dwar qafas ta' politika tal-UE biex jgħin lill-pajjiżi li qed jiżviluppaw jindirizzaw l-isfidi fil-qasam tas-sigurtà tal-ikel

(2010/2100(INI))

Il-Parlament Ewropew,

–    wara li kkunsidra l-obbligi li hemm fil-Patt Internazzjonali tan-NU dwar id-Drittijiet Ekonomiċi, Soċjali u Kulturali, partikolarment l-Artikolu 11 tiegħu dwar id-dritt għall-ikel, li tiegħu l-Istati Membri kollha tal-Unjoni Ewropea huma firmatarji,

–    wara li kkunsidra l-objettiv tas-Summit Dinji dwar l-Ikel tal-1996 (id-Dikjarazzjoni ta' Ruma) li sal-2015 jitnaqqas bin-nofs in-numru ta’ nies li jbatu l-ġuħ,

–    wara li kkunsdidra l-Għanijiet ta' Żvilupp tal-Millennju (MDGs), adottati fis-Sumimt tal-Millennju tan-Nazzjonijiet Uniti f'Settembru 2000, u b'mod partikolari l-Għan ta' Żvilupp tal-Millennju 1 dwar il-prinċipju tat-tneħħija tal-faqar u tal-ġuħ estrem,

–    wara li kkunsidra s-Sessjoni Speċjali tal-Kunsill tan-NU għad-Drittijiet tal-Bniedem tat-22 ta' Mejju 2008, f'Ġinevra, dwar "L-impatt negattiv tad-deterjorament tal-kriżi dinjija tal-ikel fuq id-dritt għall-ikel, ikkawżat inter alia minħabba prezzijiet tal-ikel li qed jogħlew",

–    wara li kkunsidra d-Dikjarazzjoni Konġunta mill-Kunsill u r-Rappreżentanti tal-Gvernijiet tal-Istati Membri mlaqqgħin fi ħdan il-Kunsill, il-Parlament Ewropew u l-Kummissjoni Ewropea dwar l-għajnuna umanitarja tal-Unjoni Ewropea bit-titolu "Il-Konsens Ewropew dwar l-Għajnuna Umanitarja",

–    wara li kkunsidra l-Konvenzjoni tal-Għajnuna tal-Ikel iffirmata f’Londra fit-13 ta’ April 1999, li l-objettivi tagħha huma li jsir kontribut għas-sigurtà alimentari dinjija u li titjieb l-abilità tal-komunità internazzjonali biex tirrispondi għal sitwazzjonijiet ta’ emerġenza fl-ikel u bżonnijiet oħra ta' ikel tal-pajjiżi li qed jiżviluppaw,

–    wara li kkunsidra d-dikjarazzjoni tas-Summit Dinji dwar is-Sigurtà Alimentari tal-2009 u l-preparazzjoni mill-FAO tal-"Linji Gwida Volontarji dwar Governanza Responsabbli tal-Pussess tal-Art u ta' Riżorsi Naturali oħra",

–    wara li kkunsidra “Il-Linji Gwida Volontarji FAO għas-sostenn tal-materjalizzazzjoni progressiva tad-dritt għal alimentazzjoni adegwata fil-kuntest tas-sigurtà alimentari nazzjonali",

–    wara li kkunsidra r-rapport interagenzjarja għall-G20 dwar il-volatilità tal-prezzijiet tal-ikel bit-titolu "Il-Volatilità tal-Prezzijiet fis-Swieq Agrikoli u tal-Ikel: Reazzjonijiet tal-Politika", li tressaq lill-Presidenza Franċiża tal-G20 fit-2 ta' Ġunju 2011,

–    wara li kkunsidra "Il-linji gwida tal-politika tal-UE dwar l-art" minn Novembru 2004,

–    wara li kkunsidra l-Prospettiva Agrikola tal-OECD u l-FAO 2011-2020, li ġiet ippubblikata b'mod konġunt fis-17 ta’ Ġunju 2011,

–    wara li kkunsidra d-Dikjarazzjoni ta’ Maputo dwar l-Agrikoltura u s-Sigurtà tal-Ikel iffirmata fl-2003, fejn il-gvernijiet Afrikani impenjaw ruħhom li jallokaw minimu ta' 10% tal-baġits nazzjonali annwali tagħhom għall-agrikoltura,

–    wara li kkunsidra r-Rapport mill-Bank Dinji dwar l-Iżvilupp Dinji għall-2008: "Agrikoltura għall-Iżvilupp",

–    wara li kkunsidra l-Komunikazzjoni tal-Kummissjoni bit-titolu “Il-KAP lejn l-2020”

–    wara li kkunsidra r-Rapport ta’ Prospettiva Bijannwali dwar l-Ikel, l-aktar riċenti tal-FAO (Ġunju, 2011),

–    wara li kkunsidra r-rapport ippublikat fil-15 ta' April 2008 dwar Valutazzjoni Internazzjonali tal-Għarfien Agrikolu, ix-Xjenza u t-Teknoloġija għall-Iżvilupp (IAASTD),

–    wara li kkunsidra d-Dikjarazzjoni Konġunta dwar is-Sigurtà Alimentari Globali tal-Ikel f’L’Aquila, adottata fl-10 ta’ Lulju 2009,

–    wara li kkunsidra l-Inizjattiva ta' Bażi tal-Protezzjoni Soċjali tan-NU,

–    wara li kkunsidra l-Konvenzjoni tan-Nazzjonijiet Uniti dwar il-Liġi tal-Baħar tal-1982,

–    wara li kkunsidra l-Kodiċi ta’ Mġiba tal-FAO għal Sajd Responsabbli tal-1995,

–    wara li kkunsidra r-reviżjoni annwali tal-FAO dwar L-Istat tas-Sajd u l-Akwakultura Dinji tal-2010,

–    wara li kkunsidra r-Regolament (KE) Nru 1337/2008 tal-Parlament Ewropew u tal-Kunsill tas-16 ta’ Diċembru 2008 li jistabbilixxi faċilità għal rispons rapidu għall-prezzijiet tal-ikel li dejjem qed jogħlew fil-pajjiżi li qegħdin jiżviluppaw(1),

–    wara li kkunsidra l-Komunikazzjoni mill-Kummissjoni lill-Kunsill u lill-Parlament Ewropew dwar "Qafas ta' politika tal-UE biex jgħin lill-pajjiżi li qed jiżviluppaw jindirizzaw l-isfidi fil-qasam tas-sigurtà tal-ikel" (COM(2010)0127) adottata fil-31 ta' Marzu 2010 u l-Konklużjonijiet tal-Kunsill adottati fl-10 ta' Mejju 2010,

–    wara li kkunsidra l-Komunikazzjoni mill-Kummissjoni lill-Kunsill u lill-Parlament Ewropew dwar l-"Għajnuna Umanitarja tal-Ikel" (COM(2010)126) adottata fil-31 ta' Marzu 2010 u l-Konklużjonijiet tal-Kunsill adottati fl-10 ta' Mejju 2010,

–    wara li kkunsidra r-riżoluzzjoni tiegħu tal-25 ta' Ottubru 2007 dwar il-prezzijiet tal-ikel u tal-għalf li dejjem qed jogħlew(2) , ir-riżoluzzjoni tiegħu tat-22 ta' Mejju 2008 dwar iż-żieda fil-prezzijiet tal-ikel fl-UE u fil-pajjiżi li qed jiżviluppaw(3), kif ukoll ir-riżoluzzjoni tiegħu tas-17 ta' Frar 2011 dwar il-prezzijiet tal-ikel li dejjem qed jogħlew(4)

–    wara li kkunsidra r-riżoluzzjoni tiegħu tad-29 ta’ Novembru 2007 dwar l-avvanz fl-agrikoltura Afrikana – Proposta għall-iżvilupp agrikolu u s-sigurtà tal-ikel fl-Afrika(5),

–    wara li kkunsidra r-riżoluzzjoni tiegħu tat-13 ta' Jannar 2009 dwar il-Politika Agrikola Komuni u s-Sigurtà Globali tal-Ikel(6),

–    wara li kkunsidra r-riżoluzzjoni tiegħu tas-26 ta' Novembru 2009 dwar il-laqgħa għolja tal-FAO u s-sigurtà tal-ikel(7),

–    wara li kkunsidra r-riżoluzzjoni tiegħu tat-18 ta' Mejju 2010 dwar il-Koerenza tal-Politiki tal-UE għall-Iżvilupp u l-kunċett ta' Għajnuna Uffiċjali għall-Iżvilupp u Iktar(8),

–    wara li kkunsidra r-riżoluzzjoni tal-Assemblea Parlamentari Konġunta AKP-UE dwar is-sigurtà tal-ikel, adottata f'Kinshasa fl-4 ta' Diċembru 2010(9),

–    wara li kkunsidra t-tmien rakkomandazzjonijiet tal-G20 ippubblikati mir-Rapporteur Speċjali tan-NU dwar id-dritt għall-ikel fid-29 ta' Jannar 2011,

–    wara li kkunsidra r-rapport bit-titolu l-"Agroekoloġija u d-Dritt għall-Ikel" mir-Rapporteur Speċjali tan-NU dwar id-dritt għall-ikel, imressaq quddiem il-Kunsill tad-Drittijiet tal-Bniedem tan-NU fit-8 ta’ Marzu 2011,

–    wara li kkunsidra l-Artikolu 208 tat-Trattat dwar il-Funzjonament tal-Unjoni Ewropea,

–    wara li kkunsidra l-Artikolu 48 tar-Regoli ta’ Proċedura tiegħu,

–    wara li kkunsidra r-rapport tal-Kumitat għall-Iżvilupp u l-opinjoni tal-Kumitat għall-Agrikoltura u l-Iżvilupp Rurali (A7-0284/2011),

A.  billi skont il-FAO, in-numru ta’ persuni li qed ibatu l-ġuħ fl-2010 jammonta għal 925 miljun persuna; billi, globalment, il-prevalenza ta' piż inqas milli suppost fit-tfal taħt il-5 snin hija ta’ 26 fil-mija u aktar minn terz tal-imwiet ta’ tfal taħt il-ħames snin huma kawża ta' nuqqas ta' nutrizzjoni; billi nofs biss tal-pajjiżi kollha li qed jiżviluppaw (62 minn 118) jinsabu fit-triq it-tajba biex jilħqu l-mira tal-MDG. billi t-tnaqqis fir-ritmu ekonomiku dinji u ż-żieda kontinwa fil-prezzijiet tal-ikel u l-fjuwil aggravaw s-sitwazzjoni tal-ikel f’ħafna pajjiżi li qed jiżviluppaw, speċjalment il-pajjiżi l-anqas żviluppati, u b’hekk ikkawżaw waqfa parzjali tal-progress imwettaq fl-aħħar deċennju għat-tnaqqis tal-faqar;

B.   billi l-ġuħ u n-nuqqas ta' ikel sustanzjuż huma r-raġunijiet prinċipali tal-moralità tal-bnedmien, kif ukoll l-ikbar theddidiet għall-paċi u sigurtà tad-dinja,

C.  billi, skont il-pubblikazzjoni riċenti ta' Jannar 2011 mill-Indiċi FOA tal-Prezzijiet tal-Ikel, kien hemm żieda fil-prezzijiet tal-ikel kull xahar minn Awwissu 2010, li ssewgi t-tendenza tal-aħħar għaxar snin, b'livelli ta' spiss ogħla minn dawk irreġistrati fl-2008 meta kien hemm żieda qawwija fil-prezzijiet tal-ikel; billi l-volatilità tal-prezzijiet tal-prodotti qed ikollha impatt kbir fuq pajjiżi bi dħul baxx u l-aktar partijiet foqra, vulnerabbli u emarġinati tal-popolazzjonijiet tal-pajjiżi li qegħdin jiżviluppaw,

