora selvaġġa(6),

–   wara li kkunsidra d-Direttiva 2008/56/KE tal-Parlament Ewropew u tal-Kunsill tas-17 ta' Ġunju 2008 li tistabbilixxi Qafas għal Azzjoni Komunitarja fil-qasam tal-Politika tal-Ambjent Marin (Direttiva Kwadru dwar l-Istrateġija Marina)(7),

–   wara li kkunsidra l-Komunikazzjoni mill-Kummissjoni intitolata "Politika Marittima Integrata għall-UE" (COM(2007)0575),

–   wara li kkunsidra l-Konvenzjoni tal-1992 dwar il-protezzjoni tal-Baħar l-Iswed mit-tniġġis (Il-Konvenzjoni ta' Bukarest) u l-protokolli tagħha,

–   wara li kkunsidra d-Dikjarazzjoni Ministerjali tal-1993 dwar il-protezzjoni tal-Baħar l-Iswed (Id-Dikjarazzjoni ta' Odessa),

–   wara li kkunsidra l-analiżi dijanjostika transkonfinali tal-Baħar l-Iswed tal-2007(8),

–   wara li kkunsidra r-rapport tal-Kummissjoni tal-2008 dwar l-istat tal-ambjent tal-Baħar l-Iswed rigward il-Protezzjoni tal-Baħar l-Iswed mit-Tniġġis,

–   wara li kkunsidra l-pjan ta' azzjoni strateġiku tal-Kummissjoni tal-2009 għall-protezzjoni ambjentali u r-riabilitazzjoni tal-Baħar l-Iswed rigward il-Protezzjoni tal-Baħar l-Iswed mit-Tniġġis,

–   wara li kkunsidra l-Konvenzjonijiet tan-Nazzjonijiet Uniti tal-1982 dwar il-liġi tal-baħar,

–   wara li kkunsidra l-Ftehim tan-Nazzjonijiet Uniti għall-implimentazzjoni tad-dispożizzjonijiet tal-Konvenzjoni tal-10 ta' Diċembru 1982 dwar il-konservazzjoni u l-immaniġġjar ta' stokkijiet ta' ħut transżonali u stokkijiet ta' ħut li jpassi ħafna,

–   wara li kkunsidra l-Ftehim dwar l-implimentazzjoni tal-Parti XI tal-Konvenzjoni dwar il-liġi tal-baħar,

–   wara li kkunsidra l-Kodiċi ta' Kondotta tal-FAO tal-1995 għal sajd responsabbli,

–   wara li kkunsidra l-Konvenzjoni tan-Nazzjonijiet Uniti tal-1992 dwar id-diversità bijoloġika,

–   wara li kkunsidra l-Konvenzjoni tan-Nazzjonijiet Uniti dwar il-kummerċ internazzjonali ta' speċijiet fil-periklu,

–   wara li kkunsidra l-Konvenzjoni tan-Nazzjonijiet Uniti dwar l-artijiet mistagħdra ta' importanza internazzjonali partikolarment bħala ħabitats tal-għasafar tal-ilma (Il-Konvenzjoni ta' Ramsar),

–   wara li kkunsidra l-Konvenzjoni tal-1979 dwar il-konservazzjoni tal-ispeċijiet migratorji tal-annimali selvaġġi (Il-Konvenzjoni ta' Bonn),

–   wara li kkunsidra l-Ftehim dwar il-konservazzjoni taċ-ċetaċji tal-Baħar l-Iswed, tal-Baħar Mediterran u taż-żona Atlantika kontigwa (ACCOBAMS),

–   wara li kkunsidra l-Ftehim tan-Nazzjonijiet Uniti tal-1995 dwar l-istokkijiet tal-ħut,

–   wara li kkunsidra r-rapport tal-2008 intitolat "It-tisħiħ tal-kooperazzjoni fil-Baħar l-Iswed" tat-tnejn u tletin sessjoni tal-Kummissjoni Ġenerali għas-Sajd fil-Mediterran (GFCM),

–   wara li kkunsidra l-istudju reġjonali tal-2009 tal-GFCM dwar tonn żgħir fil-Mediterran, inkluż il-Baħar l-Iswed,

–   wara li kkunsidra l-Organizzazzjoni tal-Kooperazzjoni Ekonomika tal-Baħar l-Iswed,

–   wara li kkunsidra d-Dikjarazzjoni konġunta tas-Summit tas-Sħubija tal-Lvant li sar fi Praga fis-7 ta' Mejju 2009 (Id-Dikjarazzjoni ta' Praga),

–   wara li kkunsidra l-Artikolu 48 tar-Regoli ta' Proċedura tiegħu,

–   wara li kkunsidra r-rapport tal-Kumitat għas-Sajd (A7-0236/2011),

A. billi d-dibattitu dwar ir-riforma tal-Politika Komuni tas-Sajd (PKS) fl-UE għadu għaddej, u billi għandu jqis l-ispeċifiċitajiet u l-ħtiġijiet ta' dan il-baħar, għaliex din se tkun l-ewwel riforma tal-PKS li tinkorpora l-Baħar l-Iswed,

