dwar il-proposta għal deċiżjoni tal-Parlament Ewropew u tal-Kunsill

dwar il-mobilizzazzjoni tal-Fond Ewropew ta' Aġġustament għall-Globalizzazzjoni, f'konformità mal-punt 28 tal-Ftehim Interistituzzjonali tas-17 ta' Mejju 2006 bejn il-Parlament Ewropew, il-Kunsill u l-Kummissjoni dwar id-dixxiplina baġitarja u l-ġestjoni finanzjarja tajba (applikazzjoni EGF/2011/001/EL/ALDI Hellas mill-Greċja)

(COM(2011)0580 – C7-0255/2011 – 2011/2200(BUD))

Il-Parlament Ewropew,

–   wara li kkunsidra l-proposta tal-Kummissjoni lill-Parlament Ewropew u lill-Kunsill (COM(2011)0580 – C7-0255/2011),

–   wara li kkunsidra l-Ftehim Interistituzzjonali tas-17 ta' Mejju 2006 bejn il-Parlament Ewropew, il-Kunsill u l-Kummissjoni dwar id-dixxiplina baġitarja u l-amministrazzjoni finanzjarja tajba (1) (IIA tas-17 ta' Mejju 2006), u b'mod partikulari l-punt 28 tiegħu,

–   wara li kkunsidra r-Regolament (KE) Nru 1927/2006 tal-Parlament Ewropew u tal-Kunsill tal-20 ta' Diċembru 2006 li jistabbilixxi l-Fond Ewropew ta' Aġġustament għall-Globalizzazzjoni(2) (ir-Regolament dwar il-FEG),

–   wara li kkunsidra l-proċedura tat-trilogu kif prevista fil-punt 28 tal-IIA tas-17 ta’ Mejju 2006,

–   wara li kkunsidra l-ittra tal-Kumitat għall-Impjiegi u l-Affarijiet Soċjali,

–   wara li kkunsidra r-rapport tal-Kumitat għall-Baġits (A7-0378/2011),

A. billi l-Unjoni Ewropea stabbiliet l-istrumenti leġiżlattivi u baġitarji xierqa biex jipprovdu appoġġ addizzjonali għall-ħaddiema li qed ibatu mill-konsegwenzi ta' bidliet strutturali kbar fix-xejriet kummerċjali dinjin u biex jiġu megħjuna jerġgħu jintegraw fis-suq tax-xogħol,

B.  billi l-ambitu tal-FEG twessa’ għall-applikazzjonijiet imressqa mill-1 ta’ Mejju 2009 biex jinkludi appoġġ għall-ħaddiema li jkunu ngħataw is-sensja b'riżultat dirett tal-kriżi finanzjarja u ekonomika globali,

C. billi l-għajnuna finanzjarja tal-Unjoni lil ħaddiema li ngħataw is-sensja għandha tkun dinamika u disponibbli kemm jista’ jkun malajr u b’mod effiċjenti, skont id-Dikjarazzjoni Konġunta tal-Parlament Ewropew, il-Kunsill u l-Kummissjoni adottata waqt il-laqgħa ta' konċiljazzjoni fis-17 ta' Lulju 2008, u b'kunsiderazzjoni xierqa għall-IIA tas-17 ta’ Mejju 2006 dwar l-adozzjoni ta' deċiżjonijiet biex jiġi mmobilizzat il-FEG,

D. billi l-Greċja talbet l-għajnuna fir-rigward tal-każ li jikkonċerna s-642 sensja, ilkoll fil-mira tal-għajnuna, f'żewġ impriżi fis-settur tal-konsumatur ("supermarket u fornitur") li joperaw fir-reġjuni tal-Maċedonja Ċentrali u l-Attika fejn kienu jinsabu l-biċċa l-kbira tal-ħwienet ALDI. Ingħataw ukoll għadd iżgħar ta' sensji f'reġjuni Griegi oħra, bħal-Lvant tal-Maċedonja-Trakja, il-Punent tal-Maċedonja, l-Epirus, il-Punent tal-Greċja, il-Greċja Kontinentali u l-Peloponnese. Mis-642 sensja, 554 seħħew matul il-perjodu ta' referenza, u 88 seħħew qablu, iżda huma eliġibbli għall-għajnuna skont l-Artiolu 3a(b) tar-Regolament (KE) Nru 1927/2006. Is-642 ħaddiem kollha li tilfu xogħolhom se jingħatw l-għajnuna mill-FEG,