D.  billi d-domanda globali għall-prodotti agrikoli mistennija li se tiżdied b'70% sal-2050 u dawn il-prodotti se jkollhom jiġu fornuti b'użu ristrett ta' ilma u pestiċidi, b'anqas art agrikola disponibbli u bl-applikazzjoni ta' metodi ta' produzzjoni agroekoloġiċi sostenibbli, filwaqt li huwa previst li l-popolazzjoni dinjija se tlaħħaq disa' biljun persuna sa dak iż-żmien; billi n-nuqqas ta' sigurtà tal-ikel hu aggravat aktar bl-ispekulazzjoni fuq il-prodotti, id-deġenerazzjoni tal-artijiet, l-iskarsezza tal-ilma, it-tibdil fil-klima, l-akkwist globali tal-artijiet u l-insigurtà dwar il-pussess tal-art, b'mod partikolari għall-partijiet tal-popolazzjoni l-aktar foqra u vulnerabbli, il-monpolji globali taż-żrieragħ, id-domanda għal fjuwils Agro u l-politiki relatati mal-enerġija,

E.   billi 85 % tal-istokkijiet evalwati tal-ħut tad-dinja jew huma sfruttati kompletament, sfruttati żżejjed jew eżawriti u billi d-dipendenza fuq il-ħut bħala sors tal-proteina tal-annimali fil-pajjiżi bi dħul baxx b’nuqqas ta’ ikel hija mill-anqas 20 % skont "L-Istat tas-Sajd u l-Akwakultura Dinjija 2010" tal-FAO,

F.   billi l-agrikoltura tipprovdi l-impjieg u l-għajxien għal aktar minn 70% tal-forza tax-xogħol, il-biċċa l-kbira minnhom nisa, fil-pajjiżi li qed jiżviluppaw; billi l-Bank Dinji jistma li t-tkabbir fis-settur agrikolu huwa darbtejn aktar effikaċi biex inaqqas il-faqar mit-tkabbir f’setturi oħra, iżda jindika wkoll l-importanza tal-investiment fit-tkabbir u l-ħolqien tal-impjiegi fis-settur rurali mhux agrikolu;

G.  billi l-evidenza turi l-potenzjal li għandhom sistemi ta' bdiewa fuq skala żgħira biex iżidu l-produzzjoni tal-ikel ġenerali; billi li wieħed jiffoka biss fuq il-produzzjoni għall-esportazzjoni fil-pajjiżi li qed jiżviluppaw jista’ jkollu impatti negattivi, speċjalment fuq in-nisa, bħala bdiewa fuq skala żgħira,

H.  Billi d-difiża tal-proprjetà privata u l-istat tad-dritt huma rekwiżiti bażiċi biex jiżdied l-investiment privat fl-agrikoltura.

I.    billi minħabba n-nuqqas ta’ aċċess għas-self jew mikrokreditu għal investiment f’mekkaniżmi mtejba ta’ żrieragħ, fertilizzanti u irrigazzjoni, bdiewa fuq skala żgħira fil-pajjiżi li qed jiżviluppaw jiffaċċjaw ostakli serji għaż-żieda fil-produzzjoni agrikola; billi l-istat għandu rwol kruċjali għal żvilupp sostenibbli u biex jiġu żviluppati kapaċitajiet għall-produzzjoni u l-ipproċessar,

J.    billi s-sehem tal-għajnuna uffiċjali għall-iżvilupp (ODA) allokat għall-agrikoltura fl-livell internazzjonali waqa' drammatikament matul dawn l-aħħar tliet deċennji,

K.  billi l-UE rreaġixxiet malajr għall-kriżi tal-ikel tal-2008 permezz tal-ħolqien tal-Faċilità tal-Ikel; billi l-impatt ta' tali miżuri fuq il-kawżi strutturali tal-ġuħ u n-nuqqas ta' sigurtà tal-ikel u fuq azjendi agrikoli żgħar u ta' daqs medju, b'mod partikolari dawk immexxija min-nisa, diffiċli jitkejjel, iqis li estensjoni ulterjuri ta' din il-Faċilità tal-Ikel, jew l-allokazzjoni addizzjonali ta' fondi għaliha, ma għandhiex tkun awtomatika, iżda deċiża abbażi ta' valutazzjoni tal-impatt indipendenti tal-effikaċja tal-infiq tal-fondi biex itejjeb is-sigurtà tal-ikel fil-pajjiżi benefiċjarji kollha,

L.   billi l-konsegwenzi tan-nuqqas ta’ nutrizzjoni, bħat-tkabbir fqir jew tfixkil tal-fetu fl-ewwel sentejn tal-ħajja jwassal għal ħsara irriversibbli, inklużi tul iqsar fl-adulti, kisba aktar baxxa tat-tagħlim, anqas dħul tal-adulti, u piż anqas tat-trabi li jitwieldu, għad iridu jidhru bħala problema kbira għall-iżvilupp sostenibbli f’ħafna pajjiżi tan-Nofsinhar;

M.  billi kien hemm enfasi politika mġedda fuq is-sigurtà tal-ikel mill-2008 li wasslet għall-multiplikazzjoni tal-inizjattivi fuq livell internazzjonali li jitlob għal strateġija globali komprensiva,

Qafas politiku tal-UE dwar is-sigurtà alimentari u nutrizzjonali: approċċ ibbażat fuq id-drittijiet tal-bniedem għas-sostenibilità tal-agrikoltura

1.   Jenfasizza li l-għadd ta' nies li jbatu l-ġuħ huwa inaċċettabbli u jiddispjaċih li l-isforzi globali internazzjonali s'issa ma laħqux il-MDG 1 jitlob li jittieħdu passi urġenti għas-sodisfazzjon ta' impenji vinkolanti f'livell internazzjonali u biex id-dritt għal alimentazzjoni adegwata jsir realtà;

2.  Jenfasizza li l-istabbiltà politika hija l-prerekwiżit għal iktar sigurtà tal-ikel, u għalhekk jistieden lill-partijiet kollha involuti juru r-rieda politika meħtieġa biex tiġi garantita dik l-istabbiltà;

3.  Jilqa' b'sodisfazzjon il-komunikazzjoni mill-Kummissjoni dwar il-qafas ta' politika tal-UE biex jgħin lill-pajjiżi li qed jiżviluppaw jindirizzaw l-isfidi fil-qasam tas-sigurtà tal-ikel; iqis, madankollu, li l-kriżi tal-ikel dinjija tirrappreżenta, mhux biss diżastru umanitarju mingħajr preċedenti, iżda wkoll theddida gravi għall-paċi u għas-sigurtà fid-dinja, u li, anki jekk il-Kummissjoni għandha tiġi rikonoxxuta għall-impenn tagħha li ssib soluzzjonijiet li jistgħu jsolvu l-faqar estrem ta' biljun persuna, l-Unjoni Ewropea u l-Istati Membri għandhom, b'urġenza, jagħmlu investimenti ġodda fl-agrikoltura u fl-iżvilupp rurali, fuq kollox minħabba t-test il-ġdid tal-PAK, li jdaħħal mekkaniżmi intiżi għall-ġbir ta' stokkijiet dinjin kbar biżżejjed ta' prodotti bażiċi tal-ikel, ineħħu l-ostakli tagħhom stess għall-kummerċ u jtaffu d-dejn tal-aktar pajjiżi milquta; jemmen li l-Kummissjoni għandha tqis iżjed il-kwistjoni tas-sigurtà tal-ikel f'xi pajjiżi meta tikkalkula l-għajnuna għall-iżvilupp;

4.   Jilqa’ ż-żewġ Komunikazzjonijiet mill-Kummissjoni dwar l-għajnuna umanitarja tal-ikel u s-sigurtà tal-ikel; jitlob li ż-żewġ komunikazzjonijiet ikunu implimentati b'mod koerenti u koordinat biex jiġu indirizzati aħjar il-kawżi ewlenin tal-ġuħ, in-nuuqas ta' nutrizzjoni u n-nuqqas ta' sigurtà tal-ikel, flimkien mal-kwistjoni tat-tqassim tal-ikel bejn u fi ħdan il-pajjiżi, b’enfasi partikolari fuq l-aktar partijiet foqra u marġinalizzati tas-soċjetà; jistieden lill-Istati Membri jappoġġjaw il-proċess tal-iżvilupp tal-pjan ta’ implimentazzjoni b’appoġġ għall-Qafas ta’ Politika dwar is-Sigurtà tal-Ikel u biex jadottawh meta jitlesta; jilqa’ l-fatt li attenzjoni speċjali tingħata lil dawk li jbagħtu l-aktar meta jseħħ xi diżastru, jiġifieri, in-nisa u t-tfal; iqis li meta sseħħ kriżi, huwa essenzjali li tiġi assigurata l-kapaċità tal-komunità biex takkwista l-ikel fuq medda qasira ta’ żmien u anki fuq dik twila, ifakkar li l-mekkaniżmi għall-emerġenza ma għandhomx ikunu soluzzjoni fit-tul; jesprimi tħassib serju dwar l-effetti negattivi ta’ tali mekkaniżmi speċjalment fuq l-ekonomiji lokali; jenfasizza li politika ta’ żvilupp sostenibbli għandha tkun ibbażata fuq approċċi fit-tul u ta’ kooperazzjoni;

5.   Jenfasizza l-importanza li tissaħħaħ ir-rabta bejn l-għajnuna, ir-riabilitazzjoni u l-iżvilupp; jitlob għall-mobilizzazzjoni ta' iktar mezzi biex jiġi żgurat li l-għajnuna tkompli tingħata u biex id-dibattitu jikkonċentra aktar fuq il-flessibilità u l-kumplementarjetà tal-istrumenti finanzjarji eżistenti; jitlob titjib fid-djalogu u l-koordinazzjoni bejn l-organizzazzjonijiet umanitarji u l-aġenziji tal-iżvilupp;

6.   Jistieden lill-UE biex tivvaluta l-impatt tal-iżvilupp tal-proposti tagħha dwar ir-riforma tal-PAK sabiex titjieb il-koerenza bejn l-objettivi tal-politika ta’ żvilupp tal-PAK u tal-UE;

7.   Jistieden lill-UE żżid is-sostenn favur produzzjoni agrikola sostenibbli min-naħa ta' azjendi agrikoli żgħar, tal-biewa u ta' daqs medju, prinċipalment, għall-konsum lokali, fil-programmi tagħha ta’ għajnuna għall-iżvilupp u tinvesti fi pjanijiet immexxija fuq livell nazzjonali li għandhom jiġu implimentati fuq livell lokali b’kooperazzjoni mal-bdiewa u r-rappreżentanti tagħhom, mal-awtoritajiet lokali u reġjonali u l-organizzazzjonijiet tas-soċjetà ċivili; jenfasizza l-ħtieġa għal aktar investimenti pubbliċi fir-riċerka għal sistemi ta’ produzzjoni agroekoloġiċi sostenibbli li jtejbu wkoll b’mod konsiderevoli il-produttività u l-kompetittività tas-settur agrikolu u rurali;

8.   jinsisti fuq il-ħtieġa għal approċċ ta’ sħubija mal-firxa sħiħa ta’ dawk interessati fl-iżvilupp dwar is-sigurtà tal-ikel, b’mod partikolari l-awtoritajiet lokali u reġjonali u l-organizzazzjonijiet tas-soċjetà ċivili; jenfasizza li minħabba l-qrubija tagħhom għat-territorji u l-popolazzjonijiet lokali u l-kapaċità tagħhom biex jikkoordinaw l-azzjonijiet minn atturi differenti, l-awtoritajiet lokali u reġjonali għandhom rwol essenzjali bħala pjattaforma intermedjarja u ta’ żvilupp; jenfasizza li d-Djalogu Strutturat bejn l-Isituzzjonijiet u l-organizzazzjonijiet tas-soċjetà ċivili għandu jiġi estiż għall-kwistjonijiet tas-sigurtà tal-ikel;