B.  billi sal-lum kien hemm ftit wisq kollaborazzjoni u kooperazzjoni, jekk mhux saħansitra ineżistenti, nuqqas ta' qafas leġiżlattiv konkret u armonizzat u nuqqas ta' att leġiżlattiv komuni li jirregola l-attivitajiet tas-sajd bejn l-istati tal-Baħar l-Iswed, minħabba l-fatt li l-ilmijiet kollha jaqgħu taħt il-ġurisdizzjoni ta' stati kostali differenti, kif ukoll minħabba n-nuqqas ġenerali ta' riċerka xierqa u sistematika u ta' informazzjoni xjentifika dwar il-baċin tal-Baħar l-Iswed,

C. billi l-ġestjoni tas-sajd fil-Baħar l-Iswed hija diffiċli ferm, għaliex tnejn biss mis-sitt pajjiżi madwar il-baċin huma Stati Membri tal-UE, u anke dawk it-tnejn huma Stati Membri ġodda li ilhom biss membri tal-UE mill-2007,

D. billi l-ħolqien ta' mekkaniżmu ta' politika komuni għas-sitt pajjiżi madwar il-Baħar l-Iswed għandu jkun eżaminat minn perspettiva fit-tul biex, fost affarijiet oħra, jiġi ggarantit il-ħarsien tal-ambjent u jiġi ffaċilitat l-iżvilupp ekonomiku u soċjali taż-żoni littorali,

E. billi dan il-mekkaniżmu ġdid ta' politika komuni għall-Baħar l-Iswed għandu jkollu l-għan li jħares u jtejjeb il-bijodiversità u l-prosperità tan-nies li jaħdmu fis-settur tas-sajd fl-inħawi, li huma wħud mill-prijoritajiet tal-Unjoni Ewropea,

F. billi l-Baħar l-Iswed għandu jieħu postu kif xieraq fost iż-żoni tal-baħar ewlenin tal-Ewropa, ladarba huwa l-aktar żagħżugħ u l-aktar dinamiku tal-ibħra semi-magħluqa,

G. billi l-Baħar l-Iswed għandu jieħu postu fil-PKS riformata u fil-Politika Marittima Integrata, u billi l-ħtiġijiet tas-sajjieda, u tal-industriji tas-sajd, tal-produzzjoni u tal-ipproċessar, għandhom jitqiesu b'mod xieraq fil-qafas finanzjarju ġdid tal-Fond Ewropew għas-Sajd wara l-2013,

H. billi r-rapport attwali jista' jitqies mhux biss bħala linja gwida għar-riforma tal-PKS, iżda jista' jsir ukoll parti minn politika futura tal-UE dwar il-kollaborazzjoni mas-sħab tagħha tal-Lvant biex jiġi mmassimizzat l-użu tal-Komunikazzjoni eżistenti tal-Kummissjoni dwar Sinerġija tal-Baħar l-Iswed(9) sabiex tiġi intensifikata l-kooperazzjoni fir-reġjun tal-Baħar l-Iswed, li fiha s-sajd u l-iżvilupp tad-diversi setturi għandhom rwol sinifikanti,

I.  billi l-ġestjoni tas-sajd fir-reġjun tal-Baħar l-Iswed tibbenefika b'mod sinifikanti minn kooperazzjoni xjentifika aktar ikkoordinata bejn l-istati littorali, kif ukoll minn politika koerenti għall-ħarsien u t-titjib tal-istat tal-istokkijiet tal-ħut f'livell Ewropew,

J.   billi ħafna mill-ekosistemi tal-baħar inġenerali, u l-ekosistema tal-Baħar l-Iswed b'mod partikolari, huma milquta serjament minn bidliet dinamiċi marbuta mas-sajd, mat-tibdil fil-klima u t-tniġġis,

K. billi l-popolazzjoni tal-'veined rapa whelk' (Rapana venosa) għandha impatt negattiv fuq il-Baħar l-Iswed, u hija theddida għall-bilanċ ekoloġiku tiegħu, billi teqred il-filtri naturali tal-ilma bħall-masklu l-blu (Mythilus galloprovincialis) u l-'istriped white venus' (Chamelea gallina),

L. billi l-biċċa l-kbira tal-bastimenti tas-sajd użati fil-Baħar l-Iswed minn sajjieda tal-UE huma anqas minn 12-il metru twal, u għalhekk għandhom impatt limitat fuq l-ambjent tal-Baħar l-Iswed, madankollu, għandhom jirrispettaw l-isforzi li qed isiru biex jinkiseb sajd sostenibbli u jassumu r-responsabbiltajiet tagħhom f'dan ir-rigward,

M.       billi s-sajd illegali, mhux rappurtat u mhux regolat fil-Baħar l-Iswed għandu jiġi ttrattat minnufih,

N. billi n-nuqqas ta' ftehim komuni bejn is-sitt pajjiżi madwar il-Baħar l-Iswed jista' jiġi rimedjat bi ftehim qafas innegozjat, pereżempju, abbażi ta' komunikazzjoni mill-Kummissjoni, li fiha jiġu mfissra u kkunsidrati l-interessi tal-partijiet kollha,

O. billi parti kbira mill-problemi tal-Baħar l-Iswed hija r-riżultat tan-nuqqas ta' struttura istituzzjonali xierqa li tikkoordina u twettaq il-ġestjoni tas-sajd fil-Baħar l-Iswed f'livell professjonali u speċjalizzat; billi ilhom għaddejjin negozjati bejn l-amministrazzjonijiet nazzjonali involuti fl-implimentazzjoni tal-politika tas-sajd għal dawn l-aħħar għaxar snin dwar il-ħolqien ta' tali struttura istituzzjonali, kif ukoll dwar il-forma u r-responsabbiltajiet tagħha, u billi dawn in-negozjati għadhom ma rnexxewx; billi, għal din ir-raġuni, ma ttiħdux miżuri xierqa biex jiġu kkontrollati l-qabdiet u, b'mod partikolari, is-sajd transkonfinali,