E.  billi l-applikazzjoni tissodisfa l-kriterji ta' eliġibilità stabbiliti mir-Regolament FEG,

1.  Jitlob lill-istituzzjonijiet involuti jagħmlu l-isforzi meħtieġa biex itejbu l-arranġamenti proċedurali u baġitarji sabiex iħaffu l-mobilizzazzjoni tal-FEG; japprezza f'dan is-sens il-proċedura mtejba li ddaħħlet fis-seħħ mill-Kummissjoni, wara t-talba tal-Parlament biex jitħaffef ir-rilaxx tal-għotjiet, bl-għan li tiġi ppreżentata lill-awtorità baġitarja l-valutazzjoni tal-Kummissjoni dwar l-eliġibilità ta' applikazzjoni tal-FEG flimkien mal-proposta biex jiġi mmobilizzat il-Fond; jittama li jsir aktar titjib fil-proċedura fil-qafas tar-rieżamijiet imminenti tal-FEG u li jinkisbu aktar effiċjenza, trasparenza u viżibilità tal-Fond;

2.  Ifakkar fl-impenn tal-istituzzjonijiet li jiżguraw proċedura rapida u bla xkiel għall-adozzjoni tad-deċiżjonijiet dwar il-mobilizzazzjoni tal-FEG, biex jiġi pprovdut appoġġ individwali ta’ darba u limitat fiż-żmien immirat biex jgħin lill-ħaddiema li ngħataw is-sensja b’riżultat tal-globalizzazzjoni u l-kriżi finanzjarja u ekonomika; jenfasizza r-rwol li jista' jkollu l-FEG biex il-ħaddiema li jkunu ngħataw is-sensja jiġu integrati mill-ġdid fis-suq tax-xogħol, b'mod partikolari l-ħaddiema l-aktar vulnerabbli u l-anqas ikkwalifikati;

3.  Jenfasizza li, skont l-Artikolu 6 tar-Regolament FEG, għandu jkun żgurat li l-FEG jappoġġa r-reintegrazzjoni fix-xogħol tal-ħaddiema individwali li ngħataw is-sensja; barra minn hekk jenfasizza li l-assistenza mill-FEG tista' tikkofinanzja biss miżuri attivi għas-suq tax-xogħol li jwasslu għal impjiegi fit-tul; itenni li għajnuna mill-FEG m'għandhiex tieħu post azzjonijiet li huma r-responsabbiltà tal-kumpaniji skont il-liġi nazzjonali jew ftehimiet kollettivi, u lanqas miżuri ta' ristrutturazzjoni ta’ kumpaniji jew setturi; jiddeplora l-fatt li l-FEG jista’ jipprovdi inċentiv għall-kumpaniji biex jissostitwixxu l-forza tax-xogħol kuntrattwali tagħhom b’waħda aktar flessibbli u fuq perjodu qasir ta' żmien;

4.  Jinnota li l-informazzjoni pprovduta dwar il-pakkett ikkoordinat ta' servizzi personalizzati li għandu jiġi ffinanzjat mill-FEG tinkludi informazzjoni dwar il-kompatibbiltà u l-komplementarjetà ma' azzjonijiet iffinanzjati mill-Fondi Strutturali; itenni l-appell tiegħu lill-Kummissjoni biex tippreżenta evalwazzjoni komparattiva ta’ din id-data anki fir-rapporti annwali tagħha;

5.  Jilqa' l-fatt li wara talbiet ripetuti mill-Parlament, għall-ewwel darba l-baġit 2011 juri approprjazzjonijiet għall-ħlasijiet ta' EUR 47 608 950 fil-linja baġitarja 04 05 01 tal-FEG; ifakkar li l-FEG nħoloq bħala strument speċifiku separat bl-objettivi u bl-iskadenzi tiegħu stess u li għalhekk jistħoqqlu allokazzjoni ddedikata, li tevita trasferimenti minn linji baġitarji oħra, kif ġara fil-passat, li hija xi ħaġa li tista' tkun ta' ħsara għall-ilħuq tad-diversi objettivi tal-politiki;