9.   Jistieden lill-Kummissjoni, lill-Istati Membri u lid-donaturi oħra tal-għajnuna għall-iżvilupp, inklużi l-NGOs, jimmiraw l-investiment tagħhom ħafna aktar fuq is-settur agrikolu sabiex il-popolazzjoni lokali jkollha raġuni biex ma titlaqx minn fejn hi;

10. Itenni l-importanza tal-promozzjoni tal-agrikoltura fil-pajjiżi li qed jiżviluppaw u l-importanza li jiġi allokat sehem xieraq tal-għajnuna tal-UE għall-iżvilupp barrani (ODA) għall-iżvilupp tas-settur agrikolu; jiddispjaċih li kien hemm tnaqqis kbir ħafna fil-livell ta' għajnuna għall-iżvilupp allokat għall-agrikoltura mis-snin tmenin 'l hawn u jilqa' b'sodisfazzjon ir-rikonoxximent tal-ħtieġa li din it-tendenza tinbidel; jistieden lill-Kummissjoni tagħti prijorità lill-agrikoltura fl-għajnuna għall-iżvilupp tagħha, inkluża l-għajnuna lill-bdiewa biex ikollhom aċċess għas-swieq;

11. Ifakkar li billi l-komunitajiet l-aktar fil-bżonn għandhom tendenza jgħixu fuq l-agrikoltura, l-iżvilupp tal-agrikoltura sostenibbli u kunsiderazzjoni serja tal-valutazzjonijiet tal-IAASTD jirrappreżentaw għalhekk kundizzjoni neċessarja biex jintlaħaq l-Għan ta' Żvilupp tal-Millennju 1; jemmen li l-biedja fuq skala żgħira tista', b'mod partikolari, tirrappreżenta tweġiba għall-isfida tas-sigurtà tal-ikel billi ssaħħaħ ir-rwol fundamentali tan-nisa, permezz tal-ipproċessar tal-prodotti fil-post u l-ġeneralizzazzjoni tas-self u tal-mikrokrediti ,u bl-involviment ta' kooperattivi tal-produtturi ż-żgħar bħala parteċipanti ewlenin fid-definizzjoni ta' politiki agrikoli kummerċjali effiċjenti;

12. Ifakkar li l-iżvilupp tas-settur agrikolu jeħtieġ investimenti fuq medda twila ta’ żmien, li jkopru l-katina tal-produzzjoni kollha, mill-produttur sal-konsumatur; u li dan ifisser li huwa importanti li jiġu stabbiliti l-infrastrutturi meħtieġa, bħal rotot, konnessjonijiet mas-swieq u informazzjoni fir-rigward tas-swieq innifishom u fir-rigward tad-diversifikazzjoni eventwali tal-prodotti;

13. Jemmen li strateġija ta' sostenn għall-pajjiżi li qed jiżviluppaw għandha tinkludi pjan edukattiv u ta' taħriġ, li jxeqleb lejn il-ħolqien tal-impjiegi, u li permezz tiegħu ż-żgħażagħ jkunu jistgħu jkomplu jitgħallmu xjenza agrikola sostenibbli bil-għan li jipproduċu forom ta' produzzjoni speċjalizzati, sostenibbli kif ukoll aqwa minn dawk preċedenti, u b'hekk jiġi limitat l-eżodu miż-żoni rurali u jitnaqqas il-faqar;

14. Jenfasizza, f'dan ir-rigward, kemm huwa importanti li l-bdiewa, minbarra li jissodisfaw il-ħtiġijiet alimentari tagħhom, għandhom jiġġeneraw id-dħul li għandhom bżonn għall-edukazzjoni u l-investiment;

15. Jenfasizza li huwa kruċjali li l-organizzazzjonijiet agrikoli lokali jiġu involuti fl-istadji differenti tal-implimentazzjoni ta' politika agrikola fil-pajjiżi li qed jiżviluppaw, u li għalhekk l-Unjoni Ewropea għandha tagħmel ħilitha biex issaħħaħ lill-assoċjazzjonijiet lokali, biex tiżgura li jitħarsu l-interessi tal-komunitajiet lokali;

16. Jaqbel li l-programmi tal-UE għall-għajununa għandhom jiffokaw prinċipalment fuq produzzjoni tal-ikel fuq skala żgħira u medja, kif rakkomandat fir-rapport IAASRD, u fuq l-approċċi li jsaħħu l-bijodiversità, jipprevjenu d-degradazzjoni tal-art fertili u jippromwovu prassi ta' dħul estern baxx (LEI) filwaqt li jżidu l-eżitu agrikolu fil-pajjiżi li qegħdin jiżviluppaw, li jista' jinkinseb billi l-azjendi agrikoli żgħar u ta' daqs medju ikollhom aċċess aħjar għas-self u għal mikrokrediti b'rati tal-imgħax u kundizzjonijiet ġusti;

17. Iqis li l-UE għandha tikkontribwixxi għall-promozzjoni tal-użu ta’ żerriegħa minn varjetajiet lokali li tkun adattata għall-kundizzjonijiet klimatiċi fil-pajjiżi li qed jiżviluppaw u li tkun tista’ tinħażen, tiġi kkummerċjalizzata u fornita faċilment lill-bdiewa, peress li ma jkollhiex drittijiet tal-proprjetà intellettwali marbuta magħha;

18. Jistieden lill-UE u l-pajjiżi li qed jiżviluppaw, jiżviluppaw kapaċitajiet konġunti għar-riċerka u t-taħriġ fir-rigward ta' metodi tal-biedja sostenibbli u teknoloġiji ġodda, l-aktar permezz ta’ sħubiji pubbliċi privati u intrapriżi konġunti, li tinkludi l-produzzjoni tal-valur miżjud fil-punt tal-ġbir u l-ħżin tal-ikel permezz tal-imballaġġ u l-ipproċċessar;

19. Jinsisti fuq il-bżonn li tissaħħaħ ir-riċerka abbażi ta’ finanzjament pubbliku u għat-trażmissjoni tal-għarfien fil-qasam tal-agrikoltura sostenibbli, billi jiġu promossi l-attivitajiet li jsaħħu l-pożizzjoni tal-azjendi agrikoli żgħar fl-ottimizzazzjoni tal-produzzjoni agrikola, isir adattament għall-isfidi li jġibu t-tibdil fil-klima u d-domanda akbar fuq ir-riżorsi.

20. Jitlob it-twaqqif ta’ mekkaniżmi li jipproteġu l-foresti, in-nies tal-post, l-artijiet mistagħdra u l-prattiki agrikoli tradizzjonali fil-pajjiżi terzi li jesportaw.

21. Iqis, li fid-dawl tal-popolazzjoni dinjija li kulma tmur qed tikber u ż-żieda fil-pressjoni fuq ir-riżorsi naturali, huwa essenzjali li jiġu stabbiliti forom ta’ produzzjoni iktar sostenibbli, effikaċi fl-użu tal-enerġija u li jiffrankaw l-enerġija, fil-livell dinji; jitlob li l-allokazzjoni tal-għajnuna mill-UE u mill-Istati Membri tagħha tkun marbuta mal-iżvilupp ta’ sistemi ta’ produzzjoni agrikola sostenibbli u awtosuffiċjenti f’termini ta’ użu ta’ enerġija, u li parti minn din l-għajnuna tikkontribwixxi għat-twaqqif ta’ faċilitajiet għall-ġenerazzjoni ta’ enerġija rinnovabbli (pereżempju bbażati fuq ir-riħ u x-xemx) u ġestjoni tajba tal-ilma;

22. Jenfasizza li fil-kuntest tan-negozjati tan-NU dwar il-Fond għat-Tibdil fil-Klima, l-UE għandha tagħmel ħilitha biex tiżgura li parti sostanzjali mill-fondi allokati lill-pajjiżi li qed jiżviluppaw tintuża b'mod effikaċi biex jisaħħew il-politiki agrikoli lokali, filwaqt li jitqiesu kif xieraq l-iżvilupp soċjali u ambjentali sostenibbli;

23. Jenfasizza li jekk irridu naraw lill-azjendi agrikoli żgħar fil-pajjiżi li qed jiżviluppaw, speċjalment in-nisa, ikunu mhux biss sostenibbli iżda wkoll f'pożizzjoni li jiżviluppaw il-potenzjal tal-produzzjoni tagħhom, dawn għandhom ikollhom aċċess akbar għall-mikrokreditu, inkluż il-mikrokreditu bla profitt, għal investiment f’mekkaniżmi mtejba ta’ żrieragħ, fertilizzanti u irrigazzjoni u l-firxa meħtieġa ta’ strumenti għall-protezzjoni tal-uċuħ biex jipproteġu l-għelejjel tagħhom mill-insetti u l-mard;

24. Jenfasizza l-importanza ta’ żieda fl-iskala kemm tal-attivitajiet u l-politiki speċifiċi għan-nutriment kif ukoll dawk sensittivi li jaffettwaw in-nutriment u biex jiġu allinjati l-interventi tal-kontribwenti f’das-settur fil-livell tal-pajjiż, tal-UE u dak internazzjonali;

25. Jenfasizza li l-azjendi agrikoli żgħar fil-pajjiżi li qed jiżviluppaw għandhom jingħataw aċċess akbar għad-drittijiet tal-proprjetà, li jippermettu sidien ta’ biċċa art żgħira jagħtu prova tas-sjieda u b’hekk ikollhom garanzija għas-self meħtieġ biex iżidu l-produzzjoni tagħhom;

26. Jistieden lill-Kummissjoni ssostni l-kapaċitajiet tal-agroproċessar fil-pajjiżi sħab sabiex jitnaqqas it-telf wara l-ħsad, jittawwal il-perjodu ta’ skadenza u l-preservazzjoni tal-prodotti tal-ikel u jiġu żviluppati faċilitajiet aħjar għall-ħżin, u b’hekk jiġi ostakolat it-telf mit-taħsir, li bħalissa huwa għoli fil-pajjiżi li qed jiżviluppaw fid-dinja kollha u jittejjeb l-aċċess għas-suq lokali u jinħoloq xogħol deċenti għall-popolazzjoni lokali; jistieden lill-UE u lill-Istati Membri tagħha biex jagħmlu kull sforz biex jiffaċilitaw it-trasferiment tat-teknoloġija, il-ħila esperta u l-appoġġ bil-bini tal-kapaċitajiet lill-pajjiżi li qed jiżviluppaw;

27. Jistieden lill-Kummissjoni biex tikkunsidra r-rwol tal-artijiet aridi jew semi aridi (ASAL), b’attenzjoni speċjali fuq il-bhejjem ladarba l-akbar provvista tal-laħam għaż-żoni l-aktar urbanizzati tiġi provduta mir-reġjuni ASAL;

28. Ifakkar li l-aċċess għal alimentazzjoni adegwata huwa dritt universali tal-bniedem; iħeġġeġ lill-pajjiżi sħab jimplimentaw il-linji gwida volontarji FAO dwar id-dritt għall-ikel;

29. Ifakkar li l-iżvilupp agrikolu għandu jissejjes fuq id-dritt għall-ikel u d-dritt li wieħed jipproduċi l-ikel; jinsisti li l-UE għandha tirrikonoxxi u tiddefendi l-bżonn li l-pajjiżi li qed jiżviluppaw jiksbu s-sigurtà tal-ikel (kemm f’termini kwantitattivi kif ukoll kwalitattivi), u d-dritt tagħhom li jkunu kemm jista’ jkun awtosuffiċjenti; jenfasizza f’dan ir-rigward l-impenn tal-UE li telimina gradwalment is-sussidji fuq l-esportazzjonijiet, b'mod parallel ma' ċerti miżuri li qed jittieħdu minn sħab tad-WTO; jenfasizza fl-istess waqt il-bżonn li tiġi żgurata ugwaljanza fl-aċċess għall-ikel f’dawn il-pajjiżi għall-popolazzjonijiet lokali;