P. billi, il-Kummissjoni Ġenerali għas-Sajd fil-Mediterran (GFCM), li l-mandat tagħha jkopri ż-żona tal-Baħar l-Iswed, s’issa ma tissodisfax daqs kemm huwa possibbli l-ħtiġijiet u l-aspettattivi tal-partijiet interessati, partikolarment tas-sajjieda, u għandha tagħmel użu mill-għodod kollha disponibbli f’dan il-qasam,

Q. billi l-Baħar l-Iswed huwa differenti ħafna mill-Mediterran fir-rigward tal-istokkijiet ta' ħut, il-livelli ta' tniġġis, il-varjetà tal-ispeċijiet, l-ispeċijiet dominanti, il-bijomassa komuni u l-produttività tiegħu,

R. billi f'Jannar 2011 il-Parlament Ewropew adotta rapport dwar Strateġija tal-UE għall-Baħar l-Iswed(10), li jenfasizza wkoll il-ħtieġa tal-applikazzjoni ta' pjanijiet ta' ġestjoni multiannwali għas-sajd, kif ukoll il-ħolqien ta' korp reġjonali indipendenti għall-ġestjoni tas-sajd fil-Baħar l-Iswed,

Ġenerali

1. Jiġbed l-attenzjoni li għandu jitwaqqaf settur tas-sajd vijabbli, stabbli u sostenibbli f'livell Ewropew u li, b'mod aktar speċifiku, il-Baħar l-Iswed jeħtieġ politika speċjali biex tinżamm u tittejjeb is-sitwazzjoni tar-riżorsi tas-sajd u biex jiġi żgurat li s-settur tas-sajd ikun adattat għall-baċin tal-Baħar l-Iswed, filwaqt li jitqiesu l-ispeċifiċitajiet tar-reġjun tal-Baħar l-Iswed, kif ukoll il-fatt li l-politika dwar is-sajd fil-Baħar l-Iswed għandha tkun parti integrali mir-riforma li jmiss tal-PKS;

2. Jenfasizza l-ħtieġa ta' riċerka xjentifika u analitika iktar eżatta u kkoordinata f'livell reġjonali, nazzjonali u Ewropew biex jitħarsu u jittejbu r-riżorsi u l-ekosistemi tas-sajd fil-baċin tal-Baħar l-Iswed;

3. Jirrikonoxxi l-isforzi tal-Kummissjoni biex tippromwovi djalogu aktar solidu u strutturat mal-Istati madwar il-Baħar l-Iswed li mhumiex membri tal-UE, u jinkuraġġixxi lill-Kummissjoni biex tintensifika l-isforzi tagħha sakemm jintlaħaq ftehim dwar qafas komuni aktar strutturat li jkopri l-baċin kollu tal-Baħar l-Iswed u li jsegwi approċċ reġjonali għall-ġestjoni tas-sajd fir-reġjun;

4. Huwa tal-fehma li d-deċiżjonijiet u l-politiki kollha marbuta mal-Baħar l-Iswed għandhom ikunu bbażati fuq dejta xjentifika soda u jitlob il-kollaborazzjoni bejn il-partijiet interessati kollha għal dan il-għan;

5. Jisħaq fuq il-ħtieġa ta' analiżi xjentifika kontinwa tal-istat tal-istokkijiet tal-ħut u ta' sistema stabbli u fuq perjodu twil ta' żmien ta' osservazzjoni tas-sajd, u jinnota li jeħtieġ li l-Istati littorali kollha tal-Baħar l-Iswed jieħdu sehem f'din l-analiżi;

6. Jinkuraġġixxi lill-Kummissjoni tuża l-mezzi diplomatiċi u finanzjarji kollha disponibbli biex ikunu jistgħu jinkisbu riżultati konkreti rigward sajd sostenibbli u li jirnexxi, fl-interess tal-UE, filwaqt li jintużaw bl-aħjar mod l-Assemblea Parlamentari Euronest u l-Inizjattiva dwar is-Sħubija tal-Lvant, meta jitqies ir-rwol kruċjali tal-ġirien l-aktar qrib tal-UE;

7. Jappella għal sistema msaħħa ta' monitoraġġ, kontroll u sorveljanza tal-attivitajiet tas-sajd, li tikkontribwixxi għal esplojtazzjoni fit-tul u sostenibbli tal-istokkijiet tal-ħut u għall-ġlieda kontra s-sajd illegali, mhux rappurtat u mhux regolat b’mod aktar effikaċi;

8. Jappoġġja r-rwol internazzjonali tal-operazzjonijiet tal-Aġenzija Komunitarja għall-Kontroll tas-Sajd u jappella sabiex ikun hemm kontribut aktar attiv u kooperazzjoni aktar effikaċi fil-kontroll, l-ispezzjoni u s-sorveljanza taż-żona tal-Baħar l-Iswed;