6.  Jilqa’ t-tisħiħ previst tal-linja baġitarja tal-FEG 04.05.01. b’EUR 50 000 000 permezz tal-Baġit Emendatorju 2/2011, li se jintuża biex ikopri l-ammont meħtieġ għall-applikazzjoni preżenti;

7.  Japprova d-deċiżjoni annessa ma' din ir-riżoluzzjoni;

8.  Jagħti istruzzjonijiet lill-President tiegħu biex jiffirma din id-deċiżjoni flimkien mal-President tal-Kunsill u biex jiżgura li tiġi ppubblikata f'Il-Ġurnal Uffiċjali tal-Unjoni Ewropea;

9.  Jagħti istruzzjonijiet lill-President tiegħu sabiex jgħaddi din ir-riżoluzzjoni, flimkien mal-anness tagħha, lill-Kunsill u lill-Kummissjoni.

(1) ĠU C 139, 14.6.2006, p. 1. (2) ĠU L 406, 30.12.2006, p. 1.

ta' XXX

dwar il-mobilizzazzjoni tal-Fond Ewropew ta' Aġġustament għall-Globalizzazzjoni, f'konformità mal-punt 28 tal-Ftehim Interistituzzjonali tas-17 ta' Mejju 2006 bejn il-Parlament Ewropew, il-Kunsill u l-Kummissjoni dwar id-dixxiplina baġitarja u l-ġestjoni finanzjarja tajba (applikazzjoni EGF/2011/004 EL/ALDI mill-Greċja)

IL-PARLAMENT EWROPEW U L-KUNSILL TAL-UNJONI EWROPEA,

Wara li kkunsidraw it-Trattat dwar il-Funzjonament tal-Unjoni Ewropea,

Wara li kkunsidraw il-Ftehim Interistituzzjonali tas-17 ta’ Mejju 2006 bejn il-Parlament Ewropew, il-Kunsill u l-Kummissjoni dwar id-dixxiplina baġitarja u l- amministrazzjoni finanzjarja tajba(1), u b’mod partikolari l-punt 28 tiegħu,

Wara li kkunsidraw ir-Regolament (KE) Nru 1927/2006 tal-Parlament Ewropew u tal-Kunsill tal-20 ta' Diċembru 2006 li jistabbilixxi l-Fond Ewropew ta' Aġġustament għall-Globalizzazzjoni(2), u b’mod partikolari l-Artikolu 12(3) tiegħu,

Wara li kkunsidra l-proposta mill-Kummissjoni(3),

Billi:

(1)      Il-Fond Ewropew ta’ Aġġustament għall-Globalizzazzjoni (FEG) twaqqaf biex jipprovdi appoġġ addizzjonali għall-ħaddiema li ngħataw is-sensja minħabba bidliet strutturali kbar fix-xejriet kummerċjali dinjija dovuti għall-globalizzazzjoni u sabiex jiġu megħjuna fir-reintegrazzjoni tagħhom fis-suq tax-xogħol.

(2)      L-ambitu tal-FEG twessa’ għal applikazzjonijiet imressqa mill-1 ta’ Mejju 2009 biex jinkludi appoġġ għall-ħaddiema li ngħataw is-sensja b’riżultat dirett tal-kriżi finanzjarja u ekonomika globali.

(3)      Il-Ftehim Interistituzzjonali tas-17 ta Mejju 2006 jippermetti l-mobilizzazzjoni tal-FEG sal-limitu massimu annwali ta' EUR 500 miljun.

(4)      Il-Greċja ressqet applikazzjoni għall-mobilizzazzjoni tal-FEG, fir-rigward tas-sensji fl-intrapriża ALDI Hellas Supermarket Holding EPE & Assoc. E.E. u f’fornitur wieħed – Thessaloniki Logistics S.A. – fl-10 ta' Mejju 2011 u ssupplimentatha b'informazzjoni addizzjonali sat-22 ta' Ġunju 2011. Din l-applikazzjoni tikkonforma mar-rekwiżiti sabiex jiġu ddeterminati l-kontribuzzjonijiet finanzjarji kif stabbilit fl-Artikolu 10 tar-Regolament (KE) Nru 1927/2006. Il-Kummissjoni għalhekk qed tipproponi li timmobilizza l-ammont ta' EUR 2 918 500.