30. Jitlob ir-rikonoxximent tal-kunċett tas-sigurtà tal-ikel, definit bħala l-kapaċità ta’ pajjiż jew reġjun li jimplimenta b’mod demokratiku l-politiki agrikoli u tal-ikel proprji tiegħu, flimkien mal-prijoritajiet u l-istrateġiji tiegħu permezz ta' mudell agrikolu sostenibbli; jenfasizza li l-kapaċitajiet tal-produzzjoni domestika f’uħud mill-pajjiżi li qed jiżviluppaw jistgħu ma jkoprux il-bżonnijiet u li l-kisba tas-sigurtà tal-ikel fuq terminu twil ta’ żmien tesiġi li jitnaqqsu d-dipendenzi tal-importazzjoni;

31. Ifakkar l-importanza ta' approċċ għall-governanza tas-sigurtà tal-ikel li jinvolvi qafas globali li jerġa' jqiegħed l-enfasi fuq il-politika alimentari lil hinn mill-għajnuna alimentari, fuq il-kooperazzjoni bejn id-donaturi u bejn id-donaturi u l-benefiċjarji, kif ukoll fuq ir-rwol kruċjali tal-politiki tal-pajjiżi benefiċjarji li jimpenjaw ruħhom li jipprovdu kundizzjonijiet pubbliċi bażiċi bħall-paċi interna u l-investiment fl-infrastruttura rurali;

32. Jilqa' d-deċiżjoni dwar l-integrazzjoni tad-dimensjoni alimentari fil-programmi tal-UE jistieden lill-Kummissjoni tfassal Komunikazzjoni speċifika dwar din id-dimensjoni; jitlob li l-aspett alimentari jiddaħħal b'mod permanenti fil-politiki dwar is-siġurtà tal-ikel u għal interventi fis-settur tal-agrikoltura;

33. Jistieden lill-Kummissjoni tirrikonoxxi r-rwol fundamentali tan-nisa, bħala azjendi agrikoli żgħar, fis-sigurtà tal-ikel u n-nutriment, u tinvesti fi programmi li jsostnuhom b’mod partikolari; ifakkar li l-importanza tan-nisa fil-kisba tas-sigurtà tan-nutriment għalihom infushom u għat-tfal tagħhom għad trid tkun rikonoxxuta kif jixraq u, għalhekk, l-għajxien tan-nisa jrid ikun assigurat u l-għarfien dwar in-nutriment adegwat irid jiżdied; jinsisti dwar il-fatt li l-istrateġija tal-UE għandha wkoll tiffoka fuq l-implimentazzjoni tal-azzjonijiet biex jiġi assigurat li dawk l-aktar vulnerabbli, speċjalment f’żoni rurali, jkunu jistgħu jibbenefikaw mill-opportunitajiet tat-taħriġ agrikolu, l-edukazzjoni dwar in-nutriment, is-saħħa u l-kundizzjonijiet tax-xogħol tajbin u sigurtà f’każ li din tkun meħtieġa;

34. Jistieden lill-Kummissjoni u lill-organizzazzjonijiet internazzjonali bħall-FAO biex ikomplu l-proċessi ta’ konsultazzjoni li għaddejjin bħalissa mas-soċjetà ċivili globali u atturi mhux statali, b’mod partikolari mal-organizzazzjonijiet tal-bdiewa, tas-sajjieda u tar-raħħala, li l-involviment u l-kontribuzzjoni tagħhom hija vitali bil-għan li jiġu adottati miżuri speċifiċi biex titjieb il-produzzjoni tal-ikel;

35. Huwa tal-fehma li, fid-dawl tal-previżjonijiet tal-FAO dwar il-popolazzjoni, li jindikaw li, sal-2025, aktar minn nofs il-popolazzjoni tad-dinja li qed tiżviluppa (madwar 3.5 miljun ruħ) se tkun qed tgħix f'żoni urbani, politika ta' appoġġ għall-ortikoltura urbana tista' toffri mod biex wieħed ma jibqax jgħix fil-faqar, meta jitqiesu l-ispejjeż baxxi inizjali, iċ-ċikli qosra tal-produzzjoni u l-ħsad kbir meta mqabbel mal-ħin ta' xogħol, d-daqs tal-artijiet u l-volumi tal-ilma użati, u minbarra l-fatt li l-bliet ġodda jistgħu jsiru aktar ħodor;

36. Iħeġġeġ lill-UE ssostni l-inizjattiva tan-NU dwar livell minimu ta’ protezzjoni soċjali, li jkun ta’ għajnuna biex jintlaħqu l-ħtiġijiet tal-ikel bażiċi tal-popolazzjonijiet foqra billi jipprovdu lin-nies foqra u vulnerabbli, inklużi dawk b’xi diżabbiltà, b'għotja ta' flus bażika li permezz tagħha jkunu jistgħu jakkwistaw prodotti tal-ikel bażiċi u b'servizzi essenzjali sabiex tissaħħaħ is-sigurtà tal-ikel u jitjieb in-nutriment – elementi fundamentali għall-materjalizzazzjoni ta' approċċ ibbażat fuq id-drittijiet tal-bniedem;

37. Iħeġġeġ lill-Kummissjoni tiffoka fuq in-nuqqas ta’ nutriment, speċjalment in-nuqqas ta’ nutriment tal-omm u tat-trabi, u biex jiġu integrati strateġiji sodi u multisettorjali dwar in-nutriment fil-politika tagħha għall-iżvilupp;

38. Jenfasizza d-dikjarazzjoni mir-Rapporteur Speċjali tan-NU dwar id-dritt għall-ikel li l-parteċipazzjoni tal-bdiewa hija vitali għas-suċċess tal-prattiki agroekoloġiċi u tistimola lill-bdiewa jkomplu jitgħallmu; għalhekk jinkuraġġixxi lill-produtturi tal-ikel fil-pajjiżi li qed jiżviluppaw biex jinvolvu ruħhom fl-NGOs globali u lokali u fil-kooperattivi tal-bdiewa;

39. Jistieden lill-Kummissjoni u lill-Kunsill jippromwovu u jaħdmu favur l-implimentazzjoni ta' strumenti ta’ finanzjament innovattivi, bħal pereżempju taxxa internazzjonali fuq it-tranżazzjonijiet finanzjarji; ifakkar li dawn l-istrumenti għandhom jiżdiedu mal-objettiv, iffissat min-Nazzjonijiet Uniti, li jingħata 0.7% tal-ING lill-koperazzjoni għall-iżvilupp; jenfasizza, fl-istess ħin, li hija r-responsabbiltà tal-pajjiżi li qed jiżviluppaw li jżidu l-isforzi tagħhom fil-qasam fiskali, prinċipalment fil-ġbir tat-taxxi u l-ġlieda kontra l-evażjoni tat-taxxa;

Miżuri effikaċi kontra l-volatilità tal-prezzijiet tal-ikel u l-akkwist bla rażan tal-art: il-limitazzjoni tal-ispekulazzjoni fis-swieq tal-prodotti bażiċi tal-ikel u agrikoli

40. Jesprimi t-tħassib tiegħu li s-sena 2008, is-sena tal-kriżi globali tal-ikel, kienet ukoll is-sena li fiha ġie prodott l-akbar ammont ta' qamħ fl-istorja tad-dinja, u jenfasizza f'dan l-isfond ir-rwol negattiv tal-ispekulazzjoni fuq l-indiċijiet tal-prezzijiet tal-komoditajiet;

41. Jiġbed l-attenzjoni għall-kawżi strutturali tal-volatilità tal-prezzijiet u jenfasizza bil-qawwi li minħabba spekulazzjoni fuq id-derivati tal-komoditajiet essenzjali l-volatilità tal-prezzijiet marret ħafna għall-agħar; japprova l-konklużjonijiet tar-Rapporteur Speċjali tan-NU dwar id-dritt għall-ikel rigward ir-rwol tal-investituri kbar li jinfluwenzaw l-indiċi tal-prezzijiet tal-komoditajiet;

42. Jenfasizza li riċentement għadd ta’ fatturi oħra imprevedibbli affettwaw ukoll ħażin l-istabbiltà fis-swieq tal-ikel, inkluż il-katastrofi fil-Ġappun, mewġa mingħajr mingħajr preċedenti ta’ inkwiet politiku li ħakem ħafna pajjiżi fl-Afrika ta’ Fuq u fil-Lvant Qrib, żieda kbira oħra fil-prezzijiet taż-żejt, inċertezza mtawla fis-swieq finanzjarji u fl-ekonomija dinjija kollha kellhom impatt;

43. Jemmen li l-ispekulazzjoni finanzjarja u ż-żieda fil-liberalizzazzjoni fis-swieq finanzjarji u fil-kummerċ tal-prodotti agrikoli jikkontribwixxu ħafna għall-instabbiltà tal-prezzijiet, u li jeħtieġ li jkun hemm mekkaniżmi regolatorji li jiżguraw ċertu livell ta’ stabbiltà tas-suq; iqis li għandha tiżdied it-trasparenza tas-swieq biex ikun żgurat dħul ġust għall-bdiewa u settur agrikolu vijabbli li jipprovdi s-sigurtà tal-ikel; jitlob b’mod partikolari li jkun hemm identifikazzjoni ċara tal-protagonisti involuti fil-kummerċ tal-ikel u analiżi fil-fond tal-mekkaniżmi ta’ trażmissjoni tal-ispekulazzjoni fuq il-prodotti tal-ikel fis-swieq lokali u dinjija;

44. Iħeġġeġ lill-Kummissjoni u lill-Istati Membri jieħdu azzjoni konkreta biex jindirizzaw b'mod effikaċi l-ispekulazzjoni finanzjarja fuq il-qmuħ u l-ikel;

45. Jemmen li d-derivati tal-komoditajiet huma differenti minn derivati finanzjarji oħra u li l-aċċess għal dan is-suq għandu jkun irregolat aħjar;

46. Jemmen li l-Unjoni Ewropea għandha tieħu passi biex iġġib l-istokkijiet dinjija tal-ikel għal li kienu, li wara li laħqu l-anqas livell tagħhom fl-2007, ikkontribwixxew għal spekulazzjoni li ilha taffettwa l-prezzijiet tal-prodotti agrikoli f'livell dinji, b'effetti allarmanti fuq il-pajjiżi li qed jiżviluppaw;

47. Jitlob żieda, ġestjoni aħjar u ħażna tar-riżervi fiżiċi tal-qmuħ u ikel fil-livell nazzjonali u reġjonali u tisħiħ tal-koordinazzjoni u monitoraġġ internazzjonali, b’hekk ipatti għall-volatilità tal-prezzijiet tal-ikel u jippermetti rispons aħjar u aktar mgħaġġel għall-kriżi tal-ikel;

48. Jesprimi tħassib profond rigward l-akkwisti tal-artijiet fuq skala kbira attwalment imwettqa minn investituri barranin fil-pajjiżi li qed jiżviluppaw, li hija għad-detriment tal-bdiewa fuq skala żgħira lokali u għas-sigurtà tal-ikel lokali, reġjonali u nazzjonali; jistieden għalhekk lill-UE tħeġġeġ il-gvernijiet tal-pajjiżi li qegħdin jiżviluppaw, jimpenjaw ruħhom għar-riforma tal-artijiet sabiex jaċċertaw it-titoli tal-artijiet għall-bdiewa indiġeni u għall-bdiewa ż-żgħar u ta' daqs medju, speċjalment in-nisa, u biex jipprevjenu prassi ta' ħtif tal-artijiet minn korporazzjonijiet;

49. Jenfasizza li l-art għandha tkun aċċessibbli għal kulħadd, u li jeħtieġ li jitħarsu d-drittijiet għal fond, tal-kera u tal-użu tal-art tal-żajendi agrikoli żgħar flimkiem mal-aċċess ta' komunitajiet lokali għar-riżorsi naturali, sabiex jiġi evitat aktar akkapparrar tal-artijiet, kif diġà qed jiġri b'mod allarmanti f'xi reġjuni tad-dinja, speċjalment fl-Afrika;