9.   Huwa tal-fehma li t-tekniki tas-sajd għall-ispeċijiet demersali għandhom jiġu eżaminati bir-reqqa u f'ċertu dettall sabiex jiġu identifikati dawk li ma jagħmlux ħsara jew dawk li jagħmlu l-anqas ħsara lil qiegħ il-baħar; jenfasizza li l-użu xieraq tat-tekniki tas-sajd għall-istokkijiet demersali huwa ta' importanza kbira fil-prevenzjoni ta' popolazzjonijiet eċċessivi ta' 'veined rapa whelk' (Rapana venosa), li jheddu l-filtru naturali li huwa l-masklu l-blu (Mythilus galloprovincialis), l-'istriped venus clam' (Chamelea gallina), kif ukoll il-popolazzjonijiet tal-gajdra ċatta (Ostrea edulis) u ħafna frott tal-baħar ieħor;

10. Huwa tal-fehma li l-Baħar l-Iswed għandu jkollu status xieraq fil-politiki Komunitarji, u għal dan il-għan għandhom isiru sforzi diplomatiċi u xjentifiċi xierqa u għandhom isiru disponibbli riżorsi finanzjarji xierqa għal sajd sostenibbli fil-baċin; jemmen li r-riżorsi baġitarji tal-UE għandhom ikunu flessibbli, aċċessibbli u trasparenti, biex l-UE tkun tista' tiżgura s-sostenibbiltà tas-sajd fil-Baħar l-Iswed;

11. Jenfasizza li d-djalogu bejn il-partijiet interessati huwa l-bażi għall-promozzjoni b'suċċess tal-Politika Marittima Integrata fiż-żona tal-Baħar l-Iswed; jinnota li l-Politika Marittima Integrata għandha tiffaċilita wkoll l-istabbiliment ta' rabta bla kunflitti u bla inkwiet bejn is-setturi marittimi, filwaqt li jitqies l-iżvilupp sostenibbli taż-żoni kostali;

12. Jenfasizza r-rwol importanti tal-kooperazzjoni bilaterali u tal-ftehimiet internazzjonali, billi l-biċċa l-kbira tal-istati tal-Baħar l-Iswed mhumiex membri tal-UE u għalhekk mhumiex obbligati jirrispettaw il-liġi Komunitarja;

13. Jemmen li l-istati kollha tal-Baħar l-Iswed, speċjalment dawk li huma Stati Membri tal-UE jew pajjiżi kandidati, għandhom jirrispettaw il-liġi internazzjonali u tal-UE li tapplika għall-attivitajiet tas-sajd, li l-għan tagħha huwa li tiggarantixxi s-sostenibbiltà mhux biss tal-istokkijiet tal-ħut, iżda anke tas-settur tas-sajd;

14. Jinkuraġġixxi lill-Kummissjoni tippromwovi aktar l-iżviupp taż-żoni kostali billi jiġi żviluppat sajd sostenibbli, li huwa partikolarment importanti għar-reġjun tal-Baħar l-Iswed, minħabba r-rati għoljin ta' qgħad;

Kunsiderazzjonijiet speċifiċi

15. Jesprimi s-sodisfazzjon tiegħu bl-isforzi tal-Kummissjoni biex tistabbilixxi gruppi ta' ħidma fil-qasam tal-ġestjoni tas-sajd mat-Turkija u mal-Federazzjoni Russa, li jipprovdu l-bażi għal aktar dibattitu dwar il-kooperazzjoni; jistieden lill-Kummissjoni żżid l-isforzi tagħha u d-djalogu mal-pajjiżi kollha madwar il-Baħar l-Iswed; jistieden lill-Kummissjoni tagħmel użu sħiħ tal-organizzazzjonijiet eżistenti, kif ukoll tal-għodod rilevanti, sabiex isir progress lejn koordinazzjoni aħjar tal-politiki; huwa tal-fehma, sadattant, li Organizzazzjoni Reġjonali tal-Ġestjoni tas-Sajd (RFMO) indipendenti għall-Baħar l-Iswed tista', fuq perjodu twil ta' żmien, tħeġġeġ u tippromwovi l-komunikazzjoni bejn istituti xjentifiċi u organizzazzjonijiet professjonali tas-sajjieda, tal-produtturi u ta' min jipproċessa bl-għan li jinstabu soluzzjonijiet għat-tilwim u li tissaħħaħ il-kooperazzjoni fil-Baħar l-Iswed; jinkuraġġixxi lill-Kummissjoni taħdem mal-pajjiżi tal-Baħar l-Iswed f'livell bilaterali, filwaqt li tqis li ħafna minnhom mhumiex membri tal-Unjoni Ewropea;

16. Jenfasizza l-ħtieġa li jiġi eżaminat fuq perjodu twil ta' żmien il-ħolqien ta' RFMO, li tikkoordina r-riċerka xjentifika, tanalizza s-sitwazzjoni tal-istokkijiet tal-ħut u twettaq politiki speċjali rigward l-osservazzjoni tal-ispeċijiet fil-periklu; jinnota li din l-organizzazzjoni tista' wkoll tressaq proposti rigward il-livell tal-pjanijiet ta' ġestjoni multiannawali tas-sajd u tqassam il-kwoti għall-pajjiżi madwar il-Baħar l-Iswed;

