dwar il-kwittanza għall-implimentazzjoni tal-baġit ġenerali tal-Unjoni Ewropea għas-sena finanzjarja 2010, Taqsima IX - Il-Kontrollur Ewropew għall-Protezzjoni tad-Data

(COM(2011)0473 – C7-0264/2011 – 2011/2209(DEC))

Il-Parlament Ewropew,

–   wara li kkunsidra l-baġit ġenerali tal-Unjoni Ewropea għas-sena finanzjarja 2010(1),

–   wara li kkunsidra l-kontijiet annwali tal-Unjoni Ewropea għas-sena finanzjarja 2010 (COM(2011)0473 – C7-0264/2011)(2),

–   wara li kkunsidra r-rapport annwali tal-Kontrollur Ewropew għall-Protezzjoni tad-Data għall-awtorità ta' kwittanza dwar il-verifiki interni mwettqa fis-sena 2010,

–   wara li kkunsidra r-rapport annwali tal-Qorti tal-Awdituri dwar l-implimentazzjoni tal-baġit għas-sena finanzjarja 2010, flimkien mat-tweġibiet tal-istituzzjonijiet(3),

–   wara li kkunsidra d-dikjarazzjoni ta' assigurazzjoni(4) dwar l-affidabilità tal-kontijiet kif ukoll il-legalità u r-regolarità tat-tranżazzjonijiet li fuqhom hija bbażata, ipprovduta mill-Qorti tal-Awdituri għas-sena finanzjarja 2010 skont l-Artikolu 287 tat-Trattat dwar il-Funzjonament tal-Unjoni Ewropea,

–   wara li kkunsidra l-Artikolu 314(10), u l-Artikoli 317, 318 u 319 tat-Trattat dwar il-Funzjonament tal-Unjoni Ewropea,

–   wara li kkunsidra r-Regolament tal-Kunsill (KE, Euratom) Nru 1605/2002 tal-25 ta' Ġunju 2002 dwar ir-Regolament Finanzjarju applikabbli għall-baġit ġenerali tal-Komunitajiet Ewropej(5), u b'mod partikulari l-Artikoli 50, 86, 145, 146 u 147 tiegħu,

–   wara li kkunsidra l-Artikolu 77 u l-Anness VI tar-Regoli ta’ Proċedura tiegħu,

–   wara li kkunsidra r-rapport tal-Kumitat għall-Kontroll tal-Baġit u l-opinjoni tal-Kumitat għal-Libertajiet Ċivili, il-Ġustizzja u l-Intern (A7-0093/2012),

1.  Jagħti l-kwittanza lill-Kontrollur Ewropew għall-Protezzjoni tad-Data dwar l-implimentazzjoni tal-baġit għas-sena finanzjarja 2010;

2.  Jippreżenta l-kummenti tiegħu fir-riżoluzzjoni t'hawn taħt;

3.  Jagħti istruzzjonijiet lill-President tiegħu biex jgħaddi din id-deċiżjoni u r-riżoluzzjoni li hi parti integrali minnha lill-Kunsill, lill-Kummissjoni, lill-Qorti tal-Ġustizzja tal-Unjoni Ewropea, lill-Qorti tal-Awdituri, lill-Ombudsman Ewropew u lill-Kontrollur Ewropew għall-Protezzjoni tad-Data, u biex jiżgura li tiġi ppubblikata fil-Ġurnal Uffiċjali tal-Unjoni Ewropea (serje L).

2. MOZZJONI GĦAL RIŻOLUZZJONI TAL-PARLAMENT EWROPEW

li tinkludi kummenti li jagħmlu parti integrali mid-deċiżjoni dwar il-kwittanza għall-implimentazzjoni tal-baġit ġenerali tal-Unjoni Ewropea għas-sena finanzjarja 2010, Taqsima IX - Il-Kontrollur Ewropew għall-Protezzjoni tad-Data

(COM(2011)0473 – C7-0264/2011 – 2011/2209(DEC))

Il-Parlament Ewropew,

–   wara li kkunsidra l-baġit ġenerali tal-Unjoni Ewropea għas-sena finanzjarja 2010(6),

–   wara li kkunsidra l-kontijiet annwali tal-Unjoni Ewropea għas-sena finanzjarja 2010 (COM(2011)0473 – C7-0264/2011)(7),

–   wara li kkunsidra r-rapport annwali tal-Kontrollur Ewropew għall-Protezzjoni tad-Data (KEPD) għall-awtorità ta' kwittanza dwar il-verifiki interni mwettqa fis-sena 2010,

–   wara li kkunsidra r-rapport annwali tal-Qorti tal-Awdituri għas-sena 2010 dwar l-implimentazzjoni tal-baġit għas-sena finanzjarja 2010, flimkien mat-tweġibiet tal-istituzzjonijiet(8),