50. Jittama li l-programmi Ewropej ta’ għajnuna u azzjoni jisfruttaw l-għarfien dwar il-produzzjoni tal-ikel tal-bdiewa lokali;

51. Iħeġġeġ l-adozzjoni tal-linji gwida volontarji tal-FAO dwar l-akkwisti tal-art u jassigura l-implimentazzjoni parteċipatorja tagħhom, iżda jitlob ukoll regolamenti nazzjonali u internazzjonali strettament vinkolanti dwar l-akkwist tal-artijiet; jenfasizza li n-negozjati kuntrattwali għandhom ikunu trasparenti b’tali mod li jippermettu l-parteċipazzjoni tal-parlamenti u tar-rappreżentanti eletti tal-awtoritajiet reġjonali u lokali wara konsultazzjoni mas-soċjetà ċivili;

52. Iqis li jeħtieġ li jiġi garantit li l-komunitajiet u l-istituzzjonijiet lokali jkollhom is-setgħa u l-kapaċità li jinnegozjaw sabiex ikunu jistgħu jiżviluppaw il-biedja lokali; jipproponi t-tfassil ta’ kodiċi ta’ mġiba biex l-investituri jingħataw inċentivi qawwija biex jibbażaw l-attivitajiet tagħhom fuq iż-żieda tal-produttività agrikola u tal-mezzi ta’ għajxien tal-popolazzjonijiet lokali;

53. Jiġbed l-attenzjoni għall-akkwist mhux biss tal-art iżda wkoll tal-liċenzji tas-sajd li jsir minn investituri barranin; jenfasizza l-ħtieġa tat-trasparenza u t-tħollija tal-parteċipazzjoni fin-negozjati kuntrattwali għall-parlamenti nazzjonali u s-soċjetà ċivili, kif ukoll il-ħtieġa biex tinżamm lista tal-ftehimiet konklużi fid-dominju pubbliku;

54. Jitlob għall-istabbiliment ta' mekkaniżmi li jipprevjenu "l-użu ta' prezzijiet baxxi" biex il-bdiewa lokali jitqaċċtu 'l barra mis-suq u l-kapaċità tagħhom li jipproduċu l-ikel għall-popolazzjonijiet lokali;

55. Ifakkar lill-Kummissjoni u lill-pajjiżi sħab dwar l-effetti pożittivi ta’ sistemi ta’ produzzjoni agroekoloġiċi fir-rigward tal-mitigazzjoni tat-tibdil fil-klima u li s-sigurtà tal-ikel fit-tul tiddependi fuq kif se jiġi indirizzat l-impatt ambjentali tal-produzzjoni, sabiex ir-riżorsi naturali u l-provvisti tal-ikel jiġu protetti; jenfasizza madankollu li l-iskop prinċipali tal-għajnuna agrikola lil reġjuni b'nuqqas ta' sigurtà tal-ikel urġenti jew ġuħ għandu jkun biex tiżdied il-produzzjoni tal-ikel u l-aċċess għall-ikel;

56. Jilqa’ b’sodisfazzjon l-isforzi tal-G20 biex jindirizzaw il-volatilità tal-prezzijiet u s-sigurtà tal-ikel;

57. Jesprimi t-tħassib profond tiegħu rigward it-tnaqqis tar-riżorsi naturali u ż-żamma tal-kundizzjonijiet effettivi għall-produzzjoni agrikola, inklużi l-kwalità tal-ħamrija, l-aċċess għall-ilma u l-prevenzjoni tat-tniġġis ambjentali; jinsisti fuq il-fatt li l-partijiet kollha interessati, partikolarment il-bdiewa, l-awtoritajiet lokali u reġjonali u l-organizzazzjonijiet tas-soċjetà ċivili, għandu jkollhomrwol sinifikanti fl-iżvilupp ta’ strateġija għal żvilupp agrikolu sostenibbli;

Il-Koerenza tal-Politiki għall-Iżvilupp: l-impatt tal-politiki tal-UE dwar is-sigurtà alimentari globali

58. Ifakkar li d-dritt għall-ikel għandu jieħu preċedenza assoluta fuq għanijiet għas-sigurtà enerġetika; jitlob għall-iffriżar tal-miri tal-istrateġija enerġetika tal-UE sakemm isiru aktar valutazzjonijiet ta' impatt ;

59. Jemmen li s-sigurtà tal-ikel m’għandhiex tkun ipperikolata minħabba l-iżvilupp tal-agrofjuwils; jitlob għalhekk li jittieħed approċċ ibbilanċjat li jagħti prijorità lill-ġenerazzjoni l-ġdida ta’ agrofjuwils li jużaw skart mill-biedja u mill-forestrija (skart ta’ tiben u pjanti oħra, demel tal-annimali, bijogass, eċċ.) minflok pjanti tal-ikel, biex tiġi evitata sitwazzjoni ta’ kompetizzjoni bejn il-produzzjoni tal-ikel u l-produzzjoni tal-enerġija; iqis ukoll li l-UE għandha tiżgura li l-importazzjoni ta’ agrofjuwils minn pajjiżi li qed jiżviluppaw issir fir-rispett tal-kriterji ta’ sostenibbiltà;

60. Iħeġġeġ l-adozzjoni ta' perspettiva aktar globali fit-tfassil tal-PAK wara l-2013 li għandu jkun konformi mal-prinċipju "tagħmilx ħsara", għas-swieq tal-ikel f'pajjiżi li qed jiżviluppaw;

61. Jistieden lill-Kummissjoni twettaq valutazzjoni ta' impatt tal-PAK li se tanalizza l-impatt estern tagħha fis-swieq internazzjonali tal-ikel u fuq is-sigurtà tal-ikel f'pajjiżi li qed jiżviluppaw;

62. Iħeġġeġ lill-Kummissjoni tinvestiga l-problema tal-ħela tal-ikel fl-UE, billi sa 40% tal-ikel disponibbli, inkluż ikel prodott f’pajjiżi li qed jiżviluppaw u esportat lejn l-UE, hu maħsub li jintrema, u biex tipproponi miżuri effikaċi biex tindirizza l-problema u jitjiebu l-mudelli tal-konsum;

63. Jitlob li gradwalment jitneħħew għalkollox is-sussidji tal-esportazzjoni kif ukoll l-inċentivi kollha l-oħra fil-PAK li jirriżultaw f'miżuri li jgħawġu l-kummerċ;

64. Jinsisti li l-Kummissjoni taċċerta li d-dimensjoni esterna tar-riforma attwali tal-Politika Komuni dwar is-Sajd tkun integrata mal-politiki ta’ żvilupp tal-UE.

65. Jistieden lill-Kummissjoni biex tassigura li l-Kodiċi tal-Kondotta tal-FAO għal Industrija tas-Sajd Responsabbli qed tiġi rispettata fil-pajjiżi fejn l-UE għandha Ftehimiet ta’ Sħubija dwar l-Industrija tas-Sajd, speċjalment rigward ir-rakkomandazzjoni biex jingħata aċċess preferenzjali lis-sajjieda artiġjanali lokali għar-riżorsi;

66. Jenfasizza li s-settur tal-industrija tas-sajd f’ħafna pajjiżi huwa kruċjali għall-impjiegi u s-sigurtà tal-ikel u għalhekk il-pajjiżi li qed jiżviluppaw kollha għandhom ikunu eliġibbli għall-għajnuna tal-UE lis-settur biex jiżviluppaw l-industrija tas-sajd sostenibbli tagħhom stess, ir-riċerka, il-kontroll u l-infurzar biex jikkumbattu sajd illegali mhux rappurtat u mhux regolat;

67. Jitlob riformi li jespandu l-opportunitajiet għall-aċċess tas-suq għall-pajjiżi li qed jiżviluppaw u jippermettulhom joperaw b'mod kompetittiv fis-swieq nazzjonali u reġjonali proprji tagħhom;

68. Ifakkar li l-Unjoni Ewropea għandha tiżgura konsistenza massima bejn il-politiki tagħha ta' kooperazzjoni u ta' żvilupp u l-politiki kummerċjali tagħha, filwaqt li tqis il-ħtiġijiet u l-preokkupazzjonijiet kemm tal-Istati Membri kif ukoll tal-pajjiżi li qed jiżviluppaw;

69. Jemmen li l-UE għandha tappoġġa l-integrazzjoni reġjonali u l-iżvilupp sostenibbli tas-swieq lokali tal-ikel li ġej mis-settur agrikolu fil-pajjiżi li qed jiżviluppaw, u speċjalment ftehimiet kummerċjali reġjonali li jippromwovu l-produzzjoni vijabbli u sostenibbli u l-kapaċitajiet ta’ pproċessar fil-livell lokali, u għandha talloka parti sostanzjali tal-għajnuna tagħha għall-iżvilupp ta' dan l-għan;

70. Itenni t-tħassib tiegħu li l-istrateġija kummerċjali tal-UE kultant tonqos milli tipprovdi approċċ favur l-iżvilupp; jitlob għalhekk ftehimiet kummerċjali ġusti u favur l-iżvilupp, peress li huma element essenzjali ta’ rispons fil-konfront tas-sigurtà tal-ikel globali;

71. Ifakkar li s-sigurtà tal-ikel titlob il-koerenza u l-koordinazzjoni tad-diversi politiki settorjali fil-livell tal-Unjoni Ewropa, jiġifieri l-politika tal-iżvilupp, il-PAK, il-politika kummerċjali komuni, il-politika dwar l-enerġija u l-programmi ta’ riċerka,

72. Jemmen li l-Kummissjoni għandha tappoġġa l-għelejjel tal-proteina fl-Unjoni Ewropea biex l-Unjoni tingħata awtonomija akbar biex b'hekk tikkontribwixxi għad-diversifikazzjoni tal-agrikoltura fil-pajjiżi li qed jiżviluppaw, li spiss ikollhom politiki agrikoli li joperaw purament abbażi tal-esportazzjonijiet u l-aċċess għas-swieq esterni, għad-detriment tal-benesseri u l-ħtiġijiet tal-komunitajiet lokali;

73. Iħeġġeġ lill-Kummissjoni tiffoka fuq tħassib marbut mal-iżvilupp tan-negozjati EPA li għaddejin, twessa' l-lok għal manuvru tal-pajjiżi li qed jiżviluppaw fir-rigward tar-regoli tal-kummerċ u, b'mod partikolari, tapplika klawżoli ta' salvagwardja għall-iżvilupp endoġeneku u sostenibbli tal-kapaċità ekonomika fil-pajjiżi li qed jiżviluppaw; jenfasizza li l-użu ta’ restrizzjonijiet tal-esportazzjoni mill-pajjiżi li qed jiżviluppaw u l-protezzjoni għall-industrija li għadha tibda huma strumenti ta’ żvilupp li jistgħu jintużaw biex jissaħħew il-produzzjoni lokali u s-sigurtà tal-ikel; jitlob lill-Kummissjoni tieħu pożizzjoni qawwija favur l-iżvilupp matul in-negozjati WTO; jistieden lill-Kummissjoni tapplika approċċ ibbażat fuq id-drittijiet tal-bniedem għan-negozjati kummerċjali internazzjonali u biex fil-ftehimiet mal-pajjiżi terzi tapplika valutazzjonijet tal-impatt fuq id-drittijiet tal-bniedem;

74. Jistieden lill-Kummissjoni u lill-Istati Membri jappoġġjaw konvenzjoni bbażata fuq il-ħtiġijiet li fiha l-livell ta’ impenji għall-għajnuna tal-ikel tal-kontribwenti tkun konnessa mal-ħtiġijiet tan-nies u mal-volumi garantiti tax-xiri lokali fil-pajjiżi benefiċjarji;

75. Jesprimi t-tħassib profond tiegħu dwar in-nuqqas ta’ trasparenza, tal-informazzjoni provduta u tal-parteċipazzjoni tal-partijiet interessati rilevanti fin-negozjati attwali tal-FAC;

76. Jagħti istruzzjonijiet lill-President tiegħu sabiex jgħaddi din ir-riżoluzzjoni lill-Kunsill u lill-Kummissjoni.

(1) ĠU L 354, 31.12.2008, p. 62. (2) ĠU C 263E, 16.10.2008, p. 621. (3) ĠU C 279E, 19.11.2009, p. 71. (4) Test adottat, P7_TA(2011)0071. (5) ĠU C 292E, 20.11.2008, p. 201. (6) ĠU C 66E, 24.2.2010, p.10. (7) GU C 285E, 21.10.2010, p. 69. (8) ĠU C 161E, 31.5.2011, p.47. (9) Test adottat ACP-EU/100.879/10/fin.