17. Iħeġġeġ lill-UE tuża r-riżorsi diplomatiċi tagħha biex tikkonvinċi lil kemm jista' jkun pajjiżi littorali tal-Baħar l-Iswed li mhumiex membri tal-UE dwar il-valur tal-prinċipji tal-Politika Komuni tas-Sajd tal-UE, speċjalment fir-rigward tal-applikazzjoni tal-pjanijiet ta' ġestjoni multiannwali;

18. Jemmen li għodda tal-UE għandha tintuża f'attivitajiet xjentifiċi bħala strument li jħeġġeġ u jiffaċilita l-kooperazzjoni u l-ħidma konġunta bejn it-timijiet xjentifiċi Ewropej u l-kontropartijiet tagħhom mill-Ukraina, il-Federazzjoni Russa, il-Ġeorġja u t-Turkija;

19. Jemmen li l-attivitajiet tal-UE marbuta mas-sajd fil-Baħar l-Iswed, partikolarment il-Politika Marittima Integrata, għandhom jiffukaw l-aktar fuq is-sajd fuq skala żgħira, li huwa kruċjali għar-reġjun u għall-istatus ekonomiku taż-żoni kostali;

20. Jenfasizza li l-Politika Komuni tas-Sajd tal-UE għandha tinkuraġġixxi l-istabbiliment ta' organizzazzjonijiet tas-sajjieda professjonali u ta' organizzazzjonijiet interprofessjonali fl-industriji tas-sajd u tal-akkwakultura fil-Baħar l-Iswed fejn dawn ma jkunux jeżistu jew ikunu sottożviluppati ferm;

21. Jemmen li l-prinċipji tal-Qabdiet Totali Permissibbli u l-kwoti annwali applikati attwalment m'għandhomx ikunu l-unika għażla għall-ġestjoni tas-sajd fil-Baħar l-Iswed; jemmen li għandhom jiġu mħeġġa pjanijiet ta' ġestjoni multiannwali li jistgħu jipprovdu aktar ċarezza rigward l-objettivi tal-UE fil-qasam tas-sajd fir-reġjun tal-Baħar l-Iswed u rigward il-viżjoni tagħha għall-futur tal-baċin;

22. Jenfasizza li għandu jkun hemm approċċ komuni, koordinat u fuq perjodu twil ta' żmien mill-partijiet interessati kollha fir-reġjun bl-għan li l-partijiet kollha fil-Baħar l-Iswed jiksbu sajd sostenibbli, u għaldaqstant jilqa' l-iskambju tal-prassi tajba bejn il-partijiet interessati involuti;

23. Jenfasizza l-importanza ta' ġestjoni tas-sajd li tippermetti l-vijabbiltà u s-sostenibbiltà tal-ekosistemi, l-iżvilupp tal-attivitajiet tas-sajd legali u l-ġlieda kontra s-sajd illegali, mhux rappurtat u mhux regolat; jitlob li jitwaqqaf Gwardjan tax-xtut Ewropew bl-għan li tiġi żviluppata b’mod effikaċi l-kooperazzjoni bejn l-Istati Membri sabiex tissaħħaħ is-sikurezza marittima u biex jiġu miġġielda t-theddidiet moderni fil-baħar, partikolarment fil-Baħar l-Iswed;

24. Jemmen li l-pjanijiet ta' ġestjoni multiannwali huma ta' interess kbir ferm kemm għas-sitwazzjoni ekonomika tas-settur tas-sajd kif ukoll għas-sitwazzjoni ambjentali tal-ekosistemi tal-Baħar l-Iswed; jemmen li l-approċċ ta' pjan ta' ġestjoni multiannwali għandu jkun akkumpanjat minn kontroll effikaċi tal-qabdiet;

25. Jenfasizza l-ħtieġa li titħeġġeġ ir-riċerka xjentifika dwar kwistjonijiet rigward il-Baħar l-Iswed, sabiex id-deċiżjonijiet meħuda mill-awtoritajiet responsabbli Ewropej, reġjonali u nazzjonali jkunu jistgħu jqisu l-konsegwenzi ekonomiċi, soċjali u ambjentali tagħhom; jemmen li jeħtieġ li ssir riċerka dettaljata u koordinata sabiex tingħata tweġiba ċara u bla ekwivoċi għall-mistoqsijiet rigward il-ġestjoni tas-sajd u l-impatt li jista' jkollhom metodi ta' sajd (i.e. is-sajd li jsir bit-tkarkir mal-qiegħ), billi fin-nuqqas ta' studji dwar l-effetti tagħhom ma jistgħux jinsiltu konklużjonijiet serji; huwa tal-fehma li programmi u proġetti ta' riċerka fil-qasam tas-sajd fil-Baħar l-Iswed, bħal SESAME, KNOWSEAS, WISER u BlackSeaFish, għandhom jitħeġġu aktar;

26. Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill, lill-Kummissjoni, lill-Gvernijiet u l-Parlamenti tal-Istati Membri u lill-Gvernijiet u l-Parlamenti tal-Ukraina, il-Federazzjoni Russa, il-Ġeorġja u t-Turkija.

(1) Testi adottati, P6_TA(2009)0373. (2) Testi adottati, P7_TA(2011)0025. (3) Testi adottati, P7_TA(2010)0039. (4) Testi adottati, P7_TA(2010)0386. (5) ĠU L 343, 29.12.2010, p. 2. (6) ĠU L 206, 22.7.1992, p. 50. (7) ĠU L 164, 25.6.2008, p. 19. (8) http://www.grid.unep.ch/bsein/tda/main.htm. (9) COM(2007)0160 dwar Sinerġija tal-Baħar l-Iswed. (10) Riżoluzzjoni tal-Parlament Ewropew tal-20 ta' Jannar 2011 dwar Strateġija tal-UE għall-Baħar l-Iswed (2010/2087(INI)).