(5)      Il-FEG għandu, għalhekk, jiġi mmobilizzat sabiex jipprovdi kontribuzzjoni finanzjarja għall-applikazzjoni mressqa mill-Greċja.

ADOTTAW DIN ID-DEĊIŻJONI:

Artikolu 1

Għall-baġit ġenerali tal-Unjoni Ewropea għas-sena finanzjarja 2011, il-Fond Ewropew ta' Aġġustament għall-Globalizzazzjoni (FEG) għandu jiġi mmobilizzat biex jipprovdi s-somma ta' EUR 2 918 500 f'approprjazzjonijiet ta' impenji u ta' pagamenti.

Artikolu 2

Din id-Deċiżjoni għandha tiġi ppubblikata f'Il-Ġurnal Uffiċjali tal-Unjoni Ewropea.

Magħmul fi [Brussell/Strasburgu],

Għall-Parlament Ewropew                          Għall-Kunsill

Il-President                                                   Il-President

(1)  ĠU C 139, 14.6.2006, p. 1. (2)  ĠU L 406, 30.12.2006, p. 1. (3)  ĠU C […], […], p. […].

I. L-isfond

Il-Fond Ewropew ta' Aġġustament għall-Globalizzazzjoni nħoloq biex jipprovdi għajnuna addizzjonali lill-ħaddiema li jkunu qed ibatu mill-konsegwenzi ta' bidliet strutturali kbar fix-xejriet kummerċjali dinjija.

Skont id-dispożizzjonijiet tal-punt 28 tal-Ftehim Interistituzzjonali tas-17 ta' Mejju 2006 dwar id-dixxiplina baġitarja u l- amministrazzjoni finanzjarja tajba(1) u tal-Artikolu 12 tar-Regolament (KE) Nru 1927/2006(2), il-Fond ma jistax jaqbeż l-ammont massimu ta' EUR 500 miljun, meħud mill-marġni taħt il-limitu massimu tal-infiq globali mis-sena preċedenti, u/jew mill-approprjazzjonijiet għall-impenji kkanċellati mis-sentejn ta' qabel, esklużi dawk relatati mal-Intestatura 1b. L-ammonti xierqa jiddaħħlu fil-baġit bħala dispożizzjoni hekk kif ikunu ġew identifikati l-marġni suffiċjenti u/jew l-impenji mħassra.

Rigward il-proċedura, sabiex tattiva l-Fond, fil-każ ta’ valutazzjoni pożittiva ta’ applikazzjoni, il-Kummissjoni tippreżenta lill-awtorità baġitarja proposta għall-mobilizzazzjoni tal-Fond u, fl-istess ħin, tagħmel talba korrispondenti għat-trasferiment. B’mod parallel, jista' jiġi organizzat trilogu bil-għan li jintlaħaq qbil dwar l-użu tal-Fond u dwar l-ammonti meħtieġa. It-trilogu jista' jsir f'forma ssimplifikata.

II. Is-sitwazzjoni attwali: il-proposta tal-Kummissjoni

Fit-22 ta' Settembru 2011, il-Kummissjoni adottat proposta ġdida għal deċiżjoni dwar il-mobilizzazzjoni tal-FEG favur il-Greċja sabiex il-ħaddiema li ngħataw is-sensja minħabba l-kriżi finanzjarja u ekonomika globali jiġu megħjuna fir-reintegrazzjoni tagħhom fis-suq tax-xogħol.

Din hija t-tmintax-il applikazzjoni li se tiġi eżaminata fil-baġit 2011 u tirreferi għall-mobilizzazzjoni ta' ammont globali ta' EUR 2 918 500 mill-FEG għall-Greċja. Tikkonċerna 642 sensja, li kollha se jingħataw l-għajnuna, f'żewġ impriżi fis-settur tal-konsumatur ("supermarket u fornitur") li joperaw fir-reġjuni tal-Maċedonja Ċentrali u l-Attika u f'reġjuni Griegi oħra, bħal-Lvant tal-Maċedonja-Trakja, il-Punent tal-Maċedonja, l-Epirus, il-Punent tal-Greċja, il-Greċja Kontinentali u l-Peloponnese matul il-perjodu ta' referenza ta' ħames xhur mill-4 ta' Novembru 2010 sal-4 ta' Marzu 2011; 88 minnhom seħħew qabel il-perjodu ta' referenza, iżda huma marbuta mal-istess proċedura ta' sensji kollettivi u mal-avveniment li wassal għas-sensji matul il-perjodu ta' referenza.