In-nuqqas ta' sigurtà tal-ikel hija sfida għall-kisba tal-Għanijiet ta' Żvilupp tal-Millennju, speċjalment fl-Afrika sub-Saħarjana u l-pajjiżi l-anqas żviluppati. Fis-Summit dwar l-Għanijiet ta' Żvilupp tal-Millennju ta' Settembru 2010, ġie rrapportat li kien ċar li l-progress lejn il-kisba tal-objettivi relatati mal-ġuħ ma kienx biżżejjed. Skont il-FAO, in-numru stmat ta' nies bil-ġuħ fl-2010 kien ta' 925 miljun, numru li naqas mill-1 023 miljun fl-2009 imma xorta waħda aktar min-numru ta' persuni mhux mitmugħin biżżejjed fl-2008 (madwar 815 miljun). Hemm evidenza b'saħħitha li ż-żidiet fil-prezzijiet tal-ikel matul dawn l-aħħar xhur diġà kabbru dak in-numru allavolja għad m'hemmx numru uffiċjali disponibbli mill-FAO.

L-isfidi l-ġodda, inklużi t-theddid li qed jikber tal-ispekulazzjoni alimentari, it-tibdil fil-klima, l-akkwisti globali tal-art, il-bijofjuwils, it-telf tal-bijodiversità, id-degradazzjoni tal-art u l-pressjonijiet fuq l-ilma, ikkontribxxew biex ikomplu jaffetwaw il-qagħda tas-sigurtà tal-ikel fid-dinja. F'dan il-kuntest, il-problemi attwali madwar il-ġuħ u n-nuqqas ta' nutrizzjoni wasslu biex l-approċċ għas-sigurtà tal-ikel jiġi rieżaminat mhux biss fil-livell tal-UE imma anke f'dak globali.

Ir-Rapporteur tixtieq tasserixxi li l-Istituzzjonijiet Ewropej, kif ukoll l-Istati Membri għadhom ma qiegħdux il-qerda tal-faqar, tal-ġuħ u n-nuqqas ta' nutrizzjoni fl-ewwel post fuq l-aġendi tagħhom jew bħala objettiv fuq żmien medju jew twil fl-istrateġiji politiċi tagħhom, minkejja li impenjaw ruħhom b'mod qawwi fir-rigward tal-infurzar tad-drittijiet tal-bniedem għall-ikel, l-ilma, l-enerġija, eċċ. Bħala konsegwenza, sabiex l-Għanijiet ta' Żvilupp tal-Millennju jinkisbu sal-2015, se jkun kruċjali li jerġgħu jiġu eżaminati, u jinbidlu jekk ikun hemm bżonn, l-istrateġiji kollha tal-UE, bħal Ewropa 2020, l-Ewropa Globali, il-Politika dwar l-Enerġija, l-Istrateġija għall-Iżvilupp Sostenibbli u l-ġejjieni tal-koperazzjoni għall-iżvilupp tal-UE Barra minn hekk, ir-Rapporteur tistieden lill-UE u lill-Istati Membri jonoraw l-impenji tagħhom li jiġġieldu l-faqar u l-ġuħ fid-dinja fi ħdan l-organizzazzjonijiet internazzjonali bħall-Bank Dinji, il-Fond Monetarju Internazzjonali u l-Organizzazzjoni Dinjija tal-Kummerċ.

Apparti dan, ir-Rapporteur temmen li l-istituzzjonijiet u l-fundazzjonijiet privati jistgħu dejjem jikkomplementaw il-ħidma tal-organizzazzjonijiet governattivi fil-politiki dwar l-iżvilupp imma qatt ma jistgħu jissostitwixxuhom minħabba li m'għandhomx l-obbligu li jagħtu rendikont tagħhom infushom b'mod demokratiku. L-implimentazzjoni ta' taxxa fuq it-tranżazzjonijiet finanzjarji tista' tkun utli ħafna għall-ġenerazzjoni ta' fondi addizzjonali għall-qerda tal-faqar.

1. Qafas politiku tal-UE dwar is-sigurtà tal-ikel u nutrizzjonali: Approċċ ibbażat fuq id-drittijiet tal-bniedem għas-sostenibilità tal-operazzjonijiet agrikoli żgħar

Fil-qafas tad-dibattitu mġedded dwar is-sigurtà alimentari, il-Kummissjoni Ewropea, fil-31 ta' Marzu 2010, adottat Komunikazzjoni ġdida dwar is-sigurtà tal-ikel li għandha tikkostitwixxi l-bażi għal qafas komuni għal azzjoni għall-UE u l-Istati Membri tagħha.

Fir-rigward ta' "Inżidu d-disponibbiltà tal-ikel", ir-Rapporteur taqbel li l-assistenza tal-UE għandha tiffoka fuq il-produzzjoni sostenibbli tal-ikel fuq skala żgħir biex tiżdied id-disponibilità tal-ikel, peress li l-agrikoltura għadha tirfed l-ekonomiji rurali matul id-dinja li għadha qed tiżviluppa. Hemm bżonn li s-sistemi ta' produzzjoni agrikola jissawru mill-ġdid, biex jitbiegħdu mis-sistemi attwali li jiddependu ħafna fuq inputs esterni u ż-żejt u tingħata aktar attenzjoni għas-sistemi agroekoloġiċi b'inputs esterni baxxi u li jkunu adattati għall-kundizzjonijiet lokali u reġjonali. Għandha tingħata attenzjoni partikulari lin-nisa u l-bżonnijiet tagħhom peress li huma l-maġġoranza fost l-azjendi agrikoli żgħar.

Fir-rigward ta' "Intejbu l-aċċess għall-ikel", ir-Rapporteur tilqa' l-alternattiva politika ċara li "d-dritt għall-ikel" jiġi propost bħala pedament għall-qafas tal-UE. L-UE għandha tapplika approċċ abbażi tad-drittijiet għat-tfassil tal-politiki u l-istrateġiji dwar il-koperazzjoni bejn il-pajjiżi u l-programmi ta' koperazzjoni u għandha ssostni lill-gvernijiet fl-adozzjoni "tad-dritt għal ikel xieraq" fil-kostituzzjonijiet tagħhom. Apparti dan, l-UE u l-pajjiżi sħabha għandhom jistabbilixxu mekkaniżmi ta' monitoraġġ trasparenti, anke bil-parteċipazzjoni tal-Organizzazzjonijiet tas-Soċjetà Ċivili u l-Awtoritajiet Lokali, sabiex jiġi ggarantit li l-politiki dwar id-dritt għall-ikel jiġu implimentati kif suppost.

Fir-rigward ta' "Intejbu l-adegwatezza tan-nutriment tal-ikel konsmat", ir-Rapporteur temmen ukoll li hemm bżonn li jsir aktar biex l-attivitajiet nutrizzjonali jiġu intensifikati u biex l-interventi tad-donatur f'dan is-settur jiġu allinjati aħjar. Biex tagħti aktar importanza lill-aspett nutrizzjonali, ir-Rapporteur qed tissuġġerixxi li l-kunċett jitwessa' u li n-nozzjoni tas-sigurtà alimetari u nutrizzjonali jintuża fit-tfassil tal-politiki u l-programmi fil-ġejjieni.

Apparti l-approċċ "tad-dritt għall-ikel", ir-Rapporteur tindika li l-kunċett tas-sovranità alimentari jista' jkun utli ħafna biex il-ġuħ fid-dinja jitnaqqas b'mod sinifikanti. Il-kunċett hu ddefinit bħala d-dritt u l-kapaċità ta' pajjiż jew reġjun li demokratikament jiddeċiedu dwar il-politiki, il-prijoritajiet u l-istrateġiji agrikoli u alimentari proprji tagħhom u jimplimentawhom; il-kunċett jagħti prijorità lill-produzzjoni lokali għall-ħtiġijiet alimentari lokali u jippreżerva d-diversità tal-kulturi, l-għarfien tal-bdiewa u l-metodi ta' produzzjoni. Id-dimensjoni demokratika tal-kunċett tippermetti l-parteċipazzjoni u l-inklużjoni tal-partijiet interessati kollha li jkollhom interess u li huma affettwati mill-politiki alimentari. F'dan ir-rigward, il-metodoloġija applikata għad-Djalogu Strutturat li pprovdiet riżultati trasparenti u inkużivi tista' tintuża għall-applikazzjoni tal-kunċett tas-sovranità alimentari.

Ir-Rapporteur jiddispjaċiha li l-aspett tal-ġeneri ma ġiex żviluppat sew fil-Komunikazzjoni dwar l-isfidi tas-sigurtà tal-ikel. Waqt li ġie rikonoxxut li n-nisa jiżvolġu rwol importanti biex jintgħelbu l-isfidi tas-sigurtà alimentari, il-Komunikazzjoni ma tipprovdix analiżi reali ta' dan ir-rwol u l-miżuri li jista' jkun hemm bżonn biex jiġu appoġġati.

Ir-Rapporteur tħeġġeġ lill-UE tappoġġa b'mod qawwi l-inizjattiva tan-NU dwar livell minimu ta' protezzjoni soċjali, li tkun tgħin biex jiġu sodisfatti l-ħtiġijiet tal-ikel bażiċi tal-popolazzjonijiet foqra. Is-servizzi essenzjali (id-disponibilità u l-aċċess għas-servizzi pubbliċi) u t-traserimenti soċjali (li jitħallsu lil min hu fqir u vulnerabbli għat-tisħiħ tas-sigurtà tal-ikel u n-nutriment) huma ż-żewġ elementi ewlenin ta' għajnuna biex jitwettaq l-approċċ abbażi tad-drittijiet tal-bniedem.

Waqt li tirrikonoxxi l-elemeni pożittivi inklużi fil-Komunikazzjoni l-ġdida, ir-Rapporteur jiddispjaċiha li l-kawżi li huma l-għeruq tan-nuqqas ta' sigurtà tal-ikel ma ġewx indirizzati kif suppost.