L-għan ewlieni ta' dan ir-rapport huwa li jistabbilixxi l-qafas għall-iżvilupp fuq perjodu medju u twil ta' żmien tas-sajd fir-reġjun tal-Baħar l-Iswed. Ir-rapport huwa ta' importanza kbira, għaliex sal-lum ma ttiħditx azzjoni kkoordinata fil-Baħarl-Iswed bejn l-atturi kollha fil-qasam tas-sajd. Il-koordinament istituzzjonalizzat jista' jagħti riżultati tanġibbli biex jitħares l-għajxien tas-sajjieda, jiġi żgurat l-iżvilupp ekonomiku fiż-żoni kostali, u jitħarsu l-bilanċ ekoloġiku u r-riżorsi tal-ħut fil-baċin. Dan ma japplikax biss għall-Istati Membri tal-UE, iżda anke għall-pajjiżi kollha tal-Baħar l-Iswed.

Il-Baħar l-Iswed huwa baċin magħluq li r-riżorsi tiegħu, sa ċertu punt, jinqasmu bejn is-sitt stati tal-Baħar l-Iswed. Iż-żona għandha wkoll importanza ekonomika, soċjali u politika kbira. Għalhekk, ir-Rapporteur tal-fehma li l-kooperazzjoni rigward is-sajd bejn il-pajjiżi fir-reġjun tal-Baħar l-Iswed tkun pass konsiderevoli 'l quddiem fil-ġestjoni tal-konservazzjoni kif ukoll biex il-kwistjonijiet jiġu ttrattati b'mod effikaċi fil-baċin tal-Baħar l-Iswed.

L-analiżi approfondita tas-sajd fil-Baħar l-Iswed turi l-ħtieġa li jinstab il-mod l-aktar effiċjenti ta' kooperazzjoni bejn il-pajjiżi kollha fir-reġjun. In-natura speċjali tal-bijodiversità tiegħu teħtieġ ukoll approċċ komuni rigward il-ġestjoni ta' dan il-baċin uniku. Biex il-problemi tar-reġjun tal-Baħar l-Iswed jiġu ttrattati b'mod effikaċi, huwa essenzjali li tiġi approfondita l-kooperazzjoni bejn il-partijiet interessati kollha fis-settur tas-sajd, inklużi r-rappreżentanti tal-industrija, ix-xjentisti, u min ifassal il-politika mir-reġjuni tas-sajd biex jiġi stimulat l-investiment fir-riċerka u l-attivitajiet xjentifiċi.

Il-mudell tas-sħubija fir-reġjun tal-Baħar l-Iswed irid ikun ibbażat fuq l-implimentazzjoni ta' pjanijiet ta' ġestjoni komuni u fuq perjodu twil ta' żmien, kif ukoll fuq il-kooperazzjoni bejn il-partijiet interessati u l-koordinament tal-isforzi tagħhom f'diversi oqsma, bħal:

· il-valutazzjoni xjentifika tar-riżorsi u tal-fatturi li jipperikolawhom,

· il-ħolqien ta' bażi ta' dejta reġjonali li tiġbor l-informazzjoni disponibbli,

· il-kooperazzjoni bejn l-organizzazzjonijiet nazzjonali u nongovernattivi fir-reġjun tal-Baħar l-Iswed,

· it-tnedija ta' inizjattivi komuni għall-ġbir tad-dejta,

· u fl-aħħar nett, il-kontroll strett tal-attivitajiet tas-sajd, inkluża l-kooperazzjoni mill-qrib bejn is-sitt Stati tal-Baħar l-Iswed fir-rigward tal-prevenzjoni, it-twaqqif u l-eliminazzjoni tas-sajd illegali, mhux rappurtat u mhux regolat.

Dan il-mudell jiżgura il-bilanċ tal-ekosistema tal-Baħar l-Iswed, li jippermetti li jsir titjib fl-istat tal-istokkijiet tal-ħut bla ma ssir ħsara lis-settur tas-sajd fir-reġjun.

Qabel ma titfassal, tiġi implimentata u tiġi approvata kwalunkwe politika dwar is-sajd fil-Baħar l-Iswed, għandu jkun ċar li l-isforzi, il-miżuri jew l-istrateġiji kollha jkunu ta' benefiċċju biss jekk tali miżuri jew strateġiji jitqiesu interessanti minn Stati li mhumiex membri tal-UE. Dan minħabba l-fatt li r-Rumanija u l-Bulgarija għandhom sehem relattivament żgħir tal-flotta tas-sajd u tal-qabdiet fil-Baħar l-Iswed, speċjalment meta mqabbla mat-Turkija u l-Federazzjoni Russa. Għalhekk huwa partikolarment importanti li l-Istati Membri jsibu approċċ alternattiv għall-prinċipju tal-Qabdiet Totali Permissibbli u l-kwoti annwali, li jpoġġuhom f'pożizzjoni partikolarment żvantaġġjata meta mqabbla mal-ġirien tagħhom tal-Baħar l-Iswed. Minflok, ir-Rapporteur tipproponi li għandhom jinbidlu bi pjanijiet ta' ġestjoni multiannwali għall-istokkijiet tal-ħut - prinċipju li l-pajjiżi li mhumiex fl-UE jridu jiddiskutu u jadottaw l-applikazzjoni futura tiegħu. Din ir-rakkomandazzjoni hija wieħed mill-elementi ewlenin tar-rapport.