–   wara li kkunsidra d-dikjarazzjoni ta' assigurazzjoni(9) dwar l-affidabilità tal-kontijiet kif ukoll il-legalità u r-regolarità tat-tranżazzjonijiet li fuqhom hija bbażata, ipprovduta mill-Qorti tal-Awdituri għas-sena finanzjarja 2010 skont l-Artikolu 287 tat-Trattat dwar il-Funzjonament tal-Unjoni Ewropea,

–   wara li kkunsidra l-Artikolu 314(10), u l-Artikoli 317, 318 u 319 tat-Trattat dwar il-Funzjonament tal-Unjoni Ewropea,

–   wara li kkunsidra r-Regolament tal-Kunsill (KE, Euratom) Nru 1605/2002 tal-25 ta' Ġunju 2002 dwar ir-Regolament Finanzjarju applikabbli għall-baġit ġenerali tal-Komunitajiet Ewropej(10), u b'mod partikulari l-Artikoli 50, 86, 145, 146 u 147 tiegħu,

–   wara li kkunsidra l-Artikolu 77 u l-Anness VI tar-Regoli ta’ Proċedura tiegħu,

–   wara li kkunsidra r-rapport tal-Kumitat għall-Kontroll tal-Baġit u l-opinjoni tal-Kumitat għal-Libertajiet Ċivili, il-Ġustizzja u l-Intern (A7-0093/2012),

1.  Jinnota li, fir-rapport annwali tagħha għall-2010, il-Qorti tal-Awdituri osservat li: "Waqt li n-natura speċjalizzata tal-funzjonijiet magħmula mill-Uffiċċju KEPD tista’ tiġġustifika l-organizzazzjoni ta’ kompetizzjoni interna [organizzata fl-oqsma legali, teknoloġiċi, tar-riżorsi umani u l-assistenza amministrattiva fl-2009], din il-politika m’għandhiex tiġi kkunsidrata bħala n-norma. L-aħjar prattika hija li jintużaw is-servizzi tal-Uffiċċju Ewropew għall-Għażla tal-Persunal (EPSO), li jorganizza kompetizzjonijiet miftuħa fuq bażi regolari." (punt 7.32.);

2.  Huwa sodisfatt li fl-2009-2010 l-KEPD organizza, b'kooperazzjoni stretta mal-EPSO, kompetizzjoni ġenerali fil-qasam tal-protezzjoni tad-data biex jirrekluta persunal speċjalizzat ħafna;

3.  Jilqa' l-fatt li l-Qorti tal-Awdituri stmat li, abbażi tax-xogħol tal-awditjar tagħha, il-pagamenti għas-sena li ntemmet fil-31 ta' Diċembru 2010 għan-nefqa amministrattiva u nefqa oħra tal-istituzzjonijiet u tal-korpi kienu kumplessivament ħielsa minn żbalji materjali; jinnota li l-iktar żball probabli kien stmat, fil-qasam tal-"ispejjeż amministrattivi", li kien ġeneralment ta' 0,4% (paragrafi 7.9. , 7.10. u 7.32.);

4.  Ifakkar li l-Qorti tal-Awdituri kienet talbet lill-KEPD, waqt l-eżerċizzju 2009, biex jistieden lill-membri tal-persunal tiegħu jipproduċu, f'intervalli regolari, id-dokumenti li juru s-sitwazzjoni personali tagħhom; jinnota li sadanittant il-KEPD ikkoreġa l-iżbalji li nstabu fil-qafas tad-dikjarazzjoni ta' assigurazzjoni tal-2009 fl-2010 u l-2011, u stabilixxa strumenti li jippermettulu jtejjeb il-ġestjoni tal-allowances; jenfasizza li l-Qorti tal-Awdituri se tivverifika l-progress fir-rapport annwali tagħha għall-2011;

5.  Jinnota li fl-2010, il-KEPD kellu approprjazzjonijiet ta' impenn ta' total ta' 7 104 351 EUR (7 000 000 EUR fl-2009), u li r-rata ta' implimentazzjoni ta' dawn l-approprjazzjonijiet kienet ta' 82,73 % (81,44 % fl-2009); jenfasizza li l-baġit tal-KEPD huwa purament amministrattiv, bl-ispiża tkun ta' 65% għall-persuni marbuta mal-istituzzjoni (intestatura 1) u 35% għall-bini, l-għamara, it-tagħmir u spejjeż operazzjonali mixellanji (intestatura 2);

6.  Jistieden lill-KEPD jipprepara baġits annwali li jaqblu mal-bżonnijiet tiegħu (mill-intestatura 1 intużaw biss 75% fl-2010) u biex jiżgura implimentazzjoni aħjar tal-baġit (punt 7.35.);

7.  Jinnota b'sodisfazzjon li r-rakkomandazzjonijiet li saru fir-rapporti tal-Qorti tal-Awdituri u tal-Kummissjoni dwar l-eżerċizzju 2009 kienu implimentati kif ġej:

–   sistema interna ġdida ta' verifika finanzjarja żdiedet mal-pjan finanzjarju marbut mal-fluss tax-xogħol (workflow),