L-applikazzjoni, il-każ EGF/2011/004 EL/ALDI mill-Greċja, tressqet lill-Kummissjoni fl-10 ta' Mejju 2011 u ġiet issupplementata b'informazzjoni addizzjonali sat-22 ta' Ġunju 2011. Kienet ibbażata fuq il-kriterju ta’ intervent tal-Artikolu 2(a) tar-Regolament dwar l-FEG li jirrikjedi mill-inqas 500 sensja fuq perjodu ta’ erba’ xhur f’intrapriża fi Stat Membru, inklużi ħaddiema li jingħataw is-sensja mill-fornituri tagħha jew mill-produtturi involuti fi stadji ulterjuri tal-produzzjoni.

Wieħed mill-kriterji għall-valutazzjoni tal-Kummissjoni kienet l-evalwazzjoni tar-rabta bejn is-sensji u l-bidliet strutturali kbar fix-xejriet tal-kummerċ dinji jew il-kriżi finanzjarja, li f’dan il-każ partikolari l-Greċja ssostni li l-kriżi ekonomika u finanzjarja kellha konsegwenzi devastanti għal-ekonomija Griega. Kien hemm ukoll tnaqqis fl-introjtu medju fis-settur privat. Effett immedjat tat-tnaqqis fl-introjtu kien tnaqqis fil-konsum. Fl-2009, iċ-ċifri finali privati tan-nefqa tal-konsumatur għall-Greċja segwew l-istess xejra negattiva bħall-medja tal-UE 27. Fl-2007, kie hemm irkupru fil-konsum privat fil-livell tal-UE 27 filwaqt li t-tnaqqis fil-konsum privat fil-Greċja kien akbar milli kien fis-sena ta' qabel. It-tnaqqsi fil-konsum privat affettwa severament lis-settur tal-konsumatur u b'mod partikulari lis-supermarkets.

Fis-16 ta' Lulju 2010, il-kumpanija ħabbret li ma kienx possibbli tilħaq ekonomiji tal-kobor – minħabba l-kundizzjonijiet tas-suq li rriżultaw mill-kriżi – u l-intenzjonijiet sussegwenti tagħha li twaqqaf kwalunkwe attività marbuta mal-implimentazzjoni tal-pjan strateġiku fuq għaxar snin u li tagħlaq il-ħwienet kollha tagħha, aħbar li la l-ħaddiema u lanqas l-awtoritajiet Griegi ma kienu lesti għaliha.

Il-pakkett ikkoordinat tas-servizzi personalizzati li jridu jiġu ffinanzjati, inkluża l-kompatibilità tiegħu mal-azzjonijiet iffinanzjati mill-Fondi Strutturali, jinkludi miżuri favur:

· Gwida dwar ix-xogħol u għajnuna għat-tfittix ta' impjieg: Din tinkludi sessjoni ta' merħba/informazzjoni individwali; it-tfassil ta’ profili; sessjonijiet ta' żvilupp personali u tal-karriera – inklużi l-iżvilupp tal-ħiliet, gwida dwar il-karriera u tekniki għat-tfittix ta' impjieg;

· Taħriġ u taħriġ mill-ġdid: Din il-miżura tinkludi valutazzjoni tal-ħtiġijiet ta' taħriġ tal-ħaddiema konċernati u t-taħriġ sussegwenti;

· Kontribuzzjoni biex jinfetaħ negozju: Il-ħaddiema li jiftħu n-negozju tagħhom jingħataw sa EUR 20 000 bħala kontribuzzjoni biex jiġu koperti l-ispejjeż tal-istabbiliment;

· Allowance għat-tfittix ta' impjieg: L-għan tagħha huwa li tgħin lill-ħaddiem ifittex impjieg b'mod attiv;

· Allowance għall-mobbiltà u kontribuzzjoni għall-ispejjeż tal-ivvjaġġar: Bħala kontribuzzjoni għall-ispejjeż tal-ivvjaġġar, il-ħaddiema li jipparteċipaw fil-miżuri jirċievu ammont ta' EUR 15 għal kull jum ta' parteċipazzjoni;