Għandha tingħata attenzjoni partikolari lill-perikli tas-sajd illegali, mhux rappurtat u mhux regolat. Kemm il-pajjiżi tal-UE kif ukoll dawk li mhumiex membri tal-UE fil-baċin tal-Baħar l-Iswed għandhom jieħdu miżuri stretti biex jikkumbattu s-sajd illegali, mhux rappurtat u mhux regolat. Dan jista' jinkiseb biss permezz tal-kooperazzjoni attiva tal-Kummissjoni Ewopea u l-pajjiżi tal-Baħar l-Iswed.

Ir-rapport jenfasizza wkoll il-ħtieġa li jitwaqqaf korp ta' ġestjoni tas-sajd fil-Baħar l-Iswed, li jkun indipendenti mill-GFCM. L-argument l-aktar b'saħħtu favur it-twaqqif ta' tali korp huwa l-karatteristiċi differenti taż-żewġ baċini li jeħtieġu li jittieħdu approċċi differenti fir-rigward tal-ġestjoni tar-riżorsi tas-sajd u tas-sajd fil-Baħar Mediterran u fil-Baħar l-Iswed. Il-Kumitat għas-Sajd kemm-il darba saħaq fuq l-importanza li jitqiesu l-ispeċifiċitajiet reġjonali meta jissawru l-politiki futuri. Din il-pożizzjoni hija riflessa fil-bosta dokumenti adottati mill-PE, inkluż ir-rapport fuq inizjattiva proprja dwar ir-riforma tal-Politika Komuni tas-Sajd imħejji mill-Kumitat għas-Sajd (Ir-Rapport Patrão Neves). Huwa ċar li, kwalunkwe politika li tiġi applikata għas-sajd fil-Baħar l-Iswed għandha tqis il-prinċipju ġenerali tas-sostenibbiltà li l-Unjoni Ewropea tapplika għall-ibħra tagħha. L-isfidi li dan il-korp indipendenti ġdid ta' ġestjoni tal-Baħar l-Iswed se jaffaċċja huma bosta, iżda r-Rapporteur tal-fehma li huwa punt ta' tluq tajjeb għall-UE. F'dan il-kuntest, ir-Rapporteur tilqa' d-djalogu attiv li l-Kummissjoni Ewropea nediet reċentement ma' atturi ewlenin fir-reġjun tal-Baħar l-Iswed bħall-Federazzjoni Russa u t-Turkija. B'mod partikolari, ir-Rapporteur tqis li l-Kummissjoni qed tagħmel sew li tistabbilixxi gruppi ta' ħidma ma' dawn iż-żewġ pajjiżi sabiex jiddiskutu l-forma u d-dettalji tal-kooperazzjoni tagħhom. Il-Kummissjoni Ewropea u d-DĠ MARE jaffaċċjaw il-kompitu diffiċli li jqarrbu kemm jista' jkun lit-Turkija, il-Ġeorġja, il-Federazzjoni Russa u l-Ukraina għall-prinċipji tal-Politika Komuni tas-Sajd tal-UE, filwaqt li jinstab bilanċ bejn dan l-objettiv u l-interessi tagħhom fil-Baħar l-Iswed. Madankollu, huwa essenzjali għall-futur tal-baċin, għall-iżvilupp taż-żoni kostali u għall-ekoloġija tas-sajd, li dawn l-isforzi jwasslu għal riżultati konkreti f'perjodu ta' żmien aċċettabbli u raġonevoli.

Is-sajd Ewropew għandu struttura reġjonali stabbilita sew, fejn kull reġjun indipendenti għandu l-ispeċifiċitajiet tiegħu; dan jeħtieġ approċċ reġjonali fir-rigward tal-ġestjoni tas-sajd. Għal din ir-raġuni, ir-Rapporteur tirrakkomanda approċċ fuq żewġ livelli fil-proċess tat-teħid ta' deċiżjonijiet, strutturat kif ġej:

-    f'livell Ewropew (l-adozzjoni tal-prinċipji, il-qafas u l-għanijiet fuq perjodu twil ta' żmien li huma komuni, kif ukoll tal-pjan direzzjonali biex dawn jintlaħqu)

-    f'livell reġjonali (l-identifikazzjoni u l-istabbiliment tal-mod xieraq biex dawn l-għanijiet jintlaħqu). Pereżempju, min jieħu d-deċiżjonijiet lokalment għandu jkollu s-setgħa li jiddetermina kif se jiġi ġestit is-sajd fir-reġjun, bla ma jinjora n-normi komuni).

L-applikazzjoni ta' dan l-approċċ fuq żewġ livelli u t-teħid ta' deċiżjonijiet f'livell politiku xieraq jissimplifikaw il-politiki filwaqt li jkunu aktar ġustifikati ekonomikament.