2. Miżuri effikaċi kontra l-volatilità tal-prezzijiet tal-ikel u l-akkwist bla rażan tal-art: il-limitazzjoni tal-ispekulazzjoni fis-swieq tal-prodotti bażiċi alimentari u agrikoli

F'Marzu 2011, l-Indiċi tal-Prezzijiet tal-Ikel tal-FAO kien ta' 230 punt, 14-il punt aktar mill-ogħla livell li laħaq fl-2008 waqt il-kriżi tal-prezzijiet tal-ikel. Issa hu rikonoxxut b'mod estensiv li l-ispekulazzjoni żvolġiet rwol kruċjali l-prezzijiet faqqgħu 'l fuq fl-2008 u fiż-żidiet ta' dan l-aħħar fil-prezzijiet tal-prodotti bażiċi tal-ikel. Waqt li l-holdings fil-fondi tal-indiċi tal-prodotti bażiċi żdied minn USD 13-il biljun fl-2003 għal USD 317-il biljun fl-2008, id-domanda u l-produzzjoni bażiċi żdiedu biss b'madwar 1.4% fl-istess perjodu. Barra minn hekk, il-volatilità tal-prezz taż-żejt hi direttament marbuta mal-volatilità tal-prezzijiet tal-ikel, fatt li jqiegħed il-problema f'kuntest usa'. Għaldaqstant, kwalunkwe soluzzjoni se jkollha tqis il-komplessità tal-problema. Ir-Rapporteur temmen b'mod qawwi li għandha tingħata prijorità għolja lill-kwistjonijiet ta' madwar il-volatilità tal-prezzijiet tal-ikel. Bħala konsegwenza, ir-Rapporteur titlob li jiddaħħlu miżuri effikaċi kontra l-ispekulazzjoni bla rażan fil-prodotti bażiċi alimentari u agrikoli. Jistgħu jitqiesu soluzzjonijiet differenti bħat-trażżin tal-pożizzjonijiet tad-derivati, it-trażżin tal-possibilitajiet kummerċjali għal ċerti investituri li qed jimmiraw li jissalvagwardjaw il-produzzjoni agrikola, il-prevenzjoni tal-possibilitajiet ta' kontrokummerċ u ż-żieda kbira tat-trasparenza fis-suq u l-kummerċ agrikoli.

Hemm ukoll bżonn partikolari biex jiġi żgurat l-aċċess għar-riżorsi naturali, speċjali peress li d-dritt tal-azjendi agrikoli żgħar għall-art qed jiġi mhedded mill-akkwisti fuq skala kbira tal-art li qed isiru, b'mod partikolari, mill-investituri agrikoli barranin. L-akkwisti tal-art ta' spiss jitwettqu mingħajr il-kunsens minn qabel tal-komunitajiet lokali u b'kondiviżjoni tal-benefiċċji inadegwata jew mingħajrha. Peress li ħafna pajjiżi fil-mira huma ggvernati b'mod dgħajjef u d-dritt tal-utenti tal-art protetti b'mod dgħajjed, l-akkwisti fuq skala kbira jistgħu jżidu l-faqar fl-inħawi rurali u jistgħu jwasslu biex il-popolazzjonijiet lokali jitkeċċew. Ir-Rapporteur temmen li r-riforma agrarja u r-ridistribuzzjoni tal-art għandhom jerġgħu jiġu introdotti fid-dibattitu bħala mod biex jiġi indirizzat l-aċċess għall-art mill-azjendi agrikoli żgħar. Ir-Rapporteur temmen ukoll li l-ħtif tal-art askaptu tad-dritt għall-ikel tal-komunitajiet lokali ma jistax jiġi aċċettat u li għandha tiġi żviluppata u adottata regolamentazzjoni stretta nazzjonali u internazzjonali dwar l-akkwist tal-art.

3. Il-Koerenza tal-Politiki għall-Iżvilupp: l-impatt tal-politiki tal-UE dwar is-sigurtà alimentari globali

a) L-agrofjuwils

Ir-Rapporteur tixtieq tfakkar li s-sigurtà tal-ikel m'għandhiex tiġi pperikolata minħabba d-domanda li qed tikber għall-agrofjuwils u s-sitwazzjonijiet ta' kompetizzjoni bejn il-produzzjoni tal-ikel u l-enerġija għandhom jiġu evitati. Għalhekk, l-istrateġiji tal-UE dwar l-enerġija għandhom jiġu ffriżati sakemm ikunu ġew esklużi l-impatti negattivi possibbli tagħhom fuq il-politiki dwar is-sigurtà tal-ikel. Barra minn hekk, hemm periklu kbir ta' deforestazzjoni ulterjuri tal-foresti tropikali minħabba d-domanda li qed tikber.

b) Il-ġejjieni tal-politika tal-UE dwar l-agrikoltura (PAK)

Ir-Rapporteur qed tħeġġeġ lill-Kummissjoni tqis l-impatt estern tal-miżuri tal-PAK dwar is-sitwazzjoni tas-sigurtà tal-ikel fil-pajjiżi li qed jiżviluppaw. L-iskrutinju tal-impatt estern tat-tfassil tar-regoli taħt il-PAK dwar is-swieq internazzjonali tal-ikel u s-sigurtà tal-ikel fil-pajjiżi li qed jiżviluppaw hu u jeħtieġ li jkun fundamentali għall-obbligu tal-UE li tonora l-impenji tagħha għall-ġustizzja internazzjonali u l-qerda tal-faqar. .

Il-PAK tal-futur għandha tinkorpora u taderixxi mal-prinċipju ta' "tagħmilx ħsara" lis-swieq tal-ikel fil-pajjiżi li qed jiżviluppaw.

Ir-Rapporteur tilqa' t-tnaqqis fis-sussidji fuq l-esportazzjoni u titlob riformi ulterjuri tal-Politika Agrikola Komuni (PAK) sabiex jiġu eliminati l-miżuri kollha li għad fadal li jgħawġu l-kummerċ u sabiex il-pajjiżi li qed jiżviluppaw jitħallew joperaw b'mod kompetittiv fis-swieq nazzjonali u reġjonali proprji tagħhom.

c) L-agrikoltura u l-kummerċ

Ir-Rapporteur ittenni t-tħassib tagħha dwar l-istrateġija kummerċjali tal-UE li tiffoka fuq il-kompetizzjoni u l-aċċess għas-suq għall-prodotti tal-UE u li ma jirnexxilhiex tipprovdi approċċ favur l-iżvilupp. Għandu jitħeġġeġ tnaqqis ulterjuri tat-tariffi fuq l-importazzjonijiet agrikoli mill-pajjiżi li qed jiżviluppaw sabiex jiġi promoss il-ħolqien sostnut tal-ġid u jiġu pprovduti opportunitajiet reali ta' aċċess għas-suq għal dawk il-pajjiżi, mhux biss għall-materja prima agrikola imma anke għall-prodotti pproċessati tal-ikel. Il-pajjiżi li qed jiżviluppaw għandhom bżonn urġenti li tiġi żviluppata l-produzzjoni u l-kapaċitajiet ta' pproċessar proprji tagħhom u jinħoloq xogħol diċenti fost il-popolazzjoni lokali. Dan rekwiżit bażiku biex il-ġuħ u l-faqar jiġu miġġielda b'mod effikaċi fid-dinja. L-UE għandha tappoġġa l-iżvilupp tal-produtturi lokali u reġjonali tal-ikel u l-kapaċitajiet tagħhom għall-produzzjoni, kummerċ u kompetizzjoni fis-swieq lokali, reġjonali u nazzjonali.

F'dan il-kuntest, l-hekk imsejjaħ Kunsens ta' Washington, li hu ffukat fuq il-liberalizzazzjoni, id-deregolamentazzjoni u l-privatizzazzjoni falla. Pereżempju, il-każ ta' Ħaiti jixhed il-konsegwenzi devastanti ta' dik l-ideoloġija: waqt li Ħaiti kienet awtosuffiċjenti bir-ross fis-snin sebgħin, u kienet tapplika rata fiskali ta' 50% fuq l-importazzjonijiet tar-ross, din ir-rata naqset għal 3% wara l-2000. Bħala riżultat ta' dan, Ħaiti tilfet l-awtosuffiċjenza tagħha u l-produtturi żgħar lokali ġew eliminati peress li ma setgħux jikkompetu mal-importazzjonijiet tar-ross b'sussidji għoljin. Bill Clinton, fir-rwol tiegħu ta' Rapporteur Speċjali dwar Ħaiti, iddikjara uffiċjalment f'Marzu 2010 lil Kumitat tas-Senat tal-Istati Uniti li ntwera li din il-politika ta' liberalizzazzjoni, li ġiet promossa waqt il-presidenza tiegħu, kienet żball. Barra minn hekk, il-proposta li l-pajjiżi industrijali se jkollhom jitimgħu l-ifqar pajjiżi fil-ġejjieni mhix se taħdem fil-perspettiva tar-Rapporteur.

Ir-Rapporteur tappoġġa l-inklużjoni ta' prinċipji għas-salvagwardja tad-dritt għall-ikel fil-ftehimiet kummerċjali bejn l-UE u pajjiżi terzi. Għaldaqstant, biex id-dritt għall-ikel isir realtà, ikun kruċjali li jsiru valutazzjonijiet tal-impatt fuq id-drittijiet tal-bniedem tal-politika tal-UE dwar il-kummerċ, l-iżvilupp u l-affarijiet barranin.

SUĠĠERIMENTI

Il-Kumitat għall-Agrikoltura u l-Iżvilupp Rurali jistieden lill-Kumitat għall-Iżvilupp, bħala l-Kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

1.  Jilqa' b'sodisfazzjon il-komunikazzjoni mill-Kummissjoni dwar il-qafas ta' politika tal-Unjoni Ewropea biex jgħin lill-pajjiżi li qed jiżviluppaw jindirizzaw l-isfidi fil-qasam tas-sigurtà tal-ikel; iqis madankollu li l-kriżi alimentari dinjija tirrappreżenta mhux biss katastrofi umanitarja mingħajr preċedenti iżda wkoll theddida gravi għall-paċi u għas-sigurtà fid-dinja, u li, anki jekk jeħtieġ li lill-Kummissjoni tiġiha rikonoxxuta r-rieda li toħloq strateġiji għal soluzzjonijiet li jistgħu jsolvu l-faqar estrem ta' biljun ruħ, l-urġenza teħtieġ li l-Istati Membri jsiru immedjatament konxji biex jattivaw investimenti ġodda fl-agrikoltura u fl-iżvilupp rurali, fuq kollox minħabba t-test il-ġdid tal-PAK, li jdaħħal strumenti ad hoc għall-ġbir ta' stokkijiet dinjin kbar biżżejjed ta' prodotti tal-ikel bażiċi, ineħħu l-ostakli tagħhom stess għall-kummerċ u jtaffu d-dejn tal-aktar pajjiżi milquta; jemmen li l-Kummissjoni għandha tqis iżjed il-kwistjoni tas-sigurtà tal-ikel f'xi pajjiżi meta tikkalkula l-għajnuna għall-iżvilupp;

2.  Ifakkar li l-Unjoni Ewropea għandha tiżgura konsistenza massima bejn il-politiki tagħha ta' kooperazzjoni u ta' żvilupp u l-politiki kummerċjali tagħha, filwaqt li tqis il-ħtiġijiet u l-preokkupazzjonijiet kemm tal-Istati Membri kif ukoll tal-pajjiżi li qed jiżviluppaw;

3.  Jenfasizza li l-istabbiltà politika hija l-prerekwiżit għal iktar sigurtà tal-ikel, u għalhekk jistieden lill-partijiet kollha involuti juru r-rieda politika meħtieġa biex tiġi garantita dik l-istabbiltà;

4.  Jistieden lill-Kummissjoni, lill-Istati Membri u lid-donaturi oħra tal-għajnuna għall-iżvilupp, inklużi l-NGOs, jimmiraw l-investiment tagħhom ħafna aktar fuq is-settur agrikolu sabiex il-popolazzjoni lokali jkollha raġuni biex ma titlaqx minn fejn hi;

5.  Ifakkar li l-iżvilupp agrikolu għandu jissejjes fuq id-dritt għall-ikel u d-dritt li wieħed jipproduċi l-ikel; jinsisti li l-UE għandha tirrikonoxxi u tiddefendi l-bżonn li l-pajjiżi li qed jiżviluppaw jiksbu s-sigurtà tal-ikel (kemm f’termini kwantitattivi kif ukoll kwalitattivi), u d-dritt tagħhom li jkunu kemm jista’ jkun awtosuffiċjenti; jenfasizza f’dan ir-rigward l-impenn tal-UE li telimina gradwalment is-sussidji fuq l-esportazzjonijiet, b'mod parallel ma' ċerti miżuri li qed jittieħdu minn sħab tad-WTO; jenfasizza fl-istess waqt il-bżonn li tiġi żgurata ugwaljanza fl-aċċess għall-ikel f’dawn il-pajjiżi għall-popolazzjonijiet lokali;