Fir-rigward tal-kriterji li jinsabu fl-Artikolu 6 tar-Regolament (KE) Nru 1927/2006, l-awtoritajiet Griegi fl-applikazzjoni u l-informazzjoni supplementari tagħhom:

•  ikkonfermaw li l-kontribuzzjoni finanzjarja mill-FEG ma tissostitwixxix il-miżuri li huma r-responsabbiltà tal-kumpaniji skont il-liġi nazzjonali jew skont ftehimiet kollettivi;

•  urew li l-azzjonijiet jipprovdu appoġġ għal ħaddiema individwali u ma għandhomx jintużaw għar-ristrutturar ta’ kumpaniji jew setturi;

•  ikkonfermaw li l-azzjonijiet eliġibbli msemmija hawn fuq ma jirċevux assistenza minn strumenti finanzjarji oħrajn tal-UE.

Fir-rigward tas-sistemi ta' ġestjoni u kontroll il-Greċja nnotifikat lill-Kummissjoni li l-kontribuzzjoni finanzjarja se tkun ġestita u kkontrollata mill-istess entitajiet bħall-finanzjament mill-Fond Soċjali Ewropew (FSE) fil-Greċja. L-Awtorità għall-Koordinazzjoni u l-Monitoraġġ tal-Azzjonijiet tal-FSE (EYSEKT) isservi bħala awtorità ta' ġestjoni u l-EDEL (il-Kumitat għall-Verifika Fiskali) bħala awtorità ta' kontroll.

Bi qbil mal-valutazzjoni tal-Kummissjoni, l-applikazzjoni tissodisfa l-kriterji tal-eliġibilità stabbiliti fir-Regolament FEG u jirrakkomanda lill-Awtorità Baġitarja tapprova l-applikazzjoni.

Sabiex timmobilizza l-Fond, il-Kummissjoni ppreżentat lill-Awtorità Baġitarja talba ta’ trasferiment għal ammont globali ta' EUR 2 918 500 mir-riserva tal-FEG (40 02 43) f’impenji għal-linja baġitarja 04 05 01 tal-FEG.

Ir-Rapporteur tilqa' l-fatt li, wara talbiet ripetuti mill-Parlament, għall-ewwel darba l-baġit 2011 juri approprjazzjonijiet għall-ħlasijiet (EUR 47 608 950) fil-linja baġitarja tal-FEG u tilqa’ t-tisħiħ tal-linja baġitarja 04.05.01. b’EUR 50 000 000 kif previst bl-AB 2/2011.

Fil-fatt tfakkar li l-FEG inħoloq bħala strument speċifiku separat bl-objettivi u bl-iskadenzi tiegħu stess u li għalhekk jistħoqqlu allokazzjoni ddedikata, li tevita trasferimenti minn linji baġitarji oħrajn - kif ġara fil-passat - li hija xi ħaġa li tista' tkun ta' ħsara għall-ilħiq tal-objettivi ta’ politika diversi.

L-IIA jippermetti l-mobilizzazzjoni tal-Fond sal-limitu massimu annwali ta’ EUR 500 miljun.

Din hija t-tmintax-il proposta għall-mobilizzazzjoni tal-Fond imressqa lill-Awtorità Baġitarja fl-2011. Għaldaqstant, wara li jitnaqqas mill-approprjazzjonijiet disponibbli l-ammont attwali mitlub (EUR 2 918 500), jibqa' disponibbli ammont ta' EUR 412 401 361 sa tmiem l-2011. Dan se jippermetti li aktar minn 25% tal-ammont annwali massimu allokat għall-FEG jibqa' disponibbli għal allokazzjonijiet matul l-aħħar erba' xhur tas-sena 2011, kif jirrikjedi l-Artikolu 12(6) tar-Regolament dwar il-FEG.

III. Proċedura

Il-Kummissjoni ppreżentat talba ta' trasferiment sabiex iddaħħal approprjazzjonijiet għall-impenji speċifiċi fil-baġit 2011, kif mitlub mill-Punt 28 tal-Ftehim Interistituzzjonali tas-17 ta' Mejju 2006.

It-trilogu dwar il-proposta tal-Kummissjoni għal deċiżjoni dwar il-mobilizzazzjoni tal-FEG jista' jieħu forma simplifikata, kif previst fl-Artikolu 12(5) tal-bażi legali, ħlief jekk ma jintlaħaqx qbil bejn il-Parlament u l-Kunsill.