Bħala konsegwenza, għandha titwaqqaf organizzazzjoni reġjonali tal-ġestjoni tas-sajd (RFMO) għall-Baħar l-Iswed, abbażi tal-eżempju tal-korp li jeżisti fil-Baħar Baltiku. L-Istati kollha tal-Baħar l-Iswed kif ukoll l-UE għandhom ikunu partijiet kontraenti f'din l-RFMO. Il-kumitat reġjonali għandu jimmonitorja l-istat tal-istokkijiet fil-Baħar l-Iswed kollu, u jiddetermina l-Qabdiet Totali Permissibbli u l-kwoti għall-pajjiżi kollha fir-reġjun abbażi ta' pariri xjentifiċi. Il-ġestjoni tas-sajd tkun ħafna aktar effikaċi jekk miżuri restrittivi li jikkonċernaw l-ispeċijiet fil-periklu jiġu applikati għall-pajjiżi kollha tal-Baħar l-Iswed u mhux biss għall-Bulgarija u r-Rumanija.

Ir-Rapporteur tal-fehma li l-ħolqien ta' organizzazzjoni reġjonali għall-ġestjoni tas-sajd fil-Baħar l-Iswed huwa ġustifikat ferm. Dan il-korp jippermetti l-koeżistenza tal-prattiki tas-sajd bl-għan uniku tal-irkupru u l-konservazzjoni tar-riżorsi tas-sajd tal-Baħar l-Iswed. Sal-lum, ma kienx hemm il-koordinament koerenti meħtieġ bejn il-pajjiżi madwar il-Baħar l-Iswed fir-rigward tal-ġestjoni tas-sajd fih. Minħabba li saru membri tal-UE, il-Bulgarija u r-Rumanija jridu japplikaw ċerti miżuri biex jikkonservaw l-istokkijiet tal-ħut fl-ibħra tagħhom. Madankollu, dawn il-miżuri ma jistax ikollhom l-effett massimu bla ma jiġu applikati wkoll fil-bqija tal-Istati tal-Baħar l-Iswed.

Dan jeħtieġ il-kooperazzjoni istituzzjonalizzata bejn dawn il-pajjiżi rigward il-konservazzjoni tal-istokkijiet tal-ħut. B'din l-inizjattiva, il-miżuri stabbiliti fil-Politika Komuni tas-Sajd tal-UE jiġu applikati fil-baċin kollu tal-Baħar l-Iswed. Dan l-argument huwa bbażat fuq riċerka xjentifika li turi li l-kooperazzjoni istituzzjonalizzata hija vitali għall-isfruttar sostenibbli tar-riżorsi ħajjin tal-baħar fil-kuntest tal-iżvilupp sostenibbli.

Huwa importanti li jiġi enfasizzat il-fatt li l-istabbiliment ta' tali organizzazzjoni jafferma l-impenn tal-UE fir-reġjun fir-rigward tal-iżvilupp sostenibbli tas-sajd, għaliex ikollu effetti ta' benefiċċju għall-Istati kollha tal-Baħar l-Iswed fuq perjodu twil ta' żmien.

Fl-istess ħin, bl-istituzzjonalizzazzjoni tal-kooperazzjoni reġjonali fil-qasam tas-sajd, din l-organizzazzjoni reġjonali tippermetti lill-UE tqiegħed il-prinċipji tagħha stabbiliti fil-Politika Komuni tas-Sajd fiċ-ċentru tal-kooperazzjoni internazzjonali dwar is-sajd mat-Turkija, l-Ukraina, il-Ġeorġja u r-Russja.

Ir-Rapporteur tqis li l-Unjoni Ewropea għandha tuża r-riżorsi diplomatiċi u finanzjarji kollha tagħha, bħall-Inizjattiva dwar is-Sħubija tal-Lvant, l-Assemblea Parlamentari Euronest u d-diversi forom ta' finanzjament Ewropew biex tikseb il-prijoritajiet tagħha filwaqt li tinnegozja ma' pajjiżi li mhumiex membri tal-UE.

Ir-rapport jinsisti fuq il-ħtieġa ta' deċiżjonijiet ibbażati fuq ix-xjenza. Barra minn hekk, l-UE trid tiżviluppa l-usa' kooperazzjoni possibbli bejn l-istituti tar-riċerka fl-Istati Membri kollha, li ma tkunx limitata biss għat-timijiet tar-riċerka. Għal dan il-għan għandu jkun żgurat finanzjament adegwat tal-UE. Inkella jkun impossibbli li jkollna stampa ċara tas-sitwazzjoni attwali tal-istokkijiet tal-ħut u deċiżjonijiet dwar il-ġestjoni tas-sajd fil-Baħar l-Iswed ikunu soġġetti għal dubji serji.

Ir-rapport jiffoka fuq l-importanza tar-riċerka biex jiġu definiti t-tekniki l-aktar sikuri tas-sajd għall-istokkijiet demersali, partikolarment il-'veined rapa whelk' (Rapana venosa). Dan huwa ta' importanza partikolari għall-ekosistema tal-Baħar l-Iswed, billi ntwera li r-'rapa whelk' qiegħda fis-sitwazzjoni ta' 'predatur mingħajr għedewwa' u għalhekk qed teżerċita pressjoni kbira fuq il-filtri naturali tal-baħar bħall-masklu l-blu (Mythilus galloprovincialis) u l-'istriped venus clam' (Chamelea gallina), u qed tipperikola serjament il-bilanċ ekoloġiku tal-Baħar l-Iswed.