6.  Itenni l-importanza tal-promozzjoni tal-agrikoltura fil-pajjiżi li qed jiżviluppaw u l-importanza li jiġi allokat sehem xieraq tal-għajnuna Ewropea għall-iżvilupp lis-settur agrikolu; jiddispjaċih li kien hemm tnaqqis kbir ħafna fil-livell ta' għajnuna għall-iżvilupp allokat għall-agrikoltura mis-snin tmenin 'l hawn u jilqa' b'sodisfazzjon ir-rikonoxximent tal-ħtieġa li din it-tendenza tinbidel; jistieden lill-Kummissjoni tagħti prijorità lill-agrikoltura fl-għajnuna għall-iżvilupp tagħha, inkluża l-għajnuna lill-bdiewa biex ikollhom aċċess għas-swieq;

7.  Jemmen li l-Unjoni Ewropea għandha tieħu passi biex iġġib l-istokkijiet dinjija tal-ikel għal li kienu, li wara li laħqu l-anqas livell tagħhom fl-2007, ikkontribwixxew għal spekulazzjoni li ilha taffettwa l-prezzijiet tal-prodotti agrikoli f'livell dinji, b'effetti allarmanti fuq il-pajjiżi li qed jiżviluppaw;

8.  Ifakkar li billi l-maġġoranza tal-aktar popolazzjonijiet fil-bżonn tgħix fuq l-agrikoltura, l-iżvilupp tax-xogħol tar-raba' tal-bdiewa u kunsiderazzjoni serja tal-valutazzjonijiet tal-IAASTD jirrappreżentaw għalhekk kundizzjoni tat-twettiq tal-Għanijiet ta' Żvilupp tal-Millennju; iqis li l-biedja fuq skala żgħira b'mod partikolari tirrappreżenta tweġiba għall-isfida dovuta għall-aċċess għal awtoprovvista tal-ikel suffiċjenti li tenfasizza, minn naħa, it-tisħiħ tar-rwol fundamentali tan-nisa, partikolarment permezz tal-ipproċessar tal-prodotti fil-post u l-ġeneralizzazzjoni tas-self u tal-mikrokrediti u, min-naħa l-oħra, l-importanza kapitali tal-kooperattivi tal-produtturi ż-żgħar fid-definizzjoni tal-politiki agrikoli kummerċjali effiċjenti;

9.  Huwa tal-fehma li, fid-dawl tal-previżjonijiet tal-FAO dwar il-popolazzjoni, li jindikaw li, sal-2025, aktar minn nofs il-popolazzjoni tad-dinja li qed tiżviluppa (madwar 3.5 miljun ruħ) se tkun qed tgħix f'żoni urbani, politika ta' appoġġ għal-ortikoltura urbana tista' toffri mod biex wieħed ma jibqax jgħix fil-faqar, meta jitqiesu l-ispejjeż baxxi inizjali, iċ-ċikli qosra tal-produzzjoni u l-ħsad kbir meta mqabbel mal-ħin ta' xogħol, minbarra l-fatt li l-bliet ġodda jsiru aktar ħodor;

10. Ifakkar fl-importanza ta' approċċ għall-governanza tas-sigurtà tal-ikel li jinvolvi qafas globali li jerġa' jqiegħed l-enfasi fuq il-politika alimentari lil hinn mill-għajnuna alimentari, fuq il-kooperazzjoni bejn id-donaturi u bejn id-donaturi u l-benefiċjarji, kif ukoll fuq ir-rwol kruċjali tal-politiki tal-pajjiżi benefiċjarji li jimpenjaw ruħhom li jipprovdu kundizzjonijiet pubbliċi bażiċi bħall-paċi interna u l-investiment fl-infrastruttura rurali;

11. Jemmen li l-UE għandha tappoġġa l-integrazzjoni reġjonali u l-iżvilupp sostenibbli tas-swieq lokali tal-ikel li ġej mis-settur agrikolu fil-pajjiżi li qed jiżviluppaw, u partikolarment ftehimiet kummerċjali reġjonali li jippromwovu l-produzzjoni vijabbli u sostenibbli u l-kapaċitajiet ta’ pproċessar fil-livell lokali, u għandha talloka parti sostanzjali tal-għajnuna tagħha għall-iżvilupp għal dan l-għan;

12. Jemmen li l-ispekulazzjoni finanzjarja u ż-żieda fil-liberalizzazzjoni fis-swieq finanzjarji u fil-kummerċ tal-prodotti agrikoli jikkontribwixxu ħafna fl-instabilità tal-prezzijiet, u li jeħtieġ li jkun hemm mekkaniżmi regolatorji li jiżguraw ċertu livell ta’ stabilità tas-suq; iqis li għandha tiżdied it-trasparenza tas-swieq biex ikun żgurat dħul ġust għall-bdiewa u settur agrikolu vijabbli li jipprovdi s-sigurtà tal-ikel; jitlob b’mod partikolari li jkun hemm identifikazzjoni ċara tal-protagonisti involuti fil-kummerċ tal-ikel u analiżi fil-fond tal-mekkaniżmi ta’ trażmissjoni tal-ispekulazzjoni fuq il-prodotti tal-ikel fis-swieq lokali u dinjija;

13. Jikkunsidra, meta jitqiesu l-popolazzjoni dinjija li kulma tmur qed tiżdied u ż-żieda fil-pressjoni fuq ir-riżorsi naturali, li huwa essenzjali li jiġu stabbiliti forom ta’ produzzjoni iktar sostenibbli, effiċjenti u li ma jaħlux ħafna enerġija fil-livell dinji; jitlob li l-allokazzjoni tal-għajnuna mill-UE u mill-Istati Membri tagħha tkun marbuta mal-iżvilupp ta’ sistemi ta’ produzzjoni agrikola sostenibbli u awtosuffiċjenti f’termini ta’ użu ta’ enerġija, u li parti minn din l-għajnuna tikkontribwixxi għat-twaqqif ta’ faċilitajiet għall-ġenerazzjoni ta’ enerġija rinnovabbli (pereżempju bbażati fuq ir-riħ u x-xemx) u ġestjoni tajba tal-ilma;

14. Jenfasizza li fil-kuntest tan-negozjati tan-NU dwar il-Fond għat-Tibdil fil-Klima, l-UE għandha tagħmel ħilitha biex tiżgura li parti sostanzjali mill-fondi allokati lill-pajjiżi li qed jiżviluppaw tintuża b'mod effikaċi biex jisaħħew il-politiki agrikoli lokali, filwaqt li jitqiesu kif xieraq l-iżvilupp soċjali u ambjentali sostenibbli;

15. Jemmen li s-sigurtà tal-ikel m’għandhiex tkun ipperikolata minħabba l-iżvilupp tal-agrofjuwils; jitlob għalhekk li jittieħed approċċ ibbilanċjat li jagħti prijorità lill-ġenerazzjoni l-ġdida ta’ agrofjuwils li jużaw skart mill-biedja u mill-forestrija (skart ta’ tiben u pjanti oħra, demel tal-annimali, bijogass, eċċ.) minflok pjanti tal-ikel, biex tiġi evitata sitwazzjoni ta’ kompetizzjoni bejn il-produzzjoni tal-ikel u l-produzzjoni tal-enerġija; iqis ukoll li l-UE għandha tiżgura li l-importazzjoni ta’ agrofjuwils minn pajjiżi li qed jiżviluppaw issir fir-rispett tal-kriterji ta’ sostenibilità;

16. Jenfasizza li l-art għandha tkun aċċessibbli għal kulħadd, u li jeħtieġ li jitħarsu d-drittijiet għal fond, tal-kera u tal-użu tal-art tal-bdiewa ż-żgħar bil-għan li jiġi evitat aktar akkapparrar tal-artijiet, kif diġà qed jiġri b'mod allarmanti f'xi reġjuni tad-dinja, speċjalment fl-Afrika;

17. Iqis li jeħtieġ li jiġi garantit li l-komunitajiet u l-istituzzjonijiet lokali jkollhom is-setgħa u l-kapaċità li jinnegozjaw sabiex ikunu jistgħu jiżguraw l-iżvilupp ta’ agrikoltura territorjali; jipproponi t-tfassil ta’ kodiċi ta’ mġiba biex l-investituri jingħataw inċentivi qawwija biex jibbażaw l-attivitajiet tagħhom fuq iż-żieda tal-produttività agrikola u tal-mezzi ta’ għajxien tal-popolazzjonijiet lokali;

18. Ifakkar li l-iżvilupp tas-settur agrikolu jeħtieġ investimenti fuq medda twila ta’ żmien, li jkopru l-katina tal-produzzjoni kollha, mill-produttur sal-konsumatur; iqis li huwa importanti li jiġu stabbiliti l-infrastrutturi meħtieġa, bħal rotot, konnessjonijiet mas-swieq u informazzjoni fir-rigward tas-swieq innifishom u fir-rigward tad-diversifikazzjoni eventwali tal-prodotti;

19. Iqis li l-UE għandha tikkontribwixxi fil-promozzjoni tal-użu ta’ żerriegħa minn varjetajiet lokali li tkun adattata għall-kundizzjonijiet klimatiċi fil-pajjiżi li qed jiżviluppaw u li tkun tista’ tinħażen, tiġi kkummerċjalizzata u fornita faċilment lill-bdiewa, peress li ma jkollhiex drittijiet tal-proprjetà intellettwali marbuta magħha;

20. Jemmen li l-Kummissjoni għandha tappoġġa l-prodotti li fihom ħafna proteini fl-Unjoni Ewropea biex l-Unjoni tingħata awtonomija akbar, biex b'hekk tikkontribwixxi għad-diversifikazzjoni tal-agrikoltura fil-pajjiżi li qed jiżviluppaw, li spiss ikollhom politiki agrikoli li joperaw purament abbażi tal-esportazzjonijiet u l-aċċess għas-swieq esterni, għad-detriment tal-benesseri u l-ħtiġijiet tal-komunitajiet lokali;

21. Iqis li politika ta' appoġġ lill-pajjiżi li qed jiżviluppaw għandha tgħaddi minn proġett edukattiv u ta' taħriġ, li joħloq l-impjiegi u jippermetti liż-żgħażagħ ikomplu l-istudji agrikoli bil-għan li jipproduċu aħjar, b'mod speċjalizzat u b'mod sostenibbli, u b'hekk jillimitaw l-eżodu miż-żoni rurali u jnaqqsu l-faqar;

22. Jenfasizza, f'dan ir-rigward, kemm huwa importanti li l-bdiewa, minbarra li jissodisfaw il-ħtiġijiet alimentari tagħhom, għandhom jiġġeneraw id-dħul li għandhom bżonn għall-edukazzjoni u l-investiment;

23. Jenfasizza li huwa kruċjali li l-organizzazzjonijiet agrikoli lokali jiġu involuti fl-istadji differenti tal-implimentazzjoni ta' politika agrikola fil-pajjiżi li qed jiżviluppaw, u li għalhekk l-Unjoni Ewropea għandha tagħmel ħilitha biex issaħħaħ lill-assoċjazzjonijiet lokali, biex tiżgura li jitħarsu l-interessi tal-komunitajiet lokali;

24. Jinsisti fuq il-bżonn ta’ tisħiħ tar-riċerka fuq il-bażi ta’ finanzjament pubbliku u tat-trażmissjoni tal-aħjar prattika u tal-għarfien lokali fil-qasam tal-agrikoltura sostenibbli, billi jiġu promossi l-attivitajiet li jsaħħu l-pożizzjoni ta' bdiewa b'impriżi żgħar fl-ottimizzazzjoni tal-produzzjoni agrikola, isir adattament għall-isfidi li jġibu t-tibdil fil-klima u d-domanda akbar fuq ir-riżorsi.

RIŻULTAT TAL-VOTAZZJONI FINALI FIL-KUMITAT