Skont ftehim intern, il-Kumitat għall-Impjiegi u l-Affarijiet Soċjali (EMPL) għandu jkun assoċjat fil-proċess, sabiex jipprovdi appoġġ u kontribut kostruttivi għall-valutazzjoni tal-applikazzjonijiet mill-Fond.

Wara l-valutazzjoni tiegħu, il-Kumitat EMPL tal-Parlament Ewropew jagħti l-opinjoni tiegħu dwar il-mobilizzazzjoni tal-Fond, li sejra tinhemeż bħala ittra mar-rapport preżenti.

Id-Dikjarazzjoni Konġunta tal-Parlament Ewropew, il-Kunsill u l-Kummissjoni, adottata waqt il-laqgħa ta' konċiljazzjoni tas-17 ta' Lulju 2008, ikkonfermat l-importanza li tiġi żgurata proċedura rapida bir-rispett dovut għall-Ftehim Interistituzzjonali għall-adozzjoni tad-deċiżjonijiet dwar il-mobilizzazzjoni tal-Fond.

(1) ĠU C 139, 14.6.2006, p. 1. (2) ĠU L 406, 30.12.2006, p. 1.

EK/jm

D(2011)49869

Sur Alain Lamassoure

President tal-Kumitat għall-Baġits

ASP 13E158

Suġġett: Opinjoni dwar il-mobilizzazzjoni tal-Fond Ewropew ta' Aġġustament għall-Globalizzazzjoni (FEG) għall-każ EGF/2011/004 EL/ALDI Hellas mill-Greċja (COM(2011)580 finali)

Sur President,

Il-Kumitat għall-Impjiegi u l-Affarijiet Soċjali (EMPL), kif ukoll il-Grupp ta' Ħidma tiegħu dwar il-FEG, eżamina l-mobilizzazzjoni tal-FEG għall-każ EGF/2011/004 EL/ALDI Hellas u adotta l-opinjoni li ġejja.

Il-Kumitat EMPL u l-Grupp ta' Ħidma dwar il-FEG huma favur il-mobilizzazzjoni tal-Fond rigward din it-talba. F'dan ir-rigward, il-Kumitat EMPL qed jippreżenta xi kummenti mingħajr, madankollu, ma jqajjem dubju dwar it-trasferiment tal-ħlasijiet.

Il-deliberazzjonijiet tal-Kumitat EMPL huma bbażati fuq il-kunsiderazzjonijiet li ġejjin:

A)  billi din l-applikazzjoni hija bbażata fuq l-Artikolu 2(a) tar-Regolament dwar il-FEG u tidentifika għall-għajnuna 642 ħaddiem issensjat, inklużi 554 ħaddiem issensjati matul il-perjodu ta’ referenza, l-4 ta’ Ottubru 2011 sal-4 ta’ Marzu 2011, fil-kumpanija ALDI Hellas Supermarket Holding u l-fornitur tagħha Thessaloniki Logistics u 88 ħaddiem li tkeċċew qabel u wara l-perjodu ta’ referenza f’ALDI Hellas;

B)  billi l-awtoritajiet Griegi jsostnu li s-sensji ġew ikkawżati mill-kriżi finanzjajra u ekonomika dinjija li kellha effett katastrofiku fuq l-ekonomija Griega, b’tali mod li kkawżat tnaqqis gravi fid-dħul medju taċ-ċittadini Griegi u wasslet għal livelli baxxi ta’ konsum privat (tnaqqis li laħaq 8.6% fl-aħħar tliet xhur tal-2010);

C)  billi l-industrija tal-imnut Griega ntlaqtet b’mod gravi mit-tnaqqis tad-domanda u sfat vittma ta’ fallimenti u takeovers hekk kif il-fatturat globali tagħha naqas b’EUR 0.6 biljun bejn l-2009 u l-2010;