–   kien innominat konsulent dwar il-kontabilità,

–   iddaħħal reġistru ċentrali għall-eċċezzjonijiet, u

–   qed tiġi adottata sistema ta' verifika a posteriori;

8.  Jieħu nota tal-bidliet profondi introdotti fl-organizzazzjoni tal-persunal fl-2010 u jitlob li jkun infurmat dwar ir-riżultati tat-tabella tal-persunal il-ġdida; f'dan il-kuntest, japprezza li l-KEPD jinkludi fir-rapport annwali dwar l-attività tiegħu wkoll is-segwitu għar-rakkomandazzjonijiet tal-Parlament;

9.  Jinnota li l-istabbiliment ta' sistema elettronika sigura tal-ġestjoni tal-każijiet tikkostitwixxi progress; jixtieq ikun infurmat dwar l-iżviluppi fir-rapport annwali dwar l-attività li jmiss;

10. Jinnota li l-KEPD se jistabbilixxi sistema ta' indikaturi tal-prestazzjoni ewlenin fil-pjan ta' ġestjoni għas-sena 2012, kif ukoll tabella ta' valutazzjoni li se tippermetti l-kejl tal-isforzi tas-servizz bis-saħħa ta' sistema ta' benchmarking; dan il-pjan se jkun evalwat bħala parti mir-rapport ta' attività annwali għall-2012;

11. Jinnota li r-rapport annwali tal-attivitajiet għas-sena 2011 se jkun fih kapitolu dwar is-segwitu tar-riżoluzzjoni dwar il-kwittanza tal-Parlament;

12. Jittama li rapport annwali dwar l-attività għas-sena 2011 jinkludi wkoll tabella komprensiva tar-riżorsi umani kollha għad-dispożizzjoni tal-Kontrollur, imqassma skont il-kategorija, il-grad, il-ġeneru, il-parteċipazzjoni fit-taħriġ professjonali u n-nazzjonalità.

10.2.2012

OPINJONI tal-Kumitat għal-Libertajiet Ċivili, il-Ġustizzja u l-Intern

għall-Kumitat għall-Kontroll tal-Baġit

dwar il-kwittanza fir-rigward tal-implimentazzjoni tal-baġit tal-Kontrollur Ewropew għall-Protezzjoni tad-Data għas-sena finanzjarja 2010

(C7-0264/2011 - 2011/2209(DEC))

Rapporteur: Simon Busuttil

SUĠĠERIMENTI

Il-Kumitat għal-Libertajiet Ċivili, il-Ġustizzja u l-Intern jistieden lill-Kumitat għall-Kontroll tal-Baġit, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

1.  Jilqa' l-konklużjoni tal-Qorti tal-Awdituri li l-ħlasijiet globali għas-sena li ntemmet fil-31 ta' Diċembru 2010 għal infiq amministrattiv u infiq ieħor tal-Kontrollur Ewropew għall-Protezzjoni tad-Data (KEPD) kienu ħielsa minn żbalji materjali u li s-sistemi ta' kontroll u ta' superviżjoni għal infiq amministrattiv jew infiq ieħor kienu effettivi biex jiżguraw ir-regolarità tal-ħlasijiet;

2.  Jinnota l-kumment tal-Qorti tal-Awdituri dwar l-organizzazzjoni ta' kompetizzjoni interna u r-risposta tal-KEPD; itenni li l-kompetizzjonijiet organizzati mill-Uffiċċju Ewropew għas-Selezzjoni tal-Persunal għandhom jibqgħu n-norma għar-reklutaġġ tal-persunal; jistieden lill-KEPD biex isaħħaħ l-ippjanar tar-riżorsi umani sabiex jiġu evitati sitwazzjonijiet simili;

3.  Jinnota u jappoġġa l-miżuri li ttieħdu għall-monitoraġġ fil-waqt tad-dokumenti li jiċċertifikaw iċ-ċirkostanzi individwali tal-persunal tal-KEPD, għall-finijiet tal-benefiċċji soċjali;

4.  Jinnota li l-kwittanza għall-implimentazzjoni tal-baġit tal-KEPD għandha tkompli tkun ibbażata fuq il-prestazzjoni tiegħu matul is-sena.

RIŻULTAT TAL-VOTAZZJONI FINALI FIL-KUMITAT

RIŻULTAT TAL-VOTAZZJONI FINALI FIL-KUMITAT

(1) ĠU L 64, 12.3.2010. (2) ĠU C 332, 14.11.2011, p. 1. (3) ĠU C 326, 10.11.2011, p. 1. (4) ĠU C 332, 14.11.2011, p. 134. (5) ĠU L 248, 16.9.2002, p. 1. (6) ĠU L 64, 12.3.2010. (7) ĠU C 332, 14.11.2011, p. 1. (8) ĠU C 326, 10.11.2011, p. 1. (9) ĠU C 332, 14.11.2011, p. 134. (10) ĠU L 248, 16.9.2002, p. 1.