D)  billi l-awtoritajiet Griegi jispjegaw li ALDI Hellas, minkejja li żviluppat pjan strateġiku ta’ għaxar snin biex tiftaħ sa 400 stabbiliment fil-Greċja, irreġistrat telf kumulattiv ta’ kważi EUR 182 miljun bejn l-2005 u l-2010 (bl-2008 u l-2009 jirrappreżentaw 58% ta’ dan it-telf); billi ALDI Hellas fis-16 ta’ Lulju 2010 ħabbret li, minħabba deterjorament tal-kundizzjonijiet tas-suq, kienet se twaqqaf l-implimentazzjoni tal-pjan u tagħlaq l-istabbiimenti kolha eżistenti;

E)  billi 24.1% tal-ħaddiema inklużi fil-miżuri huma rġiel u 75.9% huma nisa; billi 93% tal-ħaddiema għandhom bejn 25 u 54 sena;

F)  billi 80% tal-ħaddiema temmew l-edukazzjoni sekondarja u 20% temmew l-edukazzjoni postsekondarja; billi l-kaxxiera, il-ħaddema tat-tindif u l-impjegati ta’ dmirijiet ġenerali jikkostitwixxu 69.9% tal-ħaddiema ssensjati, maniġers u kontabili tal-livell medju jikkostitwixxu 24.9% u diretturi 5%.

G)  billi l-baġit tal-UE għall-2011 għall-ewwel darba jinkludi approprjazzjonijiet għall-ħlasijiet fil-linja baġitarja 04 05 01 tal-FEG li jissostitwixxu t-trasferiment ta’ ħlasijiet minn linji baġitarji oħra li ma jkunux intużaw;

Għaldaqstant, il-Kumitat għall-Impjiegi u l-Affarijiet Soċjali jistieden lill-Kumitat għall-Baġits, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu dwar l-applikazzjoni rigward ALDI Hellas:

1.  Jaqbel mal-Kummissjoni li l-kundizzjonijiet stipulati fl-Artikolu 2(a) tar-Regolament FEG (1927/2006) huma ssodisfati u li, għalhekk, il-Greċja hija intitolata għal kontribuzzjoni finanzjarja skont dan ir-Regolament;

2.  Jieħu nota li din hija l-ewwel darba li l-awtoritajiet Griegi applikaw għal għajnuna finanzjarja disponibbli fil-qafas tal-FEG; jirrimarka li din l-applikazzjoni tressqet fl-10 ta’ Mejju 2011 u li l-valutazzjoni sħiħa tagħha saret disponibbli mill-Kumissjoni Ewropea fit-22 ta’ Settembru 2011;

3.  Jinnota li s-sensji affettwaw l-aktar ir-reġjuni tal-Maċedonja Ċentrali u l-Attika, li l-kriżi laqtithom severament u li rreġistraw rati tal-qgħad li laħqu kważi 18% fl-2010;

4.  Jieħu nota li ALDI Hellas kienet involuta f’negozjati biex tbigħ l-istabbilimenti tagħha, u għaldaqstant jiddispjaċih li l-eżitu ta’ dawk in-negozjati ma kienx inkluż fil-proposta tal-Kummissjoni; jistaqsi jekk il-ħaddiema ssenjsati minn ALDI Hellas jistgħux possibbilment isibu impjiegi mal-proprjetarju l-ġdid tal-istabbilimenti;

5.  Jinnota li l-pakkett koordinat propost ta’ servizzi personalizzati li jikkonsisti fi gwida tax-xogħol u għajnuna fit-tfittix tal-impjiegi, taħriġ u taħriġ mill-ġdid, kontribuzzjoni għall-ftuħ ta’ negozju, allowance għat-tfittix ta' impjieg u allowance għall-mobbiltà, tfassal f’kollaborazzjoni mas-sħab soċjali, inkluż ir-rappreżetant tal-ħaddiema ssensjati;

6.  Jilqa’ l-fatt li l-miżuri għandhom l-għan li joffru passaġġ individwali lejn l-impjieg u li huma maħsuba biex jaqdu l-ħtiġijiet tan-negozji lokali, kif ukoll biex jipprovdu taħriġ f’ħiliet trasversali (eż. ICT); madankollu, jiddispjaċih li ma ngħatawx aktar dettalji (settorjali) rigward it-tipi ta’ taħriġ;

7.  Jirrimarka li l-kontribuzzjoni tal-FEG għal kull ħaddiem se tammonta għal EUR 4 546, li hija nefqa moderata meta mqabbla ma’ applikazzjonijiet oħra tal-FEG.

Dejjem tiegħek,

Pervenche